ព័ត៌មានជាតិ

អ្នកឧកញ៉ា លឹម ហេង៖ ការស្នើដាក់ឯកសារតាមអនឡាញ សូមកុំឲ្យ “ច្រកចេញចូលតែមួយ” ក្លាយជា “ច្រកជាប់គាំងតែមួយ”

បានផុស

២ ខែ មុន

នៅ

ថ្ងៃសៅរ៍ ២ ឧសភា ២០២៦

ដោយ

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជាបានថ្លែងកត់សម្គាល់ពីភាពស្មុគស្មាញនៃប្រព័ន្ធការិយាធិបតេយ្យ ដោយលោកលើកឡើងពីភាពបរាជ័យនៃការស្នើសុំតាមប្រព័ន្ធអនឡាញ និងការទាមទារសេវាក្រៅផ្លូវការ។

នៅក្នុងវេទិកាសារព័ត៌មានលើប្រធានបទ «AI ក្រមសីលធម៌ និងវិជ្ជាជីវៈ៖ តើយើងគួរដើរទៅមុខដោយរបៀបណា?» ដែលរៀបចំឡើងកាលពីព្រឹកថ្ងៃទី ១ ខែឧសភា ឆ្នាំ២០២៦ នៅមជ្ឈមណ្ឌលអភិវឌ្ឍធុរកិច្ច (BDC) លោកបានរៀបរាប់លម្អិតអំពីបញ្ហាប្រឈមរវាងវិស័យឯកជន និងប្រព័ន្ធការិយាធិបតេយ្យនៅកម្ពុជា ដោយផ្តោតភាពបរាជ័យនៃការស្នើសុំតាមប្រព័ន្ធអនឡាញ និងការទាមទារសេវាក្រៅផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានគូសបញ្ជាក់ថា វិស័យឯកជនតែងតែប្រឈមមុខនឹងបញ្ហានៅពេលមានរដ្ឋមន្ត្រីថ្មីឡើងកាន់តំណែង ដែលជារឿយៗតែងតែបង្កើតបញ្ហា និងភាពស្មុគស្មាញថ្មីៗដល់ការធ្វើអាជីវកម្ម។

ទោះបីជាមានការខិតខំរុញច្រានការស្នើសុំអាជ្ញាបណ្ណ ឬឯកសារនាំចេញនានាទៅក្នុងប្រព័ន្ធអនឡាញក៏ដោយ ក៏ឯកសារទាំងនោះនៅតែមិនត្រូវបានអនុម័តឡើយ ប្រសិនបើអ្នកស្នើសុំមិនទៅជួបមន្ត្រីផ្ទាល់ឬមិនមានការផ្តល់ប្រាក់ក្រោមតុ។

អ្នកឧកញ៉ា លឹម ហេង បានប្រដូច ”ច្រកចេញចូលតែមួយ” បានក្លាយជា “ច្រកជាប់គាំងតែមួយ” ដោយលោកបានលើកឡើងយ៉ាងចំៗថា សេវាច្រកចេញចូលតែមួយ ត្រូវបានគេមើលឃើញថាជា “ច្រកជាប់គាំងតែមួយ” ទៅវិញ ដោយសារតែនៅពេលដែលក្រុមហ៊ុនដាក់ពាក្យស្នើសុំអនឡាញរួចរាល់ ឯកសារតែងតែជាប់គាំងរហូតទាល់តែមានការទៅជួបផ្ទាល់ជាមួយមន្ត្រីទើបអាចចេញបាន។

ជាមួយគ្នានេះ លោកក៏លើកបញ្ហាតម្លៃសេវាសាធារណៈមិនរលូន ដែលវិស័យឯកជនទាមទារឱ្យមានការកំណត់តម្លៃសេវាសាធារណៈឱ្យបានច្បាស់លាស់ ដើម្បីកុំឱ្យខាតពេលរត់ការពីការិយាល័យមួយទៅការិយាល័យមួយ។

ទោះបីជាមានការបង់សេវាត្រឹមត្រូវនៅតាមច្រកចេញចូលតែមួយក៏ដោយ អ្នកជំនួញរូបនេះអះអាងថា ក៏ឯកសារមួយចំនួននៅតែបន្តជាប់គាំងនិងមិនដើរស្រួលដដែល។

អ្នកឧកញ៉ាស្នើឲ្យមានតម្លាភាព និងភាពស្មោះត្រង់ រវាងមន្ត្រីរាជការដែលជាអ្នកអនុវត្តច្បាប់ និងវិស័យឯកជន។ លោកចង់ឃើញការអនុវត្តបច្ចេកវិទ្យាដំណើរការបានរលូនពិតប្រាកដ ដោយមិនមានការរំខានឬបង្កការលំបាក។

អ្នកឧកញ៉ាបញ្ជាក់ថា លោកនឹងលើកយកបញ្ហាទាំងអស់នេះទៅជជែកបន្ថែមជាមួយអន្តរក្រសួងពាក់ព័ន្ធនានា ដើម្បីជំរុញឱ្យដំណើរការរដ្ឋបាលប្រព្រឹត្តទៅដោយរលូន៕