ការបញ្ជាក់ និងការអំពាវនាវរបស់កម្ពុជាធ្វើឡើង ស្របពេលនៅឯតាមព្រំដែនកម្ពុជា-ថៃ នៅតែមានភាពតានតឹង បទឈប់បាញ់មានភាពផុយស្រួយ  ខណៈកន្លងទៅថៃយកលេសបង្ក្រាបការឆបោកតាមអនឡាញលើអធិបតេយ្យ និងបូរណភាពទឹកដីកម្ពុជា ដោយប្រើប្រាស់កងកម្លាំងប្រដាប់អាវុធ ដើម្បីបិទបាំងទង្វើបើកការវាយប្រហារខុសច្បាប់ និងវាតទី កាន់កាប់ទឹកដីកម្ពុជា បំពានខ្សែរព្រំដែនដែលមានការទទួលស្គាល់ជាអន្តរជាតិ។

ក្នុងបទអន្តរាគមន៍ កិច្ចប្រជុំក្រុមប្រឹក្សាសហគមន៍នយោបាយ-សន្តិសុខអាស៊ាន (APSC) លើកទី៣១ នៅទីក្រុងសេប៊ូ ប្រទេសហ្វីលីពីន នៅថ្ងៃទី៧ ខែឧសភា ឆ្នាំ២០២៦ ឧបនាយករដ្ឋមន្ត្រី ប្រាក់ សុខុន បានបញ្ជាក់ជាថ្មីនូវការប្តេជ្ញាចិត្តរបស់កម្ពុជា ចំពោះការដោះស្រាយជម្លោះដោយសន្តិវិធី ការគោរពអធិបតេយ្យ និងការមិនប្រើកម្លាំង ស្របតាមច្បាប់អន្តរជាតិ។ ប្រមុខការទូតកម្ពុជា សង្កត់ធ្ងន់ថា អាស៊ាននៅតែបន្តដើរតួនាទីយ៉ាងសំខាន់ ដែលជាកម្លាំងចលករសម្រាប់សន្តិភាព ស្ថិរភាព និងការជឿទុកចិត្តគ្នា នៅក្នុងតំបន់ និងពិភពលោក។

ក្រសួងការបរទេស និងសហប្រតិបត្តិការអន្តរជាតិ ក្នុងកិច្ចប្រជុំ ឧបនាយករដ្ឋមន្ត្រី ប្រាក់ សុខុន ថ្លែងថា៖«នៅចំពោះមុខការកើនឡើងនៃភាពស្មុគស្មាញស្តីពីបញ្ហាឧក្រិដ្ឋកម្មឆ្លងដែន ជាពិសេសការគំរាមកំហែងតាមប្រព័ន្ធបច្ចេកវិទ្យា កម្ពុជាអំពាវនាវឱ្យមានការបង្កើនកិច្ចសហការក្នុងតំបន់ និងការចូលរួមយ៉ាងសកម្មជាមួយដៃគូ ដើម្បីរួមគ្នាប្រយុទ្ធប្រឆាំងនឹងបទល្មើសទាំងនេះឱ្យមានប្រសិទ្ធភាព។ »។

ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាដែលមានលក្ខណៈឆ្លងដែន កន្លងទៅ កម្ពុជាបានអះអាងថា បានពង្រឹង និងពង្រីកកិច្ចសហប្រតិបត្តិការជាមួយដៃគូ អង្គការអន្តរជាតិ និងយន្តការពហុភាគីពាក់ព័ន្ធ ដើម្បីផ្លាស់ប្តូរព័ត៌មាន និងបច្ចេកទេសរួមគ្នា។ កម្ពុជាបានសហការយ៉ាងសកម្មក្នុងការស្រាវជ្រាវ បង្ក្រាប និងបញ្ជូនជនសង្ស័យ ព្រមទាំងការជួយសង្គ្រោះជនរងគ្រោះ ដែលពាក់ព័ន្ធនឹងបណ្តាញ ឧក្រិដ្ឋកម្មតាម ប្រព័ន្ធបច្ចេកវិទ្យា។

រាជរដ្ឋាភិបាល កម្ពុជា ក៏អំពាវនាវឱ្យមានការសហការពីអន្តរជាតិបន្ថែម ដោយផ្អែកលើគោលការណ៍ទំនួលខុសត្រូវរួម និងការចែករំលែកព័ត៌មានឱ្យបានទាន់ពេលវេលា ដើម្បីបង្កើនប្រសិទ្ធភាពក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា ដែលជាបញ្ហារួមរបស់តំបន់។ កម្ពុជា ក៏បានបញ្ជាក់ជាថ្មីថា ការប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា គឺជាការប្រយុទ្ធប្រឆាំងរយៈពេលវែង ដែលត្រូវការចូលរួមពីគ្រប់ភាគីទាំងក្នុងប្រទេស និងអន្តរជាតិ៕

ដោយ៖ ង៉ិល ណារ៉ាត់

The post កម្ពុជាបញ្ជាក់ជាថ្មីពីការមិនប្រើកម្លាំងដោះស្រាយបញ្ហា និងអំពាវនាវឱ្យអាស៊ានបង្កើនកិច្ចសហការប្រឆាំងឧក្រិដ្ឋកម្មឆ្លងដែន appeared first on Kampuchea Thmey Daily.

តាមរយៈអត្ថបទទស្សនៈនេះដដែល កាសែតWSJ បានទទួលយកការតវ៉ារបស់កម្ពុជា ដែលបានបើកផ្លូវឱ្យពិភពលោកបានឃើញពីការពិតអំពីជំហរ ឆន្ទៈព្រមទាំងកិច្ចខិតខំរបស់កម្ពុជាក្នុងការប្រយុទ្ធប្រឆាំងឧក្រិដ្ឋកម្មឆបោកតាមប្រព័ន្ធបច្ចេកវិទ្យា។
ទោះបីជាមានការចុះផ្សាយអត្ថបទទស្សនៈខាងលើក៏ដោយ ក៏ក្រសួងព័ត៌មាននៅតែរក្សាជំហានដាច់ខាត ក្នុងការទាមទារឱ្យកាសែត WSJ ដកពាក្យ «Scambodia» ដែលបានប្រើដែលជាពាក្យបង្អាប់ និងបង្ខូចកិត្តិយសឈ្មោះប្រទេសកម្ពុជាដូចដែលបានស្នើក្នុងលិខិតផ្លូវការរបស់ឯកឧត្តមរដ្ឋមន្ត្រី។ ក្រសួងព័ត៌មានយល់ឃើញថា ការប្រើប្រាស់ឈ្មោះប្រទេសដែលមានអធិបតេយ្យភាព មកធ្វើជាឧបករណ៍សម្រាប់ចំណងជើងបែបអគតិ គឺជាបង្កការរើសអើងពូជសាសន៍ និងជាការរំលោភលើក្រមសីលធម៌សារព័ត៌មានយ៉ាងធ្ងន់ធ្ងរដែលមិនអាចទទួលយកបាន។

ក្រសួងព័ត៌មាន នឹងបន្តតាមដានករណីនេះយ៉ាងយកចិត្តទុកដាក់បំផុត ដើម្បីការពារកិត្តិយស សេចក្តីថ្លៃថ្នូរ និងអធិបតេយ្យភាពរបស់ព្រះរាជាណាចក្រកម្ពុជា ក្នុងនាមជាសមាជិកស្មើមុខស្មើមាត់នៅក្នុងសហគមន៍អន្តរជាតិ និងក្នុងនាមជាប្រទេសឈានមុខគេមួយក្នុងតំបន់ ដែលបានបន្តកិច្ចខិតខំបោសសម្អាតឧក្រិដ្ឋកម្មឆ្លងដែននេះឱ្យអស់ពីទឹកដីកម្ពុជា។

អ្នកនាំពាក្យក្រសួងព័ត៌មានសូមរំលឹកជូនផងដែរថា បន្ទាប់ពីកាសែតWSJ បានចុះផ្សាយអត្ថបទមួយដែលមានចំណងជើងថា “How Cybercrime Became a Leading Industry in ‘Scambodia’” ក្រសួងព័ត៌មានបានចាត់វិធានការឆ្លើយតបភ្លាមៗ ព្រោះអត្ថបទនេះបានប្រើប្រាស់ពាក្យពេចន៍ខ្វះវិជ្ជាជីវៈ និងមានចរិតលក្ខណៈវិទ្ធង្សនាលើកិត្តិយសជាតិកម្ពុជា។ ជាមួយលិខិតរបស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្រសួងបានស្នើសុំការកែតម្រូវជាផ្លូវនូវកំហុសវិជ្ជាជីវៈ និងស្នើផ្សាយអំពីកិច្ចខិតខំរបស់កម្ពុជាក្នុងការប្រយុទ្ធប្រឆាំងឧក្រិដ្ឋកម្មឆបោកតាមប្រព័ន្ធបច្ចេកវិទ្យា។ បន្ថែមលើនេះទៀត អ្នកនាំពាក្យក្រសួងព័ត៌មាន បានចេញសេចក្តីថ្លែងការណ៍ច្រានចោល និងថ្កោលទោសយ៉ាងដាច់អហង្ការចំពោះការយកឈ្មោះប្រទេសកម្ពុជា ទៅលេងសើចភ្ជាប់នឹងបញ្ហាឧក្រិដ្ឋកម្មសកល ដែលទង្វើនេះគឺជាការប្រមាថយ៉ាងធ្ងន់ធ្ងរដល់អត្តសញ្ញាណ និងសេចក្តីថ្លៃថ្នូររបស់ប្រជាជាតិកម្ពុជាទាំងមូលនៅលើឆាកអន្តរជាតិ៕

The post ការឆ្លើយតបរបស់ WSJ នឹងលិខិតរបស់រដ្ឋមន្ត្រីក្រសួងព័ត៌មាន តវ៉ាចំពោះការផ្សព្វផ្សាយអត្ថបទខ្វះវិជ្ជាជីវៈដែលប៉ះពាល់ដល់កិត្តិយសនិងកេរ្តិ៍ឈ្មោះកម្ពុជា appeared first on Kampuchea Thmey Daily.

ពលរដ្ឋ បាន​បង្ហាញ​នូវ​ការ​គាំទ្រ​ខ្ពស់​ចំពោះ​វិធានការ​ដ៏​ម៉ឺងម៉ាត់​ក្នុង​ការ​កម្ទេច​បទល្មើស​ឧក្រិដ្ឋ​ទាំងឡាយ​ដែល​បាន​បង្ក​អសន្តិសុខ និង​អស្ថិរភាព ដល់​ប្រទេសជាតិ។ ពលរដ្ឋ មិន​ចង់​ឲ្យ​កម្ពុជា ក្លាយ​ជា​ជម្រក នៃ​បទល្មើស​ឧក្រិដ្ឋ​ទាំងឡាយ​នោះ​ទេ។ ពោល គឺ​ចង់​ឲ្យ​កម្ពុជា​លេច​មុខ​លេច​មាត់​នៅ​លើ​ឆាក​អន្តរជាតិ តាមរយៈ​លទ្ធផល​វិជ្ជមាន​ជាច្រើន ដូចជា វប្បធម៌ ទំនៀមទម្លាប់ ប្រពៃណី សន្តិភាព ក៏ដូចជា​ការ​អភិវឌ្ឍ​ជាដើម។

បច្ចុប្បន្ន កម្លាំង​គណៈ​បញ្ជាការ​ឯកភាព​តាម​រដ្ឋបាល​ខណ្ឌ​នីមួយៗ ទាំង ១៤ ក្នុង​ក្រប​ខណ្ឌ​រាជធានី​ភ្នំពេញ បាន​ចុះ​ត្រួតពិនិត្យ​នៅ​តាម​ទីតាំង​ផ្ទះ​ជួល , អគារ​បន្ទប់​ជួល , អគារ​ខុន​ដូរ , ផ្ទះសំណាក់ និង​សណ្ឋាគារ​នានា ដើម្បី​ធ្វើ​បច្ចុប្បន្នភាព​កំណត់​ឲ្យ​បាន​ច្បាស់​អំពី​ការ​រស់នៅ​ដោយ​ស្រប​ច្បាប់​ត្រឹមត្រូវ​របស់​ជនបរទេស​ទាំងឡាយ ជៀសវាង​ការ​ស្នាក់នៅ​ដោយ​លួចលាក់​ប្រព្រឹត្តិ​ឧក្រិដ្ឋកម្ម​ឆបោក​តាម​ប្រព័ន្ធ​បច្ចេកវិទ្យា (Online Scams)។ ការ​ចុះ​រដ្ឋបាល​ត្រួតពិនិត្យ​ជា​ប្រចាំ​នេះ ក៏​មាន​ការ​សហការ​ចូលរួម​យ៉ាង​ល្អ​ពី​តាម​បណ្ដា​ម្ចាស់​ទីតាំង​ពាក់ព័ន្ធ​ទាំងអស់​ផង​ដែរ ដើម្បី​ឲ្យ​ដំណើរការ ទប់ស្កាត់ និង​បង្ក្រាប​បទល្មើស​ឧក្រិដ្ឋ​ឆបោក​នេះ​កាន់តែ​មាន​ប្រសិទ្ធភាព​ខ្ពស់។

កាលពី​ថ្មីៗ នេះ កម្លាំង​អាជ្ញាធរ​មាន​សមត្ថកិច្ច​កម្ពុជា បាន​បន្ត​ប្រតិបត្តិការ​ទ្រង់ទ្រាយ​ធំ​របស់​ខ្លួន​ក្នុង​ការ​ចុះ​បង្ក្រាប​ចំ​ជម្រក​ក្រុម​ឧក្រិដ្ឋជន​ឆបោក​តាម​ប្រព័ន្ធ​បច្ចេកវិទ្យា (Online Scams) នៅ​ក្រុង​បាវិត ខេត្ត​ស្វាយរៀង ដោយ​បាន​ឃាត់ខ្លួន​ជនបរទេស​ជាង ២ ពាន់​នាក់ មាន ០៩ សញ្ជាតិ៕

អត្ថបទ ៖ សុភា

The post ពលរដ្ឋ បន្តគាំទ្រចំពោះប្រតិបត្តិការកម្ទេចចំសម្បុកក្រុមជនបរទេសណាពាក់ព័ន្ធ​ឧក្រិដ្ឋកម្មឆបោកតាមអនឡាញ appeared first on Kampuchea Thmey Daily.

បើតាមអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ក្នុងចំណោមជនបរទេសទាំង ២០៩នាក់នេះ មានទាំងជនរងគ្រោះ និងជនសង្ស័យប្រព្រឹត្តិបទល្មើសឆបោកតាមប្រព័ន្ធបច្ចេកវិទ្យាដែលសមត្ថកិច្ចបានឃាត់ខ្លួន នាពេលកន្លងមក។ សេចក្ដីប្រកាសព័ត៌មានអះអាងថា នេះមិនមែនជាលើកទី១ទេ ដែលកម្ពុជាបានបញ្ជូនជនបរទេស ជាពិសេសជនជាតិកូរ៉េខាងត្បូងទៅប្រទេសខ្លួនវិញ បន្ទាប់ពីពួកគេត្រូវបានសមត្ថកិច្ចរកឃើញថា មានជាប់ពាក់ព័ន្ធនឹងបទល្មើសឆបោក តាមប្រព័ន្ធបច្ចេកវិទ្យា ខណៈដែលកាលពីឆ្នាំ២០២៥កន្លងមក កម្ពុជាក៏បានបញ្ជូនជនជាតិកូរ៉េ ចំនួន ២៤៤នាក់ផងដែរ។

សេចក្ដីប្រកាសព័ត៌មានអះអាងទៀតថា ការបញ្ជូនជនបរទេសខាងលើនេះ គឺជាការអនុវត្តនូវ វិធានការច្បាប់យ៉ាងម៉ឹងម៉ាត់របស់រាជរដ្ឋាភិបាលកម្ពុជា ក្នុងកិច្ចខិតខំបោសសម្អាត ដើម្បីលុបបំបាត់ឧក្រិដ្ឋកម្មតាមប្រព័ន្ធបច្ចេកវិទ្យា ធានាការពារសុវត្ថិភាពជូនប្រជាជន ទាំងក្នុងតំបន់ និងសកលលោក ដោយគ្មានការលើកលែងឡើយចំពោះមេខ្លោង ដែលនៅពីក្រោយ ក៏ដូចជាជួយសង្គ្រោះជនរងគ្រោះ ដែលត្រូវមេខ្លោងបោកបញ្ឆោតឱ្យមកធ្វើការក្នុងសកម្មភាពឆបោកតាមប្រព័ន្ធបច្ចេកវិទ្យានេះ ឱ្យមានសេរីភាព និងអាចវិលត្រឡប់ទៅប្រទេសខ្លួនវិញ។

ចាប់ពីថ្ងៃទី១ ដល់ថ្ងៃទីទី២២ ខែមករា ឆ្នាំ២០២៦ កម្ពុជាបានបណ្តេញ ជនបរទេសសរុបចំនួន១៦២០នាក់មាន២១សញ្ជាតិដូចជា៖ ជនជាតិវៀតណាម ថៃ ចិន ប៉ាគីស្ថាន ឥណ្ឌូនេស៊ី កូរ៉េខាងត្បូង និងជនជាតិភូមាជាដើម។ ក្នុងប្រតិបត្តិការបង្រ្កាបសកម្មភាពឆបោកតាមប្រព័ន្ធបច្ចេកវិទ្យានៅទូទាំងប្រទេសក្នុងរយៈពេល៧ខែចុងក្រោយនេះ សមត្ថកិច្ចកម្ពុជាបានឃាត់ខ្លួនជនសង្ស័យចំនួន៥១០៦នាក់ មាន២៣សញ្ជាតិ និងបណ្តេញចេញទៅប្រទេសដើមវិញចំនួន៤៥៣៤នាក់។

តុលាការកម្ពុជា ក៏បានអនុវត្តនីតិវិធីផ្លូវច្បាប់លើសំណុំរឿងធំៗចំនួន ៣៧ករណី ហើយផ្តន្ទាទោសមេខ្លោង និងបក្ខពួកចំនួន១៧២នាក់ផងដែរ។

សូមបញ្ជាក់ថា ក្នុងក្របខណ្ឌយុទ្ធនាការបោសសម្អាតការឆបោកតាមប្រព័ន្ធ បច្ចេកវិទ្យានេះ ក្រុមសមត្ថកិច្ចជំនាញនៃក្រសួង ស្ថាប័នពាក់ព័ន្ធ និងកំលាំងសមត្ថកិច្ចចម្រុះទូទាំងប្រទេស ដោយធ្វើការសហការជាមួយប្រទេសដៃគូនានា នឹងចាត់វិធានការតាមផ្លូវច្បាប់ យ៉ាងតឹងរឹងបំផុតចំពោះមេខ្លោងទាំងឡាយ ដែលជាប់ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យានេះ ដោយគ្មានការលើកលែងឡើយ៕

The post កម្ពុជាបណ្តេញចេញជនជាតិកូរ៉េខាងត្បូង និងភូមាជាង២០០នាក់ ពាក់ព័ន្ធនឹងការឆបោកតាមអនឡាញ appeared first on Kampuchea Thmey Daily.

ក្រសួងយុត្តិធម៌កម្ពុជា បញ្ជាក់ដូច្នេះថា៖«បុគ្គលខាងលើជាសមាជិកក្រុមឧក្រិដ្ឋជនដែលបានប្រើប្រាស់បណ្តាញសង្គម ដើម្បីទាក់ទងជនរងគ្រោះ និងបានក្លែងជាមានទំនាក់ទំនងមនោសញ្ចាតនាជាមួយនឹងអ្នកទាំងនោះ ហើយបន្ទាប់ពីទទួលបានការទុកចិត្ត បុគ្គលទាំងនេះបានបង្ហាញពីគម្រោងវិនិយោគ និងបានលួងលោមឱ្យជនរងគ្រោះទាំងនោះបណ្តាក់ទុនវិនិយោគជាមួយខ្លួន ក្នុងគោលបំណងឆបោកយកប្រាក់ទាំងនោះ។»។

បន្ទាប់ពីកើតមានជនជាតិកូរ៉េម្នាក់ស្លាប់នៅលើទឹកដីខេត្តកំពត ប្រទេសកម្ពុជា ព្រោះតែការធ្វើទារុណកម្មពីសំណាក់ជនជាតិកូរ៉េខាងត្បូង និងជនពាក់ព័ន្ធនឹងឧក្រិដ្ឋកម្មឆបោកតាមអនឡាញ,  អគ្គស្នងការដ្ឋាននគរបាលជាតិ និងទីភ្នាក់ងារនគរបាលជាតិកូរ៉េ បានចុះអនុស្សរណៈនៃការយោគយល់គ្នា (MOU) ក្នុងការបង្កើតក្រុមការងាររួមមួយរវាងកម្ពុជា និងកូរ៉េ ដើម្បីប្រយុទ្ធប្រឆាំងឧក្រិដ្ឋកម្មឆ្លងដែននានា រាប់ទាំងបទល្មើសឆបោកតាមប្រព័ន្ធបច្ចេកវិទ្យា ដែលជាប់ពាក់ព័ន្ធជាមួយជនជាតិកូរ៉េនៅកម្ពុជា។ ការិយាល័យក្រុមការងាររួមកម្ពុជា-កូរ៉េ សម្រាប់ពលរដ្ឋកូរ៉េ Task Force ក៏ត្រូវបានសម្ពោធដាក់ឱ្យប្រើប្រាស់ជាផ្លូវការកាលពីកន្លងទៅផងដែរ នៅក្នុងនាយកដ្ឋានកណ្តាលសន្តិសុខ នៃអគ្គស្នងការដ្ឋាននគរបាលជាតិ។

សូមរម្លឹកដែរថា  នៅពាក់កណ្ដាលខែតុលា ឆ្នាំ២០២៥ កម្ពុជា បានបញ្ជូនជនជាតិកូរ៉េចំនួន ៦៤នាក់ ទៅប្រទេសកំណើតវិញ។ ពលរដ្ឋកូរ៉េទាំងនេះ ទទួលបានការជួយអន្តរាគមន៍ពីអាជ្ញាធរកម្ពុជា និងត្រូវបានឃាត់ខ្លួនដោយសារបទល្មើសឧក្រិដ្ឋកម្មឆ្លងដែន ការជាប់បោកតាមប្រព័ន្ធបច្ចេកវិទ្យា និងបទល្មើសផ្សេងៗ៕

ដោយ៖ង៉ិល ណារ៉ាត់

The post កម្ពុជា បញ្ជូនមនុស្ស២នាក់ពាក់ព័ន្ធឧក្រិដ្ឋកម្មឆបោកតាមអនឡាញទៅឱ្យកូរ៉េខាងត្បូងវិញ appeared first on Kampuchea Thmey Daily.

មិនទាន់មានសេចក្ដីលម្អិតណាមួយអំពីគោលបំណងនៃជំនួបពិភាក្សាការងារពីខាងរាជរដ្ឋាភិបាលកម្ពុជាឡើយ ប៉ុន្តែបើតាមសេចក្ដីរាយការណ៍របស់សារព័ត៌មានកូរ៉េ ដំណើររបស់រដ្ឋមន្ត្រីការបរទេសកូរ៉េខាងត្បូងមកកម្ពុជា ក្នុងបំណងដើម្បី​ពិភាក្សា​លើ​កិច្ចសហការ​រវាង​ប្រទេស​កូរ៉េ និង​កម្ពុជា​ក្នុង​ការ​ចាប់​ផ្ដើម​សកម្មភាព​រួម​គ្នា​ឱ្យ​បាន​ឆាប់​ប្រឆាំង​នឹង​ឧក្រិដ្ឋកម្ម​ឆបោក​តាម​អនឡាញ​នៅ​កម្ពុជា។

តាមការចុះផ្សាយរបស់សារព័ត៌មានកូរ៉េ ដោយស្រង់សម្ដីអ្នកនាំពាក្យក្រសួងការបរទេសកូរ៉េ  Lee Jae-wo គឺ   ​កម្ពុជា និង​កូរ៉េ​ ក៏​កំពុង​រៀបចំ​អនុស្សរណៈ​នៃ​ការ​យោគយល់​គ្នា​មួយ​លើ​ការងារ​ប្រឆាំង​បទ​ល្មើស​អនឡាញ​នេះ​ផង​ដែរ​។

គួរកត់សម្គាល់ថា ដំណើរទស្សនកិច្ចនេះ កើតមានឡើងក្រោយពីករណី​នៃ​ការ​ធ្វើទារុណកម្ម​ដោយ​ជនជាតិ​ចិន​រហូត​ដល់​ស្លាប់​និស្សិត​កូរ៉េ​ម្នាក់​នៅ​ក្រុង​បូកគោ ខេត្ត​កំពត កាល​ពី​ខែ​សីហា និង​បាន​ផ្ទុះ​ព័ត៌មាន​នៅ​ខែ​តុលា បាន​ធ្វើ​ឱ្យ​ប្រទេស​កូរ៉េ​ខាង​ត្បូង​ប្រតិកម្ម​ជា​បន្ត​បន្ទាប់​រហូត​ដល់​តំបន់​ខ្លះ​នៃ​កម្ពុជា​ជា​តំបន់​ហាម​ប្រាម​កម្រិត​ខ្ពស់​​ថែម​ទៀត​ផង។

នៅមុនដំណើរទស្សនកិច្ចរបស់លោក Cho Hyun មកកាន់កម្ពុជានាពេលនេះ, អនុរដ្ឋមន្ត្រីទី២ នៃក្រសួងការបរទេសកូរ៉េ លោកស្រី គីម ជីណា ក៏ធ្លាប់បានបំពេញទស្សនកិច្ចនៅកម្ពុជា ដោយ ជជែកលើបញ្ហាបទល្មើសឆបោកតាមអនអនឡាញជាមួយនាយករដ្ឋមន្ត្រីកម្ពុជា, មន្ត្រីជាន់ខ្ពស់ក្រសួងការបរទេស,   រដ្ឋមន្ត្រីមហាផ្ទៃ និងអាជ្ញាធរជំនាញ និងបានចុះទៅខេត្តតាកែវជាដើម។

នៅថ្ងៃចុងក្រោយនៃដំណើរទស្សនកិច្ចរបស់លោកស្រី គីម ជីណា នៅកម្ពុជា កាលពីថ្ងៃទី១៦ ខែតុលា សមត្ថកិច្ចកម្ពុជា ក៏បានចាប់បញ្ជូនជនជាតិកូរ៉េខាងត្បូងដែលពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យាចំនួន៦៤នាក់ ដាក់តាមជើងហោះហើរពិសេសបញ្ចូនទៅប្រទេសកំណើតវិញផងដែរ។

កាលពីចុងខែតុលា កន្លងទៅនេះ នាយករដ្ឋមន្ត្រីកម្ពុជា និងប្រធានាធិបតីកូរ៉េ ក៏បានជួបគ្នានៅក្រៅកិច្ចប្រជុំកំពូលអាស៊ាននៅម៉ាឡេស៊ី ជជែកពីបញ្ហាឆបោកតាមអនឡាញ និងអំពីក្រុមការងារចំពោះកិច្ចប្រយុទ្ធប្រឆាំងបទល្មើសឆបោកតាមប្រព័ន្ធអនឡាញដែលដំណើរការនៅខែវិច្ឆិកានេះ។ ក្នុងជំនួបនោះ ប្រធានាធិបតីកូរ៉េខាងត្បូងអះអាងថា បញ្ហាឧក្រិដ្ឋកម្មសាយប័រ ការឆបោកតាមប្រព័ន្ធបច្ចេកវិទ្យាមិនអាចរាំងស្ទះដល់ទំនាក់ទំនងកម្ពុជា នឹងកូរ៉េបានឡើយ៕

The post រដ្ឋមន្ត្រីការបរទេសកូរ៉េខាងត្បូងផ្ដើមទស្សនកិច្ចនៅកម្ពុជា ជាបេសកកម្មផ្ដោតលើការបង្ក្រាបបទល្មើសឆបោកតាមអនឡាញ            appeared first on Kampuchea Thmey Daily.

ទេសភិបាលធនាគារជាតិកម្ពុជា ជា សិរី សរសេរលើបណ្ដាញសង្គមហ្វេសប៊ុកនាថ្ងៃទី២៧ ខែតុលា នេះ ឱ្យដឹងអំពីការការពារមុខមាត់កម្ពុជាលើឆាកអន្តរជាតិដូច្នេះ« ខ្ញុំបានបញ្ជាក់យ៉ាងច្បាស់ថា ព័ត៌មានអំពីការឆបោកតាមប្រព័ន្ធអនឡាញនៅកម្ពុជា គឺជាព័ត៌មានដ៏គួរឱ្យព្រួយបារម្ភ និងបានប៉ះពាល់ដល់កេរ្តិ៍ឈ្មោះប្រទេសកម្ពុជា។ ប៉ុន្តែ ព័ត៌មានទាំងនេះមិនបានឆ្លុះបញ្ចាំងគ្រប់ទិដ្ឋភាពរបស់កម្ពុជានោះទេ។ យើងមានបរិយាកាសវិនិយោគល្អ ដោយមានការលើកលែងពន្ធនានាសម្រាប់គម្រោងដែលមានលក្ខណៈសម្បត្តិគ្រប់គ្រាន់ យើងមានអគ្គិសនីផ្តល់ពីប្រភពថាមពលស្អាត និងមានអាកាសយានដ្ឋានអន្តរជាតិលំដាប់អន្តរជាតិទើបសម្ពោធដាក់ឱ្យណើរការ ដែលជាការវិនិយោគដោយវិនិយោគិនកម្ពុជាសុទ្ធសាធ និងគ្រប់គ្រងដោយកម្ពុជា (មិនដូចការចេញផ្សាយនៅតាមបណ្តាញសារព័ត៌មានមួយចំនួននោះទេ)។ »។

លោកស្រី ឱ្យដឹងថា ក្នុងវេទិកាទាំងពីរនោះ​លោកស្រី ក៏បានសង្កត់ធ្ងន់ថា បញ្ហាឆបោកតាមអនឡាញ គឺជាបញ្ហាសកលដ៏ស្មុគស្មាញ ដែលទាមទារឱ្យមានកិច្ចសហប្រតិបត្តិការអន្តរជាតិ ដើម្បីដោះស្រាយ ហើយប្រតិបត្តិការរបស់ក្រុមល្មើសអនឡាញទាំងនេះបានបង្កើតជាបណ្ដាញប្រទាក់ក្រឡាយ៉ាងស្មុគស្មាញទូទាំងសកលលោក។ បណ្ដាញឆបោកនេះមិនមែនកើតមានតែនៅក្នុងប្រទេសកម្ពុជាទេ តែគឺនៅគ្រប់ទិសទីជុំវិញពិភពលោក ហើយជនរងគ្រោះក៏នៅគ្រប់ទិសទីផងដែរ។

ដើម្បីដោះស្រាយបញ្ហាលើការឆបោកតាមប្រព័ន្ធបច្ចេកវិទ្យា លោកស្រី ជា សិរី បានផ្ដល់ជាយោបល់តាមរយៈវេទិកា កិច្ចពិភាក្សាក្នុងកិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ២០២៥ និងក្នុងកិច្ចប្រជុំកំពូលធុរកិច្ច Bloomberg អាស៊ានថា៖«យើងត្រូវការកិច្ចសហប្រតិបត្តិការអន្តរជាតិ ហើយមិនត្រូវចង្អុលដាក់គ្នានោះទេ។ ក្នុងន័យនេះ ប្រទេសកម្ពុជាប្តេជ្ញាក្លាយជាសមាជិកដែលគួរឱ្យទុកចិត្ត និងមានតម្លាភាពក្នុងវិស័យហិរញ្ញវត្ថុអន្តរជាតិ ហើយបានរឹតបន្តឹងវិធានការ ដើម្បីប្រឆាំងការសម្អាតប្រាក់ និងហិរញ្ញប្បទានភេរវកម្ម (AML/CFT) ហើយយើងនឹងត្រៀមខ្លួនតាមការចាំបាច់ដើម្បីសហការជាមួយអាជ្ញាធរពាក់ព័ន្ធដើម្បីដោះស្រាយបញ្ហានេះ។ បើគិតឱ្យស៊ីជម្រៅជាងនេះ បណ្ដាញឆបោកក៏បង្ហាញពីបញ្ហាជាមូលដ្ឋានជាច្រើនទៀតដូចជា អក្ខរកម្មឌីជីថល នៅក្នុងស្ថានភាពដែលភាពខុសគ្នារវាង AI និងការពិត កាន់តែពិបាកបែងចែក។»។

ជាការកត់សម្គាល់ មួយរយៈចុងក្រោយនេះ គេកត់សម្គាល់ឃើញថា ប្រព័ន្ធផ្សព្វផ្សាយនានា ជាពិសេសប្រព័ន្ធផ្សាយមានមូលដ្ឋាននៅក្នុងប្រទេសក្បែរកម្ពុជា ​បានផ្សព្វផ្សាយព័ត៌មានដែលលើសពីការពិតទាំងស្រុងពាក់ព័ន្ធនឹងករណីឆបោកតាមអនឡាញក្នុងប្រទេសកម្ពុជា។ គេសម្គាល់ឃើញថា សារព័ត៌មានទាំងនោះ បានយកប្រធានរឿង«និស្សិតជនជាតិកូរ៉េម្នាក់ស្លាប់នៅខេត្តកំពត ដែលធ្វើដំណើរមកកម្ពុជាព្រោះចាញ់បោកការអូសទាញរបស់ជាតិកូរ៉េគ្នាឯង» ទៅបង្កើតជាសាច់រឿង បំផ្លើសបំភ្លៃ ទម្លាក់កំហុសមកលើកម្ពុជាផ្ទុយពីការពិត និងកិច្ចខិតខំប្រឹងប្រែងលើការបង្រ្កាបបទល្មើសឆបោកអនឡាញដែលជាបទល្មើសសកល ក្នុងចេតនាបង្ខូចកេរ្ដិ៍ឈ្មោះកម្ពុជា។   

អនុរដ្ឋមន្ត្រីទី២ នៃក្រសួងការបរទេសកូរ៉េ លោកស្រី គីម ជីណា កាលពីពាក់កណ្ដាលខែតុលា បានលើកឡើងថា  ប្រព័ន្ធផ្សព្វផ្សាយព័ត៌មានមួយចំនួន ពុំបានចុះផ្សាយព័ត៌មានពាក់ព័ន្ធនឹងកិច្ចខិតខំប្រឹងប្រែងបង្ក្រាបអនឡាញនៅកម្ពុជាឱ្យបានពេញលេញឡើយ ទោះបីកន្លងមកនគរបាលកម្ពុជា-កូរ៉េ បានសហការគ្នាជាច្រើនលើការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធបច្ចេកវិទ្យា ហើយទទួលបានលទ្ធផលល្អក៏ដោយ  ដែលប្រការនេះបង្កឱ្យមានការយល់ច្រឡំពាក់ព័ន្ធនឹងកិច្ចសហការបង្ក្រាបលើបទល្មើសដ៏ស្មុគស្មាញនេះ។

ដោយហេតុថាការចុះផ្សាយព័ត៌មានផ្ទុយពីការពិត អំពីការខិតខំរបស់កម្ពុជាលើការបង្ក្រាបបទល្មើសឆបោកតាមប្រព័ន្ធបច្ចេកវិទ្យា អាចប៉ះពាល់ដល់កិច្ចសហការក្នុងការប្រយុទ្ធប្រឆាំងបទល្មើសរវាងកម្ពុជា និងកូរ៉េ អគ្គស្នងការនគរបាលជាតិកម្ពុជា និងកូរ៉េ ទប់ស្កាត់នូវរាល់ការផ្សព្វផ្សាយព័ត៌មានមិនពិតធ្វើអោយប៉ះពាល់ដល់ទំនាក់ទំនងកិច្ចសហប្រតិបត្តិការ ដែលភាគីទាំងពីអនុវត្តបានយ៉ាងល្អប្រសើរនាពេលកន្លងមក។

រាជរដ្ឋាភិបាលកម្ពុជា ក្រោមការដឹកនាំរបស់សម្ដេច ហ៊ុន ម៉ាណែត មានឆន្ទៈពិតប្រាកដ ក្នុងការបង្ក្រាបបទល្មើសឆបោកតាមប្រ័ពន្ធបច្ចេកវិទ្យា ដែលជាបទល្មើសរីកសាយភាយរហ័ស តាមរយៈការបង្កើតគណៈកម្មាធិការដែលដឹកនាំផ្ទាល់ដោយនាយករដ្ឋមន្ត្រី និងការដាក់ចេញបទបញ្ជាបន្ទាន់លើការបង្ក្រាប និងផ្ដល់ការសហការជាមួយសមត្ថកិច្ចអន្តរជាតិ។

កន្លងមកកម្ពុជា បានផ្ដល់កិច្ចសហប្រតិបត្តិការជាច្រើនក្នុងការបង្ក្រាបជាមួយអន្តរជាតិ ហើយនៅក្នុងអំឡុង ខែវិច្ឆិកា នេះ ក្រុមការងារចំពោះកិច្ចចម្រុះរវាងកម្ពុជានិងកូរ៉េមួយ នឹងត្រូវបង្កើតឡើង ដើម្បីបង្កើនកិច្ចសហប្រតិបត្តិការរវាងសមត្ថកិច្ចនៃប្រទេសទាំងពីរ ក្នុងការប្រយុទ្ធប្រឆាំងនឹងបទឧក្រិដ្ឋនានាដែលពាក់ព័ន្ធជាមួយជនជាតិកូរ៉េនៅកម្ពុជា រួមទាំងការឆបោកតាមប្រព័ន្ធបច្ចេកវិទ្យា។ ទន្ទឹមនេះ នាយករដ្ឋមន្ត្រីកម្ូជា និងប្រធានាធិបតីកូរ៉េ ក៏បានឯកភាពគ្នា ក្នុងការរួមគ្នាផ្សព្វផ្សាយឱ្យបានទូលំទូលាយនូវពត៌មានអំពីលទ្ធផលវិជ្ជមាននៃកិច្ចសហប្រតិបត្តិការរួមគ្នានេះ៕

ដោយ៖ ង៉ិល ណារ៉ាត់

The post NBC៖ ​កម្ពុជាជាប្រទេសរងគ្រោះមួយពីបញ្ហាឆបោកតាមអនឡាញ appeared first on Kampuchea Thmey Daily.

លោកបណ្ឌិត បានសរសេរថា៖ “ខណៈដែលការស៊ើបអង្កេតនៅតែបន្ត ដើម្បីទទួលបានលទ្ធផលកាន់តែច្បាស់លាស់ជាងនេះ គេគួរតែទុកឱ្យអាជ្ញាធរនិងក្រសួងស្ថាប័នមានសមត្ថកិច្ច រាជរដ្ឋាភិបាល និងប្រទេសពាក់ព័ន្ធ (ក្នុងករណីមាន) ជាអ្នកបកស្រាយឱ្យបានច្បាស់លាស់តាមគោលការណ៍ច្បាប់ ការទូត និងគោលការណ៍អន្តរជាតិ។ មិនគួរមានការបកស្រាយដោយផ្អែកលើទស្សនៈបុគ្គល ដែលនាំទៅដល់ការភាន់ច្រឡំ ពាក់ព័ន្ធនឹងបណ្ដាញ អង្គភាព ឬប្រទេសជាមិត្តណាមួយឡើយ”។ លោកក៏បានសង្កត់ធ្ងន់ដែរថា៖ “កុំរុញបញ្ហាឱ្យទៅជាការតានតឹងភូមិសាស្ត្រនយោបាយ”។

ចំពោះទស្សនៈរបស់បណ្ឌិត យង់ ពៅ លើករណីនេះ លោកថា ៖ “ការបណ្ដោយឱ្យមានករណីឃាតកម្មលើនិស្សិតជនជាតិកូរ៉េខាងត្បូង គឺជារឿងគួរឱ្យសោកស្ដាយមួយដែលកើតឡើងនៅក្នុងប្រទេសកម្ពុជា ពោលគឺខេត្តកំពត។ នេះជារឿងដែលមិនអាចទទួលយកបានទេ ដែលរឿងនេះជាករណីឆរបោកជាសាកល ខណៈក្រុមឧក្រិដ្ឋជនបានយកប្រទេសកម្ពុជា ធ្វើជាទីតាំងប្រព្រឹត្តឧក្រិដ្ឋកម្ម ធ្វើឱ្យកម្ពុជាក្លាយទៅជារូបភាពនយោបាយនៃប្រទេសរងគ្រោះ ហើយត្រូវបានប្រទេសជាមិត្តរបស់កម្ពុជាមួយចំនួន បែរជាចង្អុលមុខមកកម្ពុជា ដែលហាក់ដូចជារឿងនេះកើតឡើងតែនៅប្រទេសកម្ពុជាតែមួយ”។ នៅពេលមានករណីនេះកើតឡើង លោកបណ្ឌិត យង់ ពៅ សង្កេតឃើញពីការដោះស្រាយរបស់រាជរដ្ឋាភិបាលកម្ពុជា ដោយបង្ហាញពីការទទួលខុសត្រូវចំពោះបញ្ហានេះ តាមរយៈការចាត់វិធានការជាបន្តបន្ទាប់ គឺរាជរដ្ឋាភិបាលមានចំណាត់ការយ៉ាងសកម្ម ទៅលើបញ្ហានេះ ដើម្បីឆ្លើយតបយ៉ាងសមស្របចំពោះមុខ និងនៅក្នុងទំនួលខុសត្រូវក្នុងនាមជារដ្ឋាភិបាល។

លោកបណ្ឌិត បានបញ្ជាក់ទៀតថា៖ “ខ្ញុំក៏គួរគូសបញ្ជាក់ផងដែរថា ចំពោះករណីនេះ អ្នកវិភាគមួយចំនួន ក៏ដូចជាអ្នកបញ្ចេញមតិទស្សនៈសង្គមផ្សេងៗ មិនគួរ ប្រញាប់ប្រញាល់ពេកក្នុងការទាញភ្ជាប់កម្ពុជានឹងបណ្ដាញនេះឬបណ្ដាញនោះ នៃប្រទេសណាមួយនោះទេ។ គេមិនគួរទាញភ្ជាប់នាំឱ្យមានហេតុផល ដែលឈានទៅដល់ការតានតឹងភូមិសាស្ត្រនយោបាយជាមួយប្រទេសឬមហាអំណាចណាមួយនោះឡើយ ខណៈភូមិសាស្ត្រនយោបាយតំបន់ និងពិភពលោកកំពុងតែមានភាពតានតឹងស្រាប់” ៕

The post បណ្ឌិត យង់ ពៅ ថា ករណីកូរ៉េខាងត្បូង គួរតែទុកឱ្យអាជ្ញាធរជំនាញបកស្រាយ​ឱ្យច្បាស់លាស់តាមគោលការរណ៍ច្បាប់ appeared first on Kampuchea Thmey Daily.