យោងតាមសេចក្ដីថ្លែងការណ៍របស់ក្រសួងព្រះបរមរាជវាំង បានទម្លាយឱ្យដឹងថា មានជនអនាមិក បានបង្កើតគណនីហ្វេសប៊ុក ដែលបានបង្ហោះចែកចាយលើបណ្តាញទំនាក់ទំនងសង្គម ហើយដោយបានប្រើប្រាស់ព្រះនាមរបស់សម្តេចព្រះមហាក្សត្រី ព្រះវររាជមាតាជាតិខ្មែរ។ ចំពោះគណនីទាំងនេះ ក្រសួងព្រះបរមរាជវាំង បានប្រកាសបដិសេធ និងអះអាងថា មិនមែនជាគណនីផ្លូវការរបស់ហ្លួងម៉ែឡើយ។

បើតាមក្រសួងព្រះបរមរាជវាំង មានតែវេបសាយចំនួន២ប៉ុណ្ណោះ ដែលបានប្រើជាផ្លូវការរបស់ព្រះករុណា ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ គឺវេបសាយទី១ www.norodomsihamoni.org/ និងទី២ គឺ  www.norodomsihanouk.info/។

ក្រៅពីវេបសាយផ្លូវការទាំង២ខាងលើ ពុំមានប្រព័ន្ធបណ្តាញទំនាក់ទំនងសង្គមជាផ្លូវការរបស់ព្រះមហាក្សត្រ និងសម្តេចព្រះមហាក្សត្រី ក៏ដូចជាក្រសួងព្រះបរមរាជវាំងឡើយ។

ភ្ជាប់នឹងការបញ្ជាក់នេះ ក្រសួងព្រះបរមរាជវាំង បានប្រាប់អាជ្ញាធរមានសមត្ថកិច្ចចាត់វិធានការជាបន្ទាន់ឱ្យបានម៉ឺងម៉ាត់បំផុត តាមរដ្ឋធម្មនុញ្ញ និងច្បាប់ជាធរមានរបស់កម្ពុជា៕

The post ព្រះបរមរាជវាំងឱ្យសមត្ថកិច្ចប្រើវិធានការច្បាប់ចំពោះជនក្លែងព្រះនាមហ្លួងម៉ែ លើបណ្ដាញសង្គម appeared first on Kampuchea Thmey Daily.

តំណែងជាទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង របស់លោកអ្នកឧកញ៉ា មហាភក្តី គង់ បញ្ញា គឺជាតំណែងចាស់របស់សម្ដេច មហាមន្ត្រី គុយ សុផល មុនពេលតែងតាំងជាឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ជំនួសសម្ដេចចៅហ្វាវាំង គង់ សំអុល ដែលបានទទួលមរណភាព។

ព្រះរាជក្រឹត្យរបស់ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា នៅថ្ងៃទី០២ ខែកញ្ញា ឆ្នាំ២០២៤នេះ បានប្រោសព្រះរាជទានគោរមងារជូនលោកស្រី គង់ បញ្ញា ជា «លោកអ្នកឧកញ៉ា មហាភក្តី គង់ បញ្ញា»។ ដោយឡែក ព្រះរាជក្រឹត្យរបស់ព្រះករុណាព្រះមហាក្សត្រមួយច្បាប់ទៀត នៅថ្ងៃដដែលនេះ គឺតែងតាំងមុខតំណែង លោកអ្នកឧកញ៉ា មហាភក្តី គង់ បញ្ញា ជាទេសរដ្ឋមន្ត្រី ទទួលបន្ទុកកិច្ចការទូទៅអមក្រសួងព្រះបរមរាជវាំង។

ការប្រោសព្រះរាជទាន និងការត្រាស់បង្គាប់តែងតាំងនេះ បានធ្វើឡើងបន្ទាប់ពីមានសំណើក្រាបបង្គំទូលថ្វាយរបស់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ៕

The post លោកស្រី គង់ បញ្ញា ទទួលងារជា«លោកអ្នកឧកញ៉ាមហាភក្តី»និងត្រូវទទួលបន្ទុកកិច្ចការទូទៅអមក្រសួងព្រះបរមរាជវាំង appeared first on Kampuchea Thmey Daily.

ការបញ្ជាក់របស់ក្រសួងព្រះបរមរាជវាំងពេលនេះ ក្រោយមានម្ចាស់គណនីតិកតុក (Tik Tok) មួយ បានអះអាងខ្លួនជាអនុជរបស់ព្រះករុណាព្រះមហាក្សត្រនៃកម្ពុជា ដែលមានឈ្មោះថា នរោត្តម សូរិយាវង្ស និង ស៊ីសុវត្ថិ សីណាក់វង្ស។ ជុំវិញករណីនេះ ក្រសួងព្រះបរមរាជវាំង បានប្រកាសបដិសេធចំពោះបុគ្គលជាម្ចាស់គណនីតិកតុកនេះ ដែលបានបង្ហោះ ចែកចាយក្នុងប្រព័ន្ធបណ្តាញទំនាក់ទំនងសង្គម។ ក្រសួងព្រះបរមរាជវាំង អះអាងថា បុគ្គលនេះមិនមែនជាសែស្រឡាយព្រះរាជវង្សានុវង្សដែលទទួលស្គាល់ ដោយព្រះបរមរាជវាំងឡើយ។

ក្រសួងព្រះបរមរាជវាំង បានបញ្ជាក់បន្ថែមថា ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គមានព្រះអនុជបង្កើតតែមួយព្រះអង្គគត់ គឺសម្តេច នរោត្តម នរិន្ទ្រពង្ស ដែលបានយាងចូលព្រះទិវង្គតតាំងពី ឆ្នាំ២០០៣ មកម៉្លេះ។ ទន្ទឹមនេះ មានតែវេបសាយ (website) ចំនួន២ប៉ុណ្ណោះ ដែលបានប្រើប្រាស់ជាផ្លូវការ គឺ

១) https://www.norodomsihamoni.org/ ជារបស់ព្រះករុណ ព្រះមហាក្សត្រនៃកម្ពុជា និង២) គឺ https:// www.norodomsihanouk.info/ របស់សម្តេចព្រះមហាក្សត្រី ព្រះវររាជមាតាជាតិខ្មែរ។ ក្រៅពីវេបសាយ ទាំង ២ខាងនេះ ពុំមានប្រព័ន្ធបណ្តាញទំនាក់ទំនងសង្គមជាផ្លូវការរបស់ព្រះករុណា ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ និងរបស់ក្រសួងព្រះបរមរាជវាំងឡើយ។ នេះបើតាមសេចក្ដីថ្លែងការណ៍របស់ក្រសួងព្រះបរមរាជវាំង នៅថ្ងៃទី២១ ខែសីហា ឆ្នាំ២០២៤នេះ។

ក្រសួងព្រះបរមរាជវាំង ក៏បានអំពាវនាវដល់ស្ថាប័ន និងអាជ្ញាធរមានសមត្ថកិច្ចទាំងអស់ ចាត់វិធានការជាបន្ទាន់ឱ្យបានម៉ឺងម៉ាត់បំផុតតាមរដ្ឋធម្មនុញ្ញ និងច្បាប់ជាធរមានរបស់កម្ពុជា៕

The post ព្រះបរមរាជវាំង ប្រាប់ឱ្យអាជ្ញាធរចាត់វិធានការលើអ្នកក្លែងជាខ្សែរាជវង្ស តាមបណ្ដាញទំនាក់ទំនងសង្គម appeared first on Kampuchea Thmey Daily.

ក្រសួងព្រះបរមរាជវាំង បានអះអាងថាព្រះរាជសារ ដែលបាននិមន្តព្រះតេជគុណ វន វាសី ទៅសម្ដែងធម្មទេសនា ក្នុងពិធីបុណ្យកឋិនទាន គឺជាព្រះរាជសារក្លែងក្លាយ។ នេះបើតាមសេចក្ដីប្រកាសព័ត៌មានរបស់ព្រះបរមរាជវាំង នៅរសៀលថ្ងៃទី២៥ ខែតុលានេះ។

ការណ៍ដែលក្រសួងព្រះបរមរាជវាំងចេញមកអះអាងបែបនេះ បន្ទាប់ពីមានការផ្សព្វផ្សាយព្រះរាជសារមួយច្បាប់ ដែលបញ្ជាក់ពីការនិមន្ដ ព្រះធម្មវនវាសី ចន្ទមុនី ព្រះសង្ឃាធិបតី វត្តចន្ទប្បជោត្តនារាម (ហៅវត្តតាសុត) និមន្ដទៅសម្ដែងព្រះធម៌ទេសនា ក្នុងព្រះរាជពិធីបុណ្យកឋិនទានរបស់ ព្រះមហាក្សត្រ និងហ្លូងម៉ែ នៅវត្តទេពវិមាន (ហៅវត្តកាន់ទ្រង់) ស្ថិតនៅឃុំតានី ស្រុកអង្គរជ័យ ខេត្តកំពត។

ជុំវិញការចេញលិខិតនេះ ក្រសួងព្រះបរមរាជវាំង បានឱ្យដឹងថា « លិខិតមួយច្បាប់ ចុះថ្ងៃទី២៤ ខែតុលា ឆ្នាំ២០២៣ ដែលត្រូវបានបង្ហោះចែកចាយក្នុងប្រព័ន្ធបណ្តាញសង្គម ដោយជនអនាមិក នៅថ្ងៃទី២៥ ខែតុលា ឆ្នាំ២០២៣នេះ មិនមែនជា ព្រះរាជសារពិតប្រាកដ របស់ព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត និងសម្តេចព្រះមហាក្សត្រី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុតឡើយ»៕

The post ក្រសួងព្រះបរមរាជវាំង៖ ព្រះរាជសារនិមន្តព្រះតេជគុណ វន វាសី ធ្វើធម្មទេសនា ជាលិខិតក្លែងក្លាយ appeared first on Kampuchea Thmey Daily.

សេចក្ដីប្រកាសព័ត៌មានរបស់ក្រសួងព្រះបរមរាជវាំង នៅថ្ងៃទី ១៣ ខែមីនានេះ បានឲ្យដឹងថា នៅយប់ ថ្ងៃទី ១២ ខែមីនា ឆ្នាំ ២០២៣ វេលាម៉ោង ២២ និង ០៥នាទី មានអគ្គិភ័យបានឆាបឆេះអគារព្រះរាជដំណាក់តូច នៃព្រះរាជដំណាក់ខេត្តសៀមរាប ដែលបណ្ដាលមកពីការឆ្លងចរន្តអគ្គិសនី ( ទុស្សេខ្សែភ្លើង )។ ជាមួយគ្នានេះ ក្រសួងព្រះបរមរាជវាំង បានបង្ហាញការសោកស្ដាយជាពន់ពេក ចំពោះព្រឹត្តការណ៍ជាអកុសលនេះ។

សូមជម្រាបថា កាលពីវេលាម៉ោង ១០ និង ០៥នាទី យប់ថ្ងៃទី ១២ ខែមីនា ឆ្នាំ ២០២៣ មានហេតុការណ៍អគ្គិភ័យ ឆាបឆេះអគារព្រះរាជដំណាក់តូច នៃព្រះរាជដំណាក់ខេត្តសៀមរាប។

លោក ទៀ សីហា អភិបាល នៃគណៈអភិបាលខេត្តសៀមរាប បានបង្ហោះសារនៅលើហ្វេសប៊ុករបស់លោកថា «យើងពិតជាសោកស្តាយ ចំពោះអគ្គីភ័យដែលបានឆាបឆេះអាគារមួយ នៃព្រះរាជដំណាក់សៀមរាប ដែលជាកន្លែងជាទីសក្ការដ៏ខ្ពង់ខ្ពស់បំផុត កាលពីម៉ោង ១០:០៥នាទីយប់ ស្ថានភាពពេលនេះកម្លាំងសមត្ថកិច្ចបានជួយអន្តរាគមន៍ភ្លាមៗ រហូតគ្រប់គ្រងបានទាំងស្រុង»។

លោកអភិបាលខេត្ត បានថ្លែងអំណរគុណកងកម្លាំង ដែលបានអន្តរាគមន៍យ៉ាងទាន់ពេលវេលា និងសូមអរគុណដល់ប្រជាពលរដ្ឋ ដែលបានបារម្ភពីឧប្បត្តិហេតុនេះ៕

The post ក្រសួងព្រះបរមរាជវាំង បង្ហាញការសោកស្ដាយ ចំពោះអគ្គិភ័យឆាបឆេះអគារព្រះរាជដំណាក់តូច នៃព្រះរាជដំណាក់ខេត្តសៀមរាប appeared first on Kampuchea Thmey Daily.

ក្រសួងព្រះបរមរាជវាំង នឹងបើកឱ្យដំណើរការឡើងវិញ សម្រាប់ទទួលភ្ញៀវទេសចរជាតិ-អន្តរជាតិ បានចូលទស្សនា ព្រះបរមរាជវាំង នៅដើមខែក្រោយនេះ បន្ទាប់ពីផ្អាក​ការចូលទស្សនាជាង ១ឆ្នាំ ដោយសារវិបត្តិជំងឺកូវីដ១៩ ពោល​គឺចាប់តាំង​ពីពាក់កណ្តាល ខែមីនា ឆ្នាំ២០២១ ។

គួរបញ្ជាក់ថា​ សេចក្តីសម្រេចឱ្យបើកដំណើរការឡើងវិញនេះ ដោយយោងតាមព្រះរាជតម្រិះដ៏ខ្ពង់ខ្ពស់បំផុតរបស់ ព្រះកុរណាជាអង្គម្ចាស់ជីវិតលើត្បូង និងសម្តេចព្រះមហាក្សត្រីយានី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត និងតាមលិខិតលេខ ១០៥ លស.អអទ ចុះថ្ងៃទី០២ ខែវិច្ឋិកា ឆ្នាំ២០២២ របស់ក្រសួងទេសចរណ៍៕

The post ព្រះបរមរាជវាំង នឹងបើកទទួលភ្ញៀវទេសចរជាតិ-អន្តរជាតិ ឡើងវិញនៅដើមខែក្រោយនេះ appeared first on Kampuchea Thmey Daily.

ព្រះរាជ​អំណោយ ព្រះករុណា ព្រះមហាក្សត្រ និង​សម្ដេចព្រះ​មហាក្សត្រី នាពេលនេះ​មាន​៖ អង្ករ​ចំនួន ៥០​គីឡូក្រាម​, ឃី​ត​១ កញ្ចប់ (​មុង​១ ភួយ​១ ក្រមា​១ សារុង​១), មី​ចំនួន ២​កេស​, ត្រីខ​ចំនួន ១០​កំប៉ុង​, តង់​កៅស៊ូ​ចំនួន ១ ផ្ទាំង​, អាវយឺត​មាន​ស្លាក ព្រះ​រាជអំណោយ​ព្រះករុណា​ព្រះបាទ​សម្ដេច​ព្រះបរមនាថ​ន​រោ​ត្ដម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា ចំនួន ១, ម៉ាស​ចំនួន​មួយ​ដុំ​មាន​១០ បន្ទះ​, ថវិកា​ចំនួន ៨០​ម៉ឺន​រៀល សម្រាប់​គ្រួសារ​រងគ្រោះ​រលំ​ផ្ទះ ក្នុងនោះ ព្រះករុណា ព្រះមហាក្សត្រ ចំនួន ៤០ ម៉ឺន​រៀល និង​សម្ដេចព្រះ​មហាក្សត្រី ចំនួន ៤០ ម៉ឺន​រៀល ដោយឡែក​ថវិកា​ចំនួន ៤០ ម៉ឺន​រៀល សម្រាប់​គ្រួសារ​រងគ្រោះ​របើក​ដំបូលផ្ទះ ដោយ​ក្នុងនោះ ព្រះករុណា ព្រះមហាក្សត្រ ចំនួន ២០ ម៉ឺន​រៀល និង​សម្ដេចព្រះ​មហាក្សត្រី ចំនួន ២០ ម៉ឺន​រៀល​។

The post «​ព្រះករុណា​ជា​អ​ម្ចាស់ជីវិតលើត្បូង និង​សម្តេចម៉ែ ប្រោស​ព្រះរាជទាន​ព្រះរាជ​អំណោយ​ជូន​ប្រជារាស្ត្រ ១៦៥ គ្រួសារ​ក្នុង​ខេត្ត​ឧ​ត្ត​រ​មានជ័យ​» appeared first on Kampuchea Thmey Daily.

ពីធីនេះត្រូវបានធ្វើឡើងកាលពីព្រឹកថ្ងៃទី ២៩ ខែតុលា ឆ្នាំ២០២១នេះ ក្រោមអធិបតីភាព ដ៏ខ្ពស់ខ្ពស់ សម្ដេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ព្រះរាជ តំណាងដ៏ខ្ពង់ខ្ពស់ សម្តេចព្រះមហាក្សត្រី នរោត្តម មុនិនាថ សីហនុព្រះវររាជមាតាជាតិខ្មែរ។

លោក ឃួង ស្រេង អភិបាល នៃគណ:អភិបាល រាជធានីភ្នំពេញ បានមានប្រសាសន៍លើកឡើងថា ឆ្នាំនេះដោយសារការប្រែប្រួលអាកាសធាតុគួបផ្សំនឹងកត្តា ភូមិសាស្ត្រសណ្ឋានដី បានធ្វើឱ្យតំបន់សណ្ដស្ទឹងព្រែកត្នោត ដែលតភ្ជាប់ ពីខេត្តកំពង់ស្ពឺ មកកាន់ខេត្តកណ្តាល ដោយត្រូវឆ្លងកាត់រាជធានីភ្នំពេញ បានទទួលរងការគំរាមកំហែងជាថ្មីម្តងទៀតដោយសារជំនន់ទឹកភ្លៀង បណ្ដាលមកពីការហូរជន់ដោយគំហុកនូវបរិមាណទឹកភ្លៀងដ៏ច្រើន ពីតំបន់ភ្នំភាគនិរតី ជាហេតុធ្វើឱ្យបណ្ដាខណ្ឌជាយក្រុង ជាពិសេសខណ្ឌ កំបូល និងខណ្ឌដង្កោ ត្រូវលិចលង់ផ្នែកខ្លះដោយចៀសមិនរួច។

ជាក់ស្តែង កាលពីថ្ងៃទី ២៤ ខែតុលា ឆ្នាំ២០២១ ទឹកស្ទឹងព្រែកត្នោត បានហក់ឡើងយ៉ាងខ្លាំង ធ្វើឱ្យមានការហូរច្រោះក្បាលហុងទឹក ហៀរហូរ ជន់លិចលំនៅឋាន និងបង្កឱ្យមានផលប៉ះពាល់ដោយផ្ទាល់ និងដោយ ប្រយោលដល់បងប្អូនប្រជាពលរដ្ឋជាច្រើនគ្រួសារក្នុងភូមិចំនួន ៤ ក្នុងសង្កាត់គងនយ ហើយនៅថ្ងៃទី២៦ ខែតុលា ឆ្នាំ២០២១ ជំនន់ទឹកភ្លៀង បានបន្តហូរជន់លិចក្នុងភូមិចំនួន ៤ ផ្សេងទៀត នៃសង្កាត់ទៀន ព្រមទាំង បណ្តាភូមិ នៃសង្កាត់មួយចំនួនទៀត ក្នុងខណ្ឌដង្កោ រាជធានីភ្នំពេញ។

ស្ថិតក្នុងស្ថានភាពមហន្តរាយនេះ កងកម្លាំងចម្រុះ និងអាជ្ញាធរ មូលដ្ឋានគ្រប់លំដាប់ថ្នាក់របស់រដ្ឋបាលរាជធានីភ្នំពេញ មានភាពម្ចាស់ការ ខ្ពស់ បានសហការរួមគ្នាផ្ដល់ការសង្គ្រោះបានទាន់ពេលវេលា ដោយជម្លៀសបងប្អូនប្រជាពលរដ្ឋចេញពីតំបន់រងគ្រោះ ទៅកាន់ទីមូល សុវត្ថិភាព និងបានផ្គត់ផ្គង់ម្ហូបអាហារ ទឹកសុទ្ធ បង្គន់អនាម័យ និងទី កន្លែងស្នាក់នៅបណ្តោះអាសន្នសមរម្យ ពោលគឺមិនមានប្រជាពលរដ្ឋ ណាមួយរងគ្រោះដល់អាយុជីវិតឡើយ។

ដោយមើលឃើញពីទុក្ខលំបាករបស់ប្រជានុរាស្ត្រសម្ដេចព្រះមហាក្សត្រី ព្រះវររាជមាតាជាតិខ្មែរ ជាទីគោរព សក្ការៈដ៏ខ្ពង់ខ្ពស់បំផុត តាមរយៈ សម្ដេចចៅហ្វាវាំង ឧបនាយក រដ្ឋមន្ត្រី បានផ្ដល់ព្រះរាជអំណោយមនុស្សធម៌ ដើម្បីចែកជូនប្រជា ពលរដ្ឋរងគ្រោះដោយសារជំនន់ទឹកភ្លៀង ចំនួន ៨៣៧ គ្រួសារ ដែល រស់នៅក្នុងតំបន់រងផលប៉ះពាល់ ក្នុងនោះ សង្កាត់គងនយ មានចំនួន ៤៩១ គ្រួសារ និងសង្កាត់ទៀន មានចំនួន ៣៤៦ គ្រួសារ។

ព្រះរាជសកម្មភាពដ៏ឧត្តុង្គឧត្តមថ្លៃថ្លា ប្រកបដោយព្រះគុណធម៌ ព្រះមនុស្សធម៌ និងព្រះព្រហ្មវិហារធម៌ នាពេលនេះ ពិតជាបាន ឆ្លុះបញ្ចាំងឱ្យឃើញកាន់តែច្បាស់ពីព្រះទ័យទុកដាក់ខ្ពស់បំផុត អស់ពី កម្លាំងព្រះកាយពល និងព្រះបញ្ញា​ញាណរបស់ សម្ដេចព្រះមហាក្សតី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត ចំពោះ ជាតិមាតុភូមិ ដើម្បីដោះស្រាយ និងសម្រាលការលំបាកប្រជារាស្ត្រ របស់ព្រះអង្គ នៅគ្រប់ដំណាក់កាលទាំងអស់។

សម្ដេចចៅហ្វាវាំង វរវៀងជ័យ អធិបតីស្រីង្គារ គង់ សំអុល បានមានប្រសាសន៍លើកឡើងថា ក្រោយពីទទួលបានព័ត៌មានពីការលិចលង់លំនៅដ្ឋានរបស់បងប្អូនប្រជាពលរដ្ឋដោយទឹកជំនន់ព្រែកត្នោតនេះ និងដោយមើលឃើញពីទុក្ខលំបាករបស់ប្រជានុរាស្ត្រសម្ដេចព្រះមហាក្សត្រី ព្រះវររាជមាតាជាតិខ្មែរ ក៏បានចាត់ឱ្យសម្ដេចនាំយកព្រះរាជអំណោយមនុស្សធម៌នេះ មកចែកជូនបងប្អូនប្រជាពរដ្ឋចំនួន៨៣៧គ្រួសារនៅក្នុងខណ្ឌដង្កោនេះតែម្តង។

សម្ដេចចៅហ្វាវាំង បានបន្តថា ព្រះរាជអំណោយរបស់សម្ដេចម៉ែដែរត្រូវប្រគល់ឲ្យបងប្អូនប្រជាពលរដ្ឋទាំង៨៣៧ គ្រួសារនេះ ក្នុងមួយគ្រួសារៗ ទទួលបាន អាវយឺតមួយ អង្ករ ៥០គីឡូក្រាម ម៉ាស១០បន្ទះ មី១កេស ត្រីខ ១០កំប៉ុង តង់១ ឃីតមួយកញ្ចប់ (ដែលក្នុងឃីតនេះ មានភួយ១ ក្រម៉ា១ មុង១)និងថវិកាចំនួន៤សែនរៀល។

នៅក្នុងឱកាសនោះដែរ សម្ដេចចៅហ្វាវាំង ក៏បានធ្វើការណែនាំឲ្យបងប្អូនប្រជាពលរដ្ឋទាំងអស់អនុវត្តឲ្យបានទៅតាមការណែនាំរបស់ក្រសួងសុខាភិបាលក៏ដូចជារាជរដ្ឋាភិបាល ក្នុងការទប់ស្កាត់នូវការរីករាលដាលជំងឺកូវីដ-១៩ ពិសេសអនុវត្តឲ្យបាន៣កុំនិង ៣ ការពារ ដើម្បីយើងរួមគ្នាទប់ស្កាត់ឲ្យបាននូវការរីករាលដាលជំងឺកូវីដ-១៩៕

អត្ថបទ៖ ស្រីរ័ត្ន

The post ប្រជាពលរដ្ឋរងគ្រោះទឹកជំនន់ព្រែកត្នោត ជាង៨០០ គ្រួសារទទួលបានព្រះរាជអំណោយ សម្តេចម៉ែ appeared first on Kampuchea Thmey Daily.