សម្ដេចតេជោ ប្រាប់អនុរដ្ឋមន្ត្រីការបរទេសឥណ្ឌា ថា ថៃព្យាយាមបង្វែរបញ្ហាផ្ទៃក្នុងខ្លួនមកបង្កើតជម្លោះជាមួយកម្ពុជា

សម្ដេចតេជោ ហ៊ុន សែន ប្រាប់អនុរដ្ឋមន្ត្រីការបរទេសឥណ្ឌាអំពីហេតុការណ៍ពិតនៃជម្លោះដែលបាននិងកំពុងកើតមានឡើងរវាងកម្ពុជា និងថៃ ដោយសម្ដេចតេជោ អះអាងថា ថៃ កំពុងព្យាយាមបង្វែរសភាពការណ៍ដ៏ស្មុគស្មាញនៅផ្ទៃក្នុងប្រទេសរបស់ខ្លួន មកបង្កើតជាព្រឹត្តិការណ៍នាំឱ្យមានការប្រឈមមុខដាក់គ្នាតាមខ្សែបន្ទាត់ព្រំដែនជាមួយកម្ពុជា។

ការលើកឡើងរបស់សម្ដេចតេជោ បានធ្វើឡើងនៅព្រឹកថ្ងៃទី៧ ខែកក្កដា ឆ្នាំ២០២៥ ក្នុងឱកាសសម្ដេចអនុញ្ញាតឱ្យលោក បាប៊ីត្រា ម៉ាហ្គឺរីតា អនុរដ្ឋមន្រ្តីការបរទេសឥណ្ឌា ចូលជួបសម្តែងការគួរសម នៅវិមានព្រឹទ្ធសភា រាជធានីភ្នំពេញ។ អ្នកនាំពាក្យព្រឹទ្ធសភា លោក ជា ធីរិទ្ធ បានប្រាប់អ្នកសារព័ត៌មានឱ្យដឹងក្រោយជំនួបនេះ ថា សម្តេចតេជោ ហ៊ុន សែន គឺបានលើកឡើងជាមួយនឹងការសោកស្តាយអំពីសកម្មភាពដែលភាគីថៃបានធ្វើឱ្យស្ថានភាពនៃទំនាក់ទំនងប្រទេសទាំងពីរកើតឡើងនូវភាពតានតឹង។

បើតាមលោក ជា ធីរិទ្ធ, សម្ដេចតេជោ ហ៊ុន សែន បានសង្កត់ធ្ងន់ថា សម្តេចមិនមែនជា​អ្នក​នយោបាយ​ឥតគុណធម៌នោះទេ ប៉ុន្តែអ្វីដែលសម្តេចធ្វើ គឺដើម្បីការពារបូរណភាព​ទឹកដី អធិបតេយ្យជាតិ និងមិនចង់ឱ្យមានការប្រមាថចំពោះទឹកដី និងប្រជាជនកម្ពុជា។ ក្នុងន័យនេះ សម្ដេចតេជោ បញ្ជាក់ប្រាប់អនុរដ្ឋមន្ត្រីការបរទេសឥណ្ឌា ថា ការឆ្លើយតបរបស់កម្ពុជាទៅកាន់ប្រទេសថៃ គឺគ្រាន់តែបោះដុំភ្លើង ដែលគេបោះមក​កម្ពុជា ត្រឡប់ទៅកាន់ក្រុងបាងកកវិញប៉ុណ្ណោះ។

បញ្ហាព្រំដែនរវាងកម្ពុជា និងថៃ សម្តេចតេជោ បញ្ជាក់ថា គឺផ្តើមចេញពីភាគីថៃ ដែលបានគូរផែនទីជាឯកតោភាគី និងការបាញ់សម្លាប់​ទាហាខ្មែរដោយ​ទាហានថៃ ​​កាលពីថ្ងៃទី២៨ ខែឧសភា ព្រមទាំងការបិទព្រំដែនដោយឯកតោភាគី និងការ​គំរាម​កំហែង​ផ្សេង​ៗជាច្រើនមកលើកម្ពុជា។

ជាជំហររបស់កម្ពុជា គឺមិនចង់ឃើញសង្គ្រាមជាមួយប្រទេសជិតខាងនោះឡើយ ពោលគឺចង់ឱ្យមានការដោះស្រាយបញ្ហាដោយសន្តិវិធី និងប្រើយន្តការច្បាប់អន្តរជាតិ ជាពិសេសនោះ គឺជ្រើសរើសយកយុត្តាធិការនៃតុលាការយុត្តិធម៌អន្តរជាតិទីក្រុងឡាអេ ដើម្បីនាំយកជម្លោះព្រំដែនដ៏រសើបចំនួន៤ គឺប្រាសាទតាមាន់តូច ប្រាសាទតាមាន់ធំ ប្រាសាទតាក្របី និងតំបន់មុំបី ទៅដោះស្រាយនៅតុលាការអន្តរជាតិនេះ។ សម្ដេចតេជោ អះអាងដូច្នេះ។

ជាការឆ្លើយតប លោកអនុរដ្ឋមន្ត្រីការបរទេសឥណ្ឌា បានអរគុណសម្តេចតេជោ ដែលបាន​ចែករំលែកព័ត៌មានជុំវិញវិវាទ​ព្រំដែនរវាងកម្ពុជា និងថៃ ហើយលោក ក៏បានចាត់ទុកជម្រើសរបស់កម្ពុជាក្នុងការប្តឹងទៅកាន់តុលាការយុត្តិធម៌អន្តរជាតិ ជាចក្ខុវិស័យដ៏វែងឆ្ងាយ ដើម្បីដោះស្រាយបញ្ហាព្រំដែនជាមួយប្រទេសជិតខាង។

ជាការកត់សម្គាល់ នេះមិនមែនជាលើកទី១នោះឡើយដែលសម្ដេច ហ៊ុន សែន តែងប្រាប់ពីជំហររបស់កម្ពុជាលើការដោះស្រាយបញ្ហាព្រំដែនជាមួយថៃ ជាពិសេសប្រាប់ឱ្យបរទេសជួយជំរុញថៃ ទៅដោះស្រាយបញ្ហាព្រំដែននៅតុលាការយុត្តិធម៌អន្តរជាតិជាមួយកម្ពុជា៕