កម្ពុជា ប្តេជ្ញាអនុវត្តអនុសញ្ញា CEDAW ដើម្បីលុបបំបាត់រាល់ទម្រង់រើសអើងស្រី្តភេទ

ស្ថាប័នពាក់ព័ន្ធកម្ពុជា​ បានបង្ហាញឆន្ទៈ និងប្តេជ្ញាខ្ពស់ក្នុងការជំរុញអនុវត្តអនុសញ្ញាស្តីពី ការលុបបំបាត់រាល់ទម្រង់នៃការរើសអើងប្រឆាំងស្រ្តីភេទ​( CEDAW) ដើម្បីការពារសិទ្ធិស្រ្តី និងលើកកម្ពស់សមភាពយេនឌ័រនៅកម្ពុជាឱ្យទទួលបានសមិទ្ធផលជាបន្តបន្ទាប់។

ក្រុមប្រឹក្សាជាតិកម្ពុជាដើម្បីស្ត្រី កាលពីថ្ងៃទី១៧ ខែធ្នូ ឆ្នាំ២០២៤ បានរៀបចំ “កិច្ចសន្ទនាកម្រិតខ្ពស់ជាមួយគណៈកម្មការពាក់ព័ន្ធនៃរដ្ឋសភា» ស្តីពីអនុសញ្ញា CEDAW និងសេចក្តីសង្កេតសន្និដ្ឋានរបស់គណៈកម្មាធិការ CEDAW នៃអង្គការសហប្រជាជាតិ “ ក្រោមអធិបតីភាពលោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងជាប្រធានក្រុមប្រឹក្សាជាតិកម្ពុជាដើម្បីស្ត្រី។

កិច្ចប្រជុំនេះ ក៏មានការអញ្ជើញចូលរួមជាដៃគូលោកស្រី ឡោក ខេង ប្រធានគណៈកម្មការទី៨ នៃរដ្ឋសភា ស្ថាប័នពាក់ព័ន្ធ និងសមាជិកសរុប ៩០ នាក់ (ស្រ្តី ៧០នាក់) ដែលសហការរៀបចំ និងគាំទ្រដោយភ្នាក់ងារសហប្រជាជាតិ UN Women ដែលជាដៃគូក្នុងការតាមដានការអនុវត្តអនុសញ្ញាស៊ី-ដរ។

តាមរយៈកិច្ចប្រជុំនេះ ក្រុមប្រឹក្សាជាតិកម្ពុជាដើម្បីស្រ្តី និងគណៈកម្មការពាក់ព័ន្ធនៃរដ្ឋសភាបានបង្ហាញពីឆន្ទៈរួមគ្នាក្នុងការបន្តជំរុញការអនុវត្តអនុសញ្ញា CEDAW នៅកម្ពុជា ដោយនឹងផ្តួចផ្តើមអនុវត្តតាមស្មារតីនៃកិច្ចសន្ទនា ដើម្បីពន្លឿនកិច្ចការពារសិទ្ធិស្ត្រី និងលើកកម្ពស់សមភាពយេនឌ័រនៅកម្ពុជាឱ្យទទួលបានសមិទ្ធផលជាបន្តបន្ទាប់បន្ថែមទៀត។

លោកស្រី អ៊ឹង កន្ថាផាវី បានស្នើសុំឱ្យមានការពិនិត្យ និងពិភាក្សាលើកិច្ចការពារសិទ្ធិស្ត្រីពាក់ព័ន្ធនឹងការបៀតបៀនផ្លូវភេទនៅក្នុងកន្លែងការងារក្នុងក្របខណ្ឌការពារសន្តិភាព និងសន្តិសុខ(ស្ត្រីក្នុងកិច្ចការពារជាតិ ឬស្ត្រីក្នុងកងកម្លាំង )។

លោកស្រី ក៏បានជំរុញឱ្យផ្តួចផ្តើមរៀបចំក្រុមការងារសម្របសម្រួលរវាងស្ថាប័ននីតិបញ្ញាតិ្ត និងស្ថាប័ននីតិប្រតិបត្តិ (ក្រុមប្រឹក្សាជាតិកម្ពុជាដើម្បីស្រ្តី) ដើម្បីសហការរួមគ្នា និងជួបប្រជុំជាប្រចាំក្នុងគោលដៅពិនិត្យតាមដាន និងជំរុញការអនុវត្តអនុសញ្ញា CEDAW គោលនយោបាយ និងវិធានការនានា ដើម្បីពង្រឹងកិច្ចការពារសិទ្ធិស្រ្តី និងឈានទៅសម្រេចបានសមភាពយេនឌ័រ។

គួរជម្រាបថា កិច្ចសន្ទនានេះមានគោលបំណងពិភាក្សា និងបង្កើនការគាំទ្រពីរដ្ឋសភាក្នុងការអនុវត្តអនុសញ្ញា CEDAW និងពិភាក្សាអំពីវឌ្ឍនភាពគោលនយោបាយ ការប្រឈម និងផែនការឆ្លើយតបនឹងសេចក្តីសង្កេតសន្និដ្ឋាន រួមទាំងផ្តល់អនុសាសន៍ក្នុងការអនុវត្តអនុសញ្ញា CEDAW។ តបតាមការរំពឹងទុក កិច្ចសន្ទនានេះ គឺជាចំណុចចាប់ផ្តើមនៃការទំនាក់ទំនងរវាង ក.ជ.ក.ស. និងសភាក្នុងនីតិកាលទី៧ នៃរដ្ឋសភា ដើម្បីពង្រឹងកិច្ចការពារសិទ្ធិស្រ្តីដោយមានការគាំទ្រពីសភា និងការតាមដានការអនុវត្តអនុសញ្ញា CEDAW ព្រមទាំងពិធីសារតាមជម្រើសនៃអនុសញ្ញានេះ។

អង្គពិភាក្សាបានចែករំលែក និងផ្លាស់ប្តូរមតិយោបល់គ្នារវាងសមាជិកកម្មការពាក់ព័ន្ធនៃរដ្ឋសភា និងសមាជិកក្រុមប្រឹក្សាជាតិកម្ពុជាដើម្បីស្រ្តី លើទិដ្ឋភាពរួមនៃការអនុវត្តអនុសញ្ញា CEDAW និងផែនការសកម្មភាពរបស់ក្រសួង ស្ថាប័ន ដែលបានរៀបចំតាមវិស័យឆ្លើយតបនឹងសេចក្តីសង្កេតសន្និដ្ឋាន ៥៧ចំណុច របស់គណៈកម្មាធិការ CEDAW ហើយដែលលទ្ធផលនៃការអនុវត្តផែនការនេះនឹងផ្តល់នូវធាតុចូលជាមូលដ្ឋានសម្រាប់របាយការណ៍លើកទី៧ របស់ កម្ពុជា ស្តីពីការអនុវត្តអនុសញ្ញា CEDAW ដែលក្រុមប្រឹក្សាជាតិកម្ពុជាដើម្បីស្រ្តី បាននឹងកំពុងដំណើរការរៀបចំ និងត្រូវបញ្ជូនទៅគណៈកម្មាធិការ CEDAW តាមកាលកំណត់ ៕