កូនកណ្ដុរ Archives - Kampuchea Thmey Daily

អ្នកវិទ្យាសាស្ត្រជោគជ័យបង្កើតសត្វកណ្ដុរ ទោះយកហ្សែនឈ្មោលដូចគ្នា

Boa Sokunveary — Fri, 10 Mar 2023 09:56:49 +0000

អ្នកវិទ្យាសាស្ត្របានបង្កាត់សត្វកណ្ដុរដោយប្រើស៊ុតដែលមានប្រភពចេញពីកោសិកាឈ្មោល ជារបកគំហើញមួយអាចត្រួសត្រាយផ្លូវឱ្យបុរសមានកូននៅថ្ងៃអនាគត ។

ការស្រាវជ្រាវដឹកនាំដោយសាស្ត្រាចារ្យ Katsuhiko Hayashi នៃសាកលវិទ្យាល័យអូសាកានេះ បានលើកមកពណ៌នាក្នុងវិទ្យាស្ថាន Crick កាលពីថ្ងៃពុធ ទី០៨ កន្លងផុតទៅ ។

ក្នុងដំណើរការនោះអ្នកស្រាវជ្រាវអះអាងថាពួកគេបង្កើតពងបានជោគជ័យដោយបង្វែរគូក្រូម៉ូសូម XY ពីកោសិកាស្បែករបស់សត្វកណ្ដុរឈ្មោលទៅជាគូក្រូម៉ូសូម XX ញី តាមរបៀបបំប្លែងកោសិកាស្បែកទៅជាស្ទីមសែល រួចលុបក្រូម៉ូសូម Y ចម្លងក្រូម៉ូសូម X ចូល ហើយផ្គូផ្គងច្បាប់ចម្លងជាមួយក្រូម៉ូសូម X ដើមវិញ ។ បន្ទាប់ពីបង្កើតពងដោយជោគជ័យ អ្នកវិទ្យាសាស្ត្របានយកមេជីវិតកណ្ដុរឈ្មោលមួយទៀតដាក់បញ្ចូលជាការស្រេច ។

តិចនិកខាងលើបានបង្កើតកូនកណ្ដុរ ៧ ដែលមានសុខភាពល្អ និងអាយុវែងធម្មតាដូចកណ្ដុរទូទៅ ដូចនេះគេជឿថានាថ្ងៃអនាគតវាអាចជួយត្រួសត្រាយផ្លូវសម្រាប់បុរសស្រលាញ់បុរសឲ្យមានកូនដែរ ។

ដោយឡែកសាស្ត្រាចារ្យ George Daley នៃសាកលវិទ្យាល័យវេជ្ជសាស្ត្រហាវ៉ាដ ដែលមិនមានចំណែកក្នុងការស្រាវជ្រាវបានបញ្ចេញមតិថា “គួរឲ្យចាប់អារម្មណ៍ ប៉ុន្តែបើប្រើតិចនិកនេះទៅលើមនុស្សអាចពិបាកជាងធ្វើលើកណ្ដុរ” ៕

ប្រែសម្រួល ៖ វារី

ប្រភព ៖ Skynews

ចុចអាន ៖ ស៊ុតសកំពុងក្លាយជាដំណោះស្រាយបញ្ហាមីក្រូប្លាស្ទិក ក្នុងមហាសមុទ្រ

The post អ្នកវិទ្យាសាស្ត្រជោគជ័យបង្កើតសត្វកណ្ដុរ ទោះយកហ្សែនឈ្មោលដូចគ្នា appeared first on Kampuchea Thmey Daily.

តើអ្វីទៅជាកូនកណ្តុរដំបូង នៃដុំមហារីក

Sorn Phanith — Thu, 04 Feb 2021 02:47:27 +0000

ជាមួយនិងភាពជឿនលឿនជាលំដាប់នៃបច្ចេកវិទ្យាព្យាបាលជំងឺមហារីក ក្នុងពេលបច្ចុប្បន្ន បានធ្វើឲ្យការព្យាបាល អោយជាសះស្បើយ និងបង្កើនគុណភាពជីវិតអ្នកជំងឺ មានកម្រិតខ្ពស់។

ការប្រើឧបករណ៍ Gamma Probe សម្រាប់រាវរកកូនកណ្តុរដំបូង របស់ដុំមហារីក មានតួនាទីសំខាន់ណាស់ក្នុងការ កំណត់ដំណាក់កាលជំងឺមហារីក ផ្តល់ផែនការព្យាបាល ព្រមទាំងបង្កើនគុណភាពជីវិតអ្នកជំងឺ តាមរយៈការកាត់បន្ថយផលវិបាកក្រោយវះកាត់។

១) តើអ្វីទៅជាកូនកណ្តុរដំបូងនៃដុំមហារីក?

កូនកណ្ដុរដំបូងគេបង្អស់ដែលទទួលច្រោះទឹករងៃ ពីដំបន់ដែលមានដុំសាច់មហារីក។

២) តើត្រូវធ្វើដូចម្ដេច ទើបអាចកំណត់ថា កូនកណ្តុរដំបូងមានកោសិកាមហារីកឬទេ?

ជាបឋម គ្រូពេទ្យត្រូវចាក់ថ្នាំនៅជុំវិញដុំមហារីក និងចាំមួយរយៈដើម្បីឲ្យជាតិថ្នាំជ្រាបទៅដល់កូនកណ្តុរដំបូង។ បន្ទាប់មកទៀត ឧបករណ៍ Gamma Probe រាវរកកូនកណ្តុរដំបូង ដើម្បីជំនួយដល់គ្រូពេទ្យវះកាត់យកកូនកណ្តុរទាំងនោះចេញ និងវិភាគមើលភ្លាមៗថា តើមានកោសិកាមហារីករាលដាលទៅដល់កូនកណ្តុរទាំងនោះឬទេ?

៣) តើអ្វីជាសារៈសំខាន់នៃការរកកូនកណ្តុរដំបូងនៃដុំមហារីក?

ចំពោះជំងឺមហារីកនៅដំណាក់កាលដំបូងមួយចំនួន ជាពិសេសមហារីកសុដន់ និងមហារីកស្បែក(Melanoma) ការព្យាបាលដោយវះកាត់ គឺជាគន្លឹះ ក្នុងការទទួលបានការជាសះស្បើយ។ការវះកាត់ត្រូវធ្វើឡើងដោយវះយកដុំមហារីកចេញ និងវះយកប្រព័ន្ធកូនកណ្ដុរដែលពាក់ព័ន្ធចេញទាំងអស់ដើម្បីធានាឲ្យបានអត្រាជាសះស្បើយខ្ពស់។

ថ្វីត្បិតតែ ការវះយកប្រព័ន្ធកូនកណ្ដុរ ដែលពាក់ព័ន្ធចេញទាំងអស់នេះ មានសារៈសំខាន់មែន តែវាអាចបង្កជាផលវិបាកមួយចំនួនដល់អ្នកជំងឺដូចជា ការហើមអវយវៈដោយចាល់ទឹករងៃ(lymphedema) ការចុះថយមុខងារអវយវៈដែលហើម និងការឈឺចាប់។ ហេតុដូចនេះ គ្រូពេទ្យត្រូវកំណត់ឲ្យដឹងមុនថា តើមានការរាលដាលកោសិកាមហារីកដល់កូនកណ្តុរនៅតំបន់ដុំសាច់មហារីកឬទេ ព្រោះថាបើគ្មានការរាលដាលទេ គ្រូពេទ្យអាចរក្សាទុកកូនកណ្ដុរទាំងនោះបាន និងអាចបង្ការផលវិបាកដែលបានរៀបរាប់ខាងលើ។

ជាមួយនិងឧបករណ៍ Gamma Probe ថ្មីនេះ ការព្យាបាលជំងឺមហារីកកាន់តែទទួលបានប្រសិទ្ធភាពខ្ពស់ ដែលជាតម្រូវការចាំបាច់ និងជាបំណងប្រាថ្នារបស់ក្រុមគ្រូពេទ្យឯកទេសយើង៕

អត្ថបទ៖ រស្មី

សូមចុចអាន៖ យល់ដឹងពី រោគសញ្ញា និងមូលហេតុ ដែលបង្កជាជំងឺមហារីកថ្លើម

The post តើអ្វីទៅជាកូនកណ្តុរដំបូង នៃដុំមហារីក appeared first on Kampuchea Thmey Daily.

សុខៗឡើងកូនកណ្ដុរនៅលើ ក គួរឲ្យបារម្ភអត់?

Sorn Phanith — Thu, 17 Dec 2020 03:48:47 +0000

ម៉ាក់ៗជាច្រើនប្រាកដជាកង្វល់ចិត្តចំពោះបញ្ហាកូនកណ្ដុរនៅលើ ក ជាពិសេសអ្នកមានកូនតូចៗ។ វេជ្ជបណ្ឌិត ផ្នែកទូទៅ លី ឫទ្ធីគុណ បានឲ្យដឹងថា កូនកណ្ដុរនោះ គឺជាក្រពេញរាងដូចសណ្ដែកតូចមួយអាចនៅជាប់ក ជុំវិញក ឬរត់មកក្រោយគមត្រចៀក។

លោកបន្ថែមថា កូនកណ្ដុរនោះជាផ្នែកសំខាន់របស់ប្រព័ន្ធភាពស៊ាំ ព្រោះវាជួយការពាររាងកាយប្រយុទ្ធប្រឆាំងនឹងមេរោគ និងជំងឺផ្សេងៗ។ កូនកណ្ដុរមានទីតាំងគ្រប់ទីកន្លែងក្នុងរាងកាយ ហើយជាធម្មតាវាអាចមិនអាចមើលឃើញច្បាស់ទេទាល់តែយកដៃស្ទាបទើបដឹង ហើយវាពុំបង្កការឈឺចាប់នោះដែរ។ ប៉ុន្តែនៅពេលយើងមិនស្រួលខ្លួន វាក៏រីកមាឌធំឡើង ឬហើម។

ជាទូទៅ ក្នុងកូនកណ្ដុរមានគ្រាប់ឈាមសឡាំផូសីត និងម៉ាក្រូផាស ដែលមានតួនាទីសំខាន់ក្នុងការសម្លាប់មេរោគ និងចម្រោះសារធាតុពុលផ្សេងៗក្នុងប្រព័ន្ធទឹករងៃ។ បើនិយាយពីទីតាំងរបស់កូនកណ្ដុរមានចំនួនរាប់រយ លើពេញរាងកាយ ជាធម្មតាវាទំហំប៉ុនគ្រាប់សណ្ដែក ឬប៉ុនចុងកូនដៃ ឬធំជាងនេះ អាស្រ័យលើមនុស្សតែមិនគួរមានទំហំលើសពី ២ សមទេ រូបរាងរបស់វាក្រឡេកក្រឡាច់ មិនឈឺ។

ម្ចាស់សេវាកម្មថែទាំមនុស្សចាស់តាមគេហដ្ឋានថា បើហើមកូនកណ្ដុរនៅជុំវិញកអាចបង្ហាញពីការឆ្លងវីរុសផ្សេងៗដូចជា ផ្ដាសាយ រលាកបំពង់ក ស្អូច គ្រុនឈាម គ្រុនឈិក គ្រុនក្ដៅ។ បើបង្ករោគដោយបាក់តេរីដូចជាហើមរលាកក្នុងរាងកាយ អេដស៍ អំបៅអំបែក បូស រលាកកោសិកា គ្រុនពោះវៀន របេងកូនកណ្ដុរ។

វេជ្ជបណ្ឌិតរូបនោះបន្ថែមទៀតថា ជាធម្មតាកូនកណ្ដុរគ្មានអ្វីគួរឲ្យបារម្ភអត់ទេ ប៉ុន្តែបើសង្កេតឃើញដូចខាងក្រោម ត្រូវប្រញាប់ទៅជួបពេទ្យ។
– កូនកណ្ដុរឡើងហើម ក្រហម ឈឺ
– កូនកណ្ដុរមានទំហំធំទៅៗមិនព្រមស្រកលឹបបាត់វិញ ទាំងដែលអាការៈឈឺបានជាសះស្បើយ
– កូនកណ្ដុរទំហំធំជាង ២សម អត់ក្រឡេចក្រឡាច់ ពោលគឺលានដូចដុំពក
– ឡើងហើមកូនកណ្ដុរ ហើយស្រកគីឡូ ក្ដៅខ្លួន៕

អត្ថបទផ្ដល់សិទ្ធិដោយ៖ Hellokrupet

សូមចុចអាន៖ ទម្លាប់ទប់នោមញឹកញាប់ អាចជួបបញ្ហាទាំងនេះ

សូមចុចអាន៖ ញ៉ាំទឹកដូងតែមិនញ៉ាំសាច់ ដូចបោះចោលគុណប្រយោជន៍ទាំងនេះ

The post សុខៗឡើងកូនកណ្ដុរនៅលើ ក គួរឲ្យបារម្ភអត់? appeared first on Kampuchea Thmey Daily.

កូនកណ្ដុរ Archives - Kampuchea Thmey Daily

អ្នកវិទ្យាសាស្ត្រជោគជ័យបង្កើតសត្វកណ្ដុរ ទោះយកហ្សែនឈ្មោលដូចគ្នា

តើ​អ្វី​ទៅជា​កូនកណ្តុរ​ដំបូង​ នៃ​ដុំ​មហារីក ​

សុខៗឡើងកូនកណ្ដុរនៅលើ ក គួរឲ្យបារម្ភអត់?

តើអ្វីទៅជាកូនកណ្តុរដំបូង នៃដុំមហារីក