ឆ្លងឆ្នាំសកល Archives - Kampuchea Thmey Daily

មនុស្ស២២នាក់បានរងរបួស ដោយការវាយប្រហារគ្រាប់បែកនៅហ្វីលីពីន នៅយប់ឆ្លងឆ្នាំ

Minea Neu — Fri, 02 Jan 2026 09:51:30 +0000

មនុស្ស២២នាក់បានរងរបួស បន្ទាប់ពីជនសង្ស័យពីរនាក់ជិះម៉ូតូគប់គ្រាប់បែកចូលទៅកន្លែងពិធីជប់លៀងមួយអំឡុងពេលទទួលឆ្នាំថ្មីនៅភូមិ Barangay Dalapitan ក្នុងទីក្រុង Cotabato នៃខេត្ត Matalam ប្រទេសហ្វីលីពីន។

កាំជ្រួចថ្ងៃឆ្លងឆ្នាំ។ Reuters

សារព័ត៌មាន The Philippine Daily Inquirer ប៉ូលិសនៅតំបន់ Matalam បានផ្សាយថា បុរសទាំងពីរនាក់ ជិះម៉ូតូមួយគ្រឿង ឆ្លងកាត់តាមដងផ្លូវទៅមកៗ ហើយបានគប់គ្រាប់បែក។ អ្នកស្រុកជឿថា គ្រាប់បែកដែលគប់ចូលនោះ ជាគ្រាប់បែកដៃ ដោយផ្អែកលើសំបកគ្រាប់ ដែលប្រមូលបានពីកន្លែងកើតហេតុ។

ក្រុមអ្នកស៊ើបអង្កេតកំពុងពិនិត្យមើលវីដេអូតាមកាមេរ៉ាសុវត្ថិភាប (CCTV) ក្នុងគោលបំណងកំណត់អត្តសញ្ញាណ និងតាមចាប់ជនសង្ស័យ។

អភិបាលក្រុង Cotabato លោក Emmylou Mendoza បានថ្កោលទោសយ៉ាងខ្លាំងចំពោះការវាយប្រហារដ៏អាក្រក់នេះ។

លោក Mendoza បាននិយាយនៅក្នុងសេចក្តីថ្លែងការណ៍មួយថា៖ «អំពើហិង្សាមិនអាចកើតឡើងក្នុងខេត្កនេះដាច់ខាត»។

លើសពីនេះ លោក Mendoza បានបញ្ជាឱ្យប៉ូលិសនៅតំបន់ Matalam កំណត់អត្តសញ្ញាណជនសង្ស័យ ហើយនាំពួកគេទៅកាន់តុលាការភ្លាមៗ ក្នុងករណីពួកគេអាចរត់គេចខ្លួន។

លោក Mendoza ដែលប្តេជ្ញាបន្តរកយុត្តិធម៌ដល់ជនរងគ្រោះបាននិយាយថា ជាសំណាងល្អ មិនមានអ្នកស្លាប់ក្នុងហេតុការណ៍នេះឡើយ។

តែយ៉ាងណាអំឡុងចូលឆ្នាំសកលឆ្នាំនេះមានហេតុការណ៍រន្ធត់ជាច្រើន បានកើតឡើងនៅបណ្តាប្រទេសមួយចំនួនដូចជាសោកនាដកម្មឆេះក្លឹបកម្សាន្តនៅស្វីស ថ្ងៃឆ្លងឆ្នាំ និង ផ្ទុះកាំជ្រួច បាញ់អបអរថ្ងៃឆ្លងឆ្នាំនៅបាងកក និងកន្លែងមួយចំនួនផ្សេងទៀត៕

ប្រែសម្រួល៖ ណឺ មិនា

The post មនុស្ស២២នាក់បានរងរបួស ដោយការវាយប្រហារគ្រាប់បែកនៅហ្វីលីពីន នៅយប់ឆ្លងឆ្នាំ appeared first on Kampuchea Thmey Daily.

កោះ សាម័រ និងគីរីបាទី ទទួលស្វាគមន៍ឆ្នាំ២០២៦ មុនគេបង្អស់

Minea Neu — Wed, 31 Dec 2025 11:48:55 +0000

ថ្វីត្បិតតែប្រទេសជាច្រើនឆ្លងឆ្នាំសកលដូចគ្នា តែក៏មានប្រទេសនិងដែនកោះមួយចំនួនទៀត មិនទាន់បានឆ្លងនៅឡើយ។

ប្រជាជាតិនៅកោះប៉ាស៊ីហ្វិកដូចជាសាម័រ [Samoa] និងគីរីបាទី [Kiribati] បានស្វាគមន៍ឆ្នាំ២០២៦ មុនគេបង្អស់ ខណៈកោះ [Samoa American] សាម័រអាមេរិកបានប្រារព្ធពិធីនេះក្រោយមួយថ្ងៃ។

ភពផែនដី។ Reuters

យោងតាម សារព័ត៌មាន VN express ឱ្យដឹងថា នៅពេលដែលទ្រនិចនាឡិកាដើរបានពាក់កណ្តាល អធ្រាត្រនៅថ្ងៃទី៣១ ខែធ្នូ ឆ្នាំថ្មីបានចាប់ផ្តើមធ្វើដំណើរជុំវិញពិភពលោក ដោយសារការបង្វិលរបស់ផែនដី និងប្រព័ន្ធមួយចំនួននៃតំបន់ពេលវេលាខុសៗគ្នា ហើយការប្រារព្ធពិធីចូលឆ្នាំថ្មីរបស់កោះនេះប្រព្រឹត្តទៅបន្ទាប់ពីជិត ២៦ម៉ោងក្រោយនៅជុំវិញពិភពលោក។

កោះ Samoa និង Kiribati ជាកន្លែងដំបូងគេដែលទទួលស្វាគមន៍ឆ្នាំថ្មី បន្ទាប់មកប្រទេសនូវែលសេឡង់ ដែលទីក្រុងដ៏ធំមួយដូចជា Auckland បានរៀបចំការបាញ់កាំជ្រួច និងមានព្រឹត្តិការណ៍សាធារណៈជាច្រើនទៀត។

កន្លែងចុងក្រោយគេដើម្បីអបអរឆ្នាំថ្មីគឺកោះ Samoa American, Howland និងកោះ Baker (ទឹកដីគ្មានមនុស្សរស់នៅរបស់សហរដ្ឋអាមេរិក) នៅមហាសមុទ្រប៉ាស៊ីហ្វិក៕

ប្រែសម្រួល៖ ណឺ មិនា

The post កោះ សាម័រ និងគីរីបាទី ទទួលស្វាគមន៍ឆ្នាំ២០២៦ មុនគេបង្អស់ appeared first on Kampuchea Thmey Daily.

រដ្ឋបាលខេត្តស្វាយរៀង ហាមអុជកាំជ្រួច និងដុតផាវគ្រប់ប្រភេទ ក្នុងឱកាសពិធីបុណ្យឆ្លងឆ្នាំសកល

Ken Malis — Tue, 30 Dec 2025 07:31:31 +0000

រដ្ឋបាលខេត្តស្វាយរៀង ហាមឃាត់ការអុជកាំជ្រួច និងដុតផាវគ្រប់ប្រភេទ ក្នុងឱកាសពិធីបុណ្យឆ្លងឆ្នាំថ្មី ឆ្នាំសកល ឆ្នាំ២០២៦ នៅគ្រប់មូលដ្ឋានទីតាំងទាំងអស់ក្នុងភូមិសាស្ត ខេត្តស្វាយរៀង។

តាមរយៈសេក្តីជូនដំណឹងនៅថ្ងៃទី៣០ ខែធ្នូ ឆ្នាំ២០២៥ នេះ រដ្ឋបាលខេត្តស្វាយរៀង បានធ្វើការហាមឃាត់ការអុជកាំជ្រួច និងដុតផាវគ្រប់ប្រភេទ ក្នុងឱកាសពិធីបុណ្យឆ្លងឆ្នាំថ្មី ឆ្នាំសកល ឆ្នាំ២០២៦ នៅគ្រប់មូលដ្ឋានទីតាំងទាំងអស់ក្នុងភូមិសាស្ត ខេត្តស្វាយរៀង ក្នុងន័យចូលរួមរក្សានូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយ សាធារណៈ ចៀសវាងការបង្កឱ្យមានបញ្ហាហានិភ័យជាយថាហេតុណាមួយ នាឱកាសពិធី បុណ្យឆ្លងឆ្នាំថ្មី ឆ្នាំសកល ឆ្នាំ២០២៦ ដែលនឹងប្រព្រឹត្តទៅនៅយប់ថ្ងៃទី៣១ ខែធ្នូ ឆ្នាំ២០២៥ ខាងមុខនេះ។

រដ្ឋបាលខេត្តស្វាយរៀង សង្ឃឹមជឿជាក់ថា សាធារណជន ប្រជាពលរដ្ឋ ក្រុមហ៊ុន ស្ថាប័នរដ្ឋ ឯកជន ព្រមទាំងភ្ញៀវជាតិ-អន្តរជាតិទាំងអស់ នឹងចូលរួមអនុវត្តតាមខ្លឹម ប្រកបដោយស្មារតីទទួលខុសត្រូវខ្ពស់បំផុត៕

The post រដ្ឋបាលខេត្តស្វាយរៀង ហាមអុជកាំជ្រួច និងដុតផាវគ្រប់ប្រភេទ ក្នុងឱកាសពិធីបុណ្យឆ្លងឆ្នាំសកល appeared first on Kampuchea Thmey Daily.

លោក ហែម សុវត្ថិ ផ្ដួចផ្ដើមឱ្យមានការរៀបចំសម្ដែងទស្សនីយភាព”ល្ខោនបាសាក់” លើកទី ២ ជូនពលរដ្ឋទស្សនាកម្សាន្តនៅឃុំកោះសូទិន នាឱកាសបុណ្យឆ្លងឆ្នាំសកល ២០២៥

អ៊ិន ពិសី — Thu, 02 Jan 2025 04:40:27 +0000

លោក ហែម សុវត្ថិ ប្រធានក្រុមការងាររាជរដ្ឋាភិបាលចុះមូលដ្ឋានឃុំកោះសូទិន បានផ្ដួចផ្ដើមឱ្យមានការរៀបចំសម្ដែងទស្សនីយភាព “ល្ខោនបាសាក់” ជូនប្រជាពលរដ្ឋទស្សនាកម្សាន្តជាលើកទី ២ កាលពីថ្ងៃទី ៣១ ខែធ្នូ ឆ្នាំ ២០២៤ ស្ថិតក្នុងភូមិទី ១១ បរិវេណវត្តពោធិរិទ្ធ ហៅវត្តត្នោត ដោយមានអ្នកចូលរួមទស្សនាយ៉ាងច្រើនកុះករ។

ការរៀបចំផ្ទាំងទស្សនីយភាពនេះ គឺជាការចូលរួមអបអរសាទរក្នុងឱកាសបុណ្យចូលឆ្នាំសកល ឆ្នាំ ២០២៥ ដើម្បីបង្កលក្ខណៈសប្បាយរីករាយជូនប្រជាពលរដ្ឋក្នុងឃុំកោះសូទិន ក្រោមម្លប់សន្តិភាព ដែលមាន សម្តេចតេជោ ជាប្រធានគណបក្សប្រជាជនកម្ពុជា និង សម្តេចធិបតី ជានាយករដ្ឋមន្ត្រី នៃព្រះរាជាណាចក្រកម្ពុជា រាជរដ្ឋាភិបាលកម្ពុជានីតិកាលទី ៧៕

The post លោក ហែម សុវត្ថិ ផ្ដួចផ្ដើមឱ្យមានការរៀបចំសម្ដែងទស្សនីយភាព”ល្ខោនបាសាក់” លើកទី ២ ជូនពលរដ្ឋទស្សនាកម្សាន្តនៅឃុំកោះសូទិន នាឱកាសបុណ្យឆ្លងឆ្នាំសកល ២០២៥ appeared first on Kampuchea Thmey Daily.

លោក ប៉ែន បូណា៖ ក្តីសប្បាយរីករាយក្រោមម្លប់សុខសន្តិភាព ក្លាយជាមោទនភាពជាតិខ្មែរកាន់តែរឹងមាំ

hun sirivadh — Thu, 02 Jan 2025 04:25:40 +0000

មិនខុសពីបណ្តាប្រទេសនានាក្នុងពិភពលោកប៉ុន្មានទេ ពិធីបុណ្យចូលឆ្នាំសកល ឆ្នាំ២០២៥ នេះ ត្រូវបានប្រារព្ធឡើងយ៉ាងអធិកអធមបំផុតនៅកម្ពុជា ជាពិសេសនៅរាជធានីភ្នំពេញ។ ប្រជាពលរដ្ឋខ្មែរនិងភ្ញៀវបរទេសសរុបជាង ៣,៥ លាននាក់ បានដើរកម្សាន្តប្រកបដោយក្តីសប្បាយរីករាយ និងបង្ហាញស្នាមញញឹមដែលបង្កប់ដោយមោទនភាពជាតិយ៉ាងជ្រាលជ្រៅបំផុត។

នេះគឺជាសក្ខីភាពដែលសបញ្ជាក់ថា ប្រជាពលរដ្ឋខ្មែរមានក្តីសង្ឃឹម និងបញ្ចេញស្នាមញញឹមគ្រប់ពេលវេលានិងគ្រប់ទីកន្លែងជាពិសេសពេលមានពិធីបុណ្យធំៗដូចជាព្រះរាជពិធីបុណ្យអុំទូកកាលពីខែវិច្ឆិកា ឆ្នាំ២០២៤ កន្លងទៅ និងពិធីបុណ្យឆ្លងឆ្នាំសកលនាពេលនេះជាដើម។ ក្រៅពីនោះ ប្រជាពលរដ្ឋខ្មែរក៏ដូចជាភ្ញៀវទេសចរអន្តរជាតិ ក៏មានពេលវេលាសប្បាយរីករាយនៅរាល់ចុងសប្តាហ៍ ឬក្នុងពិធីផ្សេងៗជាច្រើនទៀត ពីព្រោះ កម្ពុជាមានសុខសន្តិភាពពេញលេញរយៈពេលយូរមិនធ្លាប់មានក្នុងប្រវត្តិសាស្ត្រសម័យទំនើបជាង ៥០០ ឆ្នាំចុងក្រោយ ដែលធ្វើឱ្យប្រជាពលរដ្ឋបានស្គាល់ការរស់នៅបែបស៊ីវិល័យដែលមិនធ្លាប់មានពីមុន។

សុខសន្តិភាព បានធ្វើឱ្យស្ថានភាពប្រទេសជាតិផ្លាស់ប្តូរខុសពីអតីតកាលទាំងស្រុង ពោលគឺ ផ្លាស់ប្តូរពីការបាញ់កាំភ្លើង កាប់សម្លាប់គ្នាដ៏គួរឱ្យព្រឺខ្លាច មកជាការបាញ់កាំជ្រួចដើម្បីអបអរសាទរពិធីបុណ្យយ៉ាងសប្បាយរីករាយ។ ប្តូរពីសម្រែកដោយក្តីឈឺចាប់ក្នុងរបបប្រល័យពូជសាសន៍ មកជាសម្រែកហ៊ោកញ្ជៀវដោយក្តីសប្បាយរីករាយ។ ប្តូរពីស្ថានភាពតោកយ៉ាកអត់បាយក្រហាយទឹកមករកភាពសម្បូរបែប។ ប្តូរពីភាពក្រៀមក្រោះស្រពាប់ស្រពោនមកមានស្នាមញញឹមស្រស់ស្រាយ… ពោលគឺសុខសន្តិភាពបានធ្វើឱ្យប្រទេសកម្ពុជាបានស្គាល់ការផ្លាស់ប្តូរទាំងស្រុង ទាំងស្ថានភាពសង្គម នយោបាយ ទាំងផ្នត់គំនិតមនុស្ស។

ការផ្លាស់ប្តូរដ៏ស៊ីជម្រៅនេះកើតឡើងដោយសារកម្ពុជាមានមេដឹកនាំដ៏ខ្លាំងពូកែនិងលះបង់ខ្ពស់ចំពោះជាតិនិងប្រជាពលរដ្ឋដូចសម្តេចតេជោ ហ៊ុន សែន អតីតនាយករដ្ឋមន្ត្រី និងមានអ្នកបន្តវេនដែលពោរពេញដោយសមត្ថភាពនិងភាពវាងវៃដូចសម្តេចធិបតី ហ៊ុន ម៉ាណែត។ ការផ្លាស់ប្តូរស៊ីជម្រៅនេះ ក៏កើតឡើងដោយសារប្រជាពលរដ្ឋឈរនៅខាងភាពត្រឹមត្រូវ ពោលគឺពួកគេតែងផ្តល់យុត្តិធម៌ដល់អ្នកដឹកនាំនិងប្រឆាំងដាច់ខាតចំពោះអ្នកនយោបាយជ្រុលនិយមដែលរង់ចាំតែបំផ្លិចបំផ្លាញនិងជាន់ពន្លិចជាតិខ្លួនឯង។ ជាក់ស្តែង ក្នុងឱកាសបុណ្យចូលឆ្នាំសកលឆ្នាំ២០២៥ នេះ កម្មវិធី «សាទរកម្ពុជា» ត្រូវបានប្រារព្ធឡើងយ៉ាងអធិកអធមនិងមានប្រជាពលរដ្ឋនិងយុវជនចូលរួមយ៉ាងច្រើនកុះករប្រកបដោយក្តីសប្បាយរីករាយយ៉ាងក្រៃលែង។ បើទោះបីជាមានជនជ្រុលនិយមមួយក្តាប់តូច បានឆ្លៀតយកឧបទ្ទវហេតុបន្តិចបន្តួចដែលកើតឡើងដោយសារបញ្ហាបច្ចេកទេសដើម្បីជាន់ពន្លិចតម្លៃជាតិសាសន៍ខ្លួនឯងយ៉ាងណាក្តី ក៏ប្រជាពលរដ្ឋខ្មែរទូទាំងប្រទេសនៅតែរក្សាភាពសប្បាយរីករាយនិងមោទនភាពជានិច្ចចំពោះសមិទ្ធផលដ៏ធំធេងដែលរាជរដ្ឋាភិបាលសម្រេចបាន។

សរុបមកវិញ ក្តីសប្បាយរីករាយរបស់ប្រជាពលរដ្ឋខ្មែរក្រោមម្លប់សុខសន្តិភាព បានក្លាយជាមោទនភាពជាតិ ដែលមិនអាចបាត់បង់ទៅវិញឡើយ ពីព្រោះវាជាក្តីសុខសប្បាយដែលកម្រកើតមានណាស់ នៅក្នុងប្រទេសកម្ពុជាដ៏កំសត់របស់យើង។ ដូច្នេះ ប្រជាពលរដ្ឋខ្មែរត្រូវតែរក្សាឱ្យបាននូវស្នាមញញឹមនិងក្តីសង្ឃឹមនេះឱ្យស្ថិតស្ថេរគង់វង្សជារៀងរហូតតទៅ តាមរយៈការចូលរួមជាមួយរាជរដ្ឋាភិបាលដើម្បីការពារសុខសន្តិភាពដោយមិនអនុញ្ញាតឱ្យជនណាឬក្រុមណាមកបំផ្លាញបានជាដាច់ខាត៕

ដោយ ប៉ែន បូណា

The post លោក ប៉ែន បូណា៖ ក្តីសប្បាយរីករាយក្រោមម្លប់សុខសន្តិភាព ក្លាយជាមោទនភាពជាតិខ្មែរកាន់តែរឹងមាំ appeared first on Kampuchea Thmey Daily.

ថ្ងៃទី ១ ដើមឆ្នាំ ពលរដ្ឋបន្តដើរលេងកម្សាន្តនៅសួនមាត់ទន្លេ ខណៈរបៀបរៀបរយ និងបរិស្ថានអនាម័យ មានភាពប្រសើរ

អ៊ិន ពិសី — Thu, 02 Jan 2025 01:26:18 +0000

ថ្ងៃទី ១ នៃឆ្នាំ ២០២៥ នេះ ប្រជាពលរដ្ឋជាច្រើននាក់ បាននាំគ្នាបន្តដើរលេងកម្សាន្តនៅសួនច្បារមាត់ទន្លេ ទល់មុខព្រះបរមរាជវាំង ខណៈសណ្ដាប់ធ្នាប់ របៀបរៀបរយ និងបរិស្ថានអនាម័យ មានភាពល្អ ប្រសើរ។

នៅព្រឹកថ្ងៃដំបូង ដែលជាថ្ងៃឈប់សម្រាកផងនោះ ប្រជាពលរដ្ឋជាច្រើននាក់ មានទាំងយុវជន យុវនារី ក្មេង ចាស់ ប្រុស ស្រី បានទៅលេងកម្សាន្តជាលក្ខណៈបងប្អូន សាច់ញាតិ គ្រួសារ និងមិត្តភ័ក្ដិ ដោយបានទស្សនាទស្សនីយភាព នៃការតុបតែងផ្សេងៗ រួមជាមួយការថតរូបអនុស្សាវរីយ៍ជុំគ្នា អមជាមួយបរិយាកាសខ្យល់អាកាសត្រជាក់ល្អផងដែរ។

ប្រជាពលរដ្ឋ បានសម្តែងក្តីរីករាយចំពោះព្រឹត្តិការណ៍ក្នុងថ្ងៃឆ្លងឆ្នាំសកល ដែលមានភាពអធិកអធមយ៉ាងសប្បាយ។ ពួកគាត់មើលឃើញថា បរិស្ថាន អនាម័យ និងរបៀបរៀបរយ នៅតែមានភាពល្អប្រសើរដដែល បើទោះបីជាកាលពីយប់មានមនុស្សយ៉ាងច្រើនដើរកម្សាន្តក៏ដោយ។

គួររំលឹកថា កាលពីរាត្រីយប់ថ្ងៃទី ៣១ ខែធ្នូ ឆ្នាំ ២០២៤ ឈានចូលថ្ងៃទី ១ ខែមករា ឆ្នាំ ២០២៥ ដែលជាថ្ងៃឆ្លងឆ្នាំសកល មានប្រជាពលរដ្ឋយ៉ាងច្រើនកុះករបំផុត ចូលរួមដើរលេង និងទស្សនាកម្សាន្ត ក្នុងព្រឹត្តិការណ៍ដ៏ធំមួយ គឺ «សាទរកម្ពុជា» ដែលព្រឹត្តិការណ៍នេះ បានទាក់ទាញភ្ញៀវជាតិ និងអន្តរជាតិ ទៅចូលរួម រហូតដល់ពាក់កណ្ដាលអធ្រាត្រ អមជាមួយការបាញ់កាំជ្រួចយ៉ាងអធិកអធម ដើម្បីអបអរសាទរឆ្នាំថ្មី ២០២៥៕

អត្ថបទ ៖ សុភា

The post ថ្ងៃទី ១ ដើមឆ្នាំ ពលរដ្ឋបន្តដើរលេងកម្សាន្តនៅសួនមាត់ទន្លេ ខណៈរបៀបរៀបរយ និងបរិស្ថានអនាម័យ មានភាពប្រសើរ appeared first on Kampuchea Thmey Daily.

ឆ្លងឆ្នាំសកលឆ្នាំនេះ រាជធានីភ្នំពេញមានរៀបចំការប្រគុំតន្រ្តីខ្នាតធំ ៤ទីតាំង ជាមួយនឹងការបាញ់កាំជ្រួចយ៉ាងគគ្រឹកគគ្រេង

Ken Malis — Tue, 31 Dec 2024 06:37:43 +0000

ពិធីបុណ្យឆ្លងឆ្នាំសកលត្រូវបានប្រារព្ធឡើងនៅជុំវិញពិភពលោក ក្នុងនោះប្រទេសកម្ពុជា ក៏ជាប្រទេសមួយដែលតែងតែប្រារព្វពិធីនេះមិនដែលខកខានឡើយ ដោយតែងតែប្រារព្វធ្វើឡើងនៅគ្រប់ខេត្ត ក្រុង និងរាជធានីនៅទូទាំងប្រទេស។

ជាក់ស្តែងសម្រាប់រាជធានីភ្នំពេញ ដើម្បីអបអរសាទរឆ្លងឆ្នាំសកល ២០២៤នេះ បានរៀបចំប្រគុំតន្រ្តីខ្នាតធំចំនួន ៤ទីតាំង ជាមួយគ្នានេះនៅសណ្ឋាគារ និងភោជនីយដ្ឋាន ឬមជ្ឈមណ្ឌលកម្សាន្តឯកជននានា ក៏មានកម្មវិធីរបស់ខ្លួនទៅតាមទំហំទីតាំងជាក់ស្តែងរបស់គេដែរ។

លោកស្រី ដោ សម្ផស្ស នាយិការរងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា ពិធីបុណ្យឆ្លងឆ្នាំសកលឆ្នាំថ្មី២០២៤ នេះ នៅរាជធានីភ្នំពេញមានរៀបចំប្រគុំតន្រ្តីខ្នាតធំចំនួន៤ទីតាំង ក្នុងនោះរួមមាន៖ ១. ក្រុមហ៊ុន Nago World រៀបចំឡើងនៅខាងមុខទីតាំងគាត់តែម្តង មានការប្រគុំតន្រ្តី និងបាញ់កំជ្រួញ។ ២. សហភាពសហព័ន្ធយុវជនកម្ពុជា(សសយក) រៀបចំកម្មវិធីសាទរកម្ពុជានៅបរិវេណមុខវាំង និងទីតាំងជិតនោះ ដោយមានបាញ់កាំជ្រួច។ ៣. ក្រុមហ៊ុនហង្សមាស ប្រគុំតន្រ្តីនៅទីធ្លារសួនច្បារវត្តបុទុមវតី ផ្នែកខាងត្បូង។ ៤.ទូរទស្សន៍បាយន្តមានកម្មវិធីប្រគុំតន្រ្តី នៅជាប់រង្វង់មូលនាងមច្ឆា ចាប់ពីថ្ងៃទី ២៩-៣០ និង៣១ ឆ្នូ ២០២៤។

លោកស្រី ដោ សម្ផស្ស បានបញ្ជាក់ផងដែរថា ចំពោះការរៀបចំសន្តិសុខ សណ្តាប់ធ្នាប់នានាវិញ ត្រូវបានរដ្ឋបាលរាជធានីភ្នំពេញ និងស្ថាប័នពាក់ព័ន្ធគិតគូរ និងពង្រឹងដូចកម្មវិធីធំៗរបស់ជាតិកន្លងមកដែរ គឺសំដៅធានាសុវត្ថិភាព និងសន្តិសុខជូនប្រជាពលដ្ឋមកលេងកម្សាន្ត មិនឱ្យមានការបារម្ភអ្វីឡើយ។ក្រៅពី ទីតាំង ខាងលេីនៅតាមសណ្ឋាគារនិងភោជនីយដ្ឋាន ឬមជ្ឈមណ្ឌលកម្សាន្តឯកជននានាក៏គេមាន កម្មវិធី របស់ខ្លួនទៅតាមទំហំទីតាំងជាក់ស្តែងរបស់គេដែរ៕

ដោយ៖ស្រីរ័ត្ន

The post ឆ្លងឆ្នាំសកលឆ្នាំនេះ រាជធានីភ្នំពេញមានរៀបចំការប្រគុំតន្រ្តីខ្នាតធំ ៤ទីតាំង ជាមួយនឹងការបាញ់កាំជ្រួចយ៉ាងគគ្រឹកគគ្រេង appeared first on Kampuchea Thmey Daily.

សម្រាប់ឆ្លងឆ្នាំសកលនេះ ខេត្តរតនគិរី បានត្រៀមខ្លួនរួចហើយសម្រាប់ទទួលភ្ញៀវទេសចរជាតិ និងអន្តរជាតិមកលេងកម្សាន្ត

vann sokunthea — Mon, 30 Dec 2024 07:25:57 +0000

រតនគិរី គឺជាខេត្តទេសចរណ៍ដ៏ទាក់ទាញមួយនៅក្នុងភូមិភាគឦសាននៃប្រទេសកម្ពុជា ហើយខេត្តរតនគិរីនេះ ក៏ដូចជាបណ្តាខេត្តផ្សេងៗទៀតដែរ បានរៀបចំត្រៀមខ្លួនរួចរាល់អស់ហើយសម្រាប់ទទួលភ្ញៀវទេសចរជាតិ និងអន្តរជាតិមកលេងកម្សាន្តសប្បាយជុំគ្នានាឱកាសឆ្លងឆ្នាំចាស់ចូលឆ្នាំថ្មីឆ្នាំ២០២៥។ អភិបាលខេត្តរតនគិរី និងក្រសួងស្ថាប័នពាក់ព័ន្ធ បានរៀបចំយ៉ាងសស្រាក់សស្រាំ ទៅលើហេដ្ឋារចនាសម្ព័ន្ធ ផ្លូវថ្នល់ បរិស្ថាន ភ្លើងពណ៌ និងទីកន្លែងកម្សាន្តនានា។

លោក ញ៉ែម សំអឿន អភិបាលខេត្តរតនគិរី បានមានប្រសាសន៍ថា ឆ្លងឆ្នាំសកល ត្បិតថាមិនមែនជាពិធីបុណ្យចូលឆ្នាំថ្មី ប្រពៃណីជាតិកម្ពុជាក៏ដោយ ប៉ុន្តែ ដើម្បីអបអរសាទរទិវាចូលឆ្នាំសកល ២០២៥ នេះ ជូនភ្ញៀវមកលេងកម្សាន្ត នៅខេត្តរតនគិរី នៅពេលយប់ នឹងមានការបាញ់កាំជ្រូចនៅយប់ឆ្លងឆ្នាំ វេលាម៉ោង ០០:០០ រំលងអាធ្រាត្រ។ មិនតែប៉ុណ្ណោះទេ រដ្ឋបាលខេត្ត ក៏យកចិត្តទុកដាក់លើបញ្ហាបរិស្ថាន អនាម័យ នៅគ្រប់កន្លែងផងដែរ។ តាមផ្លូវសាធារណៈវិញ នឹងមានបំពាក់ភ្លើងចម្រុះពណ៌ពេលរាត្រី ហើយរៀបចំកន្លែងកម្សាន្តខាងក្នុងក្រុង ជាពិសេសទៀតនោះ ក៏មានការប្រគុំតន្ត្រីនៅបឹងកន្សែង ថែមទៀតផង។

នៅម្តុំបឹងកន្សែងក៏មានការកែសម្រួលដែរ ដោយរៀបចំដើមឈើណូអែល និងរូបភូគោល រូបផែនដី ដែលជាជាសមិទ្ធផលថ្មីទៀត នៅក្នុងឆ្នាំថ្មី។ ភ្លើងរាត្រីក្រាលគ្របលើដងវិថីក្នុងក្រុងបានលុង និងមានឆ្លាក់ពាក្យ ២០២៥ មានភ្លើងភ្លឺព្រោងព្រាត នៅពេលយប់ ពន្លឺភ្លើងនេះនៅបំភ្លឺនៅបឹងកន្សែង និងទីក្រុង រហូតទល់ភ្លឺ។ សម្រាប់ភ្ញៀវទេសចរាចរណ៍ មកពីឆ្ងាយក៏មកបណ្តើរៗ ខ្លះក៏បានកក់បន្ទប់ផ្ទះសំណាក់ សណ្ឋាគារ មុនថ្ងៃទី៣១ ធ្នូ ឆ្លងចូលដល់ ថ្ងៃទី១ ខែ មករា ដើម្បីទស្សនាការបាញ់ កាំជ្រូច ឆ្លងឆ្នាំថ្មី៕

ដោយ៖ ខៀវ ចាប

The post សម្រាប់ឆ្លងឆ្នាំសកលនេះ ខេត្តរតនគិរី បានត្រៀមខ្លួនរួចហើយសម្រាប់ទទួលភ្ញៀវទេសចរជាតិ និងអន្តរជាតិមកលេងកម្សាន្ត appeared first on Kampuchea Thmey Daily.