ជប៉ុន-ចិន Archives - Kampuchea Thmey Daily

លោក ត្រាំ រំពឹងខ្ពស់លើជប៉ុននិងចិនក្នុងការចូលរួមជាមួយអាមេរិកការពារនាវាដឹកប្រេង

Minea Neu — Sat, 21 Mar 2026 06:48:40 +0000

ក្រោយសង្រ្គាមនៅអ៊ីរ៉ង់អូសបន្លាយឈានដល់សប្តាហ៍ទី៤ និងមិនទាន់មានភាគីណាមួយចូលរួមជាមួយអាមេរិក បើកច្រកសមុទ្រHormuz សម្រាប់ការនាំចេញប្រេងទៅកាន់តែផ្សារសកលលោកឡើងវិញទេ អាមេរិកនៅតែបន្តអំពាវនាវដល់សម្ព័ន្ធមិត្តទាំងអឺរ៉ុបនិងអាស៊ីឱ្យជួយក្នុងប្រតិបត្តការណ៍នេះ។ ក្នុងនោះប្រទេសដែលអាមេរិកសង្ឃឹមជាងគេ មានជប៉ុន ចិន និងកូរ៉េខាងត្បូង។

ប្រធានាធិបតីសហរដ្ឋអាមេរិក លោក ដូណាល់ ត្រាំ លើកឡើងកាលពីថ្ងៃសុក្រថា ជាការល្អប្រសើរ ប្រសិនបើប្រទេសជប៉ុន ចិន និងប្រទេសដទៃទៀតដែលពឹងផ្អែកលើថាមពលប្រេងខ្លាំងពីមជ្ឈិមបូព៌ា ចូលរួមជាមួយលោក ដើម្បីការពារការដឹកជញ្ជូនក្នុងច្រកសមុទ្រ Hormuz ។

លោក ត្រាំ អះអាងថា៖ «សមយុទ្ធយោធាសាមញ្ញមួយអាចប្រើ ដើម្បីបើកច្រកសមុទ្រឡើងវិញ ដែលច្រកនេះត្រូវបានបិទដោយអ៊ីរ៉ង់ចាប់តាំងពីសង្គ្រាមរវាងសហរដ្ឋអាមេរិក និងអ៊ីស្រាអែលលើប្រទែសនេះនៅថ្ងៃទី២៨ ខែកុម្ភៈ»។ នេះបើយោងតាមសារព័ត៌មានជប៉ុន KYODO NEWS ផ្សាយថ្ងៃទី២១ ខែមីនា ឆ្នាំ២០២៦ ។

ប្រធានាធិបតីសហរដ្ឋអាមេរិក លោក ដូណាល់ ត្រាំ ។ រូបភាព៖ Reuters

ផ្សាយថ្ងៃទី២០ ខែមីនា ឆ្នាំ២០២៦ សារព័ត៌មានជប៉ុនខាងលើ បានរាយការណ៍ថា លោកលើកឡើងទៀតថាផែនការនេះនឹងតម្រូវឱ្យនាវាជាច្រើនពង្រាយក្នុងតំបន់នោះដែលជាផ្នែកនៃការការពារនាវាដឹកប្រេងចេញពីតំបន់នោះ។

លោក ត្រាំ ប្រាប់អ្នកយកព័ត៌មាននៅសេតវិមានថា៖ « វានឹងមានសុវត្ថិភាព ប៉ុន្តែយើងការជំនួយច្រើន។ ណាតូអាចជួយយើងបាន ប៉ុន្តែរហូតមកដល់ពេលនេះ ពួកគេមិនទាន់មានភាពក្លាហានក្នុងការធ្វើដូច្នេះទេ ហើយប្រទេសដទៃទៀតក៏អាចជួយយើងបាន»។

លោកបន្តជាមួយអ្នកសារព័ត៌មានថា៖ « អ្នកដឹងទេ! យើងមិនប្រើប្រាស់ច្រកសមុទ្រនេះទេ […] យើងមិនត្រូវការវានោះទេ។ ប៉ុន្តែអឺរ៉ុបត្រូវការវា។ កូរ៉េខាងត្បូង ជប៉ុន ចិន និងប្រទេសជាច្រើនទៀត។ ដូច្នេះ ពួកគេនឹងត្រូវចូលរួមខ្លះលើរឿងនេះ»។

ការថ្លែងរបស់ប្រធានាធិបតីរូបនេះកើតឡើងមួយថ្ងៃ បន្ទាប់ពីលោកបានជួបពិភាក្សាជាមួយនាយករដ្ឋមន្ត្រីជប៉ុន លោក ស្រី ណាសាអេ តាកាអ៊ិឈិ (Sanae Takaichi) នៅសេតវិមាន។

លោក ត្រាំក៏បានសរសើរប្រទេសជប៉ុនចំពោះការបោះជំហានទៅមុខជាមួយអាមេរិក មិនដូចសម្ព័ន្ធភាពសន្តិសុខណាតូទេ។

កាលពីថ្ងៃអង្គារ លោកក៏បានសរសេរនៅលើបណ្តាញសង្គមថា លោកលែងស្វែងរកជំនួយពីសម្ព័ន្ធមិត្តអាមេរិក ដើម្បីរក្សាផ្លូវទឹកដឹកជញ្ជូនដ៏សំខាន់ឱ្យបើកចំហនិងមានសុវត្ថិភាពទៀតហើយ។

យ៉ាងណាការលើកឡើងចុងក្រោយរបស់លោក ត្រាំ បានបង្ហាញថា លោកនៅតែចង់បានជំនួយពីប្រទេសដទៃទៀត ដើម្បីផ្តល់ការការពារដល់នាវាដឹកប្រេងឆ្លងកាត់ច្រកសមុទ្រនេះ ដោយសង្គ្រាមនៅអ៊ីរ៉ង់បានធ្វើឱ្យទីផ្សារថាមពលសកលមានការប្រែប្រួល៕

ប្រែសម្រួល៖ ណឺ មិនា

The post លោក ត្រាំ រំពឹងខ្ពស់លើជប៉ុននិងចិនក្នុងការចូលរួមជាមួយអាមេរិកការពារនាវាដឹកប្រេង appeared first on Kampuchea Thmey Daily.

ជប៉ុនប្រតិកម្មដំបូងគេចំពោះការធ្វើសមយុទ្ធរបស់យោធាចិនព័ទ្ធកោះតៃវ៉ាន់

Minea Neu — Wed, 31 Dec 2025 10:02:42 +0000

ជប៉ុន បាននិយាយកាលពីថ្ងៃពុធនេះថា កងកម្លាំងយោធាចិនបានធ្វើសមយុទ្ធជុំវិញកោះតៃវ៉ាន់ គឺធ្វើឱ្យមានភាពតានតឹងកាន់តែខ្លាំងជុំវិញច្រកសមុទ្រតៃវ៉ាន់ ហើយខ្លួនក៏បានសម្តែងការព្រួយបារម្ភចំពោះភាគីក្រុងប៉េកាំងផងដែរ។ នេះបើយោងតាមសារព័ត៌មាន AFP។

លោកស្រី សាណាអេ តាកាអ៊ិឈិ។ Reuters

លោក Toshihiro Kitamura រដ្ឋលេខាធិការក្រសួងការបរទេស បាននិយាយថា៖«ការធ្វើសមយុទ្ធនាពេលថ្មីៗដោយកងកម្លាំងយោធាចិនបង្កើតឱ្យមានភាពតានតឹងកាន់តែខ្លាំងនៅជុំវិញច្រកសមុទ្រតៃវ៉ាន់ ហើយរដ្ឋាភិបាលជប៉ុនក៏បានបង្ហាញពីកង្វល់របស់ចំពោះភាពតានតឹងនេះទៅខាងប្រទេសចិនផងដែរ»។

លោកបានថ្លែងក្នុងសេចក្តីថ្លែងការណ៍មួយថា៖ «វាជាជំហរស្របរបស់រដ្ឋាភិបាលជប៉ុនដែលខ្លួនរំពឹងថាបញ្ហាជុំវិញកោះតៃវ៉ាន់នឹងត្រូវបានដោះស្រាយដោយសន្តិវិធីតាមរយៈការសន្ទនា។

លោកបន្ថែមថា៖ «សន្តិភាព និងស្ថិរភាពនៅទូទាំងច្រកសមុទ្រតៃវ៉ាន់មានសារៈសំខាន់សម្រាប់សហគមន៍អន្តរជាតិទាំងមូល។ យើងនឹងបន្តតាមដានការវិវត្តនានាដែលទាក់ទងនឹងបញ្ហានេះប្រកបដោយការយកចិត្តទុកដាក់ខ្ពស់»។

គួរឱ្យដឹងផងដែរថាទំនាក់ទំនងរបស់ជប៉ុនជាមួយចិនកាន់តែអាក្រក់ទៅៗក្នុងប៉ុន្មានសប្តាហ៍ថ្មីៗនេះ បន្ទាប់ពីនាយករដ្ឋមន្ត្រីជប៉ុន លោកស្រី សាណាអេ តាកាអ៊ិឈិ [Sanae Takaichi] បានស្នើថា ទីក្រុងតូក្យូអាចធ្វើអន្តរាគមន៍ផ្នែកយោធានៅក្នុងការវាយប្រហារណាមួយរបស់ចិនលើកោះតៃវ៉ាន់ កាលពីខែវិច្ឆិកា៕

ប្រែសម្រួល៖ ណឺ មិនា

The post ជប៉ុនប្រតិកម្មដំបូងគេចំពោះការធ្វើសមយុទ្ធរបស់យោធាចិនព័ទ្ធកោះតៃវ៉ាន់ appeared first on Kampuchea Thmey Daily.

ក្រសួងការពារចិន អំពាវនាវឱ្យរួមគ្នាទប់ស្កាត់ការរស់ឡើងវិញនៃយោធាស្តាំនិយមជប៉ុន

Minea Neu — Fri, 26 Dec 2025 10:27:15 +0000

ក្រសួងការពារជាតិចិនកាលពីថ្ងៃព្រហស្បតិ៍បានអំពាវនាវដល់ប្រជាជាតិ និងប្រជាជនដែលស្រឡាញ់សន្តិភាពទាំងអស់រួមដៃគ្នាជាកម្លាំងមួយ ដើម្បីទប់ស្កាត់ការរស់ឡើងវិញនៃរបបយោធាស្តាំនិយមរបស់ជប៉ុន។ យោងតាមសារព័ត៌មាន CN News ។

លោក Zhang Xiaogang អ្នកនាំពាក្យក្រសួងការពារជាតិចិន។ MNDC

លោក Zhang Xiaogang អ្នកនាំពាក្យក្រសួងការពារជាតិចិនបានឆ្លើយតបនឹងការផ្សព្វផ្សាយមួយ ដែលបានលើកឡើងដោយនាយករដ្ឋមន្រី្តជប៉ុន លោកស្រី សាណាអេ តាកាអ៊ិឈិ (Sanae Takaichi) និងមន្ត្រីម្នាក់ទៀតរបស់ខ្លួនស្តីពីការបង្កើតគ្រឿងសព្វាវុធនុយក្លេអ៊ែររបស់ជប៉ុន។

ក្នុងរយៈពេលថ្មីៗនេះ ក្រសួងការពារជាតិជប៉ុន បានរិះគន់ចិនថា បង្កើនការចំណាយលើវិស័យការពារជាតិ ហើយបានធ្វើសកម្មភាពរំខាននានានៅក្បែរដែនទឹករបស់ជប៉ុន ដោយលើកឡើងពីផែនការដាក់ពង្រាយឧបករណ៍រ៉ាដាចល័តនៅកោះអូគីណាវ៉ា របស់ជប៉ុននៅឆ្នាំ២០២៦ ដើម្បីតាមដានសកម្មភាពនានារបស់យោធាចិន។

លោក Zhang បាននិយាយថា ប្រតិបត្តិការរបស់យោធាចិននៅក្នុងដែនទឹកដែលពាក់ព័ន្ធគឺគោរពយ៉ាងពេញលេញជាមួយនឹងច្បាប់អន្តរជាតិ និងការអនុវត្តអន្តរជាតិ ហើយគ្មានការជ្រៀតជ្រែកឬបង្កហេតុណាមួយឡើយ ដោយមើលឃើញថាការចំណាយលើវិស័យការពារជាតិរបស់ចិនសមហេតុផល និងនៅតែទាបជាងមធ្យមភាគសកលជាចំណែកនៃ GDP សរុប។

លោកបន្តថា៖«យើងជំរុញឱ្យប្រទេសជប៉ុនបញ្ឈប់ការឃោសនាមិនពិតរបស់ខ្លួន និងបញ្ឈប់នូវការដាក់ពង្រាយសកម្មភាពនានាប្រឆាំងនឹងប្រទេសចិន។ យើងនឹងចាត់វិធានការយ៉ាងម៉ឺងម៉ាត់ប្រឆាំងនឹងការយាយី ឬការបង្កហេតុណាមួយដែលធ្វើដោយភាគីជប៉ុន»។

មិនតែប៉ុណ្ណោះ លោក Zhang បានព្រមាននៃការមើលឃើញកាន់តែច្បាស់ និងគ្រោះថ្នាក់ដែលឆ្ពោះទៅរកការរស់ឡើងវិញនៃពួកយោធានិយមនៅក្នុងប្រទេសជប៉ុន ដោយសារប្រទេសនេះបានបន្តធ្វើឱ្យមានវិស័យយោធាអភិវឌ្ឍន៍ទៅមុខមិនឈប់ឈរ និងបានពន្លឿនការកសាងសមត្ថភាពយោធារបស់ខ្លួន។

លោកបន្តថា៖«យើងសូមអំពាវនាវដល់ប្រជាជាតិ និងប្រជាជនដែលស្រឡាញ់សន្តិភាពទាំងអស់ ចាត់វិធានការយ៉ាងម៉ឺងម៉ាត់ក្នុងការទប់ស្កាត់ការរស់ឡើងវិញនៃរបបយោធានិយមដោយកងកម្លាំងស្តាំនិយមរបស់ជប៉ុន និងការពារពិភពលោកពីការធ្លាក់ទៅក្នុងភាពចលាចល ឬសោកនាដកម្មពីអតីតកាល»៕

ប្រែសម្រួល៖ ណឺ មិនា

The post ក្រសួងការពារចិន អំពាវនាវឱ្យរួមគ្នាទប់ស្កាត់ការរស់ឡើងវិញនៃយោធាស្តាំនិយមជប៉ុន appeared first on Kampuchea Thmey Daily.

កម្ពុជា គាំទ្រគ្រប់មធ្យោបាយរបស់ចិន ដើម្បីប្រឆាំងឯករាជ្យតៃវ៉ាន់

Ngoeul Narath — Thu, 27 Nov 2025 02:34:20 +0000

រាជរដ្ឋាភិបាលកម្ពុជា តាមរយៈក្រសួងការបរទេសបានបញ្ជាក់ជាថ្មីពីការប្រកាន់ខ្ជាប់នូវ«គោលនយោបាយចិនមួយ» និងថាតៃវ៉ាន់មិនអាចផ្ដាច់ខ្លួនចេញពីរដ្ឋចិនបានឡើយ។កម្ពុជា ចាត់ទុកបញ្ហាតៃវ៉ាន់ ជាកិច្ចការផ្ទៃក្នុងរបស់ចិន ហើយគាំទ្រគ្រប់មធ្យោបាយរបស់ចិន ដើម្បីប្រឆាំងនឹងការប្រកាសឯករាជ្យរបស់តៃវ៉ាន់។

ក្រសួងការបរទេសកម្ពុជា បញ្ជាក់តាមរយៈសេចក្ដីថ្លែងការណ៍ក្នុងថ្ងៃទី២៦ ខែវិច្ឆិកា ដូច្នេះ៖«កម្ពុជា ប្រកាន់ខ្ជាប់យ៉ាងម៉ឺងម៉ាត់នូវគោលនយោបាយចិនមួយ និងទទួលស្គាល់ថារដ្ឋាភិបាល នៃសាធារណរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់តំណាងឱ្យប្រទេសចិន ទាំងមូល ហើយតៃវ៉ាន់គឺជាផ្នែកមួយដែលមិនអាចកាត់ផ្តាច់បាននៃទឹកដីរបស់ប្រទេសចិន។ កម្ពុជា ចាត់ទុកបញ្ហាដែលទាក់ទងនឹងតៃវ៉ាន់ជាកិច្ចការផ្ទៃក្នុងនៃសាធារណរដ្ឋប្រជាមានិតចិន ព្រមទាំងគាំទ្រកិច្ចខិតខំប្រឹងប្រែងរបស់ចិនដើម្បីសម្រេចបាននូវការបង្រួបបង្រួមជាតិ និងប្រឆាំង នឹង «ឯករាជ្យតៃវ៉ាន់» គ្រប់ទម្រង់។»។

ការបញ្ជាក់សាជាថ្មីរបស់កម្ពុជាអំពីការប្រកាន់ខ្ជាប់នូវគោលនយោបាយចិនមួយ គឺបន្ទាប់ពីភាពតានតឹងរវាងជប៉ុន និងចិន ជុំវិញបញ្ហាតៃវ៉ាន់ បានឡើងកម្ដៅខ្លាំងឡើង ហើយប្រពន្ធផ្សព្វផ្សាយក៏បានសួរពីទស្សនៈរបស់រាជរដ្ឋាភិបាលកម្ពុជាវិញការវិវត្តនេះ។

ក្រសួងការបរទេសកម្ពុជា បានបញ្ជាក់ក្នុងសេចក្ដីថ្លែងការណ៍៍ដែរថា កម្ពុជាគាំទ្រយ៉ាងពេញទំហឹងចំពោះកិច្ចប្រឹងប្រែង នានាក្នុងការរក្សាសន្តិភាព ស្ថិរភាព និងភាពសុខដុមរមនាក្នុងតំបន់ ដោយផ្អែកលើគោលការណ៍ នៃការគោរពគ្នាទៅវិញទៅមក និងការដោះស្រាយទំនាស់ ក៏ដូចជាជម្លោះ ដោយសន្តិវិធី។

នាយករដ្ឋមន្រ្តីជប៉ុន Sanae Takaichi (រូបភាព៖ Reuters)

ជម្លោះការទូតដ៏តានតឹងបំផុតរវាងចិន និងជប៉ុន ក្នុងរយៈពេលជាច្រើនឆ្នាំមកនេះ កើតមានឡើងដោយការអត្ថាធិប្បាយថ្មីៗរបស់នាយករដ្ឋមន្ត្រីជប៉ុន លោកស្រី សាណាអ៊ី តាកាអ៊ីជី (Sanae Takaichi) ដែលថា ការវាយប្រហាររបស់ចិនលើកោះតៃវ៉ាន់ អាចជំរុញឲ្យមានការឆ្លើយតបផ្នែកយោធាពីសំណាក់ជប៉ុន។ ចិនបានសងសឹកវិញ តាមរយៈការអត្ថាធិប្បាយវាយប្រហារតាមប្រព័ន្ធផ្សព្វផ្សាយរដ្ឋ ការហាមឃាត់គ្រឿងសមុទ្រជប៉ុន ការផ្អាកការចាក់បញ្ចាំងភាពយន្តជប៉ុន និងការព្រមានពីការធ្វើដំណើរសម្រាប់ពលរដ្ឋរបស់ខ្លួន។

ស្របពេលដែលជម្លោះការទូតបន្តតានតឹង ជប៉ុនប្រកាសថា នឹងបន្តផែនការដាក់ពង្រាយមីស៊ីលបាញ់ពីដីទៅអាកាសនៅលើកោះយ៉ូណាហ្គូនី (Yonaguni) ដែលជាកោះមួយស្ថិតនៅចម្ងាយប្រហែល១១០គីឡូម៉ែត្រភាគខាងកើតកោះតៃវ៉ាន់។ ក្រសួងការបរទេសចិន កាលពីថ្ងៃទី២៤ខែវិច្ឆិកា ចាត់ទុកសកម្មភាពជប៉ុនបែបនេះ ថាមានបំណង«បង្កភាពតានតឹងក្នុងតំបន់ និងញុះញង់ឲ្យមានការប្រឈមមុខដាក់គ្នាផ្នែកយោធា» និងព្រមានថា «កម្លាំងស្តាំនិយមនៅជប៉ុន កំពុងដឹកនាំជប៉ុន និងតំបន់ទៅរកគ្រោះមហន្តរាយ»។ ក្រសួងការបរទេសចិន ក៏ប្រកាសថា ទីក្រុងប៉េកាំងមាន«ការតាំងចិត្ត និងសមត្ថភាពក្នុងការការពារអធិបតេយ្យភាពទឹកដីរបស់ខ្លួន»។

ទីក្រុងប៉េកាំង ដែលទាមទារថាកោះតៃវ៉ាន់ជាទឹកដីរបស់ខ្លួន បានបង្កើនសារផ្នែកយោធានៅប៉ុន្មានសប្តាហ៍ថ្មីៗនេះ។ ក្រសួងការពារជាតិចិនបានព្រមានកាលពីពាក់កណ្តាលខែវិច្ឆិកាថា ជប៉ុននឹងប្រឈមមុខនឹងបរាជ័យ «យ៉ាងធ្ងន់ធ្ងរ» ប្រសិនបើខ្លួនលូកដៃក្នុងជម្លោះកោះតៃវ៉ាន់។ ចាប់តាំងពីពេលនោះមក ទីបញ្ជាការកងទ័ពរំដោះប្រជាជនចិន (PLA) ជាច្រើនបានបញ្ចេញវីដេអូចម្រៀងជាតិនិយមដែលបង្ហាញពីមីស៊ីល នាវាចម្បាំង និងកងទ័ពត្រៀមប្រយុទ្ធ រួមទាំងវីដេអូមួយរបស់កងកម្លាំងគ្រាប់រ៉ុក្កែតដែលបង្ហាញពីមីស៊ីលផ្លោងអន្តរទ្វីប និងដាក់ចំណងជើងថា «បើថ្ងៃនេះសង្គ្រាមផ្ទុះឡើង នេះជាការឆ្លើយតបរបស់ខ្ញុំ»។

ប្រធានាធិបតីអាមេរិក ដូណាល់ ត្រាំ និងនាយករដ្ឋមន្រ្តីជប៉ុន (រូបភាព៖ Reuters)

បច្ចុប្បន្នភាពចុងក្រោយ គឺប្រធានាធិបតីអាមេរិក លោក ដូណាល់ ត្រាំ ជំរុញឲ្យនាយករដ្ឋមន្ត្រីជប៉ុន លោកស្រី Sanae Takaichi កុំបង្កជម្លោះជាមួយទីក្រុងប៉េកាំងលើបញ្ហាតៃវ៉ាន់។ នេះបើតាមកាសែត The Wall Street Journal (WSJ) រាយការណ៍កាលពីថ្ងៃពុធទី២៦ខែវិច្ឆិកា៕

ដោយ៖ ង៉ិល ណារ៉ាត់

The post កម្ពុជា គាំទ្រគ្រប់មធ្យោបាយរបស់ចិន ដើម្បីប្រឆាំងឯករាជ្យតៃវ៉ាន់ appeared first on Kampuchea Thmey Daily.

តៃវ៉ាន់បង្ហាញជំហរនៅខាងជប៉ុន ដោយចោទចិនថា ប្រើប្រាស់វិធីបំភិតបំភ័យ គម្រាមសម្លុត

Rann Reuy — Thu, 20 Nov 2025 04:19:33 +0000

ស្របពេលដែលជម្លោះការទូតរវាងមហាយក្សចិននិងជប៉ុនកំពុងបន្តដ៏ក្តៅគគុកនោះ រដ្ឋមន្ត្រីការបរទេសតៃវ៉ាន់ លោក លីន ជាលុង (Lin Chia-Lung) នៅថ្ងៃព្រហស្បតិ៍ ២០ វិច្ឆិកា បានសន្យាគាំទ្រជប៉ុនដែលបានអះអាងពីការឆ្លើយតបដោយយោធា ក្នុងករណីចិនវាយប្រហារតៃវ៉ាន់នោះ។

តាមការស្រង់សម្តីរបស់រ៉យទ័រ ថ្លែងទៅកាន់អ្នកសារព័ត៌មានកាលពីថ្ងៃព្រហស្បតិ៍ លោក លីន ជាលុង បាននិយាយថា ទីក្រុងប៉េកាំង «ប្រើប្រាស់ការបង្ខិតបង្ខំផ្នែកសេដ្ឋកិច្ច និងការបំភិតបំភ័យយោធាប្រភេទនេះ ដើម្បីសម្លុតប្រទេសដទៃ… ពាណិជ្ជកម្ម ការវិនិយោគ និងទេសចរណ៍ សុទ្ធតែជាអាវុធប្រឆាំងនឹងតៃវ៉ាន់»។

ការធ្វើអត្ថាធិប្បាយរបស់រដ្ឋមន្ត្រីការបរទេសតៃវ៉ាន់ កើតឡើងមួយថ្ងៃប៉ុណ្ណោះ បន្ទាប់ពីមន្ត្រីរដ្ឋាភិបាលពីររូបនៅទីក្រុងតូក្យូបាននិយាយថា ប្រទេសចិនបានចង្អុលបង្ហាញថា ខ្លួននឹងហាមឃាត់ការនាំចូលផលិតផលជលផលសមុទ្ររបស់ជប៉ុនទាំងអស់ ដែលហាក់ដូចជាការសង្គ្រោះចុងក្រោយបំផុតនៅក្នុងជម្លោះនេះ។

ភាពតានតឹងរវាងប្រទេសមហាអំណាចសេដ្ឋកិច្ចលេខ២និងលេខ៣ទាំងពីរបានផ្ទុះឡើង បន្ទាប់ពីនាយករដ្ឋមន្ត្រីជប៉ុនថ្មីលោកស្រី សាណាអេ តាកាអ៊ីឈី (Sanae Takaichi) បាននិយាយនៅក្នុងបទអន្តរាគមន៍ក្នុងសភាកាលថ្ងៃទី៧ខែវិច្ឆិកាថា ការវាយប្រហាររបស់ចិនលើកោះតៃវ៉ាន់ដែលគំរាមកំហែងដល់ការរស់រានរបស់ប្រទេសជប៉ុន អាចបង្កឱ្យមានការឆ្លើយតបខាងយោធា។

ប្រទេសចិនបានទាមទារឱ្យលោកស្រីដកសម្តីនោះវិញ និងជំរុញពលរដ្ឋរបស់ខ្លួនកុំឱ្យធ្វើដំណើរទៅកាន់ប្រទេសជប៉ុន ដែលបណ្តាលឱ្យមានការលុបចោលការកក់សំបុត្រយន្តហោះទ្រង់ទ្រាយធំ ដែលអាចបណ្តាលឲ្យមានផលប៉ះពាល់ដ៏ធំធេងដល់សេដ្ឋកិច្ចរបស់ជប៉ុន។

ខណៈពេលដែលប្រទេសជប៉ុនមិនមានទំនាក់ទំនងផ្លូវការជាមួយតៃវ៉ាន់ ប្រទេសទាំងពីរគឺជាសម្ព័ន្ធមិត្តយូរអង្វែង និងជាដៃគូពាណិជ្ជកម្មដ៏សំខាន់។ ជប៉ុនជាប់ចំណាត់ថ្នាក់ជាដៃគូពាណិជ្ជកម្មធំទីបីរបស់តៃវ៉ាន់ ខណៈតៃវ៉ាន់ឈរនៅលំដាប់ទី៤ធំជាងគេសម្រាប់ជប៉ុនក្នុងវិស័យពាណិជ្ជកម្មនេះ៕

រ៉ាន់ រើយ

នាយករដ្ឋមន្ត្រីជប៉ុន លោកស្រី Sanae Takaichi និងប្រធានាធិបតីចិន ស៊ី ជីនពីង ក្នុងជំនួបទ្វេភាគីនៅកូរ៉េខាងត្បូង។ Mao Ning

The post តៃវ៉ាន់បង្ហាញជំហរនៅខាងជប៉ុន ដោយចោទចិនថា ប្រើប្រាស់វិធីបំភិតបំភ័យ គម្រាមសម្លុត appeared first on Kampuchea Thmey Daily.

ចិនបិទការនាំចូលគ្រឿងសមុទ្រពីជប៉ុន ចំពេលជម្លោះការទូតកាន់តែក្ដៅ

Huon Dina — Wed, 19 Nov 2025 07:30:06 +0000

ចិនបានជូនដំណឹងដល់ជប៉ុននៅថ្ងៃពុធនេះថា ខ្លួននឹងបិទការនាំចូលគ្រឿងសមុទ្រជប៉ុនគ្រប់មុខទាំងអស់ ចំពេលដែលកម្ដៅជម្លោះការទូតរវាងប្រទេសទាំង២កើនឡើងកាន់តែខ្លាំង។ នេះបើតាមការចុះផ្សាយរបស់ទីភ្នាក់ងារសារព័ត៌មាន Kyodo News ដែលស្រង់ព័ត៌មានពីប្រភពរដ្ឋាភិបាលជប៉ុនម្នាក់ដោយមិនបញ្ចេញឈ្មោះ។

ការបិទនេះ នឹងធ្វើឡើងត្រឹមតែប៉ុន្មានខែប៉ុណ្ណោះ ក្រោយចិនទម្លាក់ចោលនូវវិធានការហាមឃាត់ការនាំចូលគ្រឿងសមុទ្រជប៉ុនមួយចំនួន ជុំវិញក្ដីបារម្ភសុវត្ថិភាពពាក់ព័ន្ធនឹងកាកសំណល់ពីរោងចក្រនុយក្លេអ៊ែរហ្វ៊ូគូហ្សីម៉ា។ មុនការហាមឃាត់នៅឆ្នាំ ២០២៣ ចិន និងក្រុងហុងកុង រួមចំណែកប្រមាណ ១/៣ នៃការនាំចេញគ្រឿងសមុទ្រសរុបរបស់ជប៉ុន។

គេមើលឃើញថា ការហាមឃាត់ជាថ្មីនៅពេលនេះ នឹងក្លាយជាឧបសគ្គដ៏ធំសម្រាប់ក្រុមហ៊ុននាំចេញគ្រឿងសមុទ្រជប៉ុន។ កាលពីថ្ងៃអង្គារ លោក Norikazu Suzuki រដ្ឋមន្ត្រីក្រសួងកសិកម្មជប៉ុន បានឱ្យដឹងថា ក្រុមហ៊ុននាំចេញជិត ៧០០ បានដាក់ពាក្យស្នើសុំបន្តការនាំចេញទៅចិន ប៉ុន្តែមានតែ ៣ ក្រុមហ៊ុនប៉ុណ្ណោះដែលទទួលបានការអនុម័តរហូតមកដល់ពេលនេះ។

ជុំវិញបញ្ហាដដែល ក្រសួងពាណិជ្ជកម្ម និងរដ្ឋបាលគយរបស់ប្រទេសចិនមិនទាន់ចេញសេចក្ដីប្រកាសជាផ្លូវការនៅឡើយទេ គិតត្រឹមរសៀលម៉ោង ៣ (ម៉ោងនៅក្រុងហុងកុង)។

គួរគូសបញ្ជក់ថា ចិន និងជប៉ុនបានធ្លាក់ចូលទៅក្នុងជម្លោះការទូត ក្រោយនាយករដ្ឋមន្រ្តីថ្មីរបស់ជប៉ុន លោកស្រី Sanae Takaichi បាននិយាយកាលពីដើមខែវិច្ឆិកានេះថា ជប៉ុនអាចដាក់ពង្រាយកងកម្លាំងយោធារបស់ខ្លួនក្នុងករណីមានជម្លោះនៅច្រកសមុទ្រតៃវ៉ាន់។ ភាពតានតឹងកើនឡើងជាបន្តបន្ទាប់ ដោយប្រទេសទាំង២ បានចេញការព្រមានស្ដីពីការធ្វើដំណើរដាក់គ្នាទៅវិញទៅមក។

The post ចិនបិទការនាំចូលគ្រឿងសមុទ្រពីជប៉ុន ចំពេលជម្លោះការទូតកាន់តែក្ដៅ appeared first on Kampuchea Thmey Daily.

ជប៉ុនបញ្ចេញទឹក៦ម៉ឺនតោនពីរោងចក្រនុយក្លេអ៊ែរ Fukushima ក្នុងឆ្នាំដំបូង

Rann Reuy — Mon, 26 Aug 2024 06:12:06 +0000

ជប៉ុនបានបញ្ចេញទឹកសំណល់៦០០០០តោនក្នុងរយៈ១ឆ្នាំគិតត្រឹមថ្ងៃទី២៦សីហានេះ ពីរោងចក្រថាមពលនុយក្លេអ៊ែរដែលរងការខូចខាតដោយសារព្យុះស៊ូណាមិនកាលឆ្នាំ២០១១ ចូលទៅក្នុងសមុទ្រដែលកាលនោះបង្កឱ្យមានការតវ៉ាយ៉ាងខ្លាំងពីសំណាក់រដ្ឋាភិបាលចិន កូរ៉េខាងជើង បក្សប្រឆាំងនៅកូរ៉េខាងត្បូង និង មានរុស្ស៊ីផងដែរ។

ក្នុងរយៈពេល១ឆ្នាំពេញនេះ បរិមាណទឹកសំណល់ប្រមាណ៦០ម៉ឺនតោន ដែលគេចោទថា មានសំណល់វិទ្យុសកម្មនុយក្លេអ៊ែរ ត្រូវបានបញ្ចេញពីរោងចក្រថាមពលនុយក្លេអ៊ែរ Daiichi Fukushima ចូលទៅក្នុងសមុទ្រ។ ការបញ្ចេញនេះ គឺជាផ្នែកមួយនៃផែនការបញ្ចេញទឹករហូតដល់១លានតោនក្នុងរយៈពេល៣០ឆ្នាំ ពីកន្លែងរក្សាទឹកសម្រាប់ការធ្វើឱ្យចុះត្រជាក់នូវម៉ាស៊ីនថាមពលនុយក្លេអ៊ែរពេលដំណើរការ។

ទិដ្ឋភាពអាងដំកល់ទឹកនៃរោងចក្រនុយក្លេអ៊ែ Fukushima។ ST

ក្រោយការបញ្ចេញទឹកដែលសង្ស័យផ្ទុកសារធាតុវិទ្យុសកម្មនោះ ជប៉ុនបានចេញរបាយការណ៍ និងបង្កើតកិច្ចខិតខំប្រឹងប្រែងដើម្បីស្តារមុខមាត់អាជីវកម្មនាំចេញត្រីសមុទ្រ ដោយសារតែការហាមឃាត់ការនាំចូលរបស់ប្រទេសចិនដែលជាទីផ្សារនាំចេញធំបំផុតរបស់ជប៉ុន។

នៅថ្ងៃទី១៩ ខែសីហា សារព័ត៌មាន The Straits Times បានរាយការណ៍អំពីការធ្វើពិសោធន៍អាហារសមុទ្រជប៉ុនមានសុវត្ថិភាព ពីការបញ្ចេញទឹកពីរោងចក្រនុយក្លេអ៊ែរហ្វូគូស៊ីម៉ា។ ការធ្វើពិសោធន៍ និងការចេញផ្សាយលទ្ធផលជាបន្តបន្ទាប់ ជាផ្នែកមួយនៃការស្តារទំនុកចិត្តរបស់ទីផ្សារត្រីសមុទ្ររបស់ជប៉ុន។

សារព័ត៌មាន Global Times របស់ប្រទេសចិន បានរាយការណ៍១ថ្ងៃ មុនខួប១ឆ្នាំនៃការបញ្ចេញទឹកនោះ បានរៀបរាប់ថា ការបញ្ចេញទឹកពីរោងចក្រនោះឥតឈប់ឈរ គ្រោះថ្នាក់ពីការលេចធ្លាយញឹកញាប់ និងការដោះស្រាយសភាពការណ៍នៅក្នុងឆ្នាំកន្លងទៅ បានធ្វើឱ្យខូចកេរ្តិ៍ឈ្មោះរបស់ ក្រុមហ៊ុនថាមពលអគ្គិសនីតូក្យូ (TEPCO) និងរដ្ឋាភិបាលជប៉ុនធ្លាក់ចុះដុនដាបយ៉ាងខ្លាំង ដោយបំផ្លាញការជឿទុកចិត្តរបស់សាធារណជន និងបង្កឱ្យមានប្រតិកម្មយ៉ាងទូលំទូលាយ។

ការពិសោធន៍លើត្រី និងបង្ហាញថាមានសុវត្ថិភាព។ ST

កាលពីថ្ងៃសៅរ៍ចុងសប្តាហ៍មុន សារព័ត៌មាន Asahi Shimbun បានរាយការណ៍ថា ក្នុងរយៈពេលមួយឆ្នាំកន្លងមកនេះ ក្រុមហ៊ុន Tokyo Electric Power Co. (TEPCO) បានបញ្ចេញទឹកដែលត្រូវបានធ្វើប្រព្រឹត្តកម្មរួចចំនួន៦០០០០តោន ពីរោងចក្រថាមពលនុយក្លេអ៊ែរ Fukushima ដែលផ្អាកដំណើរការ។

សេចក្តីរាយការណ៍នោះក៏បានបង្ហាញថា សហព័ន្ធជាតិនៃសមាគមសហករណ៍ជលផលជប៉ុនបានអះអាងដដែលនូវការប្រឆាំងដែលមិនផ្លាស់ប្តូររបស់ខ្លួនប្រឆាំងនឹងការបញ្ចេញទឹកនេះ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា នៅក្នុងព្រឹត្តិការណ៍នៃឧបទ្ទវហេតុ ឬបញ្ហាធំនៅពេលអនាគត ការជឿទុកចិត្ត និងការយល់ដឹងដែលបង្កើតឡើងដោយអ្នកនេសាទ និងសាធារណជនអាចនឹងត្រូវបាត់បង់ភ្លាមៗ ដោយជំរុញឱ្យរដ្ឋាភិបាលជប៉ុន និង TEPCO ចងចាំរឿងនេះ។

ដោយប្រឆាំងការបញ្ចេញទឹកដែលសង្ស័យផ្ទុកវិទ្យុសកម្មនុយក្លេអ៊ែរ ប្រទេសចិនដែលជាទីផ្សារធំបំផុតរបស់អាហារសមុទ្រជប៉ុន បានផ្អាកការនាំចូលអាហារសមុទ្រជាច្រើនពីប្រទេសជប៉ុន ហើយប្រទេសរុស្ស៊ីក៏បានអនុវត្តតាមចិនដែរ។

ក្នុងអំឡុងឆ្នាំកន្លងទៅ ប្រទេសជប៉ុនបានអំពាវនាវឱ្យប្រទេសទាំងនោះទម្លាក់ចោលការហាមឃាត់ការនាំចូលនេះ ដោយដកស្រង់ទិន្នន័យពីការធ្វើពិសោធន៍ពីកន្លែងបញ្ចេញទឹកថា វាត្រឹមត្រូវតាមស្តង់ដារអន្តរជាតិ។

ជាការឆ្លើយតបទៅនឹងការអំពាវនាវរបស់ប្រទេសជប៉ុនក្នុងការបន្ធូរបន្ថយការរឹតបន្តឹងការនាំចូលអាហារសមុទ្រ ការិយាល័យបរិស្ថាន និងអ៊ីកូឡូស៊ីនៃតំបន់រដ្ឋបាលពិសេសហុងកុងរបស់ប្រទេសចិនបាននិយាយកាលពីថ្ងៃសៅរ៍នៅលើ Facebook ថា ដោយពិចារណាលើរយៈពេល និងទំហំនៃការបង្ហូរដែលមិនធ្លាប់មានពីមុនមក រួមជាមួយនឹងផលវិបាកមហន្តរាយដែលអាចកើតមានសម្រាប់អ៊ីកូឡូស៊ីដែនសមុទ្រ និងសុវត្ថិភាពចំណីអាហារក្នុងករណីមានកំហុសណាមួយ ហុងកុងបានចាត់វិធានការបង្ការ រួមទាំងការរឹតបន្តឹងការនាំចូលអាហារសមុទ្រ និងផលិតផលពាក់ព័ន្ធពីតំបន់ដែលមានហានិភ័យខ្ពស់បំផុតក្នុងប្រទេសជប៉ុន។

ទឹកប្រហែល ១,៣៤លានតោនបានស្ទះនៅរោងចក្រនោះចាប់តាំងពីរោងចក្រនុយក្លេអ៊ែរ Fukushima ត្រូវបានខូចខាតដោយកម្លាំងនៃការរញ្ជួយដី និងរលកយក្សស៊ូណាមិ ដែលបានសម្លាប់មនុស្ស១៨០០០នាក់ក្នុងឆ្នាំ២០១១៕

The post ជប៉ុនបញ្ចេញទឹក៦ម៉ឺនតោនពីរោងចក្រនុយក្លេអ៊ែរ Fukushima ក្នុងឆ្នាំដំបូង appeared first on Kampuchea Thmey Daily.

ជប៉ុន ប្រាប់ចិន កុំបង្ហោះបាឡុងចូលដែនអាកាសរបស់ខ្លួនឲ្យសោះ!

ratanak neang — Sun, 19 Feb 2023 06:29:14 +0000

រដ្ឋមន្ត្រីការបរទេសជប៉ុនលោក Hayashi Yoshimasa បានជួបពិភាក្សាជាមួយមន្ត្រីការបរទេសកំពូលចិនលោក Wang Yi នៅទីក្រុង Munich ប្រទេសអាល្លឺម៉ង់ ដោយអ្នកការទូតជប៉ុន បានស្នើឱ្យទីក្រុងប៉េកាំង កុំបង្ហោះបាឡុងចូលក្នុងទឹកដីរបស់ខ្លួន។

លោក Hayashi និយាយថា បើសិនជាវត្ថុហោះចូលទៅក្នុងដែនអាកាសរបស់ប្រទេសមួយផ្សេងទៀតដោយគ្មានការអនុញ្ញាត គឺស្មើនឹងការឈ្លានពាន។

មួយរយៈចុងក្រោយនេះ វត្ថុហោះហើរត្រូវបានគេប្រទះឃើញនៅក្នុងដែនអាកាសរបស់ប្រទេសជប៉ុនដោយក្រសួងការពារជាតិទីក្រុងតូក្យូមានការសង្ស័យយ៉ាងខ្លាំងថា វាជាបាឡុងចារកម្មរបស់ចិន។

នៅក្នុងកិច្ចពិភាក្សានោះ លោក Hayashi ក៏បានបង្ហាញពីការព្រួយបារម្ភរបស់លោកអំពីស្ថានភាពនៅសមុទ្រចិនខាងកើតផងដែរ ជាពិសេសពាក់ព័ន្ធជាមួយកោះ Senkaku ដែលចិននៅតែមិនទាន់អាចបំភ្លេចបាន។

ទន្ទឹមនោះ លោក Hayashi សម្តែងការព្រួយបារម្ភអំពីសកម្មភាពយោធាដែលទីក្រុងប៉េកាំងបាននិងកំពុងកើនឡើងនៅជិតប្រទេសជប៉ុន។ លោកក៏សង្កត់ធ្ងន់ថា វាមានសារសំខាន់ណាស់ក្នុងការថែរក្សាសន្តិភាព និងស្ថិរភាពនៅច្រកសមុទ្រតៃវ៉ាន់។

ពាក់ព័ន្ធនឹងបញ្ហាអ៊ុយក្រែន មន្ត្រីការបរទេសជប៉ុន ជំរុញឱ្យប្រទេសចិនដែលជាមហាអំណាចមួយ គួរទទួលខុសត្រូវ និងដើរតួនាទីវិជ្ជមានក្នុងបញ្ហាអ៊ុយក្រែន និងរុស្ស៊ី។

ទោះជាយ៉ាងណាក្តី ភាគីទាំងពីរបានបញ្ជាក់ថា នឹងរក្សាទំនាក់ទំនងនៅគ្រប់កម្រិតទាំងអស់។ មិនតែប៉ុណ្ណោះ កិច្ចសន្ទនាសន្តិសុខជប៉ុន-ចិននឹងធ្វើឡើងនៅសប្តាហ៍ក្រោយជាលើកដំបូងក្នុងរយៈពេល ៤ ឆ្នាំ ហើយក៏ យល់ព្រមបន្តរៀបចំឱ្យលោក Hayashi ធ្វើទស្សនកិច្ចនៅប្រទេសចិន នាពេលខាងមុខ៕

ប្រែសម្រួលដោយ៖ នាង រតនៈ

ប្រភព៖ NHK

ចុចអានបន្ទាប់៖ ចិន ត្រៀមបង្ហាញផែនការ ដោះស្រាយជម្លោះ រុស្ស៊ី-អ៊ុយក្រែន

The post ជប៉ុន ប្រាប់ចិន កុំបង្ហោះបាឡុងចូលដែនអាកាសរបស់ខ្លួនឲ្យសោះ! appeared first on Kampuchea Thmey Daily.

ជប៉ុន-ចិន Archives - Kampuchea Thmey Daily

លោក​ ត្រាំ​​ រំពឹងខ្ពស់​លើជប៉ុន​និង​ចិន​ក្នុងការ​ចូលរួម​ជាមួយ​អាមេរិក​​ការ​ពារ​នាវាដឹកប្រេង​​​

ជប៉ុន​​ប្រតិកម្ម​​ដំបូងគេចំពោះ​ការធ្វើ​សមយុទ្ធរបស់​យោធាចិន​​ព័ទ្ធ​​កោះ​តៃ​វ៉ាន់ ​

ក្រសួង​ការពារ​ចិន​​ អំពាវនាវ​ឱ្យ​​រួម​គ្នា​​​ទប់​ស្កាត់​ការរស់​ឡើង​​វិញ​នៃ​យោធា​​ស្តាំនិយម​ជប៉ុន