ព្រះបរមរាជវាំង ប្រាប់ឱ្យអាជ្ញាធរចាត់វិធានការលើអ្នកក្លែងជាខ្សែរាជវង្ស តាមបណ្ដាញទំនាក់ទំនងសង្គម

ក្រសួងព្រះបរមរាជវាំង ចេញមកបញ្ជាក់ថា គេហទំព័រផ្លូវការ (website) ចំនួន២ប៉ុណ្ណោះ ដែលបានប្រើប្រាស់ជាផ្លូវការរបស់ព្រះករុណាព្រះមហាក្សត្រ និងសម្ដេចព្រះមហាក្សត្រី និងក្រៅពីនេះ ពុំមានប្រព័ន្ធទំនាក់ទំនងសង្គមរបស់ស្ដេចទាំងទ្វេឡើយ។

ការបញ្ជាក់របស់ក្រសួងព្រះបរមរាជវាំងពេលនេះ ក្រោយមានម្ចាស់គណនីតិកតុក (Tik Tok) មួយ បានអះអាងខ្លួនជាអនុជរបស់ព្រះករុណាព្រះមហាក្សត្រនៃកម្ពុជា ដែលមានឈ្មោះថា នរោត្តម សូរិយាវង្ស និង ស៊ីសុវត្ថិ សីណាក់វង្ស។ ជុំវិញករណីនេះ ក្រសួងព្រះបរមរាជវាំង បានប្រកាសបដិសេធចំពោះបុគ្គលជាម្ចាស់គណនីតិកតុកនេះ ដែលបានបង្ហោះ ចែកចាយក្នុងប្រព័ន្ធបណ្តាញទំនាក់ទំនងសង្គម។ ក្រសួងព្រះបរមរាជវាំង អះអាងថា បុគ្គលនេះមិនមែនជាសែស្រឡាយព្រះរាជវង្សានុវង្សដែលទទួលស្គាល់ ដោយព្រះបរមរាជវាំងឡើយ។

ក្រសួងព្រះបរមរាជវាំង បានបញ្ជាក់បន្ថែមថា ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ព្រះអង្គមានព្រះអនុជបង្កើតតែមួយព្រះអង្គគត់ គឺសម្តេច នរោត្តម នរិន្ទ្រពង្ស ដែលបានយាងចូលព្រះទិវង្គតតាំងពី ឆ្នាំ២០០៣ មកម៉្លេះ។ ទន្ទឹមនេះ មានតែវេបសាយ (website) ចំនួន២ប៉ុណ្ណោះ ដែលបានប្រើប្រាស់ជាផ្លូវការ គឺ

១) https://www.norodomsihamoni.org/ ជារបស់ព្រះករុណ ព្រះមហាក្សត្រនៃកម្ពុជា និង២) គឺ https:// www.norodomsihanouk.info/ របស់សម្តេចព្រះមហាក្សត្រី ព្រះវររាជមាតាជាតិខ្មែរ។ ក្រៅពីវេបសាយ ទាំង ២ខាងនេះ ពុំមានប្រព័ន្ធបណ្តាញទំនាក់ទំនងសង្គមជាផ្លូវការរបស់ព្រះករុណា ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរ និងរបស់ក្រសួងព្រះបរមរាជវាំងឡើយ។ នេះបើតាមសេចក្ដីថ្លែងការណ៍របស់ក្រសួងព្រះបរមរាជវាំង នៅថ្ងៃទី២១ ខែសីហា ឆ្នាំ២០២៤នេះ។

ក្រសួងព្រះបរមរាជវាំង ក៏បានអំពាវនាវដល់ស្ថាប័ន និងអាជ្ញាធរមានសមត្ថកិច្ចទាំងអស់ ចាត់វិធានការជាបន្ទាន់ឱ្យបានម៉ឺងម៉ាត់បំផុតតាមរដ្ឋធម្មនុញ្ញ និងច្បាប់ជាធរមានរបស់កម្ពុជា៕