ព័ត៌មានអន្ដរជាតិ

កូរ៉េខាងត្បូងចេញការព្រមានរលកកំដៅវាយលុកលើកដំបូង

បានផុស

១៥ វិនាទី មុន

នៅ

ថ្ងៃអាទិត្យ ១២ កក្កដា ២០២៦

ដោយ

ប្រទេសកូរ៉េខាងត្បូង បានចេញសេចក្តីជូនដំណឹងបន្ទាន់អំពីរលកកំដៅជាលើកដំបូងរបស់ខ្លួននៅថ្ងៃទី១២ ខែកក្កដា ក្រោមប្រព័ន្ធព្រមានថ្មីមួយដែលត្រូវបានណែនាំនៅឆ្នាំ ២០២៦ ដោយណែនាំប្រជាជនឱ្យបញ្ឈប់សកម្មភាពនៅខាងក្រៅផ្ទះ និងស្ថិតនៅទីកន្លែងដែលត្រជាក់។

ប្រជាជនកូរ៉េខាងត្បូងធ្វើដំណើរតាមដងផ្លូវនៅថ្ងៃសៅរ៍ ក្រោមការព្រមានអំពីរលកកម្តៅ។ Yonhap

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងការផ្សាយរបស់ AFP ក្រោមប្រព័ន្ធតាមានអាកាសធាតុថ្មីនេះ ការជូនដំណឹងបន្ទាន់អំពីរលកកំដៅត្រូវបានចេញនៅពេលដែលតំបន់ដែលគ្រប់តាមលក្ខណៈវិនិច្ឆ័យសម្រាប់ការព្រមានរលកកំដៅត្រូវបានព្យាករណ៍ថា នឹងឃើញសីតុណ្ហភាពយ៉ាងហោចណាស់ ៣៨អង្សាសេ ឬសីតុណ្ហភាពយ៉ាងហោចណាស់ ៣៩ អង្សាសេសម្រាប់រយៈពេលមួយថ្ងៃ។

មន្ត្រី បាននិយាយថា ប្រព័ន្ធព្រមានថ្មីត្រូវបានណែនាំដើម្បីដោះស្រាយបានកាន់តែប្រសើរឡើងជាមួយនឹងរលកកំដៅកើនឡើងនៅក្នុងប្រទេសកូរ៉េខាងត្បូង ដែលកាន់តែយូរ និងខ្លាំងក្លាជាងមុន។

បណ្តាញសារព័ត៌មាន The Korean Times បានរាយការណ៍ថា ការព្រមានគ្រាអាសន្នអំពីរលកកំដៅត្រូវបានចេញសម្រាប់ទីក្រុង Gyeongsan និង Pohang ក្នុងខេត្ត Gyeongsang ភាគខាងជើងប្រទេសកូរ៉េខាងត្បូង នៅម៉ោង ១០ព្រឹកថ្ងៃអាទិត្យ ដែលជាលើកដំបូងដែលការជូនដំណឹងបែបនេះត្រូវបានចេញចាប់តាំងពីប្រព័ន្ធតាមដានអាកាសធាតុថ្មីនេះត្រូវបានដាក់ដំណើរការ។

សេចក្តីរាយការណ៍នោះ បានកត់សម្គាល់ថា ការព្រមាននេះអនុវត្តចំពោះតំបន់ដែលសីតុណ្ហភាពអតិបរមាប្រចាំថ្ងៃដែលបានដឹងបានឡើងដល់ ៣៥ អង្សាសេ ឬខ្ពស់ជាងនេះរយៈពេលពីរថ្ងៃ ឬច្រើនជាងនេះ។

កំដៅខ្លាំងគ្រប់គ្រាន់ដើម្បីបង្កឱ្យមានការព្រមាននេះ បង្កហានិភ័យខ្ពស់នៃជំងឺដែលទាក់ទងនឹងកំដៅ។ អ្នកស្រុកត្រូវបានណែនាំឱ្យបញ្ឈប់សកម្មភាពក្រៅផ្ទះជាបន្ទាន់ ផ្លាស់ទៅកន្លែងជ្រកកោន ឬកន្លែងដែលមានម្លប់ និងផឹកទឹកពេលសម្រាក៕

រ៉ាន់ រើយ