ផលនេសាទក្នុងខេត្តកំពត នៅឆមាសទី១​ឆ្នាំ២០២៥ កើនឡើង៥ ភាគរយ

នៅក្នុងឆមាសទី១​ ឆ្នាំ២០២៥ ខេត្តកំពតប្រមូលផលនេសាទបានជាង១ម៉ឺនតោន កើនឡើងប្រមាណ៥% បើធៀបនឹងរយៈពេលដូចគ្នាកាលពីឆ្នាំមុន។ ទីតាំងភូមិសាស្ត្រខេត្តកំពត អំណោយផលលើការងារជលផល គឺមានទាំងនេសាទសមុទ្រ និងនេសាទទឹកសាប ដែលធ្វើនៅតាមវាលស្រែ វាលទំនាប បឹង ត្រពាំង អូរ ប្រឡាយ និងអាងទឹកសាធារណៈជាដើម។ នេះជាការបញ្ជាក់ពីលោក ស សូរិន នាយខណ្ខរដ្ឋបាលជលផលខេត្តកំពត កាលពីថ្ងៃទី២៦ ខែមិថុនា ឆ្នាំ២០២៥នេះ។

លោកនាយខណ្ឌជលផលបានបន្តថា ដោយមានការចូលរួមពីគ្រប់ភាគីពាក់ព័ន្ធ ពិសេសក្រោមការណែនាំចង្អុលបង្ហាញរបស់លោកអភិបាលខេត្ត ធ្វើឲ្យផលនេសាទរក្សាបាននូវកំណើន និងនិរន្តរភាព។ ជាក់ស្តែងនៅឆ្នាំមាសទី១ ឆ្នាំ២០២៥នេះ ខេត្តប្រមូលផលនេសាទបាន ១០២០៥តោន ក្នុងនោះផលនេសាទទឹកសាបចំនួន១៩៤៦ តោន និងផលនេសាទសមុទ្រចំនួន ៨២៥៩ តោន។

លោកបានបញ្ជាក់បន្ថែមថា ដើម្បីរក្សាកំណើនផលនេសាទ នៅឆ្នាំបន្តបន្ទាប់ទៀត អាជ្ញាធរខេត្ត មន្ត្រីជំនាញពាក់ព័ន្ធ អង្គការដៃគូ បានធ្វើកិច្ចការងារជាច្រើនជំរុញ និងលើកកម្ពស់ដល់សហគមន៍ ពិសេសប្រជានេសាទ តាមរយៈការងារអភិរក្ស ការអភិវឌ្ឍវារីវប្បកម្ម និងការបង្កើតការងារបន្ថែម។

ការនេសាទសមុទ្រប្រើ ទូក-កាណូតនេសាទ សរុបចំនួន១០៥៣គ្រឿង ដោយប្រើឧបករណ៍ អួនអូស លបក្តាម មងក្តាម មងត្រី មងបង្គា មងកេវ ធ្នាក់មឹកសំបកខ្យង ឈិបរុញដៃ ។ល។ តែប្រជានេសាទមួយចំនួននៅលួចប្រើឧបករណ៍ខុសច្បាប់នៅឡើយដែរ ពិសេសលបកន្ទុយកណ្តុរ នៅឆមាសទី១នេះ មន្ត្រីជលផលបានរឹបអូស និងបំផ្លាញលបកន្ទុយកណ្តុរ២០ករណីស្មើ៦០៤លប៕

អត្ថបទ៖ សឹង រ៉ាត់