ថ្នាក់ដឹកនាំ​ក្រសួង​ការងារ​ចុះ​សួរសុខទុក្ខ និង​ទទួលទាន​អាហារ​ជាមួយ​បងប្អូន​កម្មករ​និយោជិក​រោងចក្រ ក្នុង​ខណ្ឌ​កំបូល រាជធានី​ភ្នំពេញ

នៅ​ថ្ងៃទី​២៤ ខែកក្កដា ឆ្នាំ​២០២៤​នេះ ថ្នាក់ដឹកនាំ​ចំនួន​៣​រូប ជា​តំណាង​ដ៏​ខ្ពង់ខ្ពស់​លោក ហេង សួរ រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បាន​ចុះ​ជួប​សំណេះសំណាល សួរសុខទុក្ខ ទទួលទាន​អាហារ​ថ្ងៃត្រង់​ជាមួយ​បងប្អូន​កម្មករ​និយោជិក និង​ពិភាក្សា​ការងារ​ជាមួយ​តំណាង​និយោជក​រោងចក្រ​ចំនួន​៣​ទីតាំង ក្នុង​ខណ្ឌ​កំបូល រាជធានី​ភ្នំពេញ​។

កម្មវិធី​ចុះ​សំណេះសំណាល និង​ទទួលទាន​អាហារ​ថ្ងៃត្រង់​ជាមួយ​បងប្អូន​កម្មករ​និយោជិក​នេះ​រោងចក្រ COMO APPAREL CO.,LTD ដឹកនាំ​ដោយ​លោក ងុ​យ រិ​ទ្ធ រដ្ឋលេខាធិការ​នៃ​ក្រសួង​ការងារ និង​បណ្តុះបណ្តាល​វិជ្ជាជីវៈ​, និង​រោងចក្រ C.F.C GARMENT PTY CO.,LTD. ដឹកនាំ​ដោយ ឯកឧត្តម សាន គឹមហុង អនុរដ្ឋលេខាធិការ និង​រោងចក្រ SUNICON (CAMBODIA) APPAREL CO.,LTD  ដឹកនាំ​ដោយ លោក វិត សុវណ្ណ​ឧ​ត្ត​ម អនុរដ្ឋលេខាធិការ​។

នៅ​ក្នុង​ការ​ចុះ​សួរសុខទុក្ខ និង​ពិនិត្យមើល​ស្ថានភាព​ការងារ​របស់​បងប្អូន​កម្មករនិយោជិត​ជាង ១ ៨០០​នាក់ ដែល​កំពុង​បម្រើ​ការងារ​នៅក្នុង​រោងចក្រ COMO APPAREL CO.,LTD. ស្ថិតក្នុង ខណ្ឌ​កំបូល លោក ងុ​យ រិ​ទ្ធ រដ្ឋលេខាធិការ​នៃ​ក្រសួង​ការងារ បាន​ជួបពិភាក្សា​ការងារ​ជាមួយ​តំណាង​និយោជក​រោងចក្រ និង​បាន​សំណេះសំណាល​ផ្ទាល់​ជាមួយ​បងប្អូន​កម្មករនិយោជិត​តាម​ផ្នែក​នីមួយៗ​នៅក្នុង​រោងចក្រ ដើម្បី​ពិនិត្យមើល​ស្ថានភាព​ការងារ និង​ដំណើរការ​នៃ​ការប្រព្រឹត្តទៅ​នៃ​ខ្សែចង្វាក់​ផលិតកម្ម​នៅក្នុង​អគារ​រោងចក្រ​។

ក្រោយ​ការ​ទទួល​ទាន​អាហារ​ថ្ងៃត្រង់ និង​ជួប​សំណេះសំណាល​សាកសួរ​ផ្ទាល់​ជាមួយ​បងប្អូន​កម្មករនិយោជិត​រួច លោក ងុ​យ រិ​ទ្ធ បាន​វាយតម្លៃ​ខ្ពស់ និង​ថ្លែងអំណរគុណ​ទៅដល់​ម្ចាស់​រោងចក្រ COMO APPAREL CO.,LTD.. ដែល​មិន​ត្រឹមតែ​គោរព​តាមច្បាប់​ការងារ​យ៉ាង​ខ្ជាប់ខ្ជួន និង​អនុវត្ត​ស្តង់ដា​ការងារ​បាន​យ៉ាង​ល្អ​ប៉ុណ្ណោះ​ទេ ប៉ុន្តែ​ថែមទាំង​បានផ្តល់​អត្ថប្រយោជន៍​ជាច្រើន​ទៅតាម​គោលការណ៍​របស់​រាជរ​ដ្ឋា​ភិ​បាល​បាន​កំណត់​ក្នុង​ការផ្តល់​អត្ថប្រយោជន៍​ដល់​បងប្អូន​កម្មករនិយោជិត​ផងដែរ​។

​ដោយឡែក ក្នុង​ការចុះ​សំណេះសំណាល សួរសុខទុក្ខ និង​ទទួលទាន​អាហារ​ថ្ងៃត្រង់​ជាមួយ​បងប្អូន​កម្មករ​និយោជិក​ជាង ៨០០​នាក់ នៅ​រោងចក្រ C.F.C GARMENT PTY CO.,LTD. ក្នុង​ខណ្ឌ​កំបូល លោក សាន គឹមហុង អនុរដ្ឋលេខាធិការ បាន​ដើរ​ពិនិត្យ​ដោយ​ផ្ទាល់​នៅ​ក្នុង​ដំណើរការ​ផលិតកម្ម ក្នុង​រោងចក្រ ដូចជា កន្លែង​កាត់ដេរ កន្លែង​វេច​ខ្ចប់ តុ​កាត់ ឃ្លាំង កា​តុង QC(​ការពិនិត្យ​គុណភាព​) ពេទ្យ​សង្គ្រោះ ផងដែរ​។

លោក សាន គឹមហុង និង​ក្រុមការងារ ក៏បាន​ទទួលទាន​អាហារ​ថ្ងៃត្រង់​ជាមួយ​បងប្អូន​កម្មករ​និយោជិក​នៅក្នុង​បរិយាកាស​ដ៏​មាន​ភាព​ស្និទ្ធស្នាល​។

នៅ​ក្នុង​ឱកាស​នោះដែរ​ លោក​ក៏បាន​ជួបពិភាក្សា​ការងារ​ជាមួយ​តំណាង​រោងចក្រ ដោយ​បាន​គូសបញ្ជាក់​ថា ការ​ចុះ​សួរសុខទុក្ខ​បងប្អូន​កម្មករនិយោជិត​ដោយផ្ទាល់​នៅតាម​រោងចក្រ​នេះ គឺជា​ការគិតគូរ​យក​ចិត្ត​ទុកដាក់​ពី​សំណាក់​រាជរដ្ឋាភិបាល​ក​ម្ពុ​ជា​អាណត្តិ​ទី​៧ ដែល​ដឹកនាំ​ដោយ​សម្តេច​មហា​បវរ​ធិបតី ហ៊ុន ម៉ា​ណែ​ត នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ទៅលើ​បងប្អូន​កម្មករនិយោជិត​នៅតាម​រោងចក្រ សហគ្រាស​ទាំងអស់​នៅ​ទូទាំង​ប្រទេស ធ្វើយ៉ាងណា​ផ្សារភ្ជាប់​ទំនាក់ទំនង​កាន់តែ​ជិតស្និទ្ធ​រវាង​រដ្ឋាភិបាល ជាមួយ​បណ្តា​ម្ចាស់​រោងចក្រ សហគ្រាស ជាពិសេស​នោះ​គឺ​សុខទុក្ខ​របស់​បងប្អូន​កម្មករ​និយោជិក​ដែល​រដ្ឋាភិបាល​តែងតែ​គិតគូរ​ជានិច្ច​។

ទន្ទឹម​នេះ​ដែរ ក្នុង​ការ​ចុះ​ជួប​សំណេះសំណាល សួរសុខទុក្ខ ទទួលទាន​អាហារ​ថ្ងៃត្រង់​ជាមួយ​បងប្អូន​កម្មករ​និយោជិក​ជាង ៨០០​នាក់ នៃ​រោងចក្រ SUNICON (CAMBODIA) APPAREL CO.,LTD. ស្ថិត​ក្នុង​ខណ្ឌ​កំបូល លោក វិត សុវណ្ណ​ឧ​ត្ត​ម អនុរដ្ឋលេខាធិការ ក៏បាន​ជួបពិភាក្សា​ការងារ​ជាមួយ​រដ្ឋបាល និង​នាយក​សហគ្រាស ដើម្បី​សាកសួរ​ព័ត៌មាន​មួយ​ចំនួន​ទាក់ទង​នឹង​លក្ខខណ្ឌ​ការងារ និង​អត្ថប្រយោជន៍​ផ្សេង​ដែល​រោងចក្រ SUNICON (CAMBODIA) APPAREL CO.,LTD. ផ្តល់ជូន​បងប្អូន​កម្ម​ករ​និយោជិក​។

នា​ឱកាស​នោះ​ដែរ លោក​ក៏បាន​ចុះ​ពិនិត្យមើល​ផ្ទាល់​តាម​ខ្សែ​ចង្វាក់​ផលិតកម្ម​នៅក្នុង​អគារ​រោងចក្រ និង​បាន​ជួប​សាកសួរ​សុខទុក្ខ​បងប្អូន​កម្មករនិយោជិក និង​បាន​ទទួលទាន​បាយ​ថ្ងៃត្រង់​នៅ​អាហារដ្ឋាន​ក្នុង​រោងចក្រ​រួមគ្នា​ផងដែរ​។

លោក​អនុរដ្ឋលេខាធិការ បាន​កត់​សំគាល់​ឃើញ​ថា ម្ចាស់​រោងចក្រ​បាន​អនុវត្ត​លក្ខខណ្ឌ​ការងារ​បានល្អ និង​បាន​ផ្តល់​អត្ថប្រយោជន៍​ផ្សេងៗ​ជូន​បងប្អូន​កម្ម​និយោជិក​បាន​យ៉ាង​ល្អ​ដូចដែល​ច្បាប់​ការងារ​បានកំណត់​ផងដែរ​។ ក្នុង​ឱកាស​នោះ លោក​បាន​វាយតម្លៃ​ខ្ពស់ និង​ថ្លែងអំណរគុណ​ទៅដល់​ម្ចាស់​រោងចក្រ សហគ្រាស ដែល​បាន​ផ្តល់​កិច្ចសហការ​យ៉ាង​ល្អ​ជាមួយ​ក្រសួង​ការងារ និង​បណ្តុះបណ្តាល​វិជ្ជាជីវៈ​ក្នុងការ​រៀបចំ​ជំនួប​សំណេះសំណាល សួរសុខទុក្ខ និង​ទទួលទាន​អាហារ​ថ្ងៃត្រង់​ជាមួយ​បងប្អូន​កម្មករ​និយោជិក​ប្រកបដោយ​ភាព​ស្និទ្ធស្នាល​។

ទន្ទឹម​នេះ លោក​បាន​ស្នើ​ឱ្យ​ម្ចាស់​រោងចក្រ​បន្ត​យកចិត្តទុកដាក់​លើ​សុវត្ថិភាព​របស់​កម្មក​រ​និយោជិត​ទាំងអស់ ជាពិសេស​បន្ត​ផ្តល់​អត្ថប្រយោជន៍​ឱ្យបាន​ពេញលេញ​តាមច្បាប់​ការងារ​ជូន​ដល់​កម្មករ​និយោជិក​ទាំងអស់​ផង​ដែរ​៕