ចាប់ខ្លួន Archives - Kampuchea Thmey Daily

នាយករដ្ឋមន្រ្តីជាប់ឆ្នោតហុងគ្រី ថា នឹងចាប់ខ្លួន នាយករដ្ឋមន្ត្រីអ៊ីស្រាអែល តាមដីកា ICC ប្រសិនចូលទឹកដីហុងគ្រី

Minea Neu — Tue, 21 Apr 2026 02:48:26 +0000

បន្ទាប់ពីការគ្រប់គ្រងអំណាចក្នុងនាមនាយករដ្ឋមន្ត្រីអស់រយៈពេល ១៦ ឆ្នាំ លោក Viktor Orban បានបញ្ចប់វាជាមួយការចាញ់ឆ្នោតដ៏អាម៉ាស់បំផុតមួយ កាលថ្ងៃទី១២ ខែមេសា ដែលមិនត្រឹមតែការចាញ់ឆ្នោតផ្ទាល់ខ្លួនលោក ប៉ុណ្ណោះទេ ប៉ុន្តែថែមទាំងនាំភាពអាម៉ាសដល់ប្រធានាធិបតីអាមេរិកលោក ដូណាល់ ត្រាំ និង ប្រធានាធិបតីរុស្ស៊ី លោក វ៉្លាឌីមៀរ ពូទីន ដែលគាំទ្រលោកទៀតផង។

គណបក្សស្តាំនិយម Tisza របស់ លោក Peter Magyar បានទទួលជ័យជម្នះយ៉ាងភ្លូកទឹកភ្លូកដី និងទទួលបានការសាទរយ៉ាងខ្លាំងពីប្រទេសនៅអឺរ៉ុបទៀតផង។ ជ័យជម្នះលើការបោះឆ្នោត របស់ លោក Peter Magyar បាននាំទៅដល់មហន្តរាយនៃទំនាក់ទំនងយ៉ាងល្អរវាងហុងគ្រីនិងអ៊ីស្រាអែល ដែលលោក Orban ខិតខំពង្រឹងក្រោមការគ្រប់គ្រងរបស់លោក។

យោងតាមសារព័ត៌មាន Politico និង TRT World ផ្សាយថ្ងៃទី២១ ខែមេសា ឆ្នាំ២០២៦ នាយករដ្ឋមន្ត្រីជាប់ឆ្នោតរបស់ប្រទេសហុងគ្រី លោក Peter Magyar លើកឡើងទាំងមានទំនុកចិត្តថា ប្រទេសហុងគ្រី ត្រូវតែចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) ប្រសិនបើហ៊ានឈានជើងចូលទៅក្នុងទឹកដីហុងគ្រី ខណៈតុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនស្រាប់ តាំងពីខែវិច្ឆិកា២០២៤។

នាយករដ្ឋមន្ត្រីថ្មីរបស់ប្រទេសហុងគ្រី លោក Peter Magyar ។ រូបភាព៖ Reuters

ICC បានចេញដីកាចាប់ខ្លួន លោក ណេតាន់យ៉ាហ៊ូ ក្នុងខែវិច្ឆិកា ឆ្នាំ២០២៤ ពីបទឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងនឹងមនុស្សជាតិ ជាបទបញ្ជាដែលប្រទេសជាសមាជិកមានកាតព្វកិច្ចអនុវត្តជាគោលការណ៍រួម។

ពីមុនមកប្រទេសហុងគ្រីបានបដិសេធពីការចាប់ខ្លួននាយករដ្ឋមន្ត្រីអ៊ីស្រាអែលពេល លោក ណេតាន់យ៉ាហ៊ូ ធ្វើទស្សនកិច្ចនៅទីក្រុង Budapest ក្នុងខែមេសា ឆ្នាំ២០២៥។

យ៉ាងណា លោក Magyar ប្រកាសថាលោកនឹងបញ្ឈប់ដំណើរការបដិសេធ ចាប់ខ្លួននាយករដ្ឋមន្រ្តីអ៊ីស្រាអែលរូបនេះ នៅថ្ងៃទី២ ខែមិថុនា ឆ្នាំ២០២៦ ។

លោក Magyar ប្រាប់អ្នកយកព័ត៌មានថា៖ « ប្រសិនបើប្រទេសមួយជាសមាជិកនៃ ICC ហើយមនុស្សម្នាក់ដែល ICC ចង់ចាប់ខ្លួន ចូលក្នុងទឹកដីរបស់យើង នោះយើងត្រូវតែឃុំខ្លួនគេដោយអនុលោមតាមច្បាប់អន្តរជាតិ»។

គួរបញ្ជាក់ថាកាលពីខែមេសា ឆ្នាំ២០២៥ រដ្ឋាភិបាលហុងគ្រីលើកឡើងថា ខ្លួនបានសម្រេចចិត្តដកខ្លួនចេញពី ICC ដោយប្រកាសពីចលនានេះ អំឡុងពេលដំណើរទស្សនកិច្ចផ្លូវរដ្ឋរបស់ លោក ណេតាន់យ៉ាហ៊ូ លើកដំបូងទៅកាន់អឺរ៉ុប ចាប់តាំងពីតុលាការចេញដីកាចាប់ខ្លួន៕

ប្រែសម្រួល៖ ណឺ មិនា

The post នាយករដ្ឋមន្រ្តីជាប់ឆ្នោតហុងគ្រី ថា នឹងចាប់ខ្លួន នាយករដ្ឋមន្ត្រីអ៊ីស្រាអែល តាមដីកា ICC ប្រសិនចូលទឹកដីហុងគ្រី appeared first on Kampuchea Thmey Daily.

យោធាថៃចាប់ខ្លួនយុវជនខ្មែរម្នាក់ ចូលទៅយកឯកសារនៅក្នុងផ្ទះរបស់ខ្លួន ដែលថៃឈ្លានពាននៅតំបន់បឹងត្រកួន

កម្ពុជាថ្មី — Wed, 14 Jan 2026 08:09:28 +0000

ប៉ោយប៉ែត៖យោធាថៃបានឃាត់ខ្លួនយុវជនខ្មែរម្នាក់ ដែលចូលទៅក្នុងលំនៅដ្ឋានរបស់ខ្លួនក្នុងដែនដែលថៃបានឈ្លានពានដាក់កុងទីន័រ និងរាយបន្លាលួសហ៊ុំព័ទ្ធយកនៅតំបន់បឹងត្រកួនស្ថិតនៅក្នុងឃុំគោករមៀតស្រុកថ្មពួកខេត្តបន្ទាយមានជ័យ ក្រោយបទឈប់បាញ់នៃជម្លោះព្រំដែនកម្ពុជាថៃក្នុងអំឡុងខែធ្នូ ឆ្នាំ២០២៥។

យុវជនដែលយោធាថៃបានឃាត់ខ្លួនមានឈ្មោះ ផល ប៉ោង ហៅមាស ដាលីន ភេទប្រុស អាយុ២៩ឆ្នាំ រស់នៅភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យមានឪពុកឈ្មោះមាស ឡេង ត្រូវបានយោធាថៃចាប់បញ្ជូនទៅកាន់ខេត្តស្រះកែវប្រទេសថៃកាលពីម៉ោង ៨៖០០នាទីថ្ងៃ ទី១៣ ខែមករា ឆ្នាំ២០២៦ នៅចំណុចខាងត្បូងផ្សារបឹងត្រកួន ភូមិផ្លូវបំបែក ឃុំគោករមៀត។តាមបុរស ឈ្មោះ មាស ឡេង ត្រូវជាឪពុកបានឱ្យដឹងថា មុនពេលកើតហេតុរូបគាត់បានដឹកកូនតាមម៉ូតូទៅឈប់ត្រង់រង្វង់មូលផ្លូវចូលច្រកតំបន់បឹងត្រកួន ឱ្យកូនចុះដើរចូលទៅផ្ទះយកឯកសារដោយរូបគាត់មិនហានចូលដោយចាំយូរពេកទើបដឹងថា កូនត្រូវយោធាថៃចាប់។

លោកបានបន្តថា មុនមានសង្រ្គាមរូបគាត់នឹងគ្រួសារប្រពន្ធកូនបានជម្លៀសទៅនៅខេត្តសៀមរាបជាមួយផ្ទះបងប្អូនមិនបានស្នាក់នៅតាមមណ្ឌលភៀសសឹកឡើយ។លុះថ្ងៃទី១៣ខែមករា ឆ្នាំ ២០២៦ក៏មកផ្ទះដែលត្រូវយោធាថៃដាក់កុងទីន័ររាយបន្លាលួសព័ទ្ធយកមិនអាចចូលបានក៏ឱ្យកូនចូល។ ដោយឡែកបើតាមលោក នៃ ពៅ មេឃុំគោករមៀតបានឱ្យដឹងថា ក្រោយទទួលបានព័តមានពីការឃាត់ខ្លួនពលរដ្ឋខ្មែរ ដោយយោធាថៃនៅចំណុចតំបន់បឹងត្រកួនដែលថៃហ៊ុំព័ទ្ធយកលោកបានស្រាវជ្រាវរកគ្រួសារមកសួរនាំបញ្ជក់ថា ពិតជាមានការចាប់មែនលើពលរដ្ឋរបស់គាត់មានផ្ទះនៅក្នុងភូមិបន្ទាយមានរិទ្ធ ហើយអាជ្ញាធរភូមិឃុំស្រុក កំពុងរៀបចំឯកសារដើម្បីឱ្យខាងទំនាក់ទំនងទាក់ទងទៅខាងថៃសុំឱ្យដោះលែងមកវិញ៕

ដោយ៖ អពៅ

The post យោធាថៃចាប់ខ្លួនយុវជនខ្មែរម្នាក់ ចូលទៅយកឯកសារនៅក្នុងផ្ទះរបស់ខ្លួន ដែលថៃឈ្លានពាននៅតំបន់បឹងត្រកួន appeared first on Kampuchea Thmey Daily.

តុលាការកំពូលសម្រេចបន្តឃុំខ្លួនបុរសម្នាក់ដាក់ពន្ធនាគារ ក្រោយចេញសែកស្អុយជាង៣០ម៉ឺនដុល្លារ

Kang Tola — Mon, 14 Jul 2025 12:11:46 +0000

សភាព្រហ្មទណ្ឌ នៃតុលាការកំពូល កាលពីនៅថ្ងៃទី១១ ខែកក្កដា ឆ្នាំ ២០២៥ បានសម្រេច បដិសេធបណ្ដឹងសារទុក្ខសុំនៅក្រៅឃុំបណ្ដោះអាសន្ន របស់ជនត្រូវចោទឈ្មោះ ប៊ុន ធៀម ដោយបន្តឃុំខ្លួនជននេះដាក់ពន្ធនាគារដដែល ក្រោយបានចេញស្អែកស្អុយដល់ម្ចាស់លុយនាពេលកន្លងមក។

ជននេះត្រូវបានសមត្ថកិច្ចចាប់ខ្លួនកាលពីថ្ងៃទី២៧ ខែវិច្ឆិកា ឆ្នាំ២០២៤ លុះដល់ថ្ងៃទី២៨ ខែវិច្ឆិកា ឆ្នាំ២០២៤ ចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចចេញដីកាឃុំខ្លួនដាក់ពន្ធនាគារ នៅមណ្ឌលអប់រំកែប្រែ(ម១)ជាបណ្ដោះអាសន្ន ពីបទ “មិនបំពេញកាតព្វកិច្ចចំពោះឧបករណ៍អាច ជួញដូរបាន “ចេញសែកស្អុយគ្មានសាច់ប្រាក់ចំនួន៣២៨.៣៧០$(សាមសិបពីរម៉ឺនប្រាំបីពាន់បីរយចិតសិបដុល្លារ)។

ជននេះបានប្រព្រឹត្ត នៅរាជធានីភ្នំពេញ កាលពីថ្ងៃទី០១ ខែសីហា ឆ្នាំ២០២៤ បទល្មើសព្រហ្មទណ្ឌដែល មានចែងឲ្យផ្តន្ទាទោសតាមបញ្ញត្តិមាត្រា២៣១ នៃច្បាប់ស្តីឧបករណ៍អាចជួញដូរបាន និងប្រតិបត្តិការទូទាត់សងប្រាក់។

ជនត្រូវចោទឈ្មោះ ប៊ុន ធៀម ភេទប្រុសអាយុ ៣៣ឆ្នាំ ជនជាតិខ្មែរ មុខរបរជាងឡាន ទីកន្លែងកំណើតនៅភូមិតាតូច ឃុំជ្រៃលាស់ ស្រុកពញាឮ ខេត្តកណ្តាល ទីលំនៅមុនពេលឃាត់ខ្លួន នៅផ្ទះលេខ២១១F ផ្លូវម៉ាស៊ីនទឹក ភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ(ឃុំខ្លួន)។

ប្រភពឲ្យដឹងថា ដើមចមដំបូង កាលពីចុងឆ្នាំ២០២៣ ជនត្រូវចោទឈ្មោះ ប៊ុន ធៀម និងប្រពន្ធឈ្មោះ ហឿន ស្រីតុន បានមកទំនាក់ទំនង និងសុំខ្ចីប្រាក់ពីដើមបណ្ដឹង(ជនរងគ្រោះ)ចំនួន ៣២៨.៣៧០ដុល្លារ ដើម្បីយកទៅបង្វិល ក្នុងមុខរបររកស៊ី ដោយបានសន្យាថា នឹងសងមកឱ្យវិញនៅដើមឆ្នាំ២០២៤។

ក្នុងនោះជនត្រូវចោទ ប៊ុន ធៀម និងប្រពន្ធឈ្មោះ ហឿន ស្រីតុន បានចេញមូលប្បទានប័ត្រចំនួន១សន្លឹកលេខ១៤០៧៥៦ ចុះថ្ងៃទី១ ខែសីហា ឆ្នាំ២០២៤ របស់ធនាគារជីបម៉ុង (CHIPMONG COMMERCIAL BANK)ចុះហត្ថលេខាលើមូលប្បទានប័ត្រ ដោយប្ដីឈ្មោះ ប៊ុន ធៀម និងមានទឹកប្រាក់ចំនួន ៣២៨.៣៧០ (សាមសិបពីរម៉ឺនប្រាំបីពាន់បីរយចិតសិបដុល្លារ)មកឱ្យជនរងគ្រោះ សម្រាប់តម្កល់ទុកធានាបំណុល និងទូទាត់សងប្រាក់។

លុះដល់ថ្ងៃកំណត់ ជនរងគ្រោះបានយកសន្លឹកមូលប្បទានប័ត្រខាងលើ ទៅបើកប្រាក់នៅធនាគារ តែត្រូវខាងធនាគារបញ្ជាក់ត្រឡប់មកវិញថា មូលប្បទានប័ត្រនោះ គ្មានសាច់ប្រាក់នោះទេជា(សែកស្អុយ)។

ទន្ទឹមនិងនោះជនរងគ្រោះ បានទំនាក់ទំនងទៅឈ្មោះ ប៊ុន ធៀម និងឈ្មោះ ហឿន ស្រីតុន ជាច្រើនលើកច្រើនសារ។ប៉ុន្តែអ្នកទាំងពីរពុំបាន ឆ្លើយតប និងព្យាយាមគេចវេស មិនបំពេញកាតព្វកិច្ច និងមិនព្រមចេញមុខ មកដោះស្រាយឡើយ។

ជាវិធីទាល់ច្រក នៅថ្ងៃទី២៣ ខែតុលា ឆ្នាំ២០២៤ ជនរងគ្រោះក៏បានប្ដឹងប្ដីប្រពន្ធ១គូនេះ ចូលអយ្យការអមសាលាដំបូងរាជធានីភ្នំពេញ តែម្តងទៅ រហូតតុលាការអនុវត្តនីតិវិធី ចាប់និងឃុំខ្លួនជនត្រូវចោទឈ្មោះ ប៊ុន ធៀម ខណៈឈ្មោះ ហឿន ស្រីតុន ត្រូវជាប្រពន្ធរបស់ជនត្រូវចោទ បានព្យាយាមប្ដឹងតវ៉ាសុំឱ្យប្ដីនៅក្រៅឃុំជាបន្តបន្ទាប់ ។ ករណីនេះ តុលាការទាំង៣ថ្នាក់ បានអនុវត្តច្បាប់ ដោយមិនអនុញ្ញាតឱ្យជនត្រូវចោទឈ្មោះ ប៊ុន ធៀម បាននៅក្រៅឃុំនោះឡើយ។

ប្រភពបន្តថា សំណុំរឿងចេញសែកស្អុយមួយនេះ សាលាដំបូងរាជធានីភ្នំពេញ នឹងប្រកាសសាលក្រមផ្ដន្ទាទោសជនត្រូវចោទឈ្មោះ ប៊ុន ធៀម នៅថ្ងៃទី១៧ ខែកក្កដា ឆ្នាំ២០២៥ ខាងមុខនេះ ។

ជាមួយគ្នានេះ ជនរងគ្រោះ សុំស្នើយ៉ាងទទូចដល់ សាលាដំបូងរាជធានីភ្នំពេញ មេត្តាវិនិច្ឆ័យសម្រេចសេចក្ដី និងផ្ដន្ទាទោសជនត្រូវចោទឱ្យបានធ្ងន់ធ្ងរបំផុត និងសុំឱ្យតុលាការចេញដីកា បង្គាប់មកជនត្រូវចោទឈ្មោះ ប៊ុន ធៀម រួមនិងប្រពន្ធ ឱ្យប្រគល់ប្រាក់ចំនួន ៣២៨.៣៧០ដុល្លារមកឱ្យខ្លួនវិញ និងសុំទាមទារសំណងជំងឺចិត្ត សោហ៊ុយផ្សេងៗ សេវាកម្មផ្លូវច្បាប់ចំនួន១០ម៉ឺនដុល្លារទៀត ដើម្បីមានយុត្តិធម៌ សម្រាប់ខ្លួនដែលជាជនរងគ្រោះ៕

The post តុលាការកំពូលសម្រេចបន្តឃុំខ្លួនបុរសម្នាក់ដាក់ពន្ធនាគារ ក្រោយចេញសែកស្អុយជាង៣០ម៉ឺនដុល្លារ appeared first on Kampuchea Thmey Daily.

បុរសម្នាក់ ត្រូវបានប៉ុស្តិ៍នគរបាលរដ្ឋបាលសង្កាត់យក្សឡោមចាប់ខ្លួន ក្រោយមកដាក់ពាក្យបណ្តឹងឱ្យជួយរកថ្នាំញៀន

Ken Malis — Sat, 29 Mar 2025 03:30:54 +0000

នៅយប់ថ្ងៃទី២៧ ខែមីនា ឆ្នាំ២០២៥ សមត្ថកិច្ចនៃស្នងការដ្ឋាននគរបាលខេត្តរតនគិរី ដោយមានការដឹកនាំសម្របសម្រួលនិតិវិធីពីលោក ឡុង ហុកមេង ព្រះរាជអាជ្ញា នៃអយ្យការអមសាលាដំបូងខេត្ត បានឃាត់ខ្លួនជនសង្ស័យ ១នាក់ពាក់ព័ន្ធករណី រក្សាទុកដោយខុសច្បាប់នូវសារធាតុញៀន នៅចំនុចប៉ុស្តិ៍នគរបាលរដ្ឋបាលសង្កាត់យក្សឡោម ស្ថិតក្នុងភូមិឡាប៉ូ សង្កាត់យក្សឡោម ក្រុងបានលុង ខេត្តរតនគិរី។

កាលពីថ្ងៃទី២៦ ខែមិនា ឆ្នាំ២០២៥ មានប្រជាពលរដ្ឋរស់នៅភូមិអភិវឌ្ឍន៍ សង្កាត់យក្សឡោម បានប្រទះឃើញសត្វឆ្កែមួយក្បាលបានពាំថង់មួយដុំ ក្នុងថង់នោះមានច្រកវត្ថុម៉្យាងមានសណ្ឋានដូចសាច់ជូ ដោយមានការសង្ស័យភ្លាមនោះប្រជាពលរដ្ឋខាងលើបានរាយការណ៍ជូមមកសមត្ថកិច្ច។ ដោយបានទទួលពត៌មានពីប្រជាពលរដ្ឋរាយការណ៍ដូចខាងលើសមត្ថកិច្ចក៏បានចុះទៅដល់ចំនុចរាយការណ៍នោះ ហើយក៏បានត្រួតពិនិត្យតាមវិជ្ជាជីវៈជំនាញ និងបច្ចេកទេសតេស្តពិសោធន៍ឃើញថាពិតជាសារធាតញៀនប្រភេទមេតំហ្វេតាមីន(ម៉ាទឹកកក)ពិតប្រាកដមែន។

ក្រោយពីបានត្រួតពិនិត្យចប់សព្វគ្រប់សមត្ថកិច្ចបានវិចខ្ចប់រក្សាទុក និងបន្តនិតិវិធីក្នុងការស្រាវជ្រាវស៊ើបអង្កេតរកម្ចាស់កញ្ចប់សារធាតុញៀននោះជាបន្ត។

លុះយប់ថ្ងៃទី២៧ ខែឆ្នាំដដែល មានបុរសម្នាក់បានមកជួបសមត្ថកិច្ចដើម្បីសុំដាក់ពាក្យប្ដឹងករណីរូបខ្លួនបាត់គ្រឿងញៀន។ ក្រោយពីសមត្ថកិច្ចបានសាកសួរ និងស្ដាប់ចម្លើយរបស់ជនសង្ស័យចប់ សមត្ថកិច្ចក៏បានឃាត់ខ្លួនជនសង្ស័យរូបនេះតែម្ដងពាក់ព័ន្ធករណីរក្សាទុកនូវសារធាតុញៀន។

ជនសង្ស័យមានឈ្មោះ ឡុច ត្រា ភេទប្រុស អាយុ ៣៥ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិភ្នំ សង្កាត់យក្សឡោម ក្រុងបានលុង ខេត្តរតនគិរី។ ជនសង្ស័យខាងលើវិជ្ជមាន(+) នៃសារធាតុញៀន។ សម្ភារៈដកហូតរួមមាន ក្រាមសថ្លាសង្ស័យជាសារធាតុញៀនចំនួន ៦ថង់ ទម្ងន់សុទ្ធ ២.៩៩ក្រាម និងទូរសព្ទ័ ១គ្រឿង។

បច្ចុប្បន្នជនសង្ស័យខាងលើ ត្រូវបានឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្តរតនគិរីដើម្បីអនុវត្តនិតិវិធី កសាងសុំណុំរឿងបញ្ជូនទៅសាលាដំបូងខេត្តចាត់ការតាមផ្លូវច្បាប់៕

ដោយ៖ ខៀវ ចាប

The post បុរសម្នាក់ ត្រូវបានប៉ុស្តិ៍នគរបាលរដ្ឋបាលសង្កាត់យក្សឡោមចាប់ខ្លួន ក្រោយមកដាក់ពាក្យបណ្តឹងឱ្យជួយរកថ្នាំញៀន appeared first on Kampuchea Thmey Daily.

អាវុធហត្ថខេត្តសៀមរាប បញ្ជូនជនសង្ស័យ ៥នាក់ ទៅតុលាការ ពាក់ព័ន្ធករណីលួចម៉ូតូ និងគាស់ផ្ទះយ៉ាងសកម្ម

Ken Malis — Sun, 01 Sep 2024 08:43:03 +0000

ក្រុមជនសង្ស័យចំនួន ៥នាក់ ត្រូវបានកម្លាំងកងរាជអាវុធហត្ថខេត្តសៀមរាបធ្វើការចាប់ខ្លួនបញ្ជូនទៅតុលាការ ពាក់ព័ន្ធករណី លួចម៉ូតូ និងគាស់ផ្ទះ យ៉ាងសកម្មក្នុងខេត្ត។

មន្រ្តីអាវុធហត្ថខេត្តសៀមរាប បានឱ្យដឹងថា ជនសង្ស័យចំនួន ២នាក់ ត្រូវបានសាកសួរនៅការិយាល័យជំនាញកងរាជអាវុធហត្ថខេត្តសៀមរាប និងបានបន្តឃាត់ខ្លួនជនសង្ស័យចំនួន ៣នាក់ទៀត នៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប និងនៅចំណុច ភូមិតាកុះ ឃុំព្រះដាក់ ស្រុកបន្ទាយស្រី ខេត្តសៀមរាប។

ជនសង្ស័យទាំង ០៥នាក់ រួមមាន ១/. ឈ្មោះ ឡុង គឹមលី ភេទប្រុស អាយុ ២៧ឆ្នាំ មុខរបរ មិនពិតប្រាកដ។ ២/. ឈ្មោះ លី សុផាន់ណា ភេទប្រុស អាយុ ២៤ឆ្នាំ មុខរបរ មិនពិតប្រាកដ។ ៣/. ឈ្មោះ វ៉ែន រ៉ាឌី ភេទប្រុស អាយុ ៣៦ឆ្នាំ មុខរបរ មិនពិតប្រាកដ។ ៤/. ឈ្មោះ អ៊ូ ណាត ភេទប្រុស អាយុ ៤១ឆ្នាំ មុខរបរ មិនពិតប្រាកដ។ ៥/. ឈ្មោះ លាប បារាំង ភេទប្រុស អាយុ ២៦ឆ្នាំ មុខរបរ មិនពិតប្រាកដ។

ចំណែក វត្ថុតាងឃាត់បាន រួមមាន ម៉ូតូចំនួន ០៤គ្រឿង ១/. ម៉ាកស៊ុយសាគីស្មាស់រ៉េវ៉ូ ពណ៌ខ្មៅ ផលិតឆ្នាំ២០០៩ ពាក់ផ្លាកលេខ សៀមរាប 1E-5398 ។ ២/. ម៉ាកហុងដាទ្រីម សេ១២៥ ពណ៌ខ្មៅ ផលិតឆ្នាំ២០១៤ ពាក់ផ្លាកលេខ បន្ទាយមានជ័យ 1J-8911 ។ ៣/. ម៉ាកហុងដាទ្រីម សេ១២៥ ផលិតឆ្នាំ២០២១ ពាក់ផ្លាកលេខ កណ្តាល 1AL-7299 ។ ៤/. ម៉ាកហុងដាទ្រីម សេ១២ក ផលិតឆ្នាំ២០១៨ ពាក់ផ្លាកលេខ ភ្នំពេញ 1FL-1254 រួមនឹងសម្ភារមួយចំនួនទៀតផងដែរ។

ការបង្ក្រាបនេះធ្វើឡើង នៅវេលាម៉ោង ១១៖០០នាទី ថ្ងៃទី២៧ ខែសីហា ឆ្នាំ២០២៤ ដោយកម្លាំងជំនាញកងរាជអាវុធហត្ថខេត្ត បានល្បាតនៅតាមបណ្តោយផ្លវ ៦០ម៉ែត្រ ស្ថិតនៅភូមិអញ្ចាញ សង្កាត់នគរធំ ក្រុងសៀមរាប ក្រោមវិធានការរបស់ លោកឧត្តមសេនីយ៍ត្រី សៀ ទីន មេបញ្ជាការ កងរាជអាវុធហត្ថ ខេត្តសៀមរាប។

ក្រោយឃាត់ខ្លួន ជនសង្ស័យទាំង ៥នាក់ បានសារភាពដូចៗគ្នាថា ពួកគេពិតជាបានប្រព្រឹត្តអំពើលួចយ៉ាងសកម្ម នៅក្នុងភូមិសាស្ត្រក្រុងសៀមរាប ពិតប្រាកដមែន។ សូមបញ្ជាក់ថា កម្លាំងអាវុធហត្ថខេត្តសៀមរាប ធ្វើការល្បាតជាប្រចាំ ដើម្បីការពារសន្តិសុខ សុវត្ថិភាព ជូនប្រជាពលរដ្ឋ ក៏ដូចជាភ្ញៀវ ទេសចរណ៍ជាតិ-អន្តរជាតិ ក្នុងភូមិសាស្ត្រខេត្តសៀមរាប៕

ដោយ៖ជុន កុសល

The post អាវុធហត្ថខេត្តសៀមរាប បញ្ជូនជនសង្ស័យ ៥នាក់ ទៅតុលាការ ពាក់ព័ន្ធករណីលួចម៉ូតូ និងគាស់ផ្ទះយ៉ាងសកម្ម appeared first on Kampuchea Thmey Daily.

អ្នកនាំពាក្យ៖ សមត្ថកិច្ចឃាត់ខ្លួន ប្រធានបក្សកម្លាំងជាតិ ព្រោះបង្ហោះសារញុះញង់បង្កភាពវឹកវរដល់សង្គម

Ngoeul Narath — Thu, 09 May 2024 08:40:18 +0000

ប្រធានបក្សកម្លាំងជាតិ លោក ស៊ុន ចន្ធី ត្រូវបានសមត្ថកិច្ចឃាត់ខ្លួន នាម៉ោង៩ព្រឹកថ្ងៃព្រហស្បតិ៍ ទី០៩ ខែឧសភា នេះ នៅអាកាសយានដ្ឋានអន្តរជាតិភ្នំពេញ បន្ទាប់ពីវិលត្រឡប់ពីប្រទេសជប៉ុនចូលមកកម្ពុជាវិញ។ ជុំវិញបញ្ហានេះ អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់«កម្ពុជាថ្មី»ថា ការឃាត់ខ្លួននេះ គឺព្រោះតែលោក ស៊ុន ចន្ធី ប្រើប្រាស់បណ្ដាញសង្គមបង្ហោះសារញុះញង់បង្កភាពវឹកវរក្នុងសង្គម។

អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា បានថ្លែងដូច្នេះថា « នៅព្រឹកមិញនេះ យើងបានឃាត់ខ្លួនគាត់ (លោក ស៊ុន ចន្ធី) យកមកសាកសួរនៅស្នងការដ្ឋាននគរបាលរាជធានីភ្នំពេញ ដើម្បីបន្តអនុវត្តន៍តាមនីតិវិធី បុគ្គលឈ្មោះ ស៊ុន ចន្ធី នេះ ដោយរងការចោទប្រកាន់ពីបទញុះញង់បង្កភាពវឹកវរធ្ងន់ធ្ងរដល់សន្តិសុខសង្គម តាមរយៈការបង្ហោះផ្សព្វផ្សាយព័ត៌មានលើបណ្ដាញសង្គមក្នុងចេតនាញុះញង់បំភ្លៃព័ត៌មានមិនពិតនាំឱ្យប្រជាពលរដ្ឋមានការយល់ច្រឡំ បង្កឱ្យមានភាពវឹកវរក្នុងសង្គម»។

សម្រាប់ការឃាត់ខ្លួននេះ អ្នកនាំពាក្យបានអះអាងថា ការចាប់ខ្លួននេះ គឺអនុវត្តន៍តាមដីការរបស់តំណាងអយ្យការអមសាលាដំបូងរាជធានីភ្នំពេញ ពាក់ព័ន្ធសំណុំរឿង ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ចុះថ្ងៃទី០៧ ខែឧសភា ឆ្នាំ២០២៤។

អ្នកនាំពាក្យរូបនេះ ក៏បានអះអាងដែរ ការចាប់ឃាត់ខ្លួននេះ គឺមិនជាប់ពាក់ព័ន្ធជាមួយរឿងនយោបាយឡើយ សមត្ថកិច្ចចាប់ខ្លួន ព្រោះតែប្រព្រឹត្តបទល្មើសព្រហ្មទណ្ឌខុសច្បាប់៕

The post អ្នកនាំពាក្យ៖ សមត្ថកិច្ចឃាត់ខ្លួន ប្រធានបក្សកម្លាំងជាតិ ព្រោះបង្ហោះសារញុះញង់បង្កភាពវឹកវរដល់សង្គម appeared first on Kampuchea Thmey Daily.

ទីបំផុតសមត្ថកិច្ចខេត្តសៀមរាបឃាត់ខ្លួនឧកញ៉ា ឡេង ចាន់ណា និងបក្ខពួកតាម ពាក្យបណ្តឹងរបស់ពលរដ្ឋ

Kang Tola — Tue, 12 Mar 2024 11:53:33 +0000

ខេត្តសៀមរាប៖នៅរសៀលថ្ងៃទី១២ ខែមីនា ឆ្នាំ២០២៤នេះនៅខេត្តសៀមរាប ឧកញ៉ា ឡេង ចាន់ណា ប្រធានក្រុមហ៊ុន ប្រ៊ីនលាន ដែលឆបោកលុយប្រជាពលរដ្ឋរឿងដីធ្លី ផ្ទះ និងការវិនិយោគក្នុងទំហំទឹកប្រាក់ រាប់លានដុល្លារនោះ ត្រូវបានកម្លាំងនគរបាលចាប់ខ្លួនហើយ នេះបើយោងតាមសេចក្តីប្រកាស របស់អយ្យការអមសាលាដំបូងខេត្តសៀមរាប។

ឧកញ៉ា ឡេង ចាន់ណា និងបក្ខពួករបស់ខ្លួន ត្រូវបានប្រជាពលរដ្ឋចោទថាបានបោកលុយរាប់លានដុល្លារ ក្នុងរូបភាពទិញដី ផ្ទះ និងការវិនិយោគបានការប្រាក់ខ្ពស់ តែទីបំផុតអ្នកខ្លះបានការស៊ីតែប៉ុន្មានខែ ក៏លែងបានរហូត។ ប្រជាពលរដ្ឋជាច្រើននាក់ បានចាញ់បោកឧកញ៉ា ឡេង ចាន់ណា ដោយខ្លះខ្ចីលុយពីធនាគារ ដើម្បីមកនិវិយោគជាមួយ ដែលរហូតពេលនេះត្រូវសងធនាគារវិញយ៉ាងលំបាក។

ប្រជាពលរដ្ឋរងគ្រោះបានធ្វើការតវ៉ាជាច្រើនខែមកហើយ ចំពោះអំពើឆបោកដ៏ធំមួយនេះ ប៉ុន្តែកន្លងទៅបើទោះបីមានការសម្របសម្រួលពីអាជ្ញាធរ និងមន្រ្តីពាក់ព័ន្ធ ក៏មិនទទួលបានលទ្ធផលនោះទេ។ នៅទំបំផុត កម្លាំងនគរបាលខេត្តសៀមរាប បានអនុវត្តដីការបស់តំណាងអយ្យការ ក៏សម្រេចធ្វើការឃាត់ខ្លួន ឧកញ៉ារូបនេះតែម្តង។

អ្នកនាំពាក្យអយ្យការអមសាលាដំបូងខេត្តសៀមរាប មានកិត្តិយសសូមជម្រាបជូនបណ្តាញ សារព័ត៌មាន និងសាធារណៈជន ឲ្យបានជ្រាបថា សមត្ថកិច្ចនគរបាលនៃស្នងការដ្ឋាននរគបាលខេត្ត សៀមរាប បានឃាត់ខ្លួនឈ្មោះ ឡេង ចាន់ណា អគ្គនាយកក្រុមហ៊ុនទ្រីលានស៊ីធីមើលដ៍ ឯ.ក និងបក្ខពួក តាមដីកាបញ្ជាឲ្យចូលខ្លួនរបស់តំណាងអយ្យការអមសាលាដំបូងខេត្តសៀមរាប ដោយផ្អែកតាម ពាក្យបណ្តឹងរបស់ប្រជាពលរដ្ឋដែលបានដាក់ពាក្យបណ្ដឹងមកអយ្យការអមសាលាដំបូងខេត្តសៀមរាប ពាក់ ព័ន្ធនឹងបទល្មើស ឆបោក រំលោភលើទំនុកចិត្ត និងចេញមូលប្បទានបត្រគ្មានសាច់ប្រាក់ ហើយជនសង្ស័យ និងបក្ខពួក នឹងត្រូវបញ្ជូនមកអយ្យការអមសាលាដំបូងខេត្តសៀមរាប ដើម្បីចាត់ការតាមនីតិវិធី។ អយ្យការ នឹងជូនព័ត៌មានដើម្បីឲ្យសាធារណៈជនជ្រាបពីចំណាត់ការជាបន្តបន្ទាប់នូវសំណុំរឿងនេះ៕

អត្ថបទ៖ កុសល

The post ទីបំផុតសមត្ថកិច្ចខេត្តសៀមរាបឃាត់ខ្លួនឧកញ៉ា ឡេង ចាន់ណា និងបក្ខពួកតាម ពាក្យបណ្តឹងរបស់ពលរដ្ឋ appeared first on Kampuchea Thmey Daily.

នគរបាលស្រុកលំផាត់ចាប់ខ្លួន អ្នកសារព័ត៌មានម្នាក់ និងដៃជើង២នាក់ ព្រោះឆបោកពលរដ្ឋរឿងដីធ្លី

Ngoeul Narath — Mon, 05 Feb 2024 12:52:49 +0000

ក្រោមការសម្របសម្រួលនីតិវិធី ពីព្រះរាជអាជ្ញារងអមសាលាដំបូងខេត្តរតនគិរី លោកលាង អ៊ូ កាលពីថ្ងៃទី៤ ខែកុម្ភ: ឆ្នាំ២០២៤ វេលាម៉ោង១១និង៤០នាទីថ្ងៃត្រង់ កម្លាំងអធិការនគរបាលស្រុកលំផាត់បានចាប់ឃាត់ខ្លួន មេខ្លោង៣នាក់ ក្នុងនោះមានអ្នកសារព័ត៌មានម្នាក់ ពាក់ព័ន្ធករណីឆបោកប្រាក់ពីពលរដ្ឋជាថ្នូរនឹងការទទួលបានដីធ្លី។

អធិការនគរបាលស្រុកលំផាត់ លោក ក្លល់ ថើង បានឲ្យកម្ពុជាថ្មី ដឹងតាមប្រព័ន្ធទូរស័ព្ទនៅថ្ងៃទី៥កុម្ភ:នេះ ថា លោកអនុវត្តន៍ទៅតាមបទបញ្ជារបស់ព្រះរាជអាជ្ញា ព្រោះជនសង្ស័យទាំង៣នាក់នេះ ជាប់ពាក់ព័ន្ធករណីបំផុសបំផុលឲ្យប្រជាពលរដ្ឋផ្ដិតមេដៃចែកដីធ្លី ខណៈអាជ្ញាធរស្រុក ខេត្តមិនបានដឹង។

បើតាមលោក ក្លល់ ថើង ជនសង្ស័យទាំង៣នាក់រួមមាន ទី១/ ឈ្មោះ ណយ ចិន ភេទប្រុស អាយុ៤២ឆ្នាំ ជនជាតិខ្មែរ មុខរបរអ្នកយកព័ត៌មានឲ្យសារព័ត៌មានក្រុងកម្ពុជា មានទីលំនៅបច្ចុប្បន្នភូមិក្បាលរមាស ឃុំក្បាលរមាស ស្រុកសេសាន្ត ខេត្តស្ទឹងត្រែង។ ទី២/ឈ្មោះ ឡុង ចិន្តា ភេទប្រុស អាយុ៥៣ឆ្នាំ ជនជាតិខ្មែរ មុខរបរលក់អីវ៉ាន់ចាប់ហួយ ស្នាក់នៅចំណុចអូររ៉ាហា ស្ថិតក្នុងភូមិស្រែពកធំ ឃុំសេរីមង្គល ស្រុកកូនមុំ ខេត្តរតនគិរី និងទី៣/ឈ្មោះ គឹម ប៊ុនហន ភេទប្រុស អាយុ៤៧ឆ្នាំ ជនជាតិខ្មែរ មុខរបរសន្តិសុខក្រុមហ៊ុនចម្ការចេក ស្នាក់នៅភូមិស្រែពកធំ ឃុំសេរីមង្គល ស្រុកកូនមុំ ខេត្តរតនគិរី។

សម្រាប់ដំណើរដើមទងនៅមុនការចាប់ខ្លួនគឺ កាលពីថ្ងៃទី៩ ខែមករា ឆ្នាំ២០២៤ បុគ្គលឈ្មោះ ណយ ចិន ជាអ្នកសារព័ត៌មានបានផឹកស្រាស នៅផ្ទះឈ្មោះ ឡុង ចិន្ដា ដោយក្នុងពេលនោះបានសួរនាំអំពីបញ្ហាដីនៅមុខផ្ទះរបស់ឈ្មោះឡុង ចិន្តា ថាជាដីរបស់អ្នកណា។ ជាការឆ្លើយតប ឈ្មោះឡុង ចិន្តា បានប្រាប់ថា ដីដែលនៅខាងមុខផ្ទះរបស់ខ្លួននោះ ជាដីរបស់សហគមន៍។ ស្រាប់តែពេលនោះឈ្មោះណយ ចិន បានឲ្យឈ្មោះ ឡុង ចិន្តា និងឈ្មោះកឹម ប៊ុនហន ស្រង់ឈ្មោះយកលេខទូរស័ព្ទ និងឱ្យផ្តិតមេដៃប្រជាពលរដ្ឋដែលខ្វះខាតដី ដើម្បីស្នើសុំតាមរយៈអង្គការការពារកម្ពុជាដើម្បីយុត្តិធម៌។

បន្ទាប់មក ឈ្មោះ ឡុង ចិន្តា និងឈ្មោះ កឹម ប៊ុនហន ក៏បានស្រង់ឈ្មោះ និងមេដៃរបស់ប្រជាពលរដ្ឋ ដែលខ្វះខាតដី ។ ពេលនោះឈ្មោះឡុង ចិន្ដា និងគឹម ប៊ុនហន បានតម្រូវឲ្យប្រជាពលរដ្ឋបង់លុយ២ សរុបជាទឹកប្រាក់ទាំងអស់ចំនួន៨០ម៉ឺនរៀល ជាមួយនឹងពាក្យសន្យាថា ក្នុងមួយគ្រួសារៗទទួលបានដីទំហំ២៥ mx៥០m និងដីចម្ការចំនួន៥ហិកតា។ ក្នុងករណី មិនបានដី គឺឈ្មោះ ណយ ចិន ជាអ្នកទទួលខុសត្រូវសង់លុយវិញឲ្យប្រជាពលរដ្ឋ ដោយមិនឲ្យបាត់លុយមួយកាក់មួយសេនទេ។

តាមចម្លើយសារភាពរបស់ឈ្មោះឡុង ចន្តា និងឈ្មោះ គឹម ប៊ុនហន បានរៀបរាប់ ស្រដៀងគ្នាថា ពួកគេបានធ្វើតាមបញ្ជារបស់ឈ្មោះណយ ចិន ដែលបានឲ្យប្រជាពលរដ្ឋផ្តិតមេដៃ និងបង់លុយមុនចំនួន២០ម៉ឺនរៀល ដោយស្រង់បានចំនួន២៩៩គ្រួសារស្មើ និង២៩៩នាក់ ប៉ុន្តែមិនទាន់បានទទួលលុយនោះទេ។

ឈ្មោះឡុង ចន្ដានិងឈ្មោះគឹម ប៊ុនហន ក៏បានណាត់ជាមួយប្រជាពលរដ្ឋឲ្យយកលុយមកបង់នៅថ្ងៃទី៦ ខែកុម្ភៈ ឆ្នាំ២០២៤ នៅផ្ទះឈ្មោះឡុង ចិន្តា នៅចំណុចអូររ៉ាហា ស្ថិតក្នុងភូមិស្រែពកធំ ឃុំសិរីមង្គល ស្រុកកូនមុំ ខេត្តរតនគិរី។

ក្នុងពេលចុះឃាត់ខ្លួន សមត្ថកិច្ចដកហូតវត្ថុតាងមួយចំនួនដូចជា ក្រដាស់ដែលមានបញ្ជីឈ្មោះ និងស្នាមមេដៃប្រជាពលរដ្ឋ ចំនួន៣៤សន្លឹក កាតប័ណ្ណព័ត៌មាន ១សន្លឹក ពាក្យស្នើសុំជួយអន្តរាគមន៍ ២សន្លឹក លិខិតបញ្ជាបេសកកម្ម ១សន្លឹក ក្រដាស់ឡូហ្គោអង្គការ ១សន្លឹក បង្កាន់ដៃទទួលពាក្យស្នើសុំប្រើប្រាស់ដីធ្លី ២សន្លឹក និងពាក្យស្នើសុំអាស្រ័យផលដីធ្លី ១សន្លឹក។

បច្ចុប្បន្នជនសង្ស័យទាំង៣នាក់ ត្រូវបានសមត្ថកិច្ចនគរបាលស្រុកលំផាត់រៀបចំសំណុំរឿងបញ្ជូនមកតុលាការខេត្តរតនគីរី នៅល្ងាចថ្ងៃទី៥ ខែកុម្ភៈ ឆ្នាំ២០២៤ ដើម្បីចាត់ការបន្តទៅតាមនីតិវិធីច្បាប់៕

អត្ថបទ៖ វុទ្ធឦសាន

The post នគរបាលស្រុកលំផាត់ចាប់ខ្លួន អ្នកសារព័ត៌មានម្នាក់ និងដៃជើង២នាក់ ព្រោះឆបោកពលរដ្ឋរឿងដីធ្លី appeared first on Kampuchea Thmey Daily.