ក្លិបអ្នកកាសែតកម្ពុជា Archives - Kampuchea Thmey Daily

មន្រ្តីជាន់ខ្ពស់ធនាគារជាតិពន្យល់ពីដំណើរការឈានទៅដកអាជ្ញាបណ្ណធនាគារព្រីនស៍

Dy Bunnara — Fri, 29 May 2026 08:12:42 +0000

មន្រ្តីជាន់ខ្ពស់ធនាគារជាតិនៃកម្ពុជាបានឆ្លើយតបសំនួររបស់ក្រុមអ្នកសារព័ត៌មានពីដំណើរការឈានទៅដកអាជ្ញាបណ្ណធនាគារព្រីនស៍ ក្រោយម្ចាស់ស្ថាបនិករងការចោទប្រកាន់ជាប់ពាក់ព័ន្ធបទល្មើស Online Scam។

នៅក្នុងវេទិកាកិច្ចពិភាក្សារបស់អ្នកសារព័ត៌មាន និងអ្នកជំនាញក្នុងវិស័យហិរញ្ញវត្ថុ អ្នកស្រី ម៉ក់ រស្ម៊ី អគ្គនាយករងបទប្បញ្ញត្តិ និងបរិយាបន្នហិរញ្ញវត្ថុធនាគារជាតិនៃកម្ពុជាបានពន្យល់ពីដំណើរការ ក្នុងការឈានទៅដកអាជ្ញាប័ណ្ណរបស់ធនាគារព្រីនស៍ ក្រោយស្ថាបនិកធនាគារព្រីសន៍ លោក ចេន ហ្ស៊ី ត្រូវបានចាប់ខ្លួន និងធ្វើបត្យាប័នទៅប្រទេសចិនដោយរងការចោទប្រកាន់ជាប់ពាក់ព័ន្ធបទល្មើស Online Scam។

ក្នុងករណីធនាគារព្រីសន៍ មន្រ្តីជាន់ខ្ពស់ធនាគារជាតិនៃកម្ពុជាបានធ្វើការពន្យល់ពីនីតិវិធីក្នុងការអនុវត្តការដកហូតអាជ្ញាបណ្ណសាជីវកម្មធនគារ ដោយយោងតាមទិដ្ឋភាពច្បាប់ក្រមរដ្ឋប្បវេណី ក្រមព្រហ្មទណ្ឌ និងច្បាប់ជាធរមាន។

អ្នកស្រី ម៉ក់ រស្ម៊ី បានគូសបញ្ជាក់ថា យោងតាមច្បាប់ត្រូវបែងចែករវាងទ្រព្យសម្បត្តិធនាគារ និងទ្រព្យសម្បត្តិឯកជនរបស់ភាគទុនិកដាច់ដោយឡែកពីគ្នា។ ករណីធនាគារព្រីនស៍ដែលត្រូវបានដកអាជ្ញាប័ណ្ណ គឺមានបញ្ហាពាក់ព័ន្ធនឹង «ម្ចាស់ធនាគារ» ជាភាគទុនិក មិនមែនពាក់ព័ន្ធនឹងប្រតិបត្តិការរបស់ធនាគារឡើយ។

ធនាគារនៅតែរកស៊ីមានចំណេញ និងអនុវត្តស្របតាមការណែនាំគ្រប់យ៉ាង ព្រោះមានរចនាសម្ព័ន្ធគ្រប់គ្រងដាច់ដោយឡែក។ ប៉ុន្តែនៅពេលដែលម្ចាស់ធនាគារមានបញ្ហាឬបាត់បង់ ធនាគារនោះត្រូវតែបញ្ចូលទៅក្នុងនីតិវិធីមួយដែលហៅថា «ការជម្រះបញ្ជីដោយបង្ខំ»។

អ្នកស្រី ម៉ក់ រស្ម៊ី បានអះអាងថា ដោយសារតែទ្រព្យសកម្មរបស់ធនាគារនៅមានគ្រប់គ្រាន់ អាជីវកម្មនៅល្អ និងអាចបំប្លែងជាសាច់ប្រាក់បាន ដូច្នេះទើបធនាគារជាតិអំពាវនាវឱ្យអតិថិជនទៅដកប្រាក់របស់ពួកគេវិញក្នុងនាមជាម្ចាស់បំណុល។

ពាក់ព័ន្ធនីតិវិធីនៃការត្រួតពិនិត្យនិងការដកអាជ្ញាប័ណ្ណ មន្រ្តីជាន់ខ្ពស់ធនាគារជាតិរូបនេះបានបញ្ជាក់ថា ធនាគារជាតិមាននីតិវិធីត្រួតពិនិត្យច្បាស់លាស់ មិនមែននឹកឃើញដកតាមចិត្តនោះទេ។

ធនាគារជាតិបានធ្វើការចម្រាញ់យ៉ាងហ្មត់ចត់តាំងពីដំណាក់កាលស្នើសុំអាជ្ញាប័ណ្ណ ដើម្បីធានាថាអ្នកស្នើសុំមានភាពសុចរិតភាព ទ្រព្យសម្បត្តិ និងប្រភពទុនដែលយកមកវិនិយោគជាប្រភពទុនស្អាតស្អំ ព្រមទាំងពិនិត្យលើរចនាសម្ព័ន្ធគ្រប់គ្រង និងបុគ្គលិក។

ក្នុងដំណាក់កាលប្រតិបត្តិការ ក៏មានការចុះត្រួតពិនិត្យគ្រឹះស្ថានធនាគារ និងហិរញ្ញវត្ថុជាប្រចាំ ខណៈបើមានការសង្ស័យ ធនាគារជាតិនឹងចាត់តាំង «អភិបាលបណ្តោះអាសន្ន» ដើម្បីគ្រប់គ្រងនិងវាយតម្លៃបន្ថែម។

ការឈានដល់ដំណាក់កាលដកអាជ្ញាប័ណ្ណនិងជម្រះបញ្ជីគឺជាជម្រើសចុងក្រោយបង្អស់។ នេះបើការបញ្ជាក់របស់អ្នកស្រី ម៉ក់ រស្ម៊ី។ គោលបំណងពិតប្រាកដរបស់ធនាគារជាតិ គឺចង់ផ្តល់អាជ្ញាប័ណ្ណដើម្បីឱ្យគ្រឹះស្ថានទាំងនោះផ្តល់សេវាបម្រើដល់សេដ្ឋកិច្ច និងសង្គម មិនមែនចង់ដកហូតវិញឡើយ។ អ្នកស្រី ម៉ក់ រស្ម៊ី បានបន្ថែម។

យ៉ាងណាមិញ ពាក់ព័ន្ធហេតុការណ៍ដែលកើនឡើងផ្ទួនៗ រហូតឈានទៅដកហួតអាជ្ញាបណ្ណគ្រឹះស្ថានធនាគារជាបន្តបន្ទាប់ ដែលនាំឲ្យពលរដ្ឋមានការព្រួយបារម្ភពីស្ថានភាពវិស័យហិរញ្ញវត្ថុក្នុងប្រទេសកម្ពុជា អ្នកស្រី ម៉ក់ រស្ម៊ី ទទួលស្គាល់ថា ពិតជាអាចប៉ះពាល់លើសតិអារម្មណ៍សាធារណជនមួយចំនួន។

អ្នកស្រីបានគូសរំលេចថា ប្រព័ន្ធធនាគារអាចឈរជើងទៅបានគឺអាស្រ័យទាំងស្រុងលើសតិអារម្មណ៍ និងទំនុកចិត្តរបស់អតិថិជន។ បន្ទាប់ពីមានករណីធនាគារមួយចំនួនចូលក្នុងដំណាក់កាលជម្រះបញ្ជី មានសាធារណជនខ្លះមានគំនិតអវិជ្ជមានដោយយល់ថាឱ្យតែធនាគារមានម្ចាស់ជាជនជាតិចិនគឺសុទ្ធតែមានបញ្ហា។ ការគិតបែបនេះ និងការផ្សព្វផ្សាយព័ត៌មានមិនពិតអាចបង្កើតជាសតិអារម្មណ៍ភ័យខ្លាច នាំគ្នាទៅដកប្រាក់ពីធនាគារចិនផ្សេងទៀត ដែលអាចបង្កជាផលប៉ះពាល់ខ្សែសង្វាក់ដល់សង្គម សេដ្ឋកិច្ច វិស័យធនាគារទាំងមូល និងប៉ះពាល់ដល់អ្នកខ្ចីប្រាក់ផងដែរ។

ធនាគារជាតិនៃកម្ពុជា (NBC) បានចេញសេចក្តីជូនដំណឹងពីការផ្អាកមិនឱ្យធនាគារព្រីនស៍ផ្តល់សេវាធនាគារថ្មី និងត្រូវបានដាក់ឱ្យជម្រះបញ្ជីស្របតាមច្បាប់ បន្ទាប់ពីស្ថាបនិកធនាគារ គឺលោក លោក ចេន ហ្ស៊ី ត្រូវបានចាប់ខ្លួន និងធ្វើបត្យាប័នទៅកាន់ប្រទេសចិន។

ធនាគារជាតិនៃកម្ពុជាក៏បានចាត់តាំងក្រុមហ៊ុនក្រុមម៉ូរីសុនកាក់ អិមខេអេ ចុះជម្រះបញ្ជីដើម្បីដោះស្រាយបំណុលទៅអតិថិជន៕

The post មន្រ្តីជាន់ខ្ពស់ធនាគារជាតិពន្យល់ពីដំណើរការឈានទៅដកអាជ្ញាបណ្ណធនាគារព្រីនស៍ appeared first on Kampuchea Thmey Daily.

អ្នកឧកញ៉ា លឹម ហេង៖ សូមកុំឲ្យ “ច្រកចេញចូលតែមួយ” ក្លាយជា “ច្រកជាប់គាំងតែមួយ”

Dy Bunnara — Sat, 02 May 2026 08:40:35 +0000

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងកត់សម្គាល់ពីភាពស្មុគស្មាញនៃប្រព័ន្ធការិយាធិបតេយ្យ លើការស្នើដាក់ឯកសារតាមប្រព័ន្ធអនឡាញ និងការទាមទារសេវាក្រៅផ្លូវការ។

នៅក្នុងវេទិកាសារព័ត៌មានលើប្រធានបទ «AI ក្រមសីលធម៌ និងវិជ្ជាជីវៈ៖ តើយើងគួរដើរទៅមុខដោយរបៀបណា?» ដែលរៀបចំឡើងកាលពីព្រឹកថ្ងៃទី ១ ខែឧសភា ឆ្នាំ២០២៦ នៅមជ្ឈមណ្ឌលអភិវឌ្ឍធុរកិច្ច (BDC) អ្នកឧកញ៉ា លឹម ហេង បានរៀបរាប់ពីប្រព័ន្ធការិយាធិបតេយ្យនៅកម្ពុជា និងស្នើឱ្យមានដំណោះស្រាយប្រកបដោយប្រសិទ្ធភាព។

លោកបញ្ជាក់ថា វិស័យឯកជនតែងតែប្រឈមមុខនឹងបញ្ហានៅពេលមានរដ្ឋមន្ត្រីថ្មីឡើងកាន់តំណែង ដែលជារឿយៗតែងតែបង្កើតបញ្ហា និងភាពស្មុគស្មាញថ្មីៗ។

អ្នកឧកញ៉ា លឹម ហេង បានប្រដូច ”ច្រកចេញចូលតែមួយ” បានក្លាយជា “ច្រកជាប់គាំងតែមួយ” ទៅវិញ ខណះការផ្តល់សេវាតាមអនឡាញត្រូវបានជំរុញ តែការអនុវត្តជាក់ស្តែងហាក់គ្មានប្រសិទ្ធភាព។

ក្នុងឱកាសនោះ អ្នកឧកញ៉ាក៏លើកឡើងពីបញ្ហាតម្លៃសេវាសាធារណៈដែលវិស័យឯកជនទាមទារឱ្យមានការកំណត់តម្លៃឱ្យបានច្បាស់លាស់ ដើម្បីកុំឱ្យខាតពេលរត់ការពីការិយាល័យមួយទៅការិយាល័យមួយ។

បន្ថែមពីនេះ អ្នកឧកញ៉ាក៍ស្នើឲ្យមានតម្លាភាព និងភាពស្មោះត្រង់ រវាងមន្ត្រីជាអ្នកអនុវត្តច្បាប់ និងផ្នែកវិស័យឯកជន។ លោកចង់ឃើញការអនុវត្តបច្ចេកវិទ្យាដំណើរការបានរលូនពិតប្រាកដ ដោយមិនមានការរំខានឬបង្កការលំបាក។

អ្នកឧកញ៉ា លឹម ហេង បានបញ្ជាក់ថា លោកនឹងលើកយកបញ្ហាទាំងអស់នេះទៅជជែកបន្ថែមជាមួយអន្តរក្រសួងពាក់ព័ន្ធនានា ដើម្បីជំរុញឱ្យដំណើរការរដ្ឋបាលប្រព្រឹត្តទៅដោយរលូន៕

The post អ្នកឧកញ៉ា លឹម ហេង៖ សូមកុំឲ្យ “ច្រកចេញចូលតែមួយ” ក្លាយជា “ច្រកជាប់គាំងតែមួយ” appeared first on Kampuchea Thmey Daily.

លោក គី សុខលីម៖ «អ្នកសារព័ត៌មានមិនគួរដើរតួជំនួសតុលាការ វិនិច្ឆ័យរឿងក្តីក្នុងហេតុការណ៍គ្រោះថ្នាក់ចរាចរណ៍»

Dy Bunnara — Sat, 02 May 2026 06:49:41 +0000

លោក គី សុខលីម សហស្ថាបនិករបស់សារព័ត៌មានថ្មីៗបានលើកឡើងពីក្រមសីលធម៌វិជ្ជាជីវៈរបស់អ្នកសារព័ត៌មានក្នុងការរាយការណ៍ពីករណីគ្រោះថ្នាក់ចរាចរណ៍។

ពាក់ព័ន្ធការចុះយកព័ត៌មានពីហេតុការណ៍គ្រោះថ្នាក់ចរាចរណ៍ អ្នកសារព័ត៌មានមានសិទ្ធិចុះថត និងសម្ភាសន៍សាក្សី នគរបាល ឬអ្នកពាក់ព័ន្ធនៅកន្លែងកើតហេតុ។ ប៉ុន្តែអ្នកសារព័ត៌មានត្រូវចងចាំថា ព័ត៌មានដែលទទួលបានភ្លាមៗនោះគឺគ្រាន់តែជាទិន្នន័យដំបូងប៉ុណ្ណោះ ហើយវាមិនទាន់ជាការពិតទាំងស្រុងនៅឡើយទេ។

នៅក្នុងវេទិកាសារព័ត៌មានលើប្រធានបទ «AI ក្រមសីលធម៌ និងវិជ្ជាជីវៈ៖ តើយើងគួរដើរទៅមុខដោយរបៀបណា?» ដែលរៀបចំឡើងកាលពីព្រឹកថ្ងៃទី ១ ខែឧសភា ឆ្នាំ២០២៦ នៅមជ្ឈមណ្ឌលអភិវឌ្ឍធុរកិច្ច (BDC) លោក គី សុខលីម ក្រើនរំលឹកឲ្យអ្នកសារព័ត៌មានត្រូវរក្សាភាពអព្យាក្រឹត មិនត្រូវតាំងខ្លួនជាចៅក្រមនោះទេ។

នៅក្នុងការធ្វើសេចក្តីរាយការណ៍ អ្នកសារព័ត៌មានមិនគួរទុកពេលឱ្យភាគីណាមួយនិយាយច្រើនឧទាហរណ៍ ១៥ ទៅ ២០ នាទី ដើម្បីដាក់បន្ទុកទៅលើភាគីម្ខាងទៀត ហើយក៏មិនត្រូវតាំងខ្លួនជាចៅក្រមឬមេនគរបាលក្នុងការចាត់ចែងរឿងក្ដីនោះដែរ។ ការរាយការណ៍ត្រូវតែធ្វើឡើងក្នុងកម្រិតស្មើភាពគ្នា មានតុល្យភាព និងមិនត្រូវប្រញាប់ទាញសេចក្តីសន្និដ្ឋានជាមុននោះទេ។

បន្ថែមពីនេះលោកក៏រំលឹកឲ្យអ្នកសារព័ត៌មានត្រូវប្រកាន់ភ្ជាប់សិទ្ធិឯកជន និងការសុំការអនុញ្ញាតដូចជា ការថតបង្ហាញស្លាកលេខរថយន្ត ឬការទាញភ្ជាប់បញ្ហាទៅដល់ឪពុកម្តាយឬសមាជិកគ្រួសារអ្នកពាក់ព័ន្ធ គឺអាស្រ័យទៅលើសតិសម្បជញ្ញៈ និងក្រមសីលធម៌វិជ្ជាជីវៈរបស់អ្នកសារព័ត៌មាន ទោះបីជាច្បាប់មិនបានហាមឃាត់ក៏ដោយ។

«អ្វីដែលសំខាន់បំផុតនោះគឺត្រូវតែមានការយល់ព្រមពីជនរងគ្រោះ។ ប្រសិនបើជនរងគ្រោះមិនយល់ព្រមឱ្យថត ឬសម្ភាសន៍ទេ អ្នកសារព័ត៌មានគឺគ្មានសិទ្ធិថតឡើយ ឬយ៉ាងហោចណាស់គួរប្រើវិធីបិទបាំងផ្ទៃមុខដើម្បីការពារសិទ្ធិឯកជនភាព»។ លោក គី សុខលីម បញ្ជាក់។

ជាថ្មីម្តងទៀត អ្នកកាសែតជើងចាស់ដែលធ្លាប់បម្រើការឲ្យស្ថាប័នសារព័ត៌មានអន្តរជាតិរូបនេះ ក៏អំពាវនាវឲ្យអ្នកសារព័ត៌មានជៀសវាងការធ្វើអាជីវកម្មលើព្រឹត្តិការណ៍ ដោយគ្រាន់តែដើម្បីទាញចំណាប់អារម្មណ៍ឱ្យគេមើលច្រើនដោយខ្វះក្រមសីលធម៌នោះដែរ។

លោកលើកឡើងដោយទាញឧទាហរណ៍ថា “ចុះបើរឿងនេះកើតឡើងចំពោះគ្រួសារយើងវិញ តើយើងយល់ឃើញយ៉ាងណា”?។

វិស័យសារព័ត៌មានគឺជាវិស័យដ៏សំខាន់មួយដែលជួយគាំទ្រដល់វិស័យដទៃទៀតទាំងអស់ ដូចជាប្រជាធិបតេយ្យ សិទ្ធិមនុស្ស និងបរិស្ថានជាដើម។ បើតាមលោក គី សុខលីម គ្មានប្រទេសណាមួយអាចរីកចម្រើនបាន ដោយគ្មានវិស័យសារព័ត៌មាននោះទេ៕

The post លោក គី សុខលីម៖ «អ្នកសារព័ត៌មានមិនគួរដើរតួជំនួសតុលាការ វិនិច្ឆ័យរឿងក្តីក្នុងហេតុការណ៍គ្រោះថ្នាក់ចរាចរណ៍» appeared first on Kampuchea Thmey Daily.

លោក ពុយ គា៖ ជារឿងចាំបាច់ណាស់សម្រាប់អ្នកសារព័ត៌មាន ក្នុងការយល់ដឹងពីការសង្គ្រោះបឋម

អុន ស្រីមាន — Thu, 05 Feb 2026 08:58:36 +0000

ប្រធានក្លិបអ្នកកាសែតកម្ពុជា លោក ពុយ គា បានលើកឡើងថា ជារឿងដែលសំខាន់ និងចាំបាច់ណាស់សម្រាប់អ្នកសារព័ត៌មាន ក្នុងការយល់ដឹងពីវិធីជួយសង្គ្រោះបឋម នៅពេលបំពេញភារកិច្ចការងារ ការរស់នៅប្រចាំថ្ងៃ និងអាចចែករំលែកបន្តពីវិធីសាស្រ្តសង្គ្រោះបឋមទៅកាន់អ្នកដទៃបានទៀត។

ការលើកឡើងរបស់លោក ពុយ គា ធ្វើឡើងនៅព្រឹកថ្ងៃទី ៥ ខែកុម្ភៈ ឆ្នាំ២០២៦ ក្នុងឱកាសក្លិបអ្នកកាសែតកម្ពុជា បានសហការជាមួយក្រសួងសុខាភិបាល និងផ្ទះយុវជនដើម្បីមិត្តភាពកម្ពុជា-ចិន រៀបចំវគ្គបណ្តុះបណ្តាលពិសេសស្តីពី «ការសង្គ្រោះបឋមដល់ជនរងគ្រោះ ឬអ្នកជំងឺភ្លាមៗ» ដល់អ្នកសារព័ត៌មាន។ វគ្គបណ្តុះបណ្តាលពីការសង្គ្រោះបឋមនេះ គឺជាលើកទី១ ដែលក្លិបអ្នកកាសែតបានរៀបចំឡើង ក្នុងគោលបំណងផ្តល់ចំណេះដឹងដល់អ្នកសារព័ត៌មាន ជាពិសេស អ្នកដែលទៅយកព័ត៌មាននៅតំបន់គ្រោះថ្នាក់ ឬការរស់នៅប្រចាំថ្ងៃ ដើម្បីបង្កើនចំណេះដឹងបន្ថែមក្នុងការជួយសង្គ្រោះបឋម មុនពេលបញ្ជូនជនរងគ្រោះ ឬអ្នកជំងឺទៅមន្ទីរពេទ្យ។

លោក ពុយ គា បានបញ្ជាក់ថា វគ្គបណ្តុះបណ្តាលនេះ ពិតជាសំខាន់ និងចាំបាច់ណាស់សម្រាប់អ្នកសារព័ត៌មាន ក្នុងការបំពេញភារកិច្ចប្រចាំថ្ងៃ និងជួយដល់ការរស់នៅប្រចាំថ្ងៃ លើសពីនេះ ក្រៅពីយល់ដឹងពីមូលដ្ឋានសង្គ្រោះបឋម ក៏អាចចែករំលែកបន្តទៅកាន់អ្នកដទៃបានដូចគ្នា។ ក្នុងវគ្គបណ្តុះបណ្តាលនេះ លោក ពុយ គា បញ្ជាក់ថា មិនត្រឹមតែសម្រាប់អ្នកសារព័ត៌មានទេ ពោល ក៏សម្រាប់សារធារណជនទូទាំងប្រទេសយល់ដឹងពីមូលដ្ឋានគ្រឹះ និងវិធីសង្គ្រោះបឋមមួយចំនួន តាមរយៈការចែករំលែក ផ្សព្វផ្សាយបន្តរបស់អ្នកសារព័ត៌មានផងដែរ។ ជាមួយគ្នានេះ នៅពេលខាងមុខ ក៏អាចនឹងបង្កើតវគ្គបណ្តុះបណ្តាលពីការសង្គ្រោះបឋមបែបនេះឱ្យច្រើនបន្ថែមទៀត ដើម្បីជាចំណេះដឹងដល់អ្នកសារព័ត៌មាន។ នេះ បើតាមប្រធានក្លិបអ្នកកាសែតកម្ពុជា។

ជាមួយគ្នានេះ លោកវេជ្ជបណ្ឌិត និន ចន្ថា នាយកផ្នែកសាមុយនៃមន្ទីរពេទ្យមិត្តភាពខ្មែរ-សូវៀត ក៏បានលើកឡើងដែរថា ការសង្គ្រោះបឋមនេះ ពិតជាសំខាន់ណាស់សម្រាប់អ្នកសារព័ត៌មាន ព្រោះថារាល់ថ្ងៃ នៅពេលដែលប្រជាពលរដ្ឋកម្ពុជា មានគ្រោះថ្នាក់ គឺអ្នកសារព័ត៌មាននេះហើយទទួលដំណឹងមុនគេ ។ លោកថា រូបលោកពិតជាមានក្តីរីករាយណាស់ក្នុងការធ្វើបទបង្ហាញ និងផ្តល់ចំណេះដឹងពីការសង្គ្រោះបឋមដល់អ្នកសារព័ត៌មាន ដោយលោកជ្រើសយកចំណុចណាដែលសំខាន់ និងងាយយល់ មកធ្វើបទបង្ហាញដើម្បីផ្តល់ភាពងាយស្រួលក្នុងការអនុវត្តជាក់ស្តែង។

សូមជម្រាបថា វគ្គបណ្តុះបណ្តាលខាងលើ គឺមានការបណ្តុះបណ្តាលដោយផ្ទាល់ ពីក្រុមគ្រូពេទ្យជំនាញពីក្រសួងសុខាភិបាល តាមរយៈការបង្រៀនពីមូលដ្ឋានគ្រឹះ ព្រមទាំងមានការពន្យល់ល្អិតល្អន់ និងការធ្វើសកម្មភាពជាក់ស្តែងពីប្រភេទនៃការសង្គ្រោះបឋមផងដែរ៕

The post លោក ពុយ គា៖ ជារឿងចាំបាច់ណាស់សម្រាប់អ្នកសារព័ត៌មាន ក្នុងការយល់ដឹងពីការសង្គ្រោះបឋម appeared first on Kampuchea Thmey Daily.

ក្លិបអ្នកកាសែតកម្ពុជា នឹងរៀបចំវគ្គបណ្តុះបណ្តាលស្តីពី ការសង្គ្រោះបឋម ដល់អ្នកសារព័ត៌មាន

អុន ស្រីមាន — Tue, 03 Feb 2026 02:38:31 +0000

ក្លិបអ្នកកាសែតកម្ពុជា បានសហការជាមួយក្រសួងសុខាភិបាល និងផ្ទះយុវជនដើម្បីមិត្តភាពកម្ពុជា-ចិន នឹងរៀបចំវគ្គបណ្តុះបណ្តាលពិសេសស្តីពី «ការសង្គ្រោះបឋមដល់ជនរងគ្រោះ ឬអ្នកជំងឺភ្លាមៗ» ដល់អ្នកសារព័ត៌មាន នៅថ្ងៃទី៥ ខែកុម្ភៈ ឆ្នាំ២០២៦ ខាងមុខ។

បើតាមសេចក្តីប្រកាសព៍ត៌មានរបស់ក្លិបអ្នកកាសែតកម្ពុជា វគ្គបណ្តុះបណ្តាលនេះ សម្រាប់អ្នកសារព័ត៌មាន ជាពិសេស អ្នកដែលទៅយកព័ត៌មាននៅតំបន់គ្រោះថ្នាក់ ដើម្បីបង្កើនចំណេះដឹងបន្ថែមក្នុងការជួយសង្គ្រោះបឋម មុនពេលបញ្ជូនជនរងគ្រោះ ឬអ្នកជំងឺទៅមន្ទីរពេទ្យ។

តាមប្រភពដដែល បញ្ជាក់ដែរថា ការបណ្តុះបណ្តាលឱ្យអ្នកសារព័ត៌មានយល់ដឹងពីវិធីសង្គ្រោះបឋម នេះ ពិតជាមានសារសំខាន់ ព្រោះអ្នកសារព័ត៌មាន អាចនឹងជួបប្រទះករណីសង្គ្រោះបឋមញឹកញាប់ រួមទាំងករណីគ្រោះថ្នាក់ចរាចរណ៍ផងដែរ ដែលអាចឱ្យជនរងគ្រោះមានគ្រោះថ្នាក់ដល់ជីវិត។

ជាមួយគ្នានេះ វគ្គបណ្តុះបណ្តាលនេះ នឹងមានការបណ្តុះបណ្តាលដោយផ្ទាល់ ព្រមទាំងការធ្វើបទបង្ហាញជាក់ស្តែងពីក្រុមគ្រូពេទ្យជំនាញ មកពីក្រសួងសុខាភិបាលតែម្តង៕

The post ក្លិបអ្នកកាសែតកម្ពុជា នឹងរៀបចំវគ្គបណ្តុះបណ្តាលស្តីពី ការសង្គ្រោះបឋម ដល់អ្នកសារព័ត៌មាន appeared first on Kampuchea Thmey Daily.

សមាគមអ្នកសារព័ត៌មានកម្ពុជា-វៀតណាម ផ្លាស់ប្ដូរបទពិសោធវិជ្ជាជីវៈ និងការអភិវឌ្ឍព័ត៌មានក្នុងសតវត្សឌីជីថល

អ៊ិន ពិសី — Thu, 23 Oct 2025 09:40:37 +0000

នៅថ្ងៃទី ២៣ ខែតុលា ឆ្នាំ ២០២៥ នេះ ក្លិបអ្នកកាសែតកម្ពុជា និងសមាគមអ្នកកាសែតវៀតណាម បានបើកកិច្ចប្រជុំ ដើម្បីពិភាក្សាអំពីការផ្លាស់ប្ដូរ នៃវិស័យព័ត៌មាន និងការពង្រឹងសហប្រតិបត្តិការវិជ្ជាជីវៈរវាងប្រទេសទាំងពីរ។

លោក ពុយ គា ប្រធានក្លិបអ្នកកាសែតកម្ពុជា លើកឡើងថា វិស័យព័ត៌មាននៅកម្ពុជាកំពុងប្រឈមនឹងបញ្ហាផ្លាស់ប្ដូរយ៉ាងលឿន ដោយសារការរីកចម្រើន នៃបច្ចេកវិទ្យាឌីជីថល បញ្ញាសិប្បនិមិត្ត (AI) និងឥទ្ធិពល នៃអ្នកផលិតមាតិកាព័ត៌មានតាមបណ្ដាញសង្គម (Influencers)។ អ្នកសារព័ត៌មានអាជីព “ត្រូវការបណ្ដុះបណ្ដាលបន្ថែម ដើម្បីអាចប្រកួតប្រជែង និងរក្សាគុណភាពព័ត៌មានក្នុងស្ថានភាពហិរញ្ញវត្ថុដែលកាន់តែស្ដួច”។

ដោយឡែក ក្នុងស្ថានការណ៍ជម្លោះព្រំដែនកម្ពុជា–ថៃ លោក ពុយ គា បានបញ្ជាក់ថា “អ្នកសារព័ត៌មានកម្ពុជា បានប្រកាន់យកការផ្សាយព័ត៌មានដោយប្រយ័ត្នប្រយែង និងគោរពវិជ្ជាជីវៈ ដោយព្យាយាមមិនបំប៉ោងស្ថានភាពឲ្យកាន់តែតានតឹងឡើយ”។

ពីភាគីវៀតណាម លោក ង្វៀន ឌឹកឡឺយ អនុប្រធានអចិន្ត្រៃយ៍ នៃសមាគមអ្នកកាសែតវៀតណាម ដែលដឹកនាំប្រតិភូចំនួនប្រាំរូប មកទស្សនកិច្ចកម្ពុជារយៈពេល ៥ ថ្ងៃ ចាប់ពីថ្ងៃទី ២០ ដល់ថ្ងៃទី ២៤ ខែតុលា ឆ្នាំ ២០២៥ បានទៅទស្សនាប្រាសាទអង្គរវត្ត និងតំបន់ទេសចរណ៍ដទៃទៀតនៅក្នុងប្រទេសកម្ពុជា។

កិច្ចប្រជុំនៅភ្នំពេញរវាងក្លិបអ្នកកាសែតកម្ពុជា និងសមាគមអ្នកកាសែតវៀតណាម ត្រូវបានធ្វើឡើងក្នុងគោលបំណងលើកកម្ពស់ការផ្លាស់ប្ដូរបទពិសោធវិជ្ជាជីវៈ ស្ដីពីការផ្សាយព័ត៌មានដោយសុចរិតភាព និងការបង្កើនភាពជាដៃគូសហការរវាងសារព័ត៌មានកម្ពុជា និងវៀតណាម៕

The post សមាគមអ្នកសារព័ត៌មានកម្ពុជា-វៀតណាម ផ្លាស់ប្ដូរបទពិសោធវិជ្ជាជីវៈ និងការអភិវឌ្ឍព័ត៌មានក្នុងសតវត្សឌីជីថល appeared first on Kampuchea Thmey Daily.

ឥណ្ឌាពង្រីកកិច្ចសហការលើវិស័យព័ត៌មានជាមួយកម្ពុជា ដើម្បីផ្សព្វផ្សាយទេសចរណ៍ និងវប្បធម៌

Thoeun Vansong — Fri, 05 Sep 2025 07:51:44 +0000

ឥណ្ឌានឹងពង្រីកកិច្ចសហការជាមួយក្លិបអ្នកកាសែតកម្ពុជា លើវិស័យព័ត៌មាន ដើម្បីឈានទៅផ្សព្វផ្សាយលើផ្នែកផ្សេងៗទៀតជាច្រើនជាមួយកម្ពុជា ជាពិសេសវិស័យទេសចរណ៍ វប្បធម៌ និងការវិនិយោគ។ នេះជាការលើកឡើងរបស់ឯកអគ្គរដ្ឋទូតឥណ្ឌាប្រចាំនៅកម្ពុជា លោក វណ្ណឡាលវ៉ូណា បយធ្លង់ (Vanlalvawana Bawitlung)។

ការលើកឡើងរបស់លោក Bawitlung បានធ្វើឡើងកាលពីថ្ងៃទី៤ ខែកញ្ញា ឆ្នាំ២០២៥ ក្នុងជំនួបសម្តែងការគួរសម និងពិភាក្សាការងារជាមួយលោក ពុយ គា ប្រធានក្លិបអ្នកកាសែតកម្ពុជា ក្នុងឱកាសដែលលោក ត្រូវបានតែងតាំងមកបំពេញបេសកកម្មការទូតនៅកម្ពុជា។

លោក ពុយ គា បានជម្រាបលោកឯកអគ្គរដ្ឋទូតថា ក្លិបអ្នកកាសែតកម្ពុជា មានអាយុកាលជាង២៥ឆ្នាំ ហើយបច្ចុប្បន្នក្លិបអ្នកកាសែតកម្ពុជាមានសមាជិកសកម្មជាង៦០០នាក់ដែលកំពុងបំពេញវិជ្ជាជីវៈសារព័ត៌មាននៅស្ថាប័នចំនួនជិត២០០នៅទូទាំងប្រទេស។

លោក ពុយ គា បានថ្លែងថា ក្លិបអ្នកកាសែតកម្ពុជាបាននិងកំពុងដើរតួនាទីក្នុងការបណ្តុះបណ្តាលជំនាញវិជ្ជាជីវៈនិងក្រមសីលធម៌ដល់អ្នកសារព័ត៌មាន ព្រមទាំងបានរៀបចំនូវវគ្គបណ្តុះបណ្តាលលើជំនាញចាំបាច់ផ្សេងៗទៀត ជាពិសេសលើវិស័យបច្ចេកវិទ្យាព័ត៌មានវិទ្យា។ ជាមួយគ្នានេះ ក្លិបអ្នកកាសែតកម្ពុជា ក៏តែងរៀបចំវេទិកាសារព័ត៌មានជាមួយស្ថាប័នរដ្ឋ វិស័យឯកជន អង្គការសង្គមស៊ីវិល និងបណ្តាស្ថានទូតនានា ព្រមទាំងរៀបចំនូវដំណើរទស្សនកិច្ចអ្នកសារព័ត៌មានទៅកាន់តំបន់សក្តានុពលនានានៅទូទាំងប្រទេសកម្ពុជា។

ដើម្បីពង្រីកសកម្មភាពបន្ថែមទៀត លោក ពុយ គា បានស្នើដល់ស្ថានទូតឥណ្ឌា ឱ្យពិនិត្យលទ្ធភាពក្នុងការជួយបណ្តុះបណ្តាលជំនាញចាំបាច់មួយចំនួនដល់អ្នកសារព័ត៌មានកម្ពុជា ជាពិសេសលើជំនាញបច្ចេកវិទ្យាព័ត៌មាន។

ថ្លែងក្នុងជំនួបនោះ លោក វណ្ណឡាលវ៉ូណា បយធ្លង់ បានជម្រាបជូនលោក ពុយ គា ថា រយៈពេល ៧ខែដែលលោកបានមកបំពេញការងារនៅកម្ពុជា លោកបានឃើញពីការអភិវឌ្ឍយ៉ាងឆាប់រហ័សរបស់កម្ពុជាលើគ្រប់វិស័យ បើធៀបទៅនឹងឆ្នាំ២០០៩ ដែលលោកបានមកកម្ពុជា ជាលើកដំបូង។

លោក ថា ឥណ្ឌា និងកម្ពុជា មានវប្បធម៌ និងប្រពៃណីស្រដៀងគ្នា ពិសេសការប្រើប្រាស់ភាសាសំស្ក្រឹត ហើយពលរដ្ឋឥណ្ឌាដែលបានមកកម្ពុជា សុទ្ធតែបង្ហាញការពេញចិត្តចំពោះការរស់នៅទីនេះ ជាពិសេសនៅរាជធានីភ្នំពេញ និងខេត្តសៀមរាប។ ប៉ុន្តែលោកឯកអគ្គរដ្ឋទូត លើកឡើងថា ចំនួនភ្ញៀវទេសចរឥណ្ឌាមកកម្ពុជានៅមានកម្រិត បើធៀបទៅនឹងប្រទេសនានាក្នុងតំបន់។

ក្នុងន័យនេះ លោកសង្ឃឹមថា ស្ថានទូតឥណ្ឌា និងក្លិបអ្នកកាសែតកម្ពុជា អាចសហការគ្នាលើការងារផ្សព្វផ្សាយពីវិស័យទេសចរណ៍ និងវប្បធម៌នៃប្រទេសទាំងពីរ ដើម្បីទាក់ទាញភ្ញៀវទេសចរពីឥណ្ឌាឱ្យបានកាន់តែច្រើនបន្ថែមទៀត៕

The post ឥណ្ឌាពង្រីកកិច្ចសហការលើវិស័យព័ត៌មានជាមួយកម្ពុជា ដើម្បីផ្សព្វផ្សាយទេសចរណ៍ និងវប្បធម៌ appeared first on Kampuchea Thmey Daily.

ក្លិបអ្នកកាសែតកម្ពុជាបារម្ភចំពោះព័ត៌មានបំភ្លៃដោយថៃ ដែលអាចរុញជម្លោះកាន់តែឡើងកម្ដៅ

Thoeun Vansong — Fri, 25 Jul 2025 07:13:42 +0000

ក្លិបអ្នកកាសែតកម្ពុជាបង្ហាញក្ដីព្រួយបារម្ភខ្លាំងចំពោះការផ្សព្វផ្សាយសារព័ត៌មានបំភ្លៃដោយភាគីថៃ ក្នុងកាលៈទេសៈនៃជម្លោះប្រដាប់អាវុធរវាងប្រទេសកម្ពុជានិងថៃ។ ក្លិបអ្នកកាសែតកម្ពុជាបានកត់សម្គាល់អំពីការផ្សព្វផ្សាយព័ត៌មានមិនពិតរបស់ The Nation Thailand ដែលអាចបង្កឱ្យមានការយល់ច្រឡំ និងរុញស្ថានភាពជម្លោះឱ្យកាន់តែតានតឹង។

ការផ្សព្វព័ត៌មានមួយចំនួនដែលខុសពីការពិតទាក់ទងទៅនឹងស្ថានការណ៍នៃជម្លោះតាមបណ្តោយព្រំដែនរវាងកម្ពុជា និង ថៃពេលនេះ ក្លិបអ្នកកាសែតកម្ពុជា ថា មិនត្រឹមនាំឱ្យមានការយល់ច្រឡំតែក្នុងប្រទេសទាំងពីរនោះទេ ប៉ុន្តែរហូតដល់អន្តរ ជាតិទៀតផង។ សេចក្ដីថ្លែងការណ៍របស់ក្លិបអ្នកកាសែតកម្ពុជា បានសង្កត់ធ្ងន់ដូច្នេះថា «ការផ្សាយព័ត៌មានខុសពីការពិត នឹងបង្កគ្រោះថ្នាក់ដល់ទំនាក់ទំនងទ្វេភាគី បង្កការយល់ច្រឡំជាសាធារណៈ និងប៉ះពាល់ដល់កិច្ចខិតខំប្រឹងប្រែងក្នុងការរក្សាស្ថិរភាព និងសន្តិភាពនៅតាមបណ្តោយ ព្រំដែននៃប្រទេសទាំងពីរ»។

សេចក្ដីថ្លែងការណ៍ បន្ថែមថា សារព័ត៌មានដែលមានទំនួលខុសត្រូវ ត្រូវមានមូលដ្ឋានលើការពិត ប្រកាន់ខ្ជាប់នូវវិជ្ជាជីវៈ និងបង្ហាញការប្រុងប្រយ័ត្ន ដោយចៀសវាងការផ្សាយព័ត៌មានដោយគ្មានការផ្ទៀងផ្ទាត់ ឬដោយការលម្អៀង។

ក្តីបារម្ភនេះក៏បានលេចចេញពីអត្ថបទមួយដែលផ្សាយដោយសារព័ត៌មានថៃឈ្មោះ The Nation Thailand កាលពីថ្ងៃទី២៤ ខែកក្កដា ដែលបានសរសេរប្រតិដ្ឋរឿងឡើងថា អតីតនាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានឡើងយន្តហោះឯកជនពីភ្នំពេញទៅប្រទេសចិន បន្ទាប់ពីកងទ័ពថៃបានចាប់ផ្តើមវាយប្រហារលើប្រទេសកម្ពុជា។ ប៉ុន្តែ ភ្លាមៗនោះ សម្តេច ហ៊ុន សែន ក៏បានចេញមកបញ្ជាក់ពីវត្តមានរបស់សម្ដេចដែលកំពុងស្ថិតនៅក្នុងប្រទេសកម្ពុជា ហើយកំពុងរួមចំណែកបញ្ជាទ័ព តាមប្រព័ន្ធវីដេអូជាមួយនាយករដ្ឋមន្ត្រី ដើម្បីវាយទប់ទល់នឹងការឈ្លានពានដោយទ័ពថៃ។

ជាថ្មីម្តងទៀត នៅព្រឹកថ្ងៃទី២៥ ខែកក្កដា ឆ្នាំ២០២៥ សារព័ត៌មាន The Nation Thailand ដដែល បានផ្សាយថា “កងកម្លាំងថៃបានដណ្តើមយកប្រាសាទព្រះវិហារ និងវត្តកែវសិក្ខាគីរីស្វារៈ បានដោយជោគជ័យ”។ ក៏ប៉ុន្តែ អ្នកនាំពាក្យក្រសួងការពារជាតិកម្ពុជា បានប្រកាសច្រានចោល និងចាត់ទុកថា ជាព័ត៌មានមិនពិត។

ក្លិបអ្នកកាសែត ថា អត្ថបទទាំងនេះបានបង្ហាញឱ្យឃើញពីការខ្វះវិជ្ជាជីវៈដែលនាំទៅដល់ការបាត់ជំនឿលើសារព័ត៌មាននៅក្នុងកាលៈទេសៈដ៏សំខាន់នេះ។ ក្លិបអ្នកកាសែតកម្ពុជា បានអំពាវនាវឱ្យគ្រប់សារព័ត៌មានទាំងកម្ពុជា និងថៃ ប្រកាន់ខ្ជាប់នូវវិជ្ជាជីវៈ ត្រួតពិនិត្យ ប្រភពព័ត៌មាន និងផ្ទៀងផ្ទាត់ដោយការប្រុងប្រយ័ត្ន និងរួមកាត់បន្ថយភាពតានតឹងនៃជម្លោះ តាមរយៈអត្ថបទព័ត៌មាន៕

The post ក្លិបអ្នកកាសែតកម្ពុជាបារម្ភចំពោះព័ត៌មានបំភ្លៃដោយថៃ ដែលអាចរុញជម្លោះកាន់តែឡើងកម្ដៅ appeared first on Kampuchea Thmey Daily.