ព័ត៌មានជាតិ

ឯកឧត្ដម ហ៊ុន ម៉ានី ជឿជាក់ថា ក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ មានការតាំងចិត្តខ្ពស់ អនុវត្តការងារប្រកបដោយប្រសិទ្ធភាព

បានផុស

៦ ខែ មុន

នៅ

ថ្ងៃអង្គារ ២៦ ធ្នូ ២០២៣

ដោយ

ឯកឧត្ដម ហ៊ុន ម៉ានី ប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ស្ពឺ ជឿជាក់ថា ក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ មានការតាំងចិត្តខ្ពស់ក្នុងការអនុវត្តការងារនៅមូលដ្ឋានប្រកបដោយប្រសិទ្ធភាព និងប្រសិទ្ធផលខ្ពស់ជូនប្រទេសជាតិ និងប្រជាជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្ដម ហ៊ុន ម៉ានី ប្រធានក្រុមការងាររាជរដ្ឋាភិបាល ចុះមូលដ្ឋានខេត្តកំពង់ស្ពឺ ជឿជាក់បែបនេះ ក្នុងឱកាស ឯកឧត្ដម អញ្ជើញចូលរួមជាអធិបតីក្នុង«កិច្ចប្រជុំផ្សព្វផ្សាយសេចក្ដីសម្រេចរបស់រាជរដ្ឋាភិបាលកម្ពុជាស្ដីពីការចាត់តាំងសមាសភាពក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ» កាលពីថ្ងៃទី ២៥ ខែធ្នូ ឆ្នាំ ២០២៣។

នាឱកាសនោះ ឯកឧត្ដម ហ៊ុន ម៉ានី បានលើកឡើងថា ចេញពីស្មារតី និងសេចក្ដីណែនាំដែលមានក្នុងកិច្ចប្រជុំនាថ្ងៃនេះ ឯកឧត្ដម ជឿជាក់ថា «ក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ប្រាកដជាមានការតាំងចិត្តខ្ពស់ក្នុងនាមជាសេនាធិការរបស់រាជរដ្ឋាភិបាលក្នុងការអនុវត្តការងារនៅមូលដ្ឋានប្រកបដោយប្រសិទ្ធភាព និងប្រសិទ្ធផលខ្ពស់ជូនប្រទេសជាតិ និងប្រជាជន»។

ជាមួយគ្នានេះ ឯកឧត្ដម ហ៊ុន ម៉ានី បានលើកឡើងបន្ថែមថា ឯកឧត្ដម សូមយកឱកាសនេះថ្លែងអំណរគុណដល់រាជរដ្ឋាភិបាលដែលបានផ្តល់ទំនុកចិត្តចំពោះ ឯកឧត្ដម ជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ ដើម្បីរួមកម្លាំងគ្នាជាមួយ ឯកឧត្ដម លោកជំទាវ លោក លោកស្រី មកពីបណ្ដាក្រសួង ស្ថាប័ន របស់រាជរដ្ឋាភិបាល ក្នុងការចូលរួមតម្រង់ទិស គាំទ្រ និងភាពជាម្ចាស់របស់មូលដ្ឋានក្នុងកម្មវិធីអនុវត្តនយោបាយ និងដើម្បីពង្រឹងការទទួលខុសត្រូវ និងភាពជាម្ចាស់របស់មូលដ្ឋានក្នុងការអនុវត្ត កម្មវិធីនយោបាយ នៃយុទ្ធសាស្ត្របញ្ចកោណ ដំណាក់កាលទី ១ និងកម្មវិធីកែទម្រង់នានារបស់រាជរដ្ឋាភិបាល សំដៅអភិវឌ្ឍន៍មូលដ្ឋាន លើកកម្ពស់សេវាសាធារណៈ និងដោះស្រាយឆ្លើយតបទៅនឹងសំណើ សំណូមពរ និងសេចក្ដីត្រូវការប្រជាពលរដ្ឋនៅតាមមូលដ្ឋាននីមួយៗ ប្រកបដោយប្រសិទ្ធភាព តម្លាភាព និងគណនេយ្យភាព។

ឯកឧត្ដម ហ៊ុន ម៉ានី បញ្ជាក់ថា ផ្អែកតាមតួនាទី ភារកិច្ច និងរបៀបរបបការងារ ដែលបានកំណត់នៅក្នុងសេចក្ដីណែនាំរបស់រាជរដ្ឋាភិបាល និងដោយបានការចាត់តាំងពីរាជរដ្ឋាភិបាល ក្នុងនាមជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្ត ឯកឧត្ដម មានការទទួលខុសត្រូវខ្ពស់ក្នុងការដឹកនាំ និងត្រួតពិនិត្យរាល់សកម្មភាពរបស់ក្រុមការងាររាជរដ្ឋាភិបាល និងគណៈរដ្ឋមន្ត្រីចំពោះការដឹកនាំលើការងារនេះ។ ដូច្នេះ ឯកឧត្ដម លោកជំទាវ លោក លោកស្រី ដែលត្រូវបានចាត់តាំងតាមបណ្ដាក្រុង ស្រុក ទាំង ៩ និង ឃុំ សង្កាត់ ក៏នឹងត្រូវមានការទទួលខុសត្រូវក្នុងការដឹកនាំ និងចាត់ចែងអនុវត្តការងារតាមមូលដ្ឋានរៀងៗ ខ្លួន ស្របតាមសេចក្ដីណែនាំរបស់រាជរដ្ឋាភិបាល និងប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តកំពង់ស្ពឺផងដែរ៕

អត្ថបទ ៖ ពិសី