កូនៗ Archives - Kampuchea Thmey Daily

៧ សញ្ញាបង្ហាញថា កូនលោកអ្នកលួចជក់បារីអេឡិចត្រូនិក (VAPE)

Boa Sokunveary — Tue, 21 Mar 2023 09:20:00 +0000

បច្ចុប្បន្នយុវវ័យកំពុងពេញនិយមជាមួយឧបករណ៍នេះជាខ្លាំង ដែលបង្កការព្រួយបារម្ភដល់អាណាព្យាបាលគ្រប់រូប អ្នកខ្លះលួចជក់នៅខាងក្រៅគេចពីការស្ដីបន្ទោសរហូតមិនអាចផ្ដាច់បានក៏មាន។ ដូច្នេះអាណាព្យាបាលគួរស្វែងយល់ពីសញ្ញាទាំង ៧ នេះដើម្បីដឹងថាកូនកំពុងញៀន Vape ឬអត់ ៖

១. ក្លិនក្រអូប

ទឹកថ្នាំរបស់ Vape មានក្លិនច្រើនសម្រាប់ជ្រើសរើសដូចជា ផ្លែឈើ ស្ករគ្រាប់ និងទឹកក្រូចជាដើមដែលអាចជាប់ក្លិនតាមសំលៀកបំពាក់ សក់ក្បាល និងមាត់ ។

២. ប៊ិច និង USB ចម្លែក

បារីអេឡិចត្រូនិកមានច្រើនទម្រង់ដូចជា ប៊ិច បំពង់ USB ធ្វើឲ្យអាណាព្យាបាលមិនសូវចាប់អារម្មណ៍ ។

៣. ផឹកទឹកច្រើនខុសប្រក្រតី

សារធាតុបង្កឲ្យមាត់ស្ងួត ឬបាត់បង់ជាតិទឹកគឺ “ប្រូពីលីនគ្លីកូល” បើកូនលោកអ្នកចាប់ផ្ដើមផឹកទឹកច្រើនរួមជាមួយភ្នែកស្លក់ខ្មៅនោះជាសញ្ញានៃការប្រើ Vape ហើយ ។

៤. ឈាមច្រមុះ

មិនតែប៉ុណ្ណោះប្រូពីលីនគ្លីកូលអាចបង្កឲ្យមានឈាមច្រមុះផងដែរ ព្រោះច្រមុះបាត់បង់សំណើមនឹងរលាកដល់ចេញឈាម ។

៥. ស្ងួតក ស្ងួតមាត់

ការស្រាវជ្រាវបានឲ្យដឹងថាដំបៅមាត់បណ្ដាលមកពីបារីអេឡិចត្រូនិកមិនងាយជាសះស្បើយទេ មួយវិញទៀតចំហាយទឹកថ្នាំអាចរំខានដល់ប្រព័ន្ធភាពស៊ាំនិងជះឥទ្ធិពលអវិជ្ជមានលើកោសិកាមនុស្សយ៉ាងធ្ងន់ធ្ងរ ។

៦. ថ្ម និងខ្សែសាកថ្មី

បារីអេឡិចត្រូនិកភាគច្រើនតម្រូវឲ្យអ្នកប្រើសាកថ្មដោយដូរថ្ម ឬខ្សែសាកដូចទូរស័ព្ទរៀងរាល់ ២ ម៉ោងម្ដង ។

Vape មិនមែនជាឧបករណ៍ប្រើសម្រាប់ផ្ដាច់បារីនោះទេ វាជាប្រភេទបារីដូចគ្នាដែលបង្កផលប៉ះពាល់ដល់សុខភាពដូចជា ឈឺក្បាល ឈឺពោះ ស្រវាំងភ្នែក រលាកបំពង់ក ក្អក ក្អួត និងជំងឺមហារីកជាដើមព្រោះវត្តមាននីកូទីនជាសារធាតុញៀនក្នុងទឹកថ្នាំ ៕

ប្រែសម្រួល ៖ វារី

ចុចអាន ៖ តោះ! មកដឹងពីមូលហេតុដែលយុវវ័យខ្លះចូលចិត្តជក់បារីអេឡិចត្រូនិក(VAPE)

The post ៧ សញ្ញាបង្ហាញថា កូនលោកអ្នកលួចជក់បារីអេឡិចត្រូនិក (VAPE) appeared first on Kampuchea Thmey Daily.

កូនមិនសូវញ៉ាំ ពណ៌អាហារ ៥ នេះ អាចជួយក្មេងៗឲ្យមានចំណង់វិញ

សាង ស្រីល័ក្ខ — Wed, 18 May 2022 01:06:00 +0000

ជាការពិតណាស់ ចម្អិនម្ហូបឲ្យកូនញ៉ាំម្តងៗ ម្តាយត្រូវតែគិតគូរអំពីអាហាររូបត្ថម្ភពេញលេញ។ អាហារទាំងនេះរួមមាន ប្រូតេអ៊ីន កាបូអ៊ីដ្រាត បន្លែ ផ្លែឈើ និងខ្លាញ់ ប៉ុន្តែជួនកាលអាហារសម្បូរសារធាតុចិញ្ចឹម ធ្វើឲ្យកូនរបស់អ្នកមិនព្រមញ៉ាំផងដែរ។ នេះប្រហែលជាដោយសារតែពណ៌នៃអាហារ មិនទាក់ទាញទារក។

ដូច្នេះហើយ យើងខ្ញុំបានដាក់បញ្ចូលពណ៌អាហារទាំង ៥ ដែលទារកគួរញ៉ាំ ដើម្បីចែកជូនជាគន្លឹះដល់អ្នកម្តាយ។

១ ពណ៌ក្រហម

អាហារក្រហមដែលកូនអ្នកគួរញ៉ាំមានដូចជា ផ្លែស្ត្របឺរី ឪឡឹក ត្របែកពណ៌ផ្កាឈូក ប៉េងប៉ោះ ផ្លែស្រកានាគក្រហម។ អាហារដែលមានពណ៌ក្រហម គឺជារុក្ខជាតិដែលទទួលបានពី lycopene និង beta-cycline វាគឺជាសារធាតុប្រឆាំងអុកស៊ីតកម្ម ដែលជួយពន្យឺតការចុះខ្សោយនៃកោសិកាក្នុងរាងកាយ ជាពិសេសកោសិកាស្បែក។ លើសពីនេះ អាហារក្រហម ក៏រួមចំណែកដល់ការថែរក្សាភ្នែករបស់កូនអ្នកផងដែរ។

២ ពណ៌បៃតង

អាហារពណ៌បៃតង ដែលកូនរបស់អ្នកគួរញ៉ាំមានដូចជា ផ្លែប៉ោមបៃតង ផ្លែប័រ ផ្លែត្របែក ស្ពៃខ្មៅ ស្លឹកគ្រៃ ស្ពៃក្តោប សាឡាត់ និងខាត់ណា។ អាហារពណ៌បៃតង បានមកពីសារធាតុពណ៌ chlorophyll មានលក្ខណៈសម្បត្តិប្រឆាំងអុកស៊ីតកម្ម ជួយឲ្យស្បែកភ្លឺថ្លា វាក៏មានជាតិសរសៃខ្ពស់ ដែលជួយដល់ការបន្ទោរបង់របស់ទារកផងដែរ។ សំខាន់ជាងនេះទៅទៀត អាហារពណ៌បៃតង អាចជួយកាត់បន្ថយការទល់លាមក របស់កូនដូចគ្នា។

៣ ពណ៌ទឹកក្រូច និងលឿង

អាហារពណ៌ទឹកក្រូច និងលឿងដែលទារកគួរញ៉ាំមាន ក្រូច ការ៉ុត ល្ពៅ ម្នាស់ ខ្នុរ ដំឡូងផ្អែម ពោត និងផ្លែល្ហុង ជាអាហារពណ៌ទឹកក្រូចមានសារធាតុ Beta-carotene ជួយរក្សាសំណើមស្បែក ជួយធ្វើឲ្យស្បែកភ្លឺថ្លា។ វាជួយលើកកម្ពស់ និងកសាងភាពស៊ាំផងដែរ។ ផ្នែកពណ៌លឿង គឺបណ្ដាលមកពីសារធាតុមួយហៅថា lutein ។ វាជាសារធាតុដែលផ្តល់អត្ថប្រយោជន៍ដោយផ្ទាល់ភ្នែក ដែលជួយអភិវឌ្ឍការមើលឃើញ ចំពោះកុមារតូចៗបានយ៉ាងល្អ។

៤ ពណ៌ស្វាយ និងពណ៌ខៀវខ្ចី

អាហារពណ៌ស្វាយ និងខៀវ-ស្វាយ ដែលកូនតូចគួរញ៉ាំមានដូចជា ប៊្លូបឺរី ផ្កាមេអំបៅ ដំឡូងជ្វាពណ៌ស្វាយ ស្ពៃក្តោបពណ៌ស្វាយ ខ្ទឹមបារាំងក្រហម និងប៉េងប៉ោះពណ៌ស្វាយ។ អាហារពណ៌ទាំងនេះត្រូវបានផលិតដោយសារធាតុ anthocyanins ដែលមានឥទ្ធិពលរារាំង E. coli ក្នុងបំពង់រំលាយអាហារ ដែលបណ្តាលឲ្យយរាគ ក៏ដូចជាជួយប្រយុទ្ធប្រឆាំងនឹងមេរោគផងដែរ។

៥ ពណ៌សនិងពណ៌ត្នោត

អាហារពណ៌សនិងត្នោត ដែលទារកគួរញ៉ាំមាន ចេក ផ្កាខាត់ណា សណ្តែកបណ្តុះ សណ្តែកសៀង ល្ងស អាហារពណ៌សនិងពណ៌ត្នោត បណ្ដាលមកពីសារធាតុបន្ថែម។ វាគឺជាសារធាតុដែលកាត់បន្ថយការរលាក និងមានលក្ខណៈសម្បត្តិប្រឆាំងអុកស៊ីតកម្មខ្ពស់។

ជាពិសេសស សម្រាប់កុមារញ៉ាំអាហារចម្រុះពណ៌ នឹងជួយឲ្យរាងកាយទទួលបានសារធាតុចិញ្ចឹមផ្សេងៗ ផ្តល់អត្ថប្រយោជន៍ដល់រាងកាយផងដែរ៕

ប្រែសម្រួល៖ សាង ស្រីល័ក្ខ

ចុចអាន៖គួរដឹង! ទាំងនេះជាសញ្ញាព្រមាន នៃគ្រោះថ្នាក់សរសៃឈាមខួរក្បាល

ចុចអាន៖កុំមើលរំលង! ពណ៌នៃសំបោរ កំពុងប្រាប់ពីស្ថានភាពជំងឺធ្ងន់ឬស្រាល

The post កូនមិនសូវញ៉ាំ ពណ៌អាហារ ៥ នេះ អាចជួយក្មេងៗឲ្យមានចំណង់វិញ appeared first on Kampuchea Thmey Daily.

ម៉ាក់ប៉ាគួរដឹង! កូនឆ្លាត ឬមិនឆ្លាត អាស្រ័យលើ កត្តាទាំងនេះ

សាង ស្រីល័ក្ខ — Tue, 17 May 2022 01:10:00 +0000

កូនកើតមកមានសុខភាពល្អ កាយសម្បទារឹងមាំ ខួរក្បាលឆ្លាតវៃ រៀនពូកែ រហ័សរហួនស្វាហាប់ មិនងាយឈឺផ្ដេសផ្ដាសម៉ាក់ប៉ារីករាយជាងអ្វីៗទាំងអស់។ តែទោះយ៉ាងណា កូនយើងលូតលាស់បានល្អ ឬមិនល្អ ឆ្លាត ឬមិនឆ្លាត អាស្រ័យលើកត្តាច្រើនយ៉ាងដែលយើងមិនអាចសន្និដ្ឋានបានដោយភ្នែកទទេទេ។ តើហេតុផលអ្វីខ្លះដែលជាកត្តាចម្បងនៅពីក្រោយការលូតលាស់ផ្នែករាងកាយនិងប្រាជ្ញាស្មារតីរបស់កូនៗជាទីស្រឡាញ់?

ជុំវិញបញ្ហានេះលោកវេជ្ជបណ្ឌិត អ៊ុន យូ ឯកទេសរោគកុមារ មកពីប្រទេសបារាំង និងកូរ៉េ បានពន្យល់និងរៀបរាប់មូលហេតុសំខាន់ៗមួយចំនួនដែលជះឥទ្ធិពលដល់ការលូតលាស់ផ្នែករាងកាយ និងសតិបញ្ញាក្មេងដូច្នេះ៖

១- គភ៌លូតលាស់យឺត ឬម្ដាយមានជំងឺ

និយាយដល់ការលូតលាស់របស់កូន គឺត្រូវគិតតាំងពីនៅក្នុងផ្ទៃម្តាយមកម្ល៉េះ បើពេលពពោះ ម្តាយមានជំងឺ ច្បាស់ណាស់គភ៌វិវត្តយឺត មិនគ្រប់គីឡូ ខ្វះអវយវៈ ដល់ពេលកើតមកទៅជាខ្សោយ ហើយការលូតលាស់ក៏យឺតដូចគ្នា។ សុខភាពម្ដាយអំឡុងពេលពពោះ ពិតជាសំខាន់ណាស់ក្នុងការដែលទារកលូតលាស់ បើគេជួបឧបសគ្គបញ្ហាសុខភាព ចង់មិនចង់កត្តានេះពិតជាប៉ះពាល់ដល់ការលូតលាស់ទាំងផ្នែករាងកាយនិងប្រាជ្ញាស្មារតីចៀសមិនបាន។

២- កត្តាហ្សែន

ពិតណាស់ បើឪពុកម្ដាយមានហ្សែនល្អ នោះកូនកើតក៏លូតលាស់បានល្អដែរ។ បញ្ហាតំណពូជសំខាន់ណាស់ ដូចគ្នានេះដែរ កូនដែលកើតពីហ្សែនខ្សោយ នោះការលូតលាស់ផ្នែករាងកាយ ស្មារតី ខួរក្បាលក៏យឺតដូចគ្នា។

៣- ខ្វះអាហារូបត្ថម្ភ

ដើម្បីលូតលាស់បានល្អ ក្មេងត្រូវការជាចាំបាច់នូវអាហារចម្រុះមុខ មានទាំងត្រី សាច់ ស៊ុត បន្លែ ផ្លែឈើ មិនអាចខ្វះមុខណាមួយបាននោះទេ។ អ៊ីចឹងកាលណាកូនរស់នៅក្នុងគ្រួសារដែលមានទម្លាប់មិនញ៉ាំសាច់ ក៏ជួបបញ្ហាលូតលាស់ដែរ ធ្វើឲ្យប្រព័ន្ធការពារខ្សោយ ងាយឆ្លងជំងឺ ខួរក្បាលមិនសូវចងចាំ។ ចំពោះក្មេងដែលកើតក្នុងគ្រួសារក្រីក្រ ខ្វះមុខខ្វះក្រោយ ម្ដាយឪពុកគ្មានលទ្ធភាពទិញចំណីអាហារល្អបំប៉នកូន ឬពុំដឹងសូវដឹងពីរបៀបនៃការចិញ្ចឹមកូន ហើយពេលខ្លះកូនថែមទាំងមានជំងឺញឹកញាប់ទៀត ចៀសមិនរួចពីកង្វះអាហារូបត្ថម្ភនោះទេ ហើយបញ្ញាក៏ខ្សោយជាងគេ។

ចំពោះកូនដែលកើតមកខ្វះ Growth អ័រម៉ូន ឬខ្វះអាហារូបត្ថម្ភ ពិសេសពពួកដែលជួយដល់ប្រព័ន្ធការពាររាងកាយ និងខួរក្បាលទៀតនោះ កូននឹងងាកឈឺៗ ខ្សោយបញ្ញាស្មារតី និងមានការលូតលាស់មិនប្រក្រតី ឬកម្ពស់ទាប ជាដើម។
ដើម្បីលូតលាស់បានល្អ ទាំងរាងកាយ និងប្រាជ្ញា អាហារូបត្ថម្ភដើរតួនាទីយ៉ាងសំខាន់ក្នុងការចិញ្ចឹមកូនឲ្យមានសុខភាពរឹងមាំទាំងផ្លូវកាយ និងផ្លូវចិត្ត។
យោងតាមខិតប័ណ្ណផ្សព្វផ្សាយរបស់ក្រសួងសុខាភិបាល និងអង្គការដៃគូបានឲ្យដឹងថា ក្មេងតូចៗដែលមានបញ្ហាកង្វះអាហារូបត្ថម្ភស្រួចស្រាល់ធ្ងន់ធ្ងរ អាចទទួលរងគ្រោះថ្នាក់ច្រើនក្នុងរយៈពេលខ្លី និងរយៈពេលវែងដូចជា៖
ផលប៉ះពាល់រយៈពេលខ្លី
– ខ្សោយសតិបញ្ញា និងរៀនមិនពូកែ
– មានជំងឺ
ផលប៉ះពាល់រយៈពេលវែង
– ការសិក្សារបស់ក្មេងមិនល្អ
– ពេលធំឡើង គ្មានគំនិតច្នៃប្រឌិត និងរកប្រាក់ចំណូលបានតិច

៤. ប្រព័ន្ធការពាររាងកាយខ្សោយ ងាកឈឺៗ

បើអាអូនមានប្រព័ន្ធការពាររាងកាយ (ប្រព័ន្ធភាពស៊ាំ) ខ្សោយមានន័យថា កូនងាយនឹងរងផលប៉ះពាល់ពីជំងឺផ្សេងៗ ពិសេសជំងឺកាចសាហាវអាចវាយលុកចូលទៅបង្កគ្រោះថ្នាក់ដល់សុខភាពកូនបាន។ បន្ថែមពីលើនេះ ពេលកូនឈឺ ឬមិនស្រួលខ្លួន ម៉ាក់ប៉ាច្បាស់ជាពិបាកផ្ដល់ចំណីអាហារឲ្យកូន ជាហេតុបណ្ដាលឲ្យរាងកាយកូនទទួលបានសារធាតុចិញ្ចឹមមិនគ្រប់គ្រាន់ ទៅទ្រទ្រង់រាងកាយ ឬអភិវឌ្ឍខួរក្បាលឲ្យបានល្អ។

៥. ក្រពះពោះវៀនដំណើរការមិនល្អ

លោកវេជ្ជបណ្ឌិត អ៊ុន យូ ឯកទេសរោគកុមារពីប្រទេសកូរ៉េ និងបារាំង បានឲ្យដឹងថា ប្រសិនបើក្រពះពោះវៀនក្មេងល្អ ធ្វើឲ្យការស្រូបយកពពួកសារធាតុមួយចំនួនដែលគេនិយមហៅថា micro-nutrient ដែលមានតួនាទីជួយដល់ការអភិវឌ្ឍន៍ខួរក្បាលរបស់ក្មេងបានល្អ ជាហេតុបណ្ដាលឲ្យក្មេងលូតលាស់ខួរក្បាលបានប្រក្រតី។ នេះមានន័យថា បើសុខភាពក្រពះពោះវៀនអាអូនមិនល្អ ស្រូបយកសារធាតុចិញ្ចឹមមិនគ្រប់គ្រាន់ ការអភិវឌ្ឍន៍ខួរក្បាលក៏មានភាពយឺតយាវតាមនឹងដែរ។

៦- បរិយាកាសរស់នៅ

ការរស់នៅក្នុងបរិយាកាសមិនល្អ (តូចចង្អៀត អួអាប់ ស្មោកគ្រោក) ធ្វើឲ្យផ្លូវចិត្តក្មេងស្មុគស្មាញ គួបផ្សំកូនក្មេងមិនមានសកម្មភាពរាងកាយ ដូចជា ហាត់ប្រាណ លេងកីឡា ទៀតនោះ ធ្វើឲ្យប៉ះពាល់ដល់ការលូតលាស់ ពិសេសផ្លូវចិត្ត និងខួរក្បាលក្មេង៕

អត្ថបទផ្ដល់ដោយ៖Hello Krupet

ចុចអាន៖កូនមានទម្លាប់បៀមម្រាមដៃ គួរផ្ដាច់តាមវីធីណា? នេះជាតិចនិកម៉ាក់ៗគួរដឹង

ចុចអាន៖សម្រាប់ម៉ាក់ៗ! តិចនិកជួយកូន កុំឲ្យនោមដាក់ខោពេលយប់

The post ម៉ាក់ប៉ាគួរដឹង! កូនឆ្លាត ឬមិនឆ្លាត អាស្រ័យលើ កត្តាទាំងនេះ appeared first on Kampuchea Thmey Daily.

ក្រោយដើរលេងរួច មកដល់ផ្ទះវិញ កូនឈឺត្រូវធ្វើម៉េច?

សាង ស្រីល័ក្ខ — Tue, 19 Apr 2022 06:56:52 +0000

សម្រាប់ម៉ាក់ៗមួយចំនួនធំ ពេលបានដើរលេងជុំគ្នានៅថ្ងៃសម្រាកជាមួយកូន និងប្ដី ជួបជុំគ្រួសារ ច្បាស់ជាមានអារម្មណ៍កក់ក្ដៅ សប្បាយមុខញញឹមរីកដូចផ្កាមិនខាន។ ផ្ទុយទៅវិញ ពេលដើរលេងរួច ហើយត្រលប់ទៅផ្ទះវិញ កូនតូចៗក៏ធ្លាក់ខ្លួនឈឺ អ៊ីចឹងគួរធ្វើម៉េចទៅ បើកូនឈឺ?

ដើម្បីជួយជាដំណោះស្រាយដល់ម៉ាក់ប៉ា លោកវេជ្ជបណ្ឌិត ចាន់ ស៊ីណេត បានណែនាំឲ្យដឹងថា ប្រសិនបើកូនឈឺ ក្ដៅខ្លួន យើងត្រូវមានប្រដាប់វាស់កម្ដៅ ដាក់ថ្នាំបញ្ចុះកម្ដៅ ជូតខ្លួនឲ្យកូន។ ក្នុងករណីកូនតឹងច្រមុះផ្ដាសាយ គួរមានថ្នាំផ្ដាសាយ និងសេរ៉ូមប្រៃលាង ឬឆ្ពុងច្រមុះកូន ដើម្បីឲ្យកូនដកដង្ហើមបានស្រួល។

វាជារឿងធម្មតាដែលយើងមិនថា ក្មេង ឬចាស់ទេ ធ្លាក់ខ្លួនឈឺដូចជា ឈឺចុកចាប់រាងកាយ ល្វើយអស់កម្លាំង រាករូស ឬក្ដៅខ្លួន។ល។ ប្រសិនបើអាអូនត្រូវចូលរៀនថ្ងៃបន្ទាប់ ក្រោយមកពីដើរលេង ហើយកូនឈឺ ឬមិនស្រួលខ្លួន ម៉ាក់ប៉ាគួរតែអនុញ្ញាតឲ្យកូនសម្រាកនៅផ្ទះសិន ឲ្យអាការៈកូនបានធូរស្បើយបន្តិច សឹមចូលត្រលប់ទៅសាលារៀនវិញ។

បន្ថែមពីនេះ យើងក៏ត្រូវយកចិត្តទុកដាក់ទៅលើអាហារដែលកូនញ៉ាំ និងភេសជ្ជៈដែលកូនផឹកដែរដោយឲ្យកូនញ៉ាំតែអាហារល្អៗបូកបញ្ចូលគ្នាមានបន្លែ ត្រី សាច់ ស៊ុត ផ្លែឈើ ទឹកផ្លែឈើស្រស់ និងទឹកស្អាតជាដើម។ ស្របគ្នានេះ វេជ្ជបណ្ឌិតខាងលើបានឲ្យដឹងថា ប្រសិនបើត្រលប់មកពីដើរលេងវិញកូនឈឺធ្ងន់ ឬមានរោគសញ្ញាគ្រោះថ្នាក់នោះ ម៉ាក់ប៉ាគួរតែនាំកូនទៅជួបគ្រូពេទ្យទើបល្អ។

ម៉្យាងវិញទៀត មុននឹងទៅដើរលេង ម៉ាក់ប៉ាគួរតែរៀបចំថ្នាំសង្កូវដូចជាថ្នាំក្ដៅខ្លួន ផ្ដាសាយ ឈឺក្បាល វិលមុខ ឬរាករូស ឬទឹកថ្នាំសម្លាប់មេរោគ។ល។ ដើម្បីទុកត្រៀមពេលមានអាសន្នអំឡុងពេលដើរលេង៕

អត្ថបទផ្ដល់ដោយ៖ Hello krupet

ចុចអាន៖សម្រាប់ម៉ាក់ៗ! តិចនិកជួយកូន កុំឲ្យនោមដាក់ខោពេលយប់

ចុចអាន៖ប៉ាម៉ាក់អាចបំពានផ្លូវចិត្តកូន ដោយមិនដឹងខ្លួន បើមានទម្លាប់បែបនេះ

The post ក្រោយដើរលេងរួច មកដល់ផ្ទះវិញ កូនឈឺត្រូវធ្វើម៉េច? appeared first on Kampuchea Thmey Daily.

សម្រាប់ម៉ាក់ៗ! តិចនិកជួយកូន កុំឲ្យនោមដាក់ខោពេលយប់

សាង ស្រីល័ក្ខ — Wed, 13 Apr 2022 00:50:00 +0000

ការនោមដាក់ខោពេលយប់តែងតែកើតឡើង នៅពេលម៉ាក់ប៉ាឈប់ឲ្យអាអូនស្លៀកខោទឹកនោមពេលយប់។ កូនមួយចំនួនអាចគេងនោមដាក់ខោរហូតដល់អាយុ ៥ ឆ្នាំទើបឈប់។ ក្នុងអំឡុងពេលឈប់ឱ្យអាអូនស្លៀកខោទឹកនោមពេលគេងថ្មីៗ ម៉ាក់ប៉ាគួរបង្រៀនអ្វីខ្លះដើម្បីជួយអាអូនឆាប់ឈប់នោមដាក់ខោ?

ដោយសារកូនទម្លាប់ស្លៀកខោទឹកនោមពេលគេង និងដោយសារអាអូននៅតូចដែលមិនអាចគ្រប់គ្រងការបញ្ចេញទឹកនោមបាន ដូច្នេះពេលម៉ាក់ប៉ាឈប់ឱ្យអាអូនស្លៀកខោទឹកនោម កូនប្រាកដជានោមដាក់ខោជាមិនខាន។

ខាងក្រោមនេះជាតិចនិកមួយចំនួនដែលម៉ាក់ប៉ាអាចបង្រៀនកូនដើម្បីជួយឆាប់ឈប់នោមដាក់ខោពេលយប់។

១. ចៀសវាងឱ្យកូនញុំាភេជ្ជៈមុនពេលចូលគេង

មុនពេលចូលគេងម៉ាក់ប៉ាគួរកុំឱ្យអាអូនញុំាទឹកដោះគោ ព្រោះអាចធ្វើឱ្យនោមពេលយប់ដោយសារមានទឹកនោមច្រើនក្នុងប្លោកនោម។ ម៉ាក់ប៉ាក៏គួរចៀសវាងឱ្យអាអូនញុំាភេជ្ជៈដែលមានជាតិកាហ្វេអ៊ីនដូចជា ទឹកក្រូចកំប៉ុង ទឹកដោះគោរសជាតិសុកូឡា ឬកាកាវជាដើម ព្រោះជាតិកាហ្វេអ៊ីនធ្វើឱ្យអាអូននោមញឹក។

២. ឱ្យអាអូននោមមុនពេលចូលគេង

ម៉ាក់ប៉ាគួរប្រាប់ឱ្យអាអូននោមឱ្យហើយមុនពេលចូលគេង ទោះបីជាកូនមិនទាន់ចង់នោម ហើយនោមចេញតែបន្តិចក៏ដោយដើម្បីឱ្យអាអូនបញ្ចេញទឹកនោមពីប្លោកនោមដែលអាចជួយកាត់បន្ថយការនោមដាក់ខោពេលគេង។

៣. ចៀសបញ្ហាទល់លាមក

ការទល់លាមកអាចបន្ថែមសម្ពាធដល់ប្លោកនោម ព្រោះរន្ធគូទមានទីតាំងនៅខាងក្រោយប្លោកនោម។ នៅពេលរន្ធគូទពោរពេញដោយលាមករឹង និងធំ ប្លោកនោមនឹងត្រូវបានសង្កត់ដែលបណ្តាលឱ្យប្លោកនោមត្រូវបញ្ចេញទឹកនោមញឹកញាប់។

ដូច្នេះ ម៉ាក់ប៉ាគួរឱ្យអាអូនញុំាបន្លែ ផ្លែឈើ និងទឹកឱ្យបានច្រើនដើម្បីការពារអាអូនកុំឱ្យទល់លាមក។ បើអាអូនទល់លាមក ម៉ាក់ប៉ាអាចឱ្យអាអូនញុំាល្ហុងទុំឱ្យបានច្រើនដើម្បីសម្រួលអាការៈ។

៤. ហៅកូននោមពេលយប់

ម៉ាក់ប៉ាអាចប្រាប់កូនឱ្យងើបឡើងទៅបន្ទប់ទឹកនោមពេលយប់ បើសិនអាអូនឈឺនោម។ បើអាអូនមិនហ៊ានទៅបន្ទប់ទឹកតែឯង ម៉ាក់ប៉ាអាចប្រាប់អាអូនឱ្យដាស់ម៉ាក់ ឬប៉ាឱ្យជូនទៅបន្ទប់ទឹក។

ជាទូទៅបើអាអូនងងុយគេងខ្លាំង អាអូនមិនអាចភ្ញាក់ដឹងខ្លួនពេលឈឺនោមទេ ដូច្នេះម៉ាក់ប៉ាគួរឱ្យអាអូនចូលគេងពីព្រលប់ដើម្បីឱ្យអាអូនគេងបានឆ្អែត ទើបអាចភ្ញាក់ក្រោកនោម ឬភ្ញាក់ពីព្រលឹម ហើយក្រោកទៅបន្ទប់ទឹកបានទាន់ពេល។ បើអាអូនគេងដល់ថ្ងៃ ច្បាស់ជាអាចគេងនោមដាក់ខោជាមិនខាន។

៥. ឱ្យកូនប្តូរកម្រាលពូក

ពេលកូនគេងនោមដាក់ខោ ម៉ាក់ប៉ាគួរបង្រៀនឱ្យអាអូនជូតសម្អាតទឹកនោម និងប្តូរកម្រាលពូកដើម្បីឱ្យដឹងថាពេលនោមដាក់ខោធ្វើឱ្យប្រឡាក់កន្លែងគេង និងពិបាកក្នុងការសម្អាត ដូច្នេះអាអូនអាចធ្វើតាមដំបូន្មានដែលម៉ាក់ប៉ាប្រាប់ដូចខាងលើដើម្បីជួយកុំឱ្យនោមដាក់ខោ។

៦. ចៀសវាងដាស់កូននោមកណ្តាលយប់

បើអាអូនឈឺនោមកណ្តាលយប់ ម៉ាក់ប៉ាគួរឱ្យអាអូនងើបឡើងនោមដោយខ្លួនឯង ព្រោះការដាស់អាអូនឱ្យងើបឡើងនោមកណ្តាលយប់អាចរំខានដល់ការគេងរបស់អាអូន និងធ្វើឱ្យអាអូនមួម៉ៅមានអារម្មណ៍មិនល្អ។

៧. លើកសរសើរអាអូន

នៅថ្ងៃណាម៉ាក់ប៉ាសង្កេតឃើញកូនមិនគេងនោមដាក់ខោ ម៉ាក់ប៉ាគួរសរសើរ ដើម្បីលើកទឹកចិត្តអាអូន។ បើកូននោមដាក់ខោ ម៉ាក់ប៉ាគួរចៀសវាងស្តីបន្ទោរ ឬបង្អាប់ ដែលនាំឱ្យអាអូនខ្មាស ហើយលាក់មិនហ៊ានប្រាប់ថាគេងនោមដាក់ខោ។

ជាទូទៅការនោមដាក់ខោពេលយប់នឹងបាត់នៅពេលអាអូនធំបន្តិច ឬពេលអាអូនទម្លាប់នឹងវិធីសាស្រ្តដូចខាងលើ ដូច្នេះ ម៉ាក់ប៉ាត្រូវអត់ធ្មត់។ ម៉ាក់ប៉ាអាចឱ្យអាអូនគេងលើកន្ទេលទឹកនោម រួចក្រាលក្រណាត់ពីលើកន្ទេលទឹកនោមដើម្បីការពារកុំឱ្យទឹកនោមអាអូនជ្រាបប្រឡាក់៕

អត្ថបទផ្ដល់ដោយ៖ Hello Krupet

ចុចអាន៖ជំនាញសង្គមទាំង ៥ ឪពុកម្ដាយគួរ បង្រៀនកូនៗឲ្យចេះចាំ

The post សម្រាប់ម៉ាក់ៗ! តិចនិកជួយកូន កុំឲ្យនោមដាក់ខោពេលយប់ appeared first on Kampuchea Thmey Daily.

មានកូនតូចទៅវត្តនៅថ្ងៃចូលឆ្នាំ កុំប្រហែសរឿងប៉ុន្មាននេះឲ្យសោះ

សាង ស្រីល័ក្ខ — Fri, 08 Apr 2022 08:53:17 +0000

តាមទំនៀមទម្លាប់យើង ដល់រដូវបុណ្យទានដូចពិធីចូលឆ្នាំប្រពៃណីខ្មែរ ក្មេងចាស់ក្នុងផ្ទះ តែងតែជួបជុំគ្រួសារទៅវត្តដើម្បីធ្វើបុណ្យជុំគ្នា។ ពេលធ្វើបុណ្យជុំគ្រួសារ គ្នាយើងច្បាស់ជាមានអារម្មណ៍ថាសប្បាយ និងជ្រះថ្លាហើយ តែបើនាំកូនតូចទៅវត្តតាម មិនត្រូវធ្វេសប្រហែសរឿងប៉ុន្មាននេះទេ។

១. ឲ្យកូននៅកន្លែងមានផ្សែងធូបយូរ

វត្តណាក៏ដូចវត្តណាដែរ ឲ្យតែពេលបុណ្យទានផ្សែងធូបហុយឡើងអ័ព្ទ មើលមនុស្សម្នាមិនចង់ឃើញទេ។ ទាក់ទងនឹងផ្សែងធូបនេះ វេជ្ជបណ្ឌិតផ្នែកទូទៅ លី ឫទ្ធីគុណ បានឲ្យដឹងថា ធូបត្រូវបានគេផលិតឡើងពីវត្ថុធាតុដើមធម្មជាតិ និងផ្សំជាមួយសារធាតុគីមីច្រើនប្រភេទ។ ផ្សែងដែលចេញភាយក្រោយត្រូវកម្ដៅ មានផលប៉ះពាល់ដល់សុខភាពជាច្រើនយ៉ាងដូចជាបញ្ហាផ្លូវដង្ហើម រលាកទងសួត រលាកបំពង់ក ហើយការស្រូបយកជាតិធូបនេះ គ្រោះថ្នាក់ជាងផ្សែងបារីទៅទៀត។ យូរៗទៅវានឹងបង្កទៅជាជំងឺមហារីកសរីរាង្គផ្សេងៗ។

២. មិនពាក់ម៉ាស់ឲ្យកូន

វេជ្ជបណ្ឌិត ចាន់ ស៊ីណេត ឯកទេសជំងឺទូទៅ បានណែនាំ ម៉ាក់ប៉ាថា ពេលទៅវត្តកុំភ្លេចពាក់ម៉ាស់ឲ្យកូន ព្រោះថ្ងៃចូលឆ្នាំអ្នកណាៗក៏ទៅវត្តធ្វើបុណ្យដែរ។ ដ្បិតតែតាមករណីវិជ្ជមានកូវីដ ១៩ ឬវីរុសអូមីក្រុងរបស់ក្រសួងសុខាភិបាលធ្លាក់ចុះក្ដី យើងមិនត្រូវភ្លេចខ្លួនទេ ព្រោះកូវីដ ១៩ មិនភ្លេចយើងឡើយ ដូច្នេះបើអាចគួរបន្តអនុវត្តវិធានការ ៣ការពារ ៣កុំ។

ទន្ទឹមនឹងនេះ បើអាអូនមានអាយុក្រោម ២ ឆ្នាំ អ្នកជំនាញមិនណែនាំឲ្យពាក់ម៉ាស់ទេ ព្រោះកូននៅតូចពេក អាចប្រឈមនឹងការពិបាកដកដង្ហើម។

៣. ឲ្យកូនលេងជាមួយសត្វអនាថាក្នុងវត្ត

ធម្មតា នៅក្នុងវត្តសម្បូរសត្វឆ្កែ ឬឆ្មាអនាថាដែលគួរឲ្យអាណិតណាស់ ហើយក្មេងៗខ្លះឃើញសត្វចេះតែចង់ទៅជិត។ ម៉ាក់ប៉ាគួរតែនៅក្បែរកូន បើអាអូនទៅលេងជាមួយសត្វឆ្កែ ឆ្មានោះ ឬបើអាចគួរកុំឲ្យកូននៅជិតអី ដើម្បីការពារសត្វខាំ ឬខ្វាចកូន អាចបណ្ដាលឲ្យឆ្លងមេរោគបាន(មិនមែនឲ្យរើសអើងសត្វអនាថាទេ)៕

អត្ថបទផ្ដល់ដោយ៖Hello Krupet

ចុចអាន៖ជំនាញសង្គមទាំង ៥ ឪពុកម្ដាយគួរ បង្រៀនកូនៗឲ្យចេះចាំ

The post មានកូនតូចទៅវត្តនៅថ្ងៃចូលឆ្នាំ កុំប្រហែសរឿងប៉ុន្មាននេះឲ្យសោះ appeared first on Kampuchea Thmey Daily.

កូនមានទម្លាប់បៀមម្រាមដៃ គួរផ្ដាច់តាមវីធីណា? នេះជាតិចនិកម៉ាក់ៗគួរដឹង

សាង ស្រីល័ក្ខ — Tue, 29 Mar 2022 01:42:15 +0000

ទារកមួយចំនួនមានទម្លាប់បៀមម្រាមដៃ ហើយក្មេងមួយចំនួនទៀតអាចបៀមម្រាមដៃរហូតដល់ធំ (អាយុ ៥-៧ ឆ្នាំ)។ ហេតុអ្វីបានជាអាអូនបៀមម្រាមដៃ ហើយការបៀមម្រាមដៃអាចប៉ះពាល់អ្វីខ្លះ? ម៉ាក់ប៉ាគួរជួយអាអូនបញ្ឈប់ការបៀមម្រាមដៃតាមវិធីណា?

ទារកមួយចំនួនបៀមម្រាមដៃដើម្បីរម្ងាប់អារម្មណ៍ខ្លួនឯងនៅពេលឃ្លាន ងងុយគេង ភ័យ ឬអផ្សុក ហើយយូរៗក៏ក្លាយទៅជាទម្លាប់។ ទោះបីជាយ៉ាងណាក៏ដោយ នៅពេលអាអូនដុះធ្មេញ ទម្លាប់បៀមម្រាមដៃអាចធ្វើឱ្យអាអូនខូចក្រអូមមាត់ព្រោះធ្មេញមុខជួរខាងលើ និងជួរខាងក្រោមអាចដុះមិនត្រង់ជួរ មានចន្លោះ និងអាចប៉ះពាល់ដល់ការបញ្ចេញសំឡេងរបស់អាអូន។

ខាងក្រោមនេះជាវិធីសាស្រ្តមួយចំនួនដែលម៉ាក់ប៉ាអាចជួយអាអូនបញ្ឈប់ទម្លាប់បៀមម្រាមដៃ៖

១. ឱ្យអាអូនបៅ ឬញុំាឱ្យឆ្អែត

ម៉ាក់ប៉ាគួរបំបៅ ឬឱ្យអាអូនញុំាអាហារឱ្យទៀងទាត់ ចៀសវាងអាអូនឃ្លាន ព្រោះពេលឃ្លាន អាអូនអាចបៀមម្រាមដៃដើម្បីរំងាប់ការឃ្លាន។

២. បំពេរអាអូនឱ្យគេង

នៅពេលអាអូនងងុយគេង អាអូនក៏បៀមម្រាមដៃដែរ ដូច្នេះម៉ាក់ប៉ាអាចបំពេរអាអូនឱ្យគេង យោលអាអូនឱ្យគេង ឬពអាអូនដើរចុះដើរឡើងឱ្យអាអូនគេង និងចៀសវាងឱ្យអាអូនគេងបៀមម្រាមដៃរហូតដល់គេងលក់។

៣. កុំឱ្យអាអូនទំនេរ

ពេលអផ្សុក អាអូនអាចបៀមម្រាមដៃ ដូច្នេះម៉ាក់ប៉ាគួររកអ្វីឱ្យអាអូនធ្វើ ឬលេងដូចជា ឱ្យអាអូនលេងប្រដាប់ប្រដាក្មេងលេង ផាត់រូប គូររូប ឬនាំអាអូនទៅលេងនៅសួនជាដើម និងចៀសវាងឱ្យអាអូនទំនេរ។

៤. ឱ្យជ័រខាំលេងទៅអាអូន

ម៉ាក់ប៉ាអាចឱ្យអាអូនខាំជ័រខាំលេងដើម្បីបង្វែរអារម្មណ៍អាអូនពីការបៀមម្រាមដៃ និងកុំឱ្យអាអូនអផ្សុក។ ពេលអាអូនទម្លាប់ខាំជ័រខាំលេង យូរៗអាអូនអាចភ្លេចបៀមម្រាមដៃដោយខ្លួនឯង។

៥. សង្កេតពេលវេលាអាអូនចូលចិត្តបៀមម្រាមដៃ

ម៉ាក់ប៉ាគួរសង្កេតមើលពេលណាអាអូនចូលចិត្តបៀមម្រាមដៃ។ ឧទារហរណ៍ ប្រសិនបើអាអូនចូលចិត្តបៀមម្រាមដៃពេលមើលទូរទស្សន៍ ឬពេលមើលទូរស័ព្ទ ម៉ាក់ប៉ាគួរបិទទូរទស្សន៍ ឬទូរស័ព្ទ ហើយបង្វែរអារម្មណ៍អាអូនឱ្យធ្វើអីផ្សេង ឬលេងជាមួយអាអូនដើម្បីឱ្យអាអូនឈប់បៀមម្រាមដៃ។

៦. ពាក់ស្រោមដៃ ឬអាវមានដៃវែងដេរជិតម្រាម

ជាទូទៅពេលអាអូនងងុយគេង ឬពេលអាអូនយល់សប្តិអាក្រក់ អាអូននឹងបៀមម្រាមដៃដើម្បីលួងលោមខ្លួនឯង ដូច្នេះពេលអាអូនគេង ម៉ាក់ប៉ាអាចពាក់ស្រោមដៃ ឬអាវដែលដែលមានដៃវែងដេរជិតម្រាមដើម្បីការពារអាអូនពីការបៀមម្រាមដៃពេលគេង។

៧. ឱ្យអាអូនគេងឱបតុក្កដា ឬខ្នើយឱប

បើអាអូនមានអាយុលើសពី ២ ឆ្នាំ ម៉ាក់ប៉ាអាចឱ្យអាអូនគេងឱ្យឱបតុក្កដា ឬខ្នើយឱបដើម្បីបង្វែរអារម្មណ៍អាអូន និងលួងលោមអាអូនឱ្យគេង។ បើម៉ាក់ប៉ាឃើញអាអូនគេងបៀមម្រាមដៃ ម៉ាក់ប៉ាគួរដកម្រាមដៃអាអូនចេញពីមាត់ថ្នមៗ។

៨. ពន្យល់ហេតុផលប្រាប់អាអូន

ម៉ាក់ប៉ាអាចពន្យល់ហេតុផលពីផលវិបាកនៃការបៀមម្រាមដៃឱ្យអាអូនស្តាប់។ ឧទារហណ៍ ម៉ាក់ប៉ាអាចឱ្យអាអូនបើកមាត់នៅមុខកញ្ចក់ រួចប្រាប់អាអូនថា ការបៀមម្រាមដៃធ្វើឱ្យធ្មេញមុខជួរខាងលើ និងជួរខាងក្រោមរបស់កូនដុះមិនត្រង់ជួរ លែងស្អាត ហើយខូចក្រអូមមាត់ទៀត។

ម្យ៉ាងទៀត ការបៀមម្រាមដៃអាចធ្វើឱ្យកូនឈឺដោយសារការឆ្លងមេរោគចូលមាត់ ព្រោះនៅលើម្រាមដៃ និងក្រចកមានមេរោគច្រើនណាស់។ ជាពិសេស មិត្តភក្តិអាចសើចចំអកឱ្យកូនជាដើម។

៩. សរសើរកូន

នៅពេលអាអូនមិនបៀមម្រាមដៃ ម៉ាក់ប៉ាគួរសរសើរអាអូនដើម្បីលើកទឹកចិត្តអាអូន និងចៀសវាងស្តីបន្ទោស ឬចំអកឱ្យអាអូន នៅពេលបៀមម្រាមដៃព្រោះអាចធ្វើឱ្យអាអូនបាត់ជំនឿចិត្តលើខ្លួនឯង។

១០. លាបរបស់លើម្រាមដៃអាអូន

ម៉ាក់ប៉ាអាចប្រើវិធីរបស់ចាស់ៗដូចជា លាបប្រេងកូឡា ឬ ទឹកខ្មេះលើម្រាមដៃអាអូនដើម្បីកុំឱ្យបៀមម្រាមដៃទៀត។ ដូច្នេះពេលបៀមម្រាមដៃអាអូននឹងហឹរ ឬជូរពេញមាត់ជាមិនខាន តែម៉ាក់ប៉ាត្រូវប្រយ័ត្ន កុំឱ្យអាអូនយកដៃញីភ្នែក។

ទម្លាប់បៀមម្រាមដៃអាចពិបាកនឹងផ្តាច់ ប៉ុន្តែម៉ាក់ប៉ាគួរព្យាយាម និងមានភាពអត់ធ្មត់ ហើយកុំចិត្តទន់ឱ្យសោះ ព្រោះពេលខ្លះម៉ាក់ប៉ាឃើញអាអូនយំដោយសារមិនបានបៀមម្រាមដៃអាចមិនដាច់ចិត្ត៕

អត្ថបទផ្ដល់ដោយ៖ Hello Krupet

ចុចអាន៖ចោះត្រចៀកកូនហើយ គួរថែទាំបែបណា ទើបមិនឆ្លងមេរោគ?

ចុចអាន៖ជំនាញសង្គមទាំង ៥ ឪពុកម្ដាយគួរ បង្រៀនកូនៗឲ្យចេះចាំ

The post កូនមានទម្លាប់បៀមម្រាមដៃ គួរផ្ដាច់តាមវីធីណា? នេះជាតិចនិកម៉ាក់ៗគួរដឹង appeared first on Kampuchea Thmey Daily.

ប៉ាម៉ាក់អាចបំពានផ្លូវចិត្តកូន ដោយមិនដឹងខ្លួន បើមានទម្លាប់បែបនេះ

សាង ស្រីល័ក្ខ — Fri, 18 Mar 2022 09:05:00 +0000

ការរំលោភបំពានលើកុមារ មិនមែនកំណត់ត្រឹមតែជាការប្រើអំពីហិង្សាលើរាងកាយប៉ុណ្ណោះទេ ការបំពានផ្លូវអារម្មណ៍កូនក៏អាចជះឥទ្ធិពលធំធេងចំពោះការលូតលាស់ និងការអភិវឌ្ឍផ្លូវចិត្តរបស់កូនដូចគ្នា។

អ្វីទៅជាការរំលោភបំពានផ្លូវអារម្មណ៍? វាដូចទៅនឹងការមិនយកចិត្តទុកដាក់ចំពោះកូនទេ?

ក្នុងនាមជាប៉ាម៉ាក់ យើងតែងតែចង់ផ្ដល់អ្វីដែលកូនត្រូវការ ដើម្បីឲ្យកូនរស់នៅបានសុខស្រួល។ ប៉ុន្តែ ការមិនអើពើទៅនឹងតម្រូវការផ្លូវចិត្តរបស់កូន ក៏អាចបង្កជាផលវិបាករយៈពេលខ្លី ឬរយៈពេលវែងផងដែរ។ ការមិនផ្ដល់ក្ដីស្រលាញ់ មិនគាំទ្រ បដិសេធ រិះគន់ គំរាមកំហែង គឺសុទ្ធតែជាការបំពានផ្លូវអារម្មណ៍ ហើយទង្វើទាំងនេះ នឹងជះឥទ្ធិពលមិនល្អនៅពេលដែលកូនធំឡើង ដូចជាប៉ះពាល់ដល់ទំនាក់ទំនងផ្ទាល់ខ្លួន ការងារ និងទំនាក់ទំនងជាមួយនឹងក្មេងដទៃទៀត។

ជាក់ស្ដែង ការបំពានផ្លូវកាយ ដែលអមជាមួយនឹងការធ្វើបាបរាងកាយ ផ្លូវភេទ ឬការមិនអើពើ អាចបំផ្លាញការគោរពចំពោះខ្លួនឯង និងទំនុកចិត្តរបស់កុមារបាន។

ស្វែងយល់ពីការមិនយកចិត្តទុកដាក់លើផ្លូវអារម្មណ៍កូន

គ្រាន់តែបំពេញតម្រូវការរបស់កូន គឺមិនគ្រប់គ្រាន់ឡើយ។ ប៉ាម៉ាក់ក៏ត្រូវទទួលខុសត្រូវក្នុងការណែនាំ និងគាំទ្រកូនផ្នែកអារម្មណ៍ដែរ។ ជាធម្មតា ក្មេងតែងត្រូវការការយកចិត្តទុកដាក់ពីប៉ាម៉ាក់នៅគ្រប់ដំណាក់កាលក្នុងជីវិតរបស់ខ្លួន ហើយការមិនអើពើនឹងអារម្មណ៍របស់កូន អាចនាំឲ្យការអភិវឌ្ឍផ្នែកអារម្មណ៍របស់ក្មេងមានភាពចុះខ្សោយ។

សញ្ញានៃការមិនយកចិត្តទុកដាក់ចំពោះអារម្មណ៍កូន

មិនឆ្លើយតបទៅនឹងអារម្មណ៍របស់កូន
មិនអើពើនឹងអារម្មណ៍របស់កូន
មិនចំណាយពេលជាមួយកូន
រិះគន់ ឬមិនដែលសរសើរកូន
មិនសូវចាប់អារម្មណ៍នឹងជីវិតរស់នៅរបស់កូន
មិនដឹងពីសញ្ញាដែលកូនត្រូវការជំនួយ
ចាំតែចាប់កំហុសកូន

ផលប៉ះពាល់ពេលមិនសូវអើពើពីអារម្មណ៍កូន

ជាទូទៅ កុមារដែលរងគ្រោះដោយសារតែការមិនយកចិត្តទុកដាក់ផ្នែកអារម្មណ៍ អាចបង្ហាញសញ្ញាមួយចំនួនខាងក្រោម៖

ពិបាកកំណត់ភាពខ្លាំង និងភាពខ្សោយរបស់ខ្លួន
មិនសូវគោរពខ្លួនឯង
បន្ទោសខ្លួនឯង រាល់ពេលបរាជ័យ
ប្រតិកម្មខ្លាំងទៅនឹងការបដិសេធ
យល់ថាខ្លួនឯងមានកំហុសធ្ងន់ធ្ងរ។

ការស្គាល់ច្បាស់ពីសញ្ញានៃការមិនយកចិត្តទុកដាក់លើអារម្មណ៍កូន និងការកែលម្អលើចំណុចខ្វះខាតរបស់ប៉ាម៉ាក់ មានសារសំខាន់ណាស់ ក្នុងការចិញ្ចឹមបីបាច់កូនប្រកបដោយមនោសញ្ចេតនា និងការយល់ចិត្ត។ ហេតុនេះហើយ ដើម្បីឲ្យកូនទទួលបានសុភមង្គលពិតប្រាកដ ប៉ាម៉ាក់មានកាតព្វកិច្ចផ្ដល់ការគាំទ្រទាំងផ្លូវកាយ និងផ្លូវចិត្ត ព្រមផ្ដល់បរិយាកាសរស់នៅដ៏ល្អមួយដល់កូនៗ៕

អត្ថបទផ្ដល់ដោយ៖Hello Krupet

ចុចអាន៖ចោះត្រចៀកកូនហើយ គួរថែទាំបែបណា ទើបមិនឆ្លងមេរោគ?

ចុចអាន៖តិចនិក ៦យ៉ាង ជួយឲ្យខួរក្បាលកូនគិត រហ័សរហួន និងវៃឆ្លាត

The post ប៉ាម៉ាក់អាចបំពានផ្លូវចិត្តកូន ដោយមិនដឹងខ្លួន បើមានទម្លាប់បែបនេះ appeared first on Kampuchea Thmey Daily.

កូនៗ Archives - Kampuchea Thmey Daily

៧ សញ្ញាបង្ហាញថា កូនលោកអ្នកលួចជក់បារីអេឡិចត្រូនិក (VAPE)

កូនមិនសូវញ៉ាំ ពណ៌អាហារ ៥​ នេះ អាចជួយក្មេងៗឲ្យមានចំណង់វិញ

ម៉ាក់ប៉ាគួរដឹង! កូនឆ្លាត ឬមិនឆ្លាត អាស្រ័យលើ កត្តាទាំងនេះ

ក្រោយដើរលេងរួច មកដល់ផ្ទះវិញ កូនឈឺត្រូវធ្វើម៉េច?

សម្រាប់ម៉ាក់ៗ! តិចនិកជួយកូន កុំឲ្យនោមដាក់ខោពេលយប់

មានកូនតូចទៅវត្តនៅថ្ងៃចូលឆ្នាំ កុំប្រហែសរឿងប៉ុន្មាននេះឲ្យសោះ

កូនមានទម្លាប់បៀមម្រាមដៃ គួរផ្ដាច់តាមវីធីណា? នេះជាតិចនិកម៉ាក់ៗគួរដឹង

ប៉ាម៉ាក់អាចបំពានផ្លូវចិត្តកូន ដោយមិនដឹងខ្លួន បើមានទម្លាប់បែបនេះ

កូនមិនសូវញ៉ាំ ពណ៌អាហារ ៥ នេះ អាចជួយក្មេងៗឲ្យមានចំណង់វិញ