បុរសម្នាក់ ត្រូវបានប៉ុស្តិ៍នគរបាលរដ្ឋបាលសង្កាត់យក្សឡោមចាប់ខ្លួន ក្រោយមកដាក់ពាក្យបណ្តឹងឱ្យជួយរកថ្នាំញៀន

នៅយប់ថ្ងៃទី២៧ ខែមីនា ឆ្នាំ២០២៥ សមត្ថកិច្ចនៃស្នងការដ្ឋាននគរបាលខេត្តរតនគិរី ដោយមានការដឹកនាំសម្របសម្រួលនិតិវិធីពីលោក ឡុង ហុកមេង ព្រះរាជអាជ្ញា នៃអយ្យការអមសាលាដំបូងខេត្ត បានឃាត់ខ្លួនជនសង្ស័យ ១នាក់ពាក់ព័ន្ធករណី រក្សាទុកដោយខុសច្បាប់នូវសារធាតុញៀន នៅចំនុចប៉ុស្តិ៍នគរបាលរដ្ឋបាលសង្កាត់យក្សឡោម ស្ថិតក្នុងភូមិឡាប៉ូ សង្កាត់យក្សឡោម ក្រុងបានលុង ខេត្តរតនគិរី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២៦ ខែមិនា ឆ្នាំ២០២៥ មានប្រជាពលរដ្ឋរស់នៅភូមិអភិវឌ្ឍន៍ សង្កាត់យក្សឡោម បានប្រទះឃើញសត្វឆ្កែមួយក្បាលបានពាំថង់មួយដុំ ក្នុងថង់នោះមានច្រកវត្ថុម៉្យាងមានសណ្ឋានដូចសាច់ជូ ដោយមានការសង្ស័យភ្លាមនោះប្រជាពលរដ្ឋខាងលើបានរាយការណ៍ជូមមកសមត្ថកិច្ច។ ដោយបានទទួលពត៌មានពីប្រជាពលរដ្ឋរាយការណ៍ដូចខាងលើសមត្ថកិច្ចក៏បានចុះទៅដល់ចំនុចរាយការណ៍នោះ ហើយក៏បានត្រួតពិនិត្យតាមវិជ្ជាជីវៈជំនាញ និងបច្ចេកទេសតេស្តពិសោធន៍ឃើញថាពិតជាសារធាតញៀនប្រភេទមេតំហ្វេតាមីន(ម៉ាទឹកកក)ពិតប្រាកដមែន។

ក្រោយពីបានត្រួតពិនិត្យចប់សព្វគ្រប់សមត្ថកិច្ចបានវិចខ្ចប់រក្សាទុក និងបន្តនិតិវិធីក្នុងការស្រាវជ្រាវស៊ើបអង្កេតរកម្ចាស់កញ្ចប់សារធាតុញៀននោះជាបន្ត។

លុះយប់ថ្ងៃទី២៧ ខែឆ្នាំដដែល មានបុរសម្នាក់បានមកជួបសមត្ថកិច្ចដើម្បីសុំដាក់ពាក្យប្ដឹងករណីរូបខ្លួនបាត់គ្រឿងញៀន។ ក្រោយពីសមត្ថកិច្ចបានសាកសួរ និងស្ដាប់ចម្លើយរបស់ជនសង្ស័យចប់ សមត្ថកិច្ចក៏បានឃាត់ខ្លួនជនសង្ស័យរូបនេះតែម្ដងពាក់ព័ន្ធករណីរក្សាទុកនូវសារធាតុញៀន។

ជនសង្ស័យមានឈ្មោះ ឡុច ត្រា ភេទប្រុស អាយុ ៣៥ឆ្នាំ ជនជាតិខ្មែរ មុខរបរមិនពិតប្រាកដ រស់នៅភូមិភ្នំ សង្កាត់យក្សឡោម ក្រុងបានលុង ខេត្តរតនគិរី។ ជនសង្ស័យខាងលើវិជ្ជមាន(+) នៃសារធាតុញៀន។ សម្ភារៈដកហូតរួមមាន ក្រាមសថ្លាសង្ស័យជាសារធាតុញៀនចំនួន ៦ថង់ ទម្ងន់សុទ្ធ ២.៩៩ក្រាម និងទូរសព្ទ័ ១គ្រឿង។

បច្ចុប្បន្នជនសង្ស័យខាងលើ ត្រូវបានឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្តរតនគិរីដើម្បីអនុវត្តនិតិវិធី កសាងសុំណុំរឿងបញ្ជូនទៅសាលាដំបូងខេត្តចាត់ការតាមផ្លូវច្បាប់៕

ដោយ៖ ខៀវ ចាប