ព័ត៌មានជាតិ

មន្ត្រីជាន់ខ្ពស់ ៖ ឆ្មប គឺជាកម្លាំងចលករមួយយ៉ាងសំខាន់ក្នុងការចូលរួមចំណែកផ្តល់ សេវាសាធារណៈប្រកបដោយប្រសិទ្ធភាព

បានផុស

១០ ខែ មុន

នៅ

ថ្ងៃអាទិត្យ ២៨ កញ្ញា ២០២៥

ដោយ

លោកស្រីវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល បានអះអាងថា ឆ្មបគឺជាកម្លាំងចលករមួយយ៉ាងសំខាន់ នៅក្នុងវិស័យសុខាភិបាល ក្នុងការចូលរួមចំណែកផ្តល់សេវាសាធារណៈប្រកបដោយប្រសិទ្ធភាព និងលើកកម្ពស់សុខុមាលភាពរបស់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងពិធីបើក និងបិទ «កិច្ចប្រជុំក្រុមប្រឹក្សាគណៈវិជ្ជាជីវៈឆ្មបកម្ពុជា អាណត្តិទី ៣» កាលពីថ្ងៃទី ២៧ កញ្ញា លោកស្រីវេជ្ជបណ្ឌិត បានណែនាំដល់ឆ្មបគ្រប់រូប ត្រូវតែពង្រឹងសមត្ថភាពរបស់ខ្លួនឱ្យបានជាប់ជាប្រចាំ ដើម្បីដោះស្រាយអាទិភាពសុខភាព ព្រមទាំងឆ្លើយតបទៅនឹងគ្រោះអាសន្ននានាឱ្យបានទាន់ពេល។

លោកស្រីវេជ្ជបណ្ឌិត បានបន្តថា ទន្ទឹមនឹងនេះ ការលើកកម្ពស់គុណភាពសេវាថែទាំសុខភាព និងអាហារូបត្ថម្ភ ការជំរុញការប្រើប្រាស់សេវាសុខាភិបាលឌីជីថល និងការជំរុញការចូលរួមរបស់បុគ្គលគ្រួសារ និងសហគមន៍ ក្នុងការលើកកម្ពស់សុខភាពមាតា ទារក និងកុមារ គឺជាជំហានសំខាន់មួយ ដើម្បីសម្រេចបាននូវការគ្របដណ្តប់សុខភាពជាសកល។

លោកស្រីវេជ្ជបណ្ឌិត បានបន្តទៀតថា ក្នុងរយៈពេល ២ ទសវត្ស កន្លងមកនេះ ប្រទេសកម្ពុជាមានការរីកចម្រើនយ៉ាងខ្លាំងក្នុងការកាត់បន្ថយអត្រាស្លាប់របស់ទារក និងកុមារ ដោយបច្ចុប្បន្នអត្រាស្លាប់របស់ទារកនៅសល់ត្រឹមតែ ៨ ក្នុង ១ ០០០ កំណើតរស់ និងកុមារអាយុក្រោម ១ ឆ្នាំ នៅសល់ត្រឹមតែ ១២ ក្នុង ១ ០០០ កំណើតរស់ ប៉ុណ្ណោះ។ នេះមានន័យថា កម្ពុជា សម្រេចបានរួចហើយនូវគោលដៅអភិវឌ្ឍន៍ប្រកបដោយចីរភាពនៅឆ្នាំ ២០៣០។

លោកស្រីវេជ្ជបណ្ឌិត បានណែនាំឱ្យក្រុមប្រឹក្សាគណៈវិជ្ជាជីវៈឆ្មបថ្នាក់ជាតិ និងថ្នាក់រាជធានី ខេត្ត ធ្វើការរួមគ្នា រៀបចំផែនការសកម្មភាពជាមួយគ្នា ដើម្បីពង្រឹងការអនុវត្តបទដ្ឋានគតិយុត្តិ ការបណ្តុះបណ្តាលដោយអនុលោមតាមគោលការណ៍ CPD។ ពង្រឹងប្រព័ន្ធកត់ត្រា និងបញ្ជូនរបាយការណ៍ប្រចាំខែ អំពីវឌ្ឍនភាពមកនាយកដ្ឋានមន្ទីរពេទ្យ និងថ្នាក់ដឹកនាំទទួលបន្ទុក។ បង្កើនសមត្ថភាព និងអនុវត្តនូវនិយាម នៃការអនុវត្តការងារឆ្មប។ ពង្រឹងការចុះបញ្ជិកា និងបន្តអាជ្ញាប័ណ្ណឱ្យបាន ១០០%។ ត្រូវពង្រឹងយន្តការពិនិត្យតាមដានលើការប្រតិបត្តិការងាររបស់សមាជិកឆ្មប នៅគ្រប់លំដាប់ថ្នាក់ ដើម្បីធានាបាននូវក្រមសីលធម៌វិជ្ជាជីវៈ សុចរិតភាព និងភាពថ្លៃថ្នូរក្នុងនាមជាអ្នកផ្តល់សេវា។

លោកស្រីវេជ្ជបណ្ឌិត បានសំណូមពរដល់សមាជិកទាំងអស់ ចូលរួមពិនិត្យ ផ្តល់មតិយោបល់ ដល់ការពិនិត្យឡើងវិញនូវវឌ្ឍនភាព នៃការអនុវត្តការងាររបស់គណៈវិជ្ជាជីវៈឆ្មបកន្លងមក នូវចំណុចល្អ និងចំណុចដែលនៅខ្វះចន្លោះ ដើម្បីជាទុនក្នុងការរៀបចំផែនការសកម្មភាពសម្រាប់ឆ្នាំបន្តបន្ទាប់ទៀត៕

អត្ថបទ ៖ សំអឿន