ព័ត៌មានអន្ដរជាតិ

សារធាតុពុលពីអណ្ដូងរ៉ែនៅមីយ៉ាន់ម៉ា បំពុលដល់ទន្លេថៃ

បានផុស

៣៨ វិនាទី មុន

នៅ

ថ្ងៃពុធ ១១ មិថុនា ២០២៥

ដោយ

សារធាតុពុលពីអណ្តូងរ៉ែនៅក្នុងរដ្ឋ Shan របស់ប្រទេសមីយ៉ាន់ម៉ា កំពុងគំរាមកំហែងដល់បរិស្ថាន និងសុខភាពសាធារណៈនៅភាគខាងជើងប្រទេសថៃ។ នេះបើយោងតាមការចេញផ្សាយរបស់សារព័ត៌មាន The Irrawaddy នៅថ្ងៃទី១១ខែមិថុនានេះ។

ទន្លេ Kok ក្នុងខេត្តឈៀងរ៉ៃហូរពីប្រទេសមីយ៉ាន់ម៉ា (រូបភាព៖ Khaosod English)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការរុករករ៉ែថ្មីរាប់សិបកន្លែងដែលគេជឿថាដំណើរការដោយក្រុមហ៊ុនចិននៅក្នុងតំបន់ដែលគ្រប់គ្រងដោយក្រុមប្រដាប់អាវុធ United Wa State Army (UWSA) បានធ្វើឡើងតាំងពីឆ្នាំ២០២២។ អណ្តូងរ៉ែទាំងនេះត្រូវបានគេសង្ស័យថាបានបញ្ចេញកាកសំណល់ដោយផ្ទាល់ទៅក្នុងទន្លេដោយគ្មានការអនុញ្ញាត។

នៅក្នុងប្រទេសថៃ ការកើនឡើងកម្រិតអាសេនិចត្រូវបានគេរកឃើញនៅក្នុងទន្លេ Kok ដែលហូរពីប្រទេសមីយ៉ាន់ម៉ា ចូលទៅក្នុងខេត្តឈៀងរ៉ៃ។ ការធ្វើតេស្តបានបង្ហាញពីកម្រិតអាសេនិចរហូតដល់ ៥ដងខ្ពស់ជាងស្តង់ដារសុវត្ថិភាពអន្តរជាតិ ដែលបង្កឱ្យមានការភ័យខ្លាចនៃផលប៉ះពាល់សុខភាពរយៈពេលវែង និងធ្វើឱ្យខូចខាតដល់ឧស្សាហកម្មនេសាទក្នុងស្រុក។

មន្ត្រីថៃបានបន្ទោសការបំពុលលើសកម្មភាពរុករករ៉ែនៅព្រំដែន ដោយហៅវាថាជាករណីបំពុលឆ្លងដែនដ៏ធំបំផុតមិនធ្លាប់មាន។ ក្រុមបរិស្ថានព្រមានថា បើគ្មានការទុកដាក់សំណល់ត្រឹមត្រូវទេ វានឹងបន្តបំពុលទឹក និងប៉ះពាល់ដល់ការផ្គត់ផ្គង់អាហារ ដែលអាចបណ្តាលឱ្យខូចខាតជាអចិន្ត្រៃយ៍។

រដ្ឋាភិបាលថៃកំពុងគិតអំពីការសាងសង់ទំនប់ដើម្បីបញ្ឈប់ទឹកកខ្វក់មិនឲ្យហូរចូលក្នុងប្រទេសខ្លួន។ ប៉ុន្តែសកម្មជនបរិស្ថាននិយាយថា វិធានការនេះមិនគ្រប់គ្រាន់ទេ។ ពួកគេជឿថា កិច្ចសហប្រតិបត្តិការកាន់តែប្រសើរជាមួយប្រទេសចិនគឺចាំបាច់ដើម្បីដោះស្រាយបញ្ហាប្រភពបំពុល។ ប៉ុន្តែមន្ត្រីចិននិយាយថា ពួកគេបានប្រាប់ក្រុមហ៊ុនរបស់ពួកគេឲ្យធ្វើតាមច្បាប់ក្នុងតំបន់ ខណៈមេដឹកនាំយោធាមីយ៉ាន់ម៉ាមិនទាន់ឆ្លើយតបអ្វីនៅឡើយទេទាក់ទងនឹងបញ្ហានេះ៕