បំណងប្រាថ្នាដ៏ធំរបស់ពលរដ្ធ អ៊ុយក្រែន គឺចង់បានសន្តិភាព និងមានអគ្គិសនីឡើងវិញ

ប្រជាជនអ៊ុយក្រែនដែលកំពុងប្រារព្ធពិធីចូលឆ្នាំថ្មីលើកទីបួនចាប់តាំងពីការឈ្លានពានរបស់រុស្ស៊ី បានលើកឡើងដូចៗគ្នាថា បំណងប្រាថ្នាដ៏ធំបំផុតរបស់ពួកគេសម្រាប់ឆ្នាំ ២០២៦នេះ គឺចង់បានសន្តិភាព ក៏ដូចជាបញ្ចប់ការផ្ដាច់ចរន្តអគ្គិសនីដែលធ្វើឲ្យជីវិតពលរដ្ធម្នាក់ៗរស់ដូចក្នុងឋាននរក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ០១ ខែមករា ឆ្នាំ ២០២៦ CNA បានរាយការណ៍ថា ប្រទេសរុស្ស៊ីបានបង្កើនយុទ្ធនាការវាយប្រហាររបស់ខ្លួនប្រឆាំងនឹងបណ្តាញថាមពលរបស់អ៊ុយក្រែនក្នុងរដូវរងាកាលពីឆ្នាំ ២០២៥ ដោយកាត់បន្ថយថាមពល និងកំដៅដល់មនុស្សរាប់រយរាប់ពាន់នាក់ ខណៈដែលសីតុណ្ហភាពបានធ្លាក់ចុះក្រោមសូន្យឯណោះ។

នៅក្នុងសង្កាត់ Vyshgorod នៃទីក្រុងកៀវ អ្នកស្រុកជាច្រើនបានប្រាប់បណ្ដាញព័ត៌មាន AFP ដូចៗគ្នាថា ពួកគេចង់ឲ្យសង្គ្រាមបញ្ចប់ឲ្យបានឆាប់តាមដែលអាចធ្វើទៅបាន។ អ្វីដែលគ្រប់គ្នានៅទីនេះប្រាថ្នាគឺសន្តិភាព និងមានភ្លើងប្រើប្រាស់បានដូចពីមុនតែប៉ុណ្ណោះ!

យ៉ាងណាមិញ បើទោះបីជារុស្ស៊ីបានបដិសេធថាមិនបានកំណត់គោលដៅលើជនស៊ីវិល និងបានហៅការឈ្លានពានរបស់ខ្លួនថាជា «ប្រតិបត្តិការយោធាពិសេស» ដោយមានគោលបំណងទប់ស្កាត់ការពង្រីកអង្គការណាតូ ប៉ុន្តែ ទីក្រុងកៀវ និងសម្ព័ន្ធមិត្តរបស់ខ្លួនបានហៅថា នេះគឺជាការកុហកសុទ្ធសាធ។

ជម្លោះនេះដែរ ក៏ជាជម្លោះដ៏សាហាវបំផុតនៅលើទឹកដីអឺរ៉ុបចាប់តាំងពីសង្គ្រាមលោកលើកទី ២ បានបណ្តាលឲ្យមានរលកបំផ្លិចបំផ្លាញយ៉ាងខ្លាំង ហើយធ្វើឲ្យមនុស្សរាប់លាននាក់ត្រូវបានផ្លាស់ទីលំនៅ និងបានធ្វើឲ្យទីក្រុងអ៊ុយក្រែនទាំងមូលត្រូវបំផ្លិចបំផ្លាញ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

លោក វ៉ាង យី៖ ជប៉ុនព្យាយាមបញ្ច្រាសប្រវត្តិសាស្ត្រ ខណៈលោកប្រាប់កូរ៉េខាងត្បូង ប្រកាន់ខ្ជាប់ចិនតែមួយ