ក្នុងដំណើរចុះពិនិត្យនេះ លោក លីវ សំណាង ប្រធានមន្ទីរអភិវឌ្ឍន៍ជនបទខេត្តតាកែវ និងលោក ឌឹម គឹមសាន អភិបាលនៃគណៈអភិបាលក្រុងដូនកែវ បានពិនិត្យដោយផ្ទាល់លើស្ថានភាពអនុវត្តការងាររបស់ក្រុមបច្ចេកទេស និងការរីកចម្រើននៃគម្រោងជួសជុលផ្លូវ។

បើតាមមន្ទីរអភិវឌ្ឍន៍ជនបទខេត្តតាកែវ ខ្សែផ្លូវដែលកំពុងជួសជុលនេះ មានប្រវែងសរុប​១២,០០០ម៉ែត្រ (១២គីឡូម៉ែត្រ) ចាប់ពីចំណុចខ្នាតៃ ដល់ប្រហូត តភ្ជាប់ពីក្រុងដូនកែវ ឆ្ពោះទៅកាន់ផ្លូវជាតិលេខ៣ ស្ថិតក្នុងភូមិសាស្ត្រស្រុកត្រាំកក់ ខេត្តតាកែវ។ គម្រោងនេះជាការងារថែទាំ និងជួសជុលប្រចាំឆ្នាំ២០២៦ ដែលអនុវត្តដោយផ្ទាល់ពីមន្ទីរអភិវឌ្ឍន៍ជនបទខេត្តតាកែវ។

ក្នុងឱកាសនោះ ថ្នាក់ដឹកនាំទាំងពីរបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារបច្ចេកទេស ដែលបានអនុវត្តការងារទៅតាមផែនការដែលបានកំណត់។ ទន្ទឹមនឹងនេះ ក៏បានណែនាំឱ្យយកចិត្តទុកដាក់បន្ថែមលើគុណភាពសំណង់ ការអនុវត្តតាមបទដ្ឋានបច្ចេកទេស និងការត្រួតពិនិត្យគ្រប់ដំណាក់កាល ដើម្បីធានាឱ្យផ្លូវមានភាពរឹងមាំ សុវត្ថិភាព និងអាចប្រើប្រាស់បានយូរអង្វែង។

គម្រោងជួសជុលផ្លូវនេះ ត្រូវបានចាត់ទុកថា ជាផ្នែកមួយនៃការពង្រឹងហេដ្ឋារចនាសម្ព័ន្ធជនបទ ដែលមានសារៈសំខាន់ក្នុងការតភ្ជាប់ការធ្វើដំណើររវាងក្រុងដូនកែវ និងស្រុកត្រាំកក់ ព្រមទាំងភ្ជាប់ទៅកាន់ផ្លូវជាតិលេខ៣ ដែលជាសរសៃឈាមសេដ្ឋកិច្ចដ៏សំខាន់របស់ខេត្ត។

ក្រោយពេលការជួសជុលត្រូវបានបញ្ចប់ជាស្ថាពរ ខ្សែផ្លូវនេះនឹងជួយសម្រួលដល់ការធ្វើដំណើររបស់ប្រជាពលរដ្ឋ កាត់បន្ថយការលំបាកនៃចរាចរណ៍ប្រជាពលរដ្ឋ។ លើសពីនេះ វាក៏នឹងជួយលើកកម្ពស់គុណភាពជីវភាពរស់នៅរបស់ប្រជាពលរដ្ឋក្នុងក្រុងដូនកែវ និងស្រុកត្រាំកក់ ឱ្យកាន់តែប្រសើរឡើង ស្របតាមគោលនយោបាយរបស់រាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធជនបទ និងការលើកកម្ពស់ការតភ្ជាប់នៅតាមមូលដ្ឋាន៕​

អត្ថបទ៖ វីរៈ

The post ផ្លូវ DBST ប្រវែង១២គីឡូម៉ែត្រ តភ្ជាប់ពីក្រុងដូនកែវ ទៅផ្លូវជាតិលេខ៣ កំពុងជួសជុលឡើងវិញដើម្បីសម្រួល​ការធ្វើ​ចរាចរណ៍​ appeared first on Kampuchea Thmey Daily.

ការចុះពិនិត្យនេះ បានធ្វើឡើងនៅព្រឹកថ្ងៃទី០៥ ខែមិថុនា ឆ្នាំ២០២៦ ក្រោមការដឹកនាំរបស់លោក សោ សុផល អភិបាលរងក្រុងដូនកែវ តំណាងលោក ឌឹម គឹមសាន អភិបាលក្រុងដូនកែវ ដោយមានការចូលរួមពីមន្ត្រីការិយាល័យជំនាញពាក់ព័ន្ធ និងអាជ្ញាធរសង្កាត់បារាយណ៍។ ក្រុមការងារបានចុះពិនិត្យទីតាំងជាក់ស្តែង ស្ថិតនៅភូមិត្រពាំងឫស្សី សង្កាត់បារាយណ៍ ក្រុងដូនកែវ ខេត្តតាកែវ។

ក្នុងកិច្ចប្រជុំ និងការចុះពិនិត្យនៅទីតាំងផ្ទាល់ លោកអភិបាលរងក្រុង បានណែនាំឱ្យមន្ត្រីជំនាញភូមិបាលអនុវត្តការវាស់វែងដី និងផ្ទៀងផ្ទាត់ឯកសារពាក់ព័ន្ធឱ្យបានត្រឹមត្រូវ និងច្បាស់លាស់ ស្របតាមនីតិវិធីច្បាប់ ដើម្បីធានាថា ការប្រើប្រាស់ដីធ្លី និងការសាងសង់សំណង់ផ្សេងៗ មិនប៉ះពាល់ដល់ផលប្រយោជន៍សាធារណៈ និងមិនរំលោភលើដីរដ្ឋ។

ជាលទ្ធផលនៃការពិនិត្យ មន្ត្រីជំនាញបានរកឃើញថា ទីតាំងដីដែលកំពុងសាងសង់របងថ្មនោះ ពុំមានបណ្ណកម្មសិទ្ធិសម្គាល់ម្ចាស់ដីច្បាស់លាស់នៅឡើយទេ។ លើសពីនេះ ការសាងសង់ក៏ត្រូវបានសង្ស័យថាបានរំលោភលើដីចំណីផ្លូវសាធារណៈផងដែរ។

ដោយផ្អែកលើលទ្ធផលខាងលើ អាជ្ញាធរក្រុងដូនកែវ បានសម្រេចផ្អាកការសាងសង់របងថ្មជាបណ្តោះអាសន្ន រង់ចាំការត្រួតពិនិត្យ និងដោះស្រាយតាមនីតិវិធីច្បាប់បន្ថែមទៀត។ អាជ្ញាធរក៏បានអំពាវនាវដល់ប្រជាពលរដ្ឋទាំងអស់ ឱ្យគោរពបទប្បញ្ញត្តិ និងនីតិវិធីពាក់ព័ន្ធនឹងការកាន់កាប់ដីធ្លី និងការសាងសង់សំណង់ផ្សេងៗ ដើម្បីចៀសវាងការប៉ះពាល់ដល់សម្បត្តិសាធារណៈ និងបញ្ហាវិវាទនានា៕

​អត្ថបទ៖ វីរៈ

The post អាជ្ញាធរក្រុងដូនកែវ ផ្អាកការសាងសង់របងថ្មមួយកន្លែង ក្រោយពិនិត្យឃើញរំលោភដីចំណីផ្លូវ និងគ្មានបណ្ណកម្មសិទ្ធិច្បាស់លាស់ appeared first on Kampuchea Thmey Daily.

ការប្រកាសដាក់ឱសានវាទនេះ នឹងចាប់ផ្ដើមអនុវត្ត​​ចាប់ពីថ្ងៃ​ទី​៣ ខែមិថុនា ឆ្នាំ២០២៦នេះតទៅ ក្នុងគោលបំណងរៀបចំសណ្តាប់ធ្នាប់សាធារណៈ លើកកម្ពស់សោភ័ណភាពទីក្រុង សម្រួលចរាចរណ៍ និងធានាសុវត្ថិភាពជូនប្រជាពលរដ្ឋ ខណៈបញ្ហាការរំលោភយកចិញ្ចើមផ្លូវសម្រាប់ធ្វើអាជីវកម្ម ឬសាងសង់សំណង់ផ្សេងៗ បានក្លាយជាបញ្ហាប្រឈមមួយដែលប៉ះពាល់ដល់ការធ្វើដំណើរ និងរបៀបរៀបរយក្នុងក្រុង។

លោក សុខ គង្គារ័ត្ន អភិបាលរងក្រុងដូនកែវ បានដាក់បទបញ្ជាយ៉ាងម៉ឺងម៉ាត់ដល់ក្រុមការងាររៀបចំសណ្តាប់ធ្នាប់ និងកម្លាំងមានសមត្ថកិច្ចពាក់ព័ន្ធទាំងអស់ ត្រូវអនុវត្តយុទ្ធនាការនេះដោយមានការទទួលខុសត្រូវខ្ពស់ ប្រកបដោយតម្លាភាព និងគោរពតាមនីតិវិធីរដ្ឋបាលជាធរមាន។

ជាមួយគ្នានេះ អាជ្ញាធរក្រុងបានណែនាំឱ្យក្រុមការងារចុះផ្សព្វផ្សាយ ពន្យល់ និងជូនដំណឹងដល់ប្រជាពលរដ្ឋ និងអាជីវករដែលបានប្រើប្រាស់ទីសាធារណៈខុសគោលការណ៍ ឱ្យយល់ដឹងអំពីផលប៉ះពាល់នៃការរំលោភចិញ្ចើមផ្លូវ ដូចជា ការកកស្ទះចរាចរណ៍ ការបាត់បង់សោភ័ណភាពទីក្រុង ការរាំងស្ទះដល់អ្នកថ្មើរជើង និងហានិភ័យសុវត្ថិភាពសាធារណៈ។

លោកអភិបាលរងក្រុងបានបញ្ជាក់ថា អាជ្ញាធរផ្តល់ឱកាសឱ្យម្ចាស់សំណង់ និងអាជីវករធ្វើការរុះរើដោយខ្លួនឯងក្នុងរយៈពេលយ៉ាងយូរមួយសប្តាហ៍ប៉ុណ្ណោះ។ ក្នុងករណីមិនអនុវត្តតាមការណែនាំ ឬបន្តរំលោភបំពានលើទ្រព្យសម្បត្តិ​សាធារណៈ រដ្ឋបាលក្រុងនឹងចាត់វិធានការរដ្ឋបាល និងអនុវត្តច្បាប់ជាធរមានដោយម៉ឺងម៉ាត់ ដោយមិនមានការយោគយល់ឡើយ។

មហា​ជនមើលឃើញថា ការរៀបចំសណ្តាប់ធ្នាប់លើចិញ្ចើមផ្លូវ និងផ្លូវសាធារណៈ មិនត្រឹមតែជួយធ្វើឱ្យទីក្រុងមានសោភ័ណភាពប៉ុណ្ណោះទេ ប៉ុន្តែថែមទាំងរួមចំណែកកាត់បន្ថយគ្រោះថ្នាក់ចរាចរណ៍ បង្កើនភាពងាយស្រួលក្នុងការធ្វើដំណើរ និងបង្កើតបរិយាកាសរស់នៅប្រកបដោយរបៀបរៀបរយ ស័ក្តិសមជាទីប្រជុំជនកណ្តាលនៃខេត្តតាកែវ។

រដ្ឋបាលក្រុងដូនកែវ ក៏បានអំពាវនាវដល់ប្រជាពលរដ្ឋ និងអាជីវករទាំងអស់ ចូលរួមសហការជាមួយអាជ្ញាធរ ដោយរុះរើសំណង់ និងសម្ភារដែលដាក់លើចិញ្ចើមផ្លូវដោយស្ម័គ្រចិត្ត ដើម្បីរួមគ្នាថែរក្សាសណ្តាប់ធ្នាប់ សោភ័ណភាព និងផលប្រយោជន៍រួមរបស់សហគមន៍ ឱ្យក្រុងដូនកែវកាន់តែមានភាពស្អាត របៀបរៀបរយ និងមានបរិស្ថានល្អប្រសើរសម្រាប់ការរស់នៅ និងការវិនិយោគនាពេលអនាគត៕

អត្ថបទ៖ វីរៈ

The post រដ្ឋបាលក្រុងដូនកែវ ដាក់ឱសានវាទ ១សប្តាហ៍ឲ្យអាជីវករ និងអ្នករំលោភចិញ្ចើមផ្លូវត្រូវរុះរើជាបន្ទាន់ ជៀសវាងការប្រើវិធានការក្ដៅ appeared first on Kampuchea Thmey Daily.

ការណែនាំ និងជំរុញនេះធ្វើឡើងនៅក្នុងកិច្ចប្រជុំត្រួតពិនិត្យ និងជំរុញការអនុវត្តគោលនយោបាយ «ភូមិ ឃុំ សង្កាត់មានសុវត្ថិភាព» របស់គណៈបញ្ជាការឯកភាពរដ្ឋបាលក្រុងដូនកែវ កាលពីព្រឹកថ្ងៃទី១ ខែមិថុនា ឆ្នាំ២០២៦។

កិច្ចប្រជុំនេះ ក៏មានការចូលរួមពីថ្នាក់ដឹកនាំខេត្ត កងកម្លាំងប្រដាប់អាវុធ មន្ទីរ-អង្គភាពពាក់ព័ន្ធ និងមន្ត្រីរដ្ឋបាលក្រុងដូនកែវជាច្រើនរូប ដើម្បីពិនិត្យលទ្ធផលការងារ និងដាក់ចេញវិធានការបន្តពង្រឹងសន្តិសុខ សណ្ដាប់ធ្នាប់ និងសុវត្ថិភាពសង្គមនៅមូលដ្ឋាន។

លោកបណ្ឌិត ម៉ក់ ជីតូ ក៏បានកោតសរសើរចំពោះកិច្ចខិតខំប្រឹងប្រែងរបស់អាជ្ញាធរក្រុងដូនកែវ និងបានណែនាំ​ឱ្យអាជ្ញាធរ និងកម្លាំងមានសមត្ថកិច្ច បន្តបង្ក្រាបឱ្យមានប្រសិទ្ធភាពលើបទល្មើសលួច ឆក់ ប្លន់ គ្រឿងញៀន និងល្បែងស៊ីសងខុសច្បាប់គ្រប់ប្រភេទ។

លោកក៏បានជំរុញឱ្យពង្រឹងការត្រួតពិនិត្យការស្នាក់នៅរបស់ជនបរទេសឱ្យបានម៉ឺងម៉ាត់ ដើម្បីទប់ស្កាត់ការប្រើប្រាស់ទីតាំងក្នុងមូលដ្ឋានសម្រាប់ប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scam)។ ជាមួយគ្នានេះ អាជ្ញាធរមូលដ្ឋានត្រូវពន្លឿនការផ្តល់សេវារដ្ឋបាល និងសេវាសាធារណៈឱ្យកាន់តែលឿន តម្លាភាព និងមានគណនេយ្យភាព ព្រមទាំងលើកទឹកចិត្តឱ្យប្រជាពលរដ្ឋចូលរួមសហការជាមួយសមត្ថកិច្ចក្នុងការរាយការណ៍ព័ត៌មាន ដើម្បីរួមគ្នាកសាងភូមិ សង្កាត់ និងក្រុងដូនកែវឱ្យកាន់តែមានសុវត្ថិភាព និងសុខសាន្ត៕

អត្ថបទ៖ វីរៈ

The post លោក ម៉ក់ ជីតូ ជំរុញការបង្ក្រាបបទល្មើស និងពង្រឹងសុវត្ថិភាពសង្គមក្នុងក្រុងដូនកែវ appeared first on Kampuchea Thmey Daily.

ក្នុងប្រតិបត្តិការចុះពិនិត្យនោះ លោកអភិបាលក្រុង រួមជាមួយអភិបាលរងក្រុង មន្ត្រីជំនាញ និងកម្លាំងពាក់ព័ន្ធ បានចុះជួបសំណេះសំណាលដោយផ្ទាល់ជាមួយអាជីវករ និងធ្វើការណែនាំឱ្យបញ្ឈប់ការដាក់តាំងលក់ទំនិញលើផ្លូវសាធារណៈ ព្រមទាំងស្នើឱ្យចូលរួមថែរក្សាអនាម័យ បរិស្ថាន និងសោភ័ណភាពផ្សារ ដោយត្រូវវេចខ្ចប់ និងទុកដាក់សំរាមឱ្យបានត្រឹមត្រូវ។

លោក ឌឹម គឹមសាន បានបញ្ជាក់ថា ការរៀបចំសណ្ដាប់ធ្នាប់នេះ មិនមែនជាការរឹតត្បិតការប្រកបអាជីវកម្មរបស់ប្រជាពលរដ្ឋឡើយ ប៉ុន្តែជាការរៀបចំឱ្យមានរបៀបរៀបរយ សមស្របតាមបែបទីក្រុង និងដើម្បីបង្កើនភាពទាក់ទាញដល់អ្នកទិញ ក៏ដូចជាភ្ញៀវទេសចរដែលធ្វើដំណើរឆ្លងកាត់ខេត្តតាកែវ៕

អត្ថបទ៖ ​វីរៈ

The post អភិបាលក្រុងដូនកែវថ្មី ចុះរៀបចំសណ្ដាប់ធ្នាប់ផ្សារតាកែវ ខណៈការយកចំណីផ្លូវលក់ដូរ នៅតែជាបញ្ហាប្រឈមរុាំរ៉ៃ appeared first on Kampuchea Thmey Daily.

ក្នុងឱកាសនោះ អាជ្ញាធរក្រុងបានពិនិត្យស្ថានភាពស្លាកសញ្ញារបស់រោងចក្រ និងផ្តល់អនុសាសន៍ឱ្យម្ចាស់អាជីវកម្មយកចិត្តទុកដាក់ខ្ពស់ក្នុងការរៀបចំស្លាកសញ្ញាឱ្យបានត្រឹមត្រូវ ស្របតាមច្បាប់ និងសេចក្តីណែនាំរបស់រាជរដ្ឋាភិបាល។

លោក សោ សុផល បានបញ្ជាក់ថា ស្លាកសញ្ញាអាជីវកម្មទាំងអស់ ត្រូវមានអក្សរខ្មែរដាក់នៅខាងលើ និងមានទំហំធំជាងអក្សរបរទេស ដើម្បីបង្ហាញពីអត្តសញ្ញាណជាតិ និងលើកកម្ពស់តម្លៃអក្សរសាស្ត្រខ្មែរ។ ការអនុវត្តតាមគោលការណ៍នេះ គឺជាកាតព្វកិច្ចសម្រាប់គ្រប់អាជីវកម្មដែលប្រតិបត្តិការនៅក្នុងប្រទេសកម្ពុជា។

ជាមួយគ្នានេះដែរ អភិបាលរងក្រុងបានសង្កត់ធ្ងន់ថា ការប្រើប្រាស់អក្សរខ្មែរលើស្លាកសញ្ញា មិនត្រឹមតែជាការអនុវត្តតាមច្បាប់ប៉ុណ្ណោះទេ ប៉ុន្តែថែមទាំងជួយឱ្យប្រជាពលរដ្ឋនៅមូលដ្ឋានងាយស្រួលមើលឃើញ និងយល់ដឹង ព្រមទាំងជួយសម្រួលដល់កម្មករនិយោជិតដែលកំពុងបម្រើការងារនៅក្នុងរោងចក្រ។

អាជ្ញាធរក្រុងដូនកែវបានអំពាវនាវដល់ម្ចាស់អាជីវកម្មទាំងអស់ បន្តអនុវត្តតាមការណែនាំនេះឱ្យបានម៉ឺងម៉ាត់ ដើម្បីរួមចំណែកថែរក្សាអត្តសញ្ញាណជាតិ និងលើកកម្ពស់តម្លៃភាសាខ្មែរ នៅក្នុងវិស័យពាណិជ្ជកម្ម និងឧស្សាហកម្ម៕

អត្ថបទ៖ វីរៈ

The post អាជ្ញាធរក្រុងដូនកែវ ចុះណែនាំរោងចក្រមួយកន្លែងពាក់ព័ន្ធការដាក់ស្លាកអាជីវកម្ម appeared first on Kampuchea Thmey Daily.

ក្នុងប្រតិបត្តិការនេះ អាជ្ញាធរក្រុងបានពិនិត្យ និងណែនាំដល់អាជីវករ ព្រមទាំងអ្នកលក់ដូរនៅតាមបណ្តោយផ្លូវជុំវិញផ្សារ ឲ្យចូលរួមថែរក្សាអនាម័យ មិនដាក់សំរាមចោលអនាធិបតេយ្យ និងគោរពតាមការរៀបចំទីតាំងលក់ដូរដែលអាជ្ញាធរកំណត់ដើម្បីបង្កើនភាពស្រស់ស្អាត និងភាពទាក់ទាញ។

ជាមួយគ្នានេះ លោកអភិបាលរងក្រុង បានធ្វើការណែនាំយ៉ាងម៉ឺងម៉ាត់ដល់ម្ចាស់ភាស៊ីផ្ញើកង់ និងម៉ូតូទាំងអស់ ត្រូវអនុវត្តការយកភាស៊ីឲ្យបានត្រឹមត្រូវ ស្របតាមសៀវភៅបន្ទុក និងតម្លៃដែលបានកំណត់ជាផ្លូវការ ដើម្បីជៀសវាងការយកលើសកំណត់ ឬបង្កការខូចខាតដល់ផលប្រយោជន៍របស់ប្រជាពលរដ្ឋ។ ការអនុវត្តយ៉ាងតឹងរ៉ឹងលើវិធានការនេះ គឺមានគោលបំណងធានានូវភាពយុត្តិធម៌ តម្លាភាព និងបង្កើនទំនុកចិត្តរបស់សាធារណជនចំពោះសេវាសាធារណៈ។

លោក សុខ គង្គារ័ត្ន ក៏បានលើកឡើងថា ការរៀបចំសណ្តាប់ធ្នាប់ និងអនាម័យនៅតាមទីសាធារណៈ ជាពិសេសតំបន់ផ្សារ គឺជាកត្តាសំខាន់ក្នុងការលើកកម្ពស់គុណភាពជីវិតប្រជាពលរដ្ឋ និងបង្ហាញពីរូបភាពវិជ្ជមានរបស់ទីក្រុង។ ដូច្នេះ អាជ្ញាធរ និងប្រជាពលរដ្ឋត្រូវសហការគ្នាយ៉ាងជិតស្និទ្ធ ក្នុងការអនុវត្តវិធានការនានា ដើម្បីរក្សាបរិស្ថានឲ្យស្អាត និងមានរបៀបរាបរយជាបន្តបន្ទាប់។

សកម្មភាពចុះរៀបចំនេះ ត្រូវបានគេរំពឹងថា នឹងជួយបង្កើនប្រសិទ្ធភាពនៃការគ្រប់គ្រងទីក្រុង កាត់បន្ថយភាពអនាធិបតេយ្យ និងធ្វើឲ្យបរិយាកាសជុំវិញផ្សារធំតាកែវ កាន់តែមានសោភ័ណភាព សុវត្ថិភាព និងងាយស្រួលសម្រាប់ប្រជាពលរដ្ឋក្នុងការធ្វើដំណើរ និងប្រកបអាជីវកម្មប្រចាំថ្ងៃ៕

អត្ថបទ៖ វីរៈ

The post អាជ្ញាធរ​ក្រុងដូនកែវ ចុះរៀបចំសណ្តាប់ធ្នាប់ជុំវិញផ្សារធំតាកែវ ដើម្បីពង្រឹងអនាម័យ និងការគ្រប់គ្រងភាស៊ីឲ្យមានតម្លាភាព appeared first on Kampuchea Thmey Daily.

ជាមួយគ្នានេះ ហាង “ឡាម៉ូន កាហ្វេ (Lamon Coffee & Tea)” ដែលជាយីហោក្នុងស្រុកថ្មីមួយ បានបើកដំណើរការ ស្ថិតតាមផ្លូវខេត្តលេខ៣៧ ខាងជើងតាកែវយាយកែវ ប្រមាណ ២៥០ម៉ែត្រ។ ហាងនេះផ្តល់ជូនកាហ្វេ ភេសជ្ជៈ និងអាហារសម្រន់ជាច្រើនប្រភេទ ក្នុងបរិយាកាសធំទូលាយ ស្អាត និងទាន់សម័យ ព្រមទាំងមានបន្ទប់ប្រជុំសម្រាប់ក្រុមតូច និងមធ្យម។

ការកើនឡើងនៃហាងកាហ្វេនៅក្រុងដូនកែវ មិនត្រឹមជាការលើកកម្ពស់វិស័យអាជីវកម្មប៉ុណ្ណោះទេ ប៉ុន្តែថែមទាំងជួយជំរុញសកម្មភាពសេដ្ឋកិច្ច និងទាក់ទាញភ្ញៀវទេសចរមកកាន់ខេត្តតាកែវកាន់តែច្រើនផងដែរ៕

អត្ថបទ៖ វីរៈ

The post អាជីវកម្មលើវិស័យហាងកាហ្វេ កំពុងរីកចម្រើនក្នុងក្រុងដូនកែវ appeared first on Kampuchea Thmey Daily.