ការឃាត់ខ្លួននេះបានធ្វើឡើងកាលពីវេលាម៉ោង ២ រសៀល ថ្ងៃទី ១៤ ខែកក្កដា ឆ្នាំ ២០២៦ ស្ថិតនៅចំណុចមុខផ្សារចាស់ ផ្លូវ ១៥ សង្កាត់វត្តភ្នំ ខណ្ឌដូនពេញ រាជធានីភ្នំពេញ។ ជនសង្ស័យឈ្មោះ ចាន់ ទូច ភេទប្រុស អាយុ ៤១ ឆ្នាំ ជនជាតិខ្មែរ មុខរបរមិនពិតប្រាកដ។

ប្រភពពីនគរបាល បានឲ្យដឹងថា ដោយអនុវត្តតាមការណែនាំពី លោកវរសេនីយ៍ឯក ជុន ប៊ុនណាន អធិការនគរបាលខណ្ឌ ៧ មករា បានបញ្ជាកម្លាំងនគរបាលបើកការស្រាវជ្រាវ រហូតឈានដល់ការឃាត់ជនសង្ស័យម្នាក់ ពាក់ព័ន្ធ ៣ ករណី ដែលជាមុខសញ្ញាលួចយ៉ាងសកម្ម។ ក្នុងនោះ ករណីទី១.លួចម៉ូតូ ១ គ្រឿង នៅសង្កាត់មនោរម្យ ខណ្ឌ ៧ មករា , ករណីទី២.កាលពីវេលាម៉ោង ៧ និង ១០ នាទីយប់ ថ្ងៃទី ៣១ ខែមីនា ឆ្នាំ ២០២៦ បានធ្វើសកម្មភាពលួចកញ្ចក់ឡាន នៅត្រង់ចំណុចសង្កាត់បឹងព្រលឹត ខណ្ឌ ៧ មករា រាជធានីភ្នំពេញ , និង ករណីទី៣.ធ្វើសកម្មភាពលួចកញ្ចក់ឡាន នៅខណ្ឌសែនសុខ រាជធានីភ្នំពេញ។

បច្ចុប្បន្ន ជនសង្ស័យ ត្រូវបាននគរបាល នៃអធិការដ្ឋាននគរបាលខណ្ឌ ៧ មករា ធ្វើការសាកសួរ ដើម្បីចាត់ការតាមនីតិវិធីច្បាប់៕
អត្ថបទ ៖ រដ្ឋា

The post នគរបាលខណ្ឌ ៧ មករា ស្រាវជ្រាវឃាត់ខ្លួនជនសង្ស័យម្នាក់ ដែលធ្វើសកម្មភាពយ៉ាងសកម្មគាស់កញ្ចក់រថយន្ត appeared first on Kampuchea Thmey Daily.

កាលពីព្រឹកថ្ងៃទី ១៤ ខែកក្កដា ឆ្នាំ ២០២៦ នេះ លោក ថេង សុថុល អភិបាលខណ្ឌ ៧ មករា រួមជាមួយមន្រ្តីជំនាញ នៃរដ្ឋបាលខណ្ឌ បានចុះមើលសកម្មភាពបូមស្ដារប្រព័ន្ធលូក្នុងមូលដ្ឋាន ដើម្បីកាយដី និង សំរាម ដែលអាចធ្វើឲ្យរាំងស្ទះដល់លំហូរទឹកភ្លៀង។

លោក ថេង សុថុល បានឲ្យដឹងថា ដោយមានការយកចិត្តទុកដាក់ពី លោក ឃួង ស្រេង អភិបាលរាជធានីភ្នំពេញ ក្រុមការងារ បានចុះស្តារអណ្តូងលូតូចៗ ជាអាទិភាព នៅលើកំណាត់ផ្លូវលេខ ២១១ ផ្លូវលេខ ២១៥ ផ្លូវលេខ ១៧១ ផ្លូវលេខ ១៣៤ និង ផ្លូវលេខ ១៨២ ស្ថិតក្នុងសង្កាត់វាលវង់ និង សង្កាត់មិត្តភាព ដែលចំណុចនេះ គឺជាតំបន់ទំនាបទាបជាងគេ ហើយក៏ជាចំណុចទទួលរងទឹកធ្លាក់ ពីសង្កាត់ផ្សេងៗ ក្នុងមូលដ្ឋានខណ្ឌ ៧ មករា។ ដូច្នេះហើយ តំបន់នេះ តែងមានការប្រឈមការជន់ រាល់ពេលមានភ្លៀងធ្លាក់ខ្លាំង ពិសេសក៏ធ្វើឲ្យមានការរាំងស្ទះ មិនអាចនាំទឹកហូរទៅបាន ព្រោះតំបន់នេះ គឺជាប្រព័ន្ធនាំផ្លូវទឹកចេញពីខណ្ឌ ៧ មករា ដើម្បីបន្តធ្លាក់ទៅប្រព័ន្ធលូធំៗ។

លោកបញ្ជាក់ថា អនុវត្តតាមការណែនាំរបស់លោកអភិបាលរាជធានីភ្នំពេញ ដែលបានណែនាំឲ្យយកចិត្តទុកដាក់ចំពោះផ្លូវណា ឬ តំបន់ណាដែលចាំបាច់ ត្រូវធ្វើការស្តារភ្លាមៗ ដើម្បីធានាថា ប្រព័ន្ធលូមិនរាំងស្ទះកាកសំណល់ និង សំរាម សំដៅបើកមុខលូឲ្យស្អាតល្អ និង ធ្វើឲ្យលំហូរទឹកភ្លៀងអាចហូរចេញបានលឿន។

គួរជម្រាបថា កាលពីព្រឹកថ្ងៃទី ១៣ ខែកក្កដា ឆ្នាំ ២០២៦ លោក ឯក ឃុនដឿន អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ បានដឹកនាំក្រុមការងារ ចុះស្តារប្រព័ន្ធលូ ដើម្បីកាយភក់ និង សំរាម ដែលអាចធ្វើឲ្យរាំងស្ទះដល់លំហូរទឹកភ្លៀង តាមផ្លូវសំខាន់ៗ ជាច្រើនទៀត ក្នុងមូលដ្ឋានខណ្ឌ ៧ មករា ប្រមាណជា ៣.២៣៤ ម៉ែត្រ ដែលជាខណ្ឌអាទិភាព និង ស្ថិតនៅកណ្តាលរាជធានីភ្នំពេញ៕
អត្ថបទ ៖ សុភា

The post អាជ្ញាធរខណ្ឌ ៧ មករា បន្តចុះពិនិត្យមើលសកម្មភាពស្ដារបូមប្រព័ន្ធលូក្នុងមូលដ្ឋាន appeared first on Kampuchea Thmey Daily.

ប្រតិបត្តិការនេះកាលពីថ្ងៃទី ១៥ ខែមិថុនា ឆ្នាំ ២០២៦ ក្រោមការដឹកនាំដោយ លោក ថេង សុថុល អភិបាលខណ្ឌ ៧ មករា បានបន្តការចុះត្រួតពិនិត្យអគារជួលស្នាក់នៅដ៏ធំ ១ កន្លែង ស្ថិតក្នុងសង្កាត់វាលវង់ ខណ្ឌ ៧ មករា ស្របតាមអនុក្រឹត្យលេខ ០៣ របស់ប្រមុខរាជរដ្ឋាភិបាលកម្ពុជា ក្នុងការបោសសម្អាត Online Scams។

លោក ថេង សុថុល បានឲ្យដឹងថា ក្រោមការអនុវត្តតាមបទបញ្ជាដឹកនាំរបស់ លោក ឃួង ស្រេង អភិបាលរាជធានីភ្នំពេញ គណៈបញ្ជាការឯកភាពខណ្ឌ តែងតែចុះត្រួតពិនិត្យជាប្រចាំ ទៅតាមបណ្តាទីតាំងផ្តល់ការស្នាក់នៅតូចធំនានាទាំងអស់ ក្នុងមូលដ្ឋាន ដើម្បីទប់ស្កាត់ និង បោសសម្អាតដាច់ខាតលើឧក្រិដ្ឋកម្មឆបោកតាមប្រព័ន្ធបច្ចេកវិទ្យានេះ ដោយមិនអនុញ្ញាតឲ្យក្រុមឧក្រិដ្ឋជន យកប្រទេសកម្ពុជាជាជម្រកសម្រាប់ប្រព្រឹត្តបទល្មើស Online Scams នេះនោះឡើយ។

លោកបន្តថា ក្នុងរង្វង់ប្រតិបត្តិការនេះ កម្លាំងគណៈបញ្ជាការឯកភាព បានចុះឆែកតាមបន្ទប់រកឃើញជនជាតិវៀតណាម ចំនួន ៦ នាក់ រួមទាំងទូរស័ព្ទ ៨ គ្រឿង និង កុំព្យូទ័រ ៣ គ្រឿង។ ចំពោះកុំព្យូទ័រ ត្រូវបានជនសង្ស័យកាច់បំបាក់បំផ្លាញភស្តុតាង។

បច្ចុប្បន្ន នគរបាល បានបញ្ជូនជនបរទេសទាំង ៦ នាក់ ទៅកាន់អធិការដ្ឋាននគរបាលខណ្ឌ ៧ មករា ដើម្បីកសាងសំណុំរឿងចាត់ការតាមផ្លូវច្បាប់៕
អត្ថបទ ៖ រដ្ឋា

The post ត្រួតពិនិត្យទីតាំងខុនដូ ១ កន្លែង រកឃើញជនជាតិវៀតណាម ៦ នាក់ ពាក់ព័ន្ធ Online Scams នៅខណ្ឌ ៧ មករា appeared first on Kampuchea Thmey Daily.

នៅថ្ងៃទី ១២ ខែមិថុនា ឆ្នាំ ២០២៦ នេះ រដ្ឋបាលខណ្ឌ ៧ មករា ដោយមានការចង្អុលបង្ហាញពី លោក ថេង សុថុល អភិបាល នៃគណៈអភិបាលខណ្ឌ ៧ មករា បានចាត់ឲ្យ លោក អ៊ី ពៅ អភិបាលរងខណ្ឌ ដឹកនាំក្រុមការងារ នៃរដ្ឋបាលខណ្ឌ ៧ មករា និង មានការសហការចូលរួមពីមន្រ្តី នៃមន្ទីរកសិកម្មរាជធានីភ្នំពេញ បានចុះត្រួតពិនិត្យទីតាំងស្តុកសាច់បង្កក និង ចែកចាយបន្ត ក្នុងភូមិសាស្ដ្រខណ្ឌ ៧ មករា សរុបចំនួន ៣ ទីតាំង រួមមាន ៖ ១-ទីតាំងស្តុក និង លក់សាច់បង្កក ស្ថិតនៅផ្ទះលេខ ៤E0 ផ្លូវលេខ ១៤៣ សង្កាត់បឹងព្រលិត ខណ្ឌ ៧ មករា។ ២-ទីតាំងស្តុក និង លក់សាច់បង្កក ស្ថិតនៅផ្ទះលេខ ៨១CE0 ផ្លូវលេខ ១៦៦ សង្កាត់អូរឫស្សីទី ២ ខណ្ឌ ៧ មករា។ ៣-ទីតាំងស្តុក និង លក់សាច់បង្កក ស្ថិតនៅផ្ទះលេខ ៣៣E0 ផ្លូវលេខ ១២៥ កែងផ្លូវ ២៣២ សង្កាត់វាលវង់ ខណ្ឌ ៧ មករា។

ក្រោយពីបានត្រួតពិនិត្យជាក់ស្តែងឃើញថា ទីតាំងស្តុកសាច់បង្កកទាំង ៣ កន្លែង ខាងលើ ពុំមានមុខទំនិញប្រភេទសាច់បង្កកនាំចូលពីប្រទសថៃឡើយ។ ជាមួយគ្នានេះដែរ អាជ្ញាធរជំនាញពាក់ព័ន្ធ បានធ្វើការណែនាំដល់ម្ចាស់ទីតាំងទាំងអស់ មិនត្រូវនាំយកទំនិញសាច់បង្កកពីប្រទេសថៃ និង ទំនិញខូចគុណភាពមកលក់នៅកម្ពុជាឡើយ៕
អត្ថបទ ៖ សុភា

The post អាជ្ញាធរចុះពិនិត្យទីតាំងស្តុកសាច់បង្កក ៣ កន្លែង ក្នុងខណ្ឌ ៧​ មករា តែរកមិនឃើញមានមុខទំនិញណាមួយនាំចូលពីថៃឡើយ appeared first on Kampuchea Thmey Daily.

ប្រតិបត្តិការនេះធ្វើឡើងកាលពីវេលាម៉ោង ៩ និង ៣០ នាទីព្រឹក ថ្ងៃទី ១០ ខែមិថុនា ឆ្នាំ ២០២៦ ដោយមានការណែនាំពី លោក ឃួង ស្រេង អភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីភ្នំពេញ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ លោក ថេង សុថុល អភិបាល នៃគណៈអភិបាលខណ្ឌ ៧ មករា បានដឹកនាំកម្លាំងគណៈបញ្ជាការឯកភាពខណ្ឌ ៧ មករា មានការសម្របសម្រួលពី លោក ទុង រតនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះត្រួតពិនិត្យរដ្ឋបាលនៅគោលដៅផ្ទះសំណាក់ រី លែក្ស (Relax) ផ្លូវ ១២៥ ភូមិ ៩ សង្កាត់វាលវង់ ខណ្ឌ ៧ មករា រាជធានីភ្នំពេញ ដោយរកឃើញជនបរទេសស្នាក់នៅចំនួន ៦ នាក់ (ប្រុស) ជនជាតិឥណ្ឌូណេស៊ី។

ក្នុងការចុះត្រួពិនិត្យនេះ កម្លាំងអាជ្ញាធរបានរកឃើញឧបករណ៍អេឡិចត្រូនិកមួយចំនួនដូចជា ៖ ម៉ូនីទ័រចំនួន ១ គ្រឿង , leptop ៤ គ្រឿង និង ទូរស័ព្ទដៃបម្រើការ ចំនួន ៣៤ គ្រឿង។ ក្នុងនោះ ក្រុមការងារជំនាញការិយាល័យប្រឆាំងបទល្មើសបច្ចេកវិទ្យា បានសន្និដ្ឋានថាជាល្បែងស៊ីសងអនឡាញខុសច្បាប់ មិនពាក់ព័ន្ធការឆបោកតាមប្រព័ន្ធបច្ចេកវិទ្យា ទេ។

បច្ចុប្បន្ន ជនបរទេសទាំង ៦ នាក់ និង សម្ភារៈ ត្រូវបានបញ្ជូនទៅអធិការដ្ឋាននគរបាលខណ្ឌ ៧ មករា ដើម្បីកសាងសំណុំរឿងបញ្ជូនទៅអយ្យការសាលាដំបូងអនុវត្តតាមនីតិវិធីច្បាប់៕
អត្ថបទ ៖ សុភា

The post ឃាត់ខ្លួនជនបរទេស ៦ នាក់ ពាក់ព័ន្ធល្បែងស៊ីសងខុសច្បាប់តាមអនឡាញ នៅខណ្ឌ ៧ មករា appeared first on Kampuchea Thmey Daily.

ក្នុងកិច្ចប្រជុំនោះ លោក ថេង សុថុល បានធ្វើការវាយតម្លៃលទ្ធផលការងារកន្លងមក ព្រមទាំងដាក់ចេញនូវទិសដៅការងារបន្ថែម ដោយផ្តោតសំខាន់លើការរឹតបន្តឹងវិធានការត្រួតពិនិត្យ ការស្រាវជ្រាវ និងការបង្ការ ទប់ស្កាត់សកម្មភាពបទល្មើសអនឡាញស្គេមឱ្យកាន់តែមានប្រសិទ្ធភាពនៅទូទាំងមូលដ្ឋានខណ្ឌ។

លោកបានបញ្ជាក់ថា ក្រោយពីមានការបង្ក្រាបជាបន្តបន្ទាប់ ក្រុមជនសង្ស័យបានផ្លាស់ប្តូររបៀបប្រតិបត្តិការ ដោយបំបែកការប្រមូលផ្តុំធំៗដែលធ្លាប់មានមនុស្សច្រើន ទៅជាការស្នាក់នៅ និងប្រមូលផ្តុំជាក្រុមតូចៗ ចាប់ពី៣នាក់ ទៅ៥នាក់ ឬក្រោម ១០នាក់ ក្នុងទីតាំងផ្សេងៗ ដើម្បីគេចវេះពីការត្រួតពិនិត្យរបស់សមត្ថកិច្ច។

ជាមួយគ្នានេះ លោកអភិបាលខណ្ឌបានណែនាំដល់អាជ្ញាធរមូលដ្ឋានគ្រប់សង្កាត់ និងកម្លាំងពាក់ព័ន្ធ ត្រូវបង្កើនការយកចិត្តទុកដាក់លើការត្រួតពិនិត្យទីតាំងស្នាក់នៅ ជាពិសេសផ្ទះជួល បន្ទប់ជួល អគារស្នាក់នៅ និងទីតាំងដែលមានការស្នាក់នៅជាក្រុម ដើម្បីស្វែងរកព័ត៌មាន និងទប់ស្កាត់សកម្មភាពល្មើសច្បាប់ឱ្យបានទាន់ពេលវេលា។

លោក ណុប ផា អភិបាលរងខណ្ឌនៃគណៈអភិបាលខណ្ឌ៧មករា

ក្នុងឱកាសនោះដែរ លោក ណុប ផា អភិបាលរងខណ្ឌ និងជាអ្នកទទួលបន្ទុកការងារនេះ បានឡើងធ្វើរបាយការណ៍អំពីវឌ្ឍនភាពនៃការអនុវត្តវិធានការបង្ក្រាប បទល្មើសអនឡាញស្គេមក្នុងមូលដ្ឋានខណ្ឌ។ លោកបានបង្ហាញពីលទ្ធផលនៃការចុះត្រួតពិនិត្យ ការស្រាវជ្រាវ និងការបង្ក្រាបករណីពាក់ព័ន្ធដែលសម្រេចបានក្នុងរយៈពេលកន្លងមក ព្រមទាំងលើកឡើងពីបញ្ហាប្រឈម និងវិធានការបន្តសម្រាប់អនុវត្តនៅពេលខាងមុខ។

អភិបាលរងខណ្ឌរូបនេះ ក៏បានជំរុញឱ្យបន្តផ្សព្វផ្សាយគោលនយោបាយ និងវិធានការរបស់រាជរដ្ឋាភិបាល ពាក់ព័ន្ធនឹងការទប់ស្កាត់ និងបង្ក្រាបបទល្មើសអនឡាញស្គេម ដើម្បីបង្កើនការយល់ដឹងរបស់ប្រជាពលរដ្ឋ និងលើកទឹកចិត្តឱ្យមានការចូលរួមផ្តល់ព័ត៌មានដល់អាជ្ញាធរ នៅពេលសង្កេតឃើញសកម្មភាពគួរឱ្យសង្ស័យ។

ជាមួយគ្នានេះ អង្គប្រជុំក៏បានស្នើឱ្យមានការបន្តត្រួតពិនិត្យអគារខ្ពស់ៗ និង ទីតាំងដែលអាចប្រើប្រាស់ជាកន្លែងប្រមូលផ្តុំ ដោយសារ ទីតាំងទាំងនេះអាចត្រូវបានក្រុមជនសង្ស័យយកទៅប្រើប្រាស់សម្រាប់ធ្វើសកម្មភាពខុសច្បាប់៕ អត្ថបទ៖សំណាង

The post រដ្ឋបាលខណ្ឌ៧មករា បន្តរឹតបន្តឹងការបង្ក្រាបបទល្មើសOnline scam ខណៈក្រុមជនសង្ស័យបំបែកខ្លួនមកសម្ងំតាមបន្ទប់ជួល appeared first on Kampuchea Thmey Daily.

ការលើកឡើងបែបនេះក្នុងពិធីប្រកាសសមាសភាពសាខាសមាគមអតីតយុទ្ធជន និង និវត្តជនកម្ពុជា ប្រចាំសង្កាត់ទាំង ៨ ក្នុងមូលដ្ឋានខណ្ឌ ៧ មករា កាលពីរសៀលថ្ងៃទី ២ ខែមិថុនា ឆ្នាំ ២០២៦។ ពិធីនេះបានប្រព្រឹត្តទៅនៅសាលប្រជុំវិទ្យាល័យបាក់ទូក ក្រោមអធិបតីភាពរបស់លោក ថេង សុថុល អភិបាល នៃគណៈអភិបាលខណ្ឌ ៧ មករា ដោយមានការចូលរួមពីថ្នាក់ដឹកនាំ មន្ត្រីរាជការ អាជ្ញាធរមូលដ្ឋាន តំណាងស្ថាប័នពាក់ព័ន្ធ និង សមាជិកសមាគមអតីតយុទ្ធជន និង និវត្តជនជាច្រើនរូប។

នាឱកាសនោះ លោក ថេង សុថុល បាននាំយកនូវការផ្តាំផ្ញើសួរសុខទុក្ខ និង ការនឹករឭកដ៏ជ្រាលជ្រៅពីសំណាក់ សម្តេចតេជោ ហ៊ុន សែន ជាប្រធានសមាគមអតីតយុទ្ធជនកម្ពុជា ជូនចំពោះអតីតយុទ្ធជន និវត្តជន ជនភៀសសឹក និង ក្រុមគ្រួសារទាំងអស់ ដោយ សម្តេច តែងតែគិតគូរ និង យកចិត្តទុកដាក់ខ្ពស់ចំពោះសុខទុក្ខ ជីវភាពរស់នៅ និង សុខុមាលភាពរបស់ពួកគាត់ ដែលបានលះបង់កម្លាំងកាយចិត្ត និង ស្នាដៃដ៏ឧត្តុង្គឧត្តមក្នុងបុព្វហេតុបម្រើជាតិមាតុភូមិកន្លងមក។

លោកអភិបាលខណ្ឌ បានគូសបញ្ជាក់ថា ការយកចិត្តទុកដាក់ចំពោះអតីតយុទ្ធជន និង និវត្តជន មិនមែនត្រឹមតែជាការដឹងគុណប៉ុណ្ណោះទេ ប៉ុន្តែជាការបន្តថែរក្សាមរតកស្មារតីស្នេហាជាតិ ការលះបង់ និង វីរភាព ដែលជាគំរូដ៏ល្អសម្រាប់យុវជនជំនាន់ក្រោយក្នុងការចូលរួមអភិវឌ្ឍន៍ និង ការពារប្រទេសជាតិឲ្យកាន់តែរីកចម្រើន។

លោក ថេង សុថុល បានលើកឡើងបន្ថែមថា ក្រៅពីការយកចិត្តទុកដាក់ចំពោះអតីតយុទ្ធជន និង និវត្តជន យើងទាំងអស់គ្នា ក៏ត្រូវមានស្មារតីដឹងគុណចំពោះវីរកងទ័ព វីរនគរបាល និង ជនភៀសសឹក ដែលបានរួមចំណែកយ៉ាងសកម្មក្នុងការការពារសុខសន្តិភាព ស្ថិរភាពនយោបាយ និង ការអភិវឌ្ឍប្រទេសជាតិឲ្យមានការរីកចម្រើនដូចសព្វថ្ងៃ។

ជាមួយគ្នានេះ លោកអភិបាលខណ្ឌ ក៏បានសម្តែងនូវការកោតសរសើរចំពោះថ្នាក់ដឹកនាំ និង សមាជិកសមាគមអតីតយុទ្ធជន និង និវត្តជនកម្ពុជាទាំងអស់ ដែលបានខិតខំបំពេញតួនាទី និង ភារកិច្ចរបស់ខ្លួន ក្នុងការថែរក្សាសាមគ្គីភាព ផ្តល់ការគាំទ្រគ្នាទៅវិញទៅមក និង ចូលរួមសកម្មភាពសង្គមនានានៅមូលដ្ឋាន៕
អត្ថបទ ៖ សំណាង

The post អភិបាលខណ្ឌ ៧ មករា ៖ «ការដឹងគុណអតីតយុទ្ធជន និង និវត្តជន ជាកាតព្វកិច្ចរបស់យើងទាំងអស់គ្នា ព្រោះពួកគាត់បានលះបង់យ៉ាងធំធេងសម្រាប់ជាតិមាតុភូមិ» appeared first on Kampuchea Thmey Daily.

នៅថ្ងៃទី ២៨ ខែឧសភា ឆ្នាំ ២០២៦ នេះ លោក ថេង សុថុល អភិបាលខណ្ឌ ៧ មករា បានដឹកនាំមន្រ្តីជំនាញពាក់ព័ន្ធ និង ក្រុមការងារបច្ចេកទេសទទួលសាងសង់ ជួសជុលផ្លាស់ប្ដូរការ៉ូឡាថ្មី នៅជុំវិញបរិវេណផ្សារ​អូរឬស្សី ដើម្បីត្រួតពិនិត្យលក្ខណៈបច្ចេកទេសស្ដង់ដារត្រឹមត្រូវ និង ជួយពន្លឿនការងារឲ្យឆាប់រួចរាល់ផងដែរ។

លោក ថេង សុថុល បានឲ្យដឹងថា លោកបានដឹកនាំមន្រ្តីពាក់ព័ន្ធ រួមជាមួយគណៈកម្មការផ្សារអូរឬស្សី ចុះត្រួតពិនិត្យដំណើរការជួសជុល ការ៉ូឡា ដើម្បីឲ្យត្រូវលក្ខណៈបច្ចេកទេសតាមស្តង់ដារកំណត់។

លោកបន្តថា ដោយឃើញការ៉ូឡាជុំវិញបរិវេណផ្សារមានសភាពចាស់ ទើបលោកចាត់ឲ្យគណៈកម្មការផ្សារពន្លឿនការងារនេះឲ្យបានឆាប់រហ័ស ងាយស្រួលដល់អាជីវករប្រកបអាជីវកម្ម និង ភ្ញៀវមកផ្សារ ដើរថ្មើរជើង មិនឲ្យជួបការលំបាកបន្តទៀត។

ក្នុងនាមអាជ្ញាធរខណ្ឌ លោក ថេង សុថុល សូមការអធ្យាស្រ័យ និង យោគយល់ ពីប្រជាពលរដ្ឋ ចំពោះដំណើរការជួសជុលដាក់ការ៉ូឡាថ្មីជុំវិញបរិវេណផ្សារអូរឬស្សី ដែលអាច បង្កការរំខានទៅដល់ការប្រកបអាជីវកម្ម និង ស្ទះចរាចរណ៍ ផងដែរ៕
អត្ថបទ ៖ រដ្ឋា

The post អាជ្ញាធរខណ្ឌ ៧ មករា ចុះត្រួតពិនិត្យលក្ខណៈបច្ចេកទេស និង ពន្លឿនដំណើរការជួសជុលការ៉ូឡា ជុំវិញបរិវេណផ្សារអូរឬស្សី appeared first on Kampuchea Thmey Daily.