អ្នកនាំពាក្យ៖ សមត្ថកិច្ចឃាត់ខ្លួន ប្រធានបក្សកម្លាំងជាតិ ព្រោះបង្ហោះសារញុះញង់បង្កភាពវឹកវរដល់សង្គម

ប្រធានបក្សកម្លាំងជាតិ លោក ស៊ុន ចន្ធី ត្រូវបានសមត្ថកិច្ចឃាត់ខ្លួន នាម៉ោង៩ព្រឹកថ្ងៃព្រហស្បតិ៍ ទី០៩ ខែឧសភា នេះ នៅអាកាសយានដ្ឋានអន្តរជាតិភ្នំពេញ បន្ទាប់ពីវិលត្រឡប់ពីប្រទេសជប៉ុនចូលមកកម្ពុជាវិញ។ ជុំវិញបញ្ហានេះ អ្នកនាំពាក្យស្នងការដ្ឋាននគរបាលរាជធានីភ្នំពេញបានប្រាប់«កម្ពុជាថ្មី»ថា ការឃាត់ខ្លួននេះ គឺព្រោះតែលោក ស៊ុន ចន្ធី ប្រើប្រាស់បណ្ដាញសង្គមបង្ហោះសារញុះញង់បង្កភាពវឹកវរក្នុងសង្គម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សំ វិច្ឆិកា  បានថ្លែងដូច្នេះថា « នៅព្រឹកមិញនេះ យើងបានឃាត់ខ្លួនគាត់ (លោក ស៊ុន ចន្ធី) យកមកសាកសួរនៅស្នងការដ្ឋាននគរបាលរាជធានីភ្នំពេញ ដើម្បីបន្តអនុវត្តន៍តាមនីតិវិធី បុគ្គលឈ្មោះ ស៊ុន ចន្ធី នេះ ដោយរងការចោទប្រកាន់ពីបទញុះញង់បង្កភាពវឹកវរធ្ងន់ធ្ងរដល់សន្តិសុខសង្គម តាមរយៈការបង្ហោះផ្សព្វផ្សាយព័ត៌មានលើបណ្ដាញសង្គមក្នុងចេតនាញុះញង់បំភ្លៃព័ត៌មានមិនពិតនាំឱ្យប្រជាពលរដ្ឋមានការយល់ច្រឡំ បង្កឱ្យមានភាពវឹកវរក្នុងសង្គម»។

សម្រាប់ការឃាត់ខ្លួននេះ អ្នកនាំពាក្យបានអះអាងថា ការចាប់ខ្លួននេះ គឺអនុវត្តន៍តាមដីការរបស់តំណាងអយ្យការអមសាលាដំបូងរាជធានីភ្នំពេញ ពាក់ព័ន្ធសំណុំរឿង ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ចុះថ្ងៃទី០៧ ខែឧសភា ឆ្នាំ២០២៤។

អ្នកនាំពាក្យរូបនេះ ក៏បានអះអាងដែរ ការចាប់ឃាត់ខ្លួននេះ គឺមិនជាប់ពាក់ព័ន្ធជាមួយរឿងនយោបាយឡើយ សមត្ថកិច្ចចាប់ខ្លួន ព្រោះតែប្រព្រឹត្តបទល្មើសព្រហ្មទណ្ឌខុសច្បាប់៕