រដ្ឋបាលខណ្ឌពោធិ៍សែនជ័យ ចុះណែនាំរោងចក្រកាត់ដេរ ក្រោយពលរដ្ឋប្តឹងថាបង្កផ្សែងក្លិនមិនល្អ

រោងចក្រកាត់ដេរមួយកន្លែងដែលបង្កជាផ្សែង​ និង ក្លិនមិនល្អរំខានដល់ប្រជាលរដ្ឋ​ ត្រូវបានអាជ្ញាធរចុះទៅពិនិត្យ និង ណែនាំធ្វើកិច្ចសន្យាបញ្ឈប់ដុតបង្ហុយផ្សែង នៅថ្ងៃទី៣ ខែកុម្ភៈ ឆ្នាំ២០២៦ ពីពេលនេះតទៅទៀត នៅរោងចក្រមួយកន្លែង​ នៅភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ។

អាជ្ញាធរបានឱ្យដឹងថា​ ក្រោយពីទទួលព័ត៌មានពី ប្រជាពលរដ្ឋថា​ មានរោងចក្រកាត់ដេរមួយកន្លែង​ ដុតកម្ទេចក្រណាត់បង្ហុយផ្សែង​ និង ក្លិនមិនល្អ​ រំខានដល់ការរស់នៅរបស់ពលរដ្ឋនៅជុំវិញ​ ក្រោមការចង្អុលបង្ហាញពី លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ លោក សំ សារ៉ាវុធ អភិបាលរងខណ្ឌពោធិ៍សែនជ័យ បានដឹកនាំក្រុមការងារចម្រុះ សហការជាមួយមន្ទីរបរិស្ថាន ចុះត្រួតពិនិត្យរោងចក្រកាត់ដេរខាងលើតែម្តង។

ក្រោយត្រួតពិនិត្យ​ អាជ្ញាធរបានរកឃើញថា​ ទីតាំងនេះពិតជាបង្កការបំពុលបរិស្ថាន។ ទីតាំងនេះបានដុតកម្ទេចក្រណាត់ក្នុងឡចំហាយ បណ្ដាលឱ្យផ្សែងហុយ និងសាយភាយក្លិនមិនល្អ​។ ក្នុងនោះផងដែរអាជ្ញាធរបានបញ្ជាក់ថា ទីតាំងនេះមានវិញ្ញាបនបត្របញ្ជាក់ការចុះឈ្មោះក្នុងបញ្ជីពាណិជ្ជកម្ម ប៉ុន្តែមិនមានច្បាប់អនុញ្ញាតសិប្បកម្ម និងច្បាប់បរិស្ថាន នោះទេ។

ជាមួយគ្នាអាជ្ញាធរ​បានធ្វើការណែនាំម្ចាស់ទីតាំង​ ត្រូវបញ្ឈប់ការដុតកំទេចក្រណាត់ ក្នុងឡចំហាយ, ត្រូវស្នើសុំច្បាប់អនុញ្ញាតឱ្យបានត្រឹមត្រូវ, ត្រូវទទួលរងការផាកពិន័យតាមច្បាប់។ ក្នុងករណីមិនអនុវត្តតាមការណែនាំ រដ្ឋបាលខណ្ឌនឹងចាត់វិធានការតាមផ្លូវច្បាប់ និងសុំគោលការណ៍ថ្នាក់លើផ្អាកការធ្វើអាជីវកម្មជាបណ្ដោះអាស្នន។ រដ្ឋបាលខណ្ឌ នឹងបន្តយកចិត្តទុកដាក់ខ្ពស់លើសុខុមាលភាព និងបរិស្ថានរស់នៅរបស់ប្រជាពលរដ្ឋជានិច្ច៕ ដោយ៖សុខា