ព័ត៌មានជាតិ

លោក ជួន ណារិន្ទ ត្រៀមកម្លាំងនគរបាល រក្សាសន្ដិសុខ សណ្ដាប់ធ្នាប់ សុវត្ថិភាព និង ទប់ស្កាត់អគ្គិភ័យ នៅបុណ្យចូលឆ្នាំចិនខាងមុខ

បានផុស

១ year មុន

នៅ

ថ្ងៃពុធ ២២ មករា ២០២៥

ដោយ

លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដើម្បីធានានូវ សន្តិសុខ សណ្ដាប់ធ្នាប់ និងសុវត្ថិភាព បានដាក់បទបញ្ជាឲ្យកម្លាំងនគរបាលធ្វើការផ្សព្វផ្សាយដល់ប្រជាពលរដ្ឋចូលរួមបង្ការ ទប់ស្កាត់ ករណីអគ្គិភ័យ ក្នុងឱកាសបុណ្យចូលឆ្នាំថ្មី ប្រពៃណីចិន និងវៀតណាម ដែលនឹងប្រព្រឹត្តទៅចាប់ពីថ្ងៃទី ២៨ ដល់ថ្ងៃទី ៣១ ខែមករា ឆ្នាំ ២០២៥ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់ពី លោកវរសេនីយ៍ឯក សំ វិច្ឆិកា អ្នកនាំពាក្យស្នងការនគរបាលរាជធានីភ្នំពេញ នៅព្រឹកថ្ងៃទី ២២ ខែមករា ឆ្នាំ ២០២៥ នេះ បានឲ្យដឹងថា លោកឧត្ដមសេនីយ៍ឯក ជួន ណារិន្ទ បានដាក់បទបញ្ជារួចហើយដល់កម្លាំងទាំងអស់ នៃស្នងការដ្ឋាននគរបាលរាជធានីភ្នំពេញ ត្រូវប្រកាសចំណុចខ្ពស់ចាប់ពីពេលនេះតទៅ ដើម្បីអនុវត្តឲ្យមានប្រសិទ្ធភាពតាមសេចក្ដីណែនាំរបស់អគ្គស្នងការដ្ឋាននគរបាលជាតិ និងសេចក្ដីណែនាំរបស់រដ្ឋបាលរាជធានីភ្នំពេញ។

ក្នុងនោះ លោកឧត្ដមសេនីយ៍ឯក ជួន ណារិន្ទ បានណែនាំឲ្យយកចិត្តទុកដាក់នៅតាមបណ្ដាទីផ្សារទាំងអស់ចំពោះការលួចដាក់លក់ផាវ ឬ កាំជ្រួច នានា ដែលមិនអនុញ្ញាតឲ្យប្រើប្រាស់ និង នគរបាលប្រឆាំងបទល្មើសសេដ្ឋកិច្ច ត្រូវត្រួតពិនិត្យទប់ស្កាត់ការដឹកជញ្ជូនទំនិញហាមឃាត់ទាំងអស់នេះចូលក្នុងភូមិសាស្ត្ររាជធានីភ្នំពេញ។

ជាមួយគ្នានេះ ស្នងការនគរបាលរាជធានីភ្នំពេញ ក៏បានអំពាវនាវឲ្យបង្កើនការយកចិត្តទុកដាក់ចំពោះការអុជទាន ធូប ដែលអាចកើតមានគ្រោះអគ្គិភ័យជាយថាហេតុ។ ក្នុងនោះ លោកបានណែនាំឲ្យការិយាល័យនគរបាលបង្ការ ពន្លត់អគ្គិភ័យ និងសង្គ្រោះ ត្រូវយកចិត្តទុកដាក់ក្នុងការផ្សព្វផ្សាយជូនដល់ប្រជាពលរដ្ឋផងដែរ។

បន្ថែមពីនេះ លោកឧត្ដមសេនីយ៍ឯក ជួន ណារិន្ទ ក៏បានក្រើនរម្លឹកផងដែរដល់អ្នកបញ្ជាយានយន្តទាំងអស់ ត្រូវចូលរួមគោរពច្បាប់ចរាចរណ៍ កុំបើកបរក្រោមសារធាតុស្រវឹង ដើម្បីបង្ការ និងទប់ស្កាត់ករណីគ្រោះថ្នាក់ចរាចរណ៍ក្នុងរដូវបុណ្យទាន៕

អត្ថបទ ៖ ម៉េង