ពូទីន នឹងបើកសិទ្ធដល់ពលរដ្ឋ ចិន ចូល រុស្ស៊ី ដោយគ្មានទិដ្ឋាការ

ក្នុងអំឡុងពេលជួបជាមួយនាយករដ្ឋមន្ត្រីចិន លោក Li Qiang ប្រធានាធិបតីរុស្ស៊ី វ្ល៉ាឌីមៀរ ពូទីន បានប្រកាសថា ក្រុងមូស្គូនឹងអនុវត្តគោលនយោបាយមិនគិតថ្លៃទិដ្ឋាការសម្រាប់ពលរដ្ឋចិនក្នុងពេលឆាប់ៗ ពោលគឺពួកគេមានសិទ្ធពេញលេញចូលរុស្ស៊ី ។ នេះបើតាមកាសែត Moscow Times បានចុះផ្សាយ កាលពីថ្ងៃទី១៨ ខែវិច្ឆិកា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលនៃកិច្ចប្រជុំជាមួយនាយករដ្ឋមន្ត្រីចិន លោក Li Qiang នៅឯវិមានក្រឹមឡាំង លោកពូទីន បានសរសើរគោលនយោបាយទិដ្ឋាការរបស់ចិន ដោយបញ្ជាក់ថា ទំនាក់ទំនងរុស្ស៊ី-ចិន គឺស្ថិតក្នុងស្ថានភាពល្អបំផុតមិនធ្លាប់មាន។

លោកបានមានប្រសាសន៍ថា ការផ្តល់ទិដ្ឋាការចូលដោយមិនចាំបាច់មានទិដ្ឋាការរបស់ទីក្រុងប៉េកាំងដល់ពលរដ្ឋរុស្ស៊ី បានរួមចំណែកដល់ការលើកកម្ពស់ទំនាក់ទំនងវប្បធម៌ និងសេដ្ឋកិច្ចរវាងប្រទេសទាំងពីរបន្ថែមទៀត។ យើងក៏នឹងណែនាំវិធានការទៅវិញទៅមកសម្រាប់ពលរដ្ឋចិននៅពេលពួកគេមកប្រទេសរុស្ស៊ីផងដែរ។ នេះពិតជានឹងជាការជំរុញដ៏ល្អ និងវិជ្ជមាន សម្រាប់ការអភិវឌ្ឍទំនាក់ទំនងទ្វេភាគី។

ទោះជាយ៉ាងណាក៏ដោយ លោកប្រធានាធិបតីមិនបានបញ្ជាក់ថា ពេលណារុស្ស៊ីនឹងលើកលែងតម្រូវការទិដ្ឋាការសម្រាប់អ្នកកាន់លិខិតឆ្លងដែនចិននោះទេ។ ចាប់តាំងពីខែកញ្ញាមក ទីក្រុងប៉េកាំងបានសាកល្បងកម្មវិធីមួយដែលអនុញ្ញាតឲ្យពលរដ្ឋរុស្ស៊ីដែលកាន់លិខិតឆ្លងដែនធម្មតា អាចទៅទស្សនាប្រទេសចិនដោយមិនចាំបាច់មានទិដ្ឋាការរហូតដល់ ៣០ ថ្ងៃ។

យាងណា ក្នុងអំឡុងពេលនៃកិច្ចប្រជុំ មេដឹកនាំវិមានក្រឹមឡាំងក៏បានសង្កត់ធ្ងន់ផងដែរថា ភាពជាដៃគូរវាងរុស្ស៊ី និងចិនមិនមែនសំដៅលើនរណាម្នាក់ឡើយ។ លោកបានបន្ថែមថា «ភាពជាដៃគូគ្រប់ជ្រុងជ្រោយរវាងប្រទេសទាំងពីរ កំពុងចូលដល់យុគសម័យថ្មីមួយ។ យើងពិតជាកំពុងជួបប្រទះនឹងសម័យកាលដ៏ល្អបំផុតក្នុងប្រវត្តិសាស្ត្រ»។

នៅខាងភាគីចិន នាយករដ្ឋមន្ត្រី Li Qiang បានមានប្រសាសន៍ថា ទីក្រុងប៉េកាំងបានត្រៀមខ្លួនរួចជាស្រេចដើម្បីធ្វើការជាមួយទីក្រុងមូស្គូ ដើម្បីរក្សាមិត្តភាពដែលមានស្រាប់ ខណៈពេលដែលពង្រឹងការធ្វើសមកាលកម្មនៃយុទ្ធសាស្ត្រអភិវឌ្ឍន៍ និងលើកកម្ពស់កិច្ចសហប្រតិបត្តិការក្នុងវិស័យជាច្រើន ដើម្បីសម្រេចបានលទ្ធផលជាក់ស្តែងបន្ថែមទៀត៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ត្រាំ នឹងលក់យន្តហោះចម្បាំង F-35 ទៅឲ្យអារ៉ាប៊ីសាអូឌីត ទោះមានហានិភ័យក៏ដោយ