ព័ត៌មានអន្ដរជាតិ

អង់គ្លេសនឹងបញ្ជូនដ្រូន ១៥០ ០០០គ្រឿង និងប្រព័ន្ធរ៉ាដាជាង ៣៥០ ទៅអ៊ុយក្រែន ដោយយកលុយរុស្ស៊ីដែលបង្កកបង់ថ្លៃ

បានផុស

៣ ម៉ោង មុន

នៅ

ថ្ងៃសុក្រ ១៩ មិថុនា ២០២៦

ដោយ

ខណៈការវាយប្រហាររបស់រុស្ស៊ីកាន់តែខ្លាំងលើអ៊ុយក្រែន រដ្ឋាភិបាលទីក្រុងឡុងដ៍ប្រកាសកាលពីថ្ងៃទី១៨ ខែមិថុនា ថា ចក្រភពអង់គ្លេសនឹងផ្តល់ដ្រូនចំនួន ១៥០ ០០០គ្រឿង មីស៊ីលការពារដែនអាកាស និងប្រព័ន្ធរ៉ាដាជាង ៣៥០គ្រឿងដល់អ៊ុយក្រែន ក្រោមកញ្ចប់ជំនួយយោធាថ្មី តម្លៃ ១ប៊ីលានដុល្លារ។

សារព័ត៌មាន The Kyiv Independent ផ្សាយថ្ងៃទី១៨ ខែមិថុនា ឆ្នាំ២០២៦ កញ្ចប់ជំនួយនេះ ត្រូវបានបង្ហាញ អំឡុងពេលកិច្ចប្រជុំរដ្ឋមន្ត្រីការពារជាតិណាតូនិងការជួបជុំក្រុមទំនាក់ទំនងការពារជាតិអ៊ុយក្រែន(UDCG) នៅទីក្រុងព្រុចសែល។

លោក Dan Jarvis រដ្ឋមន្ត្រីក្រសួងការពារជាតិអង់គ្លេស និង លោក ហ្សេលេនស្គី។ រូបភាព៖ Getty Images

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការផ្តល់ហិរញ្ញប្បទាន តាមរយៈប្រាក់កម្ចីបង្កើនល្បឿនចំណូលវិសាមញ្ញ(ERA) ចំនួន ៣ប៊ីលានដុល្លារ របស់ចក្រភពអង់គ្លេសដល់អ៊ុយក្រែន គឺគាំទ្រដោយប្រាក់ចំណូលបានមកពីទ្រព្យសម្បត្តិរបស់រុស្ស៊ីដែលរារាំង។

ជំនួយនេះ រួមមានដ្រូនផលិតនៅអ៊ុយក្រែន ក៏ដូចជាមីស៊ីលពហុតួនាទីទម្ងន់ស្រាល(LMM) និងប្រព័ន្ធរ៉ាដាដែលមានមូលដ្ឋានលើដី ដែលនឹងដឹកជញ្ជូននៅចុងឆ្នាំ២០២៦ ប្រើ ដើម្បីការពារដែនអាកាសរបស់អ៊ុយក្រែន ប្រឆាំងនឹងការវាយប្រហារដោយមីស៊ីលនិងដ្រូនជាបន្តបន្ទាប់របស់រុស្ស៊ី។

លោក Dan Jarvis រដ្ឋមន្ត្រីក្រសួងការពារជាតិអង់គ្លេស ប្រកាសពីកញ្ចប់ជំនួយនេះ បន្ទាប់ពីបានជួបជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅទីក្រុងព្រុចសែល ក្រៅកិច្ចប្រជុំរដ្ឋមន្ត្រីការពារជាតិណាតូនិង UDCG ប្រមូលផ្តុំប្រទេសជិត៥០ សម្របសម្រួល គាំទ្រផ្នែកយោធាសម្រាប់អ៊ុយក្រែន។

លោក Jarvis ថា៖ « កញ្ចប់ដ្រូន មីស៊ីលការពារដែនអាកាស និងរ៉ាដានេះ នឹងជួយការពារប្រជាជនស្លូតត្រង់របស់អ៊ុយក្រែន ពីការបាញ់ទម្លាក់ដ្រូន និងមីស៊ីលរបស់ លោក ពូទីន»។

ដោយឡែក លោក ហ្សេលេនស្គី ថា៖ « ប្រព័ន្ធ Patriot បន្ថែម រួមទាំងសមត្ថភាពប្រឆាំងមីស៊ីលផ្លោង នឹងស្ថិតក្នុងចំណោមអាទិភាពកំពូលរបស់ទីក្រុងកៀវ ក្នុងកិច្ចប្រជុំរដ្ឋមន្ត្រីការពារជាតិណាតូ ចំពេលមានការវាយប្រហារតាមអាកាសទ្រង់ទ្រាយធំរបស់រុស្ស៊ីលើអ៊ុយក្រែន»។

គួរបញ្ជាក់ថា កញ្ចប់ជំនួយយោធាធ្វើឡើង បន្ទាប់ពីវិធានការជាបន្តបន្ទាប់ ប្រកាសដោយទីក្រុងឡុងដ៍កាលពីដើមសប្តាហ៍នេះ រួមទាំងការគាំទ្រហិរញ្ញប្បទាននាំចេញចំនួន ២៨២លានដុល្លារ សម្រាប់វិស័យថាមពលនុយក្លេអ៊ែររបស់អ៊ុយក្រែន និងទណ្ឌកម្មថ្មីចំនួន៧០ ផ្តោតលើកងនាវាស្រមោល បណ្តាញផ្គត់ផ្គង់យោធា និងគម្រោងហិរញ្ញវត្ថុខុសច្បាប់របស់រុស្ស៊ី៕

សម្រួល៖ ណឺ មិនា

Related Topics:សង្គ្រាមរុស្ស៊ី-អ៊ុយក្រែន អង់គ្លេស