កីឡាតេក្វាន់ដូ Archives - Kampuchea Thmey Daily

ក្រុមតេក្វាន់ដូ ITF កម្ពុជាឈ្នះមេដាយអាស៊ី២៤គ្រឿងមកដល់កម្ពុជាព្រឹកនេះ

chean virakbot — Mon, 26 Aug 2024 03:05:57 +0000

ប្រតិភូកីឡាតេក្វាន់ដូ ITF កម្ពុជាបានត្រឡប់មកដល់ប្រទេសកំណើតវិញនៅព្រឹកថ្ងៃចន្ទ ទី២៦ ខែសីហា ឆ្នាំ២០២៤ បន្ទាប់ពីចូលរួមប្រកួតតេក្វាន់ដូ ITF ជើងឯកអាស៊ី នៅប្រទេសឥណ្ឌា ពីថ្ងៃទី១៩ ដល់ថ្ងៃទី២៥ ខែសីហា។

សម្រាប់ការចូលរួមប្រកួតនេះមានកីឡាករ និងកីឡាការិនី១៧រូបដឹកនាំដោយលោក កែវ រ៉េមី ប្រធានសហព័ន្ធកីឡាតេក្វាន់ដូ ITF ព្រមទាំងគ្រូបង្វឹក និងគ្រូជំនួយមួយចំនួនទៀត។ ជាលទ្ធផលកម្ពុជាទទួលបានមេដាយ២៤គ្រឿង គឺមាស៣ ប្រាក់៧ និងសំរិទ្ធ១៤ ស្ថិតនៅចំណាត់ថ្នាក់លេខ៣ ក្នុងចមណោមប្រទេសជាង១០ចូលរួមប្រកួត ហើយកូរ៉េខាងជើងលេខ១ និងកាហ្សាក់ស្ថានលេខ២។

មេដាយមាស

ក្រុមកីឡាករ៥នាក់ លើវិញ្ញាសាវាយបំបែកក្តារ
ក្រុមកីឡាករ៥នាក់ លើវិញ្ញាសាបច្ចេកទេសពិសេស
កីឡាករ ឃឿន ប៊ុនឡុង វិញ្ញាសាបច្ចេកទេសពិសេស

មេដាយប្រាក់

ក្រុមកីឡាការិនី៦នាក់ លើវិញ្ញាសាបំបែកក្តារ
កីឡាការិនី ម៉េត ស្រីឡែន លើវិញ្ញាសាបច្ចេកទេសពិសេស
កីឡាករ រស់ ស្រីនិច លើវិញ្ញាសា បំបែកក្តារ
កីឡាករ ឃឿន ប៊ុនលាង លើវិញ្ញាសាសម្តែង
កីឡាករ តាំង សៀសុង លើវិញ្ញាសាប្រយុទ្ធ
ក្រុមកីឡាការិនី លើវិញ្ញាសាមេគុននារី
ក្រុមកីឡាករ លើវិញ្ញាសាមេគុនមេគុនបុរស

អត្ថបទ៖ វីរបុត្រ

The post ក្រុមតេក្វាន់ដូ ITF កម្ពុជាឈ្នះមេដាយអាស៊ី២៤គ្រឿងមកដល់កម្ពុជាព្រឹកនេះ appeared first on Kampuchea Thmey Daily.

ម្ចាស់មេដាយប្រាក់ស៊ីហ្គេម កញ្ញា ឈឿង អាលីហ្សា ចង់ក្លាយជាគ្រូបង្វឹកតេក្វាន់ដូ

chean virakbot — Tue, 28 May 2024 02:55:59 +0000

កីឡាការិនីតេក្វាន់ដូជម្រើសជាតិកម្ពុជា ឈឿង អាលីហ្សា បានបញ្ចប់ការសិក្សាវគ្គគ្រូបង្វឹកថ្នាក់ជាតិដោយជោគជ័យដែលឧបត្ថម្ភគាំទ្រដោយគណៈកម្មាធិការអូឡាំពិកអន្តរជាតិ និងមានការទទួលស្គាល់ពីសហព័ន្ធកីឡាតេក្វាន់ដូអន្តរជាតិកាលពីថ្ងៃទី២១ ដល់ទី២៧ ខែឧសភា ឆ្នាំ២០២៤។

កញ្ញា ឈឿង អាលីហ្សា បានឲ្យដឹងថា កញ្ញាទទួលបានចំណេះដឹង និងយល់បានច្រើនពីការសិក្សាវគ្គគ្រូបង្ហាត់នេះ ពីព្រោះកញ្ញាជាកីឡាការិនីស្រាប់ដល់ពេលរៀនជំនាញគ្រូបង្វឹកទៅគឺចាប់បានលឿន ឆាប់យល់ និងដឹងពីការងាររបស់គ្រូបង្ហាត់ច្រើនដែលត្រូវរៀបចំខ្លួនយ៉ាងណាក្នុងការបង្ហាត់បង្រៀនដល់កូនសិស្ស។

ម្ចាស់មេដាយប្រាក់ស៊ីហ្គេមពីរលើករូបនេះបានបន្តថា នាពេលអនាគត កញ្ញាចង់ក្លាយជាគ្រូបង្វឹកដើម្បីចែករំលែក និងបណ្តុះបណ្តាលដល់ក្មេងជំនាន់ក្រោយ។ កញ្ញាបាននិយាយថា ៖«នៅកម្ពុជាយើងមិនសូវមានគ្រូបង្វឹកនារីច្រើនទេ អីចឹងខ្ញុំចង់ក្លាយជាគ្រូម្នាក់នៅពេលខាងមុខ។ គោលដៅរបស់ខ្ញុំគឺចង់ជួយបង្ហាត់ក្មេងៗ ចង់ឲ្យក្មេងៗក្លាយជាធនធានកីឡាតេក្វាន់ដូ»។

ទោះបីជាយ៉ាងណា ការដាក់គោលដៅក្លាយជាគ្រូបង្វឹកគឺមានរយៈពេលយូរអង្វែង ខណៈក្តីស្រមៃធំរបស់កញ្ញាក្នុងនាមជាកីឡាការិនីមិនទាន់បានសម្រេច។ ឈឿង អាលីហ្សា មានក្តីស្រមៃធំបំផុតគឺការឈ្នះមេដាយមាសពីការប្រកួតអន្តរជាតិដើម្បីជូនជាតិ។

ឈឿង អាលីហ្សា បានប្រាប់ថា ៖«ខ្ញុំធ្លាប់បានឈ្នះតែមេដាយប្រាក់ពីការប្រកួតអន្តរជាតិ ដូចជាកីឡាស៊ីហ្គេមជាដើម។ ខ្ញុំចង់បានខ្ពស់ជាងនេះគឺគោលដៅធំបំផុត មេដាយមាស»។

កីឡាការិនី ឈឿង អាលីហ្សា បានចូលរួមប្រកួតកីឡាស៊ីហ្គេម៣លើកចុងក្រោយ និងតែងតែទទួលបានមេដាយ ប៉ុន្តែមិនមែនមេដាយមាសទេ។ កញ្ញាបានឈ្នះមេដាយប្រាក់ពីកីឡាស៊ីហ្គេម លើកទី៣០ ឆ្នាំ២០១៩ បន្ទាប់ពីចាញ់កីឡាការិនីម្ចាស់ផ្ទះហ្វីលីពីន Lopez Pauline Louise នៅវគ្គផ្តាច់ព្រ័ត្រដោយពិន្ទុ ១២-៣ ទម្ងន់៥៧គីឡូក្រាម។

នៅស៊ីហ្គេម លើកទី៣១ ឆ្នាំ២០២១ (លើកមកឆ្នាំ២០២២) នៅប្រទេសវៀតណាម ឈឿង អាលីហ្សា ទទួលបានមេដាយសំរិទ្ធ និងស៊ីហ្គេម លើកទី៣២ ឆ្នាំ២០២៣ នៅប្រទេសកម្ពុជា កញ្ញា ទទួលបានមេដាយប្រាក់ បន្ទាប់ពីចាញ់កីឡាការិនីថៃ Phannapa Harnsujin ក្នុងវគ្គផ្តាច់ព្រ័ត្រសម្រាប់វិញ្ញាសាទម្ងន់៥៧គីឡូក្រាម។

កញ្ញា ឈឿង អាលីហ្សា ទទួលបានឱកាសចូលរួមក្នុងព្រឹត្តិការណ៍ធំប្រចាំអាស៊ីគឺ កីឡាទ្វីបអាស៊ី (Asian Games) លើកទី១៩ នៅទីក្រុង Hangzhou ប្រទេសចិន ឆ្នាំ២០២៣ ប៉ុន្តែបានចាញ់កីឡាការិនីវៀតណាម Tran Thi Anh Tuyet ដោយពិន្ទុ៕

អត្ថបទ៖ វីរបុត្រ

The post ម្ចាស់មេដាយប្រាក់ស៊ីហ្គេម កញ្ញា ឈឿង អាលីហ្សា ចង់ក្លាយជាគ្រូបង្វឹកតេក្វាន់ដូ appeared first on Kampuchea Thmey Daily.

លោក វ៉ាត់ ចំរើន ជំរុញកីឡាតេក្វាន់ដូកម្ពុជាតាមប្រមាញ់ក្តីសុបិនធំបំផុតទៀត

chean virakbot — Mon, 27 May 2024 05:11:03 +0000

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានជំរុញឲ្យក្រុមកីឡាតេក្វាន់ដូកម្ពុជាសម្រេចក្តីសុបិនធំបំផុតបន្តទៀត បន្ទាប់ពីកីឡាការិនី ស៊ន សៀវម៉ី បានសម្រេចក្តីសុបិនបំផុតបំផុតកម្រិតអាស៊ីជូនជាតិកាលពីឆ្នាំ២០១៤។

គណៈកម្មាធិការជាតិអូឡាំពិកកម្ពុជា (NOCC) បានបិទបញ្ចប់វគ្គសាមគ្គីអូឡាំពិកស្តីពី«គ្រូបង្វឹកកីឡាតេក្វាន់ដូ WT ថ្នាក់ជាតិ កាលពីព្រឹកថ្ងៃចន្ទ ទី២៧ ខែឧសភា ឆ្នាំ២០២៤ បន្ទាប់ពីដំណើរការសិក្សាអស់រយៈពេលជាច្រើនថ្ងៃ។ លោក វ៉ាត់ ចំរើន បានអញ្ជើញជាអធិបតីក្នុងពិធីបិទមានប្រសាសន៍ថា វគ្គបណ្តុះបណ្តាលនេះទទួលបានការគាំទ្រពីគណៈកម្មាធិការអូឡាំពិកអន្តរជាតិ និងសហព័ន្ធកីឡាតេក្វាន់ដូអន្តរជាតិ។

លោកបន្តថា នេះជាឱកាសដ៏ល្អសម្រាប់ប្អូនៗដែលទទួលបានការសិក្សា ពីព្រោះសហព័ន្ធកីឡាអូឡាំពិកមានជាង៣០។ សហព័ន្ធនីមួយៗមិនងាយទទួលបានវគ្គបណ្តុះបណ្តាលបែបនេះទេ ដូច្នេះប្អូនៗជាសិក្ខាកាមទាំងអស់ត្រូវយកចំណេះ ជំនាញទាំងនេះទៅអនុវត្តជាក់ស្តែង និងអភិវឌ្ឍខ្លួនឲ្យក្លាយជាធនធានដ៏សំខាន់សម្រាប់កីឡាតេក្វាន់ដូនៅក្នុងប្រទេសកម្ពុជា។

រដ្ឋលេខាធិការក្រសួងអប់រំ យុវជន និងកីឡាបានរៀបរាប់ថា តេក្វាន់ដូជាកីឡាឈានមុខគេមួយនៅក្នុងប្រទេសកម្ពុជាដែលតែងតែនាំយកសមិទ្ធផលអន្តរជាតិជូនជាតិ។ ជាក់ស្តែងវីរកីឡាការិនី ស៊ន សៀវម៉ី ជាអត្តពលិកកម្ពុជាដំបូងគេបង្អស់ក្នុងការឈ្នះមេដាយមាសកីឡាទ្វីបអាស៊ីកាលពីឆ្នាំ២០១៤ និងជាអត្តពលិកខ្មែរទី១ដែលបានប្រកួតជាប់ជម្រុះទទួលបានសិទ្ធិពេញលេញសម្រាប់ការចូលរួមប្រកួតកីឡាអូឡាំពិក ឆ្នាំ២០១៦។ ជាមួយគ្នានេះមានកីឡាករ កីឡាការិនីជាច្រើនទៀតដែលទទួលបានមេដាយពីកម្រិតអន្តរជាតិ។

លោក វ៉ាត់ ចំរើន មានប្រសាសន៍ថា ៖«ខ្ញុំមានក្តីសុបិនធំផុតគឺចង់ឲ្យកីឡាតេក្វាន់ដូបន្តក្លាយជាកីឡាឈានមុខគេក្នុងការឈ្នះមេដាយអន្តរជាតិគឺកីឡាអូឡាំពិក។ មិនថាមេដាយមាស ប្រាក់ ឬសំរិទ្ធទេឲ្យតែបានមេដាយអូឡាំពិក ខ្ញុំនឹងធ្វើរូបចម្លាក់ឲ្យដើម្បីបញ្ជាក់ថាជា អត្តពលិកខ្មែរទី១ដែលបានឈ្នះមេដាយកីឡាអូឡាំពិក។ ដូច្នេះខ្ញុំសង្ឃឹមថា កីឡាតេក្វាន់ដូតាមប្រមាញ់ក្តីសុបិនដ៏ធំបំផុតនេះដើម្បីប្រវត្តិសាស្ត្រកីឡាកម្ពុជា»។

តាមរបាយការណ៍របស់ លោក ជាតិ ខេមរា អគ្គលេខាធិការសហព័ន្ធតេក្វាន់ដូកម្ពុជា និងជាគ្រូបង្វឹកតេក្វាន់ដូជម្រើសជាតិកម្ពុជាបង្ហាញថា វគ្គបណ្តុះបណ្តាលស្តីពី«គ្រូបង្វឹកតេក្វាន់ដូ WT ថ្នាក់ជាតិនេះបានចាប់ផ្តើមកាលពីថ្ងៃទី២១ ដល់ថ្ងៃទី២៧ ខែឧសភា ឆ្នាំ២០២៤ ដែលបានអនុវត្តទ្រឹស្តី និងអនុវត្តជាក់ស្តែងផ្ទាល់នៅកន្លែង៣ផ្សេងគ្នា។

វគ្គបណ្តុះបណ្តាលនេះបង្រៀនដោយអ្នកស្រី Byung Hee Kim អ្នកជំនាញអន្តរជាតិមកពីសហព័ន្ធកីឡាតេក្វាន់ដូអន្តរជាតិ និងលោក ឆយ យ៉ុងសុក គ្រូបង្វឹកតេក្វាន់ដូជម្រើសជាតិកម្ពុជាដែលមានសិក្ខាកាមចំនួន២៥រូប ក្នុងនោះនារី៨រូបមកពី៤ខេត្ត-រាជធានីផ្សេងចូលរួមសិក្សា។ ជាលទ្ធផលនៃការសិក្សា សិក្ខាកាមចំនួន១៥រូបទទួលបាននិទ្ទេសល្អ និងសិក្ខាកាម១០រូបទទួលបាននិទ្ទេសមធ្យម។

ក្នុងចំណោមសិក្ខាកាមជានារី៨រូបក៏មានវត្តមានកញ្ញា ឈឿង អាលីហ្សា ជាកីឡាការិនីតេក្វាន់ដូជម្រើសជាតិកម្ពុជាបានចូលរួមសិក្សាក្នុងវគ្គបណ្តុះបណ្តាលដ៏មានសារៈសំខាន់នេះ។ កញ្ញាបាននិយាយថា នៅកម្ពុជាមិនសូវមានគ្រូបង្វឹកកីឡាតេក្វាន់ដូចជាស្ត្រីទេ ដូច្នេះពេលមានឱកាសល្អបែបនេះ កញ្ញាត្រូវតែចូលរៀនដើម្បីបង្កើនចំណេះជំនាញបន្ថែមទៀត ពីព្រោះកញ្ញាចង់ក្លាយជាគ្រូបង្វឹកនាពេលអនាគត៕

អត្ថបទ៖ វីរបុត្រ

The post លោក វ៉ាត់ ចំរើន ជំរុញកីឡាតេក្វាន់ដូកម្ពុជាតាមប្រមាញ់ក្តីសុបិនធំបំផុតទៀត appeared first on Kampuchea Thmey Daily.

ឯកឧត្ដម ហ៊ុន ម៉ានី ៖ ស្មារតីកីឡា ជាការតស៊ូ យកជ័យជម្នះ តែរក្សាបានសាមគ្គីភាព និងមិត្តភាព ក្នុងសន្តិភាព

អ៊ិន ពិសី — Mon, 20 Nov 2023 02:10:40 +0000

ឯកឧត្ដម ហ៊ុន ម៉ានី ប្រធានប្រតិភូកីឡាប៉ារ៉ាឡាំពិកកម្ពុជា លើកឡើងថា ស្មារតីកីឡា គឺជាការតស៊ូ ព្យាយាម យកជ័យជម្នះ តែរក្សាបានសាមគ្គីភាព ភាតរភាព និងមិត្តភាព ក្នុងសន្តិភាព។

ការលើកឡើងនេះ ក្នុងពិធីអបអរសាទរការប្រកួតកីឡាតេក្វាន់-ដូ អាយធីអេហ្វ ជ្រើសរើសជើងឯក «ពានរង្វាន់ ឯកឧត្ដម ហ៊ុន ម៉ានី» ឆ្នាំ ២០២៣ (ចាប់ពីថ្ងៃទី ១៧-១៩ ខែវិច្ឆិកា ឆ្នាំ ២០២៣) កាលពីថ្ងៃទី ១៩ ខែវិច្ឆិកា ឆ្នាំ ២០២៣។

ឯកឧត្ដម ហ៊ុន ម៉ានី លើកឡើងថា «ស្មារតីកីឡា គឺជាការតស៊ូ ព្យាយាម ដើម្បីយកជ័យជម្នះ តែរក្សាបាននូវសាមគ្គីភាព ភាតរភាព និងមិត្តភាព ក្នុងសន្តិភាព»។ ឯកឧត្ដម បន្ថែមថា ពិតណាស់ នៅលើសង្វៀនប្រកួត យើងជាគូបដិបក្ខ តែចប់ការប្រកួត គឺជាមិត្តភ័ក្ដិគ្នា។

ឯកឧត្ដម ហ៊ុន ម៉ានី បន្តថា មិនថាកីឡាតេក្វាន់-ដូ កើតឡើងនៅទីណា ឬ ពេលណានោះទេ ឯកឧត្ដម ចូលរួមដោយមនោសញ្ចេតនាជាមួយកីឡាករ-កីឡាការិនី ចំពោះទឹកចិត្ត និងការខិតខំប្រឹងប្រែងយ៉ាងស្វាហាប់។ ស្ថិតក្នុងស្មារតីខាងលើនេះហើយ ទើបការប្រកួតកីឡាតេក្វាន់-ដូ អាយធីអេហ្វ ជ្រើសរើសជើងឯក«ពានរង្វាន់ ឯកឧត្ដម ហ៊ុន ម៉ានី» ឆ្នាំ ២០២៣ ត្រូវបានរៀបចំឡើង។

ឯកឧត្ដម ហ៊ុន ម៉ានី បន្តទៀតថា ការប្រកួតនៅពេលនេះ ជាការរួមចំណែកដល់ការផ្តល់ឱកាសសាកល្បងសមត្ថភាព ដកស្រង់បទពិសោធន៍របស់កីឡាករ ដើម្បីដុសខាត់ សម្រួចចំណេះ ជំនាញ ក្បាច់គុនរបស់ខ្លួន ឈានទៅអាចដណ្ដើមជ័យជម្នះលើឆាកជាតិ និងអន្តរជាតិនានាបន្តថែមទៀត។

ឯកឧត្ដម ហ៊ុន ម៉ានី បានអបអរសាទរដល់ជ័យលាភីជើងឯកគ្រប់វិញ្ញាសាទាំងអស់ ដែលខិតខំប្រឹងប្រែងយ៉ាងស្វិតស្វាញរហូតទទួលបានជ័យជម្នះ។ ជាមួយនោះ ឯកឧត្ដម ក៏បានកោតសរសើរ និងវាយតម្លៃខ្ពស់ដល់ថ្នាក់ដឹកនាំសហព័ន្ធកីឡា តេក្វាន់-ដូ អាយធីអេហ្វកម្ពុជា អាជ្ញាកណ្ដាល គ្រូបង្វឹក ក្រុមការងាររៀបចំ និងដៃគូសហការទាំងអស់ ដែលរៀបចំឲ្យមានការប្រកួតនេះឡើង។

ទន្ទឹមនោះ ឯកឧត្ដម ហ៊ុន ម៉ានី បានថ្លែងអំណរគុណដល់អាណាព្យាបាល ក្រុមគ្រួសារ និងអ្នកគាំទ្រទាំងអស់ ដែលបានចូលរួមក្នុងកម្មវិធីប្រកបដោយភាពក្លៀវក្លា ញ៉ាំងឲ្យកម្មវិធីកាន់តែមានភាពសប្បាយរីករាយ អធិកអធម៕

អត្ថបទ ៖ ពិសី

The post ឯកឧត្ដម ហ៊ុន ម៉ានី ៖ ស្មារតីកីឡា ជាការតស៊ូ យកជ័យជម្នះ តែរក្សាបានសាមគ្គីភាព និងមិត្តភាព ក្នុងសន្តិភាព appeared first on Kampuchea Thmey Daily.

ក្រុមហ៊ុន ថៃសាមសុង អេឡិចត្រូនិក ប្រចាំកម្ពុជាឧបត្ថម្ភគាំទ្រយ៉ាងពេញទំហឹងដល់ការប្រកួតកីឡាតេក្វាន់ដូ

Ken Malis — Thu, 15 Jun 2023 04:41:56 +0000

ក្រុមហ៊ុន ថៃសាមសុង អេឡិចត្រូនិក ប្រចាំប្រទេសកម្ពុជា បានផ្ដល់ការគាំទ្រដល់ការប្រកួតជើងឯកកីឡាតេក្វាន់ដូ “2023 Korean Embassy Taekwondo Competition” ដែលរៀបចំដោយស្ថានទូតកូរ៉េ ប្រចាំប្រទេស កម្ពុជា។ ការប្រកួតនេះធ្វើឡើងជាផ្នែកមួយនៃព្រឹត្តិការណ៍ប្រចាំសប្តាហ៍របស់ប្រទេសកូរ៉េ ដែលបានប្រព្រឹត្តទៅនៅថ្ងៃទី ១៤ ខែមិថុនា ឆ្នាំ២០២៣ នៅអគារតេក្វាន់ដូ ប៊ូយ៉ុង-ខ្មែរ ក្នុងពហុកីឡាដ្ឋានជាតិអូឡាំពិក។

ក្នុងឱកាសនោះតំណាងរបស់ក្រុមហ៊ុន ថៃសាមសុង អេឡិចត្រូនិក បានបញ្ជាក់ថា នេះគឺជា កិត្តិយសដ៏វិសេសវិសាលខ្លាំងណាស់របស់ក្រុមហ៊ុន ថៃសាមសុង អេឡិចត្រូនិក ប្រចាំប្រទេសកម្ពុជា ដែលបានចូលរួមចំណែកក្នុងការ រៀបចំការប្រកួតជើងឯកតេក្វាន់ដូដ៏រំភើបអស្ចារ្យមួយនេះ។ ជាមួយគ្នានេះ ក្រុមហ៊ុន សាមសុង បានសង្ឃឹមថានឹងខិតខំពាំនាំយកសកម្មភាពសប្បាយៗបែបនេះបន្ថែមទៀតជូនដល់យុវជនកម្ពុជា មិនថាជា អាហារ តន្រ្តី ភាពយន្ត និងកីឡា។

នេះគឺជាលើកទី២ ហើយនៃកិច្ចសហការរៀបចំការប្រកួតជើងឯកកីឡាតេក្វាន់ដូ ដើម្បីគាំទ្រដល់ព្រឹត្តិការណ៍ World Expo 2030។ បន្ថែមពីនេះ ក្រុមហ៊ុន សាមសុង មានក្ដីរំភើបរីករាយជាខ្លាំងក្នុងការបន្តកិច្ចសហការជាមួយនឹងស្ថានទូតកូរ៉េ ប្រចាំប្រទេសកម្ពុជា ក្នុងការផ្សព្វផ្សាយ និងជំរុញឱ្យទីក្រុងប៊ូសាន នៃប្រទេសកូរ៉េ ដើម្បីជ្រើសរើសជាទីតាំងសម្រាប់រៀបចំពិព័រពណ៍ពិភពលោក World Expo 2030 នាពេលខាងមុខនេះ។

ស្របពេលគ្នានេះដែរ ក្រុមហ៊ុន ថៃសាមសុង អេឡិចត្រូនិក ប្រចាំប្រទេសកម្ពុជា ក៏បានផ្ដល់ជារង្វាន់ទូរស័ព្ទដៃ និងកាសឥតខ្សែរដើម្បីលើកទឹកចិត្តដល់កីឡាករជើងឯកដែលទទួលបានជ័យលាភីផងដែរ។

សូមបញ្ជាក់ថា ក្រុមហ៊ុន ថៃសាមសុង អេឡិចត្រូនិក ប្រចាំប្រទេសកម្ពុជា នឹងបន្តធ្វើការងារផ្សេងៗទៀតផងដែរ ដូចជា កម្មវិធីសប្បុរសធម៌, ការតាំងពិព័រណ៍, និងកិច្ចការក្នុងសង្គម ដើម្បីគាំទ្រដល់ព្រឹត្តិការណ៍ពិព័រពណ៍ពិភពលោក World Expo 2030 នៅទីក្រុងប៊ូសាន នៃប្រទេសកូរ៉េ បន្តទៀត៕

The post ក្រុមហ៊ុន ថៃសាមសុង អេឡិចត្រូនិក ប្រចាំកម្ពុជាឧបត្ថម្ភគាំទ្រយ៉ាងពេញទំហឹងដល់ការប្រកួតកីឡាតេក្វាន់ដូ appeared first on Kampuchea Thmey Daily.

ITF សម្រួចយកមេដាយក្នុងព្រឹត្តការណ៍ World Champion Ship ទោះមិនមានវត្តមានក្នុងស៊ីហ្គេមនៅកម្ពុជា

Sok Srey Leak — Tue, 10 Jan 2023 04:39:05 +0000

សហព័ន្ធកីឡាតេក្វាន់ដូ ITF កម្ពុជាបានត្រៀមខ្លួនរួចរាល់ និងកំណត់អំពីការចូលរួមប្រកួតក្នុងព្រឹត្តការណ៍ ជើងឯកពិភពលោក World Champion Ship នៅប្រទេសកាហ្សាក់ស្ថាន ដែលធ្វើឡើងក្នុងអំឡុងខែសីហា ឆ្នាំ២០២៣ខាងមុខនេះ។

លោក បួន ហ៊ីងសុធីយ៉ា អគ្គលេខាធិការសហព័ន្ធកីឡាតេក្វាន់ដូ ITFកម្ពុជា បានបង្ហាញក្តីសប្បាយរីករាយ ដែលត្រូវបានក្រសួងអប់រំយុវជននិងកីឡា ផ្តល់ឧកាសឲ្យប្រមូលផ្តុំឡើងវិញ ដើម្បីត្រៀមលក្ខណៈក្នុងការប្រកួត នាពេលខាងមុខ។ លោកលើកឡើងថា “ នេះជាកត្តាជម្រុញទឹកចិត្ត ដល់ពួកយើងឲ្យមានការខិតខំប្រឹងប្រែងបន្តទៀត ដើម្បីដណ្តើមយកមេដាយមាសជូនជាតិ ក្នុងព្រឹត្តការណ៍ជើងឯកពិភពលោកនៅ កាហ្សាក់ស្ថាន ”។

សម្រាប់ការជ្រើសរើសសមាសភាព កីឡាករ – កីឡាការិនី ដែលត្រូវទៅចូលរួមប្រកួតនោះ ត្រូវបានលោកអគ្គលេខាធិការ បញ្ជាក់ថា “ អ្នកដែលត្រូវទៅ គឺសុទ្ធសឹងជាអ្នកធ្លាប់បានមេដាយមាសក្នុងព្រឹត្តការណ៍អន្តរជាតិកន្លងមក ប៉ុន្តែ បន្ថែមពីនោះ សហព័ន្ធក៍ដាក់បញ្ជូលកីឡាករថ្មីៗផងដែរ ដែលគាត់បានអភិវឌ្ឍន៍ខ្លួនឡើងមក កម្រិតមួយខ្ពស់ ”។ “ ចឹងហើយ សហព័ន្ធនិងធ្វើការជ្រើសរើសកីឡាករ- កីឡាការិនី ទាំងនោះយ៉ាងសម្រិតសម្រាំងបំផុត ។ ក្នុងនាមថ្នាក់ដឹកនាំក៍គិតថា មិនមានតែអ្នកដែលធ្លាប់មានមេដាយត្រូវតែបានទៅចូលរួមនោះទេ ប៉ុន្តែបើសិនជាសមទ្ធិផលល្អ មានវិន័យ គោរពពេលវេលា ដោយយើងឈរលើគោលការណ៍ យុត្តិធម៍ អ្នកណាបានហាត់ អ្នកនោះបានចេញ ”។

លោក បួន ហ៊ីងសុធីយ៉ា បានបន្ថែមថា “ ក្នុងនាមថ្នាក់ដឹកនាំសហព័ន្ធ សូមសម្តែងនូវការដឹងគុណ ដល់លោកកែរ រ៉េមី ប្រធានសហព័ន្ធ ដែលជានិច្ចកាលតែងតែមកសួរសុខទុក្ខ ទោះបីពេលខ្លះលោកមានភារកិច្ចមមាញឹក យ៉ាងណាក៍លោក ឈ្លៀតពេលវេលា មកមើល កីឡាករកីឡាការិនីទាំងអស់ និងលើកទឹកចិត្ត ផ្តល់ការណែនាំ ផ្តល់បទពិសោធន៍ថ្មីៗ បន្ថែមទៀត ដើម្បីឲ្យកីឡាករកីឡាការិនី ទទួលបានជោគជ័យនាពេលខាងមុខ ”។

អគ្គលេខាធិការខាងលើ ក៍បានធ្វើការអំពាវនាវដល់សប្បុរសជន ឬ ក៍ក្រុមហ៊ុននានា ដែលចាប់អារម្មណ៍វិស័យកីឡា សូមចូលរួមឧបត្តម្ភគាំទ្រ ដល់សហព័ន្ធកីឡាតេក្វាន់ដូ ITF ចូលរួមជាថវិការ ធនធាន ជាសម្ភារៈ ដើម្បីឲ្យ អត្តពលិកទាំងអស់មានកំលាំងចិត្ត ចូលរួមយ៉ាងពេញលេញក្នុងការប្រកួតអន្តរជាតិខាងមុខ។

បញ្ជាក់ដែរថា កម្ពុជានិងចូលរួមប្រកួតក្នុងព្រឹត្តការណ៍ជើងឯកពិភពលោក នៅកាហ្សាក់ស្ថាន ចាប់ពីថ្ងៃទី១៥ ដល់៣០ ខែសីហាឆ្នាំ២០២៣ ។ខណៈកម្ពុជាគ្រោងបញ្ចូនកីឡាករ – កីឡាការិនីរបស់ខ្លួន ចូលរួមប្រកួតច្រើនវិញ្ញាសាផងដែរ ៕

The post ITF សម្រួចយកមេដាយក្នុងព្រឹត្តការណ៍ World Champion Ship ទោះមិនមានវត្តមានក្នុងស៊ីហ្គេមនៅកម្ពុជា appeared first on Kampuchea Thmey Daily.

អត្តពលិកកីឡាតេក្វាន់ដូ ITF បាក់ទឹកចិត្តក្រោយត្រូវ ដកចេញពីស៊ីហ្គេម ខណៈជាកីឡាសក្តានុពលត្រូវ ដណ្តើម មេដាយមាស១៥គ្រឿង

Sok Srey Leak — Wed, 04 Jan 2023 03:29:50 +0000

ក្រោយទទួលសិទ្ធិធ្វើម្ចាស់ផ្ទះព្រឹត្តការណ៍កីឡាស៊ីហ្គេមលើកទី៣២ នាឆ្នាំ២០២៣ បានធ្វើឲ្យកម្ពុជាបានខិតខំប្រឹងប្រែងយ៉ាងខ្លាំង ពិសេសចម្រាញ់យកសហព័ន្ធកីឡាដែលមានគុណភាព សក្តានុពល ដាក់ជាកីឡាអតិភាព ក្នុងការដណ្តើមយកមេដាយជូនជាតិ។ ជាមួយនោះ កីឡាតេក្វាន់ដូ ITF កម្ពុជា ត្រូវបានថ្នាក់ដឹកនាំក្រសួង និង Camsoc មើលឃើញអំពីកម្រិតសមត្ថភាព រហូតជ្រើសរើសជាកីឡាមានសក្តានុពល ស្វែងរកមេដាយមាស ចំនួន១៥ ជូនជាតិដែលជាចំនួនមួយច្រើនជាងគេ ថែមទៀតផង។

យ៉ាងណាក៍ដោយខុសពីក្តីរំពឹងទុក ក៍ដូចជាការខិតខំប្រឹងប្រែងរបស់មេដឹកនាំសហព័ន្ធ និងអត្តពលិកដែលបានប្រឹងប្រែង មិនខ្លាចនឿយហត់ និង ខុសពីគោលការណ៍លើពិភពលោក ដែលបានលើកឡើងថា កីឡាមិន ប្រកាន់ពណ៍សម្បុរ មិនប្រកាន់ពូជសាសន៍នយោបាយ ។ តេក្វាន់ដូ ITF ត្រូវបានដកចេញពីព្រឹត្តការណ៍ប្រវិត្តសាស្រ្តរបស់កម្ពុជាមួយនេះ និងជាលើកដំបូងដែលកម្ពុជាដាក់បញ្ចូល ក៍ព្រោះដោយសារតែ កីឡានេះ មានប្រភពមកពីប្រទេសកូរ៉េខាងជើង ។ហើយកូរ៉េខាងជើងទៀតសោត ត្រូវជាប់ទណ្ឌកម្មពិភពលោក ក្រោយពីប្រទេសដ៍ឯកោមួយនេះ នូវតែប្រកាន់ភ្ជាប់ គោលការណ៍របស់ខ្លួន មិនសម្របជាមួយពិភពលោក។

បើនិយាយពី អត្តពលិកជម្រើសជាតិរបស់សហព័ន្ធដែលមានសក្តានុពលខ្លាំងក្នុងប្រទេសកម្ពុជានេះ សុទ្ធសឹងតែអ្នក ដែលមានសមត្ថភាពពិតប្រកដ ជាម្ចាស់មេដាយកម្រិតពិភពលោក គ្រាន់តែទទួលដំណឹងនេះ មានការបាក់ទឹកចិត្ត ដោយសារកីឡាមួយប្រភេទនេះ មិនត្រូវបានដាក់បញ្ចូល ជារឿងដែលពិបាកទទួលយក។

បើតាមលោក បួន ហ៊ីងសុធីយ៉ា អគ្គលេខាធិការសហព័ន្ធកីឡា តេក្វាន់ដូ ITF កម្ពុជា បានលើកឡើងថា កីឡាករ កីឡាការិនី គ្រប់រូបមានការបាក់ទឹកចិត្តយ៉ាងខ្លាំង ព្រោះមិនបានចូលស៊ីហ្គេម ព្រោះអ្វីដែលប្រឹងប្រែងកន្លងមកគោលដៅគឺ ស៊ីហ្គេមតែម្តង ។ប៉ុន្តែបើសិនជាយើងមិនមានការប្រមូលផ្តុំទៀត វារឹតតែធ្ងន់ដែរ ព្រោះការខិតខំប្រឹងប្រែងជាយូរមកហើយ ត្រូវក្លាយជាអាសាបង់ ។

លោកបន្តថា ទោះមិនបានចូលរួមប្រកួតក្នុងព្រឹត្តការណ៍កីឡាស៊ីហ្គេមនៅកម្ពុជាក្តី យើងក៍នៅមានGamesជាបន្តទៀត សង្ឃឹមថា បើមានការប្រមូលផ្តុំការប្រកួតជើងឯកពិភពលោក វាអាចជាកត្តាមួយ ប៉ះប៉ូវផ្លូវចិត្ត ពួកគាត់បាន ធ្វើយ៉ាងណាឲ្យមានការប្រមូលផ្តុំ ត្រៀមការប្រកួត ទោះមិនបានលេងក្នុងស្រុក ប៉ុន្តែការលេងក្នុងស្រុក ក៍លើកទង់ជាតិ លេងក្រៅស្រុកក៍លើកទង់ជាតិដូចគ្នា។

យើងចង់ឲ្យមានការប្រមូលផ្តុំ ព្រោះយើងត្រៀមដើម្បីចូលរួមប្រកួត នៅប្រទេសកាហ្សាក់ស្ថានខែសីហា ក្នុងព្រឹត្តការណ៍ World Championship ។ នេះជាការបញ្ចាក់បន្ថែមរបស់ អគ្គលេខាធិការ។

ការលើកឡើងឲ្យមានការប្រមួលផ្តុំបែបនេះ ក៍ព្រោះដោយសារកាលពីពេលថ្មីៗនេះពោលគឺចុងឆ្នាំ២០២២ ក្រសួងបានប្រកាសរំសាយរបស់ក្រុមជម្រើសជាតិគ្រប់ប្រភេទកីឡាដោយសារដល់ពេលកំណត់ ។ប៉ុន្តែក្រោយប្រកាសរំសាយ វាក្លាយទៅជាក្តីព្រួយបារម្មណ៍ថា ក្រសួងអាចនិងមិនដាក់ តេក្វាន់ដូITF ចូលប្រមូលផ្តុំម្តងទៀត ដោយសារតែកីឡានេះមិនមានឈ្មោះក្នុងព្រឹត្តការណ៍កីឡាស៊ីហ្គេម។

រំលឹកដែរថា ការដកមិនឲ្យមានប្រភេទកីឡាតេក្វាន់ដូ ITF ចូលរួមប្រកួតកីឡាស៊ីហ្គេមនៅក្នុងប្រទេសកម្ពុជានេះ មិនមានអ្វីពាក់ព័ន្ធជាមួយ រាជរដ្ឋាភិបាលរបស់កម្ពុជា ឬ ក្រសួងពាក់ព័ន្ធនោះទេ ប៉ុន្តែវាជាការសម្រេចរបស់អន្តរជាតិ ដែលត្រូវបាន ប្រកាសឲ្យដកប្រភេទកីឡាដែលមានប្រភពមកពីប្រទេសកូរ៉េខាងជើងមួយនេះ ដោយសារ ប្រទេសកុម្មុយនីស នៅតែគឃ្លើន ក្នុងការផលិតអាវុធ ដែលពិភពលោកមិនចង់ឲ្យកើតមាន ។

និយាយពីកម្ពុជាវិញ មានក្រសួងអប់រំយុវជននិងកីឡា គណៈកម្មាធិការជាតិរៀបចំការប្រកួត កីឡាអាស៊ីអាគ្នេយ៍ (CAMSOC)បានផ្តល់ទំនុកចិត្តដល់តេក្វាន់ដូ ITF រហូតឲ្យស្វែងរកមេដាយមាស១៥គ្រឿងថែមទៀតផង។ និងបានយកចិត្តទុកដាក់យ៉ាងខ្លាំងចំពោះបញ្ហាខាងលើ ដែលបានធ្វើការសម្របសម្រួល រហូតដាក់បញ្ចូលទៅក្នុង ក្រុមកីឡាយុទ្ធគុនចម្រុះ តែនៅតែមិនទទួលបាននូវការអនុញ្ញាតនោះឡើយ។

កត់សំគាល់ផងដែរថា កន្លងមក តេក្វាន់ដូ ITF មិនដែលមានវត្តមានក្នុងព្រឹត្តការណ៍កីឡាស៊ីហ្គេមនោះទេ រហូតមកដល់ឆ្នាំ២០២៣ដែលកម្ពុជាទទួលបានសិទ្ធិធ្វើម្ចាស់ផ្ទះ ទើបកម្ពុជាមានសិទ្ធិនៅក្នុងការដាក់បញ្ជូល ប្រភេទកីឡាមានសក្តានុពលដើម្បីដណ្តើមយកមេដាយជូនជាតិមាតុភូមិ។ប៉ុន្តែទន្ទឹមនោះ ជាប្រទេសដែលគោរព លទ្ធិប្រជាធិបតេយ្យ កម្ពុជាក៍មិនធ្វើអ្វីជាការប្រឆាំងចំពោះពិភពលោក នៅរឿងដែលចាត់ទុកជា កុម្មុយនីស ផ្តាច់ការនោះដែរ។

យ៉ាងណាក៍ដោយ តេក្វាន់ដូ ITF កម្ពុជានៅតែបន្តមានសង្ឃឹមតាមរយៈការចូលរួមប្រកួតលក្ខណៈអន្តរជាតិ ពិសេសជើងឯកពិភពលោក ព្រោះកម្ពុជាធ្លាប់ដណ្តើមយកមេដាយមាសពីកម្រិតមួយនេះបានជាច្រើនលើកផងដែរ។បន្ថែមពីនោះ កីឡាមួយប្រភេទនេះក៍ទទួលបាននូវការពេញនិយម ហ្វឹកហាត់ក្នុងជួរកងកំលាំង ពិសេសការហ្វឹកហាត់ដើម្បីសុខភាព និងការពារខ្លួនពីមហាជន សិក្សានុសិស្ស ដែលជាទីពេញនិយមរបស់ប្រជាជនក្នុងរាជធានី និងខេត្តជាដើម៕

The post អត្តពលិកកីឡាតេក្វាន់ដូ ITF បាក់ទឹកចិត្តក្រោយត្រូវ ដកចេញពីស៊ីហ្គេម ខណៈជាកីឡាសក្តានុពលត្រូវ ដណ្តើម មេដាយមាស១៥គ្រឿង appeared first on Kampuchea Thmey Daily.

លោក កែវ រ៉េមី លាឈប់ពីអនុប្រធានតេក្វាន់ដូ ITF អន្តរជាតិ និងប្រធាន ITF អាស៊ាន

chean virakbot — Thu, 17 Nov 2022 08:44:35 +0000

លោក កែវ រ៉េមី ប្រធានសហព័ន្ធកីឡាតេក្វាន់ដូ ITF កម្ពុជាបានដាក់ពាក្យលាលែងពីតំណែងជាអនុប្រធានសហព័ន្ធកីឡាតេក្វាន់ដូ ITF អន្តរជាតិ និងជាប្រធានសហព័ន្ធកីឡាតេក្វាន់ដូ ITF អាស៊ាន ដែលពាក្យលាឈប់ត្រូវបានចុះថ្ងៃទី១៥ ខែវិច្ឆិកា ឆ្នាំ២០២២។

លិខិតលាឈប់របស់ឯកឧត្តមបានផ្ញើទៅលោក Ri Yong Son ប្រធានសហព័ន្ធតេក្វាន់ដូ ITF អន្តរជាតិ ដែលមានរហូតដល់ពីរទំព័រដែលមានខ្លឹមសាររៀបរាប់ និងពន្យល់ជាច្រើន។ លោក បានរៀបរាប់មូលហេតុជាច្រើនពាក់ព័ន្ធនឹងការសម្រេចចិត្តនេះ៕

អត្ថបទ៖ វីរបុត្រ

The post លោក កែវ រ៉េមី លាឈប់ពីអនុប្រធានតេក្វាន់ដូ ITF អន្តរជាតិ និងប្រធាន ITF អាស៊ាន appeared first on Kampuchea Thmey Daily.

កីឡាតេក្វាន់ដូ Archives - Kampuchea Thmey Daily

ក្រុម​តេក្វាន់ដូ ITF កម្ពុជា​ឈ្នះ​មេដាយ​អាស៊ី២៤​គ្រឿង​មក​ដល់កម្ពុជាព្រឹកនេះ

ម្ចាស់​មេដាយ​ប្រាក់​ស៊ីហ្គេម កញ្ញា ឈឿង អាលីហ្សា ចង់ក្លាយជាគ្រូបង្វឹកតេក្វាន់ដូ

លោក វ៉ាត់ ចំរើន ជំរុញកីឡាតេក្វាន់ដូកម្ពុជាតាមប្រមាញ់ក្តីសុបិនធំបំផុតទៀត

ឯកឧត្ដម ហ៊ុន ម៉ានី ៖ ស្មារតីកីឡា ជាការតស៊ូ យកជ័យជម្នះ តែរក្សាបានសាមគ្គីភាព និងមិត្តភាព ក្នុងសន្តិភាព

ក្រុមហ៊ុន ថៃសាមសុង អេឡិចត្រូនិក ប្រចាំកម្ពុជាឧបត្ថម្ភគាំទ្រយ៉ាងពេញទំហឹងដល់ការប្រកួតកីឡាតេក្វាន់ដូ

ITF សម្រួចយកមេដាយក្នុងព្រឹត្តការណ៍ World Champion Ship ទោះមិនមានវត្តមានក្នុង​ស៊ីហ្គេមនៅកម្ពុជា

លោក​ កែវ រ៉េមី​ លា​ឈប់​​ពី​​អនុប្រធាន​តេក្វាន់ដូ​ ​ITF​ អន្តរជាតិ​​ និង​​ប្រធាន​​ ITF អាស៊ាន

ក្រុមតេក្វាន់ដូ ITF កម្ពុជាឈ្នះមេដាយអាស៊ី២៤គ្រឿងមកដល់កម្ពុជាព្រឹកនេះ

ម្ចាស់មេដាយប្រាក់ស៊ីហ្គេម កញ្ញា ឈឿង អាលីហ្សា ចង់ក្លាយជាគ្រូបង្វឹកតេក្វាន់ដូ

ITF សម្រួចយកមេដាយក្នុងព្រឹត្តការណ៍ World Champion Ship ទោះមិនមានវត្តមានក្នុងស៊ីហ្គេមនៅកម្ពុជា

លោក កែវ រ៉េមី លាឈប់ពីអនុប្រធានតេក្វាន់ដូ ITF អន្តរជាតិ និងប្រធាន ITF អាស៊ាន