ការរាំងខ្ទប់ Archives - Kampuchea Thmey Daily

កុមាររាប់លាននាក់ស្ថិតក្រោមការរាំងខ្ទប់និងកំពុងរងសម្ពាធផ្លូវចិត្ត ឪពុកម្ដាយអាចជួយអ្វីបាន?

Sonya — Thu, 17 Jun 2021 03:52:02 +0000

មកដល់ពាក់កណ្ដាលឆ្នាំ ២០២១ នេះកុមារប្រមាណជាង ១.៤ ពាន់លាននាក់នៅទូទាំងពិភពលោក កំពុងរស់នៅក្រោមការបិទខ្ទប់ ព្រោះតែជំងឺរាតត្បាត។ ទិន្នន័យដែលប្រមូលបានពី NEU របស់អង់គ្លេសបង្ហាញថា ក្មេងៗអាយុពី ៥ ទៅ ១១ ឆ្នាំកំពុងមានអារម្មណ៍ឯកោ ហើយប្រមាណ ២៨ ភាគរយក្នុងចំណោមនោះកំពុងរងសម្ពាធផ្លូវចិត្ត។

ចំណែកទិន្នន័យដែលប្រមូលបានដោយមហាវិទ្យាល័យភូមិន្ទចិត្តសាស្ត្រ (Royal College of Psychiatrists) ចក្រភពអង់គ្លេសបង្ហាញថា មនុស្សវ័យក្រោម ១៨ ឆ្នាំចំនួន ៣៧២,៤៣៨ នាក់ត្រូវបានបញ្ជូនទៅមន្ទីរពេទ្យវិកលចរិតក្នុងឆ្នាំ២០២០ ហើយមកដល់ឆ្នាំនេះ ចំនួនបានកើនឡើងបន្ថែមរហូតដល់ ៨០,២២៦ នាក់ឬស្មើ ២៨ ភាគរយ។ ករណីនេះមហាវិទ្យាល័យបានឱ្យដឹងថា វាជាលទ្ធផលនៃការរំខានបណ្តាលមកពីជំងឺរាតត្បាតកូវីដ-១៩។

លោកវេជ្ជបណ្ឌិត Bernadka Dubicka ប្រធានសាស្រ្តាចារ្យកុមារនិងមនុស្សវ័យជំទង់នៃមហាវិទ្យាល័យចិត្តសាស្រ្តនិយាយថា “កុមារនិងយុវជនកំពុងរងនូវវិបត្តិសុខភាពផ្លូវចិត្តដែលបណ្តាលមកពីជំងឺរាតត្បាត និងប្រឈមហានិភ័យនៃជំងឺផ្លូវចិត្តពេញមួយជីវិតពួកគេ”។

បន្ថែមពីលើនេះ នាយកប្រតិបត្តិអង្គការកុមារ Barnardo លោក Javed Khan មានប្រសាសន៍ថា ជំងឺរាតត្បាតបណ្ដាលឱ្យអារម្មណ៍កុមារនិងយុវវ័យរងផលប៉ះពាល់អវិជ្ជមានក្នុងរយៈពេលវែង ប្រសិនបើពួកគេមិនការគាំទ្រខាងសុខភាពផ្លូវចិត្តត្រឹមត្រូវនោះទេ។

រីឯការស្ទង់មតិមួយទៀតដែលចេញផ្សាយដោយសហព័ន្ធអប់រំជាតិ National Education Union-NEU បង្ហាញថា សិស្សសាលាវ័យក្មេងភាគច្រើនប្រទះនឹងអារម្មណ៍ឯកោ ព្រមទាំងជួបបញ្ហាសុខភាពផ្លូវចិត្ត ក្នុងកំលុងពេលរាំងខ្ទប់។

ឪពុកម្ដាយឬអាណាព្យាបាលគួរធ្វើអ្វីអាចជួយសុខភាពផ្លូវចិត្តក្មេងៗបាន?

ស្របពេលដែលសាលារៀនត្រូវបានបិទទទ្វារជាបណ្ដោះអាសន្ន ក្មេងៗក៏ត្រូវនៅផ្ទះជាមួយប៉ាម៉ាក់ឬសាច់ញាតិ ដែលនាំឱ្យពួកគេកើតរោគធុញទ្រាន់ ឯកោ និងរងសម្ពាធ ព្រោះថាមិនបានចេញក្រៅដូចមុន។

ដើម្បីកុំឱ្យកុមារប៉ះពាល់ផ្លូវចិត្ត អាណាព្យាបាលអាចបង្កើតភាពរីករាយជាមួយសកម្មភាពនៅផ្ទះខ្លះៗដោយ រៀនចម្អិនអាហារជាមួយកូនៗ នាំកូនធ្វើលំហាត់ប្រាណ បង្កើតសួនដាំដំណាំជាមួយគ្នា នាំពួកគេអានសៀវភៅ ឬមើលរឿងអប់រំជាដើម។

មួយវិញទៀត ឪពុកម្ដាយក៏គួរទុកឱកាសឱ្យកូនៗបានជជែកលេងជាមួយមិត្តភក្តិតាមរយៈអនឡាញផងដែរ។

ជារឿយៗឪពុកម្ដាយតែងព្រួយបារម្ភអំពីជជែកគ្នាលេងជាមួយមិត្តក្នុងអ៊ិនធរណិត។ តាមពិតទៅក្មេងតូចៗនិងពួកវ័យជំទង់រីករាយនឹងការហៅវីដេអូណាស់។ ក្នុងន័យនេះ ប្រព័ន្ធផ្សព្វផ្សាយសង្គមអាចជួយរក្សាមិត្តភាព និងផ្ដល់នូវអារម្មណ៍នៃការភ្ជាប់ទំនាក់ទំនងរវាងគ្នា ដោយសារតែបច្ចេកវិទ្យា គឺជាបណ្ដាញល្អសម្រាប់កុមារនិងក្មេងជំទង់។

យ៉ាងណាមិញ សម្រាប់កុមារតូចៗ ការប្រើបច្ចេកវិទ្យាដើម្បីរក្សាទំនាក់ទំនងជាមួយមិត្តភក្ដិ អាចមានការពិបាក និងហានិភ័យផ្សេងៗ។ ជាការល្អ ឪពុកម្ដាយនិងបងៗគួរតែគាំទ្រក្មេងៗ ដោយលេងជាមួយពួកគេជំនួសឱ្យបណ្ដោយឱ្យពួកគេលេងជាមួយមិត្តតែឯង៕

ប្រែសម្រួល៖ សន្យា

ប្រភព៖ Mail Daily

ចុចអាន៖ ផលប៉ះពាល់ ៣ ធំៗចំពោះកុមារអំឡុងបិទទ្វារសាលាក្នុងវិបត្តិកូវីដ-១៩

ចុចអាន៖ ហេតុអ្វីម៉ាក់ៗខ្លះសុខចិត្តចោលការងារប្រាក់ខែរាប់រយ មកនៅផ្ទះមើលកូន?

The post កុមាររាប់លាននាក់ស្ថិតក្រោមការរាំងខ្ទប់និងកំពុងរងសម្ពាធផ្លូវចិត្ត ឪពុកម្ដាយអាចជួយអ្វីបាន? appeared first on Kampuchea Thmey Daily.

កុំឲ្យស្ត្រេសធ្ងន់ធ្ងរពេលបិទខ្ទប់ សាកល្បងតិចនិកដោះស្រាយនេះ

Sonya — Tue, 04 May 2021 04:14:33 +0000

ចាប់តាំងពីកម្ពុជាមានការរាលដាលខ្លាំងដោយសារជំងឺកូវីដ-១៩ រហូតតម្រូវឲ្យបិទខ្ទប់តំបន់មួយចំនួន ពលរដ្ឋត្រូវនៅក្នុងផ្ទះ មិនចាំបាច់ មិនត្រូវចេញក្រៅ។ ជាធម្មតា នៅក្នុងស្ថានភាពតានតឹងបែបនេះ យើងម្នាក់ៗច្បាស់ជាកើតស្ត្រេស ស្មុគខួរក្បាលដោយសារនៅក្នុងផ្ទះយូរពេកជាមិនខាន។ ភាពតានតឹងធ្ងន់ធ្ងរដែលមិនបាត់ទៅវិញងាយៗ អាចប៉ះពាល់ដល់សុខភាពផ្លូវចិត្តរបស់យើង ហេតុនេះហើយ អំឡុងពេលដែលគួរឲ្យបារម្ភនេះ ការចេះគ្រប់គ្រង និងកាត់បន្ថយស្ត្រេសជាអ្វីដែលយើងគួរតែផ្ដោតសំខាន់លើ។

១. ធ្វើអ្វីដែលយើងស្រឡាញ់

ដកអារម្មណ៍ពិបាកចិត្ត និងព្រួយបារម្ភចេញការគិតរបស់យើង ហើយចំណាយទៅលើសកម្មភាពអ្វីដែលធ្វើយើងសប្បាយចិត្តវិញ។ សកម្មភាពទាំងនោះអាចការស្ដាប់បទចម្រៀង អានសៀវភៅ មើលរឿងភាគ និយាយគ្នាលេងអនឡាញជាមួយក្រុមគ្រួសារ ឬមិត្តភក្ដិ។ល។ ព្យាយាមធ្វើអ្វីថ្មី ៗ បង្កើនភាពច្នៃប្រឌិតរបស់ខ្លួន ឬបង្កើតទម្លាប់ថ្មីដែលជួយឲ្យយើងរវល់មិនមានពេលគិតរឿងស្មុគស្មាញច្រើន។

២. គ្រប់គ្រងការងារ

ការងារដើរតួនាទីយ៉ាងសំខាន់ក្នុងជីវិតយើង ប៉ុន្តែវាមានសារៈសំខាន់ណាស់ដើម្បីឲ្យមានតុល្យភាពជីវិតការងារប្រកបដោយនិរន្តភាព ពិសេសបើយើងកំពុងធ្វើការពីផ្ទះ ខណៈត្រូវរៀនអនឡាញផងដោយសារជំងឺកូវីដ-១៩នេះ។ ប្រសិនបើការងារបង្កើនកម្រិតស្ត្រេសរបស់យើង គួរកាត់បន្ថយការងារ និងបន្ថែមម៉ោងសម្រាកខ្លះ។ នេះមិនមែនមានន័យថា គួរទុកការងារចោលទៅអង្គុយលេងទេ ពោលគឺធ្វើការណាដែលចាំបាច់មុន រួចសម្រាក ហើយការងារដែលមិនចាំបាច់អាចទុកធ្វើពេលក្រោយបាន។

៣. រៀបចំផ្ទះឲ្យមានផាសុកភាព

បរិយាកាសនៅជុំវិញខ្លួនក៏ជាកត្តាសំខាន់មួយមានឥទ្ធិពលដល់អារម្មណ៍របស់យើង ស្របពេលដែលជាប់ក្នុងផ្ទះ យើងគួររៀបចំផ្ទះ ឬបន្ទប់រស់នៅឲ្យបានស្អាតបាត ព្រោះបើបរិយាកាសយើងរស់នៅរញ៉េរញ៉ៃ វាអាចធ្វើឲ្យអារម្មណ៍ស្មុគស្មាញ ឬអួរអាប់ទៅតាមហ្នឹង។

៤. ហាត់ប្រាណឲ្យទៀងទាត់

ការហាត់ប្រាណអាចបំបាត់ភាពតានតឹង និងជួយឲ្យយើងធូរអារម្មណ៍បាន។ ព្យាយាមហាត់ប្រាណទៀងទាត់ជារៀងរាល់ថ្ងៃកាន់តែល្អ យើងអាចបំបាត់ភាពតានតឹងហើយទទួលបានរាងស្អាត និងសុខភាពល្អថែមទៀត។

៥. ប្រើទៀន ឬប្រេងក្រអូបក្នុងផ្ទះ

នៅពេលដែលយើងមានអារម្មណ៍តានតឹង ការប្រើទៀនក្រអូប ឬប្រេងក្រអូបក៏អាចជួយបន្ធូរអារម្មណ៍យើងបានមួយកម្រិតដែរ។ ការប្រើប្រេងក្រអូប ជួយបង្កើតបរិយាកាសធូរស្រាល បំបាត់ភាពស្មុគស្មាញដែលយើងកំពុងជួបប្រទះ។

៦. បន្ថយម៉ោងលើគ្រឿងអេឡិចត្រូនិក

ការចំណាយពេលច្រើនម៉ោងនៅមុខអេក្រង់គ្រឿងអេឡិចត្រូនិច អាចធ្វើឲ្យឈឺក្បាល ឬចុកភ្នែក កាន់តែមិនល្អដល់បញ្ហាស្ត្រេសរបស់យើងទេ។ ពិសេសគួរកាត់បន្ថយម៉ោងចំណាយទៅលើប្រព័ន្ធផ្សព្វផ្សាយអនឡាញដូចជា ហ្វេសប៊ុក ជាដើម ព្រោះវាអាចធ្វើឲ្យយើងឃើញហេតុការណ៍ដែលយើងមិនចង់ ប៉ះពាល់ដល់អារម្មណ៍យើងលើសដើម៕

អត្ថបទផ្ដល់សិទ្ធិ៖ Hello គ្រូពេទ្យ

ចុចអាន៖ ជឿអត់! អានសៀវភៅអំឡុងជំងឺរាតត្បាតអាចជួយដោះស្រាយបញ្ហាផ្លូវចិត្ត

ចុចអាន៖ ខ្លាចបាក់ទឹកចិត្ត គួរស្វែងរកសន្តិភាពផ្លូវចិត្តពីសមាធិ និងយូហ្គា

The post កុំឲ្យស្ត្រេសធ្ងន់ធ្ងរពេលបិទខ្ទប់ សាកល្បងតិចនិកដោះស្រាយនេះ appeared first on Kampuchea Thmey Daily.

ការរាំងខ្ទប់ដោយសារកូវីដ-១៩ អប់រំផ្លូវចិត្ត ៥ យ៉ាងនេះ

Sonya — Fri, 23 Apr 2021 03:34:33 +0000

វិបត្តិកូវីដ-១៩ បាននាំឱ្យមានការរាំងខ្ទប់ការធ្វើដំណើរដើម្បីចូលរួមទប់ស្កាត់ការរីករាលដាលនៃជំងឺ ដែលវិធានការនេះបណ្ដាលឱ្យមនុស្សស្នាក់នៅផ្ទះជាច្រើននាក់។ ជឿថា ការស្នាក់នៅផ្ទះ ដោយសារកូវីដ-១៩ បានបង្កភាពស្មុគស្មាញដល់ផ្លូវចិត្តប្រជាពលរដ្ឋ ប៉ុន្តែវាក៏បានផ្ដល់មេរៀនត្រឡប់មកកាន់យើងម្នាក់ៗវិញផងដែរ។

១. ភាពអត់ធ្មត់

ការរក្សាសុវត្ថិភាពនាំឱ្យយើងមានគម្លាតពីគ្នា។ ស្ថិតក្នុងបរិបទនេះ មនុស្សជាច្រើនមិនអាចជួបជុំ ទម្លាប់ចេញក្រៅឬដើរកម្សាន្តក៏ត្រូវបានផ្អាក ចាំទម្រាំស្ថានភាពវិលរកភាពប្រក្រតីវិញ ម្នាក់ៗមុខតែតានតឹងណាស់។ ប៉ុន្តែនេះជាមេរៀន លត់ដំចំណង់សប្បាយ បង្កើនការអត់ធ្មត់ខ្ពស់ នៅរាល់ពេលមនុស្សស្ថិតក្នុងវិបត្តិ។

២. ការសម្របខ្លួន

ការរីករាលដាលនៃវីរុសកូវីដ-១៩ កំពុងផ្លាស់បែបបទការរស់នៅថ្មីមួយទៀតសម្រាប់មនុស្សជាតិ។ នរណាដែលអាចបត់បែនបាន ទាំងផ្លូវចិត្តនិងរបៀបរស់នៅរបស់ពួកគេនឹងមិនជួបបញ្ហាច្រើនឡើយ។ ផ្ទុយទៅវិញ បុគ្គលដែលក្រាញននៀលចង់បានស្ទីលរស់នៅដូចកាលពីមុនឱ្យខានតែបាន ច្បាស់ជាជួបវិបត្តិផ្លូវចិត្ត ត្បិតមិនចេះសម្របខ្លួនតាមកាលៈទេសៈនេះ។

៣. ការទំនាក់ទំនង

បច្ចុប្បន្នទម្លាប់ជួបជុំមិត្តភក្តិនៅហាងកាហ្វេ ឬទៅធ្វើការងារនៅហាងកាហ្វេ ឬនៅទីសាធារណៈនានា មិនមានទៀតនោះទេ។ មិនថ្វីទេ! វាក៏ល្អម៉្យាង ព្រោះគ្រប់គ្នានៅតែអាចរក្សាទំនាក់ទំនងជាមួយគ្នាតាមរយៈបណ្តាញសង្គមដោយការឆាត ឬវីដេអូខលជាដើម។ ទំនាក់ទំនងអាចល្អជាងមុន ពេលមិនបានជួបមុខគ្នា ដោយសារឧស្សាហ៍សួរសុខទុក្ខគ្នាតាមទូរសព្ទ។

៤. ចេះច្នៃប្រឌិត

នៅផ្ទះយូរៗប្រាកដជាស្មុគស្មាញ ហើយយើងក៏រកនឹកធ្វើនេះធ្វើនោះដើម្បីបំបាត់ភាពអផ្សុក។ អ្នកខ្លះអានសៀវភៅ អ្នកខ្លះមើលរឿង អ្នកខ្លះរៀនធ្វើម្ហូប ឬធ្វើសួននៅផ្ទះអ៊ីចឹងទៅ។ រឿងទាំងនេះមិនអត់ប្រយោជន៍ទេ វាជួយផ្លូវចិត្តហើយ បានទាំងលំហែខួរក្បាល បានទាំងគំនិតថ្មីៗដើម្បីឆ្លុះបញ្ចាំងជីវិត។ ក្រៅពីនោះអ្នកខ្លះ ក៏រៀនធ្វើនេះធ្វើនោះតាម យូធ្យូប កើតជាប្រយោជន៍សម្រាប់លក់ដូរក៏មាន។

៥. មានវិន័យចំពោះខ្លួនឯង

ការចម្លងកាន់តែច្រើននៅក្នុងសហគមន៍ មនុស្សកាន់តែមានការប្រុងប្រយ័ត្នខ្ពស់ចំពោះខ្លួនឯង ព្រមទាំងចំពោះអ្នកជិតខ្លួន។ យើងចាប់ផ្ដើមចេះអនាម័យហ្មត់ចត់ជាងមុន ចេះខ្វល់ខ្វាយសុខភាពពដោយប្រយ័ត្នលើការហូបចុក ការធ្វើលំហាត់ប្រាណ និងគេងបានគ្រប់គ្រាន់ ពោលគឺចេះថែរក្សាខ្លួននៅក្នុងអំឡុងពេលឆ្លងកាត់ស្ថានភាពដ៏លំបាកនាពេលបច្ចុប្បន្ន៕

ប្រែសម្រួល៖ សន្យា

ប្រភព៖ Forbes

ចុចអាន៖ នៅម្នាក់ឯងបង្រៀនឲ្យចេះដោះស្រាយបញ្ហាប្រឈមនានាដោយឯករាជ្យ

ចុចអាន៖ នៅផ្ទះពេលបិទខ្ទប់កុំមើលទូរសព្ទច្រើនពេក អាចប៉ះពាល់ស្បែក

The post ការរាំងខ្ទប់ដោយសារកូវីដ-១៩ អប់រំផ្លូវចិត្ត ៥ យ៉ាងនេះ appeared first on Kampuchea Thmey Daily.

ការរាំងខ្ទប់ Archives - Kampuchea Thmey Daily

កុមាររាប់លាននាក់ស្ថិតក្រោមការរាំងខ្ទប់និងកំពុងរងសម្ពាធផ្លូវចិត្ត ឪពុកម្ដាយអាចជួយអ្វីបាន?

កុំឲ្យស្ត្រេសធ្ងន់ធ្ងរពេលបិទខ្ទប់ សាកល្បងតិចនិកដោះស្រាយនេះ

១. ធ្វើ​អ្វី​ដែល​យើង​ស្រឡាញ់

២. គ្រប់​គ្រង​ការងារ

៣. រៀបចំ​ផ្ទះ​ឲ្យ​មាន​ផាសុកភាព

៤. ហាត់​ប្រាណ​ឲ្យ​ទៀង​ទាត់

៥. ប្រើ​ទៀន ឬ​ប្រេង​ក្រអូប​ក្នុង​ផ្ទះ