សង្ស័យ! គ្រូពេទ្យចុះយក​សំណា​កបុគ្គលិកការ៉ាស់ឡានក្នុងបុរីប៉េងហួតទាំងយប់

ក្រុមគ្រូពេទ្យយស្មគ្រ័ចិត្តសម្តេចតេជោនិងអាជ្ញាធរខណ្ឌច្បារអំពៅបានចុះមកយកសំណាកបុគ្គលិក មជ្ឈមណ្ឌលថែមទាំរថយន្ត វី ឃ្លីន ស្ថិតនៅបុរីប៉េងហួត ភូមិបឹងឈូក សង្កាត់និរោធ ខណ្ឌច្បារទាំងយប់ បន្ទាប់ពីមានការសង្ស័យឆ្លងជំងឺកូវីដ១៩។

លោក ហ៊ត គឹមនី អភិបាលរងខណ្ឌច្បារអំពៅបានឲ្យដឹងថា ការចុះយកសំណាកពីបុគ្គលិកការ៉ាស់រថយន្តនេះ​(មជ្ឈមណ្ឌលថែទាំរថយន្ត វី ឃ្លីន) បានចាប់ផ្តើមធ្វើឡើងកាលពីវេលាម៉ោង០៨ យប់ថ្ងៃទី ៥ ខែមីនាម្សិលមិញ ដែលមានបុគ្គលិក ៣៥ នាក់ត្រូវយកសំណាកមានស្រី ១៥ នាក់ជាជនជាតិខ្មែរ។

បើតាមលោកអភិបាលរងខណ្ឌបានបន្តថាមកដល់ថ្ងៃទី៦ខែមីនានេះនៅមូលដ្ឋានខណ្ឌច្បារអំពៅរាជធានីភ្នំពេញគឺមានការចុះមកយកសំណាកដែលសង្ស័យមានឆ្លងជំងឺកូវិដ១៩ចាប់តាំងពីព្រឹត្តិការណ៍ថ្ងៃទី២០ខែកុម្ភះមកនេះ មានសង្កាត់និរោធច្រើនជាងគេ ក្នុងនោះមានបុរីប៉េង ហួត គម្រោង៧។

ទាក់ទិននិងការរកឃើញទីតាំងប្រឈមខាងលើនេះលោក ចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានសំណូមពរយ៉ាងទទូចសុំឲ្យបងប្អូនប្រជាពលរដ្ឋទាំងអស់ត្រូវអនុវត្តន៍ឲ្យបាននូវសេចក្តីជូនដំណឹងរបស់ក្រសួងសុខាភិ​បាលដើម្បីរួមគ្នាទប់ស្កាត់ជំងឺកូវិដ១៩កុំឲ្យរាលដាលដល់សហគមន៍យ៉ាងច្រើនបែបនេះ។

ហើយបើពុំចាំបាច់សុំកុំធ្វើដំណើចេញពីផ្ទះឲ្យសោះ។ព្រោះមិនដឹងថាជំងឺកូវិដដ៏សាហាវនេះពុំដឹងនៅក្នុងខ្លួនអ្នកណាម្នាក់នោះឡើយ៕

អត្ថបទ៖នរា