ព័ត៌មានជាតិ

ជនជាតិអាមេរិកមកលេងខេត្តសៀមរាបច្រើនជាងគេក្នុងរយៈពេល៨ខែឆ្នាំ២០២៥

បានផុស

៩ ខែ មុន

នៅ

ថ្ងៃសៅរ៍ ២០ កញ្ញា ២០២៥

ដោយ

អភិបាលរងខេត្តសៀមរាបលោក ង៉ូវ សេងកាក់ បានឱ្យដឹងថាក្នុងរយៈពេល៨ខែក្នុងឆ្នាំ២០២៥នេះភ្ញៀវទេសចរណ៍ជនជាតិអាមេរិកបានមកលេងខេត្តសៀមរាបច្រើនជាងគេ ក្នុងចំណោមភ្ញៀវទេសចរបរទេសទាំងអស់ដែលមកលេងខេត្តនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ង៉ូវ សេងកាក់ បានឱ្យដឹងថាភ្ញៀវទេសចរណ៍ដែលមកលេងខេត្តសៀមរាបទាំង៣ដែលខ្ពស់ជាងគេគឺមកពីបណ្ដាលោកខាងលិច ដែលភ្ញៀវជនជាតិអាមេរិកមាន ៧៤ ៤៩២នាក់ អង់គ្លេស ៦៣ ៥៥៧នាក់ បារាំង ៦០ ៥៨១នាក់។

ដោយឡែកតាមរយៈការលើកឡើងរបស់លោក សេងកាក់ ភ្ញៀវចិនដែលធ្លាប់ស្ថិតនៅលំដាប់កំពូលមកលេងខេត្តសៀមរាបពេលនេះធ្លាក់មកនៅចំណាត់ថ្នាក់ទី៤ ដែលមានភ្ញៀវជិត៦ម៉ឺននាក់។ ខណៈកូរ៉េខាងត្បូងមានជាង៤ម៉ឺននាក់ ជប៉ុន៣,៨ម៉ឺននាក់ អាល្លឺម៉ង់ជាង៣ម៉ឺននាក់ ប្រហាក់ប្រហែលនិងអូស្ត្រាលី ដោយឡែករុស្ស៊ី និងឥណ្ឌាមានប្រហាក់ប្រហែលគ្នាក្នុងរង្វង់ជាង២ម៉ឺននាក់។

បើតាមរបាយការណ៍ទេសចរណ៍ខេត្តសៀមរាបក្នុងរយៈពេល៨ខែ ឆ្នាំ២០២៥នេះខេត្តសៀមរាបទទួលបានភ្ញៀវទេសចរណ៍សរុប ៣ ១១៧ ៧៥៤នាក់ កើនឡើង ៤៥.៧៧ភាគរយ ប្រៀបធៀបនឹងរយៈពេលដូចគ្នា កាលពីឆ្នាំ២០២៤ ដែលមានចំនួន ២ ១៣៨ ៨៥៧នាក់។

ជាមួយនឹងកំណើនភ្ញៀវទេសចរនេះ លោក ង៉ូវ សេងកាក់ បានជំរុញដល់មន្រ្ដីពាក់ព័ន្ធបន្ដខិតខំអនុវត្ដតួនាទី ភារកិច្ចឱ្យបានល្អប្រសើរបន្ថែមទៀត ដើម្បីជាការទាក់ទាញភ្ញៀវទេសចរមកទស្សនាខេត្ដសៀមរាបកាន់តែច្រើន ជាពិសេសត្រូវពិនិត្យលើរឿងអនាម័យ និងសណ្ដាប់ធ្នាប់សាធារណជូនភ្ញៀវទេសចរផងដែរ៕

អត្ថបទដោយ គឿនវេត