អភិបាលក្រុងដូនកែវថ្មី ចុះរៀបចំសណ្ដាប់ធ្នាប់ផ្សារតាកែវ ខណៈការយកចំណីផ្លូវលក់ដូរ នៅតែជាបញ្ហាប្រឈមរុាំរ៉ៃ

នៅព្រឹកថ្ងៃទី១៦ ខែឧសភា ឆ្នាំ២០២៦ លោក ឌឹម គឹមសាន អភិបាលក្រុងដូនកែវ បានដឹកនាំក្រុមការងារចម្រុះ ចុះរៀបចំសណ្ដាប់ធ្នាប់សាធារណៈនៅក្នុង និងជុំវិញផ្សារធំតាកែវ ដើម្បីលើកកម្ពស់សោភ័ណភាពទីក្រុង កាត់បន្ថយការកកស្ទះចរាចរណ៍ និងស្តាររបៀបរៀបរយក្នុងតំបន់ទីប្រជុំជន។ ការចុះរៀបចំនេះ ផ្តោតសំខាន់លើបញ្ហាការដាក់តាំងលក់ទំនិញរំលោភលើចិញ្ចើមផ្លូវសាធារណៈ ដែលកំពុងបង្កផលប៉ះពាល់ដល់សណ្ដាប់ធ្នាប់ និងការធ្វើដំណើររបស់ប្រជាពលរដ្ឋជារៀងរាល់ថ្ងៃ។

ក្នុងប្រតិបត្តិការចុះពិនិត្យនោះ លោកអភិបាលក្រុង រួមជាមួយអភិបាលរងក្រុង មន្ត្រីជំនាញ និងកម្លាំងពាក់ព័ន្ធ បានចុះជួបសំណេះសំណាលដោយផ្ទាល់ជាមួយអាជីវករ និងធ្វើការណែនាំឱ្យបញ្ឈប់ការដាក់តាំងលក់ទំនិញលើផ្លូវសាធារណៈ ព្រមទាំងស្នើឱ្យចូលរួមថែរក្សាអនាម័យ បរិស្ថាន និងសោភ័ណភាពផ្សារ ដោយត្រូវវេចខ្ចប់ និងទុកដាក់សំរាមឱ្យបានត្រឹមត្រូវ។

លោក ឌឹម គឹមសាន បានបញ្ជាក់ថា ការរៀបចំសណ្ដាប់ធ្នាប់នេះ មិនមែនជាការរឹតត្បិតការប្រកបអាជីវកម្មរបស់ប្រជាពលរដ្ឋឡើយ ប៉ុន្តែជាការរៀបចំឱ្យមានរបៀបរៀបរយ សមស្របតាមបែបទីក្រុង និងដើម្បីបង្កើនភាពទាក់ទាញដល់អ្នកទិញ ក៏ដូចជាភ្ញៀវទេសចរដែលធ្វើដំណើរឆ្លងកាត់ខេត្តតាកែវ៕

អត្ថបទ៖ ​វីរៈ