កីឡាប្រដាល់សកល Archives - Kampuchea Thmey Daily

កំពូលអ្នកប្រដាល់ជប៉ុន Inoue បំបាក់កំពូលអ្នកប្រដាល់ Nakatani បន្តកំណត់ត្រាមិនចាញ់ ១៤ ឆ្នាំ

Kosal Sem — Mon, 04 May 2026 06:54:53 +0000

កំពូលអ្នកប្រដាល់សកល ជប៉ុន Naoya Inoue បានបន្តគ្រប់គ្រងខ្សែក្រវាត់ពិភពលោកទម្ងន់ស្រាល និងកាន់កាប់កំណត់ត្រាមិនចាញ់សោះក្នុងរយៈពេល ១៤ ឆ្នាំក្នុងអាជីពខ្លួន បន្ទាប់ពីយកឈ្នះមិត្តរួមជាតិកីឡាករ Junto Nakatani ដោយពិន្ទុនៅទីក្រុង តូក្យូ កាលពីថ្ងៃទី ២ ខែ ឧសភា ឆ្នាំ ២០២៦។

Naoya Inoue

ការប្រកួតនេះត្រូវបានគេចាត់ទុកជាការប្រកួតដ៏ធំបំផុតមួយក្នុងប្រវត្តិសាស្ត្រប្រដាល់សកលជប៉ុន ដោយសារនេះ គឺជាការប៉ះគ្នារវាងកំពូលអ្នកប្រដាល់របស់ ជប៉ុន ពីររូប ដែលសុទ្ធតែមានឈ្មោះ និងចំណាត់ថ្នាក់ល្អបំផុតនៅក្នុងកីឡាប្រយុទ្ធពិភពលោក (Pound-for-pound)។

អ្នកប្រដាល់វ័យ ៣៣ ឆ្នាំ Inoue បានគ្រប់គ្រងស្ថានភាពយ៉ាងល្អក្នុងរយៈពេល ១២ ទឹកពេញ។ ទោះបីជានៅចុងការប្រកួត កីឡាករ Nakatani ព្យាយាមដាក់សម្ពាធមកវិញក៏ដោយ ក៏ Inoue នៅតែគ្រប់គ្រងស្ថានភាពបានល្អ តាមរយៈការបម្លាស់ទី និងវាយដោយភាពវៃឆ្លាត។ ចុងក្រោយ Inoue បានទទួលជ័យជម្នះដោយពិន្ទុ និងបន្តការពារខ្សែក្រវាត់ពិភពលោកទម្ងន់ស្រាលរបស់ខ្លួនបានជោគជ័យ។

Naoya Inoue ប្រកួតទល់នឹង Nakatani

ក្រោយជ័យជម្នះដ៏ធំធេងនេះ Inoue នៅតែបន្តកាន់កាប់កំណត់ត្រាមិនចាញ់សោះក្នុងរយៈពេល ១៤ ឆ្នាំ។ អ្នកប្រដាល់រហស្សនាម Monster វ័យ ៣៣ ឆ្នាំ បានប្រកួតអាជីពតាំងពីឆ្នាំ ២០១២ មកចំនួន ៣៣ ប្រកួត ក្នុងនោះឈ្នះទាំង ៣៣ លើក ហើយបានផ្តួលឱ្យដៃគូសន្លប់ចំនួន ២៧ លើក៕

Naoya Inoue

ប្រែសម្រួល៖ សេម កុសល
ប្រភព៖ BBC

The post កំពូលអ្នកប្រដាល់ជប៉ុន Inoue បំបាក់កំពូលអ្នកប្រដាល់ Nakatani បន្តកំណត់ត្រាមិនចាញ់ ១៤ ឆ្នាំ appeared first on Kampuchea Thmey Daily.

ប្រដាល់សកលកម្ពុជាបើកទំព័រសករាជថ្មី ដោយរៀបចំការប្រកួតកម្រិតអាជីពរាល់ខែ

chean virakbot — Tue, 24 Feb 2026 13:23:17 +0000

ក្រោយពេលមិនសូវមានកម្មវិធីប្រកួតទៀងទាត់អស់រយៈពេលជាច្រើនឆ្នាំ ពេលនេះ សហព័ន្ធកីឡាប្រដាល់សកលកម្ពុជា មានលទ្ធភាពរៀបចំប្រកួតប្រចាំខែដើម្បីអភិវឌ្ឍកីឡាដែលមានតម្លៃជាសកលមួយនេះឈានឡើងមួយកម្រិតទៀត។

លោក ប៊ុយ សុភ័ណ្ឌ

ផែនការប្រកួតកីឡាប្រដាល់សកលប្រចាំខែនេះបានកើតមានឡើង បន្ទាប់ពីសហព័ន្ធទទួលបានដៃគូឧបត្ថម្ភគាំទ្រថ្មី។ លោក ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា មានប្រសាសន៍ថា នៅដើមឆ្នាំ ២០២៦ កីឡាប្រដាល់សកលកម្ពុជាបើកទំព័រប្រវត្តិសាស្ត្រថ្មីដោយសហព័ន្ធបានសហការជាមួយក្រុមហ៊ុន វឌ្ឍនៈ ដើម្បីរៀបចំការប្រកួតកីឡាប្រដាល់សកលអាជីពគឺសង្វៀន«Dragon the Golden Ring»។ កម្មវិធីប្រកួតរៀបចំជារៀងរាល់ខែដែលចាប់ផ្តើមពីថ្ងៃទី២៨ ខែកុម្ភៈ រហូតដល់ខែធ្នូ ឆ្នាំ ២០២៦។

លោកមានប្រសាសន៍ថា ៖«នេះពិតជាមានសារសំខាន់ខ្លាំងមែនទែន ពីព្រោះកីឡាប្រដាល់សកលគឺជាកីឡាកម្រិតអូឡាំពិក ហើយយើងទទួលបានគាំទ្រច្រើនយ៉ាងខ្លាំង។ ការប្រកួតនេះ យើងផ្តល់ឱកាសឲ្យកីឡាករកម្រិតអាជីព និងកីឡាករវ័យក្មេងបានចូលរួមប្រកួត។ ទាំងនេះបានផ្តល់ឲ្យយើងបានត្រៀមខ្លួនសម្រាប់ការប្រកួតអន្តរជាតិនានា ហើយក៏បានទាំងអភិវឌ្ឍយុវជនថែមទៀត។ ជាពិសេសនៅឆ្នាំ ២០២៦ យើងមានការប្រកួតអន្តរជាតិច្រើន ដូចជាកីឡាទ្វីបអាស៊ី នៅប្រទេសជប៉ុន និងការប្រកួតអាស៊ីជាច្រើនទៀត»។

លោកប្រធានសហព័ន្ធកីឡាប្រដាល់សកលរូបនេះមានសុទិដ្ឋិថា កីឡាប្រដាល់សកលកម្ពុជានឹងឈានទៅមុខមួយកម្រិតទាំងថ្នាក់តំបន់ និងពិភពលោក បន្ទាប់ពីទទួលបានការឧបត្ថម្ភគាំទ្រឲ្យមានការប្រកួតទៀងទាត់។

អស់រយៈពេលជាច្រើនឆ្នាំមកហើយ ចាប់តាំងពីសង្វៀនប្រដាល់គុនខ្មែរនៅតាមបណ្តាស្ថានីយ៍ទូរទស្សន៍លែងដាក់កីឡាប្រដាល់សកលចូលជាមួយបានធ្វើឲ្យកីឡាករ កីឡាការិនីកម្ពុជាមិនសូវសកម្មភាពឡើងសង្វៀន។ កីឡាករ កីឡាការិនីប្រដាល់សកលខ្លះផ្លាស់ទៅហ្វឹកហាត់ប្រដាល់គុនខ្មែរ ហើយអ្នកខ្លះទៀតបន្តនៅហ្វឹកហាត់ តែគ្មានការប្រកួត។ ពួកគេមានកម្មវិធីប្រកួតមួយឆ្នាំម្តង ឬពីរដងប៉ុណ្ណោះ។ សូមបញ្ជាក់ថា ប្រដាល់សកលជាកីឡាអូឡាំពិកដែលមានការប្រកួតផ្លូវការគ្រប់កម្រិតទាំងតំបន់ ទ្វីប និងពិភពលោក៕

អត្ថបទ៖ វិរបុត្រ

The post ប្រដាល់សកលកម្ពុជាបើកទំព័រសករាជថ្មី ដោយរៀបចំការប្រកួតកម្រិតអាជីពរាល់ខែ appeared first on Kampuchea Thmey Daily.

ស្តេចប្រដាល់ ហ្វីលីពីន Pacquiao នឹងឡើងសង្វៀនជាថ្មីជួបកីឡាកររុស្ស៊ី Provodnikov

Kosal Sem — Wed, 18 Feb 2026 09:23:18 +0000

ស្តេចប្រដាល់ហ្វីលីពីន កីឡាករ Manny Pacquiao នឹងឡើងសង្វៀនជាថ្មី ដោយជួបប្រកួតជាមួយអតីតម្ចាស់ខ្សែក្រវាត់ពិភពលោកកីឡាករ Ruslan Provodnikov ក្នុងការប្រកួតលក្ខណៈសម្តែង (exhibition) នៅថ្ងៃទី ១៨ ខែមេសា ឆ្នាំ ២០២៦ ក្នុងទីក្រុង Las Vegas សហរដ្ឋអាមេរិក។

Pacquiao អាយុ ៤៧ ឆ្នាំ បានបញ្ចប់ការចូលនិវត្តន៍រយៈពេល ៤ ឆ្នាំរបស់ខ្លួន ដោយឡើងប្រកួតឡើងវិញ ជាមួយម្ចាស់ខ្សែក្រវាត់ WBC ប្រភេទ welterweight កីឡាករ Mario Barrios កាលពីខែ កក្កដា ឆ្នាំ ២០២៥ បានបញ្ចប់ទៅដោយស្មើគ្នា។ ទោះបីជា Pacquiao បានអំពាវនាវឲ្យការប្រកួតនោះធ្វើឡើងវិញម្តងទៀតក៏ដោយ ក៏ម្ចាស់ខ្សែក្រវាត់ពិភពលោក ៨ ខ្សែរូបនេះ បានប្តូរទិសដៅមកចូលរួមការប្រកួតលក្ខណៈពិព័រណ៌ជំនួសវិញ។

មុនការប្រកួតទល់នឹងអ្នកប្រដាល់ រស្ស៊ី វ័យ ៤២ ឆ្នាំ ដែលធ្លាប់ប្រកាសចូលនិវត្តន៍រួចម្តងដែរកាលពីឆ្នាំ ២០១៦ កីឡាករ Pacquiao បាននិយាយដូច្នេះ ថា៖ «ការគាំទ្រពីប្រទេសរបស់ខ្ញុំ និងអ្នកគាំទ្ររបស់ខ្ញុំនៅជុំវិញពិភពលោក វាបានជួយបន្តជម្រុញនូវឆន្ទៈរបស់ខ្ញុំ។ ខ្ញុំកំពុងត្រឡប់មកវិញ ដើម្បីផ្តល់ឱ្យពួកគេនូវការវ៉ៃដ៏អស្ចារ្យ។ ខ្ញុំបានត្រៀមខ្លួនរួចរាល់ហើយ។ ការត្រឡប់ទៅ Las Vegas ជាថ្មី ពិតជាមានអត្ថន័យធំធេងណាស់សម្រាប់ខ្ញុំ»។

គួរបញ្ជាក់ជាថ្មី ថា ការប្រកួតរវាងអ្នកប្រដាល់ជើងចាស់ទាំង ២ នឹងធ្វើឡើងនៅទីក្រុង Las Vegas នាថ្ងៃទី ១៨ ខែ មេសា ឆ្នាំ ២០២៦ ដោយការប្រកួតធ្វើឡើងលក្ខណៈពិព័រណ៍ ប្រកួតចំនួន ១០ ទឹក៕

ប្រែសម្រួល៖ សេម កុសល
ប្រភព៖ BBC

The post ស្តេចប្រដាល់ ហ្វីលីពីន Pacquiao នឹងឡើងសង្វៀនជាថ្មីជួបកីឡាកររុស្ស៊ី Provodnikov appeared first on Kampuchea Thmey Daily.

សហព័ន្ធប្រដាល់សកល ប្រកាសលក់អាវយកថវិកាដែលលក់បានទៅជួយវីរកងទ័ព និងជនភៀសសឹក

Sina Noun — Mon, 15 Dec 2025 02:20:40 +0000

សហព័ន្ធប្រដាល់សកល បានប្រកាសលក់អាវមួយក្នុងតម្លៃ ៥ដុល្លារស្របពេលថវិកាដែលលក់បាននេះនឹងយកទៅបូកបញ្ចូលជាមួយមូលនិធិប្រដាល់សកលដើម្បីយកទៅជួយដល់វីរកងទ័ព រួមនិងជនភៀសសឹកដែលកំពុងការពារបូរភាពទឹកដី និងជួបការលំបាកនៅពេលនេះ។

ការប្រកួតប្រដាល់សកល

នេះបើតាមការប្រកាសរបស់សហព័ន្ធប្រដាល់សកល បានបញ្ជាក់ដែរថា សហព័ន្ធបានរចនាអាវយឺតដែលមានលក្ខណៈសំគាល់ខាងផ្នែកប្រដាល់សកលដើម្បីលក់ជូនអ្នកគាំទ្រ ឬមហាជនទូទៅដែលមានបំណងចង់ចូលរួមជាមួយសហព័ន្ធ។ អាវមួយសហព័ន្ធលក់ត្រឹមតែ ៥ដុល្លារនោះទេហើយថវិកាដែលទទួលបាននេះនឹងបញ្ចូលជាមួយមូលនិធិប្រដាល់សកលដើម្បីយកទៅជួយវីរកងទ័ព និងជនភៀសសឹកតាមបណ្ដោយព្រំដែន។

មូលនិធិប្រដាល់សកល

ចំពោះអ្នកចង់ទិញអាវនេះអាចទិញនៅសាលហ្វឹកហាត់ប្រដាល់សកលក្នុងពហុកីឡដ្ឋានជាតិ ចាប់ពីថ្ងៃទី២១ ដល់ ២៦ ខែធ្នូ ឆ្នាំ២០២៥ ឬអញ្ចើញទៅសាលហ្វឹកហាត់កីឡាការ៉ាតេនៅក្នុងសកលវិទ្យាល័យភូមិន្ទភ្នំពេញតែម្ដងអំឡុងពេលសហព័ន្ធរៀបចំការប្រកួតជ្រើសរើសជើងឯកថ្នាក់ជាតិ ចាប់ពីថ្ងៃទី២៣ ដល់ ២៦ ខែធ្នូ ២០២៥។

លោក ប៊ុយ សុភ័ណ្ឌ (អាវស)

បញ្ជាក់ជាថ្មី ថាថវិកាថដែលលក់បាននេះនឹងយកទៅបញ្ចូលជាមួយមូលនិធិប្រដាល់សកលដើម្បីឧបត្ថម្ភដល់វីរកងទ័ពដែលកំពុងការពារបូរណភាពទឹកដីពីសត្រូវឈ្លានពានសៀមនៅតាមបណ្ដោយព្រំដែន។ ប្រសិនបើមហាជនចង់ទិញអាវអាចទំនាក់ទំនងទៅលេខលោក ប៊ុយ សុភ័ណ្ឌ (012 887 604) ប្រធានសហព័ន្ធកីឡាប្រដាល់សកលកម្ពុជា ឬ លោក សំ ពិសិដ្ឋ (086 875 361) អគ្គហេរញ្ញិកសហព័ន្ធ៕

អត្ថបទដោយ៖ នួន ស៊ីណា

The post សហព័ន្ធប្រដាល់សកល ប្រកាសលក់អាវយកថវិកាដែលលក់បានទៅជួយវីរកងទ័ព និងជនភៀសសឹក appeared first on Kampuchea Thmey Daily.

កំពូលអ្នកប្រដាល់ជប៉ុន Naoya Inoue កំពុងកាន់កំណត់ត្រា មិនចាញ់សោះរយៈពេល ១៣ ឆ្នាំ

Kosal Sem — Wed, 22 Oct 2025 01:05:52 +0000

នៅក្នុងប្រទេស ជប៉ុន ក្រៅពីសម្បូរធនធានកីឡាករ ឃីគបុកស៊ីង ពួកគេក៏ល្បីខ្លាំងផងដែរ អំពីកីឡាករសកលឆ្នើមៗលំដាប់ពិភពលោក។ ជាក់ស្តែង ពួកគេមានកីឡាករប្រដាល់សកលដ៏ល្បីម្នាក់ គឺកីឡាករ Naoya Inoue ដែលកំពុងកាន់កំណត់ត្រាប្រកួតរយៈពេល ១៣ ឆ្នាំចុងក្រោយមិនចាញ់សោះ។

កីឡាករ Naoya Inoue

កីឡាករ Naoya ដែលកើតនៅថ្ងៃ១០ មេសា ឆ្នាំ១៩៩៣ ជាអ្នកប្រដាល់សកលអាជីព បានចាប់ផ្តើមប្រកួតប្រដាល់សកលស្ម័គ្រចិត្តពីឆ្នាំ២០១០ ដល់២០១២ ដែលធ្លាប់ប្រកួតក្នុងព្រឹត្តិការណ៍សំខាន់ៗជាច្រើនមានដូចជា ជើងឯកយុវជនអាស៊ី ជើងឯកយុវជនពិភពលោក ជើងឯកពិភពលោក AIBA និងជម្រុះតំបន់អាស៊ីដើម្បីព្រឹត្តិការណ៍កីឡាអូឡាំពិក។ នៅចុងឆ្នាំ២០១២ រូបគេបានចាប់ផ្តើមប្រកួតប្រដាល់សកលអាជីព ហើយប្រកួតដំបូងរូបគេបានផ្តួលកីឡាករ Crison Omayao ឲ្យសន្លប់ក្នុងទឹកទី៤។

គិតតាំងពីឆ្នាំ២០១២ ដល់ខែ តុលា ឆ្នាំ២០២៥ ជើងខ្លាំង Inoue បានប្រឡូកអាជីពប្រដាល់រយៈពេល ១៣ ឆ្នាំហើយ ដោយឡើងសង្វៀន ៣១ លើក ក្នុងនោះជាលទ្ធផលឈ្នះទាំង ៣១ លើក និងផ្ដួលដៃគូឱ្យបោះបង់ការប្រកួតចំនួន ២៧ លើក។

កីឡាករ Naoya Inoue

ឆ្លងកាត់រយៈពេល ១៣ ឆ្នាំ អ្នកប្រដាល់ ជប៉ុន វ័យ ៣២ ឆ្នាំ ប្រមូលបានខ្សែក្រវាត់លំដាប់ពិភពលោកចំនួន ១២ ខ្សែ រួមមានខ្សែក្រវាត់ WBA (Unified) bantamweight, WBA (Regular) bantamweight, WBO super bantamweight, IBF super bantamweight, WBC super bantamweight, WBA (Super) super bantamweight, WBO bantamweight, IBF bantamweight, WBC bantamweight, WBA (Super) bantamweight, WBO junior bantamweight និងខ្សែក្រវាត់ WBC light flyweight។

ទន្ទឹមនឹងសមត្ថភាពដ៏ល្អបែបនេះ កាលពីឆ្នាំ២០២៣ កំពូលអ្នកប្រដាល់អាស៊ី Manny Pacquiao ធ្លាប់បានលើកសរសើរយ៉ាងខ្លាំងពីសមត្ថភាពដ៏អស្ចារ្យរបស់ Inoue។ វីរបុរសហ្វីលីពីនបានសរសើរថា ៖«Inoue មានល្បឿនដ៏អស្ចារ្យ និងកណ្តាប់ដៃមានកម្លាំងខ្លាំង។ គាត់ជាកីឡាករប្រដាល់ដ៏ពិសេសម្នាក់»។

Inoue មានរហស្សនាមមួយទៀត ត្រូវបានគេហៅថា “Monster” នោះគឺដោយសារតែអំណាចកណ្តាប់ដៃដ៏ពិសេសរបស់គាត់ ដែលមានភាគរយក្នុងការផ្តួលដៃគូរហូតដល់ទៅ ៨៨.៨៨%។ តាមរយៈភាពអំណោយផល ក៏ដូចជាចំណុចពិសេសត្រង់កណ្តាប់ដៃបែបនេះ បានធ្វើឱ្យ Inoue មិនដែលចាញ់សោះចាប់តាំងពីចាប់អាជីពជាកីឡាករប្រដាល់សកល ហើយខ្សែក្រវាត់របស់គេនៅតែមិនទាន់បាត់បង់មួយខ្សែណា ទោះបីជាមានកីឡាករជាច្រើនចូលមកដណ្តើមក៏ដោយ៕

កីឡាករ Naoya Inoue

ប្រែសម្រួល៖ សេម កុសល

The post កំពូលអ្នកប្រដាល់ជប៉ុន Naoya Inoue កំពុងកាន់កំណត់ត្រា មិនចាញ់សោះរយៈពេល ១៣ ឆ្នាំ appeared first on Kampuchea Thmey Daily.

កក្រើកទៀត! ស្តេចប្រដាល់ ហ្វីលីពីន Pacquiao ប្រកាសឡើងសង្វៀនម្តងទៀតចុងឆ្នាំនេះ

Kosal Sem — Mon, 18 Aug 2025 09:29:59 +0000

ស្តេចប្រដាល់ ហ្វីលីពីន កីឡាករ Manny Pacquiao បានប្រកាសអំពីការឡើងសង្វៀនប្រដាល់ជាថ្មីម្តងទៀតនៅចុងឆ្នាំ ២០២៥ នេះ បន្ទាប់ពីលោកទើបតែប្រកួតស្មើគ្នា ក្នុងការដណ្តើមខ្សែក្រវាត់ WBC ទល់នឹងអ្នកប្រដាល់ អាមេរិក Mario Barrios កាលពីថ្ងៃទី ១៩ ខែ កក្កដា ឆ្នាំ ២០២៥។

កីឡាករ Manny Pacquiao ប្រកួតទល់នឹង Mario Barrios

ថ្លែងប្រាប់អ្នកសារព័ត៌មានកាលពីពេលថ្មីៗនេះ អ្នកប្រដាល់វ័យ ៤៦ ឆ្នាំបានបញ្ជាក់ថា៖ «គាត់នឹងឡើងសង្វៀនម្តងទៀតនៅឆ្នាំនេះក្នុងខែ ធ្នូ»។ ទោះបីជាយ៉ាងណា Pacquiao មិនទាន់បានបញ្ជាក់ថា ដៃគូរបស់គាត់ជានរណានៅឡើយទេ ប៉ុន្តែតាមតម្រុយខ្លះៗ បច្ចុប្បន្នមានកីឡាករ ២ នាក់ ដែលអាចជួបកីឡាករម្ចាស់ខ្សែក្រវាត់ពិភពលោក ១២ ខ្សែរូបនេះ ក្នុងនោះមានអតីតដៃគូចាស់ Mario Barrios និងកីឡាករអាមេរិកវ័យ ២៩ ឆ្នាំ Rolando Romero។

កីឡាករ Rolando Romero

គួរឱ្យដឹងថា Pacquiao ធ្លាប់បានប្រកាសចូលនិវត្តន៍ពីអាជីពជាកីឡាករប្រដាល់រួចម្តងហើយ បន្ទាប់ពីគាត់ប្រកួតលើកចុងក្រោយ បរាជ័យក្រោមថ្វីដៃកីឡាករសញ្ជាតិ គុយបា Yordenis Ugas នៅរដ្ឋ Las Vegas ទឹកដី សហរដ្ឋអាមេរិក ប៉ុន្តែនៅឆ្នាំ ២០២៥ លោកបានសម្រេចចិត្តវិលឡើងសង្វៀនឡើងវិញ ដោយប្រកួតស្មើជាមួយ Mario Barrios ហើយក្រោយការប្រកួតនេះបញ្ចប់ គាត់បានបង្ហើបពីផែនការរបស់គាត់ថា នឹងត្រៀមឡើងប្រកួតលក្ខណៈអាជីពឡើងវិញ នាពេលអនាគតជាបន្តបន្ទាប់ទៀត៕

កីឡាករ Manny Pacquiao

ប្រែសម្រួល៖ សេម កុសល
ប្រភព៖ YB

The post កក្រើកទៀត! ស្តេចប្រដាល់ ហ្វីលីពីន Pacquiao ប្រកាសឡើងសង្វៀនម្តងទៀតចុងឆ្នាំនេះ appeared first on Kampuchea Thmey Daily.

ថ្ងៃស្អែក ឈុត ចិត្រា ប៉ះកីឡាករជប៉ុន Hirota ក្នុងការប្រកួតប្រដាល់សកល

chean virakbot — Sat, 29 Mar 2025 02:49:49 +0000

វាជារឿងដ៏កម្រមួយដែលមានកីឡាករប្រដាល់សកលកម្ពុជា ឈុត ចិត្រា បានចេញទៅប្រកួតនៅក្រៅប្រទេសជាមួយកីឡាករ Hirota Issei នៅប្រទេសជប៉ុន នាថ្ងៃអាទិត្យ ទី៣០ ខែមីនា ឆ្នាំ២០២៥។

ការប្រកួតនេះក្នុងកម្មវិធី Boxing to the Future ដែលជាការប្រកួតលក្ខណៈអាជីពដោយមានជាច្រើនគូ។ កីឡាករកម្ពុជា ឈុត ចិត្រា ត្រូវប៉ះកីឡាករម្ចាស់ផ្ទះ Hirota Issei សម្រាប់ការប្រកួតប្រដាល់សកលអាជីព៦ទឹក ដែលអាចចាត់ទុកជាបទពិសោធថ្មីដ៏ល្អសម្រាប់កីឡាករកម្ពុជាក្នុងការទទួលបានបទពិសោធថ្មីក្រៅប្រទេស ក៏ដូចជាបង្កើនលក្ខណៈអាជីព។

ជប៉ុន ជាប្រទេសមួយដែលសំបូរធនធានកីឡាករ កីឡាការិនីប្រដាល់សកល ហើយមានកីឡាករជាច្រើនបានឈានដល់កម្រិតកំពូលលំដាប់ពិភពលោក និងបានឈ្នះខ្សែក្រវាត់ប្រដាល់សកលពិភពលោកជាច្រើន។

ដោយឡែកកម្ពុជាមិនសូវមានសកម្មភាពប្រដាល់សកលទេនៅក្នុងប្រទេសទាំងការប្រកួតលក្ខណៈស្ម័គ្រចិត្ត និងអាជីព ប៉ុន្តែសហព័ន្ធប្រដាល់សកលកម្ពុជាបានប្រឹងប្រែងបញ្ជូនកីឡាករ កីឡាការិនីទៅប្រកួតនៅក្រៅប្រទេសជាច្រើន៕

អត្ថបទ៖ វីរបុត្រ

The post ថ្ងៃស្អែក ឈុត ចិត្រា ប៉ះកីឡាករជប៉ុន Hirota ក្នុងការប្រកួតប្រដាល់សកល appeared first on Kampuchea Thmey Daily.

មជ្ឈដ្ឋានប្រដាល់សកល៖ សម្ដែងការអបអរឡើងវិញក្រោយដាក់ឲ្យប្រកួតកីឡាអូឡាំពិកនៅសហរដ្ឋអាមេរិក

Sina Noun — Fri, 21 Mar 2025 06:58:28 +0000

មជ្ឈដ្ឋានប្រដាល់សកលជុំវិញពិភពលោក រួមទាំងសហព័ន្ធប្រដាល់កម្ពុជាផងនោះ បានសម្ដែងការត្រេកអរជាខ្លាំងក្រោយប្រភេទកីឡាមួយនេះត្រូវដាក់បញ្ចូលឲ្យប្រកួតឡើងវិញនៅព្រឹត្តិការណ៍កីឡាអូឡាំពិកឯសហរដ្ឋអាមេរិក ឆ្នាំ២០២៨ ខាងមុខនេះ។

លោក ប៊ុយ សុភ័ណ្ឌ ប្រធានសហព័ន្ធប្រដាល់សកលកម្ពុជា បានឲ្យដឹងថា ការសម្រេចដាក់បញ្ចូលឲ្យប្រដាល់សកលបានប្រកួតឡើងវិញនៅក្នុងព្រឹត្តិការណ៍កីឡាអូឡាំពិក ឆ្នាំ២០២៨ ខាងមុខនេះគឺរឿងសំខាន់សម្រាប់សហព័ន្ធជុំវិញពិភពលោក។

ព្រឹត្តិការណ៍អូឡាំពិកជាការប្រកួតកម្រិតខ្ពស់បំផុត និងជាក្ដីស្រមៃរបស់កីឡាករ កីឡាការិនីគ្រប់រូបចង់ចូលរួមបានប្រកួតប្រជែង ពិសេសការដណ្ដើមមេដាយក្នុងកម្មវិធីនេះជូនប្រទេសជាតិរបស់ខ្លួន។ មួយវិញទៀតការដាក់បញ្ចូលឡើងវិញនេះនឹងមានភាពប្រសើរឡើងវិញតាមរយៈការឧបត្ថម្ភគាំទ្រពីអូឡាំពិកលើការអភិវឌ្ឍន៍វិស័យកីឡាប្រដាល់កាន់តែមានភាពល្បីល្បាញឈានទៅមុខ។

បញ្ជាក់ដែរថា ប្រភេទកីឡាប្រដាល់សកលត្រូវបានដាក់បញ្ចូលឲ្យប្រកួតឡើងនៅនៅព្រឹត្តិការណ៍កីឡាអូឡាំពិក ឯសហរដ្ឋអាមេរិក ឆ្នាំ២០២៨ បន្ទាប់ពីគណៈកម្មាធិការអូឡាំពិកអន្តរជាតិ (IOC) បានសម្រេចកាលពីថ្ងៃទី២០ ខែមីនា ឆ្នាំ២០២៥ នេះ៕

អត្ថបទដោយ៖ នួន ស៊ីណា

The post មជ្ឈដ្ឋានប្រដាល់សកល៖ សម្ដែងការអបអរឡើងវិញក្រោយដាក់ឲ្យប្រកួតកីឡាអូឡាំពិកនៅសហរដ្ឋអាមេរិក appeared first on Kampuchea Thmey Daily.

កីឡាប្រដាល់សកល Archives - Kampuchea Thmey Daily

កំពូល​អ្នក​ប្រដាល់ជប៉ុន Inoue បំបាក់កំពូលអ្នកប្រដាល់ Nakatani បន្តកំណត់ត្រាមិនចាញ់ ១៤ ឆ្នាំ

ប្រដាល់សកល​កម្ពុជា​បើក​ទំព័រ​សករាជ​ថ្មី ដោយ​រៀបចំ​ការ​ប្រកួត​កម្រិត​អាជីព​​រាល់​ខែ​​

ស្តេចប្រដាល់ ហ្វីលីពីន Pacquiao នឹងឡើងសង្វៀនជាថ្មីជួបកីឡាករ​រុស្ស៊ី Provodnikov

សហព័ន្ធ​ប្រដាល់​សកល​ ប្រកាស​លក់​អាវយក​ថវិកា​ដែល​លក់​បាន​​ទៅ​ជួយ​វីរកងទ័ព​ និង​ជន​ភៀសសឹក​

កំពូល​អ្នក​ប្រដាល់ជប៉ុន Naoya Inoue កំពុង​កាន់​កំណត់ត្រា មិនចាញ់សោះរយៈពេល ១៣ ឆ្នាំ

កក្រើកទៀត! ស្តេចប្រដាល់ ហ្វីលីពីន Pacquiao ប្រកាសឡើងសង្វៀនម្តងទៀតចុងឆ្នាំនេះ

ថ្ងៃ​ស្អែក ឈុត ចិត្រា ប៉ះ​កីឡាករ​ជប៉ុន Hirota ក្នុង​ការ​ប្រកួត​ប្រដាល់​សកល

កំពូលអ្នកប្រដាល់ជប៉ុន Inoue បំបាក់កំពូលអ្នកប្រដាល់ Nakatani បន្តកំណត់ត្រាមិនចាញ់ ១៤ ឆ្នាំ

ប្រដាល់សកលកម្ពុជាបើកទំព័រសករាជថ្មី ដោយរៀបចំការប្រកួតកម្រិតអាជីពរាល់ខែ

ស្តេចប្រដាល់ ហ្វីលីពីន Pacquiao នឹងឡើងសង្វៀនជាថ្មីជួបកីឡាកររុស្ស៊ី Provodnikov

សហព័ន្ធប្រដាល់សកល ប្រកាសលក់អាវយកថវិកាដែលលក់បានទៅជួយវីរកងទ័ព និងជនភៀសសឹក

កំពូលអ្នកប្រដាល់ជប៉ុន Naoya Inoue កំពុងកាន់កំណត់ត្រា មិនចាញ់សោះរយៈពេល ១៣ ឆ្នាំ

ថ្ងៃស្អែក ឈុត ចិត្រា ប៉ះកីឡាករជប៉ុន Hirota ក្នុងការប្រកួតប្រដាល់សកល