ព័ត៌មានជាតិ

លទ្ធផល ៣៣ ថ្ងៃ កម្ពុជាបូមប្រេងបានជាង ៤ ម៉ឺនបារ៉ែល

បានផុស

៣ years មុន

នៅ

ថ្ងៃចន្ទ ១ កុម្ភៈ ២០២១

ដោយ

ក្នុងរយៈពេល ៣៣ ថ្ងៃ ក្រោយការប្រកាសទទួលដំណក់ប្រេងដំបូង ប្រមុខរដ្ឋាភិបាលបានបង្ហាញចំនួនផលប្រេងដែលចម្រាញ់បានពីឈូងសមុទ្រប្រទេសកម្ពុជា។

រយៈពេល ៣៣ ថ្ងៃ ក្រុមហ៊ុនបានបូមប្រេងបានចំនួន ៤១ ០៥៦ បារ៉ែល។ តាមការប៉ាន់ស្មានក្នុងមួយថ្ងៃកម្ពុជាអាចចម្រាញ់ប្រេងបាន ៧ ០០០ ទៅ ៧ ៥០០ បារ៉ែលក្នុងមួយថ្ងៃ។

សម្តេចបានបន្តទៀតថា អណ្តូងទីពីរកំពុងដំណើរការ និងទី ៣ ទី ៤ កំពុងបន្តរុករកបន្ថែមទៀត។

បើតាមប្រមុខរដ្ឋាភិបាល ចំនួនផលប្រេងនេះមិនទាន់ជះឥទ្ធិពលដល់កំណើនសេដ្ឋកិច្ចជាតិជាដុំកំភួន តែក៏ជាការចាប់ផ្ដើមដល់ល្អដល់ឧស្សាហកម្មប្រេងនិងឧស្ម័ននៅកម្ពុជា។ រដ្ឋាភិបាល នឹងបន្តធ្វើការជាមួយក្រុមហ៊ុនវិនិយោគដទៃទៀត ដើម្បីស្វែងរកប្រភពធនធានប្រេង ជំរុញដល់ការអភិវឌ្ឍសេដ្ឋកិច្ចជាតិ។

នៅថ្ងៃទី២៩ ខែធ្នូ ឆ្នាំ២០២០ កម្ពុជាប្រកាសទទួលបានដំណក់ប្រេងលើកដំបូង។ ដំណក់ប្រេងនេះស្ថិតនៅតំបន់ប្លុក A នៃឈូងសមុទ្រកម្ពុជា ដោយក្រុមហ៊ុន Kris Energy បានខួងប្រេងចេញពីបាតសមុទ្រក្នុងខេត្តព្រះសីហនុ។

ថវិកាបានពីការលក់ប្រេងដំបូង រដ្ឋាភិបាលប្រកាសនឹងយកទៅប្រើប្រាស់ក្នុងវិស័យអាទិភាព២ គឺវិស័យអប់រំ និងវិស័យសុខាភិបាល ដែលជាវិស័យសំខាន់សម្រាប់កម្ពុជា។ ប្រមុខរដ្ឋាភិបាលចាត់ទុក ដំណក់ប្រេងជាពរជ័យជូនចំពោះប្រជាជាតិកម្ពុជា៕