ឆេះផ្ទះ Archives - Kampuchea Thmey Daily

ឆ្លងចរន្តអគ្គិសនីឆេះផ្ទះ ១ កន្លែង ក្នុងបុរីហុងឡាយ ផ្អើលសមត្ថកិច្ចចុះអន្តរាគមន៍

អ៊ិន ពិសី — Wed, 22 Apr 2026 03:54:05 +0000

ឆ្លងចរន្តអគ្គិសនីឆាបឆេះផ្ទះ ១ កន្លែង ក្នុងបុរីហុងឡាយ បង្កការភ្ញាក់ផ្អើលដល់ប្រជាពលរដ្ឋរាយការណ៍ទៅសមត្ថកិច្ចចុះអន្តរាគមន៍ កាលពីវេលាម៉ោង ៩ និង ៣៥ នាទី ថ្ងៃទី ២១ ខែមេសា ឆ្នាំ ២០២៦ ចំណុចផ្ទះលេខ ១៥៥ កា ផ្លូវលេខ ៩ ភូមិត្រពាំងថ្លឹង ៣ សង្កាត់ចោមចៅទី ១ ខណ្ឌពោធិ៍សែនជ័យ រាជធានីភ្នំពេញ។

ម្ចាស់ផ្ទះរងគ្រោះឈ្មោះ វេង សុខកែវ ភេទប្រុស អាយុ ៣៥ ឆ្នាំ ជនជាតិខ្មែរ មុខរបរមន្ត្រីរាជការ ទីលំនៅបច្ចុប្បន្នស្នាក់នៅកន្លែងកើតហេតុខាងលើ។

ប្រភពព័ត៌មានបានឲ្យដឹងថា មុនពេលកើតហេតុ គេឃើញផ្សែងហុយចេញយ៉ាងសន្ធោសន្ធៅពីក្នុងផ្ទះ ទើបនាំគ្នាយកបំពង់ពន្លត់អគ្គិភ័យមកបាញ់ពន្លត់ និងរាយការណ៍ទៅសមត្ថកិច្ចចុះអន្តរាគមន៍ភ្លាមៗ។ ក្រោយទទួលព័ត៌មានភ្លាម រថយន្តពន្លត់បានចុះដល់ទីតាំងកន្លែងកើតហេតុភ្លាមៗ។

គ្រោះអគ្គិភ័យនេះ សមត្ថកិច្ចប្រើប្រាស់រថយន្តពន្លត់អគ្គិភ័យអស់ចំនួន ៣ គ្រឿង និងខូចខាតពូក ១ ព្រមទំាងសម្ភារៈប្រើប្រាស់មួយចំនួន។ ចំពោះមូលហេតុកើតមានអគ្គិភ័យនេះ បណ្តាលមកពីឆ្លងចរន្តអគ្គិសនី តែមិនបង្កឲ្យមានគ្រោះថ្នាក់ដល់មនុស្សនោះទេ៕
អត្ថបទ ៖ សុខា

The post ឆ្លងចរន្តអគ្គិសនីឆេះផ្ទះ ១ កន្លែង ក្នុងបុរីហុងឡាយ ផ្អើលសមត្ថកិច្ចចុះអន្តរាគមន៍ appeared first on Kampuchea Thmey Daily.

ទុស្សេខ្សែភ្លើង ឆេះផ្ទះលក់ពូក ១ កន្លែង ខូចខាតសម្ភារៈមួយចំនួនធំ នៅក្រុងសៀមរាប

អ៊ិន ពិសី — Fri, 13 Mar 2026 07:36:33 +0000

ទុស្សេខ្សែភ្លើង បង្កជាអគ្គិភ័យឆាបឆេះផ្ទះលក់ពូក និងលក់បាយ ១ កន្លែង នៅក្រុងសៀមរាប។

ហេតុការណ៍នេះបានកើតឡើងកាលពីព្រឹកថ្ងៃទី ១៣ ខែមីនា ឆ្នាំ ២០២៦ ស្ថិតនៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប។

សមត្ថកិច្ចបានឲ្យដឹងថា ផ្ទះខាងលើមានទំហំទទឹង ១៣ ម៉ែត្រ បណ្ដោយ ២៥ ម៉ែត្រ ដំបូលប្រក់ស័ង្កសី ម្ចាស់ផ្ទះ ឈ្មោះ ឈិន ឈាង ភេទប្រុស អាយុ ៥៦ ឆ្នាំ មុខរបរប៉ូលិសព្រំដែនបានជួលទៅឲ្យឈ្មោះ នាក់ គារ៉ា ភេទប្រុស អាយុ ៤០ ឆ្នាំ បើកកន្លែងលក់ពូក និងលក់បាយ។

សមត្ថកិច្ចបានបន្តថា អគ្គិភ័យនេះបានបង្កការខូចខាតរួមមាន ៖ ម៉ូតូ ១ គ្រឿង ម៉ាកឌ្រីមសង់ ស៊េរីឆ្នាំ ២០១៨ , ពូកចំនួន ៩០០ ពូក និង កម្រាលពូក ៧០ កម្រាល , ម៉ាស៊ីនត្រជាក់ចំនួន ២ គ្រឿង , ប្រាក់រៀលចំនួន ៥០ ០០០ ០០០ លានរៀល (ហាសិបលានរៀល) , ចង្ក្រានហ្កាស ចំនួន ១០ ឈុត , អង្កចំនួន ១០ បេ និងសម្ភារៈប្រើប្រាស់មួយចំនួនទៀត។ ដោយឡែកចំពោះមូលហេតុដែលបណ្ដាលឲ្យកើតមានអគ្គិភ័យនេះមកពីទុស្សេខ្សែភ្លើងធ្លាក់មកលើពូកក៏ឆាបឆេះតែម្ដង៕

អត្ថបទ ៖ ជុន កុសល

The post ទុស្សេខ្សែភ្លើង ឆេះផ្ទះលក់ពូក ១ កន្លែង ខូចខាតសម្ភារៈមួយចំនួនធំ នៅក្រុងសៀមរាប appeared first on Kampuchea Thmey Daily.

ឆ្លងចរន្តអគ្គិសនីឆេះផ្ទះធ្វើសិប្បកម្មពូកសាឡុង ១ កន្លែង យ៉ាងសន្ធោសន្ធៅ នៅសង្កាត់ព្រៃ.ស

អ៊ិន ពិសី — Thu, 18 Sep 2025 02:10:25 +0000

ឆ្លងចរន្តអគ្គិសនីឆេះផ្ទះធ្វើសិប្បកម្មពូកសាឡុង ១ កន្លែង យ៉ាងសន្ធោសន្ធៅ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ចេញរថយន្តពន្លត់អគ្គិភ័យអន្តរាគមន៍បាញ់ពន្លត់។

ហេតុការណ៍នេះបានកើតឡើងកាលពីវេលាម៉ោង ១១ និង ១០ នាទីយប់ ថ្ងៃទី ១៧ ខែកញ្ញា ឆ្នាំ ២០២៥ នៅចំណុចផ្ទះល្វែងអត់លេខ ធ្វើសិប្បកម្មពូកសាឡុង ផ្លូវបេតុង ភូមិព្រៃ.ស កើត សង្កាត់ព្រៃ.ស ខណ្ឌដង្កោ។

តាមប្រភពព័ត៌មានពីប្រជាពលរដ្ឋ បានឲ្យដឹងថា មុនពេលកើតហេតុ ម្ចាស់ផ្ទះបានអង្គុយផឹកស៊ីនៅខាងក្រៅផ្ទះ ចំណែកកូនចៅប្រុស ២ ទៅ ៣ នាក់ កំពុងតែហូបបាយខាងក្នុងផ្ទះ ខណៈពួកគាត់ទាំងនោះកំពុងហូបបាយសុខៗ ស្រាប់តែធុំក្លិនឈ្ងៀម ហើយឃើញអណ្ដាតភ្លើងឆេះសន្ធោសន្ធៅចេញពីបន្ទប់ឡៅតឿដោយមិនដឹងមូលហេតុអ្វីនោះទេ។ ពេលនោះ ដោយឃើញហេតុការណ៍បែបនេះ ពួកគាត់នាំគ្នាឆោឡោ មានអ្នកខ្លះបាញ់ទឹកពន្លត់ អ្នកខ្លះទៀតបាននាំគ្នាជួយជញ្ជូនអីវ៉ាន់ពូកសាឡុងចេញមកក្រៅ តែក្នុងករណីនេះមិនអាចគ្រប់គ្រងស្ថានការណ៍បាន ទើបនាំគ្នារាយការណ៍ជូនអាជ្ញាធរ និងសមត្ថកិច្ច ដើម្បីសុំជំនួយរថយន្តពន្លត់អគ្គិភ័យមកបាញ់មានចំនួន ៣ គ្រឿង ចេញអន្តរាគមន៍ក្នុងនោះមានរថយន្តពន្លត់អគ្គិភ័យរបស់ការិយាល័យបង្ការ និងពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញចំនួន ២ គ្រឿង និងរថយន្តជំនួយរបស់ក្រុមហ៊ុនស្រាបៀរកម្ពុជាចំនួន ១ គ្រឿង បានសហការគ្នាបាញ់ទឹករហូតដល់ម៉ោង ១១ និង ៣០ នាទីយប់ ថ្ងៃដដែល ទើបភ្លើងរលត់ទៅវិញជាស្ថាពរ។

ពាក់ព័ន្ធករណីនេះមិនបង្កឲ្យមានការរាលដាលដល់ផ្ទះសម្បែងរបស់ប្រជាពលរដ្ឋផ្សេងៗ ណា នោះទេ ហើយក៏មិនគ្រោះថ្នាក់ដល់មនុស្សណាម្នាក់ដែរ គ្រាន់តែខូចខាតសម្ភារៈក្នុងបន្ទប់ឡៅតឿ មានគ្រែពូកសាឡុង អស់ទាំងស្រុងតែប៉ុណ្ណោះ ចំពោះមូលហេតុបណ្ដាលមកពីឆ្លងចរន្តអគ្គិសនី៕

អត្ថបទ ៖ សុខា

The post ឆ្លងចរន្តអគ្គិសនីឆេះផ្ទះធ្វើសិប្បកម្មពូកសាឡុង ១ កន្លែង យ៉ាងសន្ធោសន្ធៅ នៅសង្កាត់ព្រៃ.ស appeared first on Kampuchea Thmey Daily.

Update ៖ ករណីឆេះផ្ទះពលរដ្ឋនៅសង្កាត់ទឹកថ្លា ឆក់យកអាយុជីវិតក្មេង-ចាស់ ២ នាក់

អ៊ិន ពិសី — Tue, 09 Sep 2025 10:06:59 +0000

ផ្ទះល្វែង ១ កន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅ បណ្ដាលឲ្យស្ត្រីវ័យចំណាស់ម្នាក់ និងក្មេងស្រីវ័យ ៨ ឆ្នាំ ម្នាក់ ឆេះស្លាប់យ៉ាងអាណោចអាធ័ម។

អគ្គិភ័យនេះបានកើតឡើងកាលពីវេលាម៉ោង ១ និង ៤០ នាទីរសៀល ថ្ងៃទី ៩ ខែកញ្ញា ឆ្នាំ ២០២៥ ស្ថិតក្នុងភូមិសេប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ។

បើតាមសមត្ថកិច្ច ករណីអគ្គភ័យនេះ បណ្តាលឲ្យមានមនុស្ស ២ នាក់ស្លាប់ គឺ ស្រ្តីវ័យ ៧៦ ឆ្នាំម្នាក់ និងចៅស្រី អាយុ ៨ ឆ្នាំម្នាក់។

ប្រភពព័ត៌មានពីពលរដ្ឋបានឲ្យដឹងថា មុនកើតហេតុ គេបានឮសំឡេងផ្ទុះក្បែរកាប៊ីនភ្លើង នឹកស្មានថាផ្ទុះ ក៏បាននាំគ្នាឆោឡោរត់ស្ទុះមកបិទ ប៉ុន្តែស្របពេលនោះមិនទាន់មានអ្វីគួរឲ្យកត់សម្គាល់នោះឡើយ។ លុះមួយសន្ទុះក្រោយមក ក៏ស្រាប់តែមានផ្សែងខ្មៅហុយខ្មួលខ្មាញ់ចេញពីផ្ទះកើតហេតុយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរខាងនាំគ្នាជួយពន្លត់ និងទាក់ទងហៅរថយន្តពន្លត់អគ្គិភ័យ ដើម្បីអន្តរាគមន៍បាញ់ពន្លត់។ បន្ទាប់ពីភ្លើងបានរលត់ សមត្ថកិច្ចរកឃើញមនុស្សក្មេង-ចាស់ ចំនួន ២ នាក់ ត្រូវភ្លើងឆេះស្លាប់។

អគ្គិភ័យនេះបានបង្កការខូចខាតសម្ភារៈមួយចំនួនធំអស់ស្ទើរទាំងស្រុង និងបណ្តាលឲ្យក្មេង-ចាស់ ២ នាក់ស្លាប់នៅខាងក្នុងយ៉ាងអាណោចអាធ័ម។ ចំពោះមូលហេតុច្បាស់លាស់ គឺ មិនដឹងមកពីអ្វីនោះឡើយ សមត្ថកិច្ចកំពុងបើកការស្រាវជ្រាវបន្ថែមនៅទីតាំងកើតហេតុ៕

អត្ថបទ ៖ រដ្ឋា

The post Update ៖ ករណីឆេះផ្ទះពលរដ្ឋនៅសង្កាត់ទឹកថ្លា ឆក់យកអាយុជីវិតក្មេង-ចាស់ ២ នាក់ appeared first on Kampuchea Thmey Daily.

ឆ្លងចរន្តអគ្គិសនី ឆេះលំនៅឋាន ១ ខ្នង និងទ្រព្យសម្បត្តិ ខ្ទេចគ្មានសល់

អ៊ិន ពិសី — Wed, 07 May 2025 02:29:42 +0000

លំនៅឋាន ១ ខ្នង និងទ្រព្យសម្បត្តិ បើគិតជាទឹកប្រាក់ប្រមាណជិត ៣០ លានរៀល ត្រូវបានអគ្គិភ័យលេបត្របាក់ទាំងស្រុង ដែលករណីនេះទាំងម្ចាស់ផ្ទះ ទាំងសមត្ថកិច្ច បានធ្វើការសន្និដ្ឋានថា អាចបណ្ដាលមកពីការឆ្លងចរន្តអគ្គិសនីទើបធ្វើឲ្យបញ្ហានេះកើតឡើង។

ហេតុការណ៍ដ៏រន្ធត់នេះបានកើតឡើងកាលពីវេលាម៉ោងប្រហែល ១ និង ២០ នាទីរសៀល ថ្ងៃទី ៦ ខែឧសភា ឆ្នាំ ២០២៥ នៅត្រង់ចំណុចភូមិតាថុក ឃុំធិបតី ស្រុកគាស់ក្រឡ ខេត្តបាត់ដំបង។

ករណីអគ្គិភ័យនេះបណ្ដាលឲ្យឆេះផ្ទះ ១ ខ្នង ទំហំ ៥ ម x៦ ម របស់ម្ចាស់ផ្ទះឈ្មោះ នេត នូ ភេទប្រុស អាយុ ៧៣ ឆ្នាំ និងប្រពន្ធឈ្មោះ ហ៊ឺម ហ៊ីង អាយុ ៧៤ ឆ្នាំ រស់នៅភូមិ/ឃុំកើតហេតុខាងលើ។

ភ្លាមៗ នោះដែរ ក្រោយពីទទួលបានព័ត៌មាន សមត្ថកិច្ចក៏បានចេញរថយន្តពន្លត់អគ្គិភ័យដើម្បីជួយអន្តរាគមន៍ ប៉ុន្តែពេលទៅដល់លំនៅឋាននោះបានឆេះខ្ទេចខ្ទីអស់ទៅហើយ។

ដោយឡែកសម្ភារៈខូចខាតរួមមាន ៖ ឆេះផ្ទះ ១ ខ្នង , ឆេះគ្រែ ១ , ឆេះធុងបាស ១ គ្រឿង តម្លៃ ១ ៥០០ បាត , សម្ភារៈផ្ទះបាយ , ឆេះកង់ ១ , ទូរស័ព្ទ ២ គ្រឿង , ឆេះ⁠អត្តសញ្ញាណប័ណ្ណសញ្ជាតិខ្មែរ ២ សន្លឹក , សំបុត្រកំណើត , សំបុត្រអាពាហ៍ពិពាហ៍ , ⁠ចុងសន្លឹកទទួលប្លង់ដី ៥ សន្លឹក , កាតគ្រីម៉ូតូ ១ , ឆេះម៉ាស៊ីនបាញ់ថ្នាំ ១ , ឆេះពូជស្រូវ ២ តោន , អង្ករ ៥០ គីឡូក្រាម , ឈើ ១០ សន្លឹក , ឆេះក្រវិលមាស ១ ជី និង ឆេះលុយខ្មែរ ១ ៩០០ ០០០ រៀល។ គិតជាទឹកប្រាក់សរុបអស់ប្រហែលជិត ៣០ ០០០ ០០០ រៀល។ ក្រោយពីការស្រាវជ្រាវរួចមក សមត្ថកិច្ចបានបញ្ជាក់អំពីមូលហេតុ គឺ ទុស្សេខ្សែភ្លើង៕

អត្ថបទ ៖ សោ និយមរ័ត្ន

The post ឆ្លងចរន្តអគ្គិសនី ឆេះលំនៅឋាន ១ ខ្នង និងទ្រព្យសម្បត្តិ ខ្ទេចគ្មានសល់ appeared first on Kampuchea Thmey Daily.

ឆេះផ្ទះពលរដ្ឋនៅសង្កាត់ទួលតាឯក មិនទាន់ដឹងមូលហេតុច្បាស់លាស់

អ៊ិន ពិសី — Sun, 23 Mar 2025 01:05:08 +0000

លំនៅដ្ឋានរបស់ប្រជាពលរដ្ឋមួយខ្នង ក្លាយជាផេះផង់ ដោយឡែកមួយខ្នងទៀត ត្រូវបានរថយន្តអគ្គិភ័យអន្តរាគមន៍ទប់ស្កាត់ទាន់ពេលវេលា ដែលនៅពេលកើតហេតុនោះគឺគេមិនទាន់ដឹងអំពីមូលហេតុនៅឡើយ។

គ្រោះអគ្គិភ័យនេះបានកើតឡើងកាលពីវេលាម៉ោង ៧ និង ២០ នាទី នាព្រឹកថ្ងៃទី ២៣ ខែមីនា ឆ្នាំ ២០២៥ នៅចំណុចក្បែរផ្លូវរថភ្លើង ក្នុងភូមិសាស្ត្រសង្កាត់ទួលតាឯក ក្រុងបាត់ដំបង។

បើតាមសេចក្ដីរាយការណ៍បានបញ្ជាក់ថា នៅពេលកើតហេតុនោះគឺមានអណ្ដាតភ្លើងចាប់ផ្ដើមឆាបឆេះយ៉ាងសន្ធោសន្ធៅទៅលើផ្ទះប្រជាពលរដ្ឋមួយខ្នង ដែលបង្កជាផ្សែងខ្មួលខ្មាញ់ តែមួយប៉ប្រិចភ្នែកប៉ុណ្ណោះ ផ្ទះនេះឆេះស្ទើរទាំងស្រុង គឺនៅពេលដែលកម្លាំងពន្លត់អគ្គិភ័យទៅដល់គឺបានបាញ់ទឹកទប់ស្កាត់ និងអន្តរាគមន៍ការពារផ្ទះថ្មមួយខ្នងទៀតដែលស្ថិតនៅជាប់ជញ្ជាំងគ្នា ដើម្បីកុំឲ្យរាលដាល។

បើតាមការរៀបរាប់ពីសាក្សីនៅក្បែរកន្លែងកើតហេតុដែលបញ្ជាក់ថា នៅពេលដែលឆេះនោះគឺម្ចាស់ផ្ទះពុំមានវត្តមាននៅក្នុងផ្ទះនោះឡើយ រីឯមូលហេតុក៏សមត្ថកិច្ចមិនទាន់អះអាងថាបណ្ដាលមកពីអ្វីនោះនៅឡើយទេ ហើយក៏មិនដឹងថាមានការខូចខាតទ្រព្យសម្បត្តិដល់កម្រិតណានោះដែរ ដោយរង់ចាំធ្វើការសិក្សាជាក្រោយ៕

អត្ថបទ ៖ សោ និយមរ័ត្ន

The post ឆេះផ្ទះពលរដ្ឋនៅសង្កាត់ទួលតាឯក មិនទាន់ដឹងមូលហេតុច្បាស់លាស់ appeared first on Kampuchea Thmey Daily.

ផ្ទុះសេខ្សែភ្លើង ធ្វើឱ្យឆេះផ្ទះ ១ខ្នង របស់មន្ត្រីនគរបាលម្នាក់ នៅស្រុកពួក ខេត្តសៀមរាប

អុន ស្រីមាន — Thu, 27 Feb 2025 09:20:56 +0000

សមត្ថកិច្ចបានឱ្យដឹងថា នៅវេលាម៉ោង២៣ និង៣០នាទី ថ្ងៃទី២៦ ខែកុម្ភៈ ឆ្នាំ២០២៥ មានករណីអគ្គិភ័យឆេះផ្ទះ១ខ្នង របស់មន្ត្រីនគរបាលម្នាក់ និងប្រពន្ធជាគ្រូបង្រៀន ស្ថិតនៅក្នុងភូមិតាទក ឃុំពួក ស្រុកពួក ខេត្តសៀមរាប។ សមត្តកិច្ចបញ្ជាក់ថា ករណីនេះបណ្តាលមកពីការផ្ទុះសេខ្សែភ្លើង។

សមត្ថកិច្ចបន្តថា ជនរងគ្រោះជាម្ចាស់ផ្ទះឈ្មោះ តាន់ ប៊ុនធន់ (ហៅ ឡោ ឡាយ) ភេទប្រុស អាយុ៥២ឆ្នាំ មុខរបរ នគរបាល តួនាទីជានាយប៉ុស្ដិ៍នគរបាលរដ្ឋបាលល្វា នៃអធិការដ្ឋាននគរបាលស្រុកពួក ខេត្តសៀមរាប ។ សមត្ថកិច្ចបញ្ជាក់ថា ករណីនេះបណ្តាលឱ្យរងការខូចខាត: ឆេះអស់ផ្ទះ ១ខ្នង ដែលជាប្រភេទផ្ទះឈើលើ បន្ទប់ថ្មក្រោម ជញ្ជាំងក្ដារ ដំបូលក្បឿង សំយ៉ាបស័ង្កសី ទំហំទទឹង០៩ម៉ែត្រ គុណ បណ្ដោយ១២ម៉ែត្រ ឆេះទាំងស្រុង ក្នុងនោះខូចខាតទ្រព្យសម្បត្តិ មានសំលៀកបំពាក់ សម្ភារៈប្រើប្រាស់ និង ប្រាក់មួយចំនួន ពុំគ្រោះថ្នាក់ដល់មនុស្សនោះទេ ។

សមត្ថកិច្ចបានប្រើប្រាស់រថយន្តពន្លត់អគ្គិភ័យរបស់ស្នងការរដ្ឋាននគរបាលខេត្តសៀមរាប ចំនួន២ គ្រឿង បានប្រើប្រាស់អស់ទឹកចំនួន ២ ឡាន ។ រថយន្តពន្លត់អគ្គិភ័យ នៃអធិការដ្ឋាននគរបាលស្រុកពួកចំនួន ១ គ្រឿង ប្រេីប្រាស់ទឹកអស់ចំនួន០២ឡាន៕

ដោយ៖ជុន កុសល

The post ផ្ទុះសេខ្សែភ្លើង ធ្វើឱ្យឆេះផ្ទះ ១ខ្នង របស់មន្ត្រីនគរបាលម្នាក់ នៅស្រុកពួក ខេត្តសៀមរាប appeared first on Kampuchea Thmey Daily.

បុរសម្នាក់ ដុតផ្ទះជីតាខ្លួន និងអ្នកជិតខាងចំនួន ២ខ្នង ឆេះខ្ទេចគ្មានសល់ នៅស្រុកអណ្ដូងមាស

Ken Malis — Mon, 24 Feb 2025 07:05:20 +0000

កាលពីថ្ងៃទី២៣ ខែកុម្ភៈ ឆ្នាំ២០២៥ វេលាម៉ោង ៥៖៣០នាទី មានករណីចៅដុតផ្ទះតារបស់ខ្លួន និងផ្ទះអ្នកជិតខាងឆេះខ្ទេចគ្មានសល់ ចំនួន ២ខ្នងផ្ទះ នៅភូមិតាំងសេ ឃុំញ៉ាង ស្រុកអណ្តូងមាស ខេត្តរតនគិរី។

បើតាមរបាយការណ៍ ប៉ុស្តិ៍នគរបាល ឃុំ ញ៉ាង បានឱ្យដឹងថា ម្ចាស់ផ្ទះមានឈ្មោះ សល់ ហឺង និង ឈ្មោះ សល់ ធីម។ មូលហេតុដែលបណ្ដាលឱ្យភ្លើងឆាបឆេះផ្ទះយ៉ាងសន្ធោ សន្ធៅ បែបនេះ មកពីពីបុរសម្នាក់ ដែលមានឈ្មោះ រម៉ាម ដាង ភេទប្រុស អាយុខ្ទង់ ២០ឆ្នាំជាង ដែលត្រូវជាចៅរបស់លោក សល់ ហឺង (សង្ស័.យជាបែ.ក.ថ្នាំ) បានធ្វើសកម្មភាព កាប់ទៅលើប្រជាពលរដ្ឋ រួចក៏បានដុតផ្ទះ ចំនួន ២ខ្នង ឆេះខ្ទេចគ្មានសល់។

ករណីអគ្គីភ័យនេះ ធ្វើឱ្យខូចខាតទ្រព្យសម្បត្តិដូចជា ទី១. ផ្ទះលោក សល់ ធីម ទំហំ ៦x៧ ម៉ែត្រ ប្រក់ស័ង្កសី និងឈើក្រោមផ្ទះចំនួន ៥គីប ស្រូវ ២០បេ និងថវិកា ចំនួន ៣ ៨០០ ០០០។ ទី២.ផ្ទះលោក សល់ ហឺង ទំហំ ៩x១០ ម៉ែត្រ ប្រក់ស័ង្កសី ឆេះទាំងស្រុង។ ដោយឡែក ក្រុមគ្រួសាររងគ្រោះដោយសារអគ្គីភ័យ មិនមានគ្រោះថ្នាក់ដល់ជីវិតម្នាក់ណាឡើយ៕

ដោយ៖ ខៀវ ចាប

The post បុរសម្នាក់ ដុតផ្ទះជីតាខ្លួន និងអ្នកជិតខាងចំនួន ២ខ្នង ឆេះខ្ទេចគ្មានសល់ នៅស្រុកអណ្ដូងមាស appeared first on Kampuchea Thmey Daily.