ការរកឃើញនេះបានកើតឡើង បន្ទាប់ពីការប្រកួតចុងក្រោយរវាងរូបគេ ទល់នឹងអ្នកប្រដាល់ ថៃ Ferrari Fairtex នៅសង្វៀន ONE Friday Fights 95 កាលពីខែ​មករា កន្លងទៅ ដែលពេលនោះរូប​គេបានទទួលជ័យជម្នះ ដោយផ្តួលឱ្យសន្លប់ទឹកទី ១។

មិនមែន Nabati តែ​ម្នាក់​នោះ​ទេ​ ដែលបានតេស្តឃើញវិជ្ជមានសារធាតុ​ហាមឃាត់ សូម្បីដៃគូរបស់គេកីឡាករ Ferrari Fairtex ក៏រកឃើញវិជ្ជមានសារធាតុ​ហាម​ឃាត់​ដូចគ្នាដែរ ប៉ុន្តែកីឡាករ ថៃ រូបនេះនឹងត្រូវផ្អាក​ពី​ការ​ឡើងសង្វៀន ONE ត្រឹមរយៈពេល ៣ ខែប៉ុណ្ណោះ។

កីឡាករ Nabati បានសាងកំណត់ត្រាល្អមែនទែននៅសង្វៀន ONE ដោយឆ្លងកាត់ ៥ ប្រកួតជាមួយជើងខ្លាំង ថៃ រូបគេបានឈ្នះទាំង ៥ ប្រកួត ក្នុងនោះអ្នកលេងកណ្តាប់ដៃវ័យ ៣០ ឆ្នាំរូបនេះបានឈ្នះកីឡាករ Pongsiri PK Saenchai, Avatar PK Saenchai, Suablack, Nong-O Hama និងចុងក្រោយបានយកឈ្នះលើ Ferrari Fairtex៕

ប្រែសម្រួលអត្ថបទ៖ សេម កុសល
ប្រភព៖ Bangkok Post

The post ជើង​ខ្លាំង​ផ្តួល​ថៃ​ច្រើន​រូប Nabati ត្រូវ ONE តេស្តឃើញសារធាតុហាម​ឃាត់ appeared first on Kampuchea Thmey Daily.

អ្នកប្រដាល់វ័យក្មេង Takumi Terada បានទម្លាក់ជើងខ្លាំងកីឡាករ Taito Gunji ឲ្យធ្លាក់មកលេខ២ក្នុងតារាងចំណាត់ថ្នាក់​ពិភពលោកក្នុងប្រភេទទម្ងន់៥៧គីឡូក្រាម​រៀបចំឡើងដោយ Beyond Kick។ អ្វីដែលកាន់តែពិសេសគឺកីឡាករ Takumi Terada នេះហើយបានធ្វើឲ្យកីឡាករ Taito Gunji ស្គាល់បរាជ័យលើកដំបូងគិតតាំងពីឆ្នាំ​២០១២។ ក្នុងការប្រកួតដណ្ដើមខ្សែក្រវាត់ K-1 Featherweight កម្មវិធី K-1 World Max 2024 នៅទីក្រុង​តូក្យូ​ កាលពីថ្ងៃទី២៩ ខែកញ្ញា ឆ្នាំ២០២៤ កីឡាករ Terada បានឈ្នះពិន្ទុកីឡាករ Taito Gunji ក្នុងទឹកទី៤ ដែលជាទឹកបន្ថែម ក្រោយការប្រកួត៣ទឹកលទ្ធផលស្មើគ្នា។

ក្រោយជ័យជម្នះ Terada បានគ្រងជាម្ចាស់ខ្សែក្រវាត់ K-1 Featherweight ជាពិសេសបានឡើងឈរលេខ១ក្នុងតារាងចំណាត់ថ្នាក់ពិភព​លោក​ ស្របពេលរូបគេកំពុងមានកំណត់ត្រាយ៉ាងល្អក្នុងការប្រកួតឃីកបុងសុីងកម្រិតអាជីព។ គិត​ចាប់តាំងពីឆ្នាំ២០២០ កីឡាករ Terada ប្រកួតបាន១១លើក​ ឈ្នះ១០ ចាញ់១លើក ហើយកំពុងគ្រងខ្សែក្រវាត់​២ខ្សែ​គឺ​ ISKA Oriental Rules World Super-featherweight និង K-1 Featherweight។

កីឡាករ Takumi Terada ស្ថិត​នៅ​ក្លិប​ Team Vasileus ជាមួយកីឡាករឆ្នើម Takeru Segawa។ រូប​គេ​មាន​​ពេល​វេលា​វែងឆ្ងាយទៀត ក្នុងការប្រឡូក​អាជីពឈឺសាច់មួយនេះ។ ជាពិសេសនៅមានដៃគូខ្លាំងៗ​ជាងច្រើនទៀតដែលអ្នកប្រដាល់វ័យក្មេងម្នាក់នេះត្រូវជួប៕

អត្ថបទ៖ ផា រតនា

The post Terada ឡើងឈរលេខ១ពិភពលោក ឃីក​បុកស៊ីង​​​ទម្ងន់៥៧គីឡូក្រាម appeared first on Kampuchea Thmey Daily.

កីឡាករ YukiYoza បានចាត់​ទុក​កីឡាករ​ Petchdam ជាអតីតម្ចាស់ខ្សែក្រវាត់ ONE Championship ជាអ្នកប្រយុទ្ធ​ដ៏​ល្អ​ម្នាក់។ ក្នុង​នាម​ជា​អ្នក​ប្រដាល់ រូប​គេ​សប្បាយ​ចិត្ត​​ដែល​​បាន​វាយជាមួយ​គាត់។ គាត់​ជាអ្នកប្រដាល់ដែលខ្លាំង​ម្នាក់។

កីឡាករ Yuki Yoza បាន​ប្រកួត​ជា​មួយ​​កីឡាករ​ថៃ​​៤​នាក់​ហើយ​ដោយ​​មិន​ធ្លាប់​ចាញ់​សោះ។ លើក​ទី១ រូប​គេ​បាន​ឈ្នះ​ពិន្ទុ​កីឡាករ Aikpikart កាល​​ពី​ឆ្នាំ​២០២២។ លើក​ទី២ រូប​គេបាន​ឈ្នះ​កីឡាករ Aikmongkol Gaiyanghadao ក្នុង​ទឹក​ទី១ ក្នុង​ឆ្នាំ​២០២៣។ លើក​ទី​៣ រូប​គេ​បាន​ផ្តួល​កីឡាករ Kongnapa Weerasakreck ក្នុង​ទឹក​ទី១ និង​លើក​ទី​៤ បាន​ផ្តួល​កីឡាករ Petchdam ក្នុង​ទឹក​ទី​៣ ក្នុង​ឆ្នាំ​២០២៤។

កីឡាករ Yuki ដែល​វាយ​ក្នុង​ទម្ងន់​៦២​គីឡូក្រាម​ ធ្លាប់​ប្រកួត២០​ដង ក្នុង​នោះ​ឈ្នះ១៨​ដង និងចាញ់​២​ដង។ រូប​គេ​បាន​ឈ្នះ​ខ្សែ​ក្រវាត់ K-1 កាល​ពី​​ឆ្នាំ​២០២៣។ អាជីព​ពី​ដំបូង រូប​គេ​ប្រកួត​កីឡា​ការ៉ាតេ តាំង​ពី​ឆ្នាំ​២០១២ ដល់​២០១៨។ អ្វី​ដែល​គួរ​ឲ្យ​សរសើរ​គឺ កាល​ពី​ឆ្នាំ​២០១៨ រូប​គេ​ប្រកួត​ការ៉ាតេ​ក្នុង​ទម្ងន់​៨០​គីឡូក្រាម ប៉ុន្តែ​បាន​ហ្វឹក​ហាត់​សម្រក​ទម្ងន់​មក​សល់​ត្រឹម​ជាង​៦០​គីឡូក្រាម​ប៉ុណ្ណោះ​សម្រាប់​ការ​ប្រកួត​ឃីក​បុក​ស៊ីង​អាជីពបច្ចុប្បន្ន៕

ប្រែសម្រួល៖ ផា រតនា

The post ជួបថៃ៤នាក់ ម្ចាស់ខ្សែក្រវាត់ K-1 កីឡាករ Yuki ទទួល​បាន​ជ័យជម្នះទាំងអស់ appeared first on Kampuchea Thmey Daily.

១. កីឡាករ Chico Kwasi

កីឡាករ Chico Kwasi កើតថ្ងៃទី១១ ខែមីនា ឆ្នាំ១៩៩៨ ជាអ្នកប្រដាល់ឃីកបុងសុីងអាជីព​កូនកាត់ហុល្លង់-ស៊ូរីណាម។ រូប​គេ​បាន​ចូលរួមជាមួយសង្វៀន Glory កាលពីដើមឆ្នាំ២០២៣ ប៉ុន្តែរូបគេមានសមត្ថភាពអាចគ្រងជាមួយម្ចាស់​ Glory Welterweight ក្រោយយកឈ្នះកីឡាករហុល្លង់ Jay Overmeer កាលពីថ្ងៃទី៤ ខែវិច្ឆិកា ឆ្នាំ២០២៣។

មុនផ្លាស់មក សង្វៀន Glory កីឡាករ Chico Kwasi ធ្លាប់ប្រកួតនៅសង្វៀន King of Kings, Mega Fight Arena និង Dynamite Fighting Show ហើយធ្លាប់គ្រងខ្សែក្រវាត់ KOK Welterweight Championship, KOK Germany Grand Prix Welterweight Grand Prix Winner, MFA Welterweight Championship ។ នៅថ្ងៃទី១២ ខែតុលា ខាងមុខ​ Kwasi នឹងត្រៀមប្រកួតការពារខ្សែក្រវាត់របស់ខ្លួនលើកដំបូង​ទល់​នឹង​កីឡាករជើងខ្លាំងកូនកាត់ម៉ារ៉ុក-ហុល្លង់ Tyjani Beztati។

២. កីឡាករ Tyjani Beztati

កីឡាករ Tyjani Beztati ជាជើងខ្លាំងក្នុងប្រភេទម្ងន់៧០គីឡូក្រាម ប៉ុន្តែឥឡូវនេះរូបគេបាន​ឡើង​ទម្ងន់ ដើម្បី​ប្រកួតក្នុងប្រភេទម្ងន់៧៧គីឡូក្រាមវិញ។ រូប​គេ​ត្រៀមប្រកួតដណ្ដើមខ្សែក្រវាត់ Glory Welterweight ពី​កីឡាករ Chico Kwasi ដែលជាម្ចាស់ខ្សែក្រវាត់។ កីឡាករ Beztati បានចូលរួមជាមួយនៅសង្វៀន Glory កាល​ពី​ឆ្នាំ២០១៦។

Tyjani Beztati បានឈ្នះខ្សែក្រវាត់ Glory Lightweight ក្រោយយកឈ្នះកីឡាករអាមេរិក Elvis Gashi កាលពីថ្ងៃទី៤ ខែកញ្ញា ឆ្នាំ២០២១​។ រយៈពេល៣ឆ្នាំចុងក្រោយ រូប​គេ​បាន​ឡើងការពារខ្សែក្រវាត់ជោគជ័យបាន៥លើក​ដែល​មិន​ទាន់​មាន​កីឡាករណាអាចដណ្ដើមខ្សែក្រវាត់ពីរូបគេបានឡើយ។

៣. កីឡាករ Teodor Hristov

កីឡាករ Teodor Hristov ជាអ្នកប្រដាល់ឃីកបុកសុីងប៊ុលហ្គារីវ័យក្មេង នៅសង្វៀន Glory។ ស្ថិតក្នុងវ័យ២៣ឆ្នាំ Hristov ប្រកួតឃីកបុកសុីងលក្ខណៈអាជីព​ចំនួន២១លើក ក្នុង​ឈ្នះ១៧លើក និង​ចាញ់៤លើក។ រូប​គេ​ទើបតែ​ចូល​រួម​សង្វៀន Glory កាលពីឆ្នាំ២០២៣ និង​មិនទាន់មាន​ឱកាស​ប្រកួតដណ្ដើមខ្សែក្រវាត់​ឡើយ​ ប៉ុន្តែរូបគេមានកំណត់ត្រាល្អ បន្ទាប់ពីប្រកួត៣លើកនៅសង្វៀន Glory ឈ្នះទាំង៣លើក។

កីឡាករ Teodor Hristov ធ្លាប់ឈ្នះខ្សែក្រវាត់ជាច្រើនតាំងពីកម្រិតយុវជនរហូតដល់កម្រិតអាជីព មុនពេលផ្លាស់មក សង្វៀន Glory។ ការប្រកួតឃីកបុកសុីង​អាជីព រូប​គេ​​​ធ្លាប់​បាន​ឈ្នះខ្សែក្រវាត់ Castle Gladiators Welterweight​,​ WKF Intercontinental​ Welterweight និង Mix Fight Welterweight។

ប្រែសម្រួល៖ ផា រតនា

The post មក​ស្គាល់​ជើងខ្លាំង​ឃីកបុកស៊ីង​ទម្ងន់​៧៧​គីឡូក្រាម​​៣​រូប​នៅសង្វៀន Glory appeared first on Kampuchea Thmey Daily.

និយាយ​ពី​ប្រភេទ​ទម្ងន់​៦៥​គីឡូក្រាម​វិញ​ បច្ចុប្បន្ន​កីឡាករ​ថៃ​កំពុង​គ្រប់​គ្រង ហើយ​រូប​គេ​បាន​ឡើង​ការពារ​ខ្សែ​ក្រវាត់​នេះ​ជោគជ័យ​​៨​ដង​ហើយ​ដែល​មិន​ទាន់​មាន​កីឡាករ​រូប​ណា​ដណ្តើម​ពី​គេ​បាន​ឡើយ។ ខាង​ក្រោម​ជា​ប្រវត្តិ​ម្ចាស់​ខ្សែ​ក្រវាត់​ទម្ងន់​៦៥​គីឡូក្រាម។

១. កីឡាករកាណាដា Gabriel Varga

កីឡាករ Gabriel Varga ដែល​កើត​ឆ្នាំ១៩៨៥ ជា​កីឡាករ​ទី១​បាន​ឈ្នះខ្សែក្រវាត់ Glory Featherweight ទម្ងន់៦៥គីឡូក្រាម បន្ទាប់ពីរូបគេបានយកឈ្នះកីឡាករកូនកាត់ម៉ារ៉ុក-ហុល្លង់ Mosab Amrani កាល​ពី​ឆ្នាំ២០១៥ នៅ​​ទីក្រុងឌូបៃ។ កីឡាករ​រូប​នេះ​គ្រប់​គ្រង​ខ្សែក្រវាត់ Featherweight បាន​តែ​​២១៧ថ្ងៃ​ប៉ុណ្ណោះ​ ក៏​របូតទៅវិញ ក្រោយចាញ់កីឡាករអ៊ុយក្រែន Serhii Adamchuk នៅ​ខែវិច្ឆិកា ឆ្នាំ២០១៥។

មួយឆ្នាំ ពោល​គឺ​ក្នុង​​ខែកក្ដដា ឆ្នាំ២០១៦ កីឡាករ Gabriel Varga ​បាន​យកឈ្នះកីឡាករអ៊ុយក្រែន Serhii Adamchuk វិញ​ និងគ្រង​ខ្សែក្រវាត់​ជាថ្មី។ នៅ​ខែតុលា ឆ្នាំ២០១៦ កីឡាករ​បានបាត់បង់ខ្សែក្រវាត់​ជា​លើក​ទី​២​ដែល​ធ្លាក់​​ទៅ​កីឡាករហុល្លង់ Robin van Roosmalen។

២. កីឡាករអ៊ុយក្រែន Serhii Adamchuk

កីឡាករ Serhii Adamchuk ជាម្ចាស់​ទី២​​​សម្រាប់ខ្សែ​ក្រវាត់​ Featherweight ក្រោយឈ្នះកីឡាករកាណាដា Gabriel Varga នៅ​ឆ្នាំ២០១៥ ក្នុងប្រទេសអុីតាលី។ រូប​គេ​បានការពារខ្សែក្រវាត់​ជោគជ័យបាន១លើក តាម​រយៈ​ជ័យជម្នះ​លើ​កីឡាករកូនកាត់ម៉ារ៉ុក-ហុល្លង់ Mosab Amrani នៅ​ខែមីនា ឆ្នាំ២០១៦ នៅ​ប្រទេស​បារាំង។

ក្រោយគ្រង​ខ្សែក្រវាត់ Glory Featherweight បាន​២៥៩ថ្ងៃ កីឡាករ​ Serhii Adamchuk បានបាត់បង់​ទៅ​វិញក្រោយ ក្រោយចាញ់កីឡាករម្ចាស់​ដើម​ Gabriel Varga នៅ​ខែកក្ដដា ឆ្នាំ២០១៦។

៣. កីឡាករហុល្លង់ Robin van Roosmalen

កីឡាករ Robin van Roosmalen ជា​ម្ចាស់​ទី៣ បន្ទាប់ពី​ដណ្តើម​បាន​ពី​កីឡាករ​កាណាដា Gabriel Varga កាល​ពី​ខែតុលា ឆ្នាំ២០១៦ ​នៅ​សហរដ្ឋ​អាមេរិក​។ កីឡាករគ្រប់​គ្រងខ្សែក្រវាត់ Glory Featherweight បាន​៩០ថ្ងៃ​ប៉ុណ្ណោះ​ បន្ទាប់​ពី​រូប​គេ​ធ្វើ​ទម្ងន់​បាន​​​តាម​កាល​កំណត់​សម្រាប់​ឡើង​ការពារ ដូច្នេះ​ស្ថាប័ន Glory បាន​ដក​ហូត​​នៅ​ខែមករា ឆ្នាំ២០១៧។

ក្រោយខ្សែក្រវាត់នៅទំនេរមួយរយៈ​ពេល នៅ​ខែឧសភា ឆ្នាំ២០១៧ កីឡាករ Robin van Roosmalen ​បាន​ឡើងប្រកួតដណ្ដើមខ្សែក្រវាត់ Glory Featherweight ជាថ្មី​។ ពេលនោះរូបគេបានយកឈ្នះកីឡាករថៃ Petpanomrung ​ដើម្បី​គ្រប់​គ្រង​​ជាលើកទី២។ រូប​គេ​បាន​ឡើង​ការពារខ្សែក្រវាត់ជោគជ័យ២​លើក​ មុនពេលរបូតខ្សែក្រវាត់នេះ។

៤. កីឡាករថៃ Petpanomrung Kiatmuu9

កីឡាករ​ថៃ Petpanomrung ជាម្ចាស់​​ទី៤​ក្នុង​ការ​គ្រប់​គ្រង​ខ្សែក្រវាត់ទម្ងន់៦៥គីឡូក្រាម។ ក្រោយ​បរាជ័យ​លើក​ទី១ រូប​គេ​បាន​ឡើង​ដណ្តើម​ជា​មួយ​​កីឡាករហុល្លង់ Robin van Roosmalen ម្តង​ទៀត​នៅ​ខែកញ្ញា ឆ្នាំ២០១៨ នៅប្រទេសហុល្លង់។ ​ពេល​នោះ រូប​គេបានយក​ឈ្នះ​កីឡាករ​ម្ចាស់​ផ្ទះ​ដើម្បី​ក្លាយ​ជា​ម្ចាស់​ខ្សែ​ក្រវាត់​ថ្មី។ ចាប់​ពី​ក្លាយ​ជា​ម្ចាស់​ខ្សែ​ក្រវាត់​មក រូប​គេ​បាន​ឡើង​​ការពារជោគជ័យ​ជោគជ័យ​៨លើក​ហើយ​គិត​ចាប់​តាំង​ពី​ឆ្នាំ​២០១៨។

កីឡាករ Petpanomrung ជា​​ម្ចាស់​ខ្សែ​ក្រវាត់​ទី១ក្នុងទម្ងន់៦៥គីឡូក្រាមដែលគ្រងខ្សែក្រវាត់នេះ​បានយូរជាងគេ ពោលគឺរូបគេ​បាន​គ្រប់​​គ្រងខ្សែក្រវាត់​ចំនួន២១៥១ថ្ងៃ​ហើយ។ បច្ចុប្បន្ន​រូប​គេ​អាយុ​២៩​ឆ្នាំ ធ្លាប់​ប្រកួត២១៥​ដង ក្នុង​នោះឈ្នះ​១៧១ដង ចាញ់​៤១ និង​ស្មើ៣ដង៕

ប្រែសម្រួល៖ ផា រតនា​

The post នេះជើងខ្លាំង៤រូបធ្លាប់គ្រងខ្សែ​ក្រវាត់​៦៥គីឡូក្រាមនៅស្ថាប័ន Glory appeared first on Kampuchea Thmey Daily.

ម្ចាស់ខ្សែក្រវាត់ K-1 Featherweight ទម្ងន់៥៧.៥ គីឡូក្រាម និងជាម្ចាស់ខ្សែក្រវាត់ K-1 Featherweight World Grand Prix កីឡាករ Taito Gunji នឹងត្រូវឡើង​ការពារខ្សែក្រវាត់​របស់​ខ្លួន​ជាលើកទី២ ទល់នឹង​ម្ចាស់ខ្សែក្រវាត់ ISKA កីឡាករ Takumi Terada នៅថ្ងៃទី២៩ ខែកញ្ញា។

កីឡាករ Terada ទទួលបានសិទ្ធិក្នុងការឡើងប្រកួតដណ្ដើមខ្សែក្រវាត់​ពី​កីឡាករ Taito Gunji បន្ទាប់​ពី​រូបគេបានយកឈ្នះកីឡាករ Shoki Kaneda ក្នុងកម្មវីធី K-1 World MAX 2024 កាលពីថ្ងៃទី៧ ខែកក្ដដា។​

ម្ចាស់ខ្សែក្រវាត់ ISKA កីឡាករ Tarada នឹងប្រកួតតំណាងឲ្យក្រុម ‘Team Vasileus’ របស់កីឡាករ Takeru ជាលើកទី៣ ចាប់តាំងពីផ្លាស់ទៅទីនោះកាលពីដើមឆ្នាំ២០២៤។ កីឡាករ​បាន​និយាយថា ៖«និយាយតាមត្រង់ទៅ ខ្ញុំគិតថាខ្ញុំ​ជា​កីឡាករ​ល្អ​​ជាងគេក្នុងទម្ងន់ featherweight។ ដូច្នេះខ្ញុំជឿថា ការប្រកួតនេះ​នឹង​បញ្ជាក់ឲ្យឃើញពីសមត្ថភាព​របស់​ខ្ញុំ។ ខ្ញុំគិតថា នឹង​ផ្ដួល​ដៃ​គូ​ឲ្យ​សន្លប់ ហើយ​គ្រង​ខ្សែក្រវាត់ K-1​ម្តង»។

កីឡាករ Taito Gunji បានឈ្នះខ្សែក្រវាត់ K-1 Featherweight ទម្ងន់៥៧.៥ គីឡូក្រាម តាំងពីចុងឆ្នាំ២០២១។ រូបគេធ្លាប់ឡើងការពារខ្សែក្រវាត់នេះជោគជ័យម្ដង តាម​រយៈ​ជ័យជម្នះ​លើ​កីឡាករថៃ View Petchkoson កាលពីថ្ងៃទី១២ ខែមីនា ឆ្នាំ២០២៣។

Gunji អាយុ​២៥​ឆ្នាំ​ កម្ពស់១.៦៧​ម៉ែត្រ ធ្លាប់​ប្រកួត​ឃីក​បុក​ស៊ីង​អាជីព៣១​ដង ក្នុង​នោះ​ឈ្នះ​២៥​ដង ចាញ់​៥​ដង និង​ស្មើ​១​ដង។ ការ​ចាញ់​លើក​ចុងក្រោយ​របស់​គេ​គឺ​កាល​ពី​ថ្ងៃ​ទី​២៦ ខែ​កញ្ញា ឆ្នាំ​២០២៤ ប៉ុន្តែ​ចាប់​តាំង​ពី​ពេល​នោះ​មកឡើង​ប្រកួត​១៣​ដង​មិន​ដែល​ចាញ់​ឡើយ៕

ប្រែសម្រួល៖ ផា រតនា​

The post មិនចាញ់៤ឆ្នាំ​ចុង​ក្រោយ Gunji ​ត្រៀម​ឡើងការពារខ្សែក្រវាត់លើកទី២ appeared first on Kampuchea Thmey Daily.

១. កីឡាករ Taito Gunji

អ្នកប្រដាល់ឃីកបុកសុីងវ័យ២៥ឆ្នាំ​សញ្ជាតិជប៉ុន Taito Gunji កំពុងឈរលេខ១ នៅតារាងចំណាត់ឃីកបុកសុីងពិភពលោក​សម្រាប់​​ទម្ងន់៥៨គីឡូកក្រោម។ រូបគេធ្វើបានយ៉ាងល្អ មិនចាញ់សោះក្នុងការប្រកួត១៣លើកចុងក្រោយគិតចាប់តាំងទីឆ្នាំ២០២០។ ក្នុងរយៈពេល៤ឆ្នាំចុងក្រោយ Taito Gunji ឈ្នះខ្សែក្រវាត់ចំនួន២ខ្សែ និង​បាន​ឡើង​ការពារខ្សែក្រវាត់ជោគជ័យ១លើក។

ខ្សែក្រវាត់ទី១ K-1 Featherweight Championship កីឡាករ Taito Gunji បានយកឈ្នះ​មិត្តរួមជាតិ Tatsuya Tsubakihara កាលពីថ្ងៃទី៤ ខែធ្នូ ឆ្នាំ២០២១ និងខ្សែក្រវាត់ទី២ K-1 World Featherweight ​ឈ្នះកីឡាករ Toma Tanabe កាលពីថ្ងៃទី១១ ខែសីហា ឆ្នាំ២០២២។ នៅថ្ងៃទី១២ ខែមីនា Taito Gunji បានឡើងការពារខ្សែក្រវាត់ K-1 Featherweight Championship ជោគជ័យ ក្រោយយកឈ្នះកីឡាករថៃ Petchkoson​។​ យោងតាមសមិទ្ធផលខាងនេះបានជួយឲ្យរូប​គេ​​ឈរលេខ១ ក្នុងតារាងចំណាត់ឃីកបុកសុីងពិភពលោកក្នុងប្រភេទទម្ងន់៥៨គីឡូកក្រោម។

២. កីឡាករ Keisuke Monguchi

កីឡាករឃីកបុកសុីង Keisuke Monguchi វ័យ២៩ឆ្នាំ ស្ថិត​នៅ​ចំណាត់​ថ្នាក់​លេខ២ ក្នុងតារាងចំណាត់ថ្នាក់​ឃីក​បុង​សុីង​ពិភពលោក។ រយៈពេល២ឆ្នាំចុងក្រោយ អ្នកប្រដាល់ជប៉ុនរីប​នេះ​បានឈ្នះខ្សែក្រវាត់១គ្រឿងនៅស្ថាប័ន RISE ក្នុងប្រទេសជប៉ុន និង​បាន​ឡើងការពារ​ម្ដង។

នៅថ្ងៃទី២៨ ខែសីហា ឆ្នាំ២០២០ កីឡាករ Keisuke Monguchi បានយកឈ្នះខ្សែក្រវាត់ RISE Featherweight​ ក្រោយឈ្នះមិត្តរួមជាតិកីឡាករ Taisei Umei ហើយនៅថ្ងៃទី២៩ ខែតុលា ឆ្នាំ២០២៣ រូបគេឡើងការពារខ្សែក្រវាត់​បាន​ជោគជ័យ ​តាម​រយៈ​ជ័យជម្នះ​លើ​កីឡាករជប៉ុន Kaito Sakaguchi ក្នុងកម្មវីធី RISE 161 ។ ២ឆ្នាំចុងក្រោយ កីឡាករ Monguchi បាន​ប្រកួត​៧លើក ក្នុងនោះឈ្នះ៦លើក និងចាញ់១លើក។

៣. កីឡាករ Kyo Kawakami

អ្នកប្រដាល់ឃីកបុកសុីងជប៉ុន Kyo Kawakami វ័យ២៤ឆ្នាំ ស្ថិត​នៅលេខ៣ ក្នុងតារាងចំណាត់ថ្នាក់ឃីកបុងសុីងពិភពលោក។ ៣ឆ្នាំចុងក្រោយ កីឡាករវ័យក្មេង Kyo Kawakami ធ្វើបានល្អគួរសម ក្រោយរូបគេ​បាន​ឈ្នះខ្សែក្រវាត់ Shoot Boxing Featherweight ​នៅ​ស្ថាប័ន Shoot Boxing កាលពីថ្ងៃទី១០ ខែមេសា ឆ្នាំ២០២២។ មួយ​ឆ្នាំក្រោយមកនៅថ្ងៃទី៣០ ខែមេសា ឆ្នាំ២០២៣ រូបគេបានបាត់បង់ខ្សែក្រវាត់វិញ ក្រោយចាញ់មិត្តរួមជាតិ Kotaro Yamada។ ទោះបីធ្វើមិនសូវបានល្អ ប៉ុន្តែលទ្ធផលការប្រកួតនៅរយៈពេល៣ឆ្នាំចុងក្រោយបានធ្វើឲ្យ Kawakami ឡើងឈរ៣ ក្នុងតារាងចំណាត់ថ្នាក់ឃីកបុងសុីងពិភពលោក។

អត្ថបទ៖ ផា រតនា​

The post កីឡាករឃីកបុក​ស៊ីង​លំដាប់កំពូល៣រូបលើ​លោក​ទម្ងន់៥៨គីឡូក្រោម appeared first on Kampuchea Thmey Daily.

១. កីឡាករ Marat Grigorian

កីឡាករអាមេនី Marat Grigorian បាន​គ្រប់​គ្រងខ្សែក្រវាត់ K-1 ទម្ងន់៧០គីឡូក្រាមដំបូងគេ ក្រោយផ្ដួលកីឡាករ​ហុល្លង់ Jordann Pikeur ក្នុងទឹកទី១ កាលពីថ្ងៃទី៤ ខែកក្ដដា ឆ្នាំ២០១៥ នៅក្នុងប្រទេសជប៉ុន។ មួយ​ឆ្នាំ​ក្រោយ​មក​ពោល​គឺ​នៅ​ថ្ងៃ​ទី​៦ ខែ​ធ្នូ ឆ្នាំ​២០១៦ កីឡាករ Grigorian ត្រូវ​បាន​ស្ថាប័ន K-1 ដកហូត​វិញ​ បន្ទាប់​ពី​រូបគេ​បដិសេធ​​​ក្នុង​ការ​ឡើង​​ប្រកួតការពារខ្សែក្រវាត់។

២. កីឡាករ Chingiz Allazov

កីឡាករបេឡារុស្ស Chingiz Allazov ជាកីឡាករទី២​ដែល​បាន​គ្រប់​គ្រង​ខ្សែក្រវាត់ K-1 ទម្ងន់៧០គីឡូក្រាម​នេះ បន្ទាប់​ពី​ទំនេរ​អត់​ម្ចាស់​ត្រូវ​ដាក់​ឲ្យ​ប្រកួត​ដណ្តើម​ជា​មួយ​កីឡាករ​ជប៉ុន Yasuhiro Kido ដោយ​រូប​គេ​បាន​យក​ឈ្នះ​កាល​ពី​ថ្ងៃទី១៨ ខែមិថុនា ឆ្នាំ២០១៧។ នៅថ្ងៃទី២១ ខែមីនា ឆ្នាំ២០១៨ កីឡាករ Chingiz Allazov ​បាន​ឡើង​ការពារខ្សែក្រវាត់របស់ខ្លួនជោគជ័យ តាម​រយៈ​ការ​ផ្ដួលកីឡាករជប៉ុន Hinata Watanabe ឲ្យសន្លប់នៅទឹកទី២។ ទោះ​បី​ជា​យ៉ាង​ណា នៅថ្ងៃទី៥ ខែកុម្ភៈ ឆ្នាំ២០១៩ Allazov ត្រូវបានដកហូតខ្សែក្រវាត់នេះវិញ បន្ទាប់ពីរូបចុះហត្ថលេខា​ចូល​រួម​ជាមួយស្ថាប័នប្រដាល់អាមេរិក Bellator Kickboxing។

៣. កីឡាករ Minoru Kimura

ពេល​នោះ​ខ្សែ​ក្រវាត់​អត់​ម្ចាស់​ជាលើក​ទី២​ហើយ​​ត្រូវបានដាក់ឲ្យដណ្ដើមសារជាថ្មី ​រវាង​កីឡាករប្រេស៊ីល Minoru Kimura និង​​កីឡាករ​ជប៉ុន​ Hiromi Wajima។ កីឡាករ​ប្រេស៊ីក​បាន​យក​ឈ្នះ​​ក្នុងទឹកទី១ កាលពីថ្ងៃទី២២ ខែមីនា ឆ្នាំ២០២០ ​ដើម្បី​ក្លាយ​ជា​អ្នក​គ្រប់​គ្រង​ទី​៣។

៤. កីឡាករ Hiromi Wajima

ជើង​ខ្លាំង​ជប៉ុន Hiromi Wajima មិន​អស់​ចិត្ត​ក៏​បាន​ឡើង​ប្រកួត​ដណ្តើម​ជាលើក​ទី​២ ហើយ​ក៏​បាន​​យកឈ្នះដៃគូចាស់កីឡាករ Minoru Kimura នៅ​ថ្ងៃទី៤ ខែធ្នូ ឆ្នាំ២០២១ ដើម្បី​ក្លាយ​ជា​អ្នក​គ្រប់​គ្រង​ទី​៤។ ក្រោយឈ្នះខ្សែក្រវាត់នេះ កីឡាករ Hiromi Wajima បាន​ឡើង​ប្រកួត​​ការពារក្រវាត់នេះ​ទទួល​ជោគជ័យ​២លើក​គឺ​​ឈ្នះកីឡាករថៃ Jomthong Chuwattana និងកីឡាហុល្លង់ Jordann Pikeur។

៥. កីឡាករ Ouyang Feng 

ទោះ​បី​ជាយ៉ាង​ណា Hiromi Wajima មិន​អាច​ការ​ពារ​បាន​ជោគជ័យ​ទេ​សម្រាប់​ការ​ប្រកួត​លើក​ទី​៣​ដោយ​បាន​ចាញ់​ជើង​ខ្លាំង​ចិន Ouyang Feng កាលពីថ្ងៃទី៩ ខែធ្នូ ឆ្នាំ២០២៣ ​នៅ​ទីក្រុងអូសាកា​ ប្រទេស​ជប៉ុន។ ចាប់​តាំង​ពី​ពេល​នោះ​មក Ouyang Feng កំពុងគ្រងជាម្ចាស់ជើងឯក K-1 Super Welterweight Championship ប៉ុន្តែ​មិន​ទាន់​ធ្លាប់​បាន​ឡើង​ប្រកួត​ការពារ​ទេ។ ស្ថាប័ន K-1 គ្រោង​រៀបចំ​ឲ្យ​រូប​គេ​ឡើង​ការពារខ្សែ​ក្រវាត់​នា​ពេល​ខាង​មុខ៕

ប្រែសម្រួល៖ ផា រតនា

The post ខ្សែក្រវាត់ K-1 ៧០គីឡូក្រាមឆ្លង​កាត់​ម្ចាស់​៤​រូប​មុនពេលធ្លាក់ទៅ​ដៃជើង​ខ្លាំង​ចិន Ouyang appeared first on Kampuchea Thmey Daily.