កូរ៉េខាងត្បូង Archives - Kampuchea Thmey Daily

កូរ៉េខាងត្បូងនឹងដំណើរការនាវាមុជទឹក ដើរដោយថាមពលនុយក្លេអ៊ែរលើកដំបូង យូរបំផុតមួយទសវត្សរ៍ក្រោយ

Minea Neu — Wed, 27 May 2026 04:33:05 +0000

ស្របពេលមានការគំរាមកំហែងដោយការបាញ់មីស៊ីលរយៈចម្ងាយខ្លី មធ្យម និងឆ្ងាយ របស់កូរ៉េខាងជើងជាបន្តបន្ទាប់ មិនថាតាមដីគោក ឬដែនសមុទ្រតាមបច្ចេកវិទ្យាថ្មីៗ មន្ត្រីទីក្រុងសេអ៊ូល បានឱ្យដឹងកាលពីថ្ងៃអង្គារថា ប្រទេសកូរ៉េខាងត្បូងនឹងចាប់ផ្តើមឱ្យដាក់ដំណើរការនាវាមុជទឹកដើរដោយថាមពលនុយក្លេអ៊ែរដំបូង ក្រោយឆ្នាំ២០៣០ (ចន្លោះឆ្នាំ២០៣៣-៣៦) ក្រោមកម្មវិធីថ្មីមួយ ដែលមានគោលបំណងទប់ទល់នឹងការគំរាមកំហែងនុយក្លេអ៊ែរនិងការបាញ់មីស៊ីលចេញពីនាវាមុជទឹករបស់កូរ៉េខាងជើង។

យោងតាមទីភ្នាក់ងារសារព័ត៌មានរ៉យទ័រ ផ្សាយថ្ងៃទី២៦ ខែឧសភា ឆ្នាំ២០២៦ ទីក្រុងសេអ៊ូល បានស្វែងការចូលរួមជាមួយក្រុមឥស្សរជនប្រទេសផ្សេងៗទៀត ដែលកំពុងប្រតិបត្តិការនាវាមុជទឹកដើរដោយថាមពលនុយក្លេអ៊ែរ ក្នុងចលនាមួយអាចផ្លាស់ប្តូរសន្តិសុខអាស៊ីល្អជាងមុន និងបង្កើនការប្រណាំងប្រជែងអាវុធក្រោមទឹកកាន់តែអស្ចារ្យ។

នាវាមុជទឹក ដើរដោយថាមពលនុយក្លេអ៊ែរកូរ៉េខាងត្បូង។ រូបភាព៖ Reuters

ប្រធានាធិបតីកូរ៉េខាងត្បូង លោក Lee Jae Myung ប្រាប់គណៈកម្មាធិការ ត្រួតពិនិត្យយុទ្ធសាស្ត្រការពារជាតិនាពេលអនាគត ថា៖ « នាវាមុជទឹកដើរដោយថាមពលនុយក្លេអ៊ែរនឹងត្រូវបានសាងសង់ឡើង ដោយផ្អែកលើសម្ព័ន្ធភាពដ៏រឹងមាំរវាងកូរ៉េខាងត្បូងនិងសហរដ្ឋអាមេរិក។ វាគឺជានិមិត្តរូបនៃឆន្ទៈរបស់យើងក្នុងការទទួលខុសត្រូវ ចំពោះសន្តិភាពនិងសន្តិសុខនៅលើឧបទ្វីបកូរ៉េ»។

ដោយឡែក រដ្ឋមន្ត្រីក្រសួងការពារជាតិកូរ៉េខាងត្បូង លោក Ahn Gyu-back ថា៖ « ការដាក់ចេញនូវផែនការមូលដ្ឋានរបស់កូរ៉េខាងត្បូង គឺសម្រាប់ធានាសុវត្ថិភាពនាវាមុជទឹកដើរដោយថាមពលនុយក្លេអ៊ែរ។ នាវានេះនឹងប្រើប្រាស់ឥន្ធនៈអ៊ុយរ៉ាញ៉ូមកម្រិតទាបបំផុត និងសាងសង់នៅកូរ៉េខាងត្បូងដោយផ្ទាល់។ កម្មវិធីសាងសង់នឹងទាញយកអត្ថប្រយោជន៍ពីឧស្សាហកម្មនុយក្លេអ៊ែរ ការសាងសង់នាវានិងសមត្ថភាពការពារជាតិរបស់កូរ៉េខាងត្បូង ខណៈទីក្រុងសេអ៊ូលនឹងរក្សាការប្តេជ្ញាចិត្តក្នុងការមិនទិញ ឬអភិវឌ្ឍអាវុធនុយក្លេអ៊ែរទេ»។

លោក Ahn និយាយថា កូរ៉េខាងត្បូងនឹងធ្វើការយ៉ាងជិតស្និទ្ធជាមួយសហរដ្ឋអាមេរិកអំឡុងពេលដំណើរការ ដោយប្រើប្រាស់ប្រេងឥន្ធនៈអ៊ុយរ៉ាញ៉ូមមានកម្រិតទាប ដើម្បីធានាថាមិនរីកសាយភាយអាវុធនុយក្លេអ៊ែរ ហើយក៏នឹងធ្វើការជាមួយទីភ្នាក់ងារថាមពលអាតូមិកអន្តរជាតិផងដែរ។

លោក Ahn បន្ថែមថា ផែនការនេះមានគោលបំណងឱ្យនាវាដំបូង ដាក់ឱ្យដំណើរការនៅក្រោយឆ្នាំ២០៣០ ។

រដ្ឋាភិបាលកូរ៉េខាងត្បូងនិយាយថា ប្រព័ន្ធជំរុញនុយក្លេអ៊ែរនឹងផ្តល់ឱ្យនាវាមុជទឹកថ្មីនូវសមត្ថភាពស្ថិតនៅក្រោមទឹកបានយូរជាងមុន និងធានាបាននូវភាពចល័តខ្ពស់ជាងនាវាមុជទឹកដែលមានស្រាប់៕

សម្រួល៖ ណឺ មិនា

The post កូរ៉េខាងត្បូងនឹងដំណើរការនាវាមុជទឹក ដើរដោយថាមពលនុយក្លេអ៊ែរលើកដំបូង យូរបំផុតមួយទសវត្សរ៍ក្រោយ appeared first on Kampuchea Thmey Daily.

យោធាកូរ៉េខាងត្បូង អះអាងថា កូរ៉េខាងជើងបាញ់មីស៊ីលផ្លោងច្រើនគ្រាប់ចូលផែនសមុទ្រជប៉ុន

Minea Neu — Tue, 26 May 2026 08:52:09 +0000

យោធាកូរ៉េខាងត្បូង បានអះអាងថា កូរ៉េខាងជើងបានបាញ់មីស៊ីលផ្លោង«បាលីស្ទិក» រយៈចម្ងាយខ្លីច្រើនគ្រាប់សំដៅទៅសមុទ្រខាងកើតនៃឧបទ្វីបកូរ៉េ (សមុទ្រជប៉ុន) នៅថ្ងៃអង្គារ ដែលជាការបង្ហាញពីសមត្ថភាពអាវុធជាបន្តបន្ទាប់ចុងក្រោយបង្អស់ដោយទីក្រុងព្យុងយ៉ាងនាឆ្នាំនេះ។

យោងតាមភ្នាក់ងារសារព័ត៌មាន AP និង CBS ផ្សាយថ្ងៃទី២៦ ខែឧសភា ឆ្នាំ២០២៦ នាយសេនាធិការចម្រុះកូរ៉េខាងត្បូងនិយាយថា មីស៊ីលទាំងនោះត្រូវបានបាញ់ចេញពីទីក្រុង Jongju នៅឆ្នេរសមុទ្រភាគខាងលិចរបស់កូរ៉េខាងជើង។ ផ្ទៃទឹកនៅទីនោះត្រូវបានគេស្គាល់ថាជាសមុទ្រលឿង ឬសមុទ្រខាងលិច ហើយជាផ្លូវបំបែករវាងឧបទ្វីបរវស់កូរ៉េទាំងពីរនិងប្រទេសចិន។

មីស៊ីលកូរ៉េខាងជើង។ រូបភាព៖ Reuters

សេចក្តីថ្លែងការណ៍ពីនាយសេនាធិការចម្រុះកូរ៉េខាងត្បូងថ្លែងថា ក្រុមយោធាយើងបានពង្រឹងឥរិយាបថឃ្លាំមើល ហើយកំពុងផ្លាស់ប្តូរព័ត៌មានពាក់ព័ន្ធយ៉ាងជិតស្និទ្ធជាមួយសហរដ្ឋអាមេរិក និងជប៉ុន។

គួរបញ្ជាក់ថា ហេតុការណ៍នេះគឺជាការបាញ់បង្ហោះអាវុធលើកដំបូងរបស់កូរ៉េខាងជើង ចាប់តាំងពីថ្ងៃទី១៩ ខែមេសា ពេលទីក្រុងព្យុងយ៉ាងបានបាញ់មីស៊ីលរយៈចម្ងាយខ្លីជាច្រើនគ្រាប់ បង្ហាញពីក្បាលគ្រាប់នុយក្លេអ៊ែរចង្កោម។

យ៉ាងណា មេដឹកនាំកូរ៉េខាងជើង លោក គីម ជុងអ៊ុន បានផ្តោតលើការពង្រីកឃ្លាំងអាវុធនុយក្លេអ៊ែរនិងមីស៊ីលរបស់ខ្លួន ចាប់តាំងពីការចរចាផ្នែកទូតចំពោះកម្មវិធីនុយក្លេអ៊ែរជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ ដួលរលំ នៅឆ្នាំ២០១៩ ។

លោក ត្រាំ បង្ហាញគោលបំណងម្តងហើយម្តងទៀតក្នុងការបន្តការចរចាជាមួយ លោក គីម ជុងអ៊ុន ប៉ុន្តែមកទល់ពេលនេះទីក្រុងព្យុងយ៉ាងបានព្រងើយកន្តើយ ចំពោះសំណើនោះ។

នៅព្រឹកថ្ងៃអង្គារ ប្រធានាធិបតីកូរ៉េខាងត្បូង លោក Lee Jae Myung បានអំពាវនាវអំឡុងពេលកិច្ចប្រជុំគណៈរដ្ឋមន្ត្រីសម្រាប់កិច្ចខិតខំប្រឹងប្រែងកាន់តែខ្លាំងឡើង ដើម្បីជំរុញវិស័យយោធារបស់ខ្លួន។

លោកសង្កត់ធ្ងន់លើបញ្ញាសិប្បនិម្មិត(AI) និងសមត្ថភាពដ្រូន ជាពិសេសសក្តានុពលនៃការទិញនាវាមុជទឹកដើរដោយថាមពលនុយក្លេអ៊ែរ តែវាជាបញ្ហាផ្នែកការទូតមួយរបស់កូរ៉េខាងត្បូងជាមួយទីក្រុងវ៉ាស៊ីនតោន៕

សម្រួល៖ ណឺ មិនា

The post យោធាកូរ៉េខាងត្បូង អះអាងថា កូរ៉េខាងជើងបាញ់មីស៊ីលផ្លោងច្រើនគ្រាប់ចូលផែនសមុទ្រជប៉ុន appeared first on Kampuchea Thmey Daily.

ពលករ និងសហគមន៍ខ្មែរជាង ៤០០០នាក់នៅក្នុងក្រុងក្វាងជូនៃប្រទេសកូរ៉េខាងត្បូង បានប្រារព្ធកម្មវិធីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ

កម្ពុជាថ្មី — Sun, 05 Apr 2026 14:44:04 +0000

ពលករ និងសហគមន៍ខ្មែរនៅប្រទេសកូរ៉េខាងត្បូងប្រមាណជាង ៤០០០នាក់ នៅថ្ងៃទី៥ ខែមេសា ឆ្នាំ២០២៦ បាននាំគ្នាចូលរួមរៀបចំកម្មវិធីសង្រ្កាន្តឆ្នាំថ្មីដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក្នុងតំបន់ក្វាងជូ ខេត្តជូឡាណាំដូ សាធារណរដ្ឋកូរ៉េ ដែលជាការរៀបចំពិធីបុណ្យចូលឆ្នាំថ្មីប្រពៃណីជាតិខ្មែរ ខណៈដែលពិធីបុណ្យចូលឆ្នាំថ្មីខិតជិតមកដល់ក្នុងពេលឆាប់ៗខាងមុខនេះ។

កម្មវិធីនេះធ្វើឡើងដើម្បីផ្តល់ភាពសប្បាយរីករាយដល់ពលករ និងសហគមន៍ខ្មែរក្នុងតំបន់ក្វាងជូ និងដើម្បីផ្សព្វផ្សាយពីទំនៀមទម្លាប់ និងប្រពៃណីខ្មែរទៅកាន់ឆាកអន្តរជាតិក៏ដូចជា ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី។ កម្មវិធីនេះ មានការគាំទ្រដោយក្រសួងការងារ និងបណ្តុះបណ្តាលវិជ្ជាជីវៈ ស្ថានទូតខ្មែរប្រចាំនៅកូរ៉េខាងត្បូង សហគមន៍ខ្មែរ និងក្រុមចលនាយុវជន យុវនារី ដើម្បីសន្តិភាព តំបន់ក្វាងជូបានរៀបចំនូវកម្មវិធីតាមបែបសាសនា ល្ខោនបាសាក់ របាំប្រពៃណី ល្បែងប្រជាប្រិយខ្មែរ និងការរាំងលេងកម្សាន្តយ៉ាងសប្បាយផងដែរសម្រាប់អ្នកចូលរួម។

ក្នុងឱកាសនោះ លោក សេង សក្តា រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ តំណាងដ៏ខ្ពង់ខ្ពស់លោករដ្ឋមន្ត្រី ហេង សួរ ក៏បានផ្ដាំផ្ញើរសួរសុខទុក្ខពីសំណាក់ លោករដ្ឋមន្ត្រី ជាពិសេស សម្ដេចមហាបវរធិបតី ហ៊ុន ម៉ាណែត និងសម្ដេចអគ្គមហាសេនាបតីតេជោ ហ៊ុន សែន ដែលតែងតែយកចិត្តទុកដាក់ ចំពោះបងប្អូនពលក
ពលការីនី និងសហគមន៍ខ្មែរនៅកូរ៉េ៕

The post ពលករ និងសហគមន៍ខ្មែរជាង ៤០០០នាក់នៅក្នុងក្រុងក្វាងជូនៃប្រទេសកូរ៉េខាងត្បូង បានប្រារព្ធកម្មវិធីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ appeared first on Kampuchea Thmey Daily.

ខ្មែរនៅកូរ៉េខាងត្បូងជាង ៣ពាន់នាក់ ជួបជុំគ្នាអបអរចូលឆ្នាំថ្មី

កម្ពុជាថ្មី — Sun, 22 Mar 2026 11:29:23 +0000

(សាធារណរដ្ឋកូរ៉េ)៖ ពលករ និងសមាគមន៍ខ្មែរនៅប្រទេសកូរ៉េខាងត្បូងប្រមាណជាង៣០០០នាក់ នៅថ្ងៃទី២២ ខែមីនា ឆ្នាំ២០២៦ បាននាំគ្នាចូលរួមរៀបចំកម្មវិធីសង្រ្កាន្តឆ្នាំថ្មីដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ក្នុងតំបន់មីយាំង ខេត្តក្យង់សាងណាំដូ សាធារណរដ្ឋកូរ៉េដែលជាការរៀបចំពិធីបុណ្យចូលឆ្នាំថ្មីមុនបង្អស់ ខណៈដែលពិធីបុណ្យចូលឆ្នាំថ្មីខិតជិតមកដល់។

កម្មវិធីនេះធ្វើឡើងដើម្បីផ្តល់ភាពសប្បាយរីករាយដល់ពលករ និងសហគមន៍ខ្មែរ ក្នុងតំបន់មីយាំង និងដើម្បីផ្សព្វផ្សាយពីទំនៀមទម្លាប់ និងប្រពៃណីខ្មែរទៅកាន់ឆាកអន្តរជាតិក៏ដូចជា ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំមមី។ កម្មវិធីនេះ មានការគាំទ្រនិងសហការដោយក្រសួងការងារ និងបណ្តុះបណ្តាលវិជ្ជាជីវៈ ស្ថានទូតខ្មែរប្រចាំនៅកូរ៉េខាងត្បូង និងសមាគមយុវជនខ្មែរ តំបន់មីយាំង បានរៀបចំនូវកម្មវិធីសាសនា គោរពវិញ្ញាណក្ខន្ធវីរៈកងទ័ព ល្បែងប្រជាប្រិយខ្មែរ និងការរាំងលេងកម្សាន្តយ៉ាងសប្បាយផងដែរសម្រាប់អ្នកចូលរួម។

បន្ថែមពីនេះ អ្នកចូលរួមទាំងអស់ ក៏បានស្រស់ស្រូបអាហារយ៉ាងឆ្ងាញ់ពិសារពីស្តង់ម្ហូបអាហារប្រមាណជាង ៣០ស្តង់ដែលជាអាហារខ្មែរផងដែរ៕

The post ខ្មែរនៅកូរ៉េខាងត្បូងជាង ៣ពាន់នាក់ ជួបជុំគ្នាអបអរចូលឆ្នាំថ្មី appeared first on Kampuchea Thmey Daily.

កូរ៉េខាងត្បូងផ្តើមអភិវឌ្ឍប្រព័ន្ធការពារ និងប្រព័ន្ធរ៉ាដាថ្មីផ្ទាល់ខ្លួន ក្រោយអាមេរិកដកប្រព័ន្ធការពារមីស៊ីល Patriot និង THAAD

Minea Neu — Tue, 17 Mar 2026 10:34:50 +0000

កាលពីសប្តាហ៍មុនកូរ៉េខាងជើងបាញ់មីស៊ីលផ្លោងចំនួន ១០គ្រាប់ចូលទៅក្នុងសមុទ្រជប៉ុន បង្ហាញពីតម្រូវការរបស់កូរ៉េខាងត្បូងស្វែងរកប្រព័ន្ធការពារមីស៊ីលដែលអាចទុកចិត្តបាន។

ជាអកុសល ការផ្លោងនេះស្របពេលជាមួយនឹងរបាយការណ៍ថា សហរដ្ឋអាមេរិកកំពុងដកប្រព័ន្ធការពារមីស៊ីលមួយចំនួនចេញពីកូរ៉េខាងត្បូង ដើម្បីបង្កើនសមត្ថភាពរបស់ខ្លួននៅមជ្ឈិមបូព៌ា អំឡុងពេលសង្គ្រាមដែលកំពុងបន្តជាមួយអ៊ីរ៉ង់។

យោងតាមកាសែត The Washington Post រាយការណ៍នៅថ្ងៃទី៩ខែមីនា ថា មន្ទីរបញ្ចកោណកំពុងផ្ទេរប្រព័ន្ធការពារមីស៊ីល Patriot និងប្រព័ន្ធការពារមីស៊ីលកម្រិតខ្ពស់ (THAAD) ពីកងកម្លាំងអាមេរិកនៅកូរ៉េខាងត្បូង (USFK) ទៅកាន់មជ្ឈិមបូព៌ា។

ប្រព័ន្ធការពារមីស៊ីលកម្រិតខ្ពស់ (THAAD) របស់កូរ៉េខាងត្បូង។ រូបភាព៖ Reuters

ចំណែកប្រព័ន្ធផ្សព្វផ្សាយកូរ៉េខាងត្បូងក៏បានរាយការណ៍ពីចំនួនជើងហោះហើរខ្ពស់មិនធម្មតាដោយយន្តហោះដឹកជញ្ជូនយោធាអាមេរិកពីមូលដ្ឋានទ័ពអាកាស Osan ទោះបីជាសហរដ្ឋអាមេរិករក្សាការសម្ងាត់អំពីសកម្មភាពក៏ដោយ។

ប្រធានាធិបតី Lee Jae-myung លើកឡើងកាលថ្ងៃទី១០ ខែមីនា ថាកងកម្លាំងសហរដ្ឋអាមេរិក (USFK) អាចនឹងបញ្ជូនប្រព័ន្ធការពារដែនអាកាសមួយចំនួន ទៅក្រៅប្រទេសស្របតាមតម្រូវការយោធារបស់គេ។

ក្នុងអត្ថបទមួយកាលពីថ្ងៃពុធ ដោយកាសែត The Korea Herald និយាយថា៖ «ប្រព័ន្ធ Patriot និង THAAD គឺជាចំណុចកណ្តាលនៃខែលការពារអាមេរិក-កូរ៉េខាងត្បូងប្រឆាំងនឹងមីស៊ីលផ្លោងរបស់កូរ៉េខាងជើង ដូច្នេះការដកខ្លួនរបស់ពួកគេនឹងមានផលវិបាកសន្តិសុខធ្ងន់ធ្ងរសម្រាប់ទីក្រុងសេអ៊ូល»។

ក្តីបារម្ភមួយទៀតគឺថា ប្រព័ន្ធទាំងនេះប្រហែលជាមិនវិលត្រឡប់មកប្រទេសកូរ៉េខាងត្បូងវិញទេ ពេលដែលវិបត្តិនៅមជ្ឈិមបូព៌ាបានថយចុះ ខណៈរដ្ឋបាលប្រធានាធិបតីអាមេរិក ដូណាល់ ត្រាំ ដាក់សម្ពាធលើសម្ព័ន្ធមិត្តឱ្យទទួលខុសត្រូវលើវិស័យការពារជាតិផ្ទាល់ខ្លួន។

គួរបញ្ជាក់ថាអាមេរិកបានដាក់ពង្រាយប្រពន្ធ័ការពារមីស៊ីជាន់កម្រិតខ្ពស់ THAAD ក្នុងកូរ៉េខាងត្បូងក្នុងឆ្នាំ ២០១៧ ដោយលើកឡើងពីការគំរាមកំហែងពីកូរ៉េខាងជើង។

ទោះបីអាមេរិកដកប្រព័ន្ធការពារដែនអាកាសទាំងនោះក្តី ក៏កូរ៉េខាងត្បូងកំពុងពន្លឿនកម្មវិធីការពារមីស៊ីល និងដែនអាកាសកូរ៉េ (KAMD) ផ្តោតលើការកសាងប្រព័ន្ធការពារក្នុងស្រុក ជាជាងពឹងផ្អែកទាំងស្រុងលើទ្រព្យសម្បត្តិយោធាសហរដ្ឋអាមេរិក។ នេះបើយោងតាម DW ផ្សាយថ្ងៃទី១៦ ខែមីនា ឆ្នាំ២០២៦ ។

មួយទៀតផ្នែកទៀត ប្រទេសនេះកំពុងអភិវឌ្ឍប្រពន្ធ័ការពារថ្មី រួមបញ្ចូលទាំងមីស៊ីលដីទៅអាកាសរយៈចម្ងាយឆ្ងាយ បណ្តាញរ៉ាដាទំនើប ប្រព័ន្ធបញ្ជា និងត្រួតពិនិត្យត្រូវបានរចនាឡើងដើម្បីស្ទាក់ចាប់មីស៊ីលផ្លោងរបស់កូរ៉េខាងជើង។

វិធីសាស្រ្តការពារជាស្រទាប់ៗ ទីក្រុងសេអ៊ូលមានបំណងបង្កើតខែលពហុស្រទាប់រួមបញ្ចូលគ្នានូវប្រព័ន្ធដែលមានស្រាប់អាមេរិក (ដូចជា THAAD) ជាមួយនឹងប្រព័ន្ធស្ទាក់ចាប់ដែលផលិតនៅកូរ៉េ។

មិនតែប៉ុណ្ណោះប្រទេសនេះមានឯករាជ្យភាពជាយុទ្ធសាស្ត្រ ពីការដកប្រព័ន្ធ Patriot ជាការដាស់តឿនមួយ ជំរុញឱ្យកូរ៉េខាងត្បូងវិនិយោគកាន់តែច្រើនក្នុងឧស្សាហកម្មការពារជាតិរបស់ខ្លួន អាចរក្សាការទប់ស្កាត់បាន ទោះបីជាការគាំទ្ររបស់សហរដ្ឋអាមេរិកផ្លាស់ប្តូរទៅតំបន់ផ្សេងទៀតក៏ដោយ៕

ប្រែសម្រួល៖ ណឺ មិនា

The post កូរ៉េខាងត្បូងផ្តើមអភិវឌ្ឍប្រព័ន្ធការពារ និងប្រព័ន្ធរ៉ាដាថ្មីផ្ទាល់ខ្លួន ក្រោយអាមេរិកដកប្រព័ន្ធការពារមីស៊ីល Patriot និង THAAD appeared first on Kampuchea Thmey Daily.

យោធាកូរ៉េខាងត្បូងនិងជប៉ុន ថា កូរ៉េខាងជើងបាញ់មីស៊ីលចូលដែនសមុទ្រជប៉ុន

Minea Neu — Wed, 28 Jan 2026 03:37:46 +0000

មន្ត្រីយោធាកូរ៉េខាងត្បូង និងជប៉ុនបានឱ្យដឹងដូចគ្នាថា យោធាកូរ៉េខាងជើងបានបាញ់សាកល្បងនូវមីស៊ីលផ្លោងរយៈចម្ងាយខ្លីចំនួនពីរគ្រាប់កាលពីរសៀលថ្ងៃអង្គារ។

ឧត្តមនាវីឯក Kim Myung-soo ប្រធានកូរ៉េខាងត្បូង។ Reuters

យោងតាម ABC News, ការបាញ់ផ្លោងនេះ បានធ្វើឡើងប៉ុន្មានម៉ោង បន្ទាប់ពី លោក Elbridge Colby អនុរដ្ឋមន្ត្រីក្រសួងការពារជាតិ (ក្រសួងសង្គ្រាម) សម្រាប់គោលនយោបាយអាមេរិក បានបញ្ចប់ដំណើរទស្សនកិច្ចរបស់លោកទៅកាន់កូរ៉េខាងត្បូង និងបានទៅដល់ប្រទេសជប៉ុន កាលពីព្រឹកថ្ងៃអង្គារ។

មិនតែប៉ុណ្ណោះ ទីក្រុងសេអ៊ូលបានរងនូវការចោទប្រកាន់ពីកូរ៉េខាងជើងពីទីក្រុងព្យុងយ៉ាង [Pyongyang] ថា កូរ៉េខាងត្បូងបានរំលោភបំពានដែនអាកាសរបស់កូរ៉េខាងជើង ដោយការប្រើប្រាស់យន្តហោះគ្មានមនុស្សបើក [Drone] កាលខែមករា និងខែកញ្ញាឆ្នាំមុន។

បន្ថែមពីនេះក្រសួងការពារជាតិជប៉ុនបានឆ្លើយតបនៅក្នុងសេចក្តីថ្លែងការណ៍មួយថា៖ «ការបាញ់ [មីស៊ីរបស់កូរ៉េខាងជើង]នេះ គឺជាការរំលោភលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ហើយបានបង្កបញ្ហាធ្ងន់ធ្ងរទាក់ទងនឹងសុវត្ថិភាពរបស់ប្រជាជនជប៉ុន»។

សេចក្តីថ្លែងការណ៍ថ្លែងជាភាសាជប៉ុនដែលត្រូវបានបកប្រែដោយ ABC News ថា៖ «ប្រទេសជប៉ុនបានធ្វើការតវ៉ាប្រឆាំងនឹងកូរ៉េខាងជើងយ៉ាងខ្លាំង ជាពិសេសបានថ្កោលទោសចំពោះទង្វើរបស់ពួកគេ»។

គួរបញ្ជាក់ថា មីស៊ីលត្រូវបានបាញ់ចេញពីតំបន់ព្យុងយ៉ាងនៅម៉ោងប្រហែល ៤ រសៀល។ មន្ត្រីជប៉ុន និងកូរ៉េខាងត្បូងបាននិយាយថា កាំជ្រួចទាំងពីរគ្រាប់បានហោះក្នុងរយៈចម្ងាយជិត ៣៥០គីឡូម៉ែត្រ មុនពេលធ្លាក់ចូលទៅក្នុងសមុទ្ររបស់ជប៉ុន។

មិនតែមិនប៉ុណ្ណោះ អគ្គសេនាធិការចម្រុះរបស់កូរ៉េខាងត្បូងបានលើកឡើងនៅក្នុងសេចក្តីថ្លែងការណ៍របស់ខ្លួនថា៖« អាជ្ញាធរស៊ើបការណ៍របស់ទីក្រុងសេអ៊ូលបានតាមដានការបាញ់បង្ហោះនេះ និងចែករំលែកព័ត៌មានជាមួយប្រទេសជប៉ុន និងសហរដ្ឋអាមេរិកផងដែរ»។

ក្រោមការដឹកនាំរបស់កូរ៉េខាងត្បូងនិងសហរដ្ឋអាមេរិក យោធាកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយថា៖ «ជំហរការពាររួមបញ្ចូលគ្នា យោធាកូរ៉េខាងត្បូងកំពុងតាមដានយ៉ាងដិតដល់នូវការវិវឌ្ឍន៍ផ្សេងៗរបស់កូរ៉េខាងជើង និងរក្សាបាននូវសមត្ថភាព និងការត្រៀមខ្លួនជាស្រេចដើម្បីឆ្លើយតបចំពោះការបង្កហេតុណាមួយពីសត្រូវ» ។

ចំណែកជប៉ុនបាននិយាយនៅក្នុងសេចក្តីថ្លែងការណ៍របស់ខ្លួនថា៖«រដ្ឋាភិបាលបានផ្តល់ព័ត៌មានដល់យន្តហោះ និងកប៉ាល់ដែលកំពុងធ្វើដំណើរក្នុងតំបន់ ប៉ុន្តែនៅពេលនេះមិនមានរបាយការណ៍ណាមួយ ដែលបញ្ជាក់ថាមានការខូចខាតនៅឡើយ»៕

ប្រែសម្រួល៖ ណឺ មិនា

The post យោធាកូរ៉េខាងត្បូងនិងជប៉ុន ថា កូរ៉េខាងជើងបាញ់មីស៊ីលចូលដែនសមុទ្រជប៉ុន appeared first on Kampuchea Thmey Daily.

កូរ៉េខាងជើងចាត់ទុកកូរ៉េខាងត្បូងជា«សត្រូវផ្តាច់មុខ» ក្រោយបង្ហោះដ្រូនស៊ើបការណ៍

Minea Neu — Sun, 11 Jan 2026 03:31:00 +0000

ប្រព័ន្ធផ្សព្វផ្សាយរដ្ឋរបស់កូរ៉េខាងជើង KCNA បានផ្សាយកាលថ្ងៃសៅរ៍ថា កូរ៉េខាងត្បូងបានបង្ហោះដ្រូន (យន្តហោះគ្មានមនុស្សបើក) មួយទៀត ចូលទៅក្នុងដែនអាកាសរបស់កូរ៉េខាងជើង កាលពីថ្ងៃទី៤ខែមករា ដោយកូរ៉េខាងជើងចោទថានេះជាបទរំលោភបំពានលើអធិបតេយ្យភាពរបស់ខ្លួន។

លោក គីម ជុងអ៊ុន។ Reuters

យោងតាមរ៉យទ័រ អ្នកវិភាគរបស់កូរ៉េខាងជើងបានប្រកាសថា រឿងនេះបានកើតឡើងមុនពេលកូរ៉េខាងជើងធ្វើសមាជបក្សពលករដ៏សំខាន់មួយ ដែលនឹងដាក់ចេញនូវគោលនយោបាយសម្រាប់រយៈពេលប្រាំឆ្នាំខាងមុខ កំណត់ដំណាក់កាលដើម្បីពង្រឹងនូវវោហាសាស្ត្ររបស់មេដឹកនាំ គីម ជុងអ៊ុន ដែលថាកូរ៉េខាងត្បូងជាបរទេស និងជាសត្រូវផ្តាច់មុខ។

KCNA បានបន្តទៀតថា យន្តហោះគ្មានមនុស្សបើកដែលមានប្រភពមកពីកោះមួយក្នុងទីក្រុង Incheon របស់កូរ៉េខាងត្បូង បានហោះបានចម្ងាយ៨គីឡូម៉ែត្រ មុនពេលត្រូវបានបាញ់ទម្លាក់នៅខាងក្នុងដែនអាកាសកូរ៉េខាងជើង។ តាមការផ្សាយនោះ ដ្រូននោះត្រូវបានឃ្លាំមើលដោយកាំមេរ៉ារបស់កូរ៉េខាងជើងរួចហើយ ដើម្បីកត់ត្រានូវកន្លែងសំខាន់ៗដែលហោះមក។

KCNA បានបន្តថា ឧបទ្ទវហេតុនេះ បន្ទាប់ពីការលុកលុយដោយយន្តហោះគ្មានមនុស្សបើករបស់កូរ៉េខាងត្បូងមួយផ្សេងទៀតកើតឡើងកាលពីខែកញ្ញា តែត្រូវបានបាញ់ទម្លាក់នៅក្រុង Kaesong ។

ការផ្សាយរបស់សារព័ត៌មានរដ្ឋរបស់កូរ៉េខាងជើងបានបន្តថា៖ «សូម្បីតែបន្ទាប់ពីការផ្លាស់ប្តូររបបនេះហើយក៏ដោយ… (កូរ៉េខាងត្បូង) ពួកគេនៅតែបន្តបង្កហេតុ ដោយដ្រូននៅជិតព្រំដែនដដែល។ រឿងនេះ បង្ហាញថា កូរ៉េខាងត្បូងពិតជាសត្រូវដ៏ធំរបស់យើងមែន»។

គួរឱ្យដឹងផងដែរថា ចាប់តាំងពីប្រធានាធិបតីកូរ៉េខាងត្បូង លោក លី ជេម្យ៉ង ចូលកាន់តំណែងកាលពីខែមិថុនាមក ប្រទេសកូរ៉េខាងជើង បានបដិសេធចំពោះការប៉ុនប៉ងការផ្សះផ្សាពីរដ្ឋបាលរបស់លោកលី។

តែយ៉ាងណា រ៉យទ័រមិនអាចទទួលបានការឆ្លើយតបពីអ្នកនាំពាក្យរដ្ឋាភិបាលកូរ៉េខាងត្បូង ចំពោះសំណើអត្ថាធិប្បាយលើរឿងបង្ហោះដ្រូននៅឡើយទេ។

ប្រែសម្រួល៖ ណឺ មិនា

The post កូរ៉េខាងជើងចាត់ទុកកូរ៉េខាងត្បូងជា«សត្រូវផ្តាច់មុខ» ក្រោយបង្ហោះដ្រូនស៊ើបការណ៍ appeared first on Kampuchea Thmey Daily.

ប្រមុខរដ្ឋចិននិងកូរ៉េខាងត្បូង សន្យាពង្រឹងទ្វេភាគី ចំពេលពិភពលោកតានតឹងខ្លាំង

Minea Neu — Tue, 06 Jan 2026 03:26:04 +0000

ប្រធានាធិបតីចិន ស៊ី ជីនពីង និងសមភាគីកូរ៉េខាងត្បូង លោក លី ជេម្យ៉ង បានជួបភាក្សាគ្នាក្នុងពេលដែលពិភពលោកកំពុងជួបវិបត្តិ ជាពិសេសកម្តៅភូមិសាស្រ្តនយោបាយនៅតំបន់អាស៊ីខាងកើត។

សារព័ត៌មានរដ្ឋចិន Xinhua បានផ្សាយថា ប្រមុខដឹកនាំទាំងពីរបានជួបប្រជុំគ្នាពីរដងរួចមកហើយ ជាពិសេសបានធ្វើទស្សនកិច្ចទៅវិញទៅមក ដោយឆ្លុះបញ្ចាំងពីសារៈសំខាន់ដែលភាគីទាំងពីរភ្ជាប់ទំនាក់ទំនងចិន-កូរ៉េខាងត្បូង។ ក្នុងនាមជាមិត្តភក្តិ និងអ្នកជិតខាងល្អ ចិននិងកូរ៉េខាងត្បូង គួរតែបង្កើនការផ្លាស់ប្តូរនិងរក្សាទំនាក់ទំនងឱ្យបានញឹកញាប់បំផុត។

លោក លី និង លោក ស៊ី។ Reuters

ប្រធានាធិបតីចិនលោក ស៊ី ជីនពីង បានជួបពិភាក្សាជាមួយប្រធានាធិបតីកូរ៉េខាងត្បូង លោក លី ជេម្យ៉ង នៅទីក្រុងប៉េកាំងកាលពីថ្ងៃចន្ទ។ លោក ស៊ី បានប្រាប់សមភាគី លោក លី ថា ប្រទេសចិនចាត់ទុកនូវទំនាក់ទំនងជាមួយកូរ៉េខាងត្បូងយ៉ាងជិតស្នទ្ធិ និងដាក់ក្នុងរបៀបវារៈការទូតនៅតំបន់របស់ខ្លួន ធានារក្សាបាននូវស្ថិរភាពនិងគោលនយោបាយនានាចំពោះកូរ៉េខាងត្បូង។

លោក ស៊ី បានបន្ថែមថា ប្រទេសចិនមានឆន្ទៈក្នុងការធ្វើការជាមួយកូរ៉េខាងត្បូងដើម្បីរក្សាទិសដៅនៃកិច្ចសហប្រតិបត្តិការមិត្តភាពយ៉ាងម៉ឺងម៉ាត់ ប្រកាន់ខ្ជាប់នូវគោលការណ៍នៃផលប្រយោជន៍ទៅវិញទៅមក និងលទ្ធផលឈ្នះ-ឈ្នះ លើកកម្ពស់ភាពជាដៃគូយុទ្ធសាស្ត្រទ្វេភាគី ឱ្យមានប្រសិទ្ធភាពទាំងរដ្ឋ និងប្រជាជនទាំងសងខាង ដើម្បីសន្តិភាព និងការអភិវឌ្ឍក្នុងតំបន់ និងពិភពលោក។

គួរឱ្យដឹងផងដែរថា ចិននិងកូរ៉េខាងត្បូងបានពួតដៃគ្នា ក្នុងការនាំយកនូវជ័យជម្នះក្នុងសង្គ្រាមលោកលើកទី២ ការពារសន្តិភាព និងស្ថិរភាពនៅអាស៊ីឦសាន។

លោក ស៊ី បានរំឭកថា កាលពីជាង ៨០ឆ្នាំមុនប្រជាជននៃប្រទេសទាំងពីរបានលះបង់ចំពោះជាតិយ៉ាងធំធេង និងទទួលបានជ័យជំនះប្រឆាំងនឹងរបបយោធានិយមជប៉ុន។

លោកបានបន្ថែមថា ប្រទេសចិននិងកូរ៉េខាងត្បូង មានទំនួលខុសត្រូវយ៉ាងសំខាន់រក្សាសន្តិភាពក្នុងតំបន់ និងលើកកម្ពស់ការអភិវឌ្ឍជាសាកល ព្រមទាំងចែករំលែកនូវផលប្រយោជន៍រួមជាច្រើន ដោយសម្គាល់ថាប្រទេសទាំងពីរគួរតែឈរលើភាពត្រឹមត្រូវនៃប្រវត្តិសាស្ត្រ និងធ្វើការជ្រើសរើសយុទ្ធសាស្ត្រវៃឆ្លាត។

លើសពីនេះ លោក ស៊ី និងលោក លី បានធ្វើជាសាក្សីក្នុងការចុះហត្ថលេខាលើឯកសារកិច្ចសហប្រតិបត្តិការចំនួន១៥ លើវិស័យនានារួមទាំង ការច្នៃប្រឌិតផ្នែកវិទ្យាសាស្ត្រ និងបច្ចេកវិទ្យា បរិស្ថានអេកូឡូស៊ី ការដឹកជញ្ជូន និងកិច្ចសហប្រតិបត្តិការសេដ្ឋកិច្ច ពាណិជ្ជកម្ម ៕

ប្រែសម្រួល៖ ណឺ មិនា

The post ប្រមុខរដ្ឋចិននិងកូរ៉េខាងត្បូង សន្យាពង្រឹងទ្វេភាគី ចំពេលពិភពលោកតានតឹងខ្លាំង appeared first on Kampuchea Thmey Daily.

កូរ៉េខាង​ត្បូង Archives - Kampuchea Thmey Daily

យោធាកូរ៉េ​ខាង​ត្បូង ​អះអាង​ថា ​កូរ៉េ​ខាង​ជើង​បាញ់​មីស៊ីល​ផ្លោងច្រើន​គ្រាប់​​​ចូល​ផែន​​សមុទ្រ​ជប៉ុ​ន​

ខ្មែរ​នៅ​កូរ៉េខាងត្បូង​ជាង ​​៣ពាន់នាក់ ជួបជុំគ្នាអបអរ​ចូល​ឆ្នាំ​ថ្មី​

​យោធា​កូរ៉េខាង​ត្បូង​និង​ជប៉ុន​ ថា កូរ៉េ​ខាង​ជើង​បាញ់​មីស៊ីល​​ចូល​ដែន​សមុទ្រ​ជប៉ុន​

កូរ៉េខាងជើង​ចាត់​ទុក​​​​កូរ៉េ​​ខាង​​ត្បូង​​​​​​ជា​«សត្រូវ​ផ្តាច់​មុខ» ​ក្រោយ​បង្ហោះ​ដ្រូនស៊ើបការណ៍

​ប្រមុខរដ្ឋចិន​និង​កូរ៉េខាងត្បូង ​សន្យា​​ពង្រឹង​​​ទ្វេ​ភាគី ចំពេល​ពិភពលោក​តានតឹងខ្លាំង​​

កូរ៉េខាងត្បូង Archives - Kampuchea Thmey Daily

យោធាកូរ៉េខាងត្បូង អះអាងថា កូរ៉េខាងជើងបាញ់មីស៊ីលផ្លោងច្រើនគ្រាប់ចូលផែនសមុទ្រជប៉ុន

ខ្មែរនៅកូរ៉េខាងត្បូងជាង ៣ពាន់នាក់ ជួបជុំគ្នាអបអរចូលឆ្នាំថ្មី

យោធាកូរ៉េខាងត្បូងនិងជប៉ុន ថា កូរ៉េខាងជើងបាញ់មីស៊ីលចូលដែនសមុទ្រជប៉ុន

កូរ៉េខាងជើងចាត់ទុកកូរ៉េខាងត្បូងជា«សត្រូវផ្តាច់មុខ» ក្រោយបង្ហោះដ្រូនស៊ើបការណ៍

ប្រមុខរដ្ឋចិននិងកូរ៉េខាងត្បូង សន្យាពង្រឹងទ្វេភាគី ចំពេលពិភពលោកតានតឹងខ្លាំង