មន្ទីរ​សាធារណការ​និង​ដឹកជញ្ចូន​ខេត្ត​ពោធិ៍សាត់​បាន​បញ្ជាក់​ថា ដោយសារ​ស្ថានភាព​អាកាសធាតុ​មាន​ភ្លៀង​ធ្លាក់​ជាបន្តបន្ទាប់ និង​មាន​ទឹកហូរ​ខ្លាំង បាន​បណ្តាល​ឱ្យ​ផ្លូវវាង​ក្រាល​ដី​ល្បាយ​ថ្ម​ឆ្លង​កាត់​ស្ទឹង​មេទឹកត្រង់គីឡូម៉ែត្រលេខ ១៧១+​៦៩៧ ស្ថិតក្នុងឃុំថ្មដា ស្រុកវាលវែង ខេត្ត​ពោធិ៍សាត់ ចាប់ផ្តើម​ហូរច្រោះបាក់ស្រុត និងលែងធ្វើចរាចរណ៍បាន។

ខណៈ​ដែល​ការងារជួសជុលពង្រឹងស្ពានដែកបេឡេតិ៍ ដែលអនុវត្តដោយមន្ទីរសាធារណការ និង​ដឹកជញ្ជូន​ខេត្តពោធិ៍សាត់ ក៏បានបញ្ចប់ការងាររួចរាល់ និង​ដើម្បីធានាសុវត្ថិភាពជូនសាធារណជន និង​បង្ការ​ហានិភ័យដែលអាចកើតមានជាយថា​ហេតុ មន្ទីរសាធារណការ និងដឹកជញ្ជូនខេត្ត​ពោធិ៍សាត់ បាន​ជូនដំណឹង​ពីការបញ្ឈប់​ការអនុញ្ញាតិ​ឲ្យ​​​ធ្វើចរាចរណ៍​លើផ្លូវវាង​ក្រាល​​ដី​ល្បាយ​ថ្ម​ឆ្លង​កាត់​ស្ទឹង​មេ​ទឹក​ និង​បើក​ឱ្យ​ធ្វើចរាចរណ៍​លើស្ពានដែក​បេឡេតិ៍ជំនួសវិញ។

ទន្ទឹម​ការ​បើក​ឲ្យ​ដំណើរការ​ស្ពាន​បេឡត៍​ឆ្លង​កាត់​ស្ទឹង​មេទឹក អាជ្ញាធរ​ក្រើន​រំលឹក​ដល់​ប្រជាពលរដ្ឋនិង​អ្នក​បើកបរ​យានយន្តគ្រប់​ប្រភេទត្រូវ​បង្កើនការ​ប្រុងប្រយ័ត្ន និង​គោរពតាមច្បាប់ចរាចរណ៍ រួមទាំង​អនុវត្ត​តាម​ការ​ណែ​នាំរបស់សមត្ថកិច្ច និងអាជ្ញាធរ​មូលដ្ឋាន​ឱ្យ​បាន​ខ្ជាប់ខ្ជួន ដើម្បីធានាបាននូវសុវត្ថិភាព និង​សណ្តាប់​ធ្នាប់សម្រាប់​ការ​ធ្វើ​ដំណើរឆ្លងកាត់​៕

The post ស្ពាន​ដែក​បេឡេត៍​ឆ្លងស្ទឹង​មេទឹក​ តាម​ផ្លូវ​ជាតិ​លេខ ៥៥ ទៅ​ថ្មដា បើក​ឲ្យ​ប្រើប្រាស់​ជំនួស​ផ្លូវ​វៀង​ក្រាល​ល្បាយថ្ម appeared first on Kampuchea Thmey Daily.

ក្នុងការចុះពិនិត្យនេះ លោកអភិបាលខេត្តបានពិនិត្យឃើញថា សំណង់មួយចំនួន នៃស្ថានីយ៍ប្រេងឥន្ធនៈខាងលើ ពិតជាបានសាងសង់លយមកលើដីចំណីផ្លូវ ដែលបង្កឱ្យមានផលប៉ះពាល់ដល់សណ្តាប់ធ្នាប់សាធារណៈ សុវត្ថិភាពចរាចរណ៍ និងសោភណភាពក្រុងពិតប្រាកដមែន។ លោក ខូយ រីដា បានបញ្ជាក់យ៉ាងម៉ឺងម៉ាត់ថា រដ្ឋបាលខេត្តលើកទឹកចិត្តរាល់ការវិនិយោគ និងការរកស៊ីទទួលទានក្នុងខេត្ត ប៉ុន្តែរាល់ការសាងសង់ទាំងអស់ ត្រូវតែគោរពតាមច្បាប់ភូមិបាល និងច្បាប់សំណង់ជាដាច់ខាត។ យើងមិនអាចបណ្តោយឱ្យបុគ្គលណាម្នាក់ ឬ ក្រុមហ៊ុនណាមួយ មកសាងសង់រំលោភលើទ្រព្យសម្បត្តិរដ្ឋ ឬដីចំណីផ្លូវ ដែលជាប្រយោជន៍រួមរបស់ប្រជាពលរដ្ឋនោះឡើយ។

លោកបានបន្ថែមទៀតថា ការអនុវត្តច្បាប់ ម្ចាស់ការដ្ឋានត្រូវតែសហការជាមួយអាជ្ញាធរ ដើម្បីរុះរើផ្នែកដែលរំលោភបំពានចេញជាបន្ទាន់។ ប្រសិនបើមិនមានការកែសម្រួលតាមការណែនាំទេ រដ្ឋបាលខេត្តនឹងអនុវត្តវិធានការរដ្ឋបាល និងផ្អាកការសាងសង់ជាបណ្តោះអាសន្ន។ លោកបានដាស់តឿន សូមឱ្យអាជ្ញាធរមូលដ្ឋាន និងមន្ទីរជំនាញ ត្រូវតាមដានឱ្យបានដិតដល់ ចៀសវាងការសាងសង់ខុសបច្ចេកទេស ឬរំលោភច្បាប់មុននឹងឈានដល់ការបង្ក្រាប។

ជាមួយគ្នាផងដែរ លោកអភិបាលខេត្ត បានបង្គាប់ឱ្យក្រុមការងារបច្ចេកទេស ធ្វើការវាស់វែងសារជាថ្មី និងកំណត់ព្រំឱ្យបានច្បាស់លាស់ ដើម្បីឱ្យម្ចាស់ការដ្ឋានធ្វើការកែសម្រួលសំណង់របស់ខ្លួនឱ្យស្របតាមប្លង់ប្រព័ន្ធផ្លូវថ្នល់។ ចំពោះម្ចាស់ការដ្ឋានក៏បានទទួលស្គាល់កំហុសខ្វះខាត និងសន្យាអនុវត្តតាមការណែនាំរបស់រដ្ឋបាលខេត្ត ដើម្បីចូលរួមចំណែករក្សាសណ្តាប់ធ្នាប់ក្នុងក្រុងពោធិ៍សាត់យើងទាំងអស់គ្នា៕

The post អភិបាលខេត្តពោធិ៍សាត់ ដឹកនាំក្រុមការងារជំនាញចុះពិនិត្យការដ្ឋានស្ថានីយ៍ប្រេងឥន្ធនៈ តេលា សាងសង់រំលោភបំពានលើដីចំណីផ្លូវ appeared first on Kampuchea Thmey Daily.

សកម្មភាពនេះត្រូវបានរៀបចំឡើង ដើម្បីឆ្លើយតបទៅនឹងស្ថានភាពរដូវប្រាំង ដែលមានអាកាសធាតុក្តៅហួតហែងខ្លាំង ដែលអាចបណ្តាលឱ្យដើមឈើលម្អតាមទ្រូងផ្លូវក្រៀមស្វិត ឬងាប់ ប្រសិនបើខ្វះការថែទាំ និងការផ្គត់ផ្គង់ទឹកមិនបានគ្រប់គ្រាន់។

គួរជម្រាបជូនថា អត្ថប្រយោជន៍នៃការស្រោចស្រពទឹក ក្នុងដំណាក់កាលនេះ រួមមាន៖ ការសង្គ្រោះជីវិតដើមឈើ៖ ការផ្តល់សំណើមចំពេលដែលអាកាសធាតុក្តៅខ្លាំង ជួយឱ្យដើមឈើរក្សាបាននូវភាពស្រស់បំព្រង និងបន្តលូតលាស់បានល្អ បញ្ជៀសការខូចខាតទ្រព្យសម្បត្តិសាធារណៈ , ការកាត់បន្ថយកម្តៅ និងធូលី៖ ការស្រោចទឹកមិនត្រឹមតែជួយដើមឈើប៉ុណ្ណោះទេ ប៉ុន្តែថែមទាំងជួយកាត់បន្ថយកម្តៅហួតហែងលើដងផ្លូវ និងកាត់បន្ថយធូលីហុយ ដែលផ្តល់ផាសុកភាពដល់អ្នកធ្វើដំណើរ

ការរក្សាសោភ័ណភាពខេត្ត៖ ដើមឈើដែលរស់រវើកនៅតាមទ្រូងផ្លូវជាតិលេខ៥ គឺជាមុខមាត់របស់ខេត្តពោធិ៍សាត់ បង្ហាញពីការយកចិត្តទុកដាក់ខ្ពស់លើបរិស្ថានបៃតង និងការទទួលស្វាគមន៍យ៉ាងកក់ក្តៅដល់ភ្ញៀវទេសចរដែលឆ្លងកាត់។

ក្នុងឱកាសនោះដែរ លោក អភិបាលខេត្ត ក៏បានអំពាវនាវដល់ប្រជាពលរដ្ឋ ដែលមានលំនៅឋានតាមសងខាងផ្លូវ សូមចូលរួមជួយថែរក្សា និងស្រោចទឹកដើមឈើនៅមុខផ្ទះរៀងៗខ្លួនបន្ថែមទៀត ដើម្បីរួមគ្នាធ្វើឱ្យខេត្តពោធិ៍សាត់ ក្លាយជាខេត្តដែលមានបរិស្ថានស្អាត និងមានភាពទាក់ទាញគ្រប់រដូវកាល៕

The post អភិបាលខេត្តពោធិ៍សាត់ ដឹកនាំកម្លាំងអន្តរាគមន៍ស្រោចស្រពសង្គ្រោះដើមឈើលម្អទ្រូងផ្លូវតាមបណ្តោយផ្លូវជាតិលេខ៥ appeared first on Kampuchea Thmey Daily.

ថ្លែងក្នុងឱកាសចុះដល់ទីតាំងនីមួយៗ លោក ខូយ រីដា បានឱ្យដឹងថា ការចុះមកពិនិត្យដោយផ្ទាល់នៅថ្ងៃនេះ គឺដើម្បីឆ្លើយតបទៅនឹងក្តីកង្វល់ ដែលបប្រជាពលរដ្ឋបានលើកឡើងតាមរយៈរដ្ឋបាលឃុំ និងស្រុកជាច្រើនឆ្នាំមកហើយ។ ដាច់ខាតត្រូវតែស្តារបឹងនេះឡើងវិញ ដើម្បីជាប្រយោជន៍រួម។ ទោះជាយ៉ាងណា លោកបានណែនាំឱ្យរដ្ឋបាលស្រុក និងឃុំ ត្រូវសម្របសម្រួលដោះស្រាយជាមួយ ៣គ្រួសារដែលប៉ះពាល់នោះ ឱ្យបានច្បាស់លាស់ជាមុនសិន ដើម្បីឱ្យគម្រោងនេះដើរទៅមុខដោយរលូន និងមានតម្លាភាព។

លោក អភិបាលខេត្ត បានលើកឡើងថា ការស្តារបឹងអំពួច និងអូរដំណាក់កន្សែងឡើងវិញនៅពេលនេះ គឺជាដង្ហើមសេដ្ឋកិច្ចរបស់ប្រជាពលរដ្ឋក្នុងឃុំផ្ទះរុងទាំងមូល។ កាលណាប្រភពទឹកយើងជ្រៅ វានឹងក្លាយជាអាងស្តុកទឹកយុទ្ធសាស្ត្រ សម្រាប់ជួយឱ្យពលរដ្ឋមានទឹកប្រើប្រាស់គ្រប់គ្រាន់ ជាពិសេសនៅរដូវប្រាំង ដែលទឹកតែងតែខ្សត់ខ្សោយ, ជាជង្រុកត្រីធម្មជាតិ ដើម្បីរក្សាជម្រកត្រីមេពូជ, ជួយរំដោះទឹក និងកាត់បន្ថយការលិចលង់នៅរដូវវស្សាផងដែរ។ លោក ខូយ រីដា អភិបាលខេត្ត បានកោតសរសើរចំពោះស្មារតីសាមគ្គីភាព របស់ប្រជាពលរដ្ឋ ដែលចូលរួមបដិភាគថវិកា និងចេះសហការជាមួយអាជ្ញាធរ។

លោកក៏បានសូមសំណូមពរដល់ប្រជាពលរដ្ឋទាំងអស់ សូមមេត្តារក្សាអនាម័យបរិស្ថានឱ្យបានខ្ជាប់ខ្ជួន ចាប់ផ្តើមពីក្នុងផ្ទះ រហូតដល់តាមដងផ្លូវសាធារណៈ។ សូមកុំបោះចោលសម្រាមពាសវាលពាសកាល ដើម្បីសុខភាពយើងទាំងអស់គ្នា និងដើម្បីឱ្យខេត្តពោធិ៍សាត់របស់យើងកាន់តែមានភាពស្រស់បំព្រង។

តំណាងប្រជាពលរដ្ឋ បានសម្តែងនូវក្តីរំភើបរីករាយយ៉ាងខ្លាំង ក្រោយពីទទួលបានការសម្រេចដ៏ខ្ពង់ខ្ពស់ពីលោកអភិបាលខេត្ត ក្នុងការផ្តល់គ្រឿងចក្រចុះស្តារបឹង និងអូរ ដែលជាក្តីសង្ឃឹមយ៉ាងធំធេង របស់ប្រជាពលរដ្ឋនៅក្នុងឃុំផ្ទះរុងយើងខ្ញុំ។ នេះសបញ្ចាក់ឱ្យឃើញថា លោកអភោបាលខេត្តគឺជាមេបាក្នុងខេត្ត ដែលយល់ពីសុខទុក្ខ និងការលំបាករបស់រាស្ត្រពិតប្រាកដ។

គួរជម្រាបជូនថា សកម្មភាពចុះជួបពលរដ្ឋដោយផ្ទាល់នេះ បានបង្ហាញពីការយកចិត្តទុកដាក់របស់រដ្ឋបាលខេត្តពោធិ៍សាត់ ក្នុងការដោះស្រាយបញ្ហាជូនប្រជាពលរដ្ឋ «ធ្វើឱ្យបាន ធ្វើឱ្យលឿន និងធ្វើឱ្យមានប្រសិទ្ធភាព»៕

The post អភិបាលខេត្តពោធិ៍សាត់ អញ្ជើញដោះស្រាយកង្វល់ប្រជាពលរដ្ឋដល់មូលដ្ឋាន នៅឃុំផ្ទះរុង ស្រុកតាលោសែនជ័យ appeared first on Kampuchea Thmey Daily.

ផ្លូវជាតិលេខ ៥

១. ផ្លូវជាតិលេខ ៥ (NR5) ជាសរសៃឈាមសេដ្ឋកិច្ច​ដ៏សំខាន់បំផុតដែលឆ្លងកាត់ពាក់កណ្តាលខេត្តពោធិ៍សាត់។ ផ្លូវ​នេះ​តភ្ជាប់ពីភ្នំពេញទៅកាន់ខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ (ប៉ោយប៉ែត)។

ស្ថានភាព​កំណាត់​ផ្លូវជាតិ​នេះ​​បច្ចុប្បន្នត្រូវបានពង្រីកជា ៤ គន្លង ដែលជួយសម្រួលដល់ការដឹកជញ្ជូនទំនិញ និងការធ្វើដំណើរឱ្យកាន់តែរហ័ស។

ផ្លូវជាតិលេខ ៥៥

២. ផ្លូវជាតិលេខ ៥៥ (NR55) ត្រូវបានគេប្រសិទ្ធនាមថា «ផ្លូវបុប្ផាលាក់ខ្លួន» ឬ «ផ្លូវបត់បែនដូចអន្ទង់» ដែល​តភ្ជាប់ពីទីរួមខេត្តពោធិ៍សាត់ ឆ្ពោះទៅកាន់ស្រុកវាលវែង និងច្រកព្រំដែនថ្មដា (ព្រំដែនកម្ពុជា-ថៃ)។

លក្ខណៈពិសេសជាផ្លូវទេសចរណ៍ដ៏ទាក់ទាញបំផុត ដោយសារវាឆ្លងកាត់ជួរភ្នំក្រវាញនិងមានទេសភាពស្រស់​ស្អាតខ្លាំង។

ផ្លូវជាតិលេខ ១០

៣. ផ្លូវជាតិលេខ ១០ (NR10) ជាផ្លូវយុទ្ធសាស្ត្រថ្មីដែលតភ្ជាប់តំបន់ភ្នំនៃខេត្តចំនួន ៣ ដែល​តភ្ជាប់ពីស្រុកសំឡូត (បាត់ដំបង) ឆ្លងកាត់ស្រុកវាលវែង (ពោធិ៍សាត់) រហូតដល់ខេត្តកោះកុង។

សារៈសំខាន់នៃ​កំណាត់​ផ្លូវនេះ​ ជួយសម្រួលដល់ការដឹកជញ្ជូនកសិផលពីតំបន់ភ្នំទៅកាន់កំពង់ផែសមុទ្រ ដោយមិនបាច់ឆ្លងកាត់ផ្លូវជាតិលេខ ៥។

ក្រៅពី​ផ្លូវ​ជាតិ​សំខាន់ៗទាំង ៣ ខ្សែ ខេត្ត​ពោធិ៍សាត់​ក៏មាន​បណ្តាញ​ហេដ្ឋារចនាសម្ព័ន្ធ​ផ្លូវ​ជាច្រើន​ខ្សែ​ទៀត​មាន​ផ្លូវលេខ ១៥៥ (PR155) តភ្ជាប់ពីផ្លូវជាតិលេខ ៥ ត្រង់ចំណុចបាក់ចិញ្ចៀន ឆ្ពោះទៅកាន់ស្រុកភ្នំក្រវាញ និង​ផ្លូវខេត្តលេខ ១៥៤ (PR154) តភ្ជាប់ពីទីរួមខេត្ត ទៅកាន់តំបន់កសិកម្ម និងតំបន់ជនបទក្នុងខេត្ត៕

The post ផ្លូវជាតិ​សំខាន់ៗ​​ចំនួន ៣ ខ្សែ​ ឆ្លង​កាត់តភ្ជាប់គ្នា​ប្រទាក់ក្រឡា​ប្រព័ន្ធ​ដឹកជញ្ជូន​ក្នុង​ខេត្តពោធិ៍សាត់​ appeared first on Kampuchea Thmey Daily.

​អនុវត្តតាមបទបញ្ជាដ៏ខ្ពង់ខ្ពស់របស់ លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ទោ ស ថេង ស្នងការនគរបាលខេត្តពោធិ៍សាត់ កម្លាំងជំនាញនៃអធិការដ្ឋាននគរបាលក្រុងពោធិ៍សាត់ បានបើកប្រតិបត្តិការបង្ក្រាបករណីជួញដូរគ្រឿងញៀនជាបន្តបន្ទាប់ក្រោមការដឹកនាំផ្ទាល់ដោយលោកវរសេនីយ៍ឯក កែវ សារិ អធិការនគរបាលក្រុងពោធិ៍សាត់ និងមានការសម្របសម្រួលពីព្រះរាជអាជ្ញាអមសាលាដំបូងខេត្ត កម្លាំងចម្រុះបានចុះបង្ក្រាបចំនួន ៣គោលដៅផ្សេងគ្នា កាលពីថ្ងៃទី១៣ ខែមីនា ឆ្នាំ២០២៦។

​​គោលដៅទី១ ភូមិស្ពានថ្ម សង្កាត់រលាប ឃាត់ខ្លួនជនសង្ស័យឈ្មោះ ហម ផារិទ្ធ អាយុ ៤៦ឆ្នាំ។ ដកហូតបានថ្នាំញៀន ១កញ្ចប់ (៣.៤១ក្រាម) និងទូរសព្ទ ១គ្រឿង។ តាមចម្លើយសារភាពជនសង្ស័យ ជននេះបានទិញថ្នាំញៀនពីឈ្មោះ តុ និងឈ្មោះ ញ្ញា។ គោលដៅទី២ នៅភូមិមាន់ចែ សង្កាត់ព្រៃញី ឃាត់ខ្លួនជនសង្ស័យឈ្មោះ បុទ្ធិ ទិត្យបញ្ញា (ហៅញ្ញា) អាយុ ៣៩ឆ្នាំ។ ដកហូតបានថ្នាំញៀន ១កញ្ចប់, ទូរសព្ទ ១គ្រឿង និងម៉ូតូ Scoopy ១គ្រឿង។ គោលដៅទី៣ នៅភូមិក្បាលហុង សង្កាត់បន្ទាយដី ឃាត់ខ្លួនជនសង្ស័យឈ្មោះ បុទ្ធិ ស័ក្កសេនា (ហៅតុ) អាយុ ៣៧ឆ្នាំ។ ក្នុងប្រតិបត្តិការនេះ សមត្ថកិច្ចដកហូតបានថ្នាំញៀនចំនួន ៨កញ្ចប់ធំ ដែលមានទម្ងន់សរុបដល់ទៅ ១,១៥៥.៦០ ក្រាម (ជាង ១គីឡូក្រាម) រួមជាមួយជញ្ជីងថ្លឹង និងឧបករណ៍សេពមួយចំនួនទៀត។

វត្ថុតាងសរុបដែលដកហូតបានរួមមាន ​ម្សៅក្រាមសថ្លាសង្ស័យជាសារធាតុញៀនសរុបជាង ១.១៥ គីឡូក្រាម។ ​ទូរសព្ទ ដៃ៣គ្រឿង និងម៉ូតូ ១គ្រឿង ជញ្ជីងថ្លឹងថ្នាំញៀន និងឧបករណ៍ប្រើប្រាស់។ ជនសង្ស័យទាំង ៣នាក់ សុទ្ធតែមានលទ្ធ ផលតេស្តទឹកនោម វិជ្ជមាន (+)។ តាមការសាកសួរ ជនសង្ស័យបានឆ្លើយសារភាពថា ថ្នាំញៀនទាំងនេះជារបស់ខ្លួន និងបក្សពួកម្នាក់ទៀតឈ្មោះ អែម កុសល់ (ដែលកំពុងរត់គេចខ្លួន)។

បច្ចុប្បន្ន ជនសង្ស័យ និងវត្ថុតាង ត្រូវបានឃាត់ខ្លួននៅអធិការដ្ឋាននគរបាលក្រុងពោធិ៍សាត់ ដើម្បីកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធីច្បាប់ ខណៈសមត្ថកិច្ចកំពុងបន្តស្រាវជ្រាវតាមចាប់ខ្លួនបក្សពួកដែលនៅសេសសល់៕

The post សមត្ថកិច្ចក្រុងពោធិ៍សាត់ បញ្ជូនជនសង្ស័យ០៣នាក់ទៅកាន់តុលាការពាក់ព័ន្ធករណីជួញដូរគ្រឿងញៀនជាង ១ គីឡូ appeared first on Kampuchea Thmey Daily.

ក្នុង​របាយការណ៍​របស់​រដ្ឋបាល​ខេត្ត​បាន​បង្ហាញ​ថា ក្រុមហ៊ុន​ចំនួន ៣ ដែល​ទទួល​បាន​ដី​សម្បទាន​សេដ្ឋកិច្ច​វិនិយោគ​ដាំ​ដុះ​ដំណាំ​កសិ​ឧស្សាហកម្មក្នុងនោះមាន​ ក្រុមហ៊ុន​ភាពីម៉ិច​ចំនួន ១៤ ៧២១ ហិកតា ក្រុមហ៊ុន MDS ចំនួន ៤ ៣៣៨ ហិកតា និងក្រុមហ៊ុនរតនាវិសាលចំនួន ១ ៦៣៦,៥១ ហិកតា។

ក្នុងឆ្នាំ ២០២៥ ក្រុមហ៊ុនឈូសឆាយបានសរុបចំនួន ១៣.៩៩៧ហ.ត និងដាំដុះសរុបបាន ១២.២៩០​ហ.ត ក្នុងនោះ៖ ក្រុមហ៊ុនអភិវឌ្ឍន៍ រតនា វិសាល ឈូសឆាយបាន ៩៣០ ហ.ត ដាំដុះ​បាន ៨៦០ហ.ត រួមមាន ដំឡូងមី ចំនួន ៤៦៦ ហិកតា ស្វាយកែវរមៀតចំនួន ៤០ ហិកតា ស្វាយ​ចន្ទី​ចំនួន ៤ ហិកតា និងស្រូវចំនួន ៣៥០ ហិកតា។

ក្រុមហ៊ុន ភាពីមិច ឈូសឆាយបាន ៩.៨៥០ ហិកតា ដាំដុះបាន ៨.៤៣០ ហិកតា (ដំឡូងមី) និង​ក្រុមហ៊ុន អឹម ឌី អេសនីហរ័ណ អាហរ័ណ MDS Import Export Co. Ltd ឈូសឆាយបាន ៣.២១៧ ហិកតា ដាំដុះ​បាន ៣.០០០ ហិកតា (កៅស៊ូ)។

ពាក់ព័ន្ធដំណាំស្រូវជា​ដំណាំ​ដ៏មាន​សក្តានុពល ខេត្ត​ជាប់បឹងទន្លេសាបនេះ​មាន​ផ្ទៃដីដាំដុះស្រូវសរុបចំនួន ២២៩.​៩៥២ ហ.ត (ស្រូវប្រាំង ៦២.៩០៥ហ.ត និងស្រូវវស្សា ១៦៧.០៤៧ហ.ត) ដែលទទួលបានបរិមាណ​ផល​ស្រូវសរុប ៩៣៨.៨៩៨ តោន (ស្រូវប្រាំង ២៦៦.៨៥៧តោន និងស្រូវវស្សា ៦៧២.០៤២តោន)។

ខេត្ត​មាន​រោងម៉ាស៊ីន​កិនស្រូវ​សរុប​ចំនួន​ ២២ ​រោង​ម៉ាស៊ីន ក្នុង​នោះ​ខ្នាត​ធំ​ចំនួន ០២ (សមត្ថភាព​កិនស្រូវ ១.០០០ តោនក្នុង ១ ថ្ងៃ សមត្ថភាព​ស្តុក​ស្រូវ-អង្ករ ២.៥០០-៥.០០០តោន/រោង និង​សមត្ថភាព​ទិញ​ស្រូវ ២៨.០០០-៤០.០០០ តោនក្នុង១ឆ្នាំ)។

រោង​ម៉ាស៊ីន​ខ្នាតមធ្យមចំនួន ០៧ (សមត្ថភាពកិនស្រូវ ១៥-៣០តោនក្នុង ១ ថ្ងៃ សមត្ថភាព​ស្តុកស្រូវ-អង្ករ ១០០-១.០០០ តោន/រោង និង​សមត្ថភាពទិញស្រូវ ១០០-៣.០០០ តោនក្នុង ១ ឆ្នាំ)​និង​ខ្នាត​តូច​ចំនួន ១៣ (សមត្ថភាពកិនស្រូវ ៥-៨ តោនក្នុង ១ ថ្ងៃ សមត្ថភាពស្តុកស្រូវ-អង្ករ ១២-១.០០០​តោន/​រោង និងសមត្ថភាពទិញស្រូវ ១០-២.០០០ តោនក្នុង ១ ឆ្នាំ)។

បន្ថែមពីនេះ​ក្នុង​ខេត្ត​ក៏មាន​រោងចក្រ​ដំឡូងមី​ចំនួន ១ ដែលមានសមត្ថភាពកិន ១ ថ្ងៃបាន ៣៣៣​តោន និង​ឃ្លាំងស្តុក​បាន ៦០០ តោន៕

The post ខេត្ត​ពោធិ៍សាត់មាន​ក្រុមហ៊ុន​​ចំនួន ៣ ទទួល​​បាន​​​ដី​​សម្បទានសេដ្ឋកិច្ច​​វិនិយោគ​ដាំដុះ​ដំណាំ​កសិ​ឧស្សាហកម្ម​លើ​ផ្ទៃដី​ជាង ២ ម៉ឺន​ហិក​តា​ appeared first on Kampuchea Thmey Daily.

វារីអគ្គិសនីស្ទឹងពោធិ៍សាត់១ ស្ថិតនៅភូមិស្ទឹងថ្មី ឃុំប្រម៉ោយ ស្រុក​វាលវែង​ដែល​មាន​អនុភាព ៨០ មេហ្គាវ៉ាត់ កំពុង​សាងសង់​សម្រេច​បាន​ប្រហែល ៦៧% ហើយ​គ្រោង​ដាក់ឱ្យដំណើរការ​នៅ​ចុង​ឆ្នាំ២០២៦។

ដោយឡែក​វារីអគ្គិសនី​ស្ទឹង​មេទឹក ដែល​មានអនុភាព ១៥០ មេហ្គាវ៉ាត់ វិនិយោគដោយក្រុមហ៊ុន Steung Meteuk Hydropower ក៏​គ្រោង​ដាក់ឱ្យដំណើរការ​នៅ​ចុង​ឆ្នាំ២០២៦ ខណៈ​វឌ្ឍនភាព​​មក​ដល់​ពេលនេះ​សាងសង់​សម្រេច​បាន​ប្រមាណ ៧០%។

ក្រៅ​ពី​វារីអគ្គិសនី​កំពុង​សាងសង់ ខេត្ត​ពោធិ៍សាត់​ក៏​បាន​ដាក់​ឲ្យ​ដំណើរការ​​វារីអគ្គិសនី​អាតៃស្ថិតនៅភូមិ​ឆាយលូក ឃុំអូរសោម ស្រុកវាលវែង ដែល​មានអនុភាព ១២០ មេហ្គាវ៉ាត់ ​កាលពីឆ្នាំ២០១៤ ។

ពាក់ព័ន្ធប្រភពថាមពលអគ្គិសនី​​ ខេត្ត​ពោធិ៍សាត់​ក៏​មាន​ស្ថានីយ​ផលិតអគ្គិសនី ដើរដោយ​ថាមពល​ពន្លឺព្រះអាទិត្យ​ចំនួន ០២ ដែលបានកំពុងដាក់​ឲ្យ​​ដំណើរការ​នៅ ភូមិអន្សក្តាម ឃុំស្នាអន្សា ស្រុកក្រគរ របស់​​ក្រុមហ៊ុនស្ទើរថេក សាប់ស្ទែន​ណេបិល និង​ក្រុមហ៊ុនស្នេថេក​អ៊ុនហ្វីនីត ដែល​មាន​អនុភាព ៩០ មេហ្គាវ៉ាត់ និង​ក្រុមហ៊ុន​ស្នើថេក ប៊ីយ៉ន ដែលមានអនុភាព​ ១៥០​ មេហ្គាវ៉ាត់។

ជាមួយគ្នា​នេះ​ខេត្ត​ពោធិ៍សាត់​​ក៏​មាន​អនុស្ថានីយ​ចំនួន ៥ ដែល​អាច​ផ្គត់ផ្គង់អគ្គិសនីប្រកប​ស្ថិរភាពរួមមាន៖

-អនុស្ថានីយ​អូរសោម (GS22)៖ ស្ថិតនៅភូមិ​ឆាយលូក ឃុំអូរសោម ស្រុកវាលវែង
-អនុស្ថានីយពោធិ៍សាត់ (GS21)៖ ស្ថិតនៅភូមិអូរថ្កូវ សង្កាត់រលាប ក្រុងពោធិ៍សាត់
-អនុស្ថានីយស្វាយស (GS45)៖ ស្ថិតនៅភូមិកំរ៉ែង ឃុំស្វាយស ស្រុកក្រគរ
-អនុស្ថានីយស្នាអន្សា (GS49)៖ ស្ថិតនៅភូមិអន្សរក្តាម ឃុំស្នាអន្សា ស្រុកក្រគរ
-អនុស្ថានីយក្រគរ (GS73)៖ ស្ថិតនៅភូមិអន្សរក្តាម ឃុំស្នាអន្សា ស្រុកក្រគរ

The post ​វារីអគ្គិសនី​ចំនួន ២ កំពុង​សាងសង់ក្នុង​ខេត្តពោធិ៍សាត់​ គ្រោង​​ដាក់​​ឲ្យ​ដំណើរការ​នៅ​ចុង​ឆ្នាំ ២០២៦ appeared first on Kampuchea Thmey Daily.