កីឡាប៉េតង់ Archives - Kampuchea Thmey Daily

ប៊ូល និងប៉េតង់ ជាកីឡាមួយប្រភេទពេញនិយមលេងទាំងនៅភ្នំពេញ និងតាមខេត្ត

Sina Noun — Thu, 16 Oct 2025 04:53:10 +0000

កីឡាប៊ូល និងប៉េតង់ ជាកីឡាមួយប្រភេទក្នុងចំណោមកីឡាជាច្រើនដែលមហាជនចូលចិត្តលេងកម្សាន្តនៅពេលជួបជុំ ឬនៅពេលទំនេរមិនថានៅតាមបណ្ដារាជធានី-ខេត្ត នោះឡើយគឺមានការគាំទ្រច្រើន និងលេងជុំៗគ្នា។

រូបភាពលើផេកក្លឹបប៉េតង់ភូមិថ្មីខេត្តកែប

វិស័យកីឡាពេញនិយមគ្រប់ស្រទាប់វណ្ណៈ និងគ្រប់វ័យនៅកម្ពុជានោះគឺកីឡាបាល់ទាត់ កីឡាបាល់ទះ ព្រោះមានមនុស្សច្រើនណាស់ដែលលេងកីឡាទាំងនេះដើម្បីកម្សាន្ត។ ស្ទើរនៅគ្រប់ខេត្ត-ក្រុង គឺមានតារាងបាល់ទាត់តារាងបាល់ទះសម្រាប់លេងជានិច្ច។

រូបភាពលើផេកក្លឹបប៉េតង់ភូមិថ្មីខេត្តកែប

យ៉ាងណាបន្ថែមពីកីឡាពីរប្រភេទខាងលើនេះក៏មានកីឡាប៊ូល និងប៉េតង់ ដែរដែលមហាជនចូលចិត្តលេងស្ទើរជាប្រចាំថ្ងៃទៅហើយ។ ដោយសារជាកីឡាមិនត្រូវការទីធ្លាធំ និងស្មុគស្មាញ មិនប្រើប្រាស់សម្ភារច្រើនដូចកីឡាផ្សេងទើបធ្វើឲ្យកីឡាប៊ូល និងប៉េតង់នេះមានទីលានប្រកួតច្រើន។ មិនថានៅតាមសាលារៀន ទីតាំងស្ថាប័នរដ្ឋ ឬតាមផ្ទះឯកជនគឺមានទីលានប៊ូលច្រើន និងមានការចូលរួមលេងច្រើនទាំងវ័យចាស់ វ័យក្មេង គឺតែងតែងជួបជុំគ្នាលេង។

រូបភាពលើផេកក្លឹបប៉េតង់ភូមិថ្មីខេត្តកែប

កីឡាមួយនេះងាយស្រួលលេងមិនគ្រោះថ្នាក់ និងមិនត្រូវការចេះខ្លាំង ឬហ្វឹកហាត់សិនទើបអាចលេងបាននោះឡើយ។ អ្នកចង់លេងគ្រាន់តែចេះបោះល្មមៗអាចលេងបានហើយទើបកីឡាប៊ូល និងប៉េតង់នេះមានអ្នកចូលចិត្តលេងច្រើនមិនចាញ់កីឡាបាល់ទាត់ បាល់ទះ។ បច្ចុប្បន្ននេះអ្នកលេងប៊ូលមួយចំនួនបានណាត់ជួបគ្នាពីខេត្តមួយទៅខេត្តមួយដើម្បីសាកល្បងសមត្ថភាពគ្នាទៀតផង ក្រៅតែពីមកចូលរួមការប្រកួតជាផ្លូវការរបស់សហព័ន្ធនោះ៕

រូបភាពលើផេកក្លឹបប៉េតង់ភូមិថ្មីខេត្តកែប

អត្ថបទដោយ៖ នួន ស៊ីណា

The post ប៊ូល និងប៉េតង់ ជាកីឡាមួយប្រភេទពេញនិយមលេងទាំងនៅភ្នំពេញ និងតាមខេត្ត appeared first on Kampuchea Thmey Daily.

កម្ពុជា បានមេដាយសំរិទ្ធប៉េតង់ពិភពលោក ខណៈប្រទេសអាស៊ាន ៣ ឈ្នះមេដាយមាស

chean virakbot — Mon, 13 Oct 2025 01:45:09 +0000

ការប្រកួតកីឡាប៉េតង់ជើងឯកពិភពលោក ផ្នែកនារី ឆ្នាំ ២០២៥ នៅប្រទេសបារាំង បានបញ្ចប់ទៅកាលពីថ្ងៃអាទិត្យ ទី១២ ខែតុលា បន្ទាប់ពីដំណើរការប្រកួតជាច្រើនថ្ងៃ។

លទ្ធភាគភាគច្រើនជាក្រុមកីឡាការិនីប៉េតង់នៅតំបន់អាស៊ានដែលដណ្តើមបានមេដាយមាស ប៉ុន្តែក្រុមកីឡាការិនីប៉េតង់កម្ពុជាដែលធ្លាប់ខ្លាំងលើឆាកអន្តរជាតិបែរជាមិនអាចរកបានមេដាយមាសសោះ។

ក្រុមកីឡាប៉េតង់ជម្រើសជាតិម៉ាឡេស៊ី បានឈ្នះជើងឯក Nations Cup សម្រាប់វិញ្ញាសាក្រុមនារី។ បន្ទាប់ពីឆ្លងកាត់វគ្គសន្សំពិន្ទុដោយជោគជ័យមក ក្រុមនារីម៉ាឡេស៊ី បានឈ្នះ ក្រុមនារី ជប៉ុន ដោយពិន្ទុ ១៣-៥ ក្នុងវគ្គ ១៦ ក្រុមចុងក្រោយ ហើយបានបន្តយកឈ្នះ ន័រវេស ដោយលទ្ធផល ១៣-៣ នៅវគ្គ ៨ ក្រុមចុងក្រោយ។ នៅវគ្គពាក់កណ្តាលផ្តាច់ព្រ័ត្រ ម៉ាឡេស៊ី បានយកឈ្នះ អូទ្រីស ដោយលទ្ធផល ១៣-៣ និងវគ្គផ្តាច់ព្រ័ត្រ បានឈ្នះ អ៉ីតាលី ដោយលទ្ធផល ១៤-៦ ដើម្បីក្លាយជាម្ចាស់ពាន Nations Cup។

សម្រាប់វិញ្ញាសា ក្រុមនារី ៣ នាក់ទល់ ៣ នាក់ មេដាយមាស បានទៅក្រុមនារី វៀតណាម។ ពួកគេបានយកឈ្នះ សាធារណរដ្ឋឆេក ដោយលទ្ធផល ១៣-៦ នៅវគ្គ១៦ក្រុមចុងក្រោយ ហើយបានឈ្នះមិត្តរួមក្រុមវៀតណាមទី២ ដោយលទ្ធផល ១៣-៣ នៅវគ្គ ៨ ក្រុមចុងក្រោយ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ។ នៅវគ្គ ៤ ក្រុមចុងក្រោយ ពួកគេបានយកឈ្នះ ប៊ែលហ្ស៊ិក ដោយលទ្ធផល ១៣-១០ ហើយបានឈ្នះ ថៃ ដោយពិន្ទុដាច់ឆ្ងាយ ១៣-១ នៅវគ្គផ្តាច់ព្រ័ត្រ ដើម្បីក្លាយជាម្ចាស់មេដាយមាស។

ថៃបានឈ្នះមេដាយមាស លើវិញ្ញាសាវាយយកពិន្ទុនារីទោល។ ក្រោយឆ្លងកាត់វគ្គសន្សំពិន្ទុ កីឡាការិនីថៃបានយកឈ្នះវៀតណាមដោយលទ្ធផល ៣៤-២១ នៅវគ្គ ៨ ក្រុមចុងក្រោយ និងបានបន្តឈ្នះ ន័រវេស ដោយពិន្ទុ ២៨-២៥ ដើម្បីឡើងទៅកាន់វគ្គផ្តាច់ព្រ័ត្រ ដែលបានឈ្នះ អេស្ប៉ាញ ដោយពិន្ទុ ៤៣ – ៣១ ដើម្បីក្លាយជាម្ចាស់មេដាយមាស។

ចំពោះក្រុមនារីកម្ពុជាធ្វើបានល្អបំផុតដោយឈានដល់វគ្គពាក់កណ្តាលផ្តាច់ព្រ័ត្រ លើវិញ្ញាសា ក្រុមនារី ៣នាក់ទល់៣នាក់។ ក្រុមនារីកម្ពុជា បានឈ្នះម្ចាស់ផ្ទះបារាំង ដោយពិន្ទុ ១៣-៣ នៅវគ្គ ១៦ ក្រុមចុងក្រោយ ហើយបានបន្តឈ្នះ ស៊ុយអែត ដោយលទ្ធផល ១៣-៦ ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ ប៉ុន្តែបានចាញ់ ថៃ ដោយពិន្ទុ ១៣-៤ ដូច្នេះទទួលបានមេដាយសំរិទ្ធ។

ចំណែកវិញ្ញាសា វាយយកពិន្ទុនារីទោល កីឡាការិនីកម្ពុជា អ៊ុន ស្រីយ៉ា បានធ្លាក់ត្រឹមវគ្គ ៨ ក្រុមចុងក្រោយ បន្ទាប់ពីបានចាញ់តួកគី ដោយសារពេលវេលា បន្ទាប់ពីពិន្ទុស្មើគ្នា ៣៥-៣៥។

ក្រុមកីឡាប៉េតង់កម្ពុជានាប៉ុន្មានឆ្នាំចុងក្រោយមិនសូវទទួលបានល្អប្រសើរទេសម្រាប់ការប្រកួតលើឆាកអន្តរជាតិ តាំងពីមុនព្រឹត្តិការណ៍កីឡាស៊ីហ្គេម ឆ្នាំ ២០២៣។ ក្នុងនាមជាម្ចាស់ផ្ទះកីឡាស៊ីហ្គេម ប៉េតង់កម្ពុជា រកមិនបានមេដាយមាសណាមួយសោះ ហើយការប្រកួតព្រឹត្តិការណ៍អន្តរជាតិបន្តបន្ទាប់មកទៀតក៏ពិតជាពិបាកក្នុងស្វែងរកមេដាយមាសដែរ។ អ្វីដែលគួរឲ្យចាប់អារម្មណ៍ សមាសភាពកីឡាករ កីឡាការិនីដដែលៗដែលបានចេញទៅប្រកួតលើឆាកអន្តរជាតិ ហើយមិនសូវឃើញមានអ្នកជំនាន់ក្រោយទេ៕

អត្ថបទ៖ វីរបុត្រ

The post កម្ពុជា បានមេដាយសំរិទ្ធប៉េតង់ពិភពលោក ខណៈប្រទេសអាស៊ាន ៣ ឈ្នះមេដាយមាស appeared first on Kampuchea Thmey Daily.

ប៉េតង់កម្ពុជាបានឈ្នះមេដាយមាស២ ប្រាក់១ សំរិទ្ធ២ ពីប៉េតង់ជើងឯកអាស៊ី

chean virakbot — Mon, 25 Nov 2024 01:23:42 +0000

ក្រុមកីឡាប៉េតង់ជម្រើសជាតិកម្ពុជា ទទួលបានមេដាយចំនួន៥គ្រឿងពីការប្រកួតប៉េតង់ ជើងឯកអាស៊ី លើកទី២ (The 2nd Pétanque Asian Championships) នៅទីក្រុង Taoyuan កោះតៃវ៉ាន់ ចាប់ពីថ្ងៃទី២០ ដល់ថ្ងៃទី២៤ ខែវិច្ឆិកា ឆ្នាំ២០២៤។

សហព័ន្ធកីឡាប៊ូល និងប៉េតង់កម្ពុជាបានបញ្ជូនកីឡាករ២នាក់ និងកីឡាការិនី២នាក់ប្រកួតលើ៤វិញ្ញាសាគឺបានឡើងដល់វគ្គផ្តាច់ព្រ័ត្រ៣វិញ្ញាសា ក្នុងនោះទទួលបានមេដាយមាស២ និងប្រាក់១ ខណៈ២វិញ្ញាសាទៀតឡើងដល់វគ្គពាក់កណ្តាលផ្តាច់ព្រ័ត្រដោយមេដាយសំរិទ្ធ។

មេដាយមាស២

កីឡាករ សុខ ចាន់មាន ទទួលបានមេដាយមាស១គ្រឿង លើវិញ្ញសាវាយយកពិន្ទុបុរសឯកត្តជន។
កីឡាករ សុខ ចាន់មាន និងកីឡាករ ពុធយ៉ុន ច័ន្ទដារ៉ា ទទួលបានមេដាយមាស១គ្រឿង លើវិញ្ញាសាគូបុរស។

មេដាយប្រាក់២

កីឡាការិនី ធា សម្ផស្ស និង កីឡាករ ពុធយ៉ុន ច័ន្ទដារ៉ា ទទួលបានមេដាយប្រាក់១គ្រឿង លើវិញ្ញាសាគូបុរស-នារី។

មេដាយសំរិទ្ធ២

កីឡាការិនី អ៊ុក ស្រីមុំ និងកីឡាការិនី ធា សម្ផស្ស ទទួលបានមេដាយសំរិទ្ធ១គ្រឿង លើវិញ្ញាសាគូនារី។
កីឡាការិនី អ៊ុក ស្រីមុំ ទទួលបានមេដាយសំរិទ្ធ១គ្រឿង លើវិញ្ញាសាវាយយកពិន្ទុនារីឯកត្តជន។

សហព័ន្ធកីឡាប៊ូល និងប៉េតង់កម្ពុជា បានបញ្ជូនអត្តពលិក៤នាក់ គ្រូបង្វឹក២នាក់ និងគ្រូជំនួយ១នាក់ទៅចូលរួមប្រកួតប៉េតង់ជើងឯកអាស៊ី លើកទី២ ឆ្នាំ២០២៤ នៅកោះតៃវ៉ាន់។ អ្វីដែលគួរឲ្យកត់សំគាល់ កីឡាករ កីឡាការិនីកម្ពុជាសុទ្ធតែរៀមច្បងមានបទពិសោធច្រើនដូចជា សុខ ចាន់មាន និង អ៊ុក ស្រីមុំ ខណៈអតីតវីរកីឡាការិនី កែ ឡេង ម្ចាស់មេដាយមាសពិភពលោក៤សម័យកាលជាប់គ្នាបានក្លាយជាគ្រូជំនួយ៕

អត្ថបទ៖ វីរបុត្រ

The post ប៉េតង់កម្ពុជាបានឈ្នះមេដាយមាស២ ប្រាក់១ សំរិទ្ធ២ ពីប៉េតង់ជើងឯកអាស៊ី appeared first on Kampuchea Thmey Daily.

ក្នុង៥វិញ្ញាសា កម្ពុជាឈ្នះមេដាយមាស Nations Cup ពីការប្រកួតប៉េតង់ពិភពលោក

chean virakbot — Wed, 29 Nov 2023 03:44:11 +0000

កម្ពុជាបានឈ្នះមេដាយមាសវិញ្ញាសាក្រុមយុវជន Nations Cup ក្នុងចំណោម៥វិញ្ញាសាដែលត្រូវបានដាក់ឲ្យប្រកួតកីឡាប៉េតង់ពិភពលោកឆ្នាំ២០២៣នៅប្រទេសថៃបានបញ្ចប់ទៅកាលពីដើមសប្តាហ៍នេះ។

មុនឈ្នះមេដាយមាស ក្រុមយុវជនកម្ពុជាបានយកឈ្នះឥណ្ឌូណេស៊ី ដោយលទ្ធផល ១៣-៦ នៅវគ្គ១៦ក្រុមចុងក្រោយ និងបានបន្តយកឈ្នះក្រុមវៀតណាមដោយលទ្ធផល ១៣-១១ នៅវគ្គ៨ក្រុមចុងក្រោយ។ នៅវគ្គពាក់កណ្តាលផ្តាច់ព្រ័ត្រ កម្ពុជាបានយកឈ្នះអាល់ហ្សេរី ដោយលទ្ធផល ១៣-១១ និងឈ្នះ អេស្ប៉ាញ ១៣-៣ នៅវគ្គផ្តាច់ព្រ័ត្រដើម្បីក្លាយជាម្ចាស់ជើងឯក Nations Cup ឆ្នាំ២០២៣។

ដោយឡែកវិញ្ញាសា៤វិញ្ញាសាផ្សេងទៀត ក្រុមកីឡាប៉េតង់កម្ពុជាធ្វើមិនបានល្អទេគឺវិញ្ញាសាវាយយកពិន្ទុនារី វិញ្ញាសាវាយយកពិន្ទុយុវជន វិញ្ញាសាក្រុមនារី៣ទល់៣ និងវិញ្ញាសាក្រុមនារី Nations Cup។

វិញ្ញាសាវាយយកពិន្ទុនារីបានធ្លាក់ទៅកីឡាការិនីមីយ៉ាន់ម៉ា Khin Cherry Thet បន្ទាប់ពីយកឈ្នះកីឡាការិនីវៀតណាម Thạch Thị Ánh Lan នៅវគ្គផ្តាច់ព្រ័ត្រ ខណៈមេដាយសំរិទ្ធបានទៅកីឡាការិនីថៃ និងសំរិទ្ធស្ទួនបានទៅកីឡាការិនីឡាវ។ វិញ្ញាសានេះជាលើកដំបូងហើយដែលកម្ពុជាមិនបានឈ្នះមេដាយគិតចាប់តាំងពីឆ្នាំ២០១១។

វីរកីឡាការិនី កែ ឡេង បានឈ្នះមេដាយមាសវិញ្ញាសាវាយយកពិន្ទុនេះចំនួន៤លើកជាប់គ្នាគឺឆ្នាំ២០១៣ ២០១៥ ២០១៧ និង២០១៩ ហើយកីឡាការិនី អ៊ុក ស្រីមុំ បានឈ្នះមេដាយមាសឆ្នាំ២០២១។

ចំពោះវិញ្ញាសាក្រុមនារី៣ទល់៣ មេដាយមាសបានទៅក្រុមកីឡាការិនីវៀតណាម ក្រោយឈ្នះម្ចាស់ផ្ទះថៃ និងវិញ្ញាសាវាយពិន្ទុយុវជន មេដាយមាសបានទៅម្ចាស់ផ្ទះថៃ ហើយវិញ្ញាសាក្រុមនារី Nations Cup បានទៅប្រទេសបែលហ្ស៊ិក៕

អត្ថបទ៖ វីរបុត្រ

The post ក្នុង៥វិញ្ញាសា កម្ពុជាឈ្នះមេដាយមាស Nations Cup ពីការប្រកួតប៉េតង់ពិភពលោក appeared first on Kampuchea Thmey Daily.

អ្នកលេងរាល់ថ្ងៃ ដឹងទេតើ ប៊ូល មួយគ្រាប់ៗមានទម្ងន់ប៉ុន្មាន?

ratanak neang — Mon, 15 May 2023 07:23:41 +0000

កីឡាប៉េតង់ ឬធម្មតាហៅថា កីឡាបោះប៊ូល ពេលលេងគេចែកចេញជា ២ ខាង ដោយក្នុងមួយខាងជាទូទៅមានកូនចំនួន ៦ គ្រាប់ ហើយសរុបចូលគ្នាស្មើ ១២ គ្រាប់ ខណៈចំពោះរបៀបលេងទៀតសោត ក៏មិនមានភាពស្មុគស្មាញអ្វីនោះទេ ពោលរាប់ពិន្ទុទៅតាមកូនប៊ូលដែលនៅជិតប៊ីជាងកូនរបស់គូប្រកួតរបស់យើង ។

ដូច្នេះធ្លាប់តែលេងខ្លួនឯង និងឃើញគេប្រកួត ប៉ុន្តែមានធ្លាប់ដឹងទេថាតើក្នុងប៊ូលមួយគ្រាប់ៗមានទម្ងន់ប៉ុន្មាន?

តាមពិតទៅ គ្រាប់ប៊ូលនីមួយៗ មានទម្ងន់ស្តង់ដាចន្លោះពី ៦៥០ ទៅ ៨០០ ក្រាម ។ ចំពោះទម្ងន់នេះដែរ គេនៅចែកចេញជា ២ ទៀត ដោយចាប់ពី ៧០០ ទៅ ៧៣០ ក្រាម សម្រាប់បុរសលេង ខណៈប៊ូលសម្រាប់មនុស្សស្រីវិញ មានទម្ងន់ចន្លោះពី ៦៨០ ទៅ ៧១០ ក្រាម ។

ដោយឡែក គ្រាប់ប៊ូលនេះ ក៏មានប្រភេទទម្ងន់សម្រាប់កុមារលេងផងដែរ ដោយមានទម្ងន់ត្រឹមតែ ៦០០ ក្រាមប៉ុណ្ណោះ សម្រាប់ក្មេងៗអាយុចាប់ពី ១១ ឆ្នាំ ។

គួរបញ្ជាក់ថា ការលេងប៊ូលនេះដែរ ប្រសិនបើក្រុមកីឡាករកីឡាការិនី ឬអ្នកលេងខាងណារកបាន ១៣ ពិន្ទុមុន នឹងក្លាយជាអ្នកទទួលបានជ័យជម្នះ ៕

ប្រែសម្រួល ៖ នាង រតនៈ

ប្រភព ៖ Obut

The post អ្នកលេងរាល់ថ្ងៃ ដឹងទេតើ ប៊ូល មួយគ្រាប់ៗមានទម្ងន់ប៉ុន្មាន? appeared first on Kampuchea Thmey Daily.

ការប្រកួតប៉េតង់ជើងឯកខេត្តកំពង់ធំដើម្បីអបអរសាទរកីឡាស៊ីហ្គេម

chean virakbot — Mon, 01 May 2023 03:59:33 +0000

ក្រុមកីឡាប៉េតង់ជាង៣០មកពីបណ្តាខេត្តចំនួន៦ បានចូលរួមប្រកួតពានរង្វាន់ខេត្តកំពង់ធំ ដើម្បីអបអរសាទរដល់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

បើកការប្រកួតនៅថ្ងៃទី៣០ ខែមេសា ឆ្នាំ២០២៣ លោក អ៊ាប ឈុនស៊ី ប្រធានក្លឹបប៉េតង់អាចារ្យលាក់ និងជាប្រធានក្រុមដឹកនាំការប្រកួត បានលើកឡើងថា ការរៀបចំឲ្យមានការប្រកួតប៉េតង់ជើងខេត្តកំពង់ធំនេះគឺកើតឡើងដោយមានកិច្ចសហការគ្នារវាងក្រុមកីឡាប៉េតង់នៅក្នុងខេត្តកំពង់ធំ និងមានការជួយឧបត្ថម្ភពីសប្បុរសជន។

គោលបំណងសំខាន់នៃការរៀបចំនេះគឺដើម្បីដើម្បីអបអរសាទរដល់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ក្រោមការដឹកនាំរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បន្ទាប់ពីកម្ពុជាទន្ទឹងរង់ចាំអស់រយៈពេល៦៤ឆ្នាំ។ ការលេងកីឡា និងមានសកម្មភាពកីឡាគ្រប់ប្រភេទនៅទូទាំងប្រទេសកើតមានឡើង អាស្រ័យលើកម្ពុជាមានការអភិវឌ្ឍ កំណើនសេដ្ឋកិច្ច ស្ថេរភាពសង្គម និងនយោបាយ ដូច្នេះហើយបានជាកម្ពុជាក្នុងនាមជាម្ចាស់ផ្ទះមានពាក្យស្លោកថា«កីឡារស់ក្នុងសន្តិភាព»។

ទន្ទឹមជាមួយគ្នានេះ លោក អឿ វឿន ប្រធានក្លឹបកីឡាប៉េតង់ CPP កំពង់ចាម និងលោក ឌិត ធន ប្រធានក្លឹបប៉េតង់ CPP កំពង់ធំ លើកឡើងដែរថា កីឡាមិនត្រឹមតែធ្វើឲ្យប្រជាជនមានសុខភាពល្អ ប៉ុណ្ណោះទេ ប៉ុន្តែក៏បានបង្កើនសាមគ្គីភាព និងមិត្តភាព។ ជាពិសេសនោះ បង្ហាញពីភាពរីកចម្រើន បង្កើនទំនាក់ទំនងតាមរយៈកីឡាទាំងក្នុងប្រទេស តំបន់ និងពិភពលោក។ ទាំងអស់នេះ បានធ្វើឲ្យកម្ពុជា ត្រូវបានពិភពលោកទទួលស្គាល់ថា រាជរដ្ឋាភិបាលបច្ចុប្បន្ន ដឹកនាំប្រទេសជាតិមានសុខសន្តិភាពពេញបរិបូរណ៍។

កីឡាករ កីឡាការិនីប៉េតង់ចំនួន៣២ក្រុម ដែលសរុបមានចំនួន ១២៨នាក់ មកពីខេត្តចំនួន៦ រួមមាន ខេត្តកំពង់ចាម កំពង់ឆ្នាំង កណ្តាល ព្រះវិហារ និងរាជធានីភ្នំពេញ ដែលមានខេត្តកំពង់ធំ ធ្វើជាម្ចាស់ផ្ទះ៕

អត្ថបទ៖ ឈាង មករា

The post ការប្រកួតប៉េតង់ជើងឯកខេត្តកំពង់ធំដើម្បីអបអរសាទរកីឡាស៊ីហ្គេម appeared first on Kampuchea Thmey Daily.

មើលទិដ្ឋភាពទីលានប៉េតង់ស្តង់ដាសម្រាប់ការប្រកួតកីឡាស៊ីហ្គេម

chean virakbot — Fri, 07 Apr 2023 02:30:49 +0000

ទីលានកីឡាប៉េតង់សម្រាប់ប្រកួតក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣នៅកម្ពុជាបានរៀបចំរួចរាល់ហើយដែលប្រកបដោយគុណភាព និងស្តង់ដាសម្រាប់ការប្រកួតលក្ខណៈអន្តរជាតិ។

ទីលានប៉េតង់នៅពហុកីឡដ្ឋានជាតិមានទីលាន៧ក្រឡាផ្សេងគ្នាសម្រាប់រៀបចំការប្រកួតផ្លូវការ និងមានក្រឡាផ្សេងទៀតសម្រាប់ការហ្វឹកហាត់កម្តៅសាច់ដុំមុនការប្រកួតទៀតផង។ សម្រាប់ការប្រកួតក្នុងកីឡាស៊ីហ្គេម លើកទី៣២ មានទីលាន៦ប្រឡាសម្រាប់ការប្រកួតក្នុងវគ្គជម្រុះ ឬសន្សំពិន្ទុក្នុងពូល និងមានទីលាន១ក្រឡាទៀតសម្រាប់រៀបចំការប្រកួតវគ្គផ្តាច់ព្រ័ត្រ។

ចំពោះទីលាន១ក្រឡាសម្រាប់រៀបចំការប្រកួតវគ្គផ្តាច់ព្រ័ត្រត្រូវបានរៀបចំយ៉ាងស្អាត និងមានកន្លែងអង្គុយជុំវិញជាថ្នាក់ៗដែលមើលទៅមានកម្រិតស្តង់ដាអន្តរជាតិតែម្តង។

សូមបញ្ជាក់ថា ប៉េតង់ជាកីឡា១ប្រភេទក្នុងចំណោមកីឡា៩ប្រភេទនៃកីឡាស៊ីហ្គេម លើកទី៣២ ដែលត្រូវប្រកួតនៅពហុកីឡដ្ឋានជាតិមានដូចជា កីឡាបាល់ទាត់បុរស (ពូលA) បាល់ទះ បាល់ទឹក ប៉េតង់ សីដក់ សូហ្វតិន្និស កាយសម្ព័ន្ធ និងលើកទម្ងន់៕

អត្ថបទជាច្រើនពីកីឡាស៊ីហ្គេម លើកទី៣២ សូមចុច «ស៊ីហ្គេម»

អត្ថបទ៖ វីរបុត្រ

The post មើលទិដ្ឋភាពទីលានប៉េតង់ស្តង់ដាសម្រាប់ការប្រកួតកីឡាស៊ីហ្គេម appeared first on Kampuchea Thmey Daily.

ក្លឹបយោធភូមិភាគពិសេស ជាប់ចំណាត់ថ្នាក់លេខ១ ការប្រកួតកីឡាប៊ូល និងប៉េតង់ពានរង្វាន់គរុគុណលើកទី២

Sok Srey Leak — Mon, 26 Dec 2022 01:04:02 +0000

ក្លឹបយោធភូមិភាគពិសេស ឈរលើកំពូលតារាងនៃការប្រកួតកីឡាប៊ូលនិងប៉េតង់កម្ពុជា ដណ្តើមរពានរង្វាន់គរុគុណលើកទី២ ដោយទទួលបានមេដាយមាស១ និង ប្រាក់១ គ្រឿង។

ការប្រកួតថ្ងៃចុងក្រោយ ក្លឹបយោធភូមិភាគពិសេស បានយកឈ្នះ ក្លឹបក្រសួងមហាផ្ទៃ លើវិញ្ញាសាបុរស អាយុ១៨ឆ្នាំឡើង៣នាក់ទល់៣នាក់។ រីឯផ្នែកនារី ចំណាត់ថ្នាក់លេខ១ បានទៅក្លឹបកងយោធពលខេមរៈភូមិន្ទ ដែលមានកីឡាការិនី អ៊ុក ស្រីមុំ ,ស្រាងសុរ៉ាឃីម និង កីឡាការិនី វងចន្ថា ។

ការប្រកួតដែលបានចាប់ផ្តើមឡើងតាំងពីថ្ងៃទី ២៣ធ្នូមកនោះ មានក្លឹប សមាគមចូលរួមចំនួន៦២ ដែលសុទ្ធតែជាជើងខ្លាំងធ្លាប់ដណ្តើមយកចំណាត់ថ្នាក់ និងពានរង្វាន់ជួនអង្គភាពរៀងៗខ្លួន ។

ជាលទ្ធផលថ្ងៃបញ្ចប់ទី២៥ធ្នូម្សិលមិញនេះ មានក្លឹបតែ៧ប៉ុណ្ណោះ ដែលដណ្តើមបានមេដាយមាស រួមមាន៖ ក្លឹបយោធភូមិភាគពិសេស , ក្លឹបមជ្ឈមណ្ឌលខេមរៈភូមិន្ទ មាស១ សំរឹទ្ធិ១ , ក្លឹបកងយោធពលខេមរៈភូមិន្ទ មាស១ សំរឹទ្ធិ១ , កំពង់សំណាញ់ខេត្តកណ្តាល មាស១ , ទីស្តីការគណៈរដ្ឋមន្រ្តី មាស១ , សេនារាជសីអគ្គស្នងការ មាស១ និង ក្លឹប ឥន្ទ្រីយ៍អប់រំ ស.ស.យ.ក ស្រុកថ្មគោល ។

យោងតាមប្រសាសន៍របស់លោកសុខ សូកាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងជាប្រធានសហព័ន្ធកីឡាប៊ូល និងប៉េតង់កម្ពុជាឲ្យដឹងថា “ការប្រកួតកីឡាប៊ូល និងប៉េតង់ពានរង្វាន់គរុគុណ លើកទី២ ឆ្នាំ២០២២ និងខួបអនុស្សាវរីយ៍៣០ឆ្នាំ នៃការបង្កើតសហព័ន្ធកីឡាប៊ូល និងប៉េតង់កម្ពុជា ១៩៩២ – ២០២២” រៀបចំឡើងដើម្បីរំលឹក និងតបស្នងនូវគុណូបការៈដ៏ឧត្តុង្គឧត្តមរបស់សម្ដេចទាំងទ្វេដែលជាស្ថាបនិករបស់សហព័ន្ធ ក៏ដូចជាឥស្សរជននិងអតីតថ្នាក់ដឹកនាំគ្រប់ជាន់ថ្នាក់របស់សហព័ន្ធ ដែលបានលះបង់កម្លាំងកាយចិត្ត ធនធាន និងខិតខំប្រឹងប្រែងក្នុងការកសាង ឱ្យមានវឌ្ឍនភាព និងជោគជ័យរហូតដល់បច្ចុប្បន្ន។

គិតត្រឹម ខែវិច្ឆិកា ឆ្នាំ២០២២ កម្ពុជាទទួលបានមេដាយសរុប មានចំនួន ៣៩៤គ្រឿង ក្នុងនោះ មេដាយមាស ១១៦គ្រឿង មេដាយប្រាក់១៣៨គ្រឿង, និងមេដាយសំរឹទ្ធ១៤០គ្រឿង។ បន្ថែមពីលើនេះ នៅឆ្នាំ២០១៧ សហព័ន្ធកីឡាប៊ូល និងប៉េតង់អន្តរជាតិ (FIPJP) ក៏បានសម្រេចផ្តល់ពានរង្វាន់ “Le Prix Marchel Pagnol” ចំណាត់ថ្នាក់លេខ១ ដល់សហព័ន្ធកីឡាប៊ូល និងប៉េតង់កម្ពុជា ដែលមានស្នាដៃនិងការដឹកនាំល្អជាងគេ នៅទូទាំងពិភពលោក។

ការប្រកួតកីឡាប៊ូល និងប៉េតង់ពានរង្វាន់គរុគុណ លើកទី២នេះ មានប្រតិភូ និងកីឡាករ កីឡាការិនីចូលរួមសរុប ៤៥៩នាក់ មកពីសមាគម និងក្លឹប៦២ ស្មើនឹង១១រាជធានី-ខេត្ត ប្រកួតលើ៧វិញ្ញាសា សរុប៤៣៨ប្រកួត៕

The post ក្លឹបយោធភូមិភាគពិសេស ជាប់ចំណាត់ថ្នាក់លេខ១ ការប្រកួតកីឡាប៊ូល និងប៉េតង់ពានរង្វាន់គរុគុណលើកទី២ appeared first on Kampuchea Thmey Daily.

កីឡាប៉េតង់ Archives - Kampuchea Thmey Daily

ប៊ូល​ និង​ប៉េតង់​ ជា​កីឡា​មួយ​ប្រភេទ​​ពេញ​និយម​លេង​ទាំង​នៅភ្នំពេញ​ និង​តាម​ខេត្ត​

កម្ពុជា បាន​មេដាយ​សំរិទ្ធប៉េតង់ពិភព​លោក ខណៈប្រទេស​អាស៊ាន ៣ ​ឈ្នះ​មេដាយ​មាស​

ប៉េតង់​កម្ពុជា​បាន​ឈ្នះ​​មេដាយ​មាស​២ ប្រាក់​១ សំរិទ្ធ២ ពី​ប៉េតង់ជើង​ឯកអាស៊ី

ក្នុង៥​វិញ្ញាសា កម្ពុជាឈ្នះមេដាយមាស Nations Cup ពី​ការប្រកួតប៉េតង់ពិភពលោក

អ្នកលេងរាល់ថ្ងៃ ដឹងទេតើ ប៊ូល មួយគ្រាប់ៗមានទម្ងន់ប៉ុន្មាន?​

ការប្រកួតប៉េតង់​ជើង​ឯក​ខេត្ត​កំពង់ធំ​ដើម្បីអបអរសាទរ​កីឡាស៊ីហ្គេម

មើលទិដ្ឋភាពទីលានប៉េតង់ស្តង់ដាសម្រាប់ការប្រកួតកីឡាស៊ីហ្គេម

ក្លឹបយោធភូមិភាគពិសេស ជាប់ចំណាត់ថ្នាក់លេខ១ ការប្រកួតកីឡាប៊ូល និងប៉េតង់ពានរង្វាន់គរុគុណលើកទី២

ប៊ូល និងប៉េតង់ ជាកីឡាមួយប្រភេទពេញនិយមលេងទាំងនៅភ្នំពេញ និងតាមខេត្ត

កម្ពុជា បានមេដាយសំរិទ្ធប៉េតង់ពិភពលោក ខណៈប្រទេសអាស៊ាន ៣ ឈ្នះមេដាយមាស

ប៉េតង់កម្ពុជាបានឈ្នះមេដាយមាស២ ប្រាក់១ សំរិទ្ធ២ ពីប៉េតង់ជើងឯកអាស៊ី

ក្នុង៥វិញ្ញាសា កម្ពុជាឈ្នះមេដាយមាស Nations Cup ពីការប្រកួតប៉េតង់ពិភពលោក

អ្នកលេងរាល់ថ្ងៃ ដឹងទេតើ ប៊ូល មួយគ្រាប់ៗមានទម្ងន់ប៉ុន្មាន?

ការប្រកួតប៉េតង់ជើងឯកខេត្តកំពង់ធំដើម្បីអបអរសាទរកីឡាស៊ីហ្គេម