ក្លែងបន្លំ Archives - Kampuchea Thmey Daily

គ្រូទាយថៃ ម្នាក់ លួចទូរស័ព្ទភ្ញៀវ ដោយសារចង់ឲ្យការទស្សទាយរបស់ខ្លួនកាន់តែឆុតខ្លាំង

សាង ស្រីល័ក្ខ — Fri, 02 Jan 2026 07:18:28 +0000

គ្រូទាយជនជាតិថៃម្នាក់ត្រូវប៉ូលិសចាប់ខ្លួននៅទីក្រុងប៉ាតាយ៉ាកាលពីថ្ងៃព្រហស្បតិ៍ទី ១ ខែមករា ឆ្នាំ ២០២៦ បន្ទាប់ពីធ្វើសកម្មភាពលួចទូរស័ព្ទដៃរបស់ស្ត្រីវ័យជំទង់ជាអតិថិជន និងធ្វើការទស្សន៍ទាយថា រូបនាងនឹងជួបប្រទះសំណាងអាក្រក់ឆាប់ៗនេះ ដោយត្រូវបាត់បង់របស់មានតម្លៃនៅថ្ងៃចូលឆ្នាំថ្មី។

រូបភាព៖khaosodenglish

យោងតាមសារព័ត៌មាន Khaosod បានរាយការណ៍ថា ហេតុការណ៍នេះកើតឡើងនៅម៉ោងប្រហែល ៦:០៦ ព្រឹក ថ្ងៃដដែល នៅនៅប៉ាតាយ៉ាខាងត្បូង នៃខេត្តឈុនបុរី។ ប៉ូលិសមកពីស្ថានីយ៍ក្រុងប៉ាតាយ៉ាបានឆ្លើយតបទៅនឹងរបាយការណ៍នៃការលួចដែលពាក់ព័ន្ធនឹង iPhone 13 Pro មានតម្លៃប្រហែល ២០,០០០ បាត (៥៨០ដុល្លារ)។

នៅកន្លែងកើតហេតុ ក្រុមអ្នកជួយសង្គ្រោះ និងអ្នកភូមិបានឃាត់ខ្លួនជនសង្ស័យទុក ដោយកំណត់អត្តសញ្ញាណឈ្មោះថា Udomsap Mueangkaew អាយុ ៣៨ ឆ្នាំ មុខរបរជាគ្រូទាយ។ ចំណែក ជនរងគ្រោះឈ្មោះ Pim អាយុ ១៩ ឆ្នាំ ខណៈដែលទូរស័ព្ទនេះបានលាក់ទុកនៅក្នុងកាបូបស្ពាយពណ៌ត្នោតដែលជនសង្ស័យតែងតែប្រើ។

យោងតាមជនរងគ្រោះបានរៀបរាប់ថា បុរសជាជនសង្ស័យបានស្លៀកពាក់ និងនិយាយដូចមនុស្សចាស់ ហើយកំពុងអង្គុយលើកន្ទេលមួយនៅលើចិញ្ចើមផ្លូវទល់មុខវត្តមួយកន្លែង ដោយស្រែកហៅអ្នកដើរកាត់ឲ្យប្រើប្រាស់សេវាកម្មទស្សន៍ទាយរបស់គាត់។ ដោយមានអារម្មណ៍អាណិតអាសូរនិងចង់ធ្វើល្អនៅថ្ងៃចូលឆ្នាំថ្មី នាងបានយល់ព្រមភ្លាមៗ។

ពេលកំពុងអានសំណាងរបស់នាងដោយប្រើសន្លឹកបៀ បុរសនោះប្រាប់នាងថា នាងនឹងជួបប្រទះនឹងសំណាងអាក្រក់ឆាប់ៗនេះ ហើយបាត់បង់ទ្រព្យសម្បត្តិដ៏មានតម្លៃមួយ ហើយក៏ណែនាំឲ្យ Pim ចំណាយប្រាក់បន្ថែមដើម្បីការពារវា។ ប៉ុន្តែនាងបានបដិសេធ ដោយជឿថាវាមិនចាំបាច់ឡើយ។

បន្ទាប់ពីការទស្សន៍ទាយបញ្ចប់ នាងហៀបនឹងត្រឡប់ទៅកន្លែងស្នាក់នៅវិញ Pim បានដឹងថាទូរស័ព្ទដៃដែលដាក់នៅក្បែរខ្លួនបានបាត់។ គ្រូទស្សន៍ទាយរូបនេះបានបន្តអួតអំពីភាពត្រឹមត្រូវនៃការទស្សន៍ទាយរបស់គាត់ ហើយថែមទាំងបានពិពណ៌នាអំពីរូបរាងរបស់ចោរដែលត្រូវបានគេចោទប្រកាន់ទៀតផង។

ដោយមានការសង្ស័យ Pim បានស្វែងរកជំនួយពីអ្នកជួយសង្គ្រោះ និងសមាជិកសាធារណជន ដើម្បីពិនិត្យមើលទ្រព្យសម្បត្តិរបស់បុរសនោះ ដែលនាំឲ្យមានការរកឃើញទូរស័ព្ទរបស់នាងនៅក្នុងកាបូបរបស់គាត់ រហូតឈានដល់ការចាប់ខ្លួនតែម្ដង។

ដោយប្រឈមមុខនឹងភស្តុតាង Udomsap បានសារភាពថា រូបគេពិតជាបានលួចទូរស័ព្ទមែន ដោយប្រាប់មន្ត្រីថាវាជាបទល្មើសលើកដំបូង ហើយថា គាត់គ្រាន់តែត្រូវការប្រាក់សម្រាប់ថ្ងៃចូលឆ្នាំថ្មីប៉ុណ្ណោះ។ គាត់បានសុំទោស និងសុំឲ្យជនរងគ្រោះកុំចោទប្រកាន់ ប៉ុន្តែនាងបានទទូចឲ្យមានសកម្មភាពផ្លូវច្បាប់ ដើម្បីចៀសវាងជនសង្ស័យនឹងកំណត់គោលដៅទៅលើអ្នកដទៃ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

បំណងប្រាថ្នាដ៏ធំរបស់ពលរដ្ធ អ៊ុយក្រែន គឺចង់បានសន្តិភាព និងមានអគ្គិសនីឡើងវិញ

The post គ្រូទាយថៃ ម្នាក់ លួចទូរស័ព្ទភ្ញៀវ ដោយសារចង់ឲ្យការទស្សទាយរបស់ខ្លួនកាន់តែឆុតខ្លាំង appeared first on Kampuchea Thmey Daily.

បន្ទាប់ក្លែងធ្វើស្លាប់អស់៥ឆ្នាំ ដើម្បីបានសំណងពីធានារ៉ាប់រង ស្រ្តីវៀតណាមត្រូវចាប់ខ្លួន

Minea Neu — Tue, 23 Dec 2025 04:47:07 +0000

ក្រោយក្លែងបន្លំខ្លួនធ្វើជាស្លាប់ និងចុះបញ្ជីមរណភាពអស់៥ឆ្នាំដើម្បីបានសំណងពីធានារ៉ាប់រង ប្រមាណជាង៤៥០០០ដុល្លារ ស្ត្រីជនជាតិវៀតណាមត្រូវចាប់ខ្លួនពេលសុំលុបបញ្ជីមរណភាព។

បន្ទាប់ពីបានព្រមព្រៀងគ្នា «សម្តែង» ជាមួយម្តាយបង្កើតរួច នៅព្រឹកថ្ងៃទី៧ ខែមិថុនា ឆ្នាំ២០២០ អ្នកស្រី ង្វៀង ធីធូ [Nguyen Thi Thu] បានលេបថ្នាំងងុយដេក រួចចូលទៅបន្ទប់ទឹក បន្ទាប់មកធ្វើជាដួលនៅលើឥដ្ឋ បណ្តាលឱ្យរបួសមុខ ច្រមុះ និងមានហូរឈាម ហើយបានបន្លំធ្វើជាស្លាប់តែម្តង។ នេះបើយោងតាមកាសែត VNN របស់វៀតណាម។

អ្នកស្រី ង្វៀង ធីធូ អាយុ៤១ឆ្នាំ។ VNA/VNS

ប៉ូលិសនៅសង្កាត់ Thanh Hoa បាននិយាយថា ពួកគេបានរកឃើញករណីដែលស្ត្រីម្នាក់ត្រូវបានប្រកាសថាស្លាប់កាលពីប្រាំឆ្នាំមុនត្រឡប់មកវិញ ហើយបានដាក់ពាក្យសុំចុះបញ្ជីមរណភាពរបស់នាង តែត្រូវបានទុកជាមោឃៈ បន្ទាប់ពីបានក្លែងបន្លំប្រាក់សំណងជាង ១.២ ពាន់លានដុង (ប្រហែល ៤៥,៦០០ដុល្លារអាមេរិក) នៅក្នុងការបង់ធានារ៉ាប់រង។

កាលពីប្រាំឆ្នាំមុន មនុស្សម្នាក់ដែលមានឈ្មោះដូចគ្នានឹងឈ្មោះ ង្វៀន ធីធូ ត្រូវបានក្រុមគ្រួសាររបស់នាងប្រកាសថាបានស្លាប់ ដោយបង្កើតឱ្យមានការសង្ស័យ ដែលទាមទារឱ្យមានការបំភ្លឺឡើងវិញ។

បន្ទាប់ពីទទួលបានរបាយការណ៍ពីប៉ូលិសសង្កាត់ Quang Trung អាជ្ញាធរបានធ្វើការផ្ទៀងផ្ទាត់ដោយប្រើវិធានការជំនាញ បានកំណត់ថា នាង ង្វៀន ធីធូ បានស្នើសុំការលុបចោលការចុះបញ្ជីមរណភាព គឺពិតជា ឈ្មោះ ង្វៀន ធីធូ ដូចគ្នា ដែលការស្លាប់ត្រូវបានចុះបញ្ជីកាលពីប្រាំឆ្នាំមុន។

ដោយឡែកប៉ូលិសរកឃើញភាពមិនប្រក្រតីជាច្រើន និងសញ្ញានៃសកម្មភាពបទឧក្រិដ្ឋ ដែលប៉ូលីសសង្កាត់ Quang Trung បានរាយការណ៍ករណីនេះនិងបានបញ្ជូនទៅភ្នាក់ងារប៉ូលិសផ្សេងទៀតដើម្បីស៊ើបអង្កេត។

ក្នុងរយៈពេលដ៏ខ្លី ប៉ូលិសបានប្រមូលឯកសារ និងភស្តុតាងគ្រប់គ្រាន់ ដោយបង្ខំ ង្វៀន ធីធូ សារភាពចំពោះបទល្មើសរបស់នាង បន្ទាប់មកនាងសារភាពថាខ្លួនបានក្លែងបន្លំធ្វើជាស្លាប់ ដើម្បីបោកប្រាស់ក្រុមហ៊ុនធានារ៉ាប់រង។

តាមសំណុំរឿងបានឱ្យដឹងថា នៅឆ្នាំ២០១៧ អ្នកស្រី ធូ បានលែងលះប្តី ហើយត្រឡប់មករស់នៅជាមួយម្តាយបង្កើតវិញ។ ក្នុងអំឡុងពេលនោះនាងបានធ្វើដំណើរទៅធ្វើការនៅខេត្ត ហើយបានទិញធានារ៉ាប់រងចំនួន៤ ពីក្រុមហ៊ុនធានារ៉ាប់រងអាយុជីវិតចំនួនពីរផ្សេងគ្នា។

នៅឆ្នាំ ២០២០ បន្ទាប់ពីបានរកឃើញថា នាងមានជំងឺមហារីក និងឈ្លោះប្រកែកជាមួយម្តាយជាញឹកញាប់ នាងក៏បានអាក់អន់ចិត្ត ហើយបែកគំនិត ក្លែងបន្លំការស្លាប់របស់នាងដើម្បី៖ «ផ្លាស់ប្តូរអត្តសញ្ញាណ» និងប្រមូលប្រាក់សំណងពីក្រុមហ៊ុនធានារ៉ាប់រង។ ដូច្នេះហើយនាងបានពិភាក្សាផែនការនេះជាមួយម្តាយ ដើម្បីបង្កើតសេណារីយ៉ូ «ការស្លាប់ក្លែងក្លាយ» ដ៏មានប្រសិទ្ធភាព។

ដោយធ្វើការជាមួយអ្នកស៊ើបអង្កេត អ្នកស្រី Thap ជាម្តាយបាននិយាយថា៖ «នៅពេលខ្ញុំឮនាងនិយាយអំពីរឿងនេះដំបូងៗ ខ្ញុំបានបដិសេធខ្លាំងដែរ ប៉ុន្តែនាងបានគំរាមថាបើខ្ញុំមិនព្រមធ្វើទេ នាងនឹងខាំខ្សែភ្លើង សម្លាប់ខ្លួនឯង។ ពេលនោះខ្ញុំនឹងត្រូវបាត់បង់កូនរបស់ខ្ញុំជាមិនខាន ប៉ុន្តែនៅតែមិនទទួលបានប្រាក់ធានារ៉ាប់រងណាមួយឡើយ»។

ក្នុងចម្លើយសារភាពជាមួយសមត្ថកិច្ច នាង ធូ បានសារភាពថា៖ «ដោយសារជំងឺ ខ្ញុំគិតចង់ធ្វើអត្តឃាត ប៉ុន្តែខ្ញុំក៏គិតដែរថាមិនទាន់បានសំណងអ្វីទេ។ បើខ្ញុំសម្លាប់ខ្លួន ធានារ៉ាប់រងក៏មិនចេញឱ្យដែរ។ ដូច្នេះខ្ញុំក្លែងបន្លំធ្វើជាស្លាប់ ដើម្បីយកលុយធានារ៉ាប់រងប៉ុណ្ណោះ។ បន្ទាប់ពីក្លែងបន្លំនេះមក ខ្ញុំមានបំណងទៅឆ្ងាយ និងកាត់ផ្តាច់ទំនាក់ទំនងជាមួយគ្រួសារខ្ញុំម្តងទៀត»។

ភ្នាក់ងារប៉ូលីសស៊ើបអង្កេតនៃប៉ូលីសខេត្ត Thanh Hóa បានចេញសេចក្តីសម្រេចឃុំខ្លួនបណ្តោះអាសន្នទាំងម្តាយនិងកូនរបស់ពួកគេ ដោយចោទប្រកាន់ពីបទក្លែងបន្លំធានារ៉ាប់រង។

ជាមួយគ្នានេះដែរ ប៉ូលិសកំពុងបន្តប្រមូលភស្តុតាងប្រឆាំងនឹងបុគ្គលដែលពាក់ព័ន្ធផ្សេងទៀត ដើម្បីពង្រីកការស៊ើបអង្កេត៕

ប្រែសម្រួល៖ ណឺ មិនា

The post បន្ទាប់ក្លែងធ្វើស្លាប់អស់៥ឆ្នាំ ដើម្បីបានសំណងពីធានារ៉ាប់រង ស្រ្តីវៀតណាមត្រូវចាប់ខ្លួន appeared first on Kampuchea Thmey Daily.

មូលហេតុដែល អាស៊ីអាគ្នេយ៍ ជាចំណុចក្តៅក្នុងការក្លែងបន្លំ ពិបាកលុបបំបាត់

សាង ស្រីល័ក្ខ — Wed, 19 Nov 2025 08:15:32 +0000

យោងតាមអង្គការសហប្រជាជាតិ មនុស្សរាប់រយរាប់ពាន់នាក់នៅតែជាប់នៅក្នុងមជ្ឈមណ្ឌលក្លែងបន្លំនៅអាស៊ីអាគ្នេយ៍។ ជនរងគ្រោះជាច្រើនត្រូវបានទាក់ទាញដោយការបង្ហោះជ្រើសរើសបុគ្គលិកក្លែងក្លាយ នៅលើវេទិកាដូចជា Facebook ជាដើម។ ទាំងនោះបានក្លាយជាបញញ្ហាចាកស្រេះ ពិបាកនឹងលុបបំបាត់បំផុត។

រូបភាពReuters

បើតាមការលើកឡើងរបស់អ្នកជំនាញ លោក Jacob Sims អ្នកស្រាវជ្រាវនៅមជ្ឈមណ្ឌលអាស៊ី សាកលវិទ្យាល័យហាវ៉ាដ និង ជាអ្នកជំនាញខាងឧក្រិដ្ឋកម្មឆ្លងដែន និងសិទ្ធិមនុស្សនៅអាស៊ីអាគ្នេយ៍បានមានប្រសាសន៍ថា អ្នកទាំងនោះត្រូវបានគេនាំចូលទៅក្នុងភាពស្មុគស្មាញដូចជាតង់ ដែលមានរបងលួសបន្លា អាហារដ្ឋាន និងបង្អួចដែក។ ពួកគេត្រូវបានគេនាំចូលទៅក្នុងនោះ ហើយបង្ខំឲ្យបោកប្រាស់។ ប្រសិនបើពួកគេមិនធ្វើទេ ពួកគេនឹងត្រូវវាយដំ ធ្វើទារុណកម្ម រំលោភបំពាន និងថែមទាំងសម្លាប់ទៀតផង។

ភាពស្មុគស្មាញក្លែងបន្លំទាំងនេះ ភាគច្រើនមានទីតាំងនៅក្នុងប្រទេស មីយ៉ាន់ម៉ា ជាពិសេសនៅតំបន់ព្រំដែន។

លោក Hammerli Sriyai អ្នកស្រាវជ្រាវនៅវិទ្យាស្ថាន ISEAS-Yusof Ishak សិង្ហបុរី ក៏បានចូលរួមបញ្ចេញយោបល់បន្ថែមថា «ក្រុមឧក្រិដ្ឋជនមានផែនការយុទ្ធសាស្ត្រខ្ពស់! ពួកគេស្វែងរកកន្លែងដែលមានសមត្ថភាពគ្រប់គ្រងខ្សោយ រដ្ឋាភិបាលមូលដ្ឋានងាយរងគ្រោះដោយសារការរៀបចំ និងការរីករាលដាលនៃអំពើពុករលួយ។ ទាំងនេះគឺជាលក្ខខណ្ឌដ៏ល្អសម្រាប់ពួកគេក្នុងការសហការជាមួយក្រុមផលប្រយោជន៍ក្នុងស្រុក»។

អ្នកជំនាញរូបនេះក៏បាននិយាយថា អង្គការឧក្រិដ្ឋជនបានចំណាយពេលរាប់ទសវត្សរ៍ក្នុងការកសាងបណ្តាញការពារ។ បណ្តាញជាច្រើនដែលធ្លាប់ដំណើរការល្បែងស៊ីសងបានប្តូរទៅគំរូមជ្ឈមណ្ឌលក្លែងបន្លំ នៅពេលដែលជំងឺរាតត្បាតកូវីដ ១៩ ធ្វើឲ្យពាណិជ្ជកម្មអន្តរជាតិជាប់គាំង។

ជាពិសេស មន្ត្រីមូលដ្ឋាន និងក្រុមផលប្រយោជន៍សេដ្ឋកិច្ចមួយចំនួន តែងតែឃុបឃិតគ្នាជាមួយប្រតិបត្តិការនៃមជ្ឈមណ្ឌលក្លែងបន្លំ ជាថ្នូរនឹងកម្រៃជើងសារ ។

អស់រយៈពេលជាយូរមកហើយ មជ្ឈមណ្ឌលក្លែងបន្លំបានពឹងផ្អែកលើធនធានមនុស្សដែលត្រូវបានទិញ និងលក់ ឬកេងប្រវ័ញ្ច។ របាយការណ៍ឆ្នាំ ២០២៥ របស់ការិយាល័យអង្គការសហប្រជាជាតិស្តីពីគ្រឿងញៀន និងឧក្រិដ្ឋកម្ម (UNODC) បង្ហាញថា មានជនរងគ្រោះមកពីប្រទេសជាង ៥០ ជុំវិញពិភពលោកឯណោះ។

ជំងឺរាតត្បាតបានបង្កើតក្រុមងាយរងគ្រោះថ្មីមួយ៖ មនុស្សដែលធ្លាប់មានការងារមានស្ថេរភាព ចេះភាសាបរទេសច្រើន រស់នៅក្នុងតំបន់ទីក្រុង មានការអប់រំ វ័យក្មេង និងមានចំណេះដឹងអំពីបច្ចេកវិទ្យា។ នេះបានពង្រីកវិសាលភាពនៃជនរងគ្រោះដែលមានសក្តានុពល ដែលអាចត្រូវបានគេបោកប្រាស់ទៅកាន់មជ្ឈមណ្ឌលបោកប្រាស់។

ក្រុមបោកប្រាស់ក៏ទាញយកប្រយោជន៍ពីបច្ចេកវិទ្យាថ្មីដើម្បីបង្កើនភាពទំនើបផងដែរ។ ជាឧបករណ៍បកប្រែតាមអ៊ីនធឺណិត និងបច្ចេកវិទ្យា deepfake ធ្វើឲ្យការបោកប្រាស់កាន់តែគួរឲ្យជឿជាក់។ ការបោកប្រាស់ទូទៅបំផុតគឺការបោកប្រាស់ «សម្លាប់ជ្រូក» ដែលអ្នកបោកប្រាស់ធ្វើពុតជាបង្កើតមិត្តភាព ឬសេចក្តីស្រឡាញ់ជាមួយជនរងគ្រោះ ហើយបន្ទាប់មកទាក់ទាញពួកគេឱ្យវិនិយោគលើគម្រោងនិម្មិត។

ក្រុមក្មេងទំនើងក៏ប្រើប្រាស់ឧបករណ៍ហិរញ្ញវត្ថុរូបិយប័ណ្ណគ្រីបតូ និង DeFi ដូចជា Stablecoin សម្រាប់ការលាងលុយកខ្វក់។ យោងតាម Kristina Amerhauser – អ្នកជំនាញនៅគំនិតផ្តួចផ្តើមប្រឆាំងឧក្រិដ្ឋកម្មសកលជាមួយគណៈកម្មាធិការរៀបចំជាតិ (GI-TOC) រូបិយប័ណ្ណទាំងនេះត្រូវបានប្រើប្រាស់ក្នុងសកម្មភាពឧក្រិដ្ឋកម្មតាមអ៊ីនធឺណិត ពីព្រោះវាពិបាកតាមដាន និងមានភាពអនាមិកខ្ពស់។

ដូច្នេះហើយ ដោយសារតែលក្ខណៈនៃ ការក្លែងបន្លំឆ្លងដែន អាជ្ញាធរមានការលំបាកជាច្រើនក្នុងការដោះស្រាយវា។ ទោះបីជាភ្នាក់ងារដូចជា Interpol តាមដានអ្នកនៅពីក្រោយក៏ដោយ ការស្វែងរកអាជ្ញាធរត្រឹមត្រូវដើម្បីសម្របសម្រួលការដោះស្រាយនៅតែជាបញ្ហាប្រឈមមួយ នេះបើយោងតាម Yen Zhi Yi – អ្នកវិភាគនៅវិទ្យាស្ថានស្រាវជ្រាវអន្តរជាតិ S. Rajaratnam (RSIS) សាកលវិទ្យាល័យបច្ចេកវិទ្យា Nanyang ប្រទេសសិង្ហបុរី៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ពូទីន នឹងបើកសិទ្ធដល់ពលរដ្ឋ ចិន ចូល រុស្ស៊ី ដោយគ្មានទិដ្ឋាការ

The post មូលហេតុដែល អាស៊ីអាគ្នេយ៍ ជាចំណុចក្តៅក្នុងការក្លែងបន្លំ ពិបាកលុបបំបាត់ appeared first on Kampuchea Thmey Daily.

អ្នកនាំពាក្យ ស្នើឱ្យមហាជនប្រុងប្រយ័ត្នចំពោះការក្លែងបន្លំគណនីតេឡេក្រាមរបស់ លោក ស សុខា

អុន ស្រីមាន — Mon, 03 Nov 2025 07:07:54 +0000

នៅរសៀលថ្ងៃទី០៣ ខែវិច្ឆិកា ឆ្នាំ២០២៥ លោក រ៉េន រតនៈ អ្នកនាំពាក្យ លោក ស សុខា បានផុសសារអំពាវនាវមហាជនមានការប្រុងប្រយ័ត្នខ្ពស់ បន្ទាប់ពីមានករណីបង្កើតតេឡេក្រាមក្លែងក្លាយ ដោយដាក់ឈ្មោះរបស់ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចៀសវាងមានការឆបោកក្រោមរូបភាពផ្សេងៗ។

ការអំពាវនាវ ធ្វើឡើងបន្ទាប់ពីអ្នកនាំពាក្យរបស់ អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រកឃើញថា នៅក្នុងបណ្ដាញទំនាក់ទំនងសង្គមតេឡេក្រាម មានជនខិលខូចបានបង្កើតគណនីដោយបន្លំប្រើឈ្មោះ របស់ ស សុខា ជាអក្សរអង់គ្លេស ថា ” Sar Sokha “និងថែមទាំងដាក់រូបភាពរបស់លោកផងដែរ។ បន្ថែមពីនេះ ប្រភពដដែលបញ្ជាក់ថា តាមរយៈគណនីក្លែងបន្លំនេះ ជនខិលខូច បានផ្ញើសារអូសទាញ ទៅកាន់បុគ្គលជាបន្តបន្ទាប់ឱ្យដាក់ទឹកប្រាក់ដើម្បីចូលរួមវិនិយោគជាមួយក្រុមហ៊ុន ដែលពួកគេអះអាងថាឈ្មោះក្រុមហ៊ុន OCIC។

ហេតុនេះ អ្នកនាំពាក្យបញ្ជាក់ថា៖ “សូមអំពាវនាវសាធារណជន បង្កើនការប្រុងប្រយ័ត្ន ចំពោះសកម្មភាពក្លែងបន្លំដូចបានបញ្ជាក់មកនេះ រួមទាំងសកម្មភាពបន្លំឆបោកជាច្រើនទម្រង់ផ្សេងទៀត តាមមធ្យោបាយបណ្ដាញទំនាក់ទំនងសង្គមនានា”។

The post អ្នកនាំពាក្យ ស្នើឱ្យមហាជនប្រុងប្រយ័ត្នចំពោះការក្លែងបន្លំគណនីតេឡេក្រាមរបស់ លោក ស សុខា appeared first on Kampuchea Thmey Daily.

អ្នកនាំពាក្យបញ្ជាក់ពីសកម្មភាពមួយចំនួនរបស់ក្រុមក្លែងបន្លំឯកសណ្ឋានមន្ត្រីនគរបាលជាតិ

Sokhom Khon — Thu, 10 Apr 2025 07:49:11 +0000

អ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សំ វិច្ឆិកា នៅរៀលថ្ងៃទី១០ ខែមេសា ឆ្នាំ២០២៥នេះ បានបញ្ជាក់ពីសម្មភាពមួយចំនួនរបស់ក្រុមជនសង្ស័យដែលក្លែងបន្លំឯកសណ្ឋានជាមន្ត្រីនគរបាលជាតិ ក្រោយត្រូវឃាត់ខ្លួនបានកាលពីថ្ងៃទី៩ មេសានេះ។

លោកវរសេនីយ៍ឯក សំ វិច្ឆិកា បញ្ជាក់ថា មុនឈានដល់ការឃាត់ខ្លួន ក្រុមជនសង្ស័យទាំង៦នាក់នេះធ្លាប់ធ្វើជាក្រុមបើកម៉ូតូនាំផ្លូវរថយន្តពេទ្យសង្រ្គោះបន្ទាន់។ ក្រោយមកពួកខ្លូនក៏ឈប់ធ្វើនៅពេលក្រសួងប្រកាសអោយបញ្ឈប់សកម្មភាពបើកម៉ូតូនាំផ្លូវរថយន្តពេទ្យ។ អ្នកនាំពាក្យបន្ថែមថា ក្នុងកំឡុងខែកុម្ភៈ ឆ្នាំ២០២៥ ឈ្មោះ តាំង ភក្តី បានហៅប្រមូលក្រុមខ្លួនទាំ០៦នាក់ បង្កើតក្រុមការងារដោយដាក់ឈ្មោះ ថា ក្រុម CID និងបានរៀបចំអោយឈ្មោះ ម៉ៅ ផាន់នីម័រ ស្លៀកឯកសណ្ឋាននគរបាលជាតិ និងបួននាក់ទៀតកាន់អាយកូម ពាក់កាតឡូហ្គោនគរបាលព្រហ្មទណ្ឌ ស្ពាយកាបូបមានឡូហ្គោ POLICE ដោយក្រុមខ្លួនបានចេញធ្វើសកម្មភាពក្នុងភូមិសាស្ត្រ សង្កាត់សំរោងក្រោម ប្រហែល០៥លើក ។

បើតាមលោក សំ វិច្ឆិកា ក្រុមជនសង្ស័យបានធ្វើសកម្មភាពជិះម៉ូតូល្បាតតាមផ្លូវរទះភ្លើង មហាវិថីឈ្មះៗ ដោយដេញឃាត់រ៉ឺម៉ក និងបានត្រួតពិនិត្យលើមនុស្ស ដែលអង្គុយនៅកន្លែងស្ងាត់ដើម្បីឆែករកគ្រឿងញៀន និងសម្ភារៈផ្សេងៗ។

សូមបញ្ជាក់ថា កាលពីវេលាម៉ោង១និង០០នាទី ថ្ងៃទី៩ ខែមេសា ឆ្នាំ២០២៥ កម្លាំងនគរបាលខណ្ឌពោធិ៍សែនជ័យ បានឃាត់ខ្លួនជនសង្ស័យចំនួន៦នាក់ ពាក់ព័ន្ធករណីក្លែងបន្លំឯកសណ្ឋានជាមន្ត្រីនគរបាលជាតិ ប្រព្រឹត្តនៅចំណុចផ្លូវរថភ្លើង ភូមិសំរោង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។

ក្នុងប្រិតិបត្តិការឃាត់ខ្លួន កម្លាំងសមត្ថកិច្ចបានដកហូតទូរស័ព្ទចំនួន ០៧គ្រឿង ម៉ូតូចំនួន ០៣គ្រឿង ម៉ាក Hond Dream ពណ៌ខ្មៅ ម៉ាកHonda Wave ពណ៌ខ្មៅ ម៉ាក Honda Scoopy ពណ៌ក្រហមចំនួន ០១គ្រឿង៕

អត្ថបទ៖ សុខុម

The post អ្នកនាំពាក្យបញ្ជាក់ពីសកម្មភាពមួយចំនួនរបស់ក្រុមក្លែងបន្លំឯកសណ្ឋានមន្ត្រីនគរបាលជាតិ appeared first on Kampuchea Thmey Daily.

ឃាត់ខ្លួនជនសង្ស័យ ០៦ នាក់ ករណីក្លែងបន្លំឯកសណ្ឋានជាមន្ត្រីនគរបាលជាតិ

អ៊ិន ពិសី — Thu, 10 Apr 2025 03:00:58 +0000

កម្លាំងអធិការដ្ឋាននគរបាលខណ្ឌពោធិ៍សែនជ័យ ឃាត់ខ្លួនជនសង្ស័យចំនួន ០៦ នាក់ ពាក់ព័ន្ធករណីក្លែងបន្លំឯកសណ្ឋានជាមន្ត្រីនគរបាលជាតិ។

កាលពីថ្ងៃទី ០៩ ខែមេសា ឆ្នាំ ២០២៥ ម្សិលមិញនេះ ដោយអនុវត្តតាមបទបញ្ជារបស់ លោកឧត្ដមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងអធិការដ្ឋាននគរបាលខណ្ឌពោធិ៍សែនជ័យ ដឹកនាំដោយលោកវរសេនីយ៍ឯក ម៉ន វុធី អធិការនគរបាលខណ្ឌ បានស្រាវជ្រាវឃាត់ខ្លួនជនសង្ស័យចំនួន ០៦ នាក់ ពាក់ព័ន្ធករណីក្លែងបន្លំឯកសណ្ឋានជាមន្ត្រីនគរបាលជាតិ ប្រព្រឹត្តនៅចំណុចផ្លូវរថភ្លើង ភូមិសំរោង សង្កាត់សំរោងក្រោម ខណ្ឌពោធិ៍សែនជ័យ។

នគរបាលបានឲ្យដឹងថា ជនសង្ស័យឃាត់ខ្លួនចំនួន ០៦ នាក់ រួមមាន ៖ ទី០១.ឈ្មោះ បាន ភ័ត្ដ្រា ភេទប្រុស មុខរបរកម្មករសំណង់ ស្នាក់នៅបន្ទប់ជួលលេខ ៤២ ភូមិត្រពាំងជ្រៃ សង្កាត់កាកាបទី ០២ ខណ្ឌពោធិ៍សែនជ័យ។ ទី០២.ឈ្មោះ គ យ៉ ជ ភេទប្រុស ជាសិស្ស ស្នាក់នៅខណ្ឌសែនសុខ។ ទី០៣. ឈ្មោះ ព ម៉ ហ៊ ភេទប្រុស ជាសិស្ស ស្នាក់នៅផ្ទះលេខ ៤៣D ភូមិបុរីសន្តិភាព ០២ សង្កាត់ចោមចៅ ០២ ខណ្ឌពោធិ៍សែនជ័យ។ ទី០៤.ឈ្មោះ ឈ ដ រ ញ៉ ភេទប្រុស ជាសិស្ស ស្នាក់នៅភូមិថ្មគោល សង្កាត់ចោមចៅទី ០២ ខណ្ឌពោធិ៍សែនជ័យ។ ទី០៥.ឈ្មោះ ម៉ៅ ផាន់នីម័រ ភេទប្រុស មុខរបរកម្មករ ស្នាក់នៅសង្កាត់កាកាបទី ០២ ខណ្ឌពោធិ៍សែនជ័យ និងទី០៦.ឈ្មោះ តាំង ភក្ដី ភេទប្រុស មុខរបរ ជាងម៉ាស៊ីនត្រជាក់ ស្នាក់នៅភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ។ ដោយឡែកវត្ថុតាងដកហូតរួមមាន ៖ ទូរស័ព្ទចំនួន ០៧ គ្រឿង , ម៉ូតូចំនួន ០៣ គ្រឿង (ម៉ាក Honda Dream ពណ៌ខ្មៅ , ម៉ាក Honda Wave ពណ៌ខ្មៅ , ម៉ាក Honda Scoopy ពណ៌ក្រហម) និងឯកសណ្ឋានមន្ត្រីនគរបាលជាតិ។

បច្ចុប្បន្ន ជនសង្ស័យ និងវត្ថុតាង នគរបាលជំនាញ កសាងសំណុំរឿងដើម្បីបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី៕

អត្ថបទ ៖ សុភា

The post ឃាត់ខ្លួនជនសង្ស័យ ០៦ នាក់ ករណីក្លែងបន្លំឯកសណ្ឋានជាមន្ត្រីនគរបាលជាតិ appeared first on Kampuchea Thmey Daily.

តើការក្លែងខ្លួនជាសែស្រឡាយរាជវង្ស ចាត់ទុកជាការប្រមាថដល់ព្រះមហាក្សត្រដែរ ឬទេ?

Ken Malis — Thu, 22 Aug 2024 08:24:50 +0000

កាលពីពេលថ្មីៗនេះ មានម្ចាស់គណនីតិកតុក (Tik Tok) មួយ បានអះអាងខ្លួនជាអនុជរបស់ព្រះករុណាព្រះមហាក្សត្រនៃកម្ពុជា ដែលមានឈ្មោះថា នរោត្តម សូរិយាវង្ស និង ស៊ីសុវត្ថិ សីណាក់វង្ស។ ជុំវិញករណីនេះ នៅថ្ងៃទី២១ ខែសីហា ឆ្នាំ២០២៤ ក្រសួងព្រះបរមរាជវាំង បានប្រកាសបដិសេធចំពោះបុគ្គលជាម្ចាស់គណនីតិកតុកនេះ ដែលបានបង្ហោះ ចែកចាយក្នុងប្រព័ន្ធបណ្តាញទំនាក់ទំនងសង្គម។

ក្រសួងព្រះបរមរាជវាំង អះអាងថា បុគ្គលនេះ មិនមែនជាសែស្រឡាយព្រះរាជវង្សានុវង្សដែលទទួលស្គាល់ដោយព្រះបរមរាជវាំងឡើយ។ ដូច្នេះ តើការក្លែងបន្លំខ្លួនជាអនុជរបស់ព្រះមហាក្សត្រ ចាត់ទុកជាទង្វើដែលធ្វើឱ្យប៉ះពាល់ និងជាការប្រមាថដល់អង្គព្រះមហាក្សត្រដែរ ឬទេ?

តាមរដ្ឋធម្មនុញ្ញ នៃព្រះរាជាណាចក្រកម្ពុជា មាត្រា៧ ព្រះមហាក្សត្រកម្ពុជា ទ្រង់គ្រងរាជសម្បត្តិ ប៉ុន្តែ ទ្រង់មិនកាន់អំណាចឡើយ ហើយទ្រង់ជាប្រមុខរដ្ឋមួយជីវិត។ មាត្រា៧នេះ ថែមទាំងកំណត់ថា អង្គព្រះមហាក្សត្រ មិនអាចនរណារំលោភបំពានបានឡើយ។ ចំណែក មាត្រា៤១ នៃច្បាប់នេះបានចែងថា ប្រជាពលរដ្ឋខ្មែរ មានសេរីភាពខាងការបញ្ចេញមតិរបស់ខ្លួន សេរីភាពខាងព័ត៌មាន សេរីភាពខាងបោះពុម្ពផ្សាយ សេរីភាពខាងការប្រជុំ។ ប៉ុន្តែ ជនណាក៏ដោយ មិនអាចឆ្លៀតប្រើសិទ្ធិនេះ ដោយរំលោភ នាំឱ្យប៉ះពាល់ដល់កិត្តយសរបស់អ្នកដ៏ទៃ ដល់ទំនៀមទម្លាប់ល្អរបស់សង្គម ដល់សណ្តាប់ធ្នាប់សាធារណៈ និងដល់សន្តិសុខជាតិបានឡើយ។

ដោយឡែក ច្បាប់ស្តីពី វិសោធនកម្មក្រមព្រហ្មទណ្ឌ ដែលបានធ្វើវិសោធនកម្មដោយបន្ថែមមាត្រា៤៣៧ (ស្ទួន)វិញ បានកំណត់ថា ចំពោះការប្រមាថចំពោះអង្គព្រះមហាក្សត្រ គឺជាវាចា កាយវិការ សំណេរ ឬវត្ថុដែលប៉ះពាល់ដល់សេចក្តីថ្លៃថ្នូរនៃបុគ្គល។ ការប្រមាថចំពោះអង្គព្រះមហាក្សត្រ ត្រូវផ្តន្ទាទោសដាក់ពន្ធនាគារពី ១ឆ្នាំ ទៅ ៥ឆ្នាំ និងពិន័យជាប្រាក់ ២លានរៀល ទៅ ១០លានរៀល។ ចំពោះ នីតិបុគ្គល ត្រូវផ្តន្ទាទោស ពិន័យជាប្រាក់ពី ១០លានរៀល ទៅ ៥០លានរៀល ព្រមទាំងទោសបន្ថែមផ្សេងទៀត ក្នុងករណីរកឃើញមានជាប់ពាក់ព័ន្ធពីបទប្រមាថចំពោះអង្គព្រះមហាក្សត្រ។

យ៉ាងណាក៏ដោយ ចំពោះករណីខាងលើនេះ នៅមិនទាន់មានចំណាត់ការណាមួយនៅឡើយទេ ប៉ុន្តែ ក្រសួងព្រះបរមរាជវាំង បានអំពាវនាវដល់ស្ថាប័ន និងអាជ្ញាធរមានសមត្ថកិច្ចទាំងអស់ ចាត់វិធានការជាបន្ទាន់ឱ្យបានម៉ឺងម៉ាត់បំផុតតាមរដ្ឋធម្មនុញ្ញ និងច្បាប់ជាធរមាន៕

អត្ថបទ៖ គេន ម៉ាលិះ

The post តើការក្លែងខ្លួនជាសែស្រឡាយរាជវង្ស ចាត់ទុកជាការប្រមាថដល់ព្រះមហាក្សត្រដែរ ឬទេ? appeared first on Kampuchea Thmey Daily.

ក្រុមការងារឯកឧត្ដម ហ៊ុន ម៉ានី ព្រមានប្ដឹងសមត្ថកិច្ច ឱ្យចាប់ខ្លួនអ្នកក្លែងបន្លំគណនីតេឡេក្រាម

Ngoeul Narath — Tue, 16 Jan 2024 11:53:54 +0000

ក្រុមការងារ ឯកឧត្ដម ហ៊ុន ម៉ានី នៅល្ងាចថ្ងៃទី១៦ ខែមករា នេះ បានព្រមានទៅកាន់ជនអនាមិកដែលក្លែងបន្លំគណនីតេឡេក្រាម ឱ្យឈប់ប្រើប្រាស់រូបភាពរបស់ ឯកឧត្តម ហ៊ុន ម៉ានី ក្នុងចេតនាក្លែងបន្លំ កុហកបោកប្រាស់ ឬទាញផលប្រយោជន៍ណាមួួយ ត្រូវបញ្ឈប់សកម្មភាពនេះជាបន្ទាន់ បើពុំដូច្នេះទេក្រុមការងារ នឹងប្ដឹងទៅសមត្ថកិច្ចឱ្យចាត់ការតាមផ្លូវច្បាប់។ នេះបើតាមសេចក្ដីជូនដំណឹងរបស់ក្រុមការងារឯកឧត្ដម ហ៊ុន ម៉ានី តាមប្រព័ន្ធតេឡេក្រាម។

ក្រុមការងារឯកឧត្ដម ហ៊ុន ម៉ានី បានសរសេរដូច្នេះថា “សូមជម្រាបជូនសាធារណជនមេត្តាជ្រាបថា ថ្មីៗនេះ មានករណីជនអាណាមិកបានក្លែងបន្លំគណនី ដោយបានប្រើប្រាស់រូបភាពរបស់ ឯកឧត្តម ហ៊ុន ម៉ានី (ជាគណនីសន្ទនាតាមប្រព័ន្ធតេឡេក្រាម) ក្នុងចេតនាក្លែងបន្លំ កុហកបោកប្រាស់ ឬទាញយកប្រយោជន៍ដោយប្រការណាមួយ។ ចំពោះករណីនេះ យើងខ្ញុំសូមអំពាវនាវ ឲ្យជនបង្ក បញ្ឈប់នូវទង្វើនេះជាបន្ទាន់ បើពុំនោះទេ ក្រុមការងារ នឹងធ្វើការជាមួយសមត្ថកិច្ចពាក់ព័ន្ធ ដើម្បីស្វែងរកជនទទួលខុសត្រូវចំពោះមុខច្បាប់ជាក់ជាមិនខាន”។

ក្រុមការងារឯកឧត្ដម ហ៊ុន ម៉ានី ក៏បានក្រើនរំលឹកដល់ប្រជាពលរដ្ឋ ដែលប្រើប្រាស់កម្មវិធីបណ្តាញទំនាក់ទំនងសង្គមនានា តាមប្រព័ន្ធអ៊ីនធឺណេត ឱ្យបង្កើនការប្រុងប្រយ័ត្នឱ្យបានខ្ពស់ ចៀសវាង ការក្លាយខ្លួនជាជនរងគ្រោះបច្ចេកវិទ្យា ដែលនាំឱ្យបាត់បង់ផលប្រយោជន៍ និងទ្រព្យសម្បត្តិ ដែលបង្កឡើងដោយសារការប្រើប្រាស់ល្បិចបន្លំ ឬការលួចប្រើប្រាស់បច្ចេកទេសចម្លងមេរោគជាដើម៕

The post ក្រុមការងារឯកឧត្ដម ហ៊ុន ម៉ានី ព្រមានប្ដឹងសមត្ថកិច្ច ឱ្យចាប់ខ្លួនអ្នកក្លែងបន្លំគណនីតេឡេក្រាម appeared first on Kampuchea Thmey Daily.