គ្រោះមហន្តរាយ Archives - Kampuchea Thmey Daily

៤ខែដើមឆ្នាំនេះ ខ្យល់កន្ត្រាក់កើតឡើង១០០លើកបង្កឱ្យស្លាប់របួស៩នាក់និងបំផ្លាញផ្ទះជិត១៦០០ខ្នងថយចុះជាងឆ្នាំមុន

Ung Meng — Mon, 04 May 2026 11:09:00 +0000

ក្នុងរយៈពេល៤ខែឆ្នាំ២០២៦នេះ ខ្យល់កន្ត្រាក់បានកើតឡើង១០០លើក បណ្តាលឱ្យមនុស្សស្លាប់និងរងរបួស៩នាក់ និង បំផ្លាញផ្ទះសម្បែងជិត១៦០០ខ្នង បើធៀបនឹងរយៈពេល ៤ ខែដូចគ្នា ឆ្នាំ ២០២៥ កន្លងទៅឃើញថា មានការថយចុះគួរឱ្យកត់សម្គាល់។

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍នៅរសៀលថ្ងៃទី៥ឧសភានេះថា រយៈពេល៤ខែឆ្នាំ២០២៦នេះ ខ្យល់កន្ត្រាក់បានកើតឡើងចំនួន១០០លើកបណ្តាលឱ្យរលំផ្ទះចំនួន១៥៦ខ្នង របើកដំបូលផ្ទះចំនួន១៤៣៧ខ្នង សាលារៀន៣៧ខ្នងតូបផ្សារ៦តូប អគាររដ្ឋបាល៨កន្លែងស្លាប់១នាក់និងរបួស៨នាក់។ លោកបានបន្តថាតួលេខនេះបើធៀបទៅនឹង៤ខែឆ្នាំ២០២៥ឃើញថាមនាការថយចុះខណៈ៤ខែឆ្នាំមុនមានខ្យល់កន្ត្រាក់បានកើតឡើងចំនួន ១០៧ លើក បានបណ្តាលឱ្យរលំផ្ទះចំនួន ២៦៧ ខ្នង ផ្ទះរបើកដំបូលចំនួន ៣ ៦៩២ ខ្នង សាលារៀន ២៨ អគារតូបផ្សារ ១៤ តូបអគាររដ្ឋបាល ១២ កន្លែង ស្លាប់មនុស្ស ៤ នាក់ និងរងរបួស ១៥ នាក់។

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ

លោកបានបញ្ជាក់ថា ឆ្លើយតបនឹងស្ថានភាពនេះ គណៈកម្មាធិការគ្រោះមហន្តរាយ និងស្ថាប័នពាក់ព័ន្ធ បានត្រៀមខ្លួនរួចរាល់ជាស្រេច ក្នុងនោះបានធ្វើបច្ចុប្បន្នភាពផែនការត្រៀមបម្រុងឆ្លើយតបនឹងគ្រោះមហន្តរាយផ្សេងៗ ទាំងថ្នាក់ជាតិ និងក្រោមជាតិ និងជំរុញ និងពង្រឹងការផ្តល់ព័ត៌មានដល់អាជ្ញាធរ និងប្រជាពលរដ្ឋឱ្យបានដឹង ដើម្បីឱ្យពួកគាត់ត្រៀមខ្លួនការពារកាត់បន្ថយផលប៉ះពាល់ឱ្យបានច្រើនពេលមានគ្រោះមហន្តរាយផ្សេងៗ។ ក្រៅពីនេះ កងកម្លាំង ក៏បានរៀបចំរួចរាល់ហើយដែរ ដើម្បីត្រៀមខ្លួនជួយអន្តរាគមន៍ប្រជាពលរដ្ឋឱ្យបានទាន់ពេលវេលានៅពេលមានគ្រោះមហន្តរាយកើតឡើងនារដូវវស្សាខាងមុខនេះ។

លោកបានអំពាវនាវដល់អាជ្ញាធរគ្រប់លំដាប់ថ្នាក់ ត្រូវត្រៀមលក្ខណៈឱ្យបានគ្រប់គ្រាន់ដើម្បីជួយដល់ប្រជាពលរដ្ឋឱ្យបានទាន់ពេលវេលា។ ចំណែកប្រជាពលរដ្ឋ ក៏ត្រូវត្រៀមខ្លួនផងដែរ ដើម្បីធ្វើយ៉ាងណាកាត់បន្ថយផលប៉ះពាល់ឱ្យនៅអប្បបរមា៕ អត្ថបទ ៖ សំអឿន

The post ៤ខែដើមឆ្នាំនេះ ខ្យល់កន្ត្រាក់កើតឡើង១០០លើកបង្កឱ្យស្លាប់របួស៩នាក់និងបំផ្លាញផ្ទះជិត១៦០០ខ្នងថយចុះជាងឆ្នាំមុន appeared first on Kampuchea Thmey Daily.

លោក អានុទីន រងសម្ពាធគរដូចភ្នំ ដែលលំបាកស្តារប្រជាប្រិយភាពវិញ មុនការបោះឆ្នោត

Rann Reuy — Mon, 01 Dec 2025 09:45:52 +0000

សម្ពាធនយោបាយកើនឡើងកាន់តែខ្លាំងសម្រាប់នាយករដ្ឋមន្ត្រីថៃ លោក អានុទីន ឆានវីរៈគុល ដែលបានខិតខំប្រឹងប្រែងខ្នះខ្នែងចង់បានការកាន់អំណាចដើម្បីទទួលបានប្រជាប្រិយភាពមុនការបោះឆ្នោតដែលគ្រោងធ្វើនៅខែមេសាឆ្នាំ២០២៦ ខណៈការរំលាយសភាកាន់តែកៀកដើម្បីបើកផ្លូវឲ្យមានការបោះឆ្នោតឡើងវិញ។

លោក អានុទីន នាយករដ្ឋមន្ត្រីដែលរងសម្ពាធ។ Standard

សម្ពាធនយោបាយកើនឡើងចុងក្រោយនេះ ទំនងធ្វើឲ្យលោក អានុទីន បាត់បង់លទ្ធភាពស្តារប្រជាប្រិយភាពសម្រាប់ការបោះឆ្នោតសកលនៅក្នុងប្រទេសថៃនៅដើមឆ្នាំ២០២៦ ផ្អែកតាមកិច្ចព្រមព្រៀងដែលគណបក្សភូមិចៃថៃរបស់លោក បានធ្វើជាមួយគណបក្សប្រជាជន ដែលជាគណបក្សក្រៅរដ្ឋាភិបាលដ៏ធំបំផុតនោះ។

សម្ពាធកើនឡើងចំពោះលោក អានុទីន នាពេលចុងក្រោយនេះ គឺកើតចេញពីការចាត់ចែង គ្រប់គ្រងគ្រោះមហន្តរាយទឹកជំនន់មិនមានប្រសិទ្ធភាពនៅទីក្រុងហាតយ៉ៃនៃខេត្តសុងខ្លា និង ខេត្តមួយចំនួនទៀតនៅភាគខាងត្បូងប្រទេសថៃ ដែលបណ្តាលឲ្យមានមនុស្សស្លាប់រហូតដល់១៧០ត្រឹមថ្ងៃទី១ខែធ្នូ និងប្រជាជនជាង៣លាន

ការខ្វះខាតស្បៀងសម្រាប់ចែកជូនជនរងគ្រោះ។

អ្នកនយោបាយថៃនិងអ្នកមានឥទ្ធិពលក្នុងសង្គមថៃកាន់តែច្រើនឡើងៗ បានចេញសារជាបន្តបន្ទាប់ប្រតិកម្មបែបអវិជ្ជមានចំពោះការដឹកនាំរបស់នាយករដ្ឋមន្ត្រីថៃ លោក អានុទីន ឆានវីរៈគុល ដែលនៅសល់ពេលត្រឹមតែ២ខែទៀតប៉ុណ្ណោះ ដល់កាលកំណត់ដែលលោកសន្យារំលាយសភា។

នៅថ្ងៃទី១ខែធ្នូនេះ អគ្គលេខាធិការរងគណបក្សភឿថៃ Lin Thipphorn Warinwatchararoach ដែលធ្លាប់កាន់តែដំណែងជាអនុរដ្ឋមន្ត្រីក្រសួងអប់រំ បាននិយាយបរិហាររដ្ឋាភិបាលរបស់លោក អានុទីន ចំពោះការបន្ថែមនូវទុក្ខវេទនា ដោយដាក់ចំណាត់ថ្នាក់ ប្រភេទនៃការស្លាប់ និងការដាក់ចេញនីតិវិធីស្មុគស្មាញក្នុងការផ្តល់់សំណង។

អ្នកនយោបាយគណបក្សភឿថៃដែលទើបបាត់បង់ការកាន់អំណាចជាង២ខែកន្លងមកនេះ បានលើកឡើងថា នាងបានទទួលព័ត៌មានពីប្រជាជនក្នុងមូលដ្ឋានអំពីការបរាជ័យរបស់រដ្ឋាភិបាលអំឡុងពេលវិបត្តិ ហើយ នៅថ្ងៃនេះ រដ្ឋបាលរបស់លោក អានុទីន បន្តធ្វើការឈឺចាប់របស់ប្រជាជនកាន់តែអាក្រក់ជាថ្មីទៀត។

កាលពីថ្ងៃសុក្រសប្តាហ៍មុន អតីតសមាជិកគណៈកម្មាធិការរៀបចំការបោះឆ្នោត លោក ស៊ុមឆៃ ស្រ៊ីស៊ុតធីយ៉ាខន (Somchai Srisutthiyakorn) បានចេញមុខរិះគន់ នាយករដ្ឋមន្ត្រី អានុទីន ដោយចំហរ ដោយជំរុញឱ្យនាយករដ្ឋមន្ត្រីរូបនេះលាលែងពីតំណែង និងទទួលខុសត្រូវចំពោះការគ្រប់គ្រងស្ថានភាពទឹកជំនន់នៅភាគខាងត្បូងមិនត្រឹមត្រូវ។

តាមសេចក្តីរាយការណ៍នោះ លោក ស៊ុមឆៃ បានរិះគន់រដ្ឋាភិបាលរបស់លោក អានុទីន ចំពោះការផ្តល់អាទិភាពលើមុខមាត់នយោបាយ និងសំឡេងឆ្នោតលើការគ្រប់គ្រងទឹកជំនន់ឲ្យមានប្រសិទ្ធភាពចំពោះស្ថានភាពទឹកជំនន់ដ៏អាក្រក់បំផុត ដែលបានបង្កការលិចលង់ និងខូចខាតហេដ្ឋារចនាសម្ព័ន្ធយ៉ាងខ្លាំងនោះ។

ទឹកលិចនៅភាគខាងត្បូងថៃ។ FB

លោក ស៊ុមឆៃ បានបញ្ជាក់ថា ខណៈភ្លៀងធ្លាក់ខ្លាំងជាធម្មជាតិ ហើយទឹកជំនន់អាចកើតឡើងនោះ ការគ្រប់គ្រងប្រកបដោយប្រសិទ្ធភាព និងរហ័សដើម្បីសង្គ្រោះអាយុជីវិតមនុស្សគឺអាចសម្រេចបាន។ អាជ្ញាធរមូលដ្ឋានអាចនឹងវាយតម្លៃស្ថានភាពដែលមិននឹកស្មានដល់ ប៉ុន្តែពួកគេមានកម្រិតលើឧបករណ៍ និងកម្លាំងពលកម្ម។ ដូច្នេះ វាជាកាតព្វកិច្ចរបស់រដ្ឋាភិបាលកណ្តាលក្នុងការប្រមូលធនធាន និងសម្របសម្រួលជំនួយ។

អ្នកសារព័ត៌មានជើងចាស់ លោក Pravit Rojanaphruk នៃសារព័ត៌មាន Khaosod បានសរសេរបរិហារពីភាពបរាជ័យរបស់រដ្ឋាភិបាលរបស់លោក អានុទីន ដែលបរាជ័យក្នុងការប្រកាសផ្តល់ដំណឹងដល់ប្រជាជនដែលស្ថិតនៅតំបន់រងផលប៉ះពាល់។

អ្នកសារព័ត៌មានដ៏មានបទពិសោធន៍រូបនេះ បានលើកឡើងថា នាយករដ្ឋមន្រ្តី អានុទីន ឆានវីរៈគុល បានទទួលស្គាល់កំហុសរបស់ខ្លួន បន្ទាប់ពីមួយសប្តាហ៍នៃទឹកជំនន់ដ៏ធំបានលិចទីក្រុងហាតយ៉ៃភាគខាងត្បូង ដែលជាទីក្រុងធំជាងគេក្នុងតំបន់ និងជាគោលដៅទេសចរណ៍ដ៏សំខាន់ ហើយអ្វីដែលហាក់ដូចជាបរាជ័យជាប្រព័ន្ធក្នុងការព្រមានប្រជាជនឱ្យជម្លៀស និងដោះស្រាយទឹកជំនន់ដែលមានជម្រៅរហូតដល់៥ម៉ែត្រនៅក្នុងតំបន់ខ្លះ។

លោក បានលើកឡើងថា៖«រដ្ឋាភិបាលមានកំហុស ខ្ញុំទទួលស្គាល់ថា ពេលមនុស្សស្លាប់ មិនថានៅទីណា ពេលរបួស និងមិនអាចនៅផ្ទះបាន គឺធ្លាក់លើនាយករដ្ឋមន្ត្រី វាជាកំហុសរបស់នាយករដ្ឋមន្ត្រីទាំងអស់»។

ការទទួលស្គាល់កំហុសរបស់អានុទីនហាក់យឺតពេលពេកទៅហើយ ប៉ុន្តែនាយករដ្ឋមន្ត្រីដែលកំណត់ត្រឹម៤ខែនេះ នៅតែមិនអាចពន្យល់បានថា ហេតុអ្វីបានជារដ្ឋាភិបាល ទាំងថ្នាក់មូលដ្ឋាន និងថ្នាក់ជាតិ បរាជ័យយ៉ាងអណោចអធ័ម។

សម្រាប់មន្ត្រីគណបក្សភឿថៃ អ្នកស្រី Lin Thipphorn ភាពច្របូកច្របល់នៃការផ្តល់ព័ត៌មានបានកើតឡើងចាប់តាំងពីថ្ងៃទី២៦ខែវិច្ឆិកា ពេលដែលអ្នកនាំពាក្យរដ្ឋាភិបាល និងមជ្ឈមណ្ឌលបញ្ជាការគ្រោះមហន្តរាយជាតិ លោក Siriphong Angkasakulkiat បានប្រកាសថា អ្នកស្លាប់៨០ពីមន្ទីរពេទ្យហាតយ៉ៃមិនពាក់ព័ន្ធទឹកជំនន់ទេ។ ៣ថ្ងៃក្រោយមក គឺនៅថ្ងៃទី២៩ខែវិច្ឆិកា សាកសព១៣១នាក់។

ដោយការទើសចិត្តចំពោះការឆ្លើយតបរបស់រដ្ឋាភិបាលចំពោះស្ថានភាពគ្រោះមហន្តរាយ គណបក្សប្រជាជនដែលជាគណបក្សគាំទ្រលោកអានុទីនឲ្យកាន់កៅអីនាយករដ្ឋមន្ត្រី ក៏ធ្លាប់បានបញ្ចេញសារខ្លាំងៗរិះគន់លោក អានុទីនផងដែរ។

គិតត្រឹមថ្ងៃទី ២៩ខែវិច្ឆិកា ទឹកជំនន់នៅតែបន្តកើតមាននៅទូទាំងខេត្តចំនួន៩ ដែលប៉ះពាល់ដល់ប្រជាជនជាង ៣,១៧លាននាក់ និង ១,១៤លានគ្រួសារ នេះបើយោងតាមនាយកដ្ឋានបង្ការ និងកាត់បន្ថយគ្រោះមហន្តរាយ។ យ៉ាងហោចណាស់មនុស្សជាង១៦០ នាក់បានស្លាប់ ប៉ុន្តែតួលេខស្លាប់ត្រូវបានគេជឿថា មានចំនួនខ្ពស់ជាងនេះបន្ថែមទៀត៕

រ៉ាន់ រើយ

The post លោក អានុទីន រងសម្ពាធគរដូចភ្នំ ដែលលំបាកស្តារប្រជាប្រិយភាពវិញ មុនការបោះឆ្នោត appeared first on Kampuchea Thmey Daily.

សម្តេចធិបតី ណែនាំគ្រប់ក្រសួង-ស្ថាប័ន ត្រូវចាត់ទុកគ្រោះមហន្តរាយជាការងារស្នូល និងពង្រឹងការជួយជនរងគ្រោះ

Samean Lay — Mon, 13 Oct 2025 03:09:59 +0000

នាយករដ្ឋមន្រ្តី សម្តេចធិបតី ហ៊ុន ម៉ាណែត ណែនាំគ្រប់ក្រសួង-ស្ថាប័នទាំងអស់ត្រូវចាត់ទុកការគ្រប់គ្រងគ្រោះមហន្តរាយ ជាការងារស្នូល និងពង្រឹងធនធានមនុស្ស និងសម្ភារៈសម្រាប់ការឆ្លើយតប ជាពិសេសពង្រឹងការជួយជនរងគ្រោះកាត់បន្ថយគ្រោះថ្នាក់បណ្តាលមកពីគ្រោះធម្មជាតិឱ្យបានជាអប្បបរមា។ ការណែនាំនេះធ្វើឡើងតាមរយៈសារលិខិត ក្នុងឱកាស «ទិវាជាតិគ្រប់គ្រងគ្រោះមហន្តរាយ» ក្រោមប្រធានបទ «ធ្វើសកម្មភាព រៀងរាល់ថ្ងៃ សម្រាប់ភាពធន់នឹងគ្រោះមហន្តរាយថ្ងៃនេះ» រួមជាមួយទិវាអាស៊ានគ្រប់គ្រងគ្រោះមហន្តរាយ និង ទិវាអន្តរជាតិកាត់បន្ថយគ្រោះមហន្តរាយ ថ្ងៃទី១៣ ខែតុលា ឆ្នាំ២០២៥។

ក្នុងស្ថានការណ៍បច្ចុប្បន្ន ពិភពលោកបាននិងកំពុងប្រឈមទៅនឹងវិបត្តិហានិភ័យជាច្រើន បង្កឡើងដោយធម្មជាតិនិងមនុស្ស ដូចជាការកើនឡើងកម្ដៅភពផែនដីដែលបណ្តាលមកពីការប្រែប្រួលអាកាសធាតុ ដោយបង្កឱ្យមានជាគ្រោះមហន្តរាយធម្មជាតិ រួមមានទឹកជំនន់ ខ្យល់ព្យុះ រញ្ជួយដី ភ្លើងឆេះព្រៃ ជំងឺរាតត្បាត។ល។ មកលើប្រទេសជាច្រើនមិនថាប្រទេសអ្នកមាន ឬប្រទេសអ្នកក្រឡើយ។ ជាមួយគ្នានេះសង្គ្រាម និងជម្លោះប្រដាប់អាវុធ នៅតំបន់មួយចំនួនក្នុងពិភពលោក ដែលជាគ្រោះមហន្តរាយដោយមនុស្ស បន្តវិវត្តលេចធ្លោឡើងប្រកបដោយ ភាពស្មុគស្មាញថែមទៀត។

ដោយឡែកកម្ពុជា ក៏មិនខុសពីប្រទេសនៅក្នុងតំបន់ និងនៅលើពិភពលោកនេះដែរ ស្ថានភាពអាកាសធាតុ ដូចជាការកើនឡើងកម្ដៅក្នុងរដូវវស្សាជួបនឹងរបាយទឹកភ្លៀងធ្លាក់រាយប៉ាយមិនបានល្អ ខ្យល់កន្ត្រាក់ រន្ទះបាញ់ បាក់ច្រាំងទន្លេ ជំងឺឆ្លងរាតត្បាត អគ្គិភ័យ មុខសញ្ញាគ្រោះថ្នាក់ផ្សេងៗទៀតបានបង្កផលប៉ះពាល់ដល់អាយុជីវិតមនុស្ស ខូចខាតទ្រព្យសម្បត្តិប្រជាជន និងសហគមន៍ជាច្រើន។

ប៉ុន្តែទោះស្ថិតក្នុងកាលៈទេសៈណាក្តី រាជរដ្ឋាភិបាលកម្ពុជាតែងប្រកាន់ខ្ជាប់នូវវិធានការប្រើប្រាស់កម្លាំងសរុប មធ្យោបាយសរុប និងធនធានសរុប ដែលមានគណៈកម្មាធិការជាតិគ្រប់គ្រងគ្រោះមហន្តរាយជាសេនាធិការ ធ្វើការសម្របសម្រួលជាមួយក្រសួង ស្ថាប័នថ្នាក់ជាតិ អាជ្ញាធរដែនដីគ្រប់លំដាក់ថ្នាក់ កងកម្លាំងប្រដាប់អាវុធ កាកបាទក្រហមកម្ពុជា ផ្នែកសាធារណៈ ផ្នែកឯកជន សង្គមស៊ីវិល ធ្វើការកាត់បន្ថយហានិភ័យគ្រោះមហន្តរាយ ជួយសង្គ្រោះការបាត់បង់អាយុជីវិត ទ្រព្យសម្បត្តិ និងដោះស្រាយរាល់បញ្ហាផ្សេងៗជូនប្រជាជនរងគ្រោះ ដោយមិនទុកនរណាម្នាក់ចោលឡើយ។ ជាពិសេសការឆ្លើយតបដោយបំពេញកិច្ចការមនុស្សធម៌ចំពោះប្រជាពលរដ្ឋភៀសសឹក ដែលបង្កឡើងដោយ ជម្លោះនៅព្រំដែនកម្ពុជា-ថៃ នាពេលថ្មីៗនេះ។

ផ្អែកលើបរិបទនេះ សម្តេចធិបតី ហ៊ុន ម៉ាណែត ណែនាំគ្រប់ក្រសួង ស្ថាប័នទាំងអស់ ត្រូវចាត់ទុកការគ្រប់គ្រងគ្រោះមហន្តរាយ ជាការងារស្នូល និងពង្រឹងធនធានមនុស្ស និងសម្ភារៈសម្រាប់ការឆ្លើយតប ព្រមទាំងត្រូវចូលរួមអនុវត្តផែនការសកម្មភាពជាតិ ស្តីពីការកាត់បន្ថយហានិភ័យគ្រោះមហន្តរាយឆ្នាំ២០២៤-២០២៨ និងផែនទីបង្ហាញផ្លូវថ្នាក់ជាតិស្តីពី ការប្រកាសឱ្យដឹងមុនសម្រាប់ទាំងអស់គ្នាឱ្យទទួលបានលទ្ធផលល្អ។ សម្តេច ក៏ជំរុញឱ្យរាជធានី-ខេត្ត ត្រូវលើកកម្ពស់ការគ្រប់គ្រងទឹកជំនន់ គ្រោះរាំងស្ងួត ជាមួយការកែលម្អហេដ្ឋារចនាសម្ព័ន្ធ គ្រប់គ្រងទឹកនៅមូលដ្ឋាន ដើម្បីបង្កើនភាពធន់របស់ប្រជាពលរដ្ឋទៅនឹងការប្រែប្រួលអាកាសធាតុ និងគ្រោះមហន្តរាយផ្សេងៗ។

ការគ្រប់គ្រងគ្រោះមហន្តរាយ ជាការងារពហុវិស័យ ជាការងារប្រទាក់ក្រឡាពាក់ព័ន្ធស្ទើរគ្រប់ទិដ្ឋភាព សេដ្ឋកិច្ច-សង្គម របស់ប្រទេសជាតិ ដែលត្រូវធ្វើឡើងប្រកបដោយបរិយាបន្ននិងចីរភាព។ ក្នុងន័យនេះ សម្តេចធិបតី ហ៊ុន ម៉ាណែត បានជំរុញថា គ្រប់ភាគីពាក់ព័ន្ធទាំងអស់ គឺមានតួនាទីក្នុងការចូលរួមធ្វើសកម្មភាពកាត់បន្ថយហានិភ័យគ្រោះមហន្តរាយ ដោយធ្វើការ វិនិយោគភាពវៃឆ្លាត គឺការវិភាជទុននិងធនធានដោយផ្ទាល់ ដើម្បីធ្វើសមាហរណកម្មការកាត់បន្ថយហានិភ័យ គ្រោះមហន្តរាយ នៅក្នុងការអភិវឌ្ឍសហគមន៍៕

The post សម្តេចធិបតី ណែនាំគ្រប់ក្រសួង-ស្ថាប័ន ត្រូវចាត់ទុកគ្រោះមហន្តរាយជាការងារស្នូល និងពង្រឹងការជួយជនរងគ្រោះ appeared first on Kampuchea Thmey Daily.

ខេត្តចំនួន ៤ រងគ្រោះដោយទឹកជំនន់ ប៉ះពាល់ពលរដ្ឋជាង ៩ ពាន់គ្រួសារ ដំណាំស្រូវ និងដំណាំរួមផ្សំជាង ១ ម៉ឺនហិតា

អ៊ិន ពិសី — Wed, 03 Sep 2025 04:10:09 +0000

ខេត្តចំនួន ៤ រួមមាន ខេត្តស្ទឹងត្រែង ក្រចេះ កំពង់ចាម និងខេត្តត្បូងឃ្មុំ បានរងប៉ះពាល់ដោយទឹកជំនន់នៅក្នុងរដូវវស្សានេះ បណ្តាលឱ្យប៉ះពាល់ប្រជាពលរដ្ឋជាង ៩ ពាន់គ្រួសារ ស្មើនឹងជាង ៣ ម៉ឺន ៦ ពាន់នាក់ ដំណាំស្រូវដំណាំរួមផ្សំ និងទ្រទ្រង់សេដ្ឋកិច្ចជាង ១ ម៉ឺនហិតា ក្នុងនោះ ខូចខាតជាង ៨ ពាន់ហិតា។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍នៅព្រឹកថ្ងៃទី ៣ កញ្ញា នេះថា ភ្លៀងធ្លាក់ច្រើននៅផ្ទៃរងទឹកភ្លៀង នៃអាងទន្លេមេគង្គលើ និងនៅក្នុងភូមិសាស្ត្រ នៃប្រទេសវៀតណាម ថៃ និងឡាវ បង្កឱ្យទឹកហូរធ្លាក់ចុះមកទន្លេមេគង្គ និងដៃទន្លេច្រើន ធ្វើឱ្យទឹកជំនន់ទន្លេមេគង្គមានការជន់ឡើង លឿនជាលើកទីមួយ ចាប់ពីថ្ងៃទី ២៨ ខែកក្កដា ហើយស្ថានីយជលសាស្ត្រក្នុងភូមិសាស្ត្រ ខេត្តស្ទឹងត្រែង ក្រចេះ និងកំពង់ចាម ក៏បានជន់ឡើងជិតដល់កម្រិតប្រុងប្រយ័ត្ន និងបង្កឱ្យមានការលិចលង់ជាបន្តបន្ទាប់នៅតាមបណ្តាក្រុងស្រុកមួយចំនួន នៃខេត្តស្ទឹងត្រែង ក្រចេះ កំពង់ចាម និងខេត្តត្បូងឃ្មុំ ធ្វើឱ្យប៉ះពាល់ប្រជាជនចំនួន ៩.០៦៦ គ្រួសារ ស្មើនឹង ៣៦.២៦៤ នាក់ និងជម្លៀសទៅទីទួលសុវត្ថិភាព ២៩៦ គ្រួសារ ផ្ទះលិចទឹក ៦៩៦ ខ្នង សាលារៀន ៧ កន្លែង វត្តអារាម ២ កន្លែង អគាររដ្ឋបាលឃុំ ១ កន្លែង និងជម្លៀសសត្វពាហណៈ ៥៧៨ ក្បាល។

លោកបានបន្តថា ក្រៅពីនេះ ទឹកជំនន់បានប៉ះពាល់ដល់ដំណាំស្រូវលិចទឹក ៧.២៤១ ហិតា ដំណាំរួមផ្សំ និងទ្រទ្រង់សេដ្ឋកិច្ច ៤.៣១០ ហិតា ដំណាំស្រូវខូច ៤.៦០៦ ហិតា និងដំណាំរួមផ្សំ និងទ្រទង់សេដ្ឋកិច្ចខូច ៣.៩៩៩ ហិតា ផ្លូវជាតិលិចទឹក ១៦០ ម៉ែត្រ ផ្លូវលំគ្រួសក្រហម និងបេតុងលិចទឹក ប្រវែង ១០២.០៦៨ ម៉ែត្រ ស្ពានលិចទឹក ៧ កន្លែង និងការបាក់ច្រាំងទន្លេស្ទឹងចំនួន ៥ ករណី នៅក្នុងខេត្តកំពង់ចាម និងត្បូងឃ្មុំ ក្នុងនោះ បាក់ស្រុតផ្ទះចូលទន្លេ ស្ទឹង ចំនួន ២ ខ្នង រំកិលផ្ទះ និងរុះរើចេញ ១ ខ្នង បាក់ស្រុតដីច្រាំងទន្លេប្រវែង ១.៥៤៦ ម៉ែត្រ និង ទទឹងពី ៥ ទៅ ៤០ ម៉ែត្រ៕

អត្ថបទ ៖ សំអឿន

The post ខេត្តចំនួន ៤ រងគ្រោះដោយទឹកជំនន់ ប៉ះពាល់ពលរដ្ឋជាង ៩ ពាន់គ្រួសារ ដំណាំស្រូវ និងដំណាំរួមផ្សំជាង ១ ម៉ឺនហិតា appeared first on Kampuchea Thmey Daily.

ភ្លៀងលាយឡំខ្យល់កន្ត្រាក់ប៉ះពាល់ផ្ទះសម្បែងពលរដ្ឋ និងផ្សារសង្គមថ្មី ជាង២០ខ្នង

កម្ពុជាថ្មី — Sun, 10 Aug 2025 10:40:10 +0000

ភ្លៀងធ្លាក់មួយមេធំលាយឡំ និងខ្យល់កន្ត្រាក់ កាលពីល្ងាចថ្ងៃទី០៩ ខែសីហា ឆ្នាំ២០២៥ បានធ្វើឲ្យខូចខាតផ្ទះប្រជាពលរដ្ឋ និងផ្សារសង្គមថ្មី អស់ជាង២០ខ្នង នៅក្នុងភូមិចំនួន៣ នៃឃុំចំរើន ស្រុកសង្គមថ្មី ខេត្តព្រះវិហារ។

យោងតាមការប្រកាសរបស់ក្រសួងធនធានទឹក និងឧតុនិយមបានឲ្យដឹងនៅព្រឹកថ្ងៃទី៩ ខែសីហាថា តំបន់ខ្ពង់រាប មានសីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣៦°C។ ខ្យល់បក់មកពីទិសនិរតី និងទិសពាយ័ព្យមានល្បឿនមធ្យម៤ម៉ែត្រ ក្នុងមួយវិនាទី។ ខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ក្រចេះ ស្ទឹងត្រែង រតនគិរី មណ្ឌលគិរី ជួរភ្នំដងរែក និងតំបន់ជួរ ភ្នំក្រវាញ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើផ្ទៃដី២៥%។

អាជ្ញាធរស្រុកសង្គមថ្មី បានឲ្យដឹងថា ផ្ទះពលរដ្ឋ និងផ្សារសង្គមថ្មី រងការខូចខាតសំយាប់ រលំដើមឈើ និងប៉ើងដំបូលផ្ទះ បណ្តាលឲ្យខូចខាតប្រមាណជាង២០ខ្នងផ្ទះនៅភូមិចំនួន៣ គឺភូមិត្បែង,ភូមិដា និងប្រធាតុ ក្នុងឃុំចំរើន ស្រុកសង្គមថ្មី។

ក្រោយកើតមានគ្រោះធម្មជាតិនេះ អាជ្ញាធរនៃស្រុកសង្គមថ្មី ក៏បានចុះសាកសួរសុខទុក្ខ និងពិនិត្យជាក់ស្តែងដល់ទីតាំងភូមិទាំងអស់ដែលបានជួបឧបទ្ទវហេតុ គឺមិនមានប៉ះពាល់ដល់អាយុជីវិតមនុស្សណាម្នាក់ឡើយ៕

ដោយ៖ជុន កុសល

The post ភ្លៀងលាយឡំខ្យល់កន្ត្រាក់ប៉ះពាល់ផ្ទះសម្បែងពលរដ្ឋ និងផ្សារសង្គមថ្មី ជាង២០ខ្នង appeared first on Kampuchea Thmey Daily.

កម្ពុជា នឹងធ្វើសមយុទ្ធឆ្លើយតបគ្រោះអាសន្នមហន្តរាយ ដែលមានថៃ សមាជិកអាស៊ាន ទីម័រ និងភាគីពាក់ព័ន្ធចូលរួម

Ngoeul Narath — Mon, 14 Jul 2025 08:53:23 +0000

គណៈកម្មាធិការជាតិគ្រប់គ្រងគ្រោះមហន្តរាយរបស់កម្ពុជា នឹងរៀបចំលំហាត់សមយុទ្ធឆ្លើយតប គ្រោះអាសន្នមហន្តរាយថ្នាក់តំបន់អាស៊ាន សម្រាប់ឆ្នាំ ២០២៥ (ARDEX-25) ចាប់ពីថ្ងៃទី២២ ដល់ថ្ងៃទី២៤ ខែកក្កដា ឆ្នាំ២០២៥ នៅបញ្ជាការដ្ឋានទ័ពពិសេស កងទ័ពជើងគោករាជធានីភ្នំពេញ។ សេចក្តីប្រកាសព័ត៌មានរបស់គណៈកម្មាធិការជាតិគ្រប់គ្រងគ្រោះមហន្តរាយ ចេញនៅថ្ងៃទីចន្ទ ទី១៤ ខែកក្កដា។

រូបថតឯកសារ ក្នុងលំហាត់សមយុទ្ធឆ្លើយតប គ្រោះអាសន្នមហន្តរាយថ្នាក់តំបន់អាស៊ាន កាលពីឆ្នាំ២០២៣ កន្លងទៅ។

សមយុទ្ធនេះ រៀបចំឡើងក្រោមកិច្ចសហការជាមួយ មជ្ឈមណ្ឌលសម្របសម្រួលអាស៊ានសម្រាប់ជំនួយមនុស្សធម៌ក្នុងការគ្រប់គ្រងគ្រោះ មហន្តរាយ (មជ្ឈមណ្ឌល-អាហា) ដែលមានការចូលរួមពីប្រទេសថៃ និងបណ្ដាប្រទេសជាសមាជិករបស់អាស៊ាន ប្រទេសទីម័រឡេស្តេ ដៃគូសន្ទនាអាស៊ាន អគ្គលេខាធិការអាស៊ាន នាយកប្រតិបត្តិមជ្ឈមណ្ឌល-អាហា ឯកអគ្គរាជទូត ឯកអគ្គរដ្ឋទូត និងអនុព័ន្ធយោធាបរទេសប្រចាំកម្ពុជា ក្រសួងស្ថាប័នជំនាញ កងប្រតិបត្តិការរុករក និងសង្គ្រោះ អភិបាលរាជធានី-ខេត្ត ដៃគូអភិវឌ្ឍន៍ ភ្នាក់ងារ សហប្រជាជាតិ អង្គការអន្តរជាតិ និងវិស័យឯកជន សរុបប្រមាណ ៦៥០នាក់។ នេះបើតាមសេចក្ដីប្រកាសព័ត៌មានដដែល។

គណៈកម្មាធិការជាតិគ្រប់គ្រងគ្រោះមហន្តរាយ គូសបញ្ជាក់ថា ARDEX-25 ជាលំហាត់សមយុទ្ធពេញលេញ ដែលរៀបចំឡើងរៀងរាល់ពីរឆ្នាំម្តង ដើម្បីធ្វើតេស្តសាកល្បង និង វាយតម្លៃយន្តការត្រៀមបង្ការ និងឆ្លើយតបសង្គ្រោះបន្ទាន់គ្រោះមហន្តរាយរបស់អាស៊ាន ដោយរួមបញ្ចូលដំណើរការ ត្រៀមរៀបចំ ការរុករកនិងសង្គ្រោះ ការប៉ាន់ប្រមាណផលប៉ះពាល់ និងយុទ្ធសាស្ត្រឆ្លើយតបបន្ទាន់កម្រិតប្រទេសដែល ផ្សារភ្ជាប់នឹងអាស៊ាន ក្នុងគោលបំណងសង្គ្រោះអាយុជីវិតជនរងគ្រោះដោយគ្រោះមហន្តរាយ រោះដោយគ្រោះមហន្តរាយ តាមរយៈការរុករកនិងសង្គ្រោះ នៅក្នុងនាមជាអ្នកសម្របសម្រួលជំនួយមនុស្សធម៌ ការផ្តល់នូវសេវាសុខាភិបាល ការផ្តល់ជម្រកស្នាក់នៅបណ្តោះអាសន្ន ការផ្តល់ស្បៀងអាហារ និងអនាម័យទឹកស្អាត ជា ដើម។

តាមគណៈកម្មាធិការជាតិគ្រប់គ្រងគ្រោះមហន្តរាយ លំហាត់សមយុទ្ធនេះក៏នឹងរួមបញ្ចូលការធ្វើតេស្តសាកល្បងនីតិវិធីប្រតិបត្តិស្តង់ដាអាស៊ានសម្រាប់ការត្រៀមរៀបចំ ក្នុងតំបន់ (SASOP) និងលក្ខខណ្ឌការងាររបស់អគ្គលេខាធិការអាស៊ានក្នុងនាមជាអ្នកសម្របសម្រួលជំនួយមនុស្សធម៌ អាស៊ានផងដែរ។ វិធានដែលនឹងត្រូវប្រើប្រាស់សម្រាប់ ARDEX-25 រួមមាន៖ លំហាត់លើតុ (TTX) លំហាត់ប៉ុស្តិ៍បញ្ជាការ (CPX) និងលំហាត់ហ្វឹកហ្វឺននៅទីវាល (FTX)។

ពិធីបើកលំហាត់សមយុទ្ធ នឹងប្រព្រឹត្តទៅនាថ្ងៃទី២២ ខែកក្កដា ឆ្នាំ២០២៥ នៅបញ្ជាការដ្ឋានទ័ពពិសេស កងទ័ព ជើងគោក ក្រោមអធិបតីភាព ទេសរដ្ឋមន្ត្រី គន់ គីម អនុប្រធានទី១ គ.ជ.គ.ម. និងជា ប្រធានកិច្ចប្រជុំថ្នាក់រដ្ឋមន្ត្រីអាស៊ានទទួលបន្ទុកការគ្រប់គ្រងគ្រោះមហន្តរាយ។ ចំណែកពិធីបិទលំហាត់សមយុទ្ធ នឹងប្រព្រឹត្តទៅនាថ្ងៃទី២៤ ខែកក្កដា ឆ្នាំ២០២៥ នៅបញ្ជាការដ្ឋានទ័ពពិសេស កងទ័ព ជើងគោក ក្រោមអធិបតីភាព នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ៕

The post កម្ពុជា នឹងធ្វើសមយុទ្ធឆ្លើយតបគ្រោះអាសន្នមហន្តរាយ ដែលមានថៃ សមាជិកអាស៊ាន ទីម័រ និងភាគីពាក់ព័ន្ធចូលរួម appeared first on Kampuchea Thmey Daily.

មេទ័ពជើងគោក បញ្ជាឱ្យកងទ័ព ត្រៀមសង្គ្រោះពលរដ្ឋករណីមានគ្រោះមហន្តរាយកើតឡើង

Ngoeul Narath — Thu, 03 Apr 2025 08:02:52 +0000

មេបញ្ជាការកងទ័ពជើងគោក លោក មៅ សុផាន់ បញ្ជាឱ្យមេបញ្ជាការទាំង០៦យោធភូមិភាគ ០២កងពលធំ កងពលតូចលេខ៧០ និងបញ្ជាការដ្ឋានទ័ពពិសេស ចំណុះកងទ័ពជើងគោក ត្រូវត្រៀមកម្លាំង មធ្យោបាយ សម្ភារៈ ឧបករណ៍ក្នុងអង្គភាព ដើម្បីសង្គ្រោះពលរដ្ឋ និងសហការភាគីពាក់ព័ន្ធនៅតំបន់ដែលមានគ្រោះធម្មជាតិកើតឡើង ត្រូវជម្លៀសប្រជាពលរដ្ឋទៅកន្លែងមាន សុវត្ថិភាព បញ្ចៀសឱ្យខានតែបាននូវផលប៉ះពាល់ដល់អាយុជីវិតប្រជាពលរដ្ឋ និងការខូចខាតផ្សេងៗ ដែលកើតមានឡើងជាយថាហេតុទាំងក្នុងតំបន់ និងជុំវិញតំបន់ដែលកងឯកភាពទទួលខុសត្រូវ។

លោក ម៉ៅ សុផាន់ មេបញ្ជាការកងទ័ពជើងគោក បញ្ជាបែបនេះ តាមរយៈបទបញ្ជាស្តីពីការប្រើប្រាស់កម្លាំងអន្តរាគមន៍ ពេលមានគ្រោះមហន្តរាយ ឆ្នាំ២០២៥ ចេញនៅថ្ងៃទី០២ ខែមេសា ។

ដើម្បីឱ្យដំណើរការ នៃប្រតិបត្តិការសង្គ្រោះប្រជាពលរដ្ឋជួបគ្រោះមហន្តរាយប្រព្រឹត្តទៅដោយភាព រលូនទាន់ពេលវេលា និងមានប្រសិទ្ធភាពខ្ពស់ លោក ម៉ៅ សុផាន់ បញ្ជាឱ្យ មេបញ្ជាការទាំងអស់ ត្រូវត្រៀមកម្លាំង ត្រួតពិនិត្យបច្ចេកទេស មធ្យោបាយ សម្ភារៈឯកទេស ប្រេងឥន្ធនៈ ឱ្យស្ថិត ក្នុងលក្ខណៈត្រៀម ដូចជាលក្ខណៈត្រៀមប្រយុទ្ធ និងកសាងផែនការស្តីពីការត្រៀមកម្លាំង មធ្យោបាយ សម្ភារៈ បរិក្ខារ សម្រាប់ប្រតិបត្តិការអន្តរាគមន៍សង្គ្រោះគ្រោះមហន្តរាយ រួចផ្ញើមកការិយាល័យទី៣ កងទ័ពជើងគោក។

ក្រោយពីគ្រោះមហន្តរាយឆ្លងផុត មេបញ្ជាការតាមអង្គភាពទទួលខុសត្រូវ ត្រូវបូកសរុបរបាយការណ៍ អំពីលទ្ធផលនៃការជួយសង្គ្រោះ និងផល ប៉ះពាល់នៃគ្រោះមហន្តរាយ ត្រូវចាត់តាំងកម្លាំងចូលរួមក្នុងសកម្មភាពពុះពារដោះស្រាយនូវរាល់ផល វិបាកដែលបណ្តាលមកពីគ្រោះមហន្តរាយទាំងនោះដូចជា ស្តារឡើងវិញនូវហេដ្ឋារចនាសម្ព័ន្ធរូបវ័ន្ត មូលដ្ឋាន បង្ការទប់ស្កាត់រោគរាតត្បាតជំងឺឆ្លង ជួយសង្គ្រោះប្រជាពលរដ្ឋ និងការងារបង្ករបង្កើនផល។

ករណីមានគ្រោះមហន្តរាយកើតឡើង ត្រូវរាយការណ៍ជារៀងរាល់ថ្ងៃនៅម៉ោង១៦.០០នាទីល្ងាច មកការិយល័យទី៣ កងទ័ពជើងគោក អំពីសភាពការណ៍គ្រោះមហន្តរាយ ការប្រើប្រាស់កម្លាំង មធ្យោបាយ ជួយសង្គ្រោះ និងផលប៉ះពាល់នៃគ្រោះមហន្តរាយ ក្នុងករណីចាំបាច់ត្រូវរាយការណ៍ជាបន្ទាន់។រយៈពេលអនុវត្តគិតចាប់ពីថ្ងៃទី១០ ខែឧសភា រហូតដល់ថ្ងៃទី៣១ ខែតុលា ឆ្នាំ២០២៥៕

The post មេទ័ពជើងគោក បញ្ជាឱ្យកងទ័ព ត្រៀមសង្គ្រោះពលរដ្ឋករណីមានគ្រោះមហន្តរាយកើតឡើង appeared first on Kampuchea Thmey Daily.

សម្ដេចធិបតី ថា សង្គ្រាម ជាគ្រោះមហន្តរាយបង្កដោយមនុស្សដ៏គួរឱ្យភ័យខ្លាច

Thoeun Vansong — Mon, 14 Oct 2024 08:29:11 +0000

ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បានចាត់ទុកចេតនាទាញសង្គមជាតិឱ្យធ្លាក់ចូលក្នុងភ្នក់ភ្លើងសង្គ្រាម គឺជាគ្រោះមហន្តរាយបង្កឡើងដោយមនុស្សដ៏គួរឱ្យភ័យខ្លាចបំផុត ដែលទាមទារឱ្យរួមគ្នាទប់ស្កាត់ជាដាច់ខាត។

សម្ដេចធិបតី ហ៊ុន ម៉ាណែត បានអំពាវនាវដល់សាធារណជន និងភាគីពាក់ព័ន្ធបន្តចូលរួមជាមួយរាជរដ្ឋាភិបាលនៅក្នុងសកម្មភាពគ្រប់គ្រងគ្រោះមហន្តរាយ រួមគ្នាទប់ស្កាត់រាល់ចេតនាបង្កចលាចលសង្គម ការញុះញង់បង្កអស្ថេរភាព បំផ្លាញសន្តិភាព ក្នុងបំណងទាញសង្គមជាតិធ្លាក់ចូលក្នុងភ្នក់ភ្លើងសង្គ្រាមបង្ហូរឈាមជាថ្មីណាមួយ ដែលជា «គ្រោះមហន្តរាយបង្កដោយមនុស្សដ៏គួរឱ្យភ័យខ្លាច» តាមរយៈល្បិចកលដ៏ខ្មៅកខ្វក់របស់ក្រុមជនឧទ្ទាមក្រៅច្បាប់មួយក្តាប់តូច។

ការអំពាវនាវរបស់ប្រមុខរាជរដ្ឋាភិបាល ធ្វើឡើងតាមរយៈសារលិខិតមួយច្បាប់ផ្ញើជនរួមជាតិ ក្នុងឱកាសទិវាជាតិគ្រប់គ្រងគ្រោះមហន្តរាយ ថ្ងៃទី១៣ ខែតុលា ឆ្នាំ២០២៤។

សម្ដេចធិបតី បានរម្លឹក និងសម្ដែងការដឹងគុណចំពោះសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងបច្ចុប្បន្នជាប្រធានព្រឹទ្ធសភា ដែលសម្ដេចបានការពារយ៉ាងមោះមុតនូវសុខសន្តិភាព និងសុវត្ថិភាពជូនប្រជាជន ដឹកនាំគ្រប់គ្រងគ្រោះមហន្តរាយ ដោយប្រយុទ្ធ ទប់ស្កាត់ រក្សាការពារអាយុជីវិត និងជីវភាពប្រជាជនពីគ្រប់មុខសញ្ញាគ្រោះថ្នាក់ ដោយមិនទុកឱ្យប្រជាជនណាម្នាក់រងគ្រោះ ដោយមិនមានការទទួលខុសត្រូវឡើយ។

តាមសារលិខិតរបស់សម្តេចធិបតី ហ៊ុន ម៉ាណែត រាជរដ្ឋាភិបាលអាណត្តិថ្មីនេះនឹងបន្តផ្តល់អាទិភាពខ្ពស់លើការងារគ្រប់គ្រងគ្រោះមហន្តរាយ ដោយបន្តរក្សា និងបង្កើនភាពធន់នឹងគ្រោះមហន្តរាយ តាមរយៈការវិនិយោគជារួមទៅលើកំណើនសេដ្ឋកិច្ច សង្គមជាពហុវិស័យប្រកបដោយបរិយាប័ន្ន ដែលជាឆ្អឹងខ្នងនៃសមត្ថភាពជាតិក្នុងការគ្រប់គ្រង និងកាត់បន្ថយ ហានិភ័យគ្រោះមហន្តរាយ ជាមួយនឹងការវិនិយោគទៅលើវិស័យជួរមុខក្នុងការកសាងសមត្ថភាពឆ្លើយតបនៅគ្រប់កម្រិត ទាន់ពេលវេលា មានប្រសិទ្ធភាព និងអាចស្តារឡើងវិញបានយ៉ាងឆាប់រហ័ស ក្រោយគ្រោះមហន្តរាយ។

សម្តេចធិបតី ហ៊ុន ម៉ាណែត ប្រធានគណៈកម្មាធិការជាតិគ្រប់គ្រងគ្រោះមហន្តរាយ គូសបញ្ជាក់ថា ការគ្រប់គ្រងគ្រោះមហន្តរាយ ជាការងារពហុវិស័យ ជាការងារប្រទាក់ក្រឡាពាក់ព័ន្ធស្ទើរគ្រប់ទិដ្ឋភាពសេដ្ឋកិច្ច សង្គមរបស់ប្រទេសជាតិ ដែលត្រូវធ្វើឡើងប្រកបដោយបរិយាបន្ន។ ហេតុនេះ គ្រប់វិស័យសុទ្ធតែជាប់ពាក់ព័ន្ធ និងត្រូវរួមចំណែកដោយផ្ទាល់ ឬដោយប្រយោលនៅក្នុងសកម្មភាពនៃការកាត់បន្ថយហានិភ័យគ្រោះមហន្តរាយ។

សម្តេចធិបតី ក៏បានអំពាវនាវឱ្យបង្កើនការយល់ដឹងអំពីមុខសញ្ញាគ្រោះថ្នាក់ ការអប់រំផ្សព្វផ្សាយ ព័ត៌មានព្យាករណ៍ និងការប្រកាសឱ្យដឹងមុន និងចូលរួមក្នុងសកម្មភាពទប់ស្កាត់ ការពារ និងកាត់បន្ថយគ្រោះមហន្តរាយ ក៏ដូចជារួមចំណែកជាមួយរាជរដ្ឋាភិបាលក្នុងការរក្សាកំណើនសេដ្ឋកិច្ច វិនិយោគ ពង្រីកមុខរបរដែលធន់ ដើម្បីរក្សាស្ថេរភាពជីវភាពរស់នៅជាមួយការរស់នៅស្អាត បរិស្ថានល្អ និងភូមិ-ឃុំមានសុវត្ថិភាព។

គួរជម្រាបថា ប្រធានបទសម្រាប់ទិវាអន្តរជាតិកាត់បន្ថយហានិភ័យគ្រោះមហន្តរាយ ឆ្នាំ២០២៤ គឺ«តួនាទីនៃការអប់រំក្នុងការការពារ និងផ្តល់អំណាចដល់កុមារសម្រាប់អនាគតដែលគ្មានគ្រោះមហន្តរាយ» សំដៅកាត់បន្ថយហានិភ័យ និងការបាត់បង់ជាសាកល។ រីឯ ទិវាអាស៊ានគ្រប់គ្រងគ្រោះមហន្តរាយ នឹងផ្តោតលើមូលបទ «ការកសាងអាស៊ានដែលមានភាពធន់ តាមរយៈការស្តារឡើងវិញបន្ទាប់ពីគ្រោះមហន្តរាយប្រកបដោយ បរិយាបន្ន និងនិរន្តរភាព»។ សម្រាប់កម្ពុជា ការគ្រប់គ្រងគ្រោះមហន្តរាយ គឺសំដៅការពារការអភិវឌ្ឍ និងសុខុមាលភាពរបស់ប្រជាជន ត្រូវបានលើកយកជាប្រធានបទសម្រាប់ទិវាជាតិគ្រប់គ្រងគ្រោះមហន្តរាយ ក្នុងឆ្នាំ២០២៤នេះ៕

The post សម្ដេចធិបតី ថា សង្គ្រាម ជាគ្រោះមហន្តរាយបង្កដោយមនុស្សដ៏គួរឱ្យភ័យខ្លាច appeared first on Kampuchea Thmey Daily.