មន្រ្តី​បសុពេទ្យ​ខេត្តបន្ទាយមានជ័យ ស្នើ​សមត្ថកិច្ច​ការពារ​ព្រំដែន​ជួយ​ទប់​ស្កាត់​ការ​លួចនាំ​ចូលសត្វ​ខុស​ច្បាប់​ពី​ថៃ

បន្ទាយមានជ័យ ៖ មន្រ្តីជំនាញបសុពេទ្យ នៃមន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ កាល​ពី​ថ្ងៃ​ទី៧ ខែឧសភា ២០២៥ បាន​ចុះ​ពង្រឹង​ការងារត្រួតពិនិត្យ​សត្វពាហណៈ​នាំ​ចូល​ពី​ប្រទេស​ថៃ ដើម្បីអនុវត្តតាមខ្លឹមសារសេចក្តីប្រកាសព័ត៌មាន ស្តីពី ការកើតមានជំងឺឈាមខ្មៅ ឬ ជំងឺអង់ត្រាក់ លើ​សត្វពាហណៈ​នៅ​ប្រទេសថៃ និងផ្សព្វផ្សាយជាមួយសមត្ថកិច្ចកងការពារព្រំដែន ឱ្យ​ជួយ​អន្តរាគមន៍ទប់ស្កាត់ការលួចនាំចូលសត្វដោយខុសច្បាប់ ។

លោក ហ៊ុយ ទូច​ ប្រធាន​ការិយាល័យ​បសុពេទ្យ​នៃមន្ទីរកសិកម្មខេត្តបន្ទាយមានជ័យបាន​ឱ្យដឹងថា បន្ទាប់ពី​ទទួល​បាន​សេចក្តី​ប្រកាសព័ត៌មាន របស់ក្រសួងកសិកម្ម ចុះថ្ងៃទី៦ឧសភា ២០២៥ ស្ដីពី​ករណី​កើត​មាន​ជំងឺ​ឈាម​ខ្មៅ ឬ ជំងឺអង់ត្រាក់ លើ​សត្វពាហណៈ​នៅ​ក្នុង​ប្រទេស​ថៃ និង ការ​ដាក់​ឱ្យអនុវត្តការហាមឃាត់ជាបណ្ដោះអាសន្ន លើការ​នាំចូល​សត្វពាហណៈ​និងផលិតផលសាច់សត្វ ពីច្រកព្រំដែនទាំងអស់នៃប្រទេសថៃ។ លោក​បាន​ដឹក​នាំ​មន្ត្រីជំនាញនៃការិយាល័យបសុពេទ្យ ចុះធ្វើការប្រាស័យទំនាក់ទំនងជាមួយក្រុមហ៊ុននាំចូលសត្វគោក្របីចំនួនពីរក្រុមហ៊ុន ឱ្យ​ផ្អាកការបញ្ជាទិញ និង ផ្អាក​ការ​នាំចូលគោរក្របីពីប្រទេសថៃ រង់ចាំការណែនាំថ្មីពីក្រសួងកសិកម្ម។

ជាមួយនឹងការចុះទំនាក់ទំនងនេះ មន្រ្តីបសុពេទ្យបានធ្វើការត្រួតពិនិត្យសត្វគោក្របី ដែលក្រុមហ៊ុនបាននាំចូលមុនសេចក្តីជូនដំណឹង​នៅ​តាមក្រោលនីមួយៗ គឺឃើញថា សត្វគោ​ក្របី​ទាំង​នោះ​មាន​សុខភាពល្អ ពុំ​មាន​ជំងឺ​អ្វី​ឡើយ ទើបអនុញ្ញាត​ឱ្យដឹកឆ្លងកាត់ទៅប្រទេសវៀតណាម។

ដើម្បី​ឱ្យកាន់តែមានប្រសិទ្ធភាព មន្ត្រី​ជំនាញ​របស់​លោក​ក៏​បាន​ធ្វើការផ្សព្វផ្សាយជាមួយនឹងសមត្ថកិច្ចកងការពារព្រំដែន​ឱ្យ​ជួយ​អន្តរាគមន៍ទប់ស្កាត់​ការ​លួច​នាំ​ចូល​សត្វ​ដោយ​ខុសច្បាប់។ ក្រៅ​ពី​ការ​ទប់ស្កាត់នៅតាមព្រំដែនជាមួយក្រុមហ៊ុននាំចូល មន្ត្រី​របស់​លោកបានធ្វើការចុះត្រួតពិនិត្សស្ថានភាពសុខភាពសត្វ គោ ក្របី ជ្រូក នៅតាម​សត្តឃាតដ្ឋាន​ជា​ប្រចាំ​មុន​ចូល​ពិឃាត​ដើម្បី​ធានា​ថា សត្វ​គ្មាន​ជំងឺឆ្លង​ដើម្បីការពារដល់អ្នកទទួលទានសាច់​ក្នុងខេត្ត​ឃើញថា​សត្វទាំងអស់នេះមានសុខភាពល្អជាធម្មតាទេ ពុំមានអ្វីគត់សំគាល់ឡើយ។

លោកហ៊ុយ ទូច បាន​បន្ត​ឱ្យ​ដឹង​ទៀត​ថា លោក​ក៏​បាន​ធ្វើ​ការ​ផ្សព្វផ្សាយដល់ប្រជាកសិករ និង ភ្នាក់ងារពេទ្យសត្វភូមិ ត្រូវតាមដានសុវត្ថិភាពសត្វគ្រប់ពេល ដឹងរាយការណ៍ មកអាជ្ញាធរដែនដីនិងមន្ត្រីពេទ្យសត្វ ឲ្យបានទាន់ពេលដើម្បីគ្រប់គ្រង ស្ថានភាព បាននៅពេលមានជំងឺឆ្លងជាយថាហេតុ៕

ដោយ ៖ អពៅ