បើតាមលោក ហង្ស ពុទ្ធា សមាជិក និងជាអ្នកនាំពាក្យ គ.ជ.ប ការិយាល័យចុះឈ្មោះបោះឆ្នោតតាមសាលាឃុំ-សង្កាត់ ទូទាំងប្រទេសសរុបចំនួន១ ៦៥២ បានបើកដំណើរការព្រមៗគ្នា និងបានប្រព្រឹត្តទៅយ៉ាងល្អតាមការគ្រោងទុក គឺពុំមានបញ្ហាប្រឈមណាមួយធ្វើឱ្យរាំងស្ទះឡើយ។

ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំនេះ គឺមានរយៈពេល២៦ថ្ងៃ ចាប់ផ្តើមពីថ្ងៃទី០១ រហូតដល់ថ្ងៃទី២៦ ខែឧសភា ឆ្នាំ២០២៥ រៀងរាល់ថ្ងៃ រួមទាំងថ្ងៃសៅរ៍ និងថ្ងៃអាទិត្យ ពេលព្រឹកចាប់ពីម៉ោង ៧:០០ ដល់ម៉ោង ១១:៣០នាទីថ្ងៃត្រង់ និងពេលរសៀលចាប់ពីម៉ោង ២:០០ ដល់ម៉ោង ៥:៣០នាទីល្ងាច។

លោក ហង្ស ពុទ្ធា បានបន្ថែមឱ្យដឹងថា មានប្រជាពលរដ្ឋប្រមាណជាង២២ម៉ឺននាក់ ដែលត្រូវបំពេញកាតព្វកិច្ចក្នុងការចុះឈ្មោះបោះឆ្នោត ក្នុងឆ្នាំ២០២៥នេះ ខណៈ គ.ជ.ប ក៏នឹងលុបឈ្មោះប្រជាពលរដ្ឋប្រមាណ៥ម៉ឺននាក់ ចេញពីបញ្ជីឈ្មោះបោះឆ្នោតនៅទូទាំងប្រទេស។ ការលុបនេះ អ្នកនាំពាក្យ បញ្ជាក់ថា ដោយសារអ្នកទាំងនោះ បានទទួលមរណៈភាពទៅហើយ។

ស្របពេលដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត បានចាប់ផ្ដើម លោក ហង្ស ពុទ្ធា សមាជិក និងជាអ្នកនាំពាក្យ គ.ជ.ប ក៏បានអំពាវនាវឱ្យប្រជាពលរដ្ឋខ្មែរដែលមានឈ្មោះក្នុងបញ្ជីបោះឆ្នោតផ្លូវការឆ្នាំ២០២៤ អញ្ជើញទៅពិនិត្យមើលឈ្មោះរបស់ខ្លួន ដែលបិទផ្សាយនៅតាមសាលាឃុំសង្កាត់ និងនៅទីប្រជុំជនមួយចំនួនក្នុងឃុំ សង្កាត់ ឬចូលពិនិត្យមើលតាមអាសយដ្ឋានវេប voterlist.nec.gov.kh និងកម្មវិធីទូរសព្ទឆ្លាត (Mobile App) NEC КН។

ចំពោះប្រជាពលរដ្ឋខ្មែរ ដែលមានសិទ្ធិបោះឆ្នោត ហើយមិនទាន់បានចុះឈ្មោះបោះឆ្នោតពីមុនមក ឬ អ្នកដែលទើបគ្រប់អាយុ១៨ឆ្នាំ គិតដល់ថ្ងៃទី៣១ ខែកក្កដា ឆ្នាំ២០២៥ (កើតមុន ឬត្រឹមថ្ងៃទី១ ខែសីហា ឆ្នាំ២០០៧) ឬអ្នកដែលបានផ្លាស់លំនៅឋាន ឬទីសំណាក់ ចូលថ្មីក្នុងឃុំសង្កាត់ សូមអញ្ជើញទៅចុះឈ្មោះបោះឆ្នោតឱ្យបានគ្រប់ៗគ្នានៅឃុំសង្កាត់ ដែលសាមីខ្លួនកំពុងរស់នៅ ឬស្នាក់នៅ៕

ដោយ៖ ធឿន វ៉ាន់សុង

The post គ.ជ.ប ថា ការចាប់ផ្ដើមពិនិត្យ និងចុះឈ្មោះបោះឆ្នោត ដំណើរការដោយរលូនល្អ appeared first on Kampuchea Thmey Daily.

នៅក្នុងខេត្តរតនគិរីផ្ទាល់ បានសម្រេចជ្រើសរើសមន្ត្រីកិច្ចសន្យា នៅតាមបណ្តា ឃុំ ចំនួន ៤ រូប ឃុំកាចាញ ឃុំឡាបានសៀក ឃុំត្រពាំងប្រេស ឃុំបឹងកន្សែង តួនាទីរួមមាន ប្រធានក្រុម និងក្នុងមួយៗឃុំ ផ្សេងទៀត ក្នុងខេត្តរតនគិរី រើសចំនួន ៣រូប នៅតាមបណ្តាឃុំនីមួយៗ នៅក្នុងខេត្តរតនគិរី។ មុខដំណែងរបស់មន្ត្រីកិច្ចសន្យានៅតាមបណ្តាឃុំនីមួយៗ រួមមាន ប្រធានក្រុម១  អនុប្រធាន១ ការីកុំព្យូទ័រ១ លើកលែងតែឃុំ ចំនួន៤ ខាងលើ ប្រធាន អនុប្រធាន ចំនួន១ រូប ដូចគ្នា តែការីកំព្យូទ័រ ចំនួន២ រូប ។

ចំពោះសាធារណជន ដែលចាប់អារម្មណ៍ ទៅស្វែងរកក្រដាសដាក់ពាក្យ នៅតាមបណ្តឃុំ របស់ខ្លួនរស់នៅ ពីថ្ងៃ១ ខែ មេសា ឆ្នាំ ២០២៥ នៅម៉ោង ០៧៖០០ព្រឹក បិទឈប់ទទួលពាក្យនៅថ្ងៃទី ០៧ ខែ មេសា ឆ្នាំ ២០២៥ នៅម៉ោង ០៧ :០០ ព្រឹក មានរយៈពេល៧ ថ្ងៃគត់ ។

ជាឱកាសសម្រាប់យុវជន និងអ្នកដែលមិនមានការងារពិតប្រាកដ សម្រាប់ប្រគួតប្រជែងគ្នានៅពេលប្រឡង ជាមួយគ្រូបង្រៀននៅតាមបណ្តា សាលានានា នៅពេលធ្វើតេស្ត សមត្ថភាពលើវិញ្ញាសា តេស្តកំព្យូទ័រ លើការសរសេរ ដោយដៃ ដើម្បីស្វែងរកឱកាសទៅបទពិសោធន៍ ធ្វើជាមន្ត្រីគជបនិងជួយខ្លួនឯង ។ ការបិទផ្សាយបញ្ជីឈ្មោះបេក្ខជនដែលត្រូវប្រប្រឡង QCM និងធ្វើតេស្តកុំព្យូទ័រ នៅថ្ងៃទី៩ ខែមេសាឆ្នាំ២០២៥ នៅតាមសាលាឃុំ សង្កាត់ ចំណុះរាជធានី ខេត្ត ការប្រឡង QCM និងធ្វើតេស្តកុំព្យូទ័រ នៅថ្ងៃទី១២ ខែមេសា ឆ្នាំ២០២៥ នៅតាមមណ្ឌល ប្រមូលផ្តុំ ក្រុង ស្រុក ខណ្ឌ ។

ចំពោះអ្នកដែលមានបំណងចង់ ប្រឡងចូលជាមន្ត្រីកិច្ចសន្យានេះ ត្រូវពង្រឹងទៅលើជំនាញវាយអក្សរនិងពាក្យឲ្យបានត្រឹមត្រូវ និងឆាប់រហ័សពីព្រោះនៅពេលប្រឡងត្រូវបានកំណត់នាទី៕

ដោយ៖ ខៀវ ចាប

The post គ.ជ.ប ប្រកាសរើសសមាសភាពក្រុមចុះឈ្មោះបោះឆ្នោតឆ្នាំ២០២៥ ក្នុងខេត្តរតនគិរី  appeared first on Kampuchea Thmey Daily.

ផ្អែកតាមរបាយការណ៍ពីគណៈកម្មការរាជធានី ខេត្តរៀបចំការបោះឆ្នោត (គ.ធ.ខប) ទាំង ២៥ នៅវេលាម៉ោង ៧:០០ព្រឹកថ្ងៃអាទិត្យ ទី២៦ ខែឧសភា ការិយាល័យបោះឆ្នោតទាំងអស់ទូទាំងប្រទេសបានបើកដំណើរការព្រមៗគ្នា ដើម្បីទទួលឱ្យអ្នកបោះឆ្នោតចូលមកបោះឆ្នោតតាមនីតិវិធី។ ទោះបីនៅតាមស្រុក ក្រុង នៃខេត្តមួយចំនួនមានអាកាសធាតុអួអាប់ដោយកន្លែងក្តី ក៏មិនបង្កការរំខាន និងរាំងស្ទះដល់ការបើកការិយាល័យបោះឆ្នោត និងការបោះឆ្នោតឡើយ។ អ្នកបោះឆ្នោតបានចេញទៅបោះឆ្នោតនៅតាមការិយាល័យបោះឆ្នោតដោយទឹកមុខរីករាយ និងជឿជាក់។ នេះបើយោងតាមការប្រកាសព័ត៌មានរបស់ គ.ជ.ប. ស្តីពីការសរុបព្រឹត្តិការណ៍ថ្ងៃបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤។

ប្រធាន គ.ជ.ប. លោក ប្រាជ្ញ ចន្ទ បានវាយតម្លៃជារួមថា បរិយាកាសទូទៅជុំវិញការបោះឆ្នោតមាន សភាពល្អប្រសើរ ដែលបង្កលក្ខណៈដល់ការបោះឆ្នោតប្រព្រឹត្តទៅដោយរលូន គ្មានអំពើហិង្សា គ្មានការគំរាមកំហែង និងពុំមានសកម្មភាពធ្វើឱ្យរាំងស្ទះដល់ដំណើរការបោះឆ្នោតឡើយ ដែលយើងអាចចាត់ទុកថាការបោះឆ្នោតនេះ បានប្រព្រឹត្តទៅដោយសេរី ត្រឹមត្រូវ យុត្តិធម៌ និងទទួលបានលទ្ធផលជោគជ័យគួរជាទីមោទនៈ។ លោកគូសបញ្ជាក់ថា៖«ដើម្បីឱ្យដំណើរការនៃការរៀបចំចាត់ចែងយន្តការនៃការងារបញ្ជូន ទទួល ត្រួតពិនិត្យផ្ទៀងផ្ទាត់ និងផ្សព្វផ្សាយលទ្ធផលបឋមនៃការបោះឆ្នោត ប្រព្រឹត្តទៅដោយរលូន គ.ជ.ប បានបង្កើត គណៈកម្មការមួយឈោ្មះថា “គណៈកម្មការគ្រប់គ្រងលទ្ធផលបឋមនៃការបោះឆ្នោត”។

គ.ជ.ប. បន្តថា៖«គណបក្សនយោបាយនានាបានរក្សាភាពស្ងប់ស្ងាត់ ដើម្បីជំរុញឱ្យការបោះឆ្នោត ប្រព្រឹត្តទៅដោយរលូន និងពុំមានព័ត៌មានអំពីការបំភិតបំភ័យ ការគំរាមកំហែង និងទិញទឹកចិត្ត អ្នកបោះឆ្នោតឡើយ។ កម្លាំងសន្តិសុខបោះឆ្នោតបានដាក់ពង្រាយតាមគោលដៅនានាដែលធានាបាននូវសន្តិសុខ សុវត្ថិភាព និងសណ្តាប់ធ្នាប់ល្អ»។

ការិយាល័យបោះឆ្នោតនៅទូទាំងប្រទេសសរុបចំនួន ២០៩ បានដំណើរការបោះឆ្នោតដោយរលូន និងជោគជ័យដែលក្នុងនោះមាន ១៩៥ ការិយាល័យបានបិទការិយាល័យបោះឆ្នោតមុនពេលកំណត់ ដោយហេតុថាអស់អ្នកមកបោះឆ្នោត ហើយការិយាល័យបោះឆ្នោត ចំនួន ១៤ បានបន្តបើកដំណើរការ រហូតដល់ម៉ោង ៣:០០រសៀល។ បន្ទាប់ពីបិទការ​បោះឆ្នោត ដំណើរការរាប់សន្លឹកឆ្នោតក៏ចាប់ផ្តើមភ្លាមៗនៅនឹងកន្លែង តាមនីតិវិធី និងសេចក្ដីណែនាំរបស់ គ.ជ.ប ក្រោមការឃ្លាំមើលពីភ្នាក់ងារគណបក្សនយោបាយ និងអ្នកសង្កេតការណ៍បោះឆ្នោតនៅតាមការិយាល័យនីមួយៗ។

សូមជម្រាបថា តាមតួលេខបណ្តោះអាសន្ននៃអ្នកបោះឆ្នោតដែល គ.ជ.ប ទទួលបាន បង្ហាញថាអ្នកបានទៅបោះឆ្នោតសរុបមានចំនួន ១១.៥៩៨នាក់ ស្មើនឹង ៩៩,៧៩% (ភាគរយ) នៃអ្នកមានឈោ្មះក្នុងបញ្ជីបោះឆ្នោតចំនួនសរុប ១១.៦២២នាក់៕

អត្ថបទ៖ ឡាយ សាមាន

The post គ.ជ.ប.៖ ការបោះឆ្នោតជ្រើសរើសក្រុមប្រឹក្សា ពុំមានព័ត៌មានអំពីការគំរាមកំហែង និងទិញទឹក​ចិត្តឡើយ appeared first on Kampuchea Thmey Daily.

ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤ ខាងមុខ នឹងទទួលបានជោគជ័យស្ថិតក្នុងការធានាបាននូវបរិយាកាសសន្តិសុខ សុវត្ថិភាព និងសណ្តាប់ធ្នាប់ល្អ គ្មានការបំភិតបំភ័យ គ្មានការគំរាមកំហែង និងគ្មានអំពើហិង្សាជាដើម។ លោក នឹម វ៉ាន់សំ ប្រធានគណ:កម្មការរៀបចំបោះឆ្នោតខេត្តសៀមរាប បានលើកឡើងថា ថ្មីៗនេះ គណ:កម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីថ្លែងការណ៍មួយពាក់ព័ន្ធនឹងការឃោសនាបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ មានរយៈពេល ១៤ ថ្ងៃ ដោយចាប់ផ្ដើមពីថ្ងៃទី១០ ដល់ថ្ងៃទី២៣ ខែកុម្ភៈ ឆ្នាំ២០២៤។

លោកបន្តថា រហូតមកដល់ពេលនេះ ការឃោសនា បានប្រព្រឹត្តទៅអស់រយៈពេល ៥ថ្ងៃ កន្លងមកហើយ លោកសង្កេតឃើញថា គណបក្សនយោបាយដែលបានដាក់បញ្ជីបេក្ខជនឈរឈ្មោះបោះឆ្នោត បានធ្វើសកម្មភាពឃោសនាបោះឆ្នោតដោយសេរី តាមកម្មវិធី និងលទ្ធភាពរៀងៗខ្លួន។ លោក នឹម វ៉ាន់សំ បញ្ជាក់បន្ថែមថា ចំពោះគណៈកម្មការរៀបចំការបោះឆ្នោតគ្រប់លំដាប់ថ្នាក់ រួមទាំងអាជ្ញាធរមានសមត្ថកិច្ច បានបង្កលក្ខណៈងាយស្រួល និងការពារសន្តិសុខ សុវត្ថិភាព ដល់គណបក្សនយោបាយ ដើម្បីធ្វើការឃោសនាបោះឆ្នោតស្របតាមច្បាប់ បទបញ្ជា និងនីតិវិធី សម្រាប់ការបោះ​ឆ្នោត​នាពេលខាងមុខនេះ។

លោកថា គ.ជ.ប បានកត់សម្គាល់ឃើញថា ក្នុងរយៈពេលនេះ មានគណបក្សនយោបាយមួយដែលគ្មានបញ្ជីបេក្ខជន​ឈរឈ្មោះបោះឆ្នោតបានធ្វើសកម្មភាពគំរាម កំហែង សមាជិកក្រុមប្រឹក្សាឃុំ សង្កាត់របស់ខ្លួន ជាអ្នកបោះឆ្នោតឱ្យបោះឆ្នោតជូនគណបក្សនេះ ឬ គណបក្សនោះ ដែលជាការរំលោភសិទ្ធិក្នុងការសម្រេចចិត្តរបស់អ្នកបោះឆ្នោត រំលោភការសម្ងាត់នៃការបោះឆ្នោត និងធ្វើឱ្យបាត់ទំនុកចិត្តលើការបោះឆ្នោត។ លោកបានបញ្ជាក់ទៀតថា ករណីនេះ បើផ្អែកតាមផ្លូវច្បាប់នៅមាត្រា៧១ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលត្រូវយកមកអនុវត្តក្នុងការបោះឆ្នោតជ្រើសតាំងសមាជិកព្រឹទ្ធសភា បានចែងថា គ្រប់គណបក្សនយោបាយ បេក្ខជន ឬ អ្នកគាំទ្រទាំងអស់ មិនត្រូវធ្វើការគំរាមកំហែង បំភិតបំភ័យ និងលួងលោមឱ្យបុគ្គលផ្ដិតមេដៃ ឬស្បថ ឬ សន្យាបោះឆ្នោតឱ្យគណបក្សណាមួយឡើយ ។

សូមបញ្ជាក់ថា គណៈកម្មាធិការជាតិរៀបចំការបោះឆ្នោត បានអំពាវនាវឱ្យគណបក្សនយោបាយដែលធ្វើសកម្មភាពខុសច្បាប់ សូមបញ្ឈប់ជាបន្ទាន់ ដើម្បីឱ្យការឃោសនាបោះឆ្នោតប្រព្រឹត្តទៅដោយរលូន ក៏ដូចជា ការបោះឆ្នោតទទួលបានជោគជ័យ។ បើករណីនៅតែប្រព្រឹត្តខុសច្បាប់ទៀត គណៈកម្មាធិការជាតិរៀមចំការបោះឆ្នោត នឹងចាត់វិធានការតាមផ្លូវច្បាប់ជាធរមាន។ ជាងនេះទៅទៀត ការរក្សាការសម្ងាត់នៃការបោះឆ្នោត គឺជាគោលការណ៍នៃលទ្ធិប្រជាធិបតេយ្យ៕

ដោយ៖ គឿន វេត

The post គណៈកម្មការរៀបចំការបោះឆ្នោតខេត្តសៀមរាបប្រជុំពីការងារសន្តិសុខ ដើម្បីសុវត្ថិភាពការបោះឆ្នោតព្រឹទ្ធសភាខាងមុខ appeared first on Kampuchea Thmey Daily.

លោក ហ៊ែល សារ៉ាត់ សមាជិក គ.ជ.ប មានប្រសាសន៍ក្នុងកិច្ចប្រជុំជាមួយភាគីពាក់ព័ន្ធ កាលពីព្រឹកថ្ងៃទី ២៦ ខែមករានេះថា គិតត្រឹមថ្ងៃទី ២៥ ខែមករា គ.ជ.ប បានទទួលបានស្គាល់អ្នកសង្កេតការណ៍ជាតិចំនួន ៦១៤នាក់។ ក្នុងនោះ ស្ត្រីចំនួន ២២៤នាក់ មកពី ១៥អង្គការ/សមាគម។

យ៉ាងណាក៏ដោយ មកដល់ពេលនេះ គ.ជ.ប ពុំទាន់បានទទួលពាក្យសុំសង្កេតការណ៍របស់អ្នកសង្កេតការណ៍អន្តរជាតិពីស្ថាប័ន ឬប្រទេសណាមួយឡើយ។

ចំណែកអ្នកសារព័ត៌មានវិញ គិតត្រឹមថ្ងៃទី ២៥ ខែមករាដែរ គ.ជ.ប បានអនុញ្ញាត និងចេញបណ្ណសម្គាល់ខ្លួនជាផ្លូវការ ជូនអ្នកសារព័ត៌មានជាតិចំនួន ១១៧នាក់។ ក្នុងនោះ ស្ត្រីចំនួន ១៥នាក់ មកពី ១៤អង្គភាព។

ដូចគ្នាដែរ មកដល់ពេលនេះ គ.ជ.ប ក៏ពុំទាន់ទទួលបានពាក្យសុំចុះឈ្មោះ ជាអ្នកសារព័ត៌មានអន្តរជាតិនៅឡើយទេ។ នេះបើតាមការបញ្ជាក់របស់លោក ហ៊ែល សារ៉ាត់ សមាជិក គ.ជ.បដដែល។

សូមជម្រាបថា ការបោះឆ្នោតជ្រើសតាំង សមាជិកព្រឹទ្ធសភា នីតិកាលទី ៥ ឆ្នាំ ២០២៤ នឹងប្រព្រឹត្តទៅនៅថ្ងៃទី ២៥ ខែកុម្ភៈ ឆ្នាំ ២០២៤ខាងមុខ។ ការបោះឆ្នោតនេះ មានគណបក្សនយោបាយចំនួន ៤ បានចុះបញ្ជីគណបក្ស និងបញ្ជីបេក្ខជន ចូលរួមប្រកួតប្រជែង។

គួរឱ្យដឹងដែរថា សមាជិកព្រឹទ្ធសភា មានចំនួន ៦២រូប ដោយក្នុងនោះ ២រូប ត្រូវបានចាត់តាំងដោយព្រះមហាក្សត្រ ២រូប ត្រូវបានរដ្ឋសភាជ្រើសតាំងតាមមតិភាគច្រើនដោយប្រៀប និង ៥៨រូបទៀត ត្រូវជ្រើសតាំងដោយការបោះឆ្នោតអសកល មិនចំពោះតាមវិធីជ្រើសរើសឆ្នោតជាសម្ងាត់៕

The post មកដល់ពេលនេះ គ.ជ.ប ទទួលស្គាល់អ្នកសង្កេតការណ៍ជាង ៦០០នាក់ សម្រាប់សង្កេតមើលដំណើរការ បោះឆ្នោតព្រឹទ្ធសភា appeared first on Kampuchea Thmey Daily.

នៅក្នុងកិច្ចប្រជុំនេះ លោក ហេង ស៊ីឡេង បានឲ្យដឹងថា គ.ជ.ប បានសម្រេចលើបញ្ជីបោះឆ្នោតដំបូង ដែលមានការិយាល័យបោះឆ្នោតចំនួន ៣៣ការិយាល័យ និងមានអ្នកបោះឆ្នោតសរុបចំនួន ១១,៧៤៧ នាក់ ក្នុងនោះ រួមមាន៖ តំណាងរាស្ត្រក្នុងតំណែងមានចំនួន ១២៥នាក់ ស្ត្រី ១៧ នាក់ និងក្រុមប្រឹក្សាឃុំ-សង្កាត់ទាំងអស់ ក្នុងតំណែងមានចំនួន ១១,៦២២ នាក់ ស្ត្រី ២,៥៦៨នាក់។

មន្ត្រីជាន់ខ្ពស់ គ.ជ.ប រូបនេះ បានឲ្យដឹងបន្តថា បន្ទាប់ពី គ.ជ.ប បានពិនិត្យ និងសម្រេចលើបញ្ជីបោះឆ្នោតដំបូងរួចរាល់ហើយ នាយកដ្ឋានគ្រប់គ្រងទិន្នន័យអ្នកបោះឆ្នោត និងបញ្ជីបោះឆ្នោត បានថតចម្លងបញ្ជីបោះឆ្នោតដំបូងចំនួន ៤ច្បាប់បន្ថែមទៀត ដើម្បីរៀបចំវេចខ្ចប់ និងបញ្ជូនទៅគណៈកម្មការរាជធានី ខេត្តរៀបចំការបោះឆ្នោត ដើម្បីធ្វើការបិទផ្សាយជាសាធារណៈ ក្នុងគោលដៅដើម្បីពិនិត្យ និងកែតម្រូវតាមរយៈការប្តឹងតវ៉ា ឬ/ និងការប្តឹងជំទាស់។

បើតាមលោក ហេង ស៊ីឡេង តាមប្រតិទិនសម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី ៥ ឆ្នាំ ២០២៤ គ.ជ.ប ត្រូវធ្វើការបិទផ្សាយបញ្ជីបោះឆ្នោតដំបូង នៅថ្ងៃទី ៥ ខែមករា ឆ្នាំ ២០២៤នេះ។ ដើម្បីបង្កលក្ខណៈងាយស្រួល ទៅដល់អ្នកបោះឆ្នោត គ.ជ.ប ក៏បានបង្ហោះបញ្ជីបោះឆ្នោតដំបូងនេះ នៅលើគេហទំព័រ voterlist.nec.gov.kh និង Mobile App (NEC KH) ផងដែរ។

ការបោះឆ្នោតជ្រើសតាំង សមាជិកព្រឹទ្ធសភា នីតិកាលទី ៥ ឆ្នាំ ២០២៤ នឹងប្រព្រឹត្តទៅនៅថ្ងៃទី ២៥ ខែកុម្ភៈ ឆ្នាំ ២០២៤ខាងមុខ។ សមាជិកព្រឹទ្ធសភា មានចំនួន ៦២រូប ដោយក្នុងនោះ ២រូប ត្រូវបានចាត់តាំងដោយព្រះមហាក្សត្រ ២រូប ត្រូវបានរដ្ឋសភាជ្រើសតាំងតាមមតិភាគច្រើនដោយប្រៀប និង ៥៨រូបទៀត ត្រូវជ្រើសតាំងដោយការបោះឆ្នោតអសកល មិនចំពោះតាមវិធីជ្រើសរើសឆ្នោតជាសម្ងាត់៕
អត្ថបទ ៖ សួស សិត

The post គ.ជ.ប បិទផ្សាយបញ្ជីបោះឆ្នោតដំបូង សម្រាប់ការបោះឆ្នោតជ្រើសតាំងព្រឹទ្ធសភា នៅថ្ងៃទី ៥ ខែមករានេះ appeared first on Kampuchea Thmey Daily.

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ២៦ ខែកក្កដានេះថា នៅក្នុងដំណើរការឃោសនាបោះឆ្នោតជ្រើសតាំង តំណាងរាស្រ្ដ នីតិកាលទី ៧ គ.ជ.ប ទទួលបានពាក្យបណ្ដឹងចំនួន ៣៣។ បណ្ដឹងទាំង ៣៣នេះ ត្រូវបានដោះស្រាយរួចរាល់ នៅថ្នាក់គណៈកម្មការឃុំ-សង្កាត់រៀបចំការបោះឆ្នោត និងនៅគណៈកម្មការរាជធានី-ខេត្តរៀបចំការបោះឆ្នោត។

លោក សោម សូរីដា បន្តថា ក្នុងចំណោមបណ្ដឹងទាំង ៣៣នោះ មានបណ្ដឹងចំនួន ៥ បានប្ដឹងបន្តមកគណៈកម្មាធិការជាតិរៀបចំការបោះឆ្នោត (គ.ជ.ប)។ បណ្ដឹងទាំង ៥នេះ គឺជាបណ្ដឹងប្ដឹងបន្តពីខេត្តប៉ៃលិនចំនួន ២ ខេត្តកំពង់ចាមចំនួន ១ និងខេត្តត្បូងឃ្មុំចំនួន ២បណ្ដឹង។ បណ្ដឹងទាំង ៥នេះ គ.ជ.ប នឹងបើកសវនាការដោះស្រាយ នៅថ្ងៃទី ២៧ ខែកក្កដា ឆ្នាំ ២០២៣។

អ្នកនាំពាក្យ គ.ជ.ប បានឲ្យដឹងបែបនេះថា «បណ្ដឹងទាំង ៥នេះ គ.ជ.ប នឹងបើកសវនាការដោះស្រាយពាក្យបណ្ដឹងនេះ នៅថ្ងៃស្អែកថ្ងៃទី ២៧ ខែកក្កដា ឆ្នាំ ២០២៣ វេលាម៉ោង ៩ព្រឹក នេះជាបណ្ដឹងសរុបដែលខ្ញុំចង់បញ្ជាក់ នៅក្នុងដំណាក់កាលឃោសនាបោះឆ្នោត»។

សេចក្ដីជូនដំណឹងរបស់ គ.ជ.ប នៅថ្ងៃទី ២៥ ខែកក្កដា ឆ្នាំ ២០២៣​ បានឲ្យដឹងថា គ.ជ.ប នឹងបើកសវនាការជាសាធារណៈ នាថ្ងៃទី ២៧ ខែកក្កដា ឆ្នាំ ២០២៣ វេលាម៉ោង ៩ និង០០ព្រឹក នៅទីស្ដីការ គ.ជ.ប ដើម្បីជំនុំជម្រះលើបណ្ដឹង/សំណុំរឿងចំនួន ៥  មានលេខ ០០១ ចុះថ្ងៃទី ១៨ ខែកក្កដា ឆ្នាំ ២០២៣ លេខ ០០២ និងលេខ ០០៣ ចុះថ្ងៃទី ១៩ ខែកក្កដា ឆ្នាំ ២០២៣ លេខ ០០៤ និងលេខ ០០៥ ចុះថ្ងៃទី ២២ ខែកក្កដា ឆ្នាំ ២០២៣។

សមាសភាពក្រុមប្រឹក្សាជំនុំជម្រះមានលោក ប្រាជ្ញ ចន្ទ ប្រធាន គ.ជ.ប ជាប្រធាន, លោក នុត សុខុម អនុប្រធាន គ.ជ.ប និងសមាជិក គ.ជ.ប ចំនួន ៧ រូបទៀត ជាសមាជិកក្រុមប្រឹក្សាជំនុំជម្រះ។ ពាក្យបណ្ដឹងទាំង ៥ ខាងលើនេះ មានកម្មវត្ថុប្ដឹងតវ៉ានឹងសេចក្ដីសម្រេច របស់គណៈកម្មការរៀបចំការបោះឆ្នោត ខេត្តកំពង់ចាម ខេត្តប៉ៃលិន និងខេត្តត្បូងឃ្មុំ ពាក់ព័ន្ធនឹងសកម្មភាពណែនាំ និងញុះញង់ឲ្យអ្នកបោះឆ្នោតបំផ្លាញ ឬធ្វើឲ្យខូចសន្លឹកឆ្នោត៕

The post គ.ជ.ប នឹងបើកសវនាការដោះស្រាយបណ្ដឹងចំនួន ៥ នៅក្នុងដំណាក់កាលឃោសនាបោះឆ្នោត appeared first on Kampuchea Thmey Daily.

អប​ដំណើរ​ជាមួយ​លោក​ប្រធាន គ​.​ជ​.​ប នាឱកាស​នោះដែរ​រួមមាន លោក បណ្ឌិត ម៉ៅ ភិ​រុណ ប្រធាន​ក្រុមប្រឹក្សា​ខេត្តកណ្ដាល និង​លោក គង់ សោ​ភ័​ណ្ឌ អភិបាល​ខេត្ត​កណ្ដាល ព្រមទាំង​មន្ត្រី​ជា​ច្រើន​នាក់​ទៀត។

សម្ដេច​អគ្គ​មហា​សេនា​បតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា និង​សម្ដេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុន សែន ប្រធាន​កាកបាទក្រហម​កម្ពុជា នឹង​អញ្ជើញ​មក​បោះឆ្នោត​នៅ​ការិយាល័យ លេខ ១៦៩៧ សាលា​គរុកោសល្យ​វិ​ក្រិត​ការ​ក្រុង​តាខ្មៅ នៅ​ថ្ងៃអាទិត្យ ទី ២៣ ខែ​កក្កដា ឆ្នាំ ២០២៣ ស្អែក​នេះ។

ការិយាល័យ​បោះឆ្នោត នៅក្នុង​ខេត្តកណ្ដាល មកដល់ពេលនេះ ត្រូវ​បានរៀបចំ​រួចរាល់​អស់ហើយ តាម​សាលារៀន និង​តាម​វត្ត​អារាម​មួយចំនួនទៀត សម្រាប់​ពលរដ្ឋ​ធ្វើការ​បោះឆ្នោត​ជ្រើសតាំង​តំណាងរាស្ត្រ នីតិកាល​ទី ៧ នេះ។

បើ​តាម​លោក ស្វាយ សិទ្ធី ប្រធាន​គណៈកម្មការ​រៀបចំ​ការ​បោះឆ្នោត​សង្កាត់​ព្រែក​ហូរ ក្រុង​តាខ្មៅ ខេត្ត​កណ្ដាល បាន​ឲ្យ​ដឹង​ថា គ្រប់​មន្ត្រី​ការិយាល័យ​បោះឆ្នោត​ទាំងអស់ បាន​យក​សម្ភារៈ​មួយ​ចំនួន ពី​ស្នាក់​ការ​គណៈកម្មការ ទៅ​ដំឡើង​រៀបចំ​នៅក្នុង​បន្ទប់​ការិយាល័យ​បោះឆ្នោត​របស់ខ្លួន លើកលែង​សម្ភារៈ​បី​មុខ ដូចជា ទឹកខ្មៅ សន្លឹកឆ្នោត និង​ត្រា គឺ​នៅ​មិនទាន់​ប្រគល់​ទៅតាម​ការិយាល័យ បោះ​ឆ្នោត​នោះ​ទេ និង​មាន​ក្រុម​សមត្ថ​កិច្ចការពារ​តឹងរ៉ឹង។

លោក ហង្ស ពុទ្ធា អ្នកនាំពាក្យ​គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) បាន​ឲ្យ​ដឹងថា ការ​បោះឆ្នោត​ជ្រើសរើស​តំណាងរាស្ត្រ​នា​ថ្ងៃអាទិត្យ ទី ២៣ ខែ​កក្កដា ឆ្នាំ ២០២៣ ស្អែក​នេះ គ​.​ជ​.​ប រៀបចំ​ទីតាំង​ការិយាល័យ​បោះឆ្នោត ប្រមាណ​ជាង ២ ម៉ឺន​ការិយាល័យ នៅ​ទូទាំង​ប្រទេស និង​មាន​មន្ត្រី គ​.​ជ​.​ប បម្រើការ​តាម​ការិយាល័យ​បោះឆ្នោត ប្រមាណ​ជាង ១៤ ម៉ឺន​នាក់ ចាំ​ទទួល​ពលរដ្ឋ​ប្រមាណ ៩ លាន ៧ សែន​នាក់ អញ្ជើញ​ចូលរួម​បោះឆ្នោត៕

អត្ថបទ ៖ សំអឿន

The post ប្រធាន គ.ជ.ប ចុះពិនិត្យការរៀបចំការិយាល័យបោះឆ្នោតនៅសាលាគរុកោសល្យវិក្រិតការ ក្រុងតាខ្មៅ សម្រាប់បោះឆ្នោតថ្ងៃស្អែក appeared first on Kampuchea Thmey Daily.