លោក ទិត សុធា អំពាវនាវឱ្យពលរដ្ឋប្រុងប្រយ័ត្ន ចំពោះគណនីតេឡេក្រាមក្លែងក្លាយ

លោក ទិត សុធា រដ្ឋលេខាធិការទីស្ដីការគណៈរដ្ឋមន្ត្រី និងជាប្រធានអង្គភាពព័ត៌មាននិងប្រតិកម្មរហ័ស អំពាវនាវឱ្យប្រជាពលរដ្ឋមានការប្រុងប្រយ័ត្ន ព្រោះមានជនខិលខូច បានយករូបថតរបស់លោកទៅបង្កើតគណនីតេឡេក្រាម ដើម្បីធ្វើការវិនិយោគ និងធ្វើពាណិជ្ជកម្មផ្សេងៗ។

លោករដ្ឋលេខាធិការ បានចេញមកបញ្ជាក់ថា មានជនខិលខូចបានយករូបថតរបស់លោក ទៅបង្កើតគណនីតេឡេក្រាមក្លែងក្លាយ ក្នុងចេតនាទុច្ចរិត ដើម្បីធ្វើការវិនិយោគ និងធ្វើពាណិជ្ជកម្មផ្សេងៗ ដែលគណនីតេឡេក្រាមនោះមិនមែនជាគណនីរបស់លោកទេ និងសូមឱ្យប្រជាពលរដ្ឋគ្រប់មជ្ឈដ្ឋានមេត្តាប្រុងប្រយ័ត្ន។

ជាមួយគ្នានេះ លោកបានប្រកាសបដិសេធ និងមិនទទួលខុសត្រូវចំពោះទង្វើនានាដែលគណនីនេះប្រព្រឹត្ត ដែលអាចបង្កបញ្ហា ឬផលប៉ះពាល់ណាមួយ។ លើសពីនេះ លោកក៏បានអំពាវនាវដល់កម្លាំងមានសមត្ថកិច្ចចាត់វិធានការតាមផ្លូវច្បាប់ចំពោះជនក្លែងបន្លំនេះ៕