ក្រុមហ៊ុន Nvidia Archives - Kampuchea Thmey Daily

Nvidia៖ ការលក់កើនឡើង ដោយសារកំណើនតម្រូវការបន្ទះឈីប

Huon Dina — Thu, 27 Feb 2025 02:04:45 +0000

ក្រុមហ៊ុនផលិតបន្ទះឈីប Nvidia កាលពីថ្ងៃពុធ បានរាយការណ៍ពីកំណើននៃប្រាក់ចំណេញ និងការលក់នៅត្រីមាសទី ៤ (ឆ្នាំសារពើពន្ធរបស់ក្រុមហ៊ុន) ដោយសារតម្រូវការសម្រាប់បន្ទះឈីបដែលប្រើក្នុងប្រព័ន្ធបញ្ញាសិប្បនិម្មិត បានកើនឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

ក្នុងត្រីមាសគិតត្រឹមថ្ងៃទី ២៦ មករា Nvidia បានប្រកាសប្រាក់ចំណូលប្រមាណ ៣៩,៣ ប៊ីលានដុល្លារ កើនឡើង ១២ ភាគរយ ពីត្រីមាសមុន និងរហូតដល់ ៧៨ ភាគរយ ក្នុងអត្រាប្រចាំឆ្នាំ។

Nvidia បានរាយការណ៍ពីប្រាក់ចំណេញសុទ្ធ ២២,០៦ ប៊ីលានដុល្លារ នៅត្រីមាសទី ៤ ដោយលើសការរំពឹងទុករបស់អ្នកវិភាគត្រឹមប្រមាណ ១៩,៥៧ ប៊ីលានដុល្លារ។ ការលក់របស់ក្រុមហ៊ុនបច្ចេកវិទ្យាយក្សមួយនេះ រំពឹងថានឹងបន្តកើនឡើង ដែលអាចឱ្យប្រាក់ចំណូលកើនដល់ ៤៣ ប៊ីលានដុល្លារ សម្រាប់ត្រីមាសទី១នៃឆ្នាំសារពើពន្ធ ២០២៦។

ស្ថាបនិក Nvidia លោក Jensen Huang បាននិយាយក្នុងសេចក្តីថ្លែងការណ៍ថា៖ «តម្រូវការសម្រាប់ Blackwell (បន្ទះឈីបឯកទេសប្រើក្នុង AI) គឺអស្ចារ្យណាស់ ខណៈ Reasoning AI ( AI ដែលអាចអនុវត្តការគិតបែបឡូជីក ការដោះស្រាយបញ្ហា និងការសម្រេចចិត្តដោយផ្អែកលើព័ត៌មានដែលវាដំណើរការ។) បន្ថែមច្បាប់កំណត់មាត្រដ្ឋានមួយផ្សេងទៀត ពោលគឺការបង្កើនការគណនាសម្រាប់ការបណ្តុះបណ្តាលធ្វើឱ្យម៉ូដែលឆ្លាតវៃជាងមុន ហើយការបង្កើនការគណនាសម្រាប់ការគិតវែងធ្វើឱ្យចម្លើយកាន់តែឆ្លាតវៃ»។

លោក Jensen បានបន្តថា Nvidia បានផលិតបន្ទះឈីប Blackwell ទ្រង់ទ្រាយធំ ដែលលក់បានប្រាក់រាប់ប៊ីលានដុល្លារនៅត្រីមាសចុងក្រោយ៕

The post Nvidia៖ ការលក់កើនឡើង ដោយសារកំណើនតម្រូវការបន្ទះឈីប appeared first on Kampuchea Thmey Daily.

Samsung ព្រមានពីកម្សោយនៃការលក់បន្ទះឈីប ជុំវិញការរឹតត្បឹតរបស់អាមេរិកលើចិន

Huon Dina — Fri, 31 Jan 2025 10:08:15 +0000

Samsung Electronics ដែលជាក្រុមហ៊ុនផលិតគ្រឿងអេឡិចត្រូនិក និងបន្ទះឈីបដ៏ធំមួយរបស់ពិភពលោក បានព្រមាននៅថ្ងៃសុក្រនេះថា ការលក់បន្ទះឈីបប្រើក្នុងបញ្ញាសិប្បនិម្មិតរ (AI) របស់ខ្លួន អាចនឹងចុះខ្សោយនៅត្រីមាសទី១ ដើមឆ្នាំ ២០២៤ នេះ ដោយសារតែការរឹតបន្តឹងការនាំចេញបន្ទះឈីបរបស់សហរដ្ឋអាមេរិកទៅកាន់ប្រទេសចិន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

អនុប្រធានប្រតិបត្តិទទួលបន្ទុកលើអាជីវកម្មអង្គចងចាំរបស់ក្រុមហ៊ុន Samsung លោក Kim Jae-june បាននិយាយថា៖ «វានឹងមានការរឹតបន្តឹងបណ្តោះអាសន្នមួយចំនួនក្នុងការលក់បន្ទះឈីប HBM របស់យើង នៅត្រីមាសទី១»។ លោកនិយាយនេះ ដោយសំដៅលើបន្ទះឈីបអង្គចងចាំកុំព្យូទ័រទំនើប ដែលមានឈ្មោះពេញថា High Bandwidth Memory ដែលវាមានសមត្ថភាពខ្ពស់សម្រាប់គ្រប់គ្រងលើការងាររបស់ AI។

គួររំឭកថា កាលពីខែធ្នូ សហរដ្ឋអាមេរិកបានកំណត់គោលដៅរឹតត្បឹតជុំថ្មីលើការផ្គត់ផ្គង់បន្ទះឈីបទៅឱ្យចិន រួមទាំងការដាក់កម្រិតលើការលក់បន្ទះឈីប HBM ផងដែរ។ ការរឹតត្បឹតនេះ ធ្វើឱ្យប៉ះពាល់ដល់ការលក់របស់ក្រុមហ៊ុន Samsung ដែលមានអតិថិជនចិនរួមចំណែកទិញប្រហែល ២០ ភាគរយ នៃការលក់ HBM របស់ខ្លួន។

លោក Kim បាននិយាយថា៖ «យើងរំពឹងថានឹងមានផលប៉ះពាល់មួយចំនួនលើតម្រូវការ HBM របស់យើង ទាំងមកពីការរឹតបន្តឹងរបស់សហរដ្ឋអាមេរិកលើការនាំចេញបន្ទះឈីបទំនើបៗ និងការផ្លាស់ប្ដូរនៃតម្រូវការសម្រាប់បន្ទះឈីបទំនើបៗពីអតិថិជនធំៗ»។

បើតាមរ៉យទ័រ Samsung បានជួបនូវបញ្ហាក្នុងការបំពេញតម្រូវការបន្ទះឈីប HBM ដែលប្រើក្នុងប្រព័ន្ធដំណើរការក្រាហ្វិក AI (GPUs) ទៅឱ្យក្រុមហ៊ុនផលិតបន្ទះឈីបយក្សអាមេរិក Nvidia ចំពេលដែលបន្ទះឈីបទំនើបៗប្រើសម្រាប់ AI បែបនេះ មានភាពលេចធ្លោរជាងគេនៅលើទីផ្សារបន្ទះឈីបអង្គចងចាំ។

សារព័ត៌មាន Korea JoongAng Daily បានរាយការណ៍ថា នាយកប្រតិបត្តិ Nvidia លោក Jensen Huang និយាយនៅខែនេះថា ក្រុមហ៊ុន Samsung ត្រូវតែបង្កើតការរចនាថ្មី ដើម្បីផ្គត់ផ្គង់បន្ទះឈីប HBM ដល់ក្រុមហ៊ុនរបស់លោក។ កាលពីឆ្នាំមុន Samsung អះអាងថា ខ្លួនកំពុងធ្វើឱ្យមានវឌ្ឍនភាពក្នុងការផ្គត់ផ្គង់បន្ទះឈីប HBM ដល់ Nvidia ប៉ុន្តែមិនបានចេញផ្សាយការអាប់ដេតជាសាធារណៈណាមួយចាប់តាំងពីពេលនោះមកទេ៕

The post Samsung ព្រមានពីកម្សោយនៃការលក់បន្ទះឈីប ជុំវិញការរឹតត្បឹតរបស់អាមេរិកលើចិន appeared first on Kampuchea Thmey Daily.

វៀតណាម និងក្រុមហ៊ុនឈីប Nvidia ចុះកិច្ចព្រមព្រៀងកិច្ចសហប្រតិបត្តិការ

Huon Dina — Fri, 06 Dec 2024 08:58:16 +0000

នាយករដ្ឋមន្ត្រីវៀតណាម លោក ផាម មិញឈិញ និងជាប្រធាននាយកប្រតិបត្តិក្រុមហ៊ុនបច្ចេកវិទ្យា និងផលិតបន្ទះឈីប Nvidia លោក Jensen Huang បានចូលរួមក្នុងពិធីចុះហត្ថលេខាលើកិច្ចព្រមព្រៀងសហប្រតិបត្តិការបង្កើតមជ្ឈមណ្ឌលស្រាវជ្រាវ និងអភិវឌ្ឍន៍បញ្ញាសិប្បនិម្មិត (AI) និងមជ្ឈមណ្ឌលទិន្នន័យ AI នៅវៀតណាម។ នេះបើតាមការចុះផ្សាយរបស់កាសែត VnExpress។

ក្នុងព្រឹត្តិការណ៍កាលពីថ្ងៃព្រហស្បតិ៍ លោក ឈិញ បានថ្លែងអំណរគុណដល់លោក Jensen Huang ដែលបាននាំមកនូវស្មារតីនៃកិច្ចសហប្រតិបត្តិការ ទំនុកចិត្ត និងភាពស្មោះត្រង់ លើភាពជាដៃគូរវាងក្រុមហ៊ុន Nvidia និង វៀតណាម។

លោក ឈិញ បានទទួលស្គាល់ការរួមចំណែករបស់ក្រុមហ៊ុន Nvidia និងលោក Jensen Huang ចំពោះការអភិវឌ្ឍន៍របស់វៀតណាម ជាពិសេសក្នុងការប្រើប្រាស់វិទ្យាសាស្ត្រ បច្ចេកវិទ្យា និង AI ដើម្បីជំរុញកំណើនជាតិ។ លោកបានជំរុញឱ្យមានការវិនិយោគបន្ថែមពីក្រុមហ៊ុន Nvidia ដូចជាលើការអភិវឌ្ឍ AI ការផ្ទេរបច្ចេកវិទ្យា ហេដ្ឋារចនាសម្ព័ន្ធ AI និងការអភិវឌ្ឍធនធានមនុស្សជាដើម។

ចំណែក លោក Jensen Huang បាននិយាយថា វៀតណាមមានសក្តានុពល ហេដ្ឋារចនាសម្ព័ន្ធ និងធនធានមនុស្សក្នុងការអភិវឌ្ឍន៍ AI ដែលគេប្រើកាន់តែច្រើនឡើងៗក្នុងវិស័យសេដ្ឋកិច្ចសង្គមរបស់វៀតណាម។

លើសពីនេះ លោកបានអរគុណដល់នាយករដ្ឋមន្រ្តីវៀតណាម ហើយបានប្តេជ្ញាចិត្តថាធ្វើជាមិត្ត និងជាដៃគូរបស់វៀតណាមក្នុងដំណើរអភិវឌ្ឍន៍របស់ខ្លួន៕

The post វៀតណាម និងក្រុមហ៊ុនឈីប Nvidia ចុះកិច្ចព្រមព្រៀងកិច្ចសហប្រតិបត្តិការ appeared first on Kampuchea Thmey Daily.

ភាគហ៊ុន Nvidia ធ្លាក់ចុះជិត ១០ ភាគរយ បង្កការបាត់បង់ជិត ២៨០ ប៊ីលានដុល្លារ នៅថ្ងៃអង្គារ

Huon Dina — Wed, 04 Sep 2024 07:11:43 +0000

ភាគហ៊ុនរបស់ក្រុមហ៊ុនផលិតបន្ទះឈីបយក្ស Nvidia បានធ្លាក់ចុះប្រមាណ ៩,៥ ភាគរយ កាលពីថ្ងៃអង្គារ ដែលបង្កការបាត់បង់តម្លៃមូលធនទីផ្សាររហូតដល់ ២៧៩ ប៊ីលានដុល្លារ ខណៈវិនិយោគិនបានបន្ថយសុទិដ្ឋិនិយមរបស់ខ្លួនអំពីបញ្ញាសិប្បនិម្មិត (AI) ដែលធ្វើឱ្យទីផ្សារភាគហ៊ុនធ្លាក់ចុះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ការធ្លាក់ចុះនៃមូលធនទីផ្សារដ៏មហាសាលក្នុងរយៈពេលត្រឹមតែ១ថ្ងៃនេះ គឺជាសូចនាការដ៏សំខាន់មួយដែលថា វិនិយោគិនកាន់តែមានការប្រុងប្រយ័ត្នចំពោះបច្ចេកវិទ្យាកំពុងរីកចម្រើន AI ដែលបានជំរុញឱ្យមានការកើនឡើងខ្លាំងនៃទីផ្សារភាគហ៊ុននាពេលកន្លងមកក្នុងឆ្នាំនេះ។

ភាពច្របូកច្របល់ចុងក្រោយបំផុតអំពី AI បានកើតឡើង ក្រោយក្រុមហ៊ុន Nvidia កាលពីថ្ងៃពុធសប្តាហ៍មុន បានផ្តល់ការព្យាករប្រាក់ចំណូលប្រចាំត្រីមាស៣ ដែលមិនបានដូចការរំពឹងទុកខ្ពស់របស់វិនិយោគិន ដែលបង្កជាការធ្លាក់ចុះភាគហ៊ុនប្រមាណ ៦ ភាគរយ។

អ្នកជំនាញលើកឡើងថា ការព្រួយបារម្ភលើការចំណាយយឺតយ៉ាវក្នុងការវិនិយោគ AI បានធ្វើឱ្យភាគហ៊ុនរបស់ក្រុមហ៊ុនដ៏មានតម្លៃបំផុតផ្សេងៗរបស់ Wall Street ធ្លាក់ចុះ ក្នុងរយៈពេលប៉ុន្មានសប្តាហ៍ថ្មីៗនេះ រួមទាំងភាគហ៊ុនរបស់ក្រុមហ៊ុន Intel ក្រុមហ៊ុន Microsoft និងក្រុមហ៊ុន Alphabet ជាដើម។

គួរបញ្ជាក់ផងដែរថា ការធ្លាក់ចុះនៃភាគហ៊ុនបន្ទះឈីប បានដើរព្រមគ្នានឹងការធ្លាក់ចុះយ៉ាងខ្លាំងនៃភាគហ៊ុននៅ Wall Street ដោយផ្សារភាគហ៊ុន Nasdaq ធ្លាក់ចុះ ៣,៣ ភាគរយ និងផ្សារហ៊ុន S&P 500 បានធ្លាក់ចុះ ២,១ ភាគរយ៕

The post ភាគហ៊ុន Nvidia ធ្លាក់ចុះជិត ១០ ភាគរយ បង្កការបាត់បង់ជិត ២៨០ ប៊ីលានដុល្លារ នៅថ្ងៃអង្គារ appeared first on Kampuchea Thmey Daily.

Nvidia វ៉ាដាច់ Microsoft ក្លាយជាក្រុមហ៊ុនមានតម្លៃជាងគេបំផុតលើពិភពលោក

Huon Dina — Thu, 20 Jun 2024 07:15:00 +0000

ក្រុមហ៊ុនផលិតបន្ទះឈីប Nvidia បានវ៉ាដាច់ក្រុមហ៊ុនបច្ចេកវិទ្យាយក្ស Microsoft ក្លាយជាក្រុមហ៊ុនដ៏មានតម្លៃបំផុតនៅលើពិភពលោក បន្ទាប់ពីតម្លៃភាគហ៊ុនបានកើនឡើងដល់កម្រិតខ្ពស់មិនធ្លាប់មានកាលពីថ្ងៃអង្គារ។

ភាគហ៊ុន Nvidia បានបញ្ចប់ការជួញដូរកាលពីថ្ងៃអង្គារក្នុងតម្លៃ ១៣៦ ដុល្លារ ដោយកើនឡើង ៣,៥ ភាគរយ ដែលធ្វើឱ្យមូលធនទីផ្សាររបស់ក្រុមហ៊ុននេះ កើនដល់ ៣,៣៤ ទ្រីលានដុល្លារ វ៉ាដាច់ក្រុមហ៊ុន Microsoft ដែលមានតម្លៃ ៣,៣២ ទ្រីលានដុល្លារ។ ក្រុមហ៊ុនបច្ចេកវិទ្យា Apple ដែល Nvidia វ៉ាដាច់យកដំណែងលេខ២កាលពីខែមុន មានតម្លៃទីផ្សារ ៣,២៧ ទ្រីលានដុល្លារ។

អ្នកជំនាញលើកឡើងថា ការឡើងថ្លៃលឿនដូចហោះរបស់ក្រុមហ៊ុន Nvidia កើតឡើងដោយសារតែភាពលេចធ្លោរបស់ក្រុមហ៊ុននេះ ក្រោមអ្វីដែលអ្នកវិភាគហៅថា «មាស ឬប្រេងថ្មីនៅក្នុងវិស័យបច្ចេកវិទ្យា» ពោលគឺបន្ទះឈីប ដែលត្រូវការសម្រាប់បញ្ញាសិប្បនិម្មិត (AI) ។

តម្លៃរបស់ Nvidia បានកើនឡើងច្រើនជាង ១០ ដងចាប់តាំងពីខែតុលា ឆ្នាំ ២០២២ មុនពេលក្រុមហ៊ុន AI OpenAI ដាក់ដំណើរការសុសវ៉ែរ ChatGPT ដែលធ្វើឱ្យសន្ទុះប្រើប្រាស់ AI រីកសុះសាយ។

ថ្លែងក្នុងកម្មវិធីមួយនៅទីក្រុងកូប៉ិនហាក ប្រទេសដាណឺម៉ាក លោក Chris Penrose ប្រធានផ្នែកអភិវឌ្ឍន៍អាជីវកម្មសកលសម្រាប់ទូរគមនាគមន៍របស់ Nvidia បានព្យាករណ៍ពីកំណើន បន្ថែមទៀតនៅក្នុងវិស័យបច្ចេកវិទ្យា AI។ លោកបានបន្តថា៖ «ដំណើរការ AI មានមុខងារបង្កើត គឺពិតជាផ្លាស់ប្តូរអាជីវកម្ម និងទូរគមនាគមន៍ជុំវិញពិភពលោក។ យើងទើបតែចាប់ផ្តើមទេ»។ នេះបើតាមការស្រង់សម្ដីរបស់បណ្ដាញព័ត៌មាន BCC។

អ្នកវិភាគនៅធនាគារវិនិយោគឯកជន Wedbush Securities បានយល់ស្របនឹងការលើកឡើងនេះ ដោយសរសេរក្នុងកំណត់ត្រាមួយចេញផ្សាយកាលពីដើមសប្ដាហ៍នេះថា៖ «យើងជឿជាក់ថា នៅឆ្នាំក្រោយ ការប្រកួតប្រជែងយកតម្លៃមូលធនទីផ្សារ ៤ ទ្រីលានដុល្លារក្នុងទីផ្សារបច្ចេកវិទ្យា នឹងក្លាយជាចំណុចសំខាន់រវាង ក្រុមហ៊ុន Nvidia, Apple និង Microsoft»៕

The post Nvidia វ៉ាដាច់ Microsoft ក្លាយជាក្រុមហ៊ុនមានតម្លៃជាងគេបំផុតលើពិភពលោក appeared first on Kampuchea Thmey Daily.

ជាមួយមូលធនទីផ្សារ ៣ ទ្រីលានដុល្លារ Nvidia វ៉ាដាច់ Apple ក្លាយជាក្រុមហ៊ុនមានតម្លៃជាងគេបំផុតទី២នៅលើទីផ្សារហ៊ុនអាមេរិក

Huon Dina — Thu, 06 Jun 2024 07:02:59 +0000

Nvidia Corp. ដែលជាក្រុមហ៊ុនផលិតបន្ទះឈីបដ៏មានតម្លៃជាងគេលើពិភពលោក ឥឡូវនេះបានក្លាយជាក្រុមហ៊ុនមានតម្លៃជាងគេបំផុតទី២នៅលើទីផ្សារហ៊ុនអាមេរិក ដោយមូលធនទីផ្សាររបស់ក្រុមហ៊ុនបានកើនឡើងលើស ៣ ទ្រីលានដុល្លារ។ នេះបើតាមការចុះផ្សាយរបស់ទីភ្នាក់ងារសារព័ត៌មាន Bloomberg។

ភាគហ៊ុនរបស់ Nvidia បានកើនឡើងប្រហែល ១៤៧ ភាគរយនៅឆ្នាំនេះ ដោយបានបន្ថែមមូលធនទីផ្សារ ១,៨ ទ្រីលានដុល្លារ ខណៈតម្រូវការបន្ទះឈីបរបស់ក្រុមហ៊ុន ដែលប្រើដើម្បីដំណើការបញ្ញាសិប្បនិម្មិត (AI) បានហក់ឡើងកប់ពពក។

កាលពីថ្ងៃពុធ ភាគហ៊ុនរបស់ក្រុមហ៊ុនបានកើនឡើង ៥,២ ភាគរយ ក្នុងតម្លៃជួញដូរចុងក្រោយ ១ ២២៤,៤០/ហ៊ុន ដែលធ្វើឱ្យតម្លៃមូលធនទីផ្សារទាំងមូលកើនលើសពី ៣ ទ្រីលានដុល្លារ ដោយវ៉ាដាច់មូលធនទីផ្សាររបស់ក្រុមហ៊ុន Apple Inc. និងឈរនៅពីក្រោយតែក្រុមហ៊ុន Microsoft ប៉ុណ្ណោះ។ ការណ៍នេះ ធ្វើឱ្យ Nvidia ក្លាយជាក្រុមហ៊ុនបច្ចេកវិទ្យាបន្ទះឈីបដំបូងគេលើពិភពលោក ដែលមានមូលធនទីផ្សារលើសពី ៣ ទ្រីលានដុល្លារ។

ពេលចុងក្រោយដែល Nvidia មានតម្លៃលើសពី Apple គឺនៅឆ្នាំ ២០០២ ពោលគឺ ៥ ឆ្នាំមុន ទូរស័ព្ទម៉ាក iPhone ចេញលក់នៅលើទីផ្សារ។ កាលនោះ ក្រុមហ៊ុនទាំង២មានតម្លៃតិចជាង ១០ ប៊ីលានដុល្លារប៉ុណ្ណោះ។

បើតាម Bloomberg ភាពរីកចម្រើនរបស់ Nvidia មិនបានបង្ហាញសញ្ញាដែលអាចឱ្យគូប្រជែងតាមទាន់នាំពេលនេះទេ។ លោក Jensen Huang នាយកប្រតិបត្តិរបស់ក្រុមហ៊ុន បាននិយាយថា ក្រុមហ៊ុនមានគម្រោងធ្វើឱ្យប្រសើរឡើងនូវអ្វីដែលខ្លួនហៅថា «ឈ្នាន់បង្កើនល្បឿន AI (AI Accelerators)» ជារៀងរាល់ឆ្នាំ។

លោក Huang បានប្រាប់អ្នកចូលរួមក្នុងសុន្ទរកថានៅសកលវិទ្យាល័យជាតិតៃវ៉ាន់ថា ការកើនឡើងនៃ AI ជំនាន់ថ្មី គឺជាបដិវត្តន៍ឧស្សាហកម្មថ្មី ហើយ Nvidia រំពឹងថានឹងដើរតួយ៉ាងសំខាន់៕

The post ជាមួយមូលធនទីផ្សារ ៣ ទ្រីលានដុល្លារ Nvidia វ៉ាដាច់ Apple ក្លាយជាក្រុមហ៊ុនមានតម្លៃជាងគេបំផុតទី២នៅលើទីផ្សារហ៊ុនអាមេរិក appeared first on Kampuchea Thmey Daily.

ក្រុមហ៊ុនឈីប អាមេរិក ចាប់ដៃគូជាមួយ វៀតណាម ដើម្បីអភិវឌ្ឍន៍ AI

ratanak neang — Tue, 12 Dec 2023 10:00:03 +0000

ក្រុមហ៊ុនផលិតបន្ទះឈីប Nvidia របស់សហរដ្ឋអាមេរិកបានពង្រីកភាពជាដៃគូជាមួយក្រុមហ៊ុនបច្ចេកវិទ្យាកំពូលវៀតណាម ដើម្បីគាំទ្រដល់ការបណ្តុះបណ្តាលសម្រាប់ការអភិវឌ្ឍបច្ចេកវិទ្យា AI និងហេដ្ឋារចនាសម្ព័ន្ធឌីជីថល ។

ក្នុងដំណើរទស្សនកិច្ចទៅកាន់ទីក្រុងហាណូយ លោក Jensen Huang នាយកប្រតិបត្តិក្រុមហ៊ុន Nvdia បញ្ចាក់ថា វៀតណាមគឺជាដៃគូដ៏សំខាន់របស់ក្រុមហ៊ុនរួចទៅហើយ ដោយសារតែមានអតិថិជនជាច្រើននៅទីនោះ ។ ជាមួយគ្នានេះ Nvidia នឹងធ្វើឲ្យទំនងកាន់តែស៊ីជម្រៅបន្ថែមទៀតផងដែរ តាមរយៈភាពជាដៃគូនឹងក្រុមហ៊ុនធំៗវៀតណាមដូចជា Viettel, FPT, Vingroup, VNG ជាដើម ។

ក្រុមហ៊ុន Nvidia បានបណ្តាក់ទុន ២៥០ លានដុល្លារក្នុងប្រទេសវៀតណាម ហើយបានចាប់ដៃគូជាមួយក្រុមហ៊ុនបច្ចេកវិទ្យាឈានមុខគេក្នុងការដាក់ពង្រាយបច្ចេកវិទ្យា AI នៅក្នុងប្រតិបត្តិការ Cloud, ឧស្សាហកម្មរថយន្ត និងថែទាំសុខភាព ។

ស្របពេលជាមួយគ្នានេះ ដំណើរទស្សនកិច្ចរបស់នាយកប្រតិបត្តិ Nvidia កើតមានឡើង ចំពេលដែលប្រទេសវៀតណាមកំពុងព្យាយាមពង្រីកខ្លួនទៅលើការរចនា ក៏ដូចជាការផលិតបន្ទះឈីប ។

ទន្ទឹមគ្នានេះ រដ្ឋមន្ត្រីវិនិយោគវៀតណាម លោក Nguyen Chi Dzung និយាយថា វៀតណាមកំពុងរៀបចំយន្តការ និងលើកទឹកចិត្តដើម្បីទាក់ទាញគម្រោងវិនិយោគក្នុងឧស្សាហកម្ម semiconductor និង AI ខណៈលោកក៏បានស្នើឲ្យ Nvidia ពិចារណាលើការបង្កើតកន្លែងស្រាវជ្រាវ និងអភិវឌ្ឍន៍ក្នុងវៀតណាមតាមសំណើរបស់លោកនាយកប្រតិបត្តិរបស់ក្រុមហ៊ុនផងដែរ ៕

ប្រែសម្រួល៖ នាង រតនៈ

ប្រភព៖ VN Express

ចុចអាន៖ ប៉ាតាយ៉ា បើកលក់សារធាតុញៀនបញ្ចូលក្នុងប៉េងប៉ោង យ៉ាងរំភើយ

The post ក្រុមហ៊ុនឈីប អាមេរិក ចាប់ដៃគូជាមួយ វៀតណាម ដើម្បីអភិវឌ្ឍន៍ AI appeared first on Kampuchea Thmey Daily.

ក្រុមហ៊ុន Nvidia Archives - Kampuchea Thmey Daily

Nvidia៖ ការលក់​កើនឡើង ដោយសារកំណើនតម្រូវការបន្ទះឈីប

Samsung ព្រមាន​ពីកម្សោយនៃការលក់បន្ទះ​ឈីប ​​​​ជុំវិញការរឹតត្បឹតរបស់អាមេរិកលើចិន

វៀតណាម​ និង​ក្រុមហ៊ុនឈីប​ Nvidia ចុះ​កិច្ចព្រមព្រៀង​កិច្ចសហប្រតិបត្តិការ​