ជើងហោះហើរ Archives - Kampuchea Thmey Daily

កម្ពុជា មិនទាន់មានការលុបជើងហោះហើរទ្រង់ទ្រាយធំ ដោយសារតម្លៃប្រេងកើនឡើងនោះទេ

deth leng — Fri, 22 May 2026 08:09:12 +0000

លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរណ៍ស៊ីវិល បានប្រាប់ឱ្យដឹងថា គិតមកដល់ពេលនេះ អាកាសយានដ្ឋានអន្តរជាតិនៅកម្ពុជា រួមទាំងអាកាសយានដ្ឋានអន្តរជាតិតេជោ និងអាកាសយានដ្ឋានសៀមរាប នៅបន្តប្រតិបត្តិការធម្មតា។

លោកថា ក្រុមហ៊ុនអាកាសចរណ៍ដែលហោះហើរមកកម្ពុជា ក៏កំពុងបន្តតាមដានស្ថានការណ៍ថ្លៃប្រេង ស្ថានភាពទីផ្សារ និងតម្រូវការអ្នកដំណើរយ៉ាងជិតស្និទ្ធផងដែរ។

ក្នុងបរិបទវិស័យអាកាសចរណ៍អន្តរជាតិ តម្លៃប្រេងអាកាសចរណ៍ គឺជាចំណាយធំបំផុតមួយសម្រាប់ក្រុមហ៊ុនអាកាសចរណ៍ ដែលអាចមានចន្លោះប្រមាណ ២៥%-៤០% នៃចំណាយប្រតិបត្តិការ។ ដូច្នេះ នៅពេលតម្លៃប្រេងកើនឡើងខ្លាំង វាអាចប៉ះពាល់ដល់ថ្លៃសំបុត្រ ចំនួនជើងហោះហើរ និងផែនការប្រតិបត្តិការរបស់ក្រុមហ៊ុនមួយចំនួន។

លោក ស៊ីន ចាន់សិរីវុត្ថា បានថ្លែងថា៖« សម្រាប់កម្ពុជា វិស័យអាកាសចរណ៍នៅតែបង្ហាញសញ្ញាវិជ្ជមាន តាមរយៈការកើនឡើងនៃចំនួនអ្នកដំណើរ ការតភ្ជាប់ជើងហោះហើរអន្តរជាតិ និងការចូលមករបស់ក្រុមហ៊ុនអាកាសចរណ៍ថ្មីៗ»។

រាជរដ្ឋាភិបាល និងអាជ្ញាធរអាកាសចរស៊ីវិល ក៏កំពុងតាមដានយ៉ាងយកចិត្តទុកដាក់លើការវិវត្តនៃទីផ្សារប្រេង និងស្ថានភាពអាកាសចរណ៍សកល ដើម្បីធានានូវស្ថិរភាព និងនិរន្តរភាពនៃវិស័យនេះ។

លោក ស៊ីន ចាន់សិរីវុត្ថាបញ្ជាក់ថា៖ «កម្ពុជាមិនទាន់មានការលុបចោលជើងហោះហើរទ្រង់ទ្រាយធំដោយសារតម្លៃប្រេងដូចករណីខ្លះនៅតំបន់ផ្សេងទេ ប៉ុន្តែអាជ្ញាធរ និងក្រុមហ៊ុនអាកាសចរណ៍កំពុងតាមដានស្ថានការណ៍សកលយ៉ាងជិតស្និទ្ធ ដើម្បីគ្រប់គ្រងផលប៉ះពាល់ដែលអាចកើតមានជាយថាហេតុនាពេលខាងមុខ»។

គិតចាប់ពីខែមករា ដល់ខែមេសា ឆ្នាំ ២០២៦ អាកាសយានដ្ឋានអន្តរជាតិទាំង៣ (តេជោ-សៀមរាបអង្គរ-ព្រះសីហនុ) ទទួលបានជើងហោះហើរចេញ-ចូល (ទ្វេទិស) ចំនួនជាង២ម៉ឺនជើង (២៣,២០៤ ជើង) កើនឡើងប្រមាណ២%។

សម្រាប់អ្នកដំណើរចេញ-ចូល (ទ្វេទិស) មានចំនួនជាង ២លាននាក់ (២,៤២៨,០០៩ នាក់) ថយចុះប្រមាណ៤%។ ដោយឡែកទំនិញតាមផ្លូវអាកាសចេញ-ចូល (ទ្វេទិស) មានចំនួនជាង៣០ ពាន់តោន (៣០,៤៤៨ តោន) កើនឡើង៣៦%៕

The post កម្ពុជា មិនទាន់មានការលុបជើងហោះហើរទ្រង់ទ្រាយធំ ដោយសារតម្លៃប្រេងកើនឡើងនោះទេ appeared first on Kampuchea Thmey Daily.

អាមេរិក ជំរុញពលរដ្ឋខ្លួនចាកចេញពីអ៊ីរ៉ង់បន្ទាន់ ទាំងតាមផ្លូវអាកាសឬផ្លូវគោកឆ្លងកាត់ប្រទេសជាប់អ៊ីរ៉ង់

Minea Neu — Thu, 23 Apr 2026 09:54:03 +0000

មិនខុសគ្នាប៉ុន្មានពីស្ថានភាពនៅប្រទេសលីបង់ សហរដ្ឋអាមេរិកកាលពីថ្ងៃពុធជំរុញឱ្យពលរដ្ឋខ្លួនក្នុងប្រទេសអ៊ីរ៉ង់ចាកចេញពីប្រទេសនេះជាបន្ទាន់ បន្ទាប់ពីដែនអាកាសអ៊ីរ៉ង់មួយចំនួនបើកជើងហោះហើរឡើងវិញ គិតត្រឹមថ្ងៃទី២១ ខែមេសា។

យោងតាមសារព័ត៌មានតួកគី Anadolu ផ្សាយថ្ងៃទី២២ ខែមេសា ឆ្នាំ២០២៦ សេចក្តីជូនដំណឹងពីការធ្វើដំណើរ បានអំពាវនាវឱ្យពលរដ្ឋអាមេរិកតាមដានប្រព័ន្ធផ្សព្វផ្សាយក្នុងស្រុកសម្រាប់ព័ត៌មានថ្មីៗ និងពិគ្រោះជាមួយក្រុមហ៊ុនអាកាសចរណ៍ពាណិជ្ជកម្មសម្រាប់ជើងហោះហើរដែលពួកគេអាចរកបាន។

ប្រធានាធិបតីសហរដ្ឋអាមេរិក លោក ដូណាល់ ត្រាំ។ រូបភាព៖ Reuters

ទោះបីយ៉ាងណា សម្រាប់អ្នកដែលមិនអាចហោះហើរបាន សេចក្តីថ្លែងការណ៍ក៏បញ្ជាក់ពីជម្រើសធ្វើដំណើរទៅតាមព្រំដែនគោក តាមរយៈប្រទេស អាមេនី (Armenia) តួកគី (Türkiye) និង តូមិននីស្ថាន (Turkmenistan) ខណៈព្រំដែនគោករបស់ប្រទេស Azerbaijan នៅតែបិទសម្រាប់ចរាចរណ៍និងត្រូវការយល់ព្រមពីរដ្ឋាភិបាលជាមុន។

សេចក្តីថ្លែងការណ៍ខាងលើព្រមានថា៖ « ពលរដ្ឋអាមេរិកមិនគួរធ្វើដំណើរទៅកាន់ប្រទេសអាហ្វហ្គានីស្ថាន អ៊ីរ៉ាក់ ឬតំបន់ព្រំដែនប៉ាគីស្ថាន-អ៊ីរ៉ង់ទេ។ អាជ្ញាធរអ៊ីរ៉ង់អាចរារាំងការចាកចេញ ឬដាក់ថ្លៃចេញលើជនជាតិអាមេរិក»។

មិនតែប៉ុណ្ណោះ របាយការណ៍រម្លឹកដល់ជនជាតិអាមេរិក-អ៊ីរ៉ង់ដែលមានសញ្ជាតិពីរថា៖ « អ៊ីរ៉ង់មិនទទួលស្គាល់សញ្ជាតិពីរទេ[…] ជនជាតិអាមេរិកនៅអ៊ីរ៉ង់ប្រឈមមុខនឹងហានិភ័យខ្ពស់នៃការសួរចម្លើយ ការចាប់ខ្លួន និងការឃុំខ្លួន»។

យ៉ាងណាអ្នកដែលមិនអាចចាកចេញណែនាំឱ្យជ្រកកោននៅនឹងកន្លែងនិងនៅឱ្យឆ្ងាយពីបង្អួចកញ្ចក់។

គួរបញ្ជាក់ថា បទឈប់បាញ់រយៈពេលពីរសប្តាហ៍ អាមេរិក-អ៊ីស្រាអែលលើអ៊ីរ៉ង់ត្រូវបានពង្រីកនៅថ្ងៃអង្គារ បន្ទាប់ពីមានសំណើពីនាយករដ្ឋមន្ត្រីនិងមេបញ្ជាការកងទ័ពប៉ាគីស្ថាន។

ដោយឡែក ប្រធានាធិបតីអាមេរិក លោក ដូណាល់ ត្រាំ លើកឡើងថា បទឈប់បាញ់នឹងនៅតែមានសុពលភាពរហូតដល់ថ្នាក់ដឹកនាំអ៊ីរ៉ង់ដាក់សំណើថ្មី ដើម្បីបញ្ចប់ជម្លោះដែលលេបត្របាក់តំបន់ទាំងមូល រួមទាំងប្រទេសក្នុងឈូងសមុទ្រផងដែរ៕

ប្រែសម្រួល៖ ណឺ មិនា

The post អាមេរិក ជំរុញពលរដ្ឋខ្លួនចាកចេញពីអ៊ីរ៉ង់បន្ទាន់ ទាំងតាមផ្លូវអាកាសឬផ្លូវគោកឆ្លងកាត់ប្រទេសជាប់អ៊ីរ៉ង់ appeared first on Kampuchea Thmey Daily.

ត្រឹម ៤ ថ្ងៃ ការប៉ះទង្គិចគ្នានៅមជ្ឈឹមបូព៌ាធ្វើឱ្យមានការលុបជើងហោះហើរពាក់ព័ន្ធជាង ៩ ពាន់ជើង

Din Thary — Wed, 04 Mar 2026 07:27:42 +0000

លោក ស៊ិន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា បានឱ្យដឹងថា ការប៉ះទង្គិចគ្នានៅមជ្ឈឹមបូព៌ា (តំបន់ឈូងសមុទ្រ) រយៈពេល ៤ ថ្ងៃ ( គិតចាប់ពីថ្ងៃ ២៨ កុម្ភះ ដល់ត្រឹមថ្ងៃ ៣ មិនា ២០២៦) បានធ្វើឱ្យមានការលុបជើងហោះហើរពាក់ព័ន្ធប្រមាណជាង ៩,៥០០ ជើងដែលឆ្លងកាត់នៅក្នុងតំបន់មជ្ឈឹមបូព៏ា។

ប្រាប់«កម្ពុជាថ្មី» នៅរសៀលថ្ងៃទី០៤ ខែមិនា ឆ្នាំ២០២៦ លោក ស៊ិន ចាន់សិរីវុត្ថា បានពន្យល់ថា ការលុបចោលជើងហោះហើរទាំងនេះត្រូវបានបង្កឡើងដោយការបិទដែនអាកាសក្នុងតំបន់ បន្ទាប់ពីការកើនឡើងនៃជម្លោះអ៊ីរ៉ង់ឆ្នាំ២០២៦ រួមទាំងការវាយប្រហារដែលប៉ះពាល់ដល់រដ្ឋឈូងសមុទ្រ និងអាកាសយានដ្ឋាន។

ទន្ទឹមនេះអ្នកនាំពាក្យអាកាសចរណ៍រូបនេះ បានបន្ថែមថា ការលុបចោលជើងហោះហើរទាំងនេះ ពាក់ព័ន្ធទៅនឹងអាកាសយានដ្ឋាននៅឈូងសមុទ្រធំៗទាំង ៧ រួមមាន នៅ ឌូបៃ (DXB), ដូហា (DOH), អាប៊ូ ដាប៊ី (AUH), Sharjah (SHJ), គុយវ៉ែត (KWI), បារ៉ែន (BAH) និងDubai World Central (DWC)។

ការប៉ាន់ស្មាននៃការលុបចោលជើងហោះហើរ ទាំង ៤ ថ្ងៃនេះ គឺនៅថ្ងៃទី២៨ ខែកុម្ភៈ អាចមានការលុបចោលជើងហោះហើរប្រមាណជាង ១,៤០០ ជើង នៅថ្ងៃទី១ ខែមីនា មានជាង ៣,៤០០ ជើង នៅថ្ងៃទី២ ខែមីនា មានជាង ៣,៤០០ ជើង នៅថ្ងៃទី៣ ខែមីនា មានជាង ១,៣០០ ជើង សរុបជើងហោះហើរដែលបានលុបចោលទាំងអស់នេះចំនួនជាង ៩,៥០០ ជើង។

ជាមួយគ្នានេះ លោក ស៊ិន ចាន់ ក៏បានបញ្ជាក់ដែរថា៖«ជើងហោះហើរទាំងជាង ៩,៥០០ ជើងនេះ គឺមិនមែនជាការលុបចោលទូទាំងពិភពលោកទេ គឺសំដៅជាពិសេសតែទៅលើការលុបចោលនៅទូទាំងអាកាសយានដ្ឋានសំខាន់ៗចំនួន ៧ នៅឈូងសមុទ្រដែលបានរៀបរាប់ខាងលើ»៕

ដោយ៖ ឌិន ថារី

The post ត្រឹម ៤ ថ្ងៃ ការប៉ះទង្គិចគ្នានៅមជ្ឈឹមបូព៌ាធ្វើឱ្យមានការលុបជើងហោះហើរពាក់ព័ន្ធជាង ៩ ពាន់ជើង appeared first on Kampuchea Thmey Daily.

ត្រឹម១ថ្ងៃអាទិត្យ ជើងហោះហើរ៣៤០០ នៅមជ្ឈិមបូព៌ាត្រូវលុបចោល

Minea Neu — Mon, 02 Mar 2026 04:25:32 +0000

ការវាយប្រហាររបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ បានរំខានដល់ជើងហោះហើរនៅទូទាំងមជ្ឈិមបូព៌ា ខណៈប្រទេសនានានៅជុំវិញតំបន់បានបិទជើងហោះហើរតាមអាកាសរបស់ពួកគេ ជាពិសេសអាកាសយានដ្ឋានសំខាន់ៗភ្ជាប់ជាមួយអឺរ៉ុប អាហ្វ្រិក និងលោកខាងលិចទៅអាស៊ីទទួលរងការវាយប្រហារដោយផ្ទាល់។

យោងតាមកម្មវិធីតាមដានជើងហោះហើរ Flightradar២៤ ជើងហោះហើរជាង៣ ៤០០ ត្រូវបានលុបចោលកាលពីថ្ងៃអាទិត្យទូទាំងអាកាសយានដ្ឋានចំនួន៧ នៅមជ្ឈិមបូព៌ា។

យន្តហោះ Emirates, Qatar និង Etihad ។ រូបភាព៖ Simple Flying

យោងតាម Al.com នៅថ្ងៃទី០១ខែមីនា ឆ្នាំ២០២៦ ឱ្យដឹងថា អាកាសយានដ្ឋានដែលបានបិទរួមមាន អាកាសយានដ្ឋានទីក្រុងឌូបៃ និងអាប៊ូដាប៊ី(Abu Dhabi ) ក្នុងប្រទេសអារ៉ាប់រួម និងរដ្ឋធានីដូហាប្រទេសកាតា និងម៉ាណាម៉ា (Manama) ក្នុងប្រទេសបារ៉ែន។

ក្រុមហ៊ុនអាកាសចរណ៍ Emirates Airlines បានផ្អាកជើងហោះហើរទាំងអស់ចេញ-ចូលទីក្រុងឌូបៃចាប់ពីថ្ងៃអាទិត្យ ពេលដែលភាគីជម្លោះចាប់ផ្តើមវាយប្រហារគ្នាទៅវិញទៅមកយ៉ាងព្រៃផ្សៃដោយសារការផ្លោងមីស៊ីល និងការវាយប្រហារតាមផ្លូវអាកាស។

ចំណែកក្រុមហ៊ុនអាកាសចរណ៍ El Al របស់អ៊ីស្រាអែល បាននិយាយថា ខ្លួនកំពុងរៀបចំស្តារឡើងវិញដើម្បីនាំជនជាតិអ៊ីស្រាអែលដែលជាប់គាំងនៅបរទេសត្រឡប់ទៅផ្ទះវិញ ពេលដែនអាកាសបានបើកឡើងវិញ។

យ៉ាងណាមិញ អ្នកធ្វើដំណើរជាច្រើនបានជាប់គាំង ឬបង្វែរទៅកាន់អាកាសយានដ្ឋានផ្សេងទៀតនៅថ្ងៃសៅរ៍ បន្ទាប់ពីអ៊ីស្រាអែល កាតា ស៊ីរី អ៊ីរ៉ង់ អ៊ីរ៉ាក់ គុយវ៉ែត និងបារ៉ែន បានបិទដែនអាកាសរបស់ពួកគេ។

កម្មវិធី FlightRadar២៤ បានបន្តថា គ្មានសកម្មភាពហោះហើរលើប្រទេស អារ៉ាប់រួមនោះទេ បន្ទាប់ពីរដ្ឋាភិបាលប្រទេសនេះបានប្រកាសពីការបិទដែនអាកាសរបស់ខ្លួនជាបណ្តោះអាសន្ន។

យោងតាមក្រុមហ៊ុនវិភាគអាកាសចរណ៍ Cirium បានឱ្យដឹងថា ក្រុមហ៊ុនអាកាសចរណ៍ធំៗទាំងបីដែលធ្វើប្រតិបត្តិការនៅអាកាសយានដ្ឋានទាំងនោះគឺ Emirates, Qatar Airways និង Etihad ជាធម្មតាមានអ្នកដំណើរប្រហែល ៩០ ០០០នាក់ ក្នុងមួយថ្ងៃ៕

ប្រែសម្រួល៖ ណឺ មិនា

The post ត្រឹម១ថ្ងៃអាទិត្យ ជើងហោះហើរ៣៤០០ នៅមជ្ឈិមបូព៌ាត្រូវលុបចោល appeared first on Kampuchea Thmey Daily.

Air Canada ផ្អាកជើងហោះហើរទៅកាន់គុយបាពីពេលនេះទៅ ព្រោះវិបត្តិប្រេងធ្ងន់ធ្ងរ

Minea Neu — Tue, 10 Feb 2026 06:00:00 +0000

ក្រុមហ៊ុនអាកាសចរណ៍ Air Canada បានផ្អាកសេវាកម្មហោះហើរទៅកាន់ប្រទេសគុយបា ដោយសារតែខ្វះខាតប្រេងឥន្ធនៈ បម្រើដល់ជើងហោះហើរ ប្រសិនបើនៅបន្តជើងហោះហើរទៅកាន់កោះនេះ។ យោងតាម Al Jazeera ផ្សាយនៅថ្ងៃទី៩ខែកុម្ភៈ។

យន្តហោះ Air Canada ។ រូបភាព៖ ក្រុមហ៊ុនអាកាសចរណ៍កាណាដា។

ក្រុមហ៊ុនអាកាសចរណ៍ បាននិយាយនៅក្នុងសេចក្តីប្រកាសព័ត៌មានកាលពីថ្ងៃចន្ទថា ក្រុមហ៊ុន Air Canada បានសម្រេចចិត្តផ្អាកការហោះហើរ បន្ទាប់ពីការណែនាំ ដែលធ្វើឡើងដោយរដ្ឋាភិបាលពីភាពមិនប្រាកដប្រជា ក្នុងការផ្គត់ផ្គង់ប្រេងដល់អាកាសចរណ៍នៅអាកាសយានដ្ឋានគុយបា។

សេចក្តីថ្លែងការណ៍បន្ថែមថា៖ «វាត្រូវបានគេព្យាករណ៍ថា ចាប់ពីថ្ងៃទី ១០ខែកុម្ភៈនេះ ប្រេងឥន្ធនៈសម្រាប់អាកាសចរណ៍នឹងមិនមានលក់ឱ្យអាកាសយានដ្ឋាននៅលើកោះនេះទៀតទេ។ សម្រាប់ជើងហោះហើរដែលនៅសេសសល់ ក្រុមហ៊ុន Air Canada នឹងដឹកប្រេងបន្ថែមទៅចាក់ ឬចុះចត ប្រសិនបើចាំបាច់ ពេលធ្វើដំណើរត្រឡប់មកវិញ»។

ក្រុមហ៊ុនអាកាសចរណ៍បានបន្តថា អាទិភាពបន្ទាន់របស់ក្រុមហ៊ុន គឺការបញ្ជូនអតិថិជនដែលបានចុះចតនៅប្រទេសគុយបា មកកាន់ប្រទេសកាណាដាវិញ។

ក្រុមហ៊ុន Air Canada បានលើកឡើងទៀតថា៖ « ក្នុងរយៈពេលប៉ុន្មានថ្ងៃបន្ទាប់ ក្រុមហ៊ុននឹងដំណើរការជើងហោះហើរទទេរ ឆ្ពោះទៅភាគខាងត្បូង ដើម្បីទទួលយកអតិថិជនប្រមាណ ៣ ០០០នាក់ ដែលបានទៅដល់គោលដៅហើយ ដឹកពួកគេត្រឡប់មកផ្ទះវិញ» ។

គួរបញ្ជាក់ថា ជើងហោះហើរបច្ចុប្បន្នដំណើរការជាមធ្យម ១៦ ជើង ក្នុងមួយសប្តាហ៍ទៅកាន់គោលដៅចំនួន ៤ ក្នុងប្រទេសគុយបា។

នៅក្នុងសេចក្តីជូនដំណឹងអំពីបេសកកម្មផ្លូវអាកាស(NOTAM) នៃអាកាសយានដ្ឋានអន្តរជាតិ Jose Marti នៃទីក្រុង Havana ឱ្យដឹងកាលពីថ្ងៃអាទិត្យថា៖ « ប្រេងឥន្ធនៈសម្រាប់យន្តហោះម៉ាក Jet A១ នឹងមិនមានទៀតទេ។ ចាប់ផ្តើមពីថ្ងៃអង្គារ នៅម៉ោង ៥ ព្រឹក ដោយព្រមានជាធរមានរហូតដល់ថ្ងៃទី ១១ ខែមីនា»។

គួរបញ្ជាក់ថា គុយបាមិនអាចពន្លឿនសេដ្ឋកិច្ចរបស់ខ្លួនបានទេ ដោយសារវិបត្តិថាមពលធ្ងន់ធ្ងរ និងអាចយូរជាងនេះ។ ការដួលរលំនៃការដឹកជញ្ជូនប្រេងពីបរទេស ជាពិសេសពីប្រទេសវ៉េណេស៊ុយអេឡា កាន់តែមានភាពមិនល្អ។ លើសពីនេះ ការរឹតបន្តឹងទណ្ឌកម្មរបស់សហរដ្ឋអាមេរិក កង្វះរូបិយប័ណ្ណបរទេសដើម្បីទិញប្រេងឥន្ធនៈក្នុងតម្លៃស្តង់ដារ។

ការខ្វះខាតនេះ បង្ខំឱ្យមានការផ្អាកប្រេងឥន្ធនៈចំពោះអាកាសចរណ៍ ក្នុងអាកាសយានដ្ឋានហាវ៉ាណា ការបែងចែកសាំងមានភាពតឹងរ៉ឹង និងដាច់ចរន្តអគ្គិសនីបានរីករាលដាលក្នុងប្រទេស គិតត្រឹមខែកុម្ភៈ ឆ្នាំ ២០២៦ ៕

ប្រែសម្រួល៖ ណឺ មិនា

The post Air Canada ផ្អាកជើងហោះហើរទៅកាន់គុយបាពីពេលនេះទៅ ព្រោះវិបត្តិប្រេងធ្ងន់ធ្ងរ appeared first on Kampuchea Thmey Daily.

ក្រុមហ៊ុនអាកាសចរណ៍ចិនលុបចោលជើងហោះហើរជិត៥០ទៅជប៉ុនសម្រាប់ខែកុម្ភៈ

Minea Neu — Tue, 27 Jan 2026 09:27:59 +0000

រាល់ជើងហោះហើរដែលបានគ្រោងរួចហើយចំនួន៤៩ រវាងចិននិងជប៉ុនត្រូវបានលុបចោលសម្រាប់ខែកុម្ភៈ។ នេះបើតាម ទិន្នន័យជើងហោះហើរបានបង្ហាញ នៅថ្ងៃទី២៦ ខែមករា ដោយសារក្រុមហ៊ុនអាកាសចរណ៍ចិន បានពង្រីកការផ្លាស់ប្តូរសំបុត្រពិសេស និងគោលនយោបាយសងប្រាក់វិញសម្រាប់ការធ្វើដំណើរទៅនិងមកប្រទេសជប៉ុន។

យន្តហោះរបស់ចិន។ Reuters

យោងតាម CHINA DAILY, ទិន្នន័យពីកម្មវិធីព័ត៌មានជើងហោះហើរ Flight Master បានបង្ហាញថា គិតត្រឹមថ្ងៃទី២៦ខែមករា ជើងហោះហើរចិន-ជប៉ុនចំនួន៤៩ បានលុបចោលជើងហោះហើរទាំងអស់ដែលបានគ្រោងសម្រាប់ខែកុម្ភៈ ដែលជាការកើនឡើងពីខែមករា។

យ៉ាងណាក្នុងខែមករា អត្រានៃការលុបចោលជើងហោះហើរពីចិនទៅកាន់ប្រទេសជប៉ុនមានចំនួន ៤៧.២ភាគរយ កើនឡើង ៧.៨ ភាគរយធៀបនឹងខែធ្នូ។

ក្រុមហ៊ុនអាកាសចរណ៍របស់ប្រទេសចិនចំនួនបី រួមមាន Air China, China Eastern Airlines និង China Southern Airlines បានចេញសេចក្តីជូនដំណឹងនៅថ្ងៃទី២៦ ខែមករា ដោយលម្អិតអំពីវិធានការដោះស្រាយពិសេសសម្រាប់សំបុត្រទៅកាន់ប្រទេសជប៉ុន។ នេះបើតាម ក្រសួងការបរទេសរបស់ប្រទេសចិន។

នៅក្រោមគោលការណ៍នេះ អ្នកដំណើរដែលបានទិញសំបុត្រ ឬចេញដំណើរនៅថ្ងៃទី២៦ ខែមករា អាចធ្វើការផ្លាស់ប្តូរដោយមិនគិតថ្លៃ អាស្រ័យលើភាពខុសគ្នានៃតម្លៃសំបុត្រ ឬស្នើសុំការបង្វិលសងដោយមិនគិតថ្លៃសម្រាប់សំបុត្រដែលមិនប្រើ។

មិនតែប៉ុណ្ណោះ វិធានការនេះគ្របដណ្តប់លើជើងហោះហើរទៅប្រទេសជប៉ុនដែលបានគ្រោងទុកនៅចន្លោះថ្ងៃទី២៩ ខែមីនា ដល់ថ្ងៃទី២៤ ខែតុលា រួមទាំងការហោះហើរទៅកាន់ទីក្រុង Tokyo, Osaka, Nagoya, Fukuoka, Sapporo និង Okinawa ។

គួរឱ្យដឹងថា ការពន្យារពេលទាំងនេះបានកើតឡើងបន្ទាប់ពីប្រទេសចិនចេញសេចក្តីណែនាំអំពីការធ្វើដំណើរកាលពីពាក់កណ្តាលខែវិច្ឆិកា។ ពិសេសការធ្វើដំណើរទៅកាន់ប្រទេសជប៉ុន បន្ទាប់ពីនាយករដ្ឋមន្រី្តជប៉ុន លោកស្រី សាណាអេ តាកាអ៊ិឈិ [ Sanae Takaichi ] ប្រកាសថា នឹងលូកដៃជួយតៃវ៉ាន់ បើចិនប្រើកម្លាំងយោធាលើកោះនេះ៕

ប្រែសម្រួល៖ ណឺ មិនា

The post ក្រុមហ៊ុនអាកាសចរណ៍ចិនលុបចោលជើងហោះហើរជិត៥០ទៅជប៉ុនសម្រាប់ខែកុម្ភៈ appeared first on Kampuchea Thmey Daily.

ជើងហោះហើររាប់សិបនៅជប៉ុនត្រូវបានលុបចោល ព្រោះអាកាសធាតុលំបាកព្យាករណ៍

Minea Neu — Wed, 14 Jan 2026 04:30:57 +0000

ព្រិលធ្លាក់ និងខ្យល់បក់ខ្លាំងបានវាយប្រហារផ្នែកមួយចំនួនធំនៃប្រទេសជប៉ុនកាលពីថ្ងៃទី១១ ខែមករា និងបន្តជះឥទ្ធិពលបន្ថែមទៀត ដោយបង្ខំឱ្យក្រុមហ៊ុនអាកាសចរណ៍ធំៗ លុបចោលជើងហោះហើរក្នុងស្រុករាប់សិបជើង និងប៉ះពាល់ដល់អ្នកដំណើររាប់ពាន់នាក់។

ព្រិលធ្លាក់នៅជប៉ុន។ Reuters

ក្រុមហ៊ុនអាកាសចរណ៍ជប៉ុន បាននិយាយថា ខ្លួនបានលុបចោលជើងហោះហើរក្នុងស្រុកចំនួន៥៨ គិតត្រឹមម៉ោង ៨យប់ និងប៉ះពាល់ដល់អ្នកធ្វើដំណើរ ជិត ២ ០០០នាក់។

ផ្លូវហោះហើរដែលរងផលប៉ះពាល់បង្កឱ្យមានគ្រោះថ្នាក់ដល់ការហោះហើរ រួមមាន Osaka Itami និង Tajima។ នេះបើតាម The Straits Times បានរាយការណ៍។

ចំណែកក្រុមហ៊ុន All Nippon Airways បានរាយការណ៍ពីការលុបចោលជើងហោះហើរក្នុងស្រុកចំនួន៤៣ គិតត្រឹមម៉ោង៦ល្ងាច ដែលប៉ះពាល់ដល់អ្នកដំណើរប្រហែល២ ៨០០នាក់។

ចំណែកសារព័ត៌មាន ក្នុងស្រុក Japan News បានរាយការណ៍ថា ផ្លូវដែលរំខានដល់ជើងហោះហើរ រួមមានផ្លូវហោះហើររវាងព្រលានយន្តហោះអន្តរជាតិនានា ដូចជា រវាង Haneda និង Tottori ក៏ដូចជា Toyama និង Haneda ផងដែរ។

ទីភ្នាក់ងារឧតុនិយមជប៉ុន ឱ្យដឹងថា អាកាសធាតុរដូវរងាដ៏ធ្ងន់ធ្ងរនេះ ត្រូវបានរំពឹងថានឹងបន្តនៅក្នុងតំបន់ជាច្រើន កាលពីថ្ងៃទី១២ខែមករា ដោយមានព្រិលធ្លាក់ និងខ្យល់បក់ខ្លាំងទំនងជាបណ្តាលឱ្យមានការរំខានដល់ការដឹកជញ្ជូន។

តែយ៉ាងណា អាជ្ញាធរបានជំរុញឱ្យអ្នកធ្វើដំណើរ តាមដានការធ្វើបច្ចុប្បន្នភាពរបស់ជើងហោះហើរឱ្យបានដិតដល់ ព្រោះលក្ខខណ្ឌនានានៅតែមានការប្រែប្រួល៕

ប្រែសម្រួល៖ ណឺ មិនា

The post ជើងហោះហើររាប់សិបនៅជប៉ុនត្រូវបានលុបចោល ព្រោះអាកាសធាតុលំបាកព្យាករណ៍ appeared first on Kampuchea Thmey Daily.

ក្រុមហ៊ុនអាកាសចរណ៍អាមេរិក លុបចោលជើងហោះហើរជាង ១ ០០០ ដោយសារព្យុះដ៏ធំ

Minea Neu — Sat, 27 Dec 2025 04:49:35 +0000

យោងតាមគេហទំព័រតាមដានជើងហោះហើរ ‍FlightAware បានឱ្យដឹងថា ក្រុមហ៊ុនអាកាសចរណ៍នៅសហរដ្ឋអាមេរិកបានលុបចោលជើងហោះហើរចំនួន ១ ៣៨៣ជើង និងពន្យារពេល៤ ៦៨៥ជើងកាលពីថ្ងៃសុក្រ ដោយសារតែព្យុះនារដូវរងា ដែលមានឈ្មោះថាដេវីន [Devin] អំឡុងពេលធ្វើដំណើរកម្សាន្តនានាពេលថ្ងៃឈប់សម្រាក។ យោងតាមសារព័ត៌មាន Agence France-Presse។

យន្តហោះអាមេរិក។ Rueters

សេវាកម្មអាកាសធាតុជាតិ (NWS) បានព្យាករណ៍ថា នឹងមានព្រឹលធ្លាក់ពាសពេញតំបន់ Great Lakes ពេញមួយថ្ងៃ ជាមួយនឹងព្យុះដ៏ធំកំពុងធ្វើដំណើរឆ្ពោះទៅប៉ែកឦសាន។

ភ្នាក់ងារអាកាសធាតុព្រមានថា៖ «ស្ថានភាពផ្លូវនឹងពិបាកធ្វើដំណើរ សូម្បីពេលត្រឡប់មកពីថ្ងៃឈប់សម្រាកវិញក៏ដោយ» ។ ភ្នាក់ងារក៏បង្ហាញពីហានិភ័យនៃទឹកជំនន់ភ្លាមៗដោយសារព្យុះនៅទូទាំងរដ្ឋកាលីហ្វ័រញ៉ា [California] ភាគខាងត្បូង រួមជាមួយនឹងខ្យល់បក់ខ្លាំង និងព្យុះផ្គររន្ទះនៅជិតឆ្នេរសមុទ្រផងដែរ។

អ្នកតំណាងមកពីក្រុមហ៊ុនអាកាសចរណ៍អាមេរិក [United Airlines] និង JetBlue បានប្រាប់រ៉យទ័រថាក្រុមហ៊ុនដឹកអ្នកដំណើរបានលើកលែងថ្លៃសំបុត្រយន្តហោះ និងសងលុយវិញសម្រាប់ការកក់របស់អ្នកធ្វើដំណើរណាដែល អាចនឹងរងផលប៉ះពាល់ខ្លាំង៕

ប្រែសម្រួល៖ ណឺ មិនា

The post ក្រុមហ៊ុនអាកាសចរណ៍អាមេរិក លុបចោលជើងហោះហើរជាង ១ ០០០ ដោយសារព្យុះដ៏ធំ appeared first on Kampuchea Thmey Daily.

ជើងហោះហើរ Archives - Kampuchea Thmey Daily

​កម្ពុជា ​មិនទាន់​មាន​ការ​លុប​ជើង​ហោះហើរទ្រង់ទ្រាយធំ​ ដោយសារតម្លៃប្រេងកើនឡើងនោះទេ​

ត្រឹម ៤ ថ្ងៃ ការប៉ះទង្គិចគ្នានៅមជ្ឈឹមបូព៌ាធ្វើឱ្យមានការលុបជើងហោះហើរពាក់ព័ន្ធជាង ៩ ពាន់ជើង

ត្រឹម១ថ្ងៃអាទិត្យ​​ ជើង​ហោះ​ហើរ​​៣៤០០ នៅ​មជ្ឈិមបូព៌ា​ត្រូវ​​​​លុបចោល​​

Air Canada ផ្អាកជើងហោះហើរ​ទៅ​កាន់​គុយ​បាពីពេលនេះ​ទៅ ព្រោះ​​​វិបត្តិ​ប្រេង​ធ្ងន់​ធ្ងរ​

ក្រុមហ៊ុន​អាកាសចរណ៍ចិន​លុបចោល​ជើង​ហោះ​ហើរ​ជិត​៥០​ទៅជប៉ុន​​សម្រាប់ខែកុម្ភៈ​

ជើង​ហោះ​ហើរ​​រាប់សិប​នៅ​ជប៉ុន​​ត្រូវ​បាន​លុប​ចោល​​ ព្រោះអាកាសធាតុលំបាកព្យាករណ៍​

ក្រុម​ហ៊ុន​អាកាស​ចរណ៍​អាមេរិក ​លុប​ចោល​ជើង​ហោះ​ហើរ​ជាង ១ ០០០ ដោយ​សារ​ព្យុះដ៏ធំ

កម្ពុជា មិនទាន់មានការលុបជើងហោះហើរទ្រង់ទ្រាយធំ ដោយសារតម្លៃប្រេងកើនឡើងនោះទេ

ត្រឹម១ថ្ងៃអាទិត្យ ជើងហោះហើរ៣៤០០ នៅមជ្ឈិមបូព៌ាត្រូវលុបចោល

Air Canada ផ្អាកជើងហោះហើរទៅកាន់គុយបាពីពេលនេះទៅ ព្រោះវិបត្តិប្រេងធ្ងន់ធ្ងរ

ក្រុមហ៊ុនអាកាសចរណ៍ចិនលុបចោលជើងហោះហើរជិត៥០ទៅជប៉ុនសម្រាប់ខែកុម្ភៈ

ជើងហោះហើររាប់សិបនៅជប៉ុនត្រូវបានលុបចោល ព្រោះអាកាសធាតុលំបាកព្យាករណ៍

ក្រុមហ៊ុនអាកាសចរណ៍អាមេរិក លុបចោលជើងហោះហើរជាង ១ ០០០ ដោយសារព្យុះដ៏ធំ