ការអះអាងរបស់លោកស្រីសាស្ត្រាចារ្យបានធ្វើឡើងនៅព្រឹកថ្ងៃទី៣១ ខែមីនា ឆ្នាំ២០២៦ ក្នុងពិធីបើកវគ្គបណ្តុះបណ្តាល ស្តីពីការទាក់ទងប្រកបដោយគុណភាពរបស់គិលានុបដ្ឋាក-ឆ្មប ដើម្បីធានាសុវត្ថិភាព និងប្រសិទ្ធភាពក្នុងការថែទាំនៅមន្ទីរពេទ្យព្រះអង្គឌួង ដោយមានការអញ្ជើញចូលរួមពីលោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង លោក លោកស្រី មកពីមន្ទីរពេទ្យព្រះអង្គឌួង មន្ទីរពេទ្យថ្នាក់ជាតិ និងមន្ទីរសុខាភិបាល នៃរដ្ឋបាលខេត្តទាំងបី គឺខេត្តតាកែវ កែប និងខេត្តកំពត ដែលជាសម្ព័ន្ធមេត្រីភាព។

លោកស្រីសាស្ត្រាចារ្យ បានបន្តទៀតថា ការយកចិត្តទុកដាក់ និងផ្តោតសំខាន់ទៅលើអ្នកជំងឺជាចម្បង គឺជាបេះដូងនៃវគ្គបណ្តុះបណ្តាលនៃមនី្ទពេទ្យព្រះអង្គឌួង។ គោលបំណងសំខាន់ គឺដើម្បីធានាថា រាល់ការសម្រេចចិត្តក្នុងការអនុវត្តការងាររបស់គិលានុបដ្ឋាកយិកា និងឆ្មប គឺធ្វើឡើងដើម្បីឧត្តមប្រយោជន៍ និងសុវតិ្ថភាពរបស់អ្នកជំងឺ។ ជាក់ស្តែង ក្នុងរបៀបវារៈនាថ្ងៃនេះ យើងនឹងផ្តោតទៅលើប្រធានបទសំខាន់ៗ រួមមាន៖ ឯកសារថែទាំ និងបែងចែកអ្នកជំងឺ ហើយឯកសារថែទាំសម្រាប់ឆ្មប គឺជាការកត់ត្រាទុកនូវរាល់សកម្មភាពថែទាំ ស្ថានភាពសុខភាពមាតា ទារក គឺធានានូវការតាមដានតាមលក្ខណៈវិទ្យាសាស្រ្ត និងជាភស្តុតាងក្នុងការងារវិជ្ជាជីវៈ។

ជាមួយគ្នានេះ លោកស្រីសាស្ត្រាចារ្យ ជំនួយ ជុកម៉ុល កុសុម៉ា នាយិការង នៃមន្ទីរពេទ្យព្រះអង្គឌួង បានមានប្រសាសន៍ថា ការទាក់ទងប្រកបដោយគុណភាព គឺជាកត្តាសំខាន់មួយដែលជួយធានាបាននូវសុវត្ថិភាព អ្នកជំងឺ និងការថែទាំប្រកបដោយប្រសិទ្ធភាព។ លោកស្រីបន្តថា ការប្រាស្រ័យទាក់ទងល្អរវាងបុគ្គលិកសុខាភិបាល និងអ្នកជំងឺ ក៏ដូចជាការសហការល្អក្នុងក្រុមការងារព្យាបាល អាចជួយកាត់បន្ថយកំហុសក្នុងការព្យាបាល បង្កើនការយល់ចិត្ត និងការជឿទុកចិត្តរបស់អ្នកជំងឺ និងគ្រួសារ ហើយនាំឱ្យមានលទ្ធផល ព្យាបាលកាន់តែប្រសើរ។

លោកស្រីសាស្ត្រាចារ្យជំនួយបានបន្តថា ក្នុងបរិបទនៃការអភិវឌ្ឍប្រព័ន្ធសុខាភិបាលឱ្យកាន់តែទំនើប និងមានគុណភាព ការពង្រឹង សមត្ថភាពវិជ្ជាជីវៈ និងជំនាញទំនាក់ទំនងរបស់គិលានុបដ្ឋាក និងឆ្មប គឺមានសារៈសំខាន់យ៉ាងខ្លាំង ដើម្បីឆ្លើយតបទៅនឹងតម្រូវការកាន់តែកើនឡើងនៃការផ្តល់សេវាសុខាភិបាលប្រកបដោយសុវត្ថិភាព ប្រសិទ្ធភាព និងមានមនុស្សធម៌។

លោកស្រី ជឿជាក់យ៉ាងមុតមាំថា តាមរយៈវគ្គបណ្តុះបណ្តាលនេះ សិក្ខាកាមទាំងអស់នឹងទទួលបានចំណេះដឹងថ្មីៗ បទពិសោធន៍ និងជំនាញជាក់ស្តែង ដែលអាចយកទៅអនុវត្តក្នុងការងារប្រចាំថ្ងៃ ដើម្បីលើកកម្ពស់គុណភាពសេវាថែទាំអ្នកជំងឺ និងរួមចំណែកអភិវឌ្ឍប្រព័ន្ធសុខាភិបាល ឱ្យកាន់តែប្រសើរឡើង៕

អត្ថបទ៖ សំអឿន

The post មន្រី្តជាន់ខ្ពស់សុខាភិបាល អះអាងថា វិជ្ជាជីវៈគិលានុបដ្ឋាក-ឆ្មប គឺជាឆ្អឹងខ្នងនៃប្រព័ន្ធសុខាភិបាល appeared first on Kampuchea Thmey Daily.

ថ្លែងក្នុងសន្និសីទស្ដីពីបច្ចុប្បន្នភាពរបស់សមាគមឆ្មបកម្ពុជាលើកទី៤ ក្រោមប្រធានបទ «រួមគ្នាថែទាំសុខភាពមាតា និងទារកជុំវិញកំណើត»កាលពីថ្ងៃទី២៨កម្ភៈ នៅវិទ្យាស្ថានជាតិបច្ចេកវិទ្យាកម្ពុជា លោកស្រី វេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល បានជំរុញឱ្យពង្រឹងនិងលើកកម្ពស់សមត្ថភាពរបស់អ្នកបម្រើសេវាសុខភាព ក្នុងការថែទាំ និងគ្រប់គ្រងសុខភាពមាតា និងទារកជុំវិញកំណើតឱ្យកាន់តែប្រសើរឡើងដើម្បីចូលរួមកាត់បន្ថយអត្រាមរណភាព និងបង្ការផលវិបាកនានាដែលអាចកើតមានឡើងចំពោះមាតា និងទារក។

លើសពីនេះសមាគមឆ្មបកម្ពុជាត្រូវចែករំលែកចំណេះដឹង និងបទពិសោធន៍ថ្មីៗ សំដៅធានាឱ្យការអនុវត្តការថែទាំកាន់តែមានប្រសិទ្ធភាព និងគុណភាព ដោយពង្រឹងបន្ថែមនូវចំណេះដឹង និងជំនាញជាមួយនិងការអភិវឌ្ឍន៍វិជ្ជាជីវៈជាប់ជាបន្ត។ចូលរួមផ្សព្វផ្សាយអំពីការអនុវត្តច្បាប់បទបញ្ញត្តិសម្រាប់អ្នកប្រកបវិជ្ជាជីវៈឆ្មប និងការកសាងវប្បធម៌ការងារបែប «មិនស្តីបន្ទោស» និងសុវត្ថិភាពអ្នកជំងឺនិងពង្រឹងបន្ថែមនូវស្មារតីធ្វើការងារជាក្រុម និងបង្កើតបណ្តាញសហការរវាងសមាជិកនិងដៃគូពាក់ព័ន្ធ។

ជាមួយគ្នានេះដែរ លោកស្រីរដ្ឋលេខាធិការបានជំរុញ និងលើកទឹកចិត្តដល់ឆ្មបទាំងអស់ដែលកំពុងប្រកបវិជ្ជាជីវៈឆ្មប សូមរួសរាន់ចុះបញ្ជិកាឲ្យបានគ្រប់ៗគ្នា និងបន្តសុពលភាពអាជ្ញាប័ណ្ណប្រកបវិជ្ជាជីវៈឲ្យបាន១០០%។

យោងតាមក្រសួងសុខាផិបាលបានឱ្យដឹងថានៅឆ្នាំ២០២៥ មន្ត្រីរាជការសុខាភិបាលទូទាំងប្រទេសមានចំនួនសរុប ៣០ ៤៦១នាក់ ក្នុងនោះមានបរិញ្ញាបត្រឆ្មប ៦៣២នាក់ ឆ្មបមធ្យម ៥ ៨៧០ នាក់ ឆ្មបបឋម ១ ៩២៤នាក់និងបរិញ្ញាបត្រគិលានុបដ្ឋាក-ឆ្មប ១៥នាក់៕

អត្ថបទ ៖ សំអឿន

The post មន្ត្រីជាន់ខ្ពស់សុខាភិបាលរម្លឹក​​ពីការ​លះបង់​របស់​ឆ្មបក្នុងការថែទាំសុខភាពស្ត្រី និងកុមារកំឡុងពេលសង្គ្រាម appeared first on Kampuchea Thmey Daily.

ការ​លើក​ទឹកចិត្ត​នេះ​ក្នុង​ឱកាស លោក​សាស្ត្រាចារ្យ​ជំនួយ វេជ្ជបណ្ឌិត តាត សុវណ្ណ ចូលរួម​បើក​សិក្ខា​សាលា​ផ្សព្វផ្សាយ​លើក​ទី ១ ស្ដីពី​ការ​អនុវត្ត​ជំនាញ​គ្លីនិក នៃ​កម្មវិធី​ជាតិ ថ្នាក់​បរិញ្ញាបត្ររង​ឆ្មប កែសម្រួល​លើក​ទី ២ ដែល​ប្រព្រឹត្ត​ទៅ​ចាប់ពី​ថ្ងៃ​ទី ២៤ ដល់​ថ្ងៃ​ទី ២៨ ខែ​វិច្ឆិកា ឆ្នាំ ២០២៥ នៅ​សាលា​មធ្យមសិក្សា​សុខាភិបាល​ភូមិភាគ​ស្ទឹងត្រែង នា​ថ្ងៃ​ទី ២៤ ខែ​វិច្ឆិកា ឆ្នាំ ២០២៥។

នា​ឱកាស​នោះ លោក​សាស្ត្រាចារ្យ​ជំនួយ វេជ្ជ​. តាត សុវណ្ណ បាន​ជម្រាប​ជូន​ពី​គោលបំណង នៃ​សិក្ខា​សាលា គឺ​ដើម្បី​ពិនិត្យ​ការ​អនុវត្ត​ទម្រង់ការ​ជា​តម្រូវការ​គ្លីនិក​ដែល​មាន​ភាព​លំបាក​សម្រាប់​កម្មវិធី​សិក្សា​ជាតិ ថ្នាក់​បរិញ្ញាបត្ររង​ឆ្មប កែសម្រួល​លើក​ទី ២ (​ការអប់រំ​ផ្អែកលើ​សមត្ថភាព​/CBE)។

លោក​សាស្ត្រាចារ្យ​ជំនួយ ក៏បាន​លើកទឹកចិត្ត​ឲ្យ​គ្រូបង្រៀន​ផ្នែក​ឆ្មប​ទាំងអស់ សូម​បន្ត​កិច្ច​ខិតខំ​ពង្រឹង​ការ​អនុវត្ត​ជំនាញ​គ្លីនិក ដើម្បី​ធានា​គុណភាព​សម្រាប់​ការ​បណ្ដុះបណ្ដាល​និស្សិត​បរិញ្ញាបត្ររង​ឆ្មប​ស្រប​តាម​កម្មវិធីសិក្សា​ថ្មី លើកកម្ពស់​ប្រសិទ្ធភាព កាត់បន្ថយ​ឈាន​ទៅ​លុប​បំបាត់​បាន​នូវ​មរណភាព​មាតា និង​ទារក៕

The post សាស្ត្រាចារ្យជំនួយ តាត សុវណ្ណ លើកទឹកចិត្តឲ្យគ្រូបង្រៀនឆ្មបខិតខំពង្រឹង​ការអនុវត្តជំនាញគ្លីនិក ដើម្បីធានាគុណភាពឆ្មបស្របតាមកម្មវិធីសិក្សាថ្មី appeared first on Kampuchea Thmey Daily.

ថ្លែង​ក្នុង​ពិធី​បើក និង​បិទ «​កិច្ចប្រជុំ​ក្រុមប្រឹក្សា​គណៈ​វិជ្ជាជីវៈ​ឆ្មប​កម្ពុជា អាណត្តិ​ទី ​៣»​ កាលពី​ថ្ងៃទី ២៧​ កញ្ញា លោកស្រី​វេជ្ជបណ្ឌិត បាន​ណែនាំ​ដល់​ឆ្មប​គ្រប់រូប ​ត្រូវតែ​ពង្រឹង​សមត្ថភាព​របស់​ខ្លួន​ឱ្យ​បាន​ជាប់​ជាប្រចាំ ដើម្បី​ដោះស្រាយ​អាទិភាព​សុខភាព ព្រមទាំង​ឆ្លើយតប​ទៅ​នឹង​គ្រោះអាសន្ន​នានា​ឱ្យ​បាន​ទាន់​ពេល។

លោកស្រី​វេជ្ជបណ្ឌិត​ បាន​បន្តថា ​ទន្ទឹមនឹងនេះ ការ​លើក​កម្ពស់​គុណភាព​សេវា​ថែទាំ​សុខភាព និង​អាហារូបត្ថម្ភ ការ​ជំរុញ​ការប្រើប្រាស់​សេវា​សុខាភិបាល​ឌីជីថល និង​ការ​ជំរុញ​ការចូលរួម​របស់​បុគ្គល​គ្រួសារ និង​សហគមន៍ ក្នុងការ​លើកកម្ពស់​សុខភាព​មាតា ទារក និង​កុមារ គឺជា​ជំហាន​សំខាន់​មួយ ដើម្បី​សម្រេច​បាន​នូវ​ការ​គ្របដណ្តប់​សុខភាព​ជា​សកល។

លោកស្រី​វេជ្ជបណ្ឌិត​ បាន​បន្តទៀត​ថា ក្នុង​រយៈពេល ២ ​ទសវត្ស ​កន្លងមក​នេះ ប្រទេស​កម្ពុជា​មាន​ការ​រីកចម្រើន​យ៉ាងខ្លាំងក្នុងការ​កាត់បន្ថយ​អត្រា​ស្លាប់​របស់​ទារក និង​កុមារ ដោយ​បច្ចុប្បន្ន​អត្រា​ស្លាប់​របស់​ទារក​នៅសល់​ត្រឹមតែ ៨ ក្នុង ១ ០០០ កំណើត​រស់ និង​កុមារ​អាយុ​ក្រោម ​១ ​ឆ្នាំ នៅសល់​ត្រឹមតែ ១២ ក្នុង ១ ០០០ កំណើត​រស់ ​ប៉ុណ្ណោះ​។ នេះ​មានន័យថា កម្ពុជា ​សម្រេចបាន​រួចហើយ​នូវ​គោលដៅ​អភិវឌ្ឍន៍​ប្រកប​ដោយ​ចីរភាព​នៅ​ឆ្នាំ ២០៣០។

លោកស្រី​វេជ្ជបណ្ឌិត បាន​ណែនាំ​ឱ្យ​ក្រុមប្រឹក្សា​គណៈ​វិជ្ជាជីវៈ​ឆ្មប​ថ្នាក់​ជាតិ និង​ថ្នាក់​រាជធានី ខេត្ត ធ្វើការ​រួមគ្នា រៀបចំ​ផែនការ​សកម្មភាព​ជាមួយ​គ្នា ដើម្បី​ពង្រឹង​ការ​អនុវត្ត​បទដ្ឋាន​គតិយុត្តិ ការ​បណ្តុះបណ្តាល​ដោយ​អនុលោម​តាម​គោលការណ៍ CPD​។ ពង្រឹង​ប្រព័ន្ធ​កត់ត្រា និង​បញ្ជូន​របាយការណ៍​ប្រចាំខែ អំពី​វឌ្ឍនភាព​មក​នាយកដ្ឋាន​មន្ទីរពេទ្យ និង​ថ្នាក់ដឹកនាំ​ទទួលបន្ទុក។ បង្កើន​សមត្ថភាព និង​អនុវត្ត​នូវ​និយាម​ នៃ​ការ​អនុវត្ត​ការងារ​ឆ្មប។ ពង្រឹង​ការ​ចុះ​បញ្ជិកា និង​បន្ត​អាជ្ញាប័ណ្ណ​ឱ្យ​បាន ​១០០%​។ ត្រូវ​ពង្រឹង​យន្តការ​ពិនិត្យ​តាមដាន​លើ​ការប្រតិបត្តិ​ការងារ​របស់​សមាជិក​ឆ្មប នៅ​គ្រប់​លំដាប់ថ្នាក់ ដើម្បី​ធានាបាន​នូវ​ក្រមសីលធម៌​វិជ្ជាជីវៈ សុចរិត​ភាព និង​ភាព​ថ្លៃថ្នូរ​ក្នុងនាម​ជា​អ្នក​ផ្តល់​សេវា។

លោកស្រី​វេជ្ជបណ្ឌិត បាន​សំណូមពរ​ដល់​សមាជិក​ទាំងអស់ ចូលរួម​ពិនិត្យ ផ្តល់​មតិ​យោបល់ ដល់​ការ​ពិនិត្យឡើងវិញ​នូវ​វឌ្ឍនភាព នៃ​ការអនុវត្ត​ការងារ​របស់​គណៈ​វិជ្ជាជីវៈ​ឆ្មប​កន្លងមក នូវ​ចំណុច​ល្អ និង​ចំណុច​ដែល​នៅ​ខ្វះចន្លោះ ដើម្បី​ជា​ទុន​ក្នុង​ការរៀបចំ​ផែនការ​សកម្មភាព​សម្រាប់​ឆ្នាំ​បន្តបន្ទាប់​ទៀត៕

អត្ថបទ ៖ សំអឿន

The post មន្ត្រីជាន់ខ្ពស់ ៖ ឆ្មប គឺជាកម្លាំងចលករមួយយ៉ាងសំខាន់ក្នុងការចូលរួមចំណែកផ្តល់ សេវាសាធារណៈប្រកបដោយប្រសិទ្ធភាព appeared first on Kampuchea Thmey Daily.

ទិវាឆ្មបជាតិ អន្តរជាតិ ៥ ឧសភា នាថ្ងៃទី២៩ ខែមេសា ឆ្នាំ២០២៥ ត្រូវបានរៀបចំឡើងដើម្បីលើកកម្ពស់តួនាទីរបស់ឆ្មប ក្នុងការពារ និងថែទាំសុខភាពមាតា ទារក និងកុមារ។ ទិវានេះ នឹងជួយលើកកម្ពស់គុណភាពសេវា និងចូលរួមកាត់បន្ថយអត្រាឈឺ និងស្លាប់របស់មាតា និងទារក តាមរយៈការពង្រឹងសមត្ថភាព និងក្រមសីលធម៌វិជ្ជាជីវៈ។ ការរៀបចំទិវានេះ ក៏ជាឱកាសមួយក្នុងការពង្រឹង និងពង្រីកចំណេះដឹង ចែករំលែកចំណេះដឺង បទពិសោធន៍ ដើម្បីបន្ថែមសមត្ថភាពនិងលើកកម្ពស់តួនាទីរបស់ឆ្មប ក្នុងការឆ្លើយតបទៅនឹងតម្រូវការសុខភាពក្នុងលក្ខណៈទូលំទូលាយ គ្រប់វិស័យ គ្រប់កាលៈទេសៈ ទាំងពេលមានគ្រោះមហន្តរាយ និងគ្រោះអាសន្ន។

ដើម្បីឈានទៅសម្រេចបានការគ្របដណ្តប់សុខភាពជាសកល នៅកម្ពុជា លោករដ្ឋមន្រ្តី ក៏បានផ្តល់ជាអនុសាសន៍គន្លឹះមួយចំនួន ដល់អង្គពិធី ក៏ដូចជាឆ្មបទូទាំងប្រទេស ឱ្យបន្តជំរុញ និងផ្តល់ការចុះបញ្ជីអនុញ្ញាតប្រកបវិជ្ជាជីវឆ្មបឱ្យកាន់តែប្រសើឡើង និងឱ្យបានច្រើនជាបន្តបន្ទាប់ និងឈានទៅគ្រប់រូប។ ជាពិសេសត្រូវមានការសាមគ្គីភាពគ្នារវាង ឆ្មប គិលានុប្បដ្ឋាកយិកា វេជ្ជបណ្ទិត និងគ្រូពេទ្យគ្រប់កម្រិត កាន់តែស្អិតរមួត ដើម្បីដោះស្រាយរាល់បញ្ហាសុខភាព ចំពោះមាតា ទារក និងកុមារឱ្យកាន់តែល្អប្រសើឡើង។ ព្រមទាំងពិនិត្យមើលការចុះបញ្ជីអនុញ្ញាតប្រកបវិជ្ជាជីវឆ្មប និងវិជ្ជាជីវសុខាភិបាលផ្សេងៗទៀត ឱ្យបានច្បាស់លាស់ និងត្រឹមត្រូវ ដើម្បីរក្សាតម្លៃនៃការប្រកបវិជ្ជាជីវសុខាភិបាលឱ្យកាន់តែមានប្រសិទ្ធភាព និងគុណភាព។

លោករដ្ឋមន្ត្រី បានប្រាប់ឱ្យមានការយកចិត្តទុកដាក់លើចំណុចមួយចំនួន ក្នុងនោះ ត្រូវបន្តអភិវឌ្ឍន៍ខ្លួន និងសិក្សាស្រាវជ្រាវរកមូលហេតុជាបញ្ហា ដែលបានជួបជាញឹកញ៉ាប់។ ឆ្មបត្រូវដើរតួនាទីក្នុងការពិគ្រោះផ្តល់យោបល់ជូនដល់ស្រ្តីមានផ្ទៃពោះ ទាំងមុន និងក្រោយសម្រាល ផ្តល់ការប្រឹក្សាយោបល់ និងគិតគូអំពីចិត្តសាស្រ្ត ជូនដល់អ្នកដែលអាចនឹងមានផ្ទៃពោះ រឺអ្នកដែលត្រៀមមានផ្ទៃពោះ។

លើសពីនេះ ត្រូវពង្រឹងក្នុងការពិនិត្យមើលការលក់ឱសថនៅតាមឱសថស្ថាន ដើម្បីជៀសវាងការលក់ឱសថជូនអ្នកជំងឺដោយគ្មានវេជ្ជបញ្ជា រឺខុសពីវេជ្ជបញ្ជា របស់គ្រូពេទ្យ។ ឆ្មបត្រូវយកចិត្តទុកដាក់ក្នុងការចូលរួមណែនាំ និងពិនិត្យស្វែងរកសញ្ញាណជំងឺមហារីកមាត់ស្បូន និងមហារីកសុដន់ នៅតាមមណ្ឌលសុខភាព និងឆ្មបត្រូវផ្តល់ការណែនាំអំពីសុខភាពបន្តពូជ ជូនដល់ប្រជាពលរដ្ឋយល់ដឹងពីសារសំខាន់។

លោក ឈាង រ៉ា ក៏បានលើកឡើងអំពីអ្នកដឹកនាំ ដែលត្រូវមានទស្សនវិស័យច្បាស់លាស់ និងបញ្ចេញសកម្មភាពឱ្យកាន់តែរស់រវើក ដើម្បីជាស្នូលដើម្បីនាំមកនូវភាពជោគជ័យ និងសម្រេចគោលដៅ។ លោករដ្ឋមន្រ្តី បានបន្តថាដើម្បីឱ្យស្ថានភាពការងារមានការវិវឌ្ឍន៍ទៅមុខបានល្អ អ្នកដឹកនាំគ្រប់កម្រិតរបស់ឆ្មបត្រូវអនុវត្តន៍ ១) បណ្តុះបណ្តាលមធ្យោបាយនៃការទំនាក់ទំនង និងឱ្យមានភាពរស់រវើក ២) ត្រូវស្វែងរកនូវឯកសារ រឺអត្ថបទត្រូវធ្វើការផ្សព្វផ្សាយ ដែលទាក់ទងនឹងសកម្មភាពឆ្មប ៣) ព្យាយាមរៀបចំទស្សនាវដ្តី រឺព្រឹត្តិបត្រព័ត៌មាន ៤) ត្រូវចូលរួមក្នុងវេទិកាទាំងឡាយ ពិសេសវេទិកាអន្តរជាតិ ដើម្បីពិនិត្យមើលសកម្មភាព និងកិច្ចការងារមានភាពជឿនលឿនរបស់អន្តរជាតិ យកមកសិក្សា និងអនុវត្តន៍តាម៕

The post រដ្ឋមន្ត្រីសុខាភិបាល៖ ឆ្មប ដើរតួនាទីយ៉ាងសំខាន់ក្នុងកិច្ចការជួយសង្រ្គោះ និងថែទាំសុខភាពមាតា ទារក និងកុមារ appeared first on Kampuchea Thmey Daily.

ក្នុងសារលិខិត ក្នុងទិវាឆ្មបជាតិ-អន្តរជាតិ ថ្ងៃទី៥ ខែឧសភា ឆ្នាំ២០២៣ ក្រោមប្រធានបទ “រួមគ្នាជាថ្មី: ពីភស្តុតាងជាក់លាក់ ទៅការអនុវត្តពិតប្រាកដ” សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន លើកឡើង ប្រធានបទនេះ បានផ្តោតជាសំខាន់ទៅលើការប្ដេជ្ញាចិត្តរួមរបស់ប្រទេសទាំងអស់ជា សមាជិករបស់អង្គការសុខភាពពិភពលោក ក្នុងនោះមានទាំងប្រទេសកម្ពុជាផងដែរ ក្នុងការខិតខំប្រឹងប្រែង ដោយប្រមូលគ្រប់លទ្ធភាព និងធនធានដែលមានមកវិនិយោគលើការងារឆ្មប ដើម្បីមានឆ្មបជំនាញគ្រប់គ្រាន់ ពោលគឺ ត្រូវមានឆ្មប គិលានុបដ្ឋាក និងវេជ្ជបណ្ឌិតដែលបំពេញការងារជួយស្រ្តីក្នុងការសម្រាលកូន អាចឆ្លើយតបបានទៅនឹងតម្រូវការចាំបាច់នៃការថែទាំសុខភាព ដើម្បីកាត់បន្ថយអត្រាស្លាប់របស់ ស្ត្រី មាតា ទារក និងកុមារ។ ឆ្មបជំនាញគ្រប់ៗរូប បាន និងកំពុងបំពេញការងារយ៉ាងសកម្មក្នុងការតាមដានរកដើមហេតុនៃបញ្ហា និងផលវិបាកនានា ដើម្បីទប់ស្កាត់ជំងឺ ព្យាបាល និងសង្គ្រោះបន្ទាន់ ក្នុងគោលបំណងកាត់បន្ថយអត្រា នៃការស្លាប់របស់មាតា ទារក និងកុមារ។

សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បញ្ជាក់ថា ប្រទេសនីមួយៗចាំបាច់ត្រូវមានឆ្មបជំនាញគ្រប់គ្រាន់ ហើយឆ្មបជំនាញទាំងនោះត្រូវទទួលបានជាប្រចាំ នូវការបង្វឹកបំប៉នជំនាញ ទទួលបាននូវចំណេះដឹងថ្មីៗ ដែលមានប្រសិទ្ធភាព សម្រាប់ការផ្តល់សេវាថែទាំ ជួយសង្គ្រោះ និងព្យាបាលទាន់ពេលវេលា។ ក្រៅពីការផ្តល់សេវាសម្រាលកូន កាតព្វកិច្ចសំខាន់មួយទៀត គឺ ការថែទាំស្រីក្នុងពេលមានគភ៌ និងការថែទាំមាតា ទារក ក្រោយពេលសម្រាល រួមទាំងផ្តល់ការអប់រំអំពី អាហារូបត្ថម្ភ ការចិញ្ចឹមថែទាំទារក និងកុមារតូច។ បន្ថែមពីលើនេះ ឆ្មបជំនាញអាចជួយស្រ្តីក្នុងការទទួលបាននូវសេវាពន្យារកំណើតតាមតម្រូវការ និងតាមប្រាថ្នា ផ្តល់ការពិនិត្យតាមដាន ជំងឺមហារីកសុដន់ ឬ មហារីកមាត់ស្បូន និងជួយស្ត្រីដែលរងគ្រោះដោយអំពើហិង្សាទាក់ទងនឹងយេនឌ័រ ថែមទៀត។ ដូចបុគ្គលិកសុខាភិបាលដទៃទៀតដែរ ទោះបីមានមុខងារជាឆ្មបជំនាញក៏ដោយ ក៏ឆ្មបជំនាញទាំងអស់នោះមិនបាន រាថយឡើយក្នុងការប្រឈមនឹងជំងឺឆ្លងជាសាកល រួមទាំងជំងឺកូវីដ-១៩ផង។ អាស្រ័យហេតុនេះហើយ ទិវាឆ្មបជាតិ-អន្តរជាតិ ៥ឧសភា ពិតជាមានអត្ថន័យ និងមានសារៈសំខាន់ណាស់ ក្នុងការជំរុញការប្តេជ្ញាចិត្ត របស់ប្រទេសទាំងអស់ក្នុងសាកលលោកឱ្យរួមគ្នាជាថ្មី : ពីភស្តុតាងជាក់លាក់ទៅជាការអនុវត្តពិតប្រាកដ និងត្រូវបន្តការវិនិយោគលើការងារឆ្មប ដើម្បីសុខភាព និងសុខុមាលភាពរបស់ប្រជាជនគ្រប់រូប។

ឆ្លៀតក្នុងឱកាសនេះ សម្ដេចកិត្តិព្រឹទ្ធបណ្ឌិត សូមសម្ដែងនូវការកោតសរសើរ និងអបអរសាទរយ៉ាងក្រៃលែងចំពោះ ការសម្រេចបាននូវវឌ្ឍនភាពដ៏ល្អប្រសើរក្នុងការងារសុខភាពមាតា ទារក កុមារ ដូចដែលបានបញ្ជាក់ដោយការអង្កេតប្រជាសាស្ត្រ និងសុខភាព ដែលនៅក្នុងនោះ អត្រានៃការសម្រាលកូនដោយឆ្មបជំនាញមានការ កើនឡើងពី ៣៤% នៅឆ្នាំ២០០០ ដល់ ៩៩% នៅឆ្នាំ២០២១-២២ ដែលធ្វើឱ្យអត្រាមរណភាពមាតាបានថយចុះពី ៤៣៧ករណី នៅឆ្នាំ២០០០ មកនៅ ១៥៤ករណី ក្នុង ១សែនកំណើតរស់ នៅឆ្នាំ២០២១-២២ អត្រាមរណភាពទារកទើបកើតបានថយចុះពី ៣៧ករណី នៅឆ្នាំ២០០០ មកនៅ ៨ករណី ក្នុង ១ពាន់កំណើតរស់ នៅឆ្នាំ២០២១-២២ និងអត្រាមរណភាពកុមារអាយុក្រោម ៥ឆ្នាំ បានថយចុះពី ១២៤ករណី នៅឆ្នាំ២០០០ ដល់ ១៦ករណី ក្នុង ១ពាន់កំណើតរស់ នៅឆ្នាំ២០២១-២២។

ទោះបីជាយ៉ាងណា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បញ្ជាក់ថា យើងមិនត្រូវស្កប់ស្កល់នឹងវឌ្ឍនភាពខាងលើនេះឡើយ ដូចនេះហើយ សម្ដេចកិត្តិព្រឹទ្ធបណ្ឌិត សូមអំពាវនាវចំពោះថ្នាក់ដឹកនាំ មន្ត្រីរាជការ បុគ្គលិកសុខាភិបាល អ្នកផ្តល់សេវាទាំងអស់សូមចូលរួមគាំទ្រការអនុវត្តគោលនយោបាយរបស់រាជរដ្ឋាភិបាលឱ្យកាន់តែមានប្រសិទ្ធភាពខ្ពស់ ដើម្បីឈានទៅសម្រេចបាន គោលដៅរបស់រាជរដ្ឋាភិបាលតាមការកំណត់ និងសូមអំពាវនាវដល់គ្រប់ស្ថាប័នពាក់ព័ន្ធទាំងអស់ ទាំងជាតិ និងអន្តរជាតិ សូមជួយ និងបន្តជួយវិនិយោគគាំទ្រដល់ការងារឆ្មបថែមទៀត ដើម្បីសុខភាពប្រជាជនកម្ពុជា ក្នុងពេលបច្ចុប្បន្ន និងពេលអនាគត៕

The post សម្ដេចកិត្តិព្រឹទ្ធបណ្ឌិត៖ ប្រទេសនីមួយៗចាំបាច់ត្រូវមានឆ្មបជំនាញគ្រប់គ្រាន់ appeared first on Kampuchea Thmey Daily.

យោង​តាម​របាយការណ៍​អង្កេត​ប្រជាសាស្ត្រ និង​សុខភាព​កម្ពុជា ឆ្នាំ ២០២១ ២០២២ បាន​រក​ឃើញ​ថា អត្រា​មរណភាព​មាតា​ធ្លាក់ចុះ​ពី​ចំនួន ៤៣៧ នាក់ ក្នុង ១ សែន​កំណើត រស់នៅ​ឆ្នាំ ២០០០ មក​ត្រឹម ១៥៤ នាក់ ក្នុង ១ សែន​កំណើត រស់នៅ​ឆ្នាំ ២០២១។ ចំណែក​អត្រា​មរណភាព​ទារក​ទើប​កើត​ក៏បាន​ធ្លាក់​ចុះ​គួរ​ឲ្យ​កត់សម្គាល់​ផង​ដែរ គឺ​ពី​ចំនួន ៣៧ នាក់ ក្នុង ១០០០ កំណើត រស់នៅ​ឆ្នាំ ២០០០ មក ៨ នាក់​ប៉ុណ្ណោះ ក្នុង ១០០០ កំណើត រស់នៅ​ឆ្នាំ២០២១។

លោក​សាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួងសុខាភិបាល មាន​ប្រសាសន៍​ថា ភាព​ប្រសើរ​ឡើង នៃ​ការ​កាត់បន្ថយ​អត្រា​មរណភាព​មាតា និង​ទារក​នេះ ដោយសារ​បច្ចុប្បន្ន​ប្រជាពលរដ្ឋ​មានការ​យល់​ដឹង​ពី​សារសំខាន់​ក្នុង​ការ​ថែរក្សា​សុខភាព​កូន​ឲ្យ​បាន​ល្អ ដោយ​មក​ទទួល​សេវា​តាម​មូលដ្ឋាន​សុខាភិបាល​របស់​រដ្ឋ ទាំង​ពេល​មាន​ផ្ទៃពោះ មក​ពិនិត្យ​ទៀងទាត់ និង​ពេល​គ្រប់​ខែ សម្រាល​នៅ​មណ្ឌល​សុខភាព និង​មន្ទីរពេទ្យ។

លោក​រដ្ឋមន្ត្រី បន្ត​ទៀត​ថា លើស​ពី​នេះ រាជរដ្ឋាភិបាល ក៏បាន​ឧបត្ថម្ភ​ប្រាក់​ដល់​ស្ត្រី​ដែល​មាន​ជីវភាព​ក្រីក្រ ទាំង​ពេល​ពិនិត្យ​ផ្ទៃពោះ សម្រាល និង​ផ្តល់​ប្រាក់​ដល់​ទារក​ទើប​កើត​រហូតដល់ ២ ឆ្នាំ សរុប​ប្រមាណ ១៩០ ដុល្លារ ដើម្បី​ជួយ​ទ្រទ្រង់​ជីវភាព​ឲ្យ​កាន់តែ​ប្រសើរ។

លោក​បន្ថែម​ថា ក្រៅពី​នេះ​ភាព​ជោគជ័យ នៃ​អត្រា​មរណភាព​មាតា និង​ទារក​នេះ មួយ​ផ្នែក​ជា​គុណ​តម្លៃ នៃ​ការ​ចូលរួម​របស់​ឆ្មប​ដែល​បាន​ដើរ​តួនាទី​យ៉ាង​សំខាន់​ក្នុង​ការ​ចូលរួម​ថែទាំ​សុខភាព​មាតា និង​ទារក ខណៈ​បច្ចុប្បន្ន​មាន​ឆ្មប​ប្រមាណ​ជាង ៦០០០ នាក់ កំពុង​បម្រើ​ការងារ​ផ្តល់​សេវា​ជូន​ប្រជាពលរដ្ឋ ដោយ​យ៉ាងហោចណាស់​មាន​ឆ្មប ២ នាក់ នៅ​គ្រប់​មណ្ឌល​សុខភាព ទូទាំង​ប្រទេស។

លោក​រដ្ឋមន្ត្រី​បន្ថែម​ទៀត​ថា ស្របតាម​តួនាទី​ដ៏​សំខាន់​របស់​ឆ្មប ក្រសួងសុខាភិបាល បាន​ខិតខំ​ពង្រឹង​សមត្ថភាព​ឆ្មប ដោយ​មាន​ទាំង​ការ​រៀបចំ​ការ​បណ្ដុះបណ្ដាល​មុន​ពេល​បម្រើ​ការងារ និង​បណ្ដុះបណ្ដាល​ក្នុង​ពេល​បម្រើ​ការងារ សំដៅ​ធ្វើ​យ៉ាង​ណា​ឲ្យ​ឆ្មប​របស់​យើង​មាន​សមត្ថភាព​វិជ្ជាជីវៈ​ខ្ពស់ ដើម្បី​ផ្តល់​សេវា​ជូន​ប្រជាពលរដ្ឋ​ប្រកបដោយ​ជំនឿ​ទុកចិត្ត។

លោក​រដ្ឋមន្ត្រី​បញ្ជាក់​ថា ឆ្មប​មាន​កិត្តិយស​ដ៏​ឧត្ដុង្គឧត្ដម​ណាស់​សម្រាប់​មនុស្សលោក​គ្រប់រូប ព្រោះ​ថា គាត់​គឺជា​អ្នក​ថែទាំ​មាតា និង​ទារក តាំងពី​ចាប់កំណើត​រហូតដល់​កើត ហើយ​គាត់​ក៏​ជា​មនុស្ស​ដំបូង​គេ​បំផុត​ដែល​បាន​ឃើញ​យើង​មុនគេ​បន្ទាប់ពី​សម្រាល​មុន​យក​ទៅ​ឲ្យ​ម្តាយ​យើង៕

អត្ថបទ ៖ សំអឿន

The post អត្រាមរណភាពរបស់មាតា និងទារក នៅកម្ពុជា បន្តធ្លាក់ចុះជាបន្តបន្ទាប់​ appeared first on Kampuchea Thmey Daily.