ការសាងសង់ Archives - Kampuchea Thmey Daily

គិតត្រឹមខែមេសា ការសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបាន ៥៧,៤៤%

Ken Malis — Thu, 30 Apr 2026 02:15:54 +0000

គិតត្រឹមខែមេសា ឆ្នាំ២០២៦នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបានលទ្ធផល ៥៧,៤៤% បន្ទាប់ពីបានចាប់ផ្ដើមសាងសង់ជាផ្លូវការ កាលពីថ្ងៃទី៩ ខែធ្នូ ឆ្នាំ២០២៤ កន្លងទៅ។

លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល បានដឹកនាំកិច្ចប្រជុំត្រួតពិនិត្យវឌ្ឍនភាពរួមគ្នា លើកទី៣ នៃគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាលក្រោមឥណទានកម្ចី (EDCFLoan) របស់សាធារណរដ្ឋកូរ៉េ។

កិច្ចប្រជុំ នៅថ្ងៃទី២៩ ខែមេសា ឆ្នាំ២០២៦ បានផ្តោតលើការពិនិត្យវឌ្ឍនភាពរួមគ្នា លើការងារសាងសង់ ការងារបណ្តុះបណ្តាល ការងារផ្គត់ផ្គង់បរិក្ខារពេទ្យ និងប្រព័ន្ធគ្រប់គ្រងមន្ទីរពេទ្យអេឡិចត្រូនិច និងជាពិសេសការងារសម្របសម្រួលនិងការដោះស្រាយនូវបញ្ហាប្រឈមផ្សេងៗ ដើម្បីជំរុញឱ្យគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាលបានប្រព្រឹត្តទៅដោយជោគជ័យ។

លោកស្រីនាយកគម្រោង បានថ្លែងអំណរគុណចំពោះគ្រប់ភាគីពាក់ព័ន្ធ ដែលបានខិតខំបំពេញការងាររបស់ខ្លួនប្រកបដោយភាពទទួលខុសត្រូវខ្ពស់ និងបានផ្តល់អនុសាសន៍ណែនាំឱ្យក្រុមហ៊ុនទាំងបី ត្រូវយកចិត្តទុកដាក់អនុវត្តការងារតាមកិច្ចសន្យា ឱ្យទទួលបានជោគជ័យ និងជាពិសេស ត្រូវយកចិត្តទុកដាក់ ក្នុងពេលរដូវវស្សាដែលអាចមានការជន់លិច ហើយប៉ះពាល់ដល់ដំណើរការសាងសង់ និងបំពាក់បរិក្ខារពេទ្យជាដើម។

សូមរម្លឹកឡើងវិញថា គម្រោងមន្ទីរពេទ្យសាកលវិទ្យាល័យនេះ បានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណរដ្ឋកូរ៉េនូវទឹកប្រាក់ឥណទានចំនួន ៦៦,៥៧ លានដុល្លារ។ កិច្ចសន្យាសាងសង់មានរយៈពេល ២៨ខែ ដែលគ្រោងនឹងបញ្ចប់នៅខែមីនា ឆ្នាំ២០២៧ ខាងមុខ។

មន្ទីរពេទ្យនេះ សាងសង់ឡើងនៅលើទីតាំងទី៣ នៃសាកលវិទ្យាល័យវិទ្យាសាស្ត្រសុខាភិបាល ដែលមានផ្ទៃដីសរុប ២២ ២៤៣ ម៉ែត្រការ៉េ បណ្តោយ ៨៣,៨០ ម៉ែត្រ និងទទឹង ៥៩,៨០ ម៉ែត្រ និងកម្ពស់ ៨ជាន់ មានសមត្ថភាពទទួលជំងឺសម្រាកសរុបបាន ២០០គ្រែ៕

The post គិតត្រឹមខែមេសា ការសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបាន ៥៧,៤៤% appeared first on Kampuchea Thmey Daily.

គិតត្រឹមខែមីនា មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចការសាងសង់បានជាង៥០%

Ken Malis — Fri, 13 Mar 2026 02:22:25 +0000

គិតត្រឹមខែមីនា ឆ្នាំ២០២៦នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចបានលទ្ធផល ៥២,៥៤% លឿនជាងផែនការកំណត់៤% នៃផែនការគម្រោងសាងសង់។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សាខាទី៣ កាលពីថ្ងៃទី១១ ខែមីនា ឆ្នាំ២០២៦ បានដឹកនាំក្រុមការងារចុះពិនិត្យការដ្ឋានសាងសង់ និងប្រជុំពិភាក្សាវាយតម្លៃ នៃការអនុវត្តគម្រោង ត្រឹមខែមីនា ឆ្នាំ២០២៦ ស្ថិតនៅភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

លោកស្រីរដ្ឋលេខាធិការ បានកោតសរសើរចំពោះវឌ្ឍនភាព នៃការងារសាងសង់អគារមន្ទីរពេទ្យសាកលវិទ្យាល័យនេះ បានលឿនជាងកាលវិភាគកំណត់ និងបានផ្តល់អនុសាសន៍ណែនាំដល់ក្រុមហ៊ុនសាងសង់ ឱ្យពង្រឹងបន្ថែមលើគុណភាព ក៏ដូចជាគោលការណ៍សុវត្ថិភាពនានា ឱ្យកាន់តែប្រសើរឡើង។

កិច្ចប្រជុំបានពិភាក្សាលើចំនុចសំខាន់ៗ ដែលបានស្នើឡើង ក្នុងនោះលោកស្រីរដ្ឋលេខាធិការ បានជំរុញឱ្យគ្រប់ភាគីពាក់ព័ន្ធធ្វើយ៉ាងណាបំពេញតាមគោលការណ៍កំណត់ និងដោះស្រាយឱ្យទាន់ពេលវេលា ដើម្បីគម្រោងអាចប្រព្រឹត្តទៅប្រកបដោយគុណភាព និងបានសម្រេចរួចរាល់តាមពេលវេលាកំណត់។

គួរជម្រាបដែរថា គម្រោងមន្ទីរពេទ្យសាកលវិទ្យាល័យនេះ បានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណរដ្ឋកូរ៉េនូវទឹកប្រាក់ឥណទានចំនួន ៦៦,៥៧ លានដុល្លារ។ កិច្ចសន្យាសាងសង់មានរយៈពេល ២៨ខែ ដែលគ្រោងនឹងបញ្ចប់នៅខែមីនា ឆ្នាំ២០២៧ ខាងមុខ។

The post គិតត្រឹមខែមីនា មន្ទីរពេទ្យសាកលវិទ្យាល័យវិទ្យាសាស្រ្តសុខាភិបាល សម្រេចការសាងសង់បានជាង៥០% appeared first on Kampuchea Thmey Daily.

គិតត្រឹមខែតុលា ការសាងសង់ពេទ្យសាកលវិទ្យាល័យវិទ្យាសាស្ត្រសុខាភិបាល សម្រេចបានលទ្ធផលជាង ៣៨%

អ៊ិន ពិសី — Thu, 30 Oct 2025 03:27:55 +0000

គិតត្រឹមខែតុលា ឆ្នាំ ២០២៥ នេះ គម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល (ស.វ.ស) នៅទីតាំងទី ៣ សម្រេចបានលទ្ធផលជាង ៣៨% បន្ទាប់ពីបានចាប់ផ្ដើមការសាងសង់ជាផ្លូវការ កាលពីថ្ងៃទី ០៩ ខែធ្នូ ឆ្នាំ ២០២៤ កន្លងទៅ។

គម្រោងមន្ទីរពេទ្យសាកលវិទ្យាល័យនេះបានទទួលការអនុម័តពីរាជរដ្ឋាភិបាលកម្ពុជា អនុញ្ញាតឱ្យប្រើប្រាស់ថវិកាកម្ចីសម្បទានរបស់រដ្ឋាភិបាលសាធារណរដ្ឋកូរ៉េនូវទឹកប្រាក់ឥណទានចំនួន ៦៦,៥៧ លានដុល្លារ។ កិច្ចសន្យាសាងសង់មានរយៈពេល ២៨ ខែ ដែលគ្រោងនឹងបញ្ចប់នៅខែមីនា ឆ្នាំ ២០២៧ ខាងមុខ។

មន្ទីរពេទ្យនេះ សាងសង់ឡើងនៅលើទីតាំងទី ៣ នៃសាកលវិទ្យាល័យវិទ្យាសាស្ត្រសុខាភិបាលដែលមានផ្ទៃដីសរុប ២២ ២៤៣ ម៉ែត្រការ៉េ បណ្តោយ ៨៣,៨០ ម៉ែត្រ និងទទឹង ៥៩,៨០ ម៉ែត្រ និងកម្ពស់ ៨ ជាន់ មានសមត្ថភាពទទួលជំងឺសម្រាកសរុបបាន ២០០ គ្រែ។

នៅក្នុងកិច្ចប្រជុំត្រួតពិនិត្យវឌ្ឍនភាពរួមគ្នា លើកទី ២ នៃគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល នៅទីតាំងទី ៣ នៃ ស.វ.ស កាលពីពេលថ្មីៗ នេះ លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល បានមានប្រសាសន៍ថា គិតត្រឹមខែតុលា ឆ្នាំ ២០២៥ នេះ ការងារសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល សម្រេចបានលទ្ធផល ៣៨.២០% នៃផែនការគម្រោង។

យ៉ាងណាក៏ដោយ លោកស្រីរដ្ឋលេខាធិការ បានកោតសរសើរចំពោះវឌ្ឍនភាពការងារសាងសង់មន្ទីរពេទ្យសាកលវិទ្យាល័យ ដែលសម្រេចបានលទ្ធផលជាវិជ្ជមាន និងទាន់ពេលវេលា នៃកាលវិភាគការងារ ជាពិសេសតំណាងក្រសួងសេដ្ឋកិច្ច និងហិរញ្ញវត្ថុ ដែលបានផ្តល់ការគាំទ្រក្នុងការងារសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាលនេះ ឱ្យកាន់តែរលូនទៅមុខបន្តទៀតទៅតាមគោលដៅគ្រោងទុក។

លោក Koo Bonhyun នាយកប្រចាំប្រទេសរបស់ Korean Exim Bank បានសាទរចំពោះវឌ្ឍនភាព និងបានចាត់ទុកគម្រោងសាងសង់មន្ទីរពេទ្យសាកលវិទ្យាល័យនេះ ជាសមិទ្ធផលដ៏សំខាន់មួយក្នុងការអភិវឌ្ឍរបស់ប្រទេសកម្ពុជា។

ថ្លែងក្នុងពិធីបញ្ចុះបឋមសិលាសាងសង់ជាផ្លូវការកាលពីថ្ងៃទី ០៩ ខែធ្នូ ឆ្នាំ ២០២៤ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានមានប្រសាសន៍ថា អគារមន្ទីរពេទ្យនេះបំពាក់ដោយគ្រឿងបរិក្ខារពេទ្យទំនើបទាន់សម័យ និងប្រកបដោយបច្ចេកវិទ្យាខ្ពស់នាពេលបច្ចុប្បន្នសម្រាប់ផ្តល់សេវាជូនប្រជាពលរដ្ឋ ហើយអគារមន្ទីរពេទ្យនេះសម្រាប់បណ្ដុះបណ្ដាល និងទាក់ទាញអ្នកជំនាញវេជ្ជសាស្ត្រទាំងកម្រិតជាតិ និងអន្តរជាតិសហការគ្នា ដើម្បីរកនវានុវត្តន៍ថ្មីៗ ទៅលើការសិក្សា និងស្រាវជ្រាវការអប់រំសុខភាព និងការពារ និងធ្វើគោលនយោបាយទៅលើការបណ្តុះបណ្តាលផ្នែកវេជ្ជសាស្ត្រនៅប្រទេសកម្ពុជាកាន់តែប្រសើរបន្ថែមទៀតស្របទៅនឹងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល គឺ ការពង្រឹង និងការលើកកម្ពស់សុខភាពឈានទៅរកការគ្របដណ្ដប់សុខភាពជាសកល។

លោករដ្ឋមន្ត្រី បានបន្តទៀតថា សមិទ្ធផលនេះពេលសាងសង់រួចមិនត្រឹមតែជាអគារមន្ទីរពេទ្យមួយដ៏ទំនើបប៉ុណ្ណោះទេ ក៏ជាកន្លែងមួយធ្វើរោគវិនិច្ឆ័យ និងការព្យាបាលកាន់តែមានប្រសិទ្ធភាព និងជាកន្លែងមួយដែលអ្នកប្រកបវិជ្ជាជីវៈសុខាភិបាលទាំងអស់ នឹងប្រើប្រាស់ទីតាំងនេះដើម្បីអភិវឌ្ឍន៍វិស័យសុខាភិបាលឱ្យកាន់តែប្រសើរឡើងថែមទៀត៕

អត្ថបទ ៖ សំអឿន

The post គិតត្រឹមខែតុលា ការសាងសង់ពេទ្យសាកលវិទ្យាល័យវិទ្យាសាស្ត្រសុខាភិបាល សម្រេចបានលទ្ធផលជាង ៣៨% appeared first on Kampuchea Thmey Daily.

ទំនប់ទឹកស្ទឹងពោធិ៍សាត់ទី២ សម្រេចបាន៣០%ហើយ ខណៈពេលបញ្ចប់អាចនឹងទប់ទឹកបានប្រមាណ៨៦០លានម៉ែត្រគូប

Kang Tola — Wed, 09 Jul 2025 14:50:35 +0000

ពោធិ៍សាត់ ៖ ទំនប់ទឹកស្ទឹងពោធិ៍សាត់២ នៅលើទឹកដីខេត្តពោធិ៍សាត់ បាននឹងកំពុងលេចរូបរាងឡើងប្រមាណជាង៣០%ហើយ ដែលទំនប់ដ៏ធំមួយនេះ ជាអំណោយដ៏ថ្លៃថ្លារបស់រាជរដ្ឋាភិបាលកម្ពុជា និងមានសមត្ថភាពអាចទប់ទឹកបានប្រមាណជា៨៦០លានម៉ែត្រគូប។

លោក ខូយ រីដា អភិបាលនៃគណៈអភិបាលខេត្តពោធិ៍សាត់ បានដឹកនាំកម្លាំងក្រុមការងារចម្រុះអង្គភាពជំនាញអាជ្ញាធរដែនដីដើម្បីចុះត្រួតពិនិត្យវឌ្ឍនភាពនៃការសាងសង់ទំនប់ស្ទាក់ទឹកស្ទឹងពោធិ៍សាត់២នាព្រឹកថ្ងៃទី៨ ខែកក្កដា ឆ្នាំ២០២៥ ត្រង់ចំណុចអន្លង់ក្រូច ក្នុងភូមិវាលវង្ស ឃុំរកាត ស្រុកភ្នំក្រវ៉ាញ ខេត្តពោធិ៍សាត់។

លោក ខូយ រីដា បានឱ្យដឹងថា ទំនប់ស្ទឹងពោធិ៍សាត់២នេះ ជាទំនប់មួយថ្មីស្រឡាង ដែលជាអំណោយដ៏ថ្លៃថ្លារបស់រាជរដ្ឋាភិបាលកម្ពុជា។ ហើយក្នុងទំនប់ទឹកនេះ គឺមានវិសាលភាពគ្របដណ្ដប់លើវិស័យកសិកម្ម និងវិស័យទេសចរ ហើយយើងក៏ធ្លាប់មានទំនប់មួយចំនួនរួចមកហើយ តែទំហំបរិមាណទឹកយើងទប់បានតែ៦០លានម៉ែត្រគូបនៅក្នុងមួយឆ្នាំប៉ុណ្ណោះ ប៉ុន្តែពេលទំនប់ទឹកនេះសម្រេចបានរួចរាល់គឺយើងអាចទប់បានរហូតដល់៨៦០លានម៉ែត្រគូបឯណោះ។

មិនតែប៉ុណ្ណោះទំនប់នេះ ក៏អាចបម្រើឱ្យវិស័យកសិកម្មអាចស្រោចស្រប់លើផ្ទៃដីរាប់ម៉ឺនហិតា ដើម្បីឆ្លើយតបទៅនឹងតម្រូវការរបស់ប្រជាកសិករ នៅទូទាំងក្រុងស្រុកទាំងទៅប្រជុំជននិងតំបន់ជនបទក្នុងខេត្តពោធិ៍សាត់ និងខេត្តបាត់ដំបង ដែលមានព្រំប្រទល់ដីជាប់គ្នានៅក្នុងស្រុកបាកាន ដែលអាចធ្វើស្រែដំណាំស្រូវបានចំនួន២ទៅ៣ដងនៅក្នុងមួយឆ្នាំ និងស្រូបភ្ញៀវទេសចរណ៍មកលេងកំសាន្តនៅក្នុងទឹកដីខេត្តនេះបានច្រើនកន្លែងថែមទៀត។

លោកបានបន្តទៀតថា បើតាមអ្នកជំនាញនៃការសាងសង់ទំនប់នេះបានឱ្យដឹងថា ទំនប់នេះមានកម្ពស់បង្ហូរទឹក៤០ម៉ែត្រ ហើយទំនប់ស្ពានខាងលើ៦០ម៉ែត្រ បណ្ដោយ៤១០ម៉ែត្រ អញ្ចឹងវិសាលភាពនៃទំនប់ស្ទាក់ទឹកនេះមួយ ជាទ្រព្យសម្បត្តិមហាសាល របស់ប្រជាជនខេត្តពោធិ៍សាត់ ហើយកើតចេញពីសុខសន្តិភាពពិតប្រាកដ ព្រោះបើគ្មានសន្តិភាពទេការអភិវឌ្ឍទាំងអស់នេះ មិនមានកើតមានឡើងទេ។

ទំនប់ស្ទឹងពោធិ៍សាត់ ២ គឺជាគម្រោងសំខាន់មួយសម្រាប់ការអភិវឌ្ឍប្រទេសជាតិ ដែលមានន័យសំខាន់យ៉ាងខ្លាំងក្នុងវិស័យសេដ្ឋកិច្ច កសិកម្ម ថាមពល និងទេសចរណ៍។ ទំនប់នេះជាគម្រោងអភិវឌ្ឍន៍សំណង់ធំមួយ ដែលរដ្ឋាភិបាលកម្ពុជាបានយកចិត្តទុកដាក់យ៉ាងខ្លាំងក្នុងការអភិវឌ្ឍ ដើម្បីលើកស្ទួយជីវភាពប្រជាជន និងអភិវឌ្ឍន៍តំបន់ ព្រោះវាអាចការពារបាននៅពេលដែលមានទឹកជំនន់នារដូវវស្សានៅទទូទាំងខេត្តថែមទៀត ប្រជាពលរដ្ឋទូទាំងខេត្តពោធិ៍សាត់នឹងខេត្តជាប់ព្រំប្រទល់អាចមានសេដ្ឋកិច្ចល្អប្រសើរ៕

ដោយ ៖ លាន គ្រន

The post ទំនប់ទឹកស្ទឹងពោធិ៍សាត់ទី២ សម្រេចបាន៣០%ហើយ ខណៈពេលបញ្ចប់អាចនឹងទប់ទឹកបានប្រមាណ៨៦០លានម៉ែត្រគូប appeared first on Kampuchea Thmey Daily.

ប្រាក់ចំណូលរបស់ក្រុមហ៊ុនហ្គោលដេនទ្រី មានការធ្លាក់ចុះ ៣៥% នៅត្រីមាសទី៣

May Kunmakara — Thu, 26 Dec 2024 02:18:17 +0000

ក្រុមហ៊ុន ហ្គោលដេនទ្រី ដែលជាក្រុមហ៊ុនអចលនទ្រព្យដែលបានចុះបញ្ជីនៅផ្សារមូលបត្រកម្ពុជា(CSX) បានរាយការណ៍ពីការធ្លាក់ចុះនៃចំណូលពីប្រតិបត្តិការរបស់ខ្លួនៅក្នុងត្រីមាសទី៣ឆ្នាំនេះ ដោយសារតែការធ្លាក់ចុះ៣៥%នៃសេដ្ឋកិច្ចសកលនិងក្នុងតំបន់ជាពិសេសការងើបឡើងយឺតនៃវិស័យសំណង់ និងអចលនទ្រព្យ។

យោងតាមរបាយការណ៍ហិរញ្ញវត្ថុរបស់ខ្លួនដែលបានផ្ញើរទៅកាន់ CSXសម្រាប់ត្រីមាសទី៣ ឆ្នាំ២០២៤ ក្រុមហ៊ុន ហ្គោលដេន ទ្រី មានចំណូលសរុបចំនួន ៤៦២,៦៩៨ដុល្លារ ថយចុះ៣៥% បើធៀបទៅនឹងត្រីមាសទី៣ ឆ្នាំ២០២៣ ដែលមានចំណូលសរុបចំនួនជិត៧១០,៧៧៤ ដុល្លារ។
ជាមួយគ្នានេះដែរ ការខាតសុទ្ធសម្រាប់ត្រីមាសទី៣ ឆ្នាំ២០២៤ ចំនួនជាង ១,១៤៩លានដុល្លារកើនឡើងចំនួនជាង ១លាន ដុល្លារ បើធៀបនឹងត្រីមាសទី៣ ឆ្នាំ២០២៣ ដែលមានការខាតសុទ្ធចំនួន ៩៥ ៤៤៩ដុល្លារ។

សម្រាប់ទ្រព្យសកម្មសរុប របស់ក្រុមហ៊ុន ហ្គោលដេន ទ្រី សម្រាប់ត្រីមាសទី៣ ឆ្នាំ២០២៤ មានចំនួនជាង ២៩,៧១ លានដុល្លារ ថយចុះចំនួនជាង ១,៨៥០ លានដុល្លារ បើធៀបនឹង ថ្ងៃទី៣១ ខែធ្នូ ឆ្នាំ២០២៣ ដែលមានចំនួន ៣១,៥៦៩លានដុល្លារ។

មូលធនសរុប របស់ក្រុមហ៊ុន ហ្គោលដេន ទ្រី សម្រាប់ត្រីមាសទី៣ ឆ្នាំ២០២៤ មានចំនួនជិត២លានដុល្លា) ថយចុះចំនួនជាង ១,៦២៤ លានដុល្លារ បើធៀបទៅនឹង ថ្ងៃទី៣១ ខែធ្នូ ឆ្នាំ២០២៣ ដែលមានចំនួនជាង ៣,៥៥៤ លានដុល្លារ។

លោកហុង អ៊ុយ ប្រធានក្រុមប្រឹក្សាភិបាលនៃក្រុមហ៊ុន ហ្គោលដេន ទ្រីបានថ្លែងថា ទីផ្សារអចលនទ្រព្យការិយាល័យនៅក្នុងទីក្រុងភ្នំពេញវិញ យោងតាមរបាយកាណ៍របស់ភ្នាក់ងារ អចបេនទ្រព្យ CBRE ទោះបីជាមានការធ្លាក់ចុះនៃវិស័យសំណង់ តម្លៃជួល និងតម្លៃលក់ក៏ដោយ អត្រាជួល ការិយាល័យបានបង្ហាញសញ្ញានៃស្ថិរភាព និងកំណើនគិតត្រឹមត្រីមាសទី ៣ ឆ្នាំ ២០២៤ ដែលមានចំនួន ៦៥.៨ ភាគរយ កើនឡើងខ្ពស់ជាងត្រីមាសទី២ដែលមានចំនួន៦១,៨ ភាគរយ។

លោកថា៖« ការកាត់បន្ថយទំហំ ការិយាល័យថ្មីអាចជួយបង្កើនអត្រាជួល និងផលចំណេញសម្រាប់វិនិយោគិន។ ដោយមើលឃើញឱកាសនេះ យើង កំពុងធ្វើពិពិធកម្មយុទ្ធសាស្ត្រក្នុងការពង្រីកភាពជាដៃគូជាមួយអ្នកជួលបច្ចុប្បន្ន អ្នកជួលថ្មី និងដៃគូផ្សេងទៀត»។

លោកបានគូសបញ្ជាក់ថា៖«ចំពោះអគារ វីត្រាស់ អត្រាជួលនៅក្នុងត្រីមាសទី៣ គឺ ៥៩ ភាគរយ ក្នុងត្រីមាសទី៣ នេះ។ យើងកំពុង ពង្រីក យុទ្ធសាស្ត្ររបស់យើង ដើម្បីសម្រេចឱ្យបាននូវអត្រាជួលខ្ពស់ជាងនេះ ដោយសារបច្ចុប្បន្នយើងកំពុងទទួលបានអ្នកជួលថ្មីៗបន្ថែមទៀត ។ យើងនៅតែបន្តផ្តល់អគារការិយាល័យប្រកបដោយគុណភាព ដើម្បី បង្កើតភាពជិតស្និតជាអ្នកជួល និងផ្តោតលើ ឧត្តមភាពប្រតិបត្តិការរបស់យើង»។

ជាមួយគ្នានេះដែរទាក់ទងនឹងបញ្ហាផ្លូវច្បាប់ អគារ អមរា រេស៊ីដេន លោកហុង អ៊ុយបានថ្លែងបញ្ជាក់ថា គណៈមេធាវីរបស់ក្រុមហ៊ុនកំពុងបន្តនិតិវិធីផ្លូវច្បាប់ ប្រកបដោយភាពប្រុងប្រយ័ត្ន។ ក្រុមហ៊ុនយល់ពីសារៈសំខាន់នៃការដោះស្រាយបញ្ហានេះឱ្យបានលឿន ហើយ កំពុងប្រើប្រាស់ធនធានដែលមាន និងចាំបាច់ ដើម្បីអាចទទួលបានភាពយុត្តិធម៌ទៅដល់គ្រប់ភាគីពាក់ព័ន្ធ ។

«ចំពោះយុទ្ធសាស្ត្រហិរញ្ញវត្ថុវិញ ក្រុមហ៊ុនបាន កំពុងធ្វើការជាមួយធនាគារដែលជាដៃគូរ ដើម្បីរៀបចំ រចនាសម្ព័ន្ធហិរញ្ញប្បទានមានកាលកំណត់និងរចនាសម្ព័ន្ធ ភាគហ៊ុនិករបស់ក្រុមហ៊ុនឡើងវិញ ដើម្បីពង្រឹង តារាងតុល្យការរបស់យើង និងកែលម្អដំណើរការអាជីវកម្ម»។ នេះបើយោងតាមលោក ហុង អ៊ុយ៕

The post ប្រាក់ចំណូលរបស់ក្រុមហ៊ុនហ្គោលដេនទ្រី មានការធ្លាក់ចុះ ៣៥% នៅត្រីមាសទី៣ appeared first on Kampuchea Thmey Daily.

ទំនប់បង្វែរចរន្តទិសទឹកស្ទឹងស្រែង សម្រេចការសាងសង់បានប្រមាណជាង ៧០%

Ken Malis — Fri, 16 Aug 2024 08:07:37 +0000

ទំនប់បង្វែរចរន្តទិសទឹកស្ទឹងស្រែង ដែលមានការជីកព្រែកសិប្បនិម្មិតប្រវែង ៤៥០ម៉ែត្រ និងទំនប់ស្ទាក់ស្ទឹងប្រវែង ១០០ម៉ែត្រ ស្ថិតនៅក្នុងឃុំស្លែងស្ពាន ស្រុកស្រីស្នំ ខេត្តសៀមរាប គិតមកដល់ពេលនេះសម្រេចការសាងសង់បានប្រមាណជាង ៧០%។

ស្ទឹងស្រែង មានតួនាទីទទួលយកទឹកពីប្រភពទឹកជួរភ្នំដងរែក និងមួយផ្នែកទៀតពីផ្ទៃរងទឹកភ្លៀងក្នុងតំបន់ មកធ្វើការស្រោចស្រពបន្ថែមលើផ្ទៃដីបង្កបង្កើនផលកសិកម្ម ដំណាំរួមផ្សំ និងការប្រើប្រាស់សម្រាប់ជីវភាពរស់នៅប្រចាំថ្ងៃរបស់ប្រជាពលរដ្ឋនៅតាមបណ្ដោយស្ទឹង។ កន្លងមក ដីច្រាំងស្ទឹងស្រែងបានបាក់ និងហូរច្រោះ ជាច្រើនកន្លែង ដោយសារឥទ្ធិពលជំនន់ទឹកភ្លៀងរដូវវស្សាដែលហូរមកពីជួរភ្នំដងរែក និងផ្ទៃរងទឹកភ្លៀងក្នុងតំបន់ ដែលធ្វើឱ្យប្រជាពលរដ្ឋនៅឃុំស្លែងស្ពាន ស្រុកស្រីស្នំ ខេត្តសៀមរាប ជួបការលំបាកកង្វះទឹកសម្រាប់ស្រោចស្រពបន្ថែមលើការងារបង្កបង្កើនផលកសិកម្ម និងការប្រើប្រាស់ប្រចាំថ្ងៃ។

បើតាមការបង្ហោះនៅលើទំព័រហ្វេសប៊ុករបស់អង្គភាពអ្នកនាំពាក្យរាជរដ្ឋាភិបាល ចរន្តទឹកស្ទឹងស្រែងបានយាយីទៅលើប្រឡាយមេបេតុងខាងកើត នៃប្រព័ន្ធធារាសាស្ត្រស្ទឹងស្រែងជំហាន១ ដែលជាប្រភពទឹកដ៏ធំចេញពីអាងទឹកស្ទឹងស្រែងយកទៅស្រោចស្រពនៅខេត្ដឧត្ដរមានជ័យ និងតំបន់មួយចំនួននៅខេត្តសៀមរាប។ ប្រព័ន្ធធារាសាស្ត្រស្ទឹងស្រែងជំហាន១ ស្ថិតនៅក្នុងឃុំជើងទៀន ស្រុកចុងកាល់ ខេត្តឧត្តរមានជ័យ ជាប្រព័ន្ធដ៏ធំគ្របដណ្តប់លើស្រុកចុងកាល់ ខេត្តឧត្តរមានជ័យ ស្រុកភ្នំស្រុក ខេត្តបន្ទាយមានជ័យ និងស្រុកចំនួន២ របស់ខេត្តសៀមរាប គឺស្រុកស្រីស្នំ និងស្រុកក្រឡាញ់ និងបានដើរតួនាទីយ៉ាងសំខាន់បម្រើដល់ការងារបង្កបង្កើនផលទាំងរដូវប្រាំង និងរដូវវស្សា ព្រមទាំងការប្រើប្រាស់សម្រាប់វិស័យផ្សេងៗទៀត។

ប្រព័ន្ធនេះបញ្ជូនទឹកពីទិសខាងជើងទៅទិសខាងត្បូង តាមប្រឡាយមេបេតុង ២ខ្សែ គឺប្រឡាយមេខាងកើត និងប្រឡាយមេខាងលិច រួមជាមួយទំនប់សណ្ដស្ទឹង ១ខ្សែ ប្រវែង ២៩៨៤ម៉ែត្រ។ ប្រឡាយមេខាងកើតមានប្រវែង ៣៨០៥៩ម៉ែត្រ នាំទឹកពីផ្នែកខាងលើ និងពីអាងស្តុកទឹកមកស្រោចស្រពលើផ្ទៃដី ១២០០០ហិកតា ក្នុងស្រុកស្រីស្នំ និងស្រុកក្រឡាញ់ ខេត្តសៀមរាប។ ប្រឡាយមេខាងលិច មានប្រវែង ៤២៩៦៩ម៉ែត្រ នាំទឹកពីផ្នែកខាងលើ និងពីអាងស្តុកទឹកឆ្លងកាត់ស្រុកចុងកាល់ ខេត្តឧត្តរមានជ័យមកស្រោចស្រពលើផ្ទៃដី ១៣០០០ហិកតា ក្នុងស្រុកភ្នំស្រុក ខេត្តបន្ទាយមានជ័យ។

ប្រភពដដែលបានឱ្យដឹងថា ចាប់ពីខែឧសភា ឆ្នាំ២០២៤មក ក្រុមការងារនាយកដ្ឋានវិស្វកម្ម នៃក្រសួងធនធានទឹក និងឧតុនិយម បានចាប់ផ្ដើមអនុវត្តការសាងសង់ទំនប់បង្វែរចរន្តទឹកស្ទឹងស្រែង ដើម្បីការពារប្រព័ន្ធប្រឡាយមេបេតុងខាងកើតដ៏មានសារសំខាន់សម្រាប់ការស្រោចស្រពក្នុងខេត្តឧត្ដរមានជ័យ និងខេត្តសៀមរាប។ ការងារសាងសង់រួមមាន៖ ជីកព្រែកសិប្បនិម្មិតប្រវែង ៤៥០ម៉ែត្រ ដែលមានទំហំមាត់លើ ៦០ម៉ែត្រ ទំហំបាតក្រោម ២០ម៉ែត្រ ដើម្បីប្ដូរចរន្តទឹក និងសាងសង់ទំនប់ស្ទាក់ស្ទឹងប្រវែង ១០០ម៉ែត្រ។ គិតមកដល់ពេលនេះវឌ្ឍនភាពការងារសាងសង់សម្រេចបានប្រមាណជាង ៧០ភាគរយ។

ក្រោយពេលជីកព្រែកសិប្បនិម្មិតបង្វែរចរន្តទិសទឹក និងសាងសង់សំណង់បេតុងបង្វែរទិសទឹកស្ទឹងស្រែង បានរួចរាល់ ប្រជាពលរដ្ឋប្រមាណ ១៤៩០គ្រួសារ ក្នុងឃុំចុងកាល់ និងឃុំជើងទៀន ស្រុកចុងកាល់ ខេត្តឧត្តរមានជ័យ និងឃុំស្លែងស្ពាន ស្រុកស្រីស្នំ ខេត្តសៀមរាប នឹងទទួលបានប្រភពទឹកមកធ្វើការស្រោចស្រពបន្ថែមលើការងារបង្កបង្កើនផលកសិកម្ម ព្រមទាំងបានរួមចំណែកយ៉ាងសំខាន់ក្នុងការដោះស្រាយបញ្ហាប្រែប្រួលអាកាសធាតុដូចជាគ្រោះរាំងស្ងួត និងទឹកជំនន់ជាដើម។

មិនតែប៉ុណ្ណោះ កសិករនឹងអាចបង្កើនរដូវដាំដុះដំណាំកសិកម្ម ២ ទៅ ៣ ដងក្នុងមួយឆ្នាំលើផ្ទៃដីដដែល ដោយទទួលបានកំណើនប្រាក់ចំណូលក្នុងគ្រួសារប្រសើរជាងមុន ថែមទាំងចូលរួមចំណែកក្នុងការអភិវឌ្ឍ និងថែរក្សាធនធានធម្មជាតិក្នុងមូលដ្ឋានផងដែរ៕

The post ទំនប់បង្វែរចរន្តទិសទឹកស្ទឹងស្រែង សម្រេចការសាងសង់បានប្រមាណជាង ៧០% appeared first on Kampuchea Thmey Daily.

ការដ្ឋានពង្រីកផ្លូវជាតិលេខ ៧ ស្គន់-កំពង់ចាម បើកការដ្ឋានរួច យឺតយ៉ាវមិនទាន់សាងសង់

Din Thary — Fri, 28 Jul 2023 01:56:42 +0000

លោក គង់ វិមាន អនុរដ្ឋលេខាធិការនៃក្រសួងសាធារណការ និងដឹកជញ្ជូន នារសៀលថ្ងៃទី២៧ ខែកក្កដា នេះ បានគូសបញ្ជាក់ថា ការដ្ឋានពង្រីកផ្លូវជាតិលេខ ៧ ពីស្គន់ទៅក្រុងកំពង់ចាម មានភាពរាំងស្ទះនៃការសាងសង់ដោយសារកំពុងដោះស្រាយផលប៉ះពាល់មួយចំនួន។

ឆ្លើយតបការសាកសួរពី «កម្ពុជាថ្មី» កាលពីម្សិលមិញនេះ លោក គង់ វិមាន បានពន្យល់ថា ភាពរអាក់រអួលគម្រោងសាងសង់ផ្លូវជាតិលេខ ៧ ពីស្គន់ទៅកំពង់ចាម ដោយហេតុបច្ចុប្បន្នកំពុងរង់ចាំថវិកាដោះស្រាយផលប៉ះពាល់មួយចំនួន ដូច្នេះនៅពេលថវិកាធ្លាក់មកពេលណា ក្រុមការងារនឹងចាប់ផ្តើមការសាងសង់វិញភ្លាមៗ។

អនុរដ្ឋលេខាធិការរូបនេះបញ្ជាក់ថា «យើងបានដឹងហើយថា ផ្លូវជាតិលេខ ៧ ពីស្គន់ ទៅកំពង់ចាមជាផ្លូវចាស់ ដូច្នេះហើយទើបបង្កឱ្យមានបញ្ហាប្រឈមមួយចំនួន ហើយផ្លូវចាស់នេះត្រូវសាងសង់និងពង្រីកជាផ្លូវធំថ្មី ដែលមានប្រវែងសរុបជាង ៤៥ គីឡូម៉ែត្រ ដោយស្តារនិងពង្រីកពី ២ គន្លង ទៅ ៤ គន្លង»។

តែទោះជាបែបនេះក្តី លោក គង់ វិមាន អះអាងថា បច្ចុប្បន្នគណៈកម្មាធិការនិងក្រុមការងារកំពុងធ្វើការសម្របសម្រួល និងដោះស្រាយផលប៉ះពាល់ឲ្យបានចប់ ហើយនៅពេលរួចរាល់នឹងចាប់ផ្តើមបន្តការសាងសង់វិញភ្លាមៗផងដែរ។

គួររំលឹកថា ផ្លូវជាតិលេខ ៧ ពីស្គន់ ទៅកំពង់ចាមមានប្រវែងសរុបជាង ៤៥ គីឡូម៉ែត្រ ចាប់ពីរង្វង់មូលស្គន់ទីរួមស្រុកជើងព្រៃ ទៅដល់រង្វង់មូលគល់ស្ពានគីហ្សូណាក្រុងកំពង់ចាម ដែលបានបើកការដ្ឋានស្តារនិងពង្រីកពី ២ គន្លង ទៅ ៤ គន្លង កាលពីថ្ងៃទី ៩ ខែមករា ឆ្នាំ២០២៣។ កំណាត់ផ្លូវនេះសាងសង់ដោយក្រុមហ៊ុមសាជីវកម្មស្ពាននិងថ្នល់ចិនដោយចំណាយថវិកាសរុបជាង ១១៧ លានដុល្លារអាមេរិក ហើយបើតាមផែនការគ្រោងបញ្ចប់នៅក្នុងឆ្នាំ ២០២៦៕

The post ការដ្ឋានពង្រីកផ្លូវជាតិលេខ ៧ ស្គន់-កំពង់ចាម បើកការដ្ឋានរួច យឺតយ៉ាវមិនទាន់សាងសង់ appeared first on Kampuchea Thmey Daily.

លែងខ្លាចខ្វះទៀតហើយ បន្ទប់ទឹក៩បានសាងសង់តាមបណ្តោយឆ្នេរ សម្រាប់បុណ្យចូលឆ្នាំខ្មែរខាងមុខ

Sorn Phanith — Mon, 01 Feb 2021 04:40:39 +0000

បន្ទប់ទឹកសាធារណៈ ស្ថិតតាមបណ្តោយឆ្នេរសមុទ្រអូរឈើទាល២ អូរត្រេះ១ អូរត្រេះ២ និងឆ្នេរពយជំទាវម៉ៅចំនួន៩កន្លែង នៅក្រុងព្រះសីហនុនឹងដាក់ឲ្យសាធារណជនប្រើប្រាស់ នៅបុណ្យចូលឆ្នាំខ្មែរខាងមុខនេះ។

ការប្រកាសនេះ បានធ្វើឡើង ខណៈដែលលោក គួច ចំរើន អភិបាល នៃគណៈអភិបាលខេត្តព្រះសីហនុ បានដឹកនាំមន្ត្រីជំនាញចុះត្រួតពិនិត្យវឌ្ឍនភាពនៃការសាងសង់បន្ទប់ទឹកសាធារណៈ ស្ថិតតាមបណ្តោយឆ្នេរសមុទ្រអូរឈើទាល២ អូរត្រេះ១ អូរត្រេះ២ និងឆ្នេរពយជំទាវម៉ៅ កាលពីរសៀលថ្ងៃទី៣១ ខែមករាឆ្នាំ២០២១។

លោក គួច ចំរើន បានជំរុញឲ្យក្រុមការងារជំនាញនីមួយៗ ត្រូវបង្កើនការសាងសង់ និងធ្វើតាមលក្ខណៈបច្ចេកទេស សម្រេចឲ្យបានតាមផែនការ ដែលបានគ្រោងទុក។ លោកអភិបាលខេត្តបានមានប្រសាសន៍ថា« បន្ទប់ទឹក សាធារណៈទាំង៩ នៅបណ្ដោយឆ្នេរ ក្នុងក្រុងព្រះសីហនុ ក្រោមគោលនយោបាយសម្ដេចអគ្គមហាសេនាបតីតេជោ ហ៊ុន សែន កំពុងដំណើរការក្នុងយ៉ាងល្អ ហើយសម្រាប់ចូលឆ្នាំខ្មែរ២០២១ខាងមុខនេះ នឹងបានដាក់ជូនសាធាណៈជន ប្រើប្រាស់ហើយ»។

គួរបញ្ជាក់ថា គិតត្រឹមថ្ងៃទី២២ ខែមករា ឆ្នាំ២០២១ ការងារសាងសង់បន្ទប់ទឹកសាធារណៈទាំង ៩ទីតាំង នៅតាមបណ្តោយឆ្នេរអូរឈើទាល ឆ្នេរអូរត្រេះ និងឆ្នេរពយជំទាវម៉ៅ សម្រេចបានប្រមាណ ៣៥.១% នៃការងារទាំងអស់៕

អត្ថបទ៖ សំអឿន

សូមចុចអាន៖ លទ្ធផល ៣៣ ថ្ងៃ កម្ពុជាបូមប្រេងបានជាង ៤ ម៉ឺនបារ៉ែល

The post លែងខ្លាចខ្វះទៀតហើយ បន្ទប់ទឹក៩បានសាងសង់តាមបណ្តោយឆ្នេរ សម្រាប់បុណ្យចូលឆ្នាំខ្មែរខាងមុខ appeared first on Kampuchea Thmey Daily.