ការត្រួតពិនិត្យបានរកឃើញថា សិប្បកម្មនេះចាប់ផ្តើមដំណើរការនៅខែមករា ឆ្នាំ២០២៦ ដោយទើបប្លាស់ប្ដូរថៅកែថ្មី ប្ដូរឈ្មោះថ្មី និងបម្រុងប្លាស់ប្ដូរទីតាំងថ្មី ដែលមានកម្មករសរុប ៨០នាក់ ក្នុងនោះប្រុស ៩នាក់។ មន្ត្រីជំនាញក៏បានបញ្ជាក់ដែរថា សិប្បកម្មកំពុងទាក់ទងរៀបចំធ្វើកិច្ចសន្យាជាមួយក្រុមហ៊ុនប្រមូល និងដឹកជញ្ជូនសំរាមសម្រាប់គ្រប់គ្រងសំណល់ឧស្សាហកម្ម និងសំណល់ផ្ទះបាយ។

កំពុងដំណើការរៀបចំធ្វើច្បាប់ពាក់ព័ន្ធទាំងអស់ ការត្រួតពិនិត្យឡចំហាយឃើញថា ទើបសម្អាតរួច មិនមានស្បោងក្រណាត់នៅក្បែរឡចំហាយនោះទេ និងមានក្លិនតិចតួច និងមានគំនរអុសសើមនៅក្បែសម្រាប់ដុត មន្ទីរបរិស្ថានបានណែនាំកុំឱ្យដុតឬបង្កាត់កម្ទេចក្រណាត់ក្នុងឡចំហាយទោះក្នុងគោលបំណងអ្វីក៏ដោយ និងត្រូវធ្វើរោងដាក់អុសឱ្យបានត្រឹមត្រូវ កុំឱ្យសើមជាហេតុធ្វើឱ្យពេលដុតមានផ្សែងខ្លាំង។

សូមបញ្ជាក់ដែរថា រៀងរាល់ថ្ងៃ ប្រជាពលរដ្ឋបានឃើញផ្សែងខ្មៅ និងមានក្លិនស្ងៀម ដែលដុតចេញពីរោងចក្រកាត់ដេរសម្លៀកបំពាក់ខាងលើ និងបង្កឱ្យប៉ះពាល់បរិស្ថានលើដងផ្លូវ និងសុខភាពរបស់ពួកគាត់ក្នុងពេលធ្វើដំណើរ ក៏ដូចជាពលរដ្ឋដែលរស់នៅជិតនោះ ហើយពួកគាត់ស្នើរដល់អាជ្ញាធរគ្រប់លំដាប់ថ្នាក់ និងមន្ទីរក្រសួងពាក់ព័ន្ធ មេត្តាជួយមានវិធានការផ្លូវច្បាប់ ទៅលើទីតាំងមួយនេះផង៕

អត្ថបទ៖ វីរៈ

The post មន្ត្រីបរិស្ថានខេត្តតាកែវ ចុះណែនាំដល់ម្ចាស់សិប្បកម្មមួយកន្លែងក្រោយបង្កក្លិនដល់ពលរដ្ឋ appeared first on Kampuchea Thmey Daily.

អាជ្ញាធរបានឱ្យដឹងថា​ ក្រោយពីទទួលព័ត៌មានពី ប្រជាពលរដ្ឋថា​ មានរោងចក្រកាត់ដេរមួយកន្លែង​ ដុតកម្ទេចក្រណាត់បង្ហុយផ្សែង​ និង ក្លិនមិនល្អ​ រំខានដល់ការរស់នៅរបស់ពលរដ្ឋនៅជុំវិញ​ ក្រោមការចង្អុលបង្ហាញពី លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ លោក សំ សារ៉ាវុធ អភិបាលរងខណ្ឌពោធិ៍សែនជ័យ បានដឹកនាំក្រុមការងារចម្រុះ សហការជាមួយមន្ទីរបរិស្ថាន ចុះត្រួតពិនិត្យរោងចក្រកាត់ដេរខាងលើតែម្តង។

ក្រោយត្រួតពិនិត្យ​ អាជ្ញាធរបានរកឃើញថា​ ទីតាំងនេះពិតជាបង្កការបំពុលបរិស្ថាន។ ទីតាំងនេះបានដុតកម្ទេចក្រណាត់ក្នុងឡចំហាយ បណ្ដាលឱ្យផ្សែងហុយ និងសាយភាយក្លិនមិនល្អ​។ ក្នុងនោះផងដែរអាជ្ញាធរបានបញ្ជាក់ថា ទីតាំងនេះមានវិញ្ញាបនបត្របញ្ជាក់ការចុះឈ្មោះក្នុងបញ្ជីពាណិជ្ជកម្ម ប៉ុន្តែមិនមានច្បាប់អនុញ្ញាតសិប្បកម្ម និងច្បាប់បរិស្ថាន នោះទេ។

ជាមួយគ្នាអាជ្ញាធរ​បានធ្វើការណែនាំម្ចាស់ទីតាំង​ ត្រូវបញ្ឈប់ការដុតកំទេចក្រណាត់ ក្នុងឡចំហាយ, ត្រូវស្នើសុំច្បាប់អនុញ្ញាតឱ្យបានត្រឹមត្រូវ, ត្រូវទទួលរងការផាកពិន័យតាមច្បាប់។ ក្នុងករណីមិនអនុវត្តតាមការណែនាំ រដ្ឋបាលខណ្ឌនឹងចាត់វិធានការតាមផ្លូវច្បាប់ និងសុំគោលការណ៍ថ្នាក់លើផ្អាកការធ្វើអាជីវកម្មជាបណ្ដោះអាស្នន។ រដ្ឋបាលខណ្ឌ នឹងបន្តយកចិត្តទុកដាក់ខ្ពស់លើសុខុមាលភាព និងបរិស្ថានរស់នៅរបស់ប្រជាពលរដ្ឋជានិច្ច៕ ដោយ៖សុខា

The post រដ្ឋបាលខណ្ឌពោធិ៍សែនជ័យ ចុះណែនាំរោងចក្រកាត់ដេរ ក្រោយពលរដ្ឋប្តឹងថាបង្កផ្សែងក្លិនមិនល្អ appeared first on Kampuchea Thmey Daily.

ថ្លែងនាសន្និសីទសារព័ត៌មាន នាអាកាសយានដ្ឋានអន្តរជាតិតេជោ រដ្ឋមន្ត្រី អ៊ាង សុផល្លែត  បានបញ្ជាក់ថា គម្រោងសំខាន់ៗចំនួន៦ ត្រូវបានទទួលការគាំទ្រពីអង្គការសហប្រជាជាតិ និងដៃគូអភិវឌ្ឍធ្វើឱ្យប្រសើរឡើងនូវភាពស្អាត ភាពបៃតង កាត់បន្ថយការប្រែ ប្រួលអាកាសធាតុ និងការរស់នៅប្រកបដោយចីរភាព។

 គម្រោងទាំង៦ ដែលទទូលបានការគាំទ្រនោះគឺ៖ ទី១/ កម្មវិធីចីរភាពបឹងទន្លេសាបសម្រាប់អនុវត្តរយៈពេល២៥ឆ្នាំ រហូតដល់ឆ្នាំ២០៥០ ដោយផ្តោតលើសុខភាពនៃបឹងសាប ការការពារបរិស្ថានទប់ស្កាត់ការបំពុល ការបង្កើននូវជីវចម្រុះ និងមច្ឆាជាតិ និងការបង្កើនជីវភាពសហគមន៍មូលដ្ឋានដែលធន់ការប្រែប្រួលអាកាសធាតុ។ ទី២/ គម្រោងរៀបចំកោះស្រឡៅ ក្នុងភូមិសាស្ត្រខេត្តកោះកុង ឱ្យក្លាយជាកោះអព្យាក្រិតកាបូន និងជាកោះដែលល្អជាងគេបំផុតនៅអាស៊ី។ ទី៣/ គម្រោងអភិរក្សពូជក្តាមតំបន់ឆ្នេរក្នុងភូមិសាស្រ្តស្រុកស្រែអំបិល ខេត្តកោះកុង។

 ទី៤/ គម្រោងអភិវឌ្ឍន៍តំបន់ខ្នងផ្សារ ខេត្តកំពង់ស្ពឺ ស្របតាមការណែនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ដើម្បីផ្តល់ជូនសហគមន៍មានការអភិវឌ្ឍជីវភាពឱ្យកាន់តែប្រសើរ និងចូលរួមការពារនិងអភិរក្សធនធានធម្មជាតិប្រកបដោយចីរភាព។ ៥. គម្រោងអភិវឌ្ឍន៏តំបន់ទេទឹកពុះ នៅខេត្តកំពង់ស្ពឺ ដើម្បីប្រែក្លាយឱ្យសហគមន៍ជាសហគមន៍អព្យាក្រឹតកាបូន និងផ្តល់ប្រយោជន៏ផ្ទាល់ដល់ប្រជាពលរដ្ឋនៅក្នុងមូលដ្ឋាន ដែលបានទទួលប្រយោជន៍ពីគម្រោងសម្រាប់ការបង្កើនជីវភាពកាន់តែប្រសើរ។ ៦. កម្ពុជាទទួលបានគម្រោងអភិវឌ្ឍន៍ក្នុងទឹកប្រាក់ប្រមាណ ៤លានដុល្លារ សម្រាប់ការកាត់បន្ថយការសាយភាយកាបូនខ្មៅ ចូលរួមក្នុងការឆ្លើយតបនឹងការប្រែប្រួលអាកាសធាតុ ដែលជាបញ្ហាសកល។

គួរ​​​ឱ្យដឹងថា ក្នុងឱកាសនៃសន្និសីទ COP30 រដ្ឋមន្ត្រីក្រសួងបរិស្ថានកម្ពុជា បានអញ្ជើញចូលរួមក្នុងព្រឹត្តិការណ៍សំខាន់ៗចំនួន១១ និងបានឡើងថ្លែងសន្ទរកថាគន្លឹះតំណាងឱ្យប្រទេសកម្ពុជា និងកិច្ចប្រជុំថ្នាក់រដ្ឋមន្រ្តី សម្រាប់ភាពជាដៃគូកិច្ចដឹកនាំសម្រាប់វិស័យព្រៃឈើ និងអាកាសធាតុ រួមទាំងការចែករំលែក និងបង្ហាញពីដំណើរការរបស់កម្ពុជា រួមចំណែកឆ្លើយតបនឹងការប្រែប្រួលអាកាសធាតុ តាមរយៈផែនការរួម ចំណែកជាតិ NDC3.0 ដែលរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្តេចអគ្គមហា សេនាបតីតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្ន ជាប្រធានព្រឹទ្ធសភា និងបានបន្តវេនដឹកនាំប្រកបដោយស្វាហាប់និងវាងវៃ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដាក់ជូនយ៉ាងជោគជ័យ ទៅកាន់អនុសញ្ញាក្របខ័ណ្ឌសហប្រជាជាតិ ស្តីពីការប្រែប្រួលអាកាសធាតុ (UNFCCC) នៅថ្ងៃទី៨ ខែសីហា ឆ្នាំ២០២៥។

រដ្ឋមន្ត្រីក្រសួងបរិស្ថាន អះអាងថា  ការដាក់ជូននូវផែនការជាតិនេះ សបញ្ជាក់ពីការប្តេជ្ញាចិត្តឥតងាករេរបស់កម្ពុជា ក្នុងការឆ្លើយតបនឹងការប្រែប្រួលអាកាសធាតុសកល និងដើម្បីសម្រេចគោលបំណងនៃកិច្ចព្រម ព្រៀងទីក្រុងប៉ារីស ស្តីពីការប្រែប្រួលអាកាស ធាតុ។ កម្ពុជាបានគូសបញ្ជាក់អំពីការពង្រឹងគោលដៅក្នុងការកាត់បន្ថយការបញ្ចេញឧស្ម័នផ្ទះកញ្ចក់ និងការបន្ស៊ាំនឹងការប្រែប្រួលអាកាសធាតុ តាមរយៈវិស័យអាទិភាព ចំនួន៥ គឺវិស័យឧស្សាហកម្ម ថាមពល កសិកម្ម ព្រៃឈើ និងសំណល់ ក្នុងគោលដៅកាត់បន្ថយការបញ្ចេញឧស្ម័នផ្ទះកញ្ចក់រហូតដល់ ៥៥% នៅឆ្នាំ ២០៣៥។

ក្រៅពីការចូលរួមជាអធិបតី និងជាភ្ញៀវកិត្តិយស ក្នុងឱកាសស្នាក់នៅនិងអញ្ជើញចូលរួមក្នុងសន្និសីទ COP30 ឆ្នាំ២០២៥នេះ រដ្ឋមន្ត្រី អ៊ាង សុផល្លែត ក៏បានជួបពិភាក្សាជាមួយថ្នាក់ដឹកនាំនៃបណ្តាប្រទេសមួយចំនួន បណ្តាដៃគូសហការ និងដៃគូអភិវឌ្ឍអន្តរជាតិ ដើម្បីពង្រឹងទំនាក់ទំនង និងកិច្ចសហប្រតិបត្តិការទ្វេភាគី និងពហុភាគី រួមចំណែកជាមួយសហគមន៍អន្តរជាតិឆ្លើយតបនឹងការប្រែប្រួលអាកាសធាតុ និងការពង្រឹងកិច្ចការការពារបរិស្ថាន និងគ្រប់គ្រងធនធានធម្មជាតិនៅកម្ពុជាឱ្យបានកាន់តែប្រសើរថែមទៀត៕

The post រដ្ឋមន្ត្រីបរិស្ថាន៖ គម្រោងសំខាន់ៗចំនួន៦ ទទួលបានការគាំទ្រពីUN និងដៃគូអភិវឌ្ឍនាកិច្ចប្រជុំ COP30 នៅប្រេស៊ីល appeared first on Kampuchea Thmey Daily.

ក្នុងរយៈពេល១០ខែក្នុងឆ្នាំ២០២៥
គិតចាប់ពីខែមករា ដល់ខែតុលា ឆ្នាំ២០២៥ ក្រសួងបរិស្ថាន បានធ្វើការទប់ស្កាត់ការបញ្ចេញសំណល់រាវបំពុលបរិស្ថានពីរោងចក្រ សហគ្រាសនិងក្រុមហ៊ុននានា ស្របតាមវិធានការច្បាប់ បានចំនួន១៥ ៨៩៤ ៤៥០ ម៉ែត្រគូប។ ដោយឡែកគ្រាន់តែក្នុងខែតុលា ឆ្នាំ២០២៥ ក្រសួងបរិស្ថានបានទប់ស្កាត់ការបញ្ចេញសំណល់រាវមិនឱ្យមានការបំពុលបរិស្ថាន បានចំនួនប្រមាណ២លានម៉ែត្រគូប។ នេះបើតាមអ្នកនាំពាក្យក្រសួងបរិស្ថាន លោក ខ្វៃ អាទិត្យា។

អ្នកនាំពាក្យក្រសួងបរិស្ថាន លោក ខ្វៃ អាទិត្យា បានបញ្ជាក់ថា លទ្ធផលសម្រេចបាននេះ គឺស្របតាមគោលនយោបាយនិងយុទ្ធសាស្រ្តរបស់រាជរដ្ឋាភិបាលកម្ពុជា និងការដឹកនាំចង្អុលបង្ហាញដ៏ខ្ពង់សខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការទប់ស្កាត់និងកាត់បន្ថយការបំពុលទឹកសាធារណៈ។ ជាមួយគ្នានេះ យុទ្ធសាស្រ្តចក្រាវិស័យបរិស្ថាន ដែលបានដាក់ចេញ ដោយអនុលោមតាមយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក៏បានដាក់ចេញសសរស្តម្ភចំនួន៣ គឺភាពស្អាត ភាពបៃតង និងចីរភាព។

អ្នកនាំពាក្យក្រសួងបរិស្ថាន បានឱ្យដឹងដែរថា ចំពោះភាពស្អាត គឺក្រសួងបរិស្ថាន បានធ្វើការផ្សព្វផ្សាយ ដាក់ចេញជាយុទ្ធនាការ និងអនុវត្តសកម្មភាព ដើម្បឱ្យកម្ពុជាមានភាពស្អាតទាំងនៅលើផ្ទៃដី ភាពស្អាតក្នុងទឹក និងភាពស្អាតលើមេឃ។ ចំពោះភាពស្អាតក្នុងទឹកនេះ ក្រសួងបរិស្ថានបានរួមបញ្ចូលយុទ្ធនាការទប់ស្កាត់ការបញ្ចេញសំណល់រាវបំពុលតំបន់ទឹកសាធារណៈ និងបរិស្ថាន។ កន្លងមកនេះ ម្ចាស់រោងចក្រ សហគ្រាសនិងក្រុមហ៊ុននានា បានចូលរួមជាបន្តបន្ទាប់បំពាក់ឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ ដើម្បីរួមគ្នាទប់ស្កាត់ការបញ្ចេញសំណល់រាវមិនត្រឹមត្រូវ នាំឱ្យមានការបំពុលតំបន់ទឹកសាធារណៈ ប៉ះពាល់ដល់បរិស្ថាននិងការរស់នៅរបស់ប្រជាពលរដ្ឋ។

ជាមួយគ្នានេះ លោក ខ្វៃ អាទិត្យា បានថ្លែងថា ការទប់ស្កាត់ការបញ្ចេញសំណល់រាវដែលនាំឱ្យមានការបំពុលបរិស្ថាន បានចែងតាមច្បាប់ជាធរមានរបស់កម្ពុជា ក្នុងក្រមបរិស្ថាន និងធនធានធម្មជាតិ ត្រង់មាត្រា១៧៨ មាត្រា២៨៧ មាត្រា២៨៨ មាត្រា៨២៩ ទាក់ទងនឹង ការបញ្ចេញសំណល់ ឬសារធាតុបំពុលទៅក្នុងបរិស្ថាន មិនស្របតាមស្តង់ដារបញ្ចេញសំណល់រាវ ត្រង់មាត្រា៨៤៥ ការមិនអនុវត្តកាតព្វកិច្ចក្នុងការគ្រប់គ្រងសំណល់រាវ និងទឹកកខ្វក់។ លើសពីនេះ ការត្រួតពិនិត្យការបំពុលទឹក ការកាត់បន្ថយនិងទប់ស្កាត់ការបំពុលតំបន់ទឹកសារធារណៈ ក៏មានចែងក្នុងបទដ្ឋានគត្តិយុត្តមួយចំនួនផ្សេងទៀត ដែលបានចូលជាធរមាន របស់ព្រះរាជាណាចក្រកម្ពុជា។

អ្នកនាំពាក្យឱ្យដឹងថា គិតត្រឹមខែតុលា ឆ្នាំ២០២៥នេះដែរ រោងចក្រ សហគ្រាស និងក្រុមហ៊ុនចំនួ៦១ ទីតាំង បានចុះកិច្ចសន្យា ក្នុងនោះមាន៤៨ទីតាំង បានបំពាក់ឧបករណ៍ស្វ័យត្រួតពិនិត្យ និងប្រព័ន្ធគ្រប់គ្រងទិន្នន័យការបញ្ចេញសំណល់រាវ នៅតាមទីតាំងរៀងៗខ្លួន៕

The post រយៈពេល១០ខែ ក្រសួងបរិស្ថានទប់ស្កាត់ការបំពុលបរិស្ថានតាមរយៈការបញ្ចេញសំណល់រាវពីរោងចក្រសហគ្រាសនានា បានចំនួនជិត១៦លានម៉ែត្រគូប appeared first on Kampuchea Thmey Daily.

ការចុះផ្អាកដំណើរការផលិតកម្មរោងចក្រកែច្នៃស្បែកសត្វនេះ គឺអនុវត្តតាមលិខិតលេខ ៤៨២២/០៦២៥ ប.ស្ថ/អគព ចុះថ្ងៃទី១៣ ខែមិថុនា ឆ្នាំ២០២៥ របស់ក្រសួងបរិស្ថាន និងលិខិតលេខ ៤៤៧/២៥ សជណ ចុះថ្ងៃទី២១ ខែតុលា ឆ្នាំ២០២៥ របស់រដ្ឋបាលខេត្តព្រះសីហនុ។

លោក ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ បានបញ្ជាក់ថា ក្រុមហ៊ុន គូប៊ុន (ខេមបូឌា) ជាក្រុមហ៊ុនកែច្នៃស្បែកសត្វ នៅក្នុងស្រុកព្រៃនប់ ខេត្តព្រះសីហនុ ដែលរោងចក្ររបស់ក្រុមហ៊ុននេះបានបំពុលបរិស្ថាន ធ្វើឱ្យប៉ះពាល់ដល់ជីវចម្រុះជុំវិញតំបន់។

លោកអភិបាលរងបន្ថែមថា កន្លងមកក្រសួងបរិស្ថាន និងរដ្ឋបាលខេត្តធ្លាប់បានធ្វើការណែនាំឱ្យកែតម្រូវ និងធ្វើការផាកពិន័យជាច្រើនលើកច្រើនសារមកហើយ តែក្រុមហ៊ុននៅមិនមានការកែតម្រូវ។ ដូច្នេះ ការផ្អាកដំណើរការផលិតកម្មរោងចក្រនេះ គឺដើម្បីបញ្ឈប់នូវរាល់សកម្មភាពដែលអាចឈានទៅដល់ការបំពុលបរិស្ថានបន្ថែមទៀត ហើយសង្វាក់ផលិតកម្មទាំងមូលនឹងត្រូវផ្អាករហូតដល់មានការកែតម្រូវឱ្យស្របតាមស្តង់ដារបច្ចេកទេស។

បើតាមលោក ឡុង ឌីម៉ង់ ក្នុងបេសកកម្មនេះ តំណាងក្រុមហ៊ុនបានចូលរួមអនុវត្តតាមសេចក្តីជូនដំណឹងរបស់រដ្ឋបាលខេត្ត ដើម្បីរៀបចំស្តារប្រព័ន្ធលូ និងអាងប្រព្រឹត្តកម្មឱ្យស្របទៅតាមបទដ្ឋានបច្ចេកទេសរបស់ក្រសួងបរិស្ថាន មុននឹងស្នើសុំបើកដំណើរផលិតកម្មឡើងវិញ៕

The post រដ្ឋបាលខេត្តព្រះសីហនុ ចុះផ្អាកដំណើរការផលិតកម្មរោងចក្រកែច្នៃស្បែកសត្វមួយកន្លែងដែលធ្វើឲ្យប៉ះពាល់ដល់បរិស្ថានក្នុងតំបន់ appeared first on Kampuchea Thmey Daily.

តាមរបាយការណ៍របស់សារព័ត៌មាន CNN បានបង្ហាញថា រហូតដល់ ៩០% នៃគំរូប្រូតេអ៊ីនសត្វ និងរុក្ខជាតិដែលត្រូវបានធ្វើតេស្តមានផ្ទុកមីក្រូប្លាស្ទិក។ គួរកត់សម្គាល់ថា អាហារសមុទ្រ ដែលជាអាហារពេញនិយមសម្រាប់មនុស្សជាច្រើន ត្រូវបានគេរកឃើញថាមានជាតិពុលខ្លាំងបំផុត។

ទី១ បង្គា បង្គាគឺជាប្រភពអាហាររបស់សត្វ Plankton ដែលប្រមូលផ្តុំមីក្រូប្លាស្ទិកអណ្តែតក្នុងចរន្តទឹក។ នេះធ្វើឲ្យបង្គាក្លាយជាអ្នកប្រមូលផ្តុំ ដ៏មានសក្តានុពលសម្រាប់ភាគល្អិតប្លាស្ទិក។ ការវេចខ្ចប់ប្លាស្ទិកកំឡុងពេលផ្ទុក និងដឹកជញ្ជូនធ្វើឲ្យបញ្ហានៃការចម្លងរោគមីក្រូប្លាស្ទីកកាន់តែធ្ងន់ធ្ងរ។

ការសិក្សាមួយដែលត្រូវបានចេញផ្សាយនៅក្នុងទស្សនាវដ្តី Environmental Research ក៏បានរកឃើញថា បង្គាចៀន និងបំពង មានផ្ទុកមីក្រូប្លាស្ទិកយ៉ាងច្រើន ដែលជាមធ្យមមានច្រើនជាង ៣០០ បំណែក នៃប្លាស្ទិកក្នុងមួយពេល។

ទី២.អយស្ទ័រ ការស្រាវជ្រាវពីសាកលវិទ្យាល័យ Hull បានរកឃើញថា អយស្ទ័រមានផ្ទុកមីក្រូប្លាស្ទិកច្រើន។ (ចក្រភពអង់គ្លេស) សត្វអយស្ទ័រ និងសំបកខ្យងផ្សេងទៀតដូចជា មឹក និងខ្យង ត្រូវបានគេរកឃើញថាមានកម្រិតមីក្រូប្លាស្ទិកខ្ពស់ជាងសាច់ក្តាម ឬបង្គា។

ជាពិសេស អយស្ទ័រ​ដែល​ចាប់បាន​ក្នុង​ដែនទឹក​អាស៊ី គឺជា​សត្វ​ដែល​មាន​មេរោគ​ច្រើនជាងគេ​។ ការសិក្សាមួយពីសាកលវិទ្យាល័យ Queensland ប្រទេសអូស្ត្រាលី បានបញ្ជាក់ពីវត្តមានរីករាលដាលនៃមីក្រូប្លាស្ទិកនៅក្នុងសត្វអយស្ទ័រ។

ទន្ទឹមនឹងនោះ អ្នកជំនាញបានផ្តល់អនុសាសន៍ថា អ្នកបរិភោគត្រូវលាងសម្អាតអាហារឲ្យបានហ្មត់ចត់ មុនពេលចម្អិនអាហារ ដើម្បីកម្ចាត់មីក្រូប្លាស្ទិកលើផ្ទៃ។ ពួកគេផ្តល់អាទិភាពដល់អាហារស្រស់ ដូចជាអាហារកែច្នៃ ក្លាសេ និងអាហាររហ័ស ជាញឹកញាប់មានផ្ទុកមីក្រូប្លាស្ទិកខ្ពស់ជាង។

ដូចគ្នានេះផងដែរ ការជ្រើសរើសអាហារដែលមានប្រភពច្បាស់លាស់អាចជួយកំណត់ការទិញអាហារសមុទ្រពីប្រភពកខ្វក់។ ពួកគេក៏គួរតែកាត់បន្ថយការប្រើប្រាស់ការវេចខ្ចប់ប្លាស្ទិកចោល ហើយជំនួសវាដោយសម្ភារៈដែលមានសុវត្ថិភាពជាងមុន ដើម្បីចៀសវាងការលេចធ្លាយមីក្រូប្លាស្ទិកអំឡុងពេលផ្ទុក។

ការសិក្សាមួយបានរកឃើញថា មីក្រូប្លាស្ទីក និង ណាណូផ្លាស្ទិក បង្កឲ្យមានភាពតានតឹងអុកស៊ីតកម្មនៅក្នុងប្រព័ន្ធសរសៃប្រសាទកណ្តាល។ ជាងនេះទៅទៀត មីក្រូប្លាស្ទីកក្នុងអាហារ ក៏អាចផ្សារភ្ជាប់ទៅនឹងជំងឺធ្លាក់ទឹកចិត្ត និងការថប់បារម្ភ។ អ្នកស្រាវជ្រាវព្រមានថា ទាំងនេះអាចជះឥទ្ធិពលអវិជ្ជមានដល់ការអភិវឌ្ឍន៍ខួរក្បាល បង្កការរលាក និងរំខានដល់ដំណេក និងអារម្មណ៍មិនល្អ។

ជាងនេះទៅទៀត មីក្រូប្លាស្ទិកកំពុងជ្រៀតចូលទៅក្នុងរបបអាហារប្រចាំថ្ងៃរបស់យើង ដោយយើងមិនបានដឹងអំពីវាឡើយ។ ប្រសិនបើយើងមិនផ្លាស់ប្តូរអាកប្បកិរិយារបស់យើងនៅថ្ងៃនេះទេ យើងអាចបង់ថ្លៃសម្រាប់សុខភាពរបស់យើង។ ឬសូម្បីតែជីវិតរបស់យើងនាពេលអនាគតដ៏ខ្លី៕

អត្ថបទ៖ សាង ស្រីល័ក្ខ

ចុចអាន៖ការស្រាវជ្រាវដ៏ភ្ញាក់ផ្អើលមួយបង្ហាញថា មីក្រូផ្លាស្ទិក ជាមូលហេតុថ្មីនៃជំងឺពុកឆ្អឹង

The post ការស្រាវជ្រាវ៖ អាហារសមុទ្រពីរប្រភេទ ផ្ទុកជាតិពុលខ្ពស់ និងមីក្រូប្លាស្ទិក ប៉ះធ្ងន់ដល់សុខភាព appeared first on Kampuchea Thmey Daily.

ការជីកយករ៉ែដែលភាគច្រើនគ្រប់គ្រងដោយក្រុមយោធា United Wa State Army (UWSA) និងគាំទ្រដោយអ្នកវិនិយោគចិន បាននាំឱ្យមានការបំពុលឆ្លងដែនធ្ងន់ធ្ងរ គំរាមកំហែងដល់សុខភាពសាធារណៈ កសិកម្ម នេសាទ និងទេសចរណ៍តាមដងទន្លេនៅ​ភាគឧត្តរ​ប្រទេសថៃ។ ទោះបី​ជា​​កា​រធ្វើអាជីវកម្ម​​សារធាតុរ៉ែកម្រទាំងនេះ មានសារៈសំខាន់សម្រាប់បច្ចេកវិទ្យាបៃតង និងគ្រឿងអេឡិចត្រូនិក ប៉ុន្តែការទាញយក និងការបន្សុតពួកវាគឺត្រូវ​ឆ្លងកាត់​នីតិវិធី​ស្មុគស្មាញ និងមានគ្រោះថ្នាក់ដល់បរិស្ថាន។

កន្លងមានការតវ៉ានៅក្នុងភូមិ Thaton ខេត្តឈៀងម៉ៃប្រទេសថៃ​ បានធ្វើឱ្យមានការចាប់អារម្មណ៍ចំពោះបញ្ហានេះតាំងពីខែមីនា ហើយក្រោយមកអាជ្ញាធរថៃបានបញ្ជាក់ពីការបំពុលអាសេនិច​មាន​កម្រិត​ខ្ពស់​។

បើតាមរូបភាពផ្កាយរណបទីតាំងរុករករ៉ែភាគច្រើននៅទីក្រុង Mong Pawk ក្នុងរដ្ឋ Wa កើនឡើងពី ៣កន្លែងក្នុងឆ្នាំ ២០១៥ ដល់ ២៦ កន្លែងនៅឆ្នាំ២០២៥ ភាគច្រើននៅជិតតំបន់លំនៅដ្ឋាន។ ប្រតិបត្តិការទាំងនេះប្រើវិធីសាស្រ្តមួយគឺបង្ហូរសារធាតុគីមីចូលទៅក្នុងដីដើម្បីទាញយកសារធាតុរ៉ែកម្រ ខណៈវិធីសាស្រ្តនេះគឺមានគ្រោះថ្នាក់ព្រោះសារធាតុគីមីអាចលេចធ្លាយចូលទៅក្នុងទន្លេ និងទឹកក្រោមដីបានយ៉ាងងាយ ដែលធ្វើឱ្យវាមិនមានសុវត្ថិភាពសម្រាប់ទឹកផឹក ឬប្រើប្រាស់។

ការិយាល័យគ្រប់គ្រងការបំពុល និងសកម្មជនបរិស្ថាន ដូចជា Pianporn Deetes មកពី International Rivers កំពុងស្នើសុំឱ្យរដ្ឋាភិបាលថៃចាត់វិធានការកាន់តែខ្លាំង។ ប៉ុន្តែ​មក​ទល់​ពេល​នេះ រដ្ឋាភិបាល​ថៃបាន​ត្រឹម​តែ​ផ្ញើ​លិខិត​ជា​ផ្លូវការ​ពី​ការ​ព្រួយ​បារម្ភប៉ុណ្ណោះ។ ក្រុមសិទ្ធិមនុស្ស ដូចជាមូលនិធិសិទ្ធិមនុស្ស Shan (SHRF) និយាយថា អាជីវកម្មបរទេសកំពុងទាញយកផលប្រយោជន៍ពីច្បាប់ទន់ខ្សោយនៅក្នុងប្រទេសមីយ៉ាន់ម៉ា ចាប់តាំងពីរដ្ឋប្រហារយោធាឆ្នាំ ២០២១។ លើសពីនេះក៏មានការ ស្នើសុំឱ្យមានការស៊ើបអង្កេតជាសាកល ហើយចង់ឱ្យការរុករករ៉ែដ៏គ្រោះថ្នាក់នេះត្រូវបញ្ឈប់ជាបន្ទាន់ផងដែរ៕

អត្ថបទ៖ ប៊ុន សុភាព

The post ថៃរង​ការ​បំ​ពុល​បរិស្ថាន​ធ្ងន់ធ្ងរ​​​ពីការ​ធ្វើ​អាជីវកម្ម​រ៉ែកម្រ​ដោយ​ក្រុមយោធា​នៅ​​មីយ៉ាន់ម៉ា appeared first on Kampuchea Thmey Daily.

ប្រតិបត្តិការរុករករ៉ែថ្មីរាប់សិប​កន្លែង​ដែល​គេ​ជឿថាដំណើរការដោយក្រុមហ៊ុនចិននៅក្នុងតំបន់ដែលគ្រប់គ្រងដោយ​ក្រុម​ប្រដាប់​អាវុធ United Wa State Army (UWSA) បាន​ធ្វើ​ឡើងតាំងពីឆ្នាំ​២០២២។ អណ្តូងរ៉ែទាំងនេះត្រូវបានគេសង្ស័យថាបានបញ្ចេញកាកសំណល់ដោយផ្ទាល់ទៅក្នុងទន្លេដោយគ្មានការអនុញ្ញាត។

នៅក្នុងប្រទេសថៃ ការកើនឡើងកម្រិតអាសេនិចត្រូវបានគេរកឃើញនៅក្នុងទន្លេ Kok ដែលហូរពីប្រទេសមីយ៉ាន់ម៉ា ចូលទៅក្នុងខេត្តឈៀងរ៉ៃ។ ការធ្វើតេស្តបានបង្ហាញពីកម្រិតអាសេនិចរហូតដល់ ៥ដងខ្ពស់ជាងស្តង់ដារសុវត្ថិភាពអន្តរជាតិ ដែលបង្កឱ្យមានការភ័យខ្លាចនៃផលប៉ះពាល់សុខភាពរយៈពេលវែង និងធ្វើឱ្យខូចខាតដល់ឧស្សាហកម្មនេសាទក្នុងស្រុក។

មន្ត្រីថៃបានបន្ទោសការបំពុលលើសកម្មភាពរុករករ៉ែនៅព្រំដែន ដោយហៅវាថាជាករណីបំពុលឆ្លងដែនដ៏ធំបំផុតមិនធ្លាប់មាន។ ក្រុមបរិស្ថានព្រមានថា បើគ្មានការទុកដាក់សំណល់ត្រឹមត្រូវទេ វា​នឹងបន្តបំពុលទឹក និងប៉ះពាល់ដល់ការផ្គត់ផ្គង់អាហារ ដែលអាចបណ្តាលឱ្យខូចខាតជាអចិន្ត្រៃយ៍។

រដ្ឋាភិបាល​ថៃ​កំពុង​គិត​អំពី​ការ​សាងសង់​ទំនប់​ដើម្បី​បញ្ឈប់​ទឹក​កខ្វក់​មិន​ឲ្យ​​ហូរ​ចូល​ក្នុង​ប្រទេសខ្លួន។ ប៉ុន្តែ​សកម្មជន​បរិស្ថាន​និយាយ​ថា វិធានការនេះ​មិន​គ្រប់គ្រាន់​ទេ។ ពួកគេជឿថា កិច្ចសហប្រតិបត្តិការកាន់តែប្រសើរជាមួយប្រទេសចិនគឺចាំបាច់ដើម្បីដោះស្រាយបញ្ហាប្រភពបំពុល។ ប៉ុន្តែមន្ត្រី​ចិន​និយាយ​ថា ពួកគេ​បាន​ប្រាប់​ក្រុមហ៊ុន​របស់​ពួកគេ​ឲ្យ​ធ្វើ​តាម​ច្បាប់​ក្នុង​តំបន់ ខណៈ​មេដឹកនាំ​យោធា​មីយ៉ាន់ម៉ា​មិន​ទាន់ឆ្លើយតបអ្វីនៅ​ឡើយ​ទេទាក់ទងនឹងបញ្ហានេះ៕

អត្ថបទ៖ ប៊ុន សុភាព

The post សារធាតុពុលពីអណ្ដូងរ៉ែនៅមីយ៉ាន់ម៉ា បំពុលដល់ទន្លេថៃ appeared first on Kampuchea Thmey Daily.