១ ស៊ុត

ស៊ុតមិនត្រឹមតែសម្បូរទៅដោយប្រូតេអ៊ីន និងអាស៊ីតអាមីណូដែលជួយបង្កើតកោសិកាឡើងវិញប៉ុណ្ណោះទេ ប៉ុន្តែវាក៏មានផ្ទុកសេលេញ៉ូមផងដែរ – សារធាតុរ៉ែដែលជួយគាំទ្រប្រព័ន្ធភាពស៊ាំឱ្ឲ្យដំណើរការប្រកបដោយប្រសិទ្ធភាព។ ការបន្ថែមស៊ុតទៅក្នុងអាហារប្រចាំថ្ងៃរបស់អ្នកជួយឱ្យរាងកាយរបស់អ្នកទទួលបានកម្លាំងឡើងវិញយ៉ាងឆាប់រហ័ស និងការពារជំងឺផ្តាសាយ និងគ្រុនផ្តាសាយបានកាន់តែប្រសើរ។

២ អាល់ម៉ុន

ក្រៅពីការបង្កើនការចងចាំ អាល់ម៉ុនក៏មានសមត្ថភាពជំរុញប្រតិកម្មភាពស៊ាំផងដែរ ដែលជួយឲ្យរាងកាយប្រយុទ្ធប្រឆាំងនឹងបាក់តេរី និងវីរុស។ អ្នកអាចញ៉ាំវាដោយផ្ទាល់ លាយសាឡាដ ឬលាយវាជាមួយទឹកដោះគោដើម្បីបង្កើនប្រសិទ្ធភាព។

៣ ភេសជ្ជៈក្តៅឧណ្ហៗ

ទឹកស៊ុបក្តៅឧណ្ហៗមួយចាន មិនថាចម្អិនពីបន្លែ ឬសាច់ទេ ជួយបំបាត់ការឈឺបំពង់ក សម្អាតផ្លូវដង្ហើម និងផ្តល់សារធាតុចិញ្ចឹមសំខាន់ៗ។ ការបន្ថែមបន្លែបៃតង កាណូឡា ឬខ្ញីទៅក្នុងទឹកស៊ុបរបស់អ្នកនឹងជួយបង្កើនការប្រឆាំងនឹងការរលាក និងធ្វើឱ្យរាងកាយមានភាពកក់ក្តៅ។

៤ ផ្លែក្រូច

ផ្លែក្រូច ក្រូចឃ្វិច ក្រូចថ្លុង និងក្រូចឆ្មារ សុទ្ធតែសម្បូរទៅដោយវីតាមីន C – ជាសារធាតុចិញ្ចឹមដែលជួយពង្រឹងប្រព័ន្ធភាពស៊ាំ កាត់បន្ថយការរលាក និងជួយអ្នកដែលមានជំងឺផ្តាសាយឱ្យជាសះស្បើយលឿនជាងមុន ខណៈពេលដែលកាត់បន្ថយរោគសញ្ញាមិនល្អ។

៥ គ្រាប់ល្ពៅ

គ្រាប់ល្ពៅគឺជាប្រភពដ៏សម្បូរបែបនៃស័ង្កសី ដែលជួយពង្រឹងប្រព័ន្ធភាពស៊ាំ និងគាំទ្ររាងកាយប្រឆាំងនឹងមេរោគផ្តាសាយ។ អ្នកអាចបន្ថែមគ្រាប់ល្ពៅទៅក្នុងសាឡាដ ឬស្មូទី ដើម្បីបំពេញបន្ថែមអាហារូបត្ថម្ភប្រចាំថ្ងៃ។

៦ ខ្ទឹមស

ខ្ទឹមសមានផ្ទុកសារធាតុ allicin ដែលជាសមាសធាតុដែលមានប្រសិទ្ធភាពប្រឆាំងនឹងបាក់តេរី និងប្រឆាំងនឹងការរលាកដ៏មានឥទ្ធិពល។ ការបន្ថែមខ្ទឹមសទៅក្នុងម្ហូបប្រចាំថ្ងៃគឺជាវិធីធម្មជាតិមួយដើម្បីជួយឱ្យរាងកាយមានសុខភាពល្អក្នុងរដូវផ្តាសាយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ឱសថ ៦ ប្រភេទ ល្អសម្រាប់សុខភាព ក្នុងរដូវរងាឬធ្លាក់ខ្យល់

The post អាហារ ៦ មុខ ជួយរាងកាយប្រយុទ្ធប្រឆាំងនឹងជំងឺផ្តាសាយ appeared first on Kampuchea Thmey Daily.

លោក បាន ជាជនជាតិដើមភាគតិច ស្ថិតនៅភូមិទៀមលើ ឃុំ កាចូន ស្រុក វ៉ឺនសៃ ខេត្តរតនគិរី បានប្រាប់ថា លោកមានជំងឺផ្តាយសាយនេះ នៅដើមខែកុម្ភៈមានរោគសញ្ញា ហៀរសំបោរ និងស្លេសនៅក្នុងបំពង់ រហូតដល់ខែមេសា។ បើទោះជាលោកទៅបើកថ្នាំនៅមណ្ឌលសុខភាព ហើយទៅទិញថ្នាំនៅកន្លែងលក់ថ្នាំពេទ្យឯកជន និងកម្ម៉ង់ថ្នាំតាម Online លេបនៅតែពុំធូរស្រាល អស់រយៈពេល ៥ខែមកហើយ។ នៅពេលយប់លោកដេក មិនសូវបានបណ្តាលមកពីក្អក និងពិបាកដកដង្ហើម។

លោក ខេង សារី អនុប្រធានមណ្ឌលសុខភាពស្រុកវ៉ឺនសៃ បានមានប្រសាសន៍ថា ជំងឺផ្តាសាយ មានការៈក្អក ហៀរសំបោរ ក្តៅខ្លួន។ ជាទូទៅជំងឺនេះ កើតឡើងនៅខែក្តៅ និងនៅដើមឆ្នាំមានភ្លៀងធ្លាក់ដំបូង និងនៅខែរងាធ្លាក់ខ្យល់ខែកក្តិក ហើយពេលក្តៅខ្លួនខ្លាំង ត្រូវលេបថ្នាំបញ្ចុះកម្តៅ និងត្រូវពិសារទឹកឱ្យញឹកញាប់គ្រប់គ្រាន់។ លោកថា ជំងឺនេះបង្កឡើងពីពពួក វីរុសមិនមែនជាពពួកប៉ាកតេរី ដែលអាចជាសះស្បើយ ទៅវិញជាធម្មតាមានសុខភាពល្អឡើងវិញ ពុំចាំបាច់លេបថ្នាំពេទ្យ ដោយគ្រាន់តែផឹកទឹកក្តៅ សម្រាកឱ្យគ្រប់គ្រាន់ ត្រូវតាមដានខ្លួនឯងជាប្រចាំ និងទៅពិនិត្យសុខភាព នៅមណ្ឌលសុខភាព។ ករណីអាការៈមានក្អក និងមានស្លេស្ម៍ឥតឈប់ដូចនេះ លើសពី១ ទៅ ២អាទិត្យ អូសបន្លាយរហូត ១៤ថ្ងៃ ឬ ចាប់ពី ៣ខែឡើងទៅ តាមការសន្និដ្ឋានដំបូង អ្នកជំងឺអាចវិវដ្តជាជំងឺរបេងនៅដំណាក់កាលដំបូង។

ប្រសិនបើទៅបើកថ្នាំផ្តាសាយ លេបទៅចាប់ពី ៣ថ្ងៃ ទៅ ៧ថ្ងៃ នៅតែមិនជាសះស្បើយ ត្រូវត្រឡប់ទៅមណ្ឌលសុខភាពឡើងវិញ ដើម្បីជួបគ្រូពេទ្យពិនិត្យ ជាលើកទី២ ដើម្បីតាមដានជំងឺនេះឡើងវិញ។ ក្នុងនាមលោកជាអ្នកបម្រើការងារផ្នែកសុខភាពសាធារណៈ លោកណែនាំ ឱ្យជនជាតិដើមភាគតិច ដែលមានជំងឺ ត្រូវទៅពិនិត្យ និងគ្រោះជំងឺ នៅមណ្ឌលសុខភាព ដើម្បីបើកថ្នាំយកទៅពិសារឱ្យបានទៀងទាត់តាមវិជ្ជបញ្ជា ដោយមិនត្រូវទុកថ្នាំចោល ដែលបណ្តាឱ្យមេរោគស៊ាំនឹងថ្នាំ ធ្វើឱ្យមិនងាយជាសះស្បើយ៕

ដោយ៖ ខៀវ ចាប

The post មណ្ឌលសុខភាពស្រុកវ៉ឺនសៃ ណែនាំឱ្យអ្នកមានជំងឺផ្តាសាយរ៉ាំរ៉ៃឆាប់ព្យាបាល ព្រោះខ្លាចវិវដ្តជាជំងឺរបេង appeared first on Kampuchea Thmey Daily.

យោងតាមនាយកដ្ឋានសុខាភិបាលរដ្ឋកាលីហ្វ័រញ៉ា, បើគិតចាប់តាំងពីខែធ្នូឆ្នាំ២០២៤មក មនុស្សស្លាប់ដោយសារជំងឺផ្តាសាយគ្រប់ទម្រង់ គឺមានភាគរយខ្ពស់ជាងអ្នកបាត់បង់ជីវិតដោយសារកូវីដ១៩ទៅទៀត។ ជាក់ស្តែង ឥឡូវអ្នកស្លាប់ដោយសារផ្តាសាយគឺមានប្រហែល ២%ក្នុងចំណោមការស្លាប់នៅទូទាំងរដ្ឋ។

វេជ្ជបណ្ឌិត John Swartzberg អ្នកជំនាញខាងជំងឺឆ្លងនៅសាកលវិទ្យាល័យកាលីហ្វ័រញ៉ា Berkeley បានព្រមានថា រដូវផ្តាសាយឆ្នាំនេះអាចជារដូវផ្តាសាយអាក្រក់បំផុតប្រចាំសតវត្សរ៍ទី២១ ហើយអ្វីដែលសំខាន់គឺការផ្ទុះករណីឆ្លងផ្តាសាយប្រភេទ H1N1 និង H3N2។

ចាប់តាំងពីថ្ងៃទី១ខែកក្កដាមក រដ្ឋកាលីហ្វ័រញ៉ា បានកត់ត្រាការស្លាប់ដោយសារជំងឺគ្រុនផ្តាសាយយ៉ាងតិច ៥៦១នាក់ ដែលភាគច្រើនកើតឡើងក្នុងចំណោមមនុស្សមានអាយុលើស៦៥ឆ្នាំ។

ពាក់ព័ន្ធបញ្ហានេះដែរ ក្រុមអ្នកជំនាញបានចង្អុលចំៗទៅអត្រាចាក់វ៉ាក់សាំងដ៏ទាប ថាជាមូលហេតុចម្ប​ងបណ្តាលឲ្យមានមនុស្សស្លាប់ដោយសារជំងឺផ្តាសាយយ៉ាងច្រើនបែបនេះ ជាពិសេសក្នុងចំណោមកុមារតែម្តង។

បើនិយាយពីគ្រោះធម្មជាតិវិញ កាលពីថ្ងៃចន្ទ គ្រោះរញ្ជួយដីបានកើតឡើងក្នុងទីក្រុង San Bernardino ភាគខាងត្បូងរដ្ឋ ដោយការរញ្ជួយលើកដំបូងមានកម្រិត៣.៦រ៉ិចទ័រ វាយប្រហារនៅម៉ោង៩:៤៥នាទីព្រឹក ខណៈ៣នាទីក្រោយ មានការរញ្ជួយលើកទី២ កម្រិត ៣.០រ៉ិចទ័រ។ ការរញ្ជួយទាំងពីរលើកនេះ គឺសុទ្ធសឹងមានជម្រៅជាង ៦គីឡូម៉ែត្រ។

មុននេះ ភាគកណ្តាលរដ្ឋកាលីហ្វ័រញ៉ា ក៏ប្រឈមនឹងអាកាសធាតុត្រជាក់ដល់ឆ្អឹងដែរ ខណៈសីតុណ្ហភាពត្រូវបានគេព្យាករថា នឹងធ្លាក់ចុះដល់ -២៨អង្សាសេឯណោះ នៅប៉ុន្មានថ្ងៃខាងមុខ ដោយសារតែឥទ្ធិពលម៉ាស់ខ្យល់មកពីតំបន់អាក់ទិក៕

អត្ថបទ៖ សុខ សុវណ្ណ

ចុចអាន៖ រងទុក្ខផ្ទួនៗ រដ្ឋកាលីហ្វ័រញ៉ា ជួបគ្រោះរញ្ជួយដី ២លើកទៀតហើយ

The post មិនត្រឹមគ្រោះធម្មជាតិ តែរដ្ឋកាលីហ្វ័រញ៉ា ត្រូវជួបវិបត្តិសុខភាពទៀត appeared first on Kampuchea Thmey Daily.

លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានប្រាប់ កម្ពុជាថ្មី នៅព្រឹក
ថ្ងៃទី១៣មិថុនានេះថា រដូវភ្លៀងធ្លាក់តែងតែមានការរីករាលដាលជំងឺផ្តាសាយដែលបណ្តាលមកពីមេរោគផ្តាសាយ ហើយ បើតាមទិន្នន័យនៃនាយកដ្ឋានប្រយុទ្ធនឹងជំងឺឆ្លងបានបង្ហាញថា អត្រាវិជ្ជមាននៃជំងឺផ្តាសាយនាពេលបច្ចុប្បន្នខ្ពស់ជាងជំងឺកូវីដ១៩ទៅទៀត។

លោកវេជ្ជបណ្ឌិតបានពន្យល់ថា ជំងឺផ្តាសាយនៅរដូវភ្លៀងមានភាពខុសគ្នាទៅនឹងជំងឺផ្តាសាយនៅរដូវត្រជាក់។ ជំងឺផ្តាសាយនៅរដូវត្រជាក់មិនមែនបង្កឡើងដោយមេរោគផ្តាសាយទេភាគច្រើនបង្កឡើងដោយការប្រែប្រួលអាកាសធាតុហើយការព្យាបាលក៏ខុសគ្នាដែរ។

លោកវេជ្ជបណ្ឌិតបានបន្តថា ចំពោះការព្យាបាលជំងឺផ្តាសាយបង្កឡើងដោយមេរោគអ្នកជំងឺត្រូវពិសារទឹកឱ្យបានច្រើន និងបរិភោគថ្នាំបញ្ចុះកម្តៅ និងពិសារថ្នាំវីតាមីនសេដើម្បីជួយឱ្យឆាប់ជាសះស្បើយ។ ជាមួយគ្នានេះអ្នកជំងឺក៏អាចព្យាបាលតាមរបៀបធម្មជាតិផងដែរដោយអ្នកជំងឺត្រូវបរិភោគទឹកក្តៅអ៊ុនៗឱ្យបានច្រើន និងញឹកញាប់ និងពិសារអាហារដែលមាន​សារជាតិវីតាមីនសេក្នុងនោះមានដូចជា ផ្លែក្រូច ស្ត្រូប៊ើរី ស្វាយទុំ ល្ហុងទុំ ត្របែក ម្នាស់ទុំ ក្រូចឆ្មានិងបន្លែពណ៍ខៀវ។

លោកវេជ្ជបណ្ឌិតបន្តទៀតថា ជំងឺផ្តាសាយបង្កឡើងដោយមេរោគអាចជាដោយខ្លួនឯងវិញទេចំពោះអ្នកមានសុខភាពល្អ។ប៉ុន្តែចំពោះអ្នកមិនមានសុខភាពមិនល្អ និងមនុស្សវ័យចំណាស់ដូចជាជំងឺទឹកនោមផ្អែម លើសឈាម រលាកក្រពះពោះវៀន មហារីក និងជំងឺរ៉ាំរ៉ៃដ៏ទៃទៀតដែលមានភាពស៊ាំក្នុងខ្លួនថយចុះអាចប្រឈម និងវិវត្តន៍ទៅជាធ្ងន់ធ្ងរ។ លោកវេជ្ជបណ្ឌិតបានបន្ថែមថា ក្នុងករណីប្រើថ្នាំបញ្ចុះកម្តៅនិងអនុវត្តតាមវិធីធម្មជាតិហើយរយៈពេល៣ថ្ងៃនៅមិនធូរស្រាលហើយក្នុងអំឡុងពេលព្យាបាលមានអាការៈដូចជាហត់ពិបាកដកដង្ហើមគួរទៅពិគ្រោះជំងឺជាមួយគ្រូពេទ្យនៅមណ្ឌលសុខភាព​ឬមន្ទីរពេទ្យដើម្បីឱ្យគ្រូពេទ្យធ្វើរោគវិនិច្ឆ័យឱ្យបានសមស្របនិងព្យាបាលឱ្យបានត្រឹមត្រូវនិងកុំទិញថ្នាំផ្តេសផ្តាសពិសារពិសេសកុំប្រើថ្នាំផ្សះដោយខ្លួនឯងអាចធ្វើឱ្យខូចសុខភាពនិងស៊ាំថ្នាំ។

លោកវេជ្ជបណ្ឌិតបានណែនាំដល់អ្នកជំងឺផ្តាសាយគួរតែពាក់ម៉ាស និងនៅឱ្យដាច់ពីគេ និងអនុវត្តវិធានការអនាម័យ។ព្រោះជំងឺផ្តាសាយឆ្លងពីម្នាក់ទៅម្នាក់ទៀតតាមរយៈតំណក់ទឹកតូចៗពេលអ្នកជំងឺកណ្តាស់ឬក្អកចេញពីមាត់និងច្រមុះហើយអាចសាយភាពមេរោគ១ម៉ែត្រទៅ១ម៉ែត្រកន្លះ។

លោកវេជ្ជបណ្ឌិតបានអំពាវនាវដល់ប្រជាពលរដ្ឋបើឃើញកន្លែងណាមានករណីជំងឺផ្តាសាយច្រើនខុសធម្មតានៅក្នុង​សហគមន៍ ឬកន្លែងធ្វើការសូមរាយការណ៍មកលេខ១១៥ចាបន្ទាន់ដើម្បីឱ្យនា​យកដ្ឋានប្រយុទ្ធនឹងជំងឺឆ្លងបញ្ជួនមន្ត្រីចុះទៅអង្កេតស្រាវជ្រាវរកមេរោគអ្វីពិតប្រាកដបណ្តាលឱ្យឆ្លងជំងឺផ្តាសាយសំដៅទប់ស្កាត់ការឆ្លងរីករាលដាលឱ្យបានទាន់ពេលវេលា៕

អត្ថបទ៖ សំអឿន

The post មន្ត្រីជំនាញប្រកាសឱ្យពលរដ្ឋបង្កើនប្រុងប្រយ័ត្នចំពោះជំងឺផ្តាសាយ ខណៈជំងឺនេះមានអត្រាខ្ពស់ជាងជំងឺកូវីដ១៩ appeared first on Kampuchea Thmey Daily.

ការ​បិទ​ខ្ទប់ ដាក់​បំរាម​ ពាក់ម៉ាស់ និង​គម្លាត​សង្គម​​​ដែល​បាន​ក្លាយ​ជា​បទដ្ឋាន​នៅ​អឺរ៉ុប​កំឡុង​ពេលការ​រាត​ត្បាត​របស់​កូវីដ-១៩​ដែល​​បាន​គ្រប់​ដណ្តប់​លើ​ជំងឺ​ផ្តាសាយ​កាល​ពី​រដូវ​រងា​មុន។ យោង​តាម​ទិន្នន័យ​របស់​អឺរ៉ុប​បង្ហាញ​ថា ​​វីរុស​ផ្តាសាយ​នេះ​បាន​សម្លាប់មនុស្ស​ជា​សកល​​ប្រហែល ៦៥០ ០០០​​នាក់​ក្នុង​មួយ​​ឆ្នាំ។

ប៉ុន្តែ​​ឥឡូវ​នេះ វា​​បាន​ផ្លាស់​ប្តូរ​នៅ​ពេល​ប្រទេស​ជា​ច្រើនបន្ធូរ​បន្ថយ​វិធានា​ការប្រយុទ្ធ​នឹងកូវីដ-១៩​ដោយសារ​តែ​ការ​ចាក់​វ៉ាក់សាំង​ការពារ។

យោង​តាមមជ្ឈមណ្ឌល​​ការពារ និង​គ្រប់​គ្រង​ជំងឺ​ឆ្លង​អឺរ៉ុប (ECDC) បានរាយការណ៍​នៅ​ខែ​នេះ​ថា ចាប់​តាំង​ពី​ពាក់​កណ្តាល​ខែ​ធ្នូ​មក ជំងឺ​ផ្តាសាយ​បាន​វាយ​លុក​អឺរ៉ុប​​នៅ​ក្នុង​អត្រា​ខ្ពស់​ជាង​ការ​រំពឹង​ទុក។

ទិន្នន័យ​របស់ ECDC និង​អង្គការ​សុខភាព​ពិភព​លោក (WHO) បាន​បង្ហាញ​ថា ក្នុង​ខែ​ធ្នូ ចំនួន​នៃ​អ្នកជំងឺ​ផ្តាយ​សាយ​​ស្ថិត​នៅ​សាល​​ព្យាបាល​កម្រិត​ខ្ពស់ (ICUs) ​បាន​កើន​ឡើង​ដល់​​​កំពូលកម្រិត​​​៤៣​​​​ក្នុង​សប្តាហ៍​ចុង​ក្រោយ​នៃ​ឆ្នាំ​មុន។

កម្រិត​នេះទាប​ជាង​កម្រិត​មុន​ជំងឺ​កូវីដ​រាត​ត្បាត ខណៈ​​ចំនួន​អ្នក​​ជំងឺ​ផ្តាសាយ​​ប្រចាំ​សប្តាហ៍​នៅ​សាល​ ICU កម្រិត​ខ្ពស់​បំផុត​ដល់​៤០០​នាក់​​នៅ​ក្នុង​ដំណាក់​កាល​ដូច​គ្នា​កាល​ពី​ឆ្នាំ​២០១៨។

អ្នក​ឯកទេស​ជំងឺ​ផ្តាសាយកំពូល​របស់ ECDC លោក​វេជ្ជបណ្ឌិត​ Pasi Penttinen បាន​និយាយ​ថា ការ​វិល​ត្រឡប់​មក​វិញ​នៃ​ជំងឺ​ផ្តាសាយ​អាច​ជា​ការ​ចាប់​ផ្តើម​រដូវ​កាល​ដ៏​វែង​ខុស​ពី​ធម្មតា​ដែល​អាច​អូស​បន្លាយ​ដល់​រដូវ​ក្តៅ។

លោក​ថា ៖«ប្រសិន​បើ យើង​ចាប់​ផ្តើម​លើក​វិធាន​ការ​ទាំង​អស់ កង្វល់​ដ៏​ធំ​​របស់​​ខ្ញុំ​​​ពី​ជំងឺ​ផ្តាសាយ​គឺ​ថា យើង​​នឹង​មាន​ពេល​វេលា​ដ៏​វែង​ដែល​ស្ទើរ​តែ​មិន​អាច​គណនា​បាន​នៅ​ក្នុង​ប្រជា​ជន​អឺរ៉ុប។ ប្រហែល​ជា​យើង​នឹង​​ផ្លាស់​ប្តូរចេញ​ពី​គំរូ​រដូវ​កាល​ធម្មតា»៕

ប្រែ​សម្រួល៖ វីរបុត្រ
ប្រភព៖ reuters

The post វេន​​ជំងឺ​ផ្តាសាយ​មក​ដល់​ ឥឡូវអឺរ៉ុប​កំពុង​ប្រឈម​ជំងឺ​ឆ្លង​ពីរប្រភេទ appeared first on Kampuchea Thmey Daily.

ស្ត្រីរូបនេះបានធ្វើតេស្តវិជ្ជមានមេរោគទាំងពីរ នៅក្នុងមន្ទីរពេទ្យ Beilinson នៃទីក្រុង Petach Tikva ប្រទេសអ៊ីស្រាអែល កាលពីថ្ងៃព្រហស្បតិ៍សប្តាហ៍មុន។

នាងមានរោគសញ្ញាស្រាល ហើយមន្ត្រីសុខាភិបាលអ៊ីស្រាអែលកំពុងសិក្សាករណីរបស់នាង ដើម្បីកំណត់ថាតើ ការរួមផ្សំគ្នានៃជំងឺទាំង២នេះ បណ្តាលឲ្យមានអាការធ្ងន់ធ្ងរឬយ៉ាងណា។

សាស្ត្រាចារ្យ Arnon Vizhnitser ប្រធាននាយកដ្ឋានរោគស្ត្រី នៃមន្ទីរពេទ្យបានប្រាប់កាសែត Hamodia ថា “នាងត្រូវបានគេធ្វើរោគវិនិច្ឆ័យឃើញថាមានគ្រុនផ្តាសាយ និងកូវីដភ្លាមៗនៅពេលមកដល់។ ការធ្វើតេស្តទាំងពីរបានចេញលទ្ធផលវិជ្ជមាន សូម្បីពិនិត្យម្តងទៀតក៏ដោយ។​ ជំងឺទាំង២គឺជាប្រភេទតែមួយ។ ពួកវាជាមេរោគ និងធ្វើឲ្យពិបាកដកដង្ហើម”។

ទោះបីជាយ៉ាងណាក៏ដោយ ស្ត្រី​រូប​នេះ​ត្រូវ​បាន​គេ​រំពឹង​ថា​នឹង​ចេញពីមន្ទីរពេទ្យ​នៅ​ថ្ងៃ​ព្រហស្បតិ៍សប្តាហ៍នេះ។

គួរបញ្ជាក់ថា ការរកឃើញនេះកើតឡើង បន្ទាប់ពីរដ្ឋមន្ត្រីសុខាភិបាលអ៊ីស្រាអែល បាននិយាយកាលពីចុងសប្តាហ៍ថា ប្រទេសនេះកំពុងពង្រីកការចាក់វ៉ាក់សាំងលើកទីបួនដល់មនុស្សចាស់នៅក្នុងមណ្ឌលថែទាំ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ៊ីស្រាអែល ចាក់វ៉ាក់សាំងកូវីដដូសទី ៤ ដល់ក្រុមមនុស្ស ២ ប្រភេទ ទោះចាក់ដូសទី ៣ បាន ៤ ខែក៏ដោយ

The post រកឃើញមនុស្សដំបូងគេលើលោក កើតជំងឺ២ប្រភេទនេះ ក្នុងពេលតែមួយ (មានវីដេអូ) appeared first on Kampuchea Thmey Daily.

ការ​សិក្សា​បង្ហាញ​ថា ខណៈ​ពេល​មនុស្ស​មួយ​ចំនួន​កើត​មាន​ផល​រំខាន​ច្រើន​​ពី​ការ​ចាក់​បញ្ចូល​គ្នា​រវាង​វ៉ាក់សាំង​​​ផ្តាសាយ និង​កូវីដ-១៩ ក៏​អាការ​ភាគ​ច្រើន​ពី​ស្រាល​ទៅ​មធ្យម។ ផល​រំខាន​កើត​មាន​ទូទៅ​បំផុត​មាន​ដូច​ជា​ឈឺ​ចាប់​នៅ​កន្លែង​ចាក់ និង​អស់​កម្លាំង​​ ឈឺ​ក្បាល ឬ​ឈឺ​សាច់​ដុំជា​បណ្តោះ​អាសន្ន។

ការ​ធ្វើ​តេស្ត​ឈាម​លើ​អ្នក​ស្ម័គ្រ​ចិត្ត​​ក្នុង​ការ​សាក​ល្បង​បាន​បង្ហាញ​ថា មិន​មាន​ផល​ប៉ះ​ពាល់អវិជ្ជមាន​​​លើ​ការ​ឆ្លើយ​តប​របស់​ប្រព័ន្ធ​ភាព​ស៊ាំ​​ឡើយ​ទាំង​​វ៉ាក់សាំងផ្តាសាយ ឬវ៉ាក់សាំង​កូវីដ នៅ​ពេល​ការ​ចាក់​​ក្នុង​ពេល​ជា​មួយ​គ្នា​​លើ​ដៃទាំង​សង​ខាង​ដោយ​​​វ៉ាក់សាំង​ផ្តាសាយ​ FluBlok របស់​ក្រុម​ហ៊ុន Sanofi និង​វ៉ាក់សាំង​កូវីដ Pfizer។

អ្នក​ស្រាវ​ជ្រាវលើ​ការ​សិក្សា​រួម​បញ្ចួល​គ្នារវាង​វ៉ាក់សាំង​ផ្តាយ​សាយ និង​វ៉ាក់សាំង​កូវីដ (ComFluCov) បាន​និយាយ​ថា ការ​រក​ឃើញ​បាន​គាំទ្រ​ដល់​ដំបូន្មាន​​ថ្មី​ៗ​​​របស់​​គណៈកម្មាធិការ​ស្តីពី​វ៉ាក់សាំង និង​ការ​ចាក់​ថ្នាំ​បង្ការ (JCVI) ​ដើម្បី​​ផ្តល់​ការ​ចាក់​​​វ៉ាក់សាំង​កូវីដដូស​ជំរុញរួម​ជា​មួយ​នឹង​ការ​វ៉ាក់សាំង​ផ្តាសាយ​នា​រដូវ​ស្លឹក​ឈើ​ជ្រុះ និង​រដូវ​រងា​ខាង​មុខ។

អ្នក​ស្រី​វេជ្ជបណ្ឌិត Rajeka Lazarus អ្នក​វិទ្យាសាស្ត្រដែល​ដឹក​នាំ​លើ​ការ​សាក​ល្បង និង​ជា​អ្នក​ប្រឹក្សាជំនាញជំងឺ​ឆ្លង និង​រោគ​សាស្ត្រ​នៅ​ University Hospitals Bristol និង​មូល​និធិ Weston NHS Foundation Trust បាន​ឲ្យ​ដឹង​ថា លទ្ធផល​បឋម​នេះ​គឺ​ជា​ជំហាន​វិជ្ជមាន​ពិត​ប្រាកដ​មួយ​ដែល​អាច​មាន​ន័យ​ថា ការ​ណាត់​ជួប​តិច​ជាង​មុនសម្រាប់​អ្នក​ដែល​មាន​សិទ្ធិ​ចាក់​វាក់កូវីដដូស​ជំរុញ និង​វ៉ាក់សាំង​ផ្តាសាយ។

អ្នក​ស្រី​បាន​លើក​ឡើង​ថា ៖«យើង​មិន​រំពឹងទេ​ជា​មួយ​ដូស​ជំរុញ ថា​តើ​នឹង​មាន​ផល​ប៉ះ​ពាល់​លើ​ដំណើរ​ការ​វ៉ាក់សាំង​កូវីដ​យ៉ាង​ណា»។ ដំបូន្មាន​របស់ JCVI កើត​មាន​ចំពេល​ក្តី​បារម្ភ​កើន​ឡើង​នៅ​ក្នុង​​​រដូវកាល​​ជំងឺ​ផ្តាសាយ​ចូល​មក​ដល់​ដែល​អាច​ធ្វើ​ឲ្យ​កាន់​តែ​ធ្ងន់​ធ្ងរ​ជាង​ឆ្នាំ​មុន​ៗ ពី​ព្រោះ​ប្រព័ន្ធ​ភាព​ស៊ាំ​​​ជំងឺ​ផ្តាសាយ​នឹង​ថយ​ចុះ។

ការ​សាក​ល្បង​ដែល​បាន​ធ្វើ​ឡើង​នៅ​ទីតាំង​ទាំង​១២​របស់​សេវាសុខភាព​ជាតិ (NHS) នៅ​អង់គ្លេស និង​វែលបាន​ពិនិត្យ​មើល​ផល​ប៉ះ​ពាល់ និង​ប្រព័ន្ធ​ឆ្លើយ​តប​ភាព​ស៊ាំលើ​មនុស្ស​៦៧៩​នាក់​​ដែល​បាន​ចាក់​វ៉ាក់សាំង​កូវីដ Pfizer ឬ AstraZeneca ដូស​ទី​២នៅ​លើ​ដៃ​ម្ខាង និង​ដៃ​ម្ខាងទៀត​ចាក់​វ៉ាក់សាំង​ផ្តាយ​សាយ​៣​ម្ជុល។

អ្នក​ស្ម័គ្រ​ចិត្ត​ត្រូវ​បាន​បែង​ចែក​ជា​ពីរ​ក្រុម​​​ពោល​​គឺ​ក្រុម​អាយុ​ក្រោម​៦៥​ឆ្នាំ​មួយ និង​ក្រុម​អាយុ​លើ​​៦៥​ឆ្នាំមួយ។ ការ​ណាត់​ជួបចាក់​លើក​ទី​១ ពួក​គាត់​ចាក់​វ៉ាក់សាំង​កូវីដ និងវ៉ាក់សាំង​ផ្តាយ​សាយ ឬ​វ៉ាក់សាំងកូវីដ និង​ថ្នាំ​ព្យាបាល។ ក្រុម​វ័យ​ចាស់​ចាក់​វ៉ាក់សាំងផ្តាសាយ FluAd របស់​ក្រុម​ហ៊ុន Seqirus  ខណៈ​ក្រុម​វ័យ​ក្មេង​​​ចាក់​វ៉ាក់សាំងផ្តាយសាយ​ Flublok របស់​ក្រុម​ហ៊ុន Sanofi ឬ Flucelvax របស់​ក្រុម​ហ៊ុន Seqirus។

រយៈ​ពេល​៣​ទៅ​៤​សប្តាហ៍​ក្រោយ​មក អ្នក​ស្ម័គ្រ​ចិត្តបាន​វិល​ត្រឡប់​មកចាក់ថ្នាំ​ព្យាបាល ឬ​វ៉ាក់សាំង​ផ្តាយ​សាយ អាស្រ័យ​លើ​ពេល​វេលា​ដែល​ពួក​គេ​ខក​ខាត​កាល​ណាត់​ជួប​លើក​ទី​១។ ពីរ​ឬ​បី​សប្តាហ៍ បន្ទាប់​ពី​នោះ អ្នក​ស្ម័គ្រ​ចិត្ត​បាន​វិល​ត្រឡប់​មក​ម្តង​ទៀត​ដើម្បី​ពិភាក្សា​អំពី​ផល​ប៉ះ​ពាល់ និង​ផ្តល់​សំណាក់​ឈាម។

ប្រហែល​ជា​៣​ភាគ​៤​នៃស្ម័គ្រ​ចិត្ត​បាន​ប្រាប់​ថា ហោច​ណាស់​មាន​ផល​ប៉ះ​ពាល់​មួយ​ដូច​ជា អស់កម្លាំង ដោយ​មិន​គិត​ថា​តើ​ពួក​គេ​ចាក់​វ៉ាក់សាំង​កូវីដតែម្យ៉ាង ឬ​ចាក់​លាយ​បញ្ចូល​ជា​មួយ​វ៉ាក់សាំង​ផ្តាសាយ។ ក្នុង​ចំណោម​របាយការណ៍​កម្រ​នៃផលប៉ះ​ពាល់​ធ្ងន់​ធ្ងរ​គឺ​មាន​​តែ​ម្នាក់​គត់​​​បាន​ប្រាប់​ថា បាន​ទៅ​មន្ទីរពេទ្យដោយ​សារ​កើត​មាន​អាការឈឺ​ក្បាល​ប្រកាំង។

ពេល​សួរនៅ​ទី​បញ្ចប់​នៃ​ការ​សិក្សា អ្នក​ស្ម័គ្រ​ចិត្ត​៩៧​%​បាន​និយាយ​ថា ពួក​គេ​មាន​ឆន្ទៈ​ចាក់​វ៉ាក់សាំង​ពីរ​ក្នុង​ពេល​ណាត់​ជួប​តែមួយនា​ពេល​អនាគត។ ខណៈ​ការ​ចាក់​វ៉ាក់សាំង​កូវីដនិង​ផ្តាសាយ​នឹង​ទាម​ទារ​សម្រាប GPs អ្នក​ស្រី​វេជ្ជបណ្ឌិត Lazarus បាន​និយាយ​ថា វាទូទៅ​​​ដែល​ទទួល​ការ​ចាក់​វ៉ាក់សាំងជាង​ពីរ​​ក្នុង​ពេល​តែ​មួយ ជា​ពិសេស​សម្រាប់​កុមារ និង​ការ​ធ្វើ​ដំណើរ​ក្រៅ​ប្រទេស។ លទ្ធផល​នឹង​​ត្រូវ​បោះ​ពុម្ព​ផ្សាយ​នៅ​ទស្សនាវដ្តី Lancet៕

ប្រែ​សម្រួល៖ វីរបុត្រ
ប្រភព៖ reuters

The post អង់គ្លេស​រក​ឃើញ​ ការ​ចាក់​វ៉ាក់សាំង​កូវីដ​និង​ផ្តាសាយ​ក្នុង​ពេលតែ​មួយ​មាន​សុវត្ថិភាព appeared first on Kampuchea Thmey Daily.

សាស្រ្តាចារ្យ Dame Sarah Gilbert បាននិយាយថា “មិនមានលទ្ធភាពច្រើនទេ ដែលមេរោគនេះអាចគេចវេះពីប្រព័ន្ធភាពស៊ាំបាន ប៉ុន្តែវានៅតែជាមេរោគឆ្លង”។

លោកស្រីបន្តថា មេរោគនេះកាន់តែបន្ថយកម្លាំង នៅពេលវាសាយភាយតាមរយៈប្រជាជន។ គ្មានហេតុផលអ្វីដែលត្រូវគិតថា យើងនឹងមានមេរោគ Sars-CoV-2 version បំប្លែងខ្លួនកាន់តែច្រើនបន្ថែមទៀតនោះទេ។

នៅទីបំផុត វីរុសដែលបណ្តាលឲ្យមានជំងឺកូវីដ-១៩ នឹងដូចជាវីរុសកូរ៉ូណាដែលរីករាលដាលយ៉ាងទូលំទូលាយនិងបង្កឲ្យមានជំងឺផ្តាសាយ។

ថ្លែងក្នុងសិក្ខាសាលា Royal Society of Medicine លោកស្រី Dame Sarah បាននិយាយថា “យើងរស់នៅជាមួយមេរោគកូរ៉ូណា ៤ ប្រភេទផ្សេងគ្នាដែលយើងមិនធ្លាប់គិតរួចទៅហើយ ហើយទីបំផុត Sars-CoV-2 នឹងក្លាយជាវីរុសមួយក្នុងចំណោមនោះ។

ប៉ុន្តែគ្រាន់តែមានសំនួរថា តើយើងត្រូវចំណាយពេលយូរប៉ុនណាដើម្បីទៅដល់ទីនោះ និងត្រូវចាត់វិធានការអ្វីខ្លះ ដើម្បីគ្រប់គ្រងវាក្នុងពេលឆាប់ៗនេះ។

គួរបញ្ជាក់ថា ស្រ្តីវ័យ ៥៩ ឆ្នាំរូបនេះ បានដឹកនាំក្រុមនៅវិទ្យាស្ថាន Jenner របស់សាកលវិទ្យាល័យ Oxford ដែលបានបង្កើតវ៉ាក់សាំងការពារជំងឺកូវីដ Oxford-AstraZeneca Covid ដែលជាវ៉ាក់សាំងចែកចាយទូលំទូលាយបំផុតនៅលើពិភពលោក។

លោកស្រី Dame Sarah ក៏បានបង្ហាញផងដែរថា លោកស្រីកំពុងតស៊ូរកមូលនិធិដើម្បីជួយការពារជំងឺរាតត្បាតនាពេលអនាគត៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ បាញ់បច្ចេកវិទ្យាវ៉ាក់សាំងចូលបន្លែ យកទៅដាំដុះបរិភោគ យកឈ្នះកូវីដ

The post កូវីដ ទំនងមិនបំប្លែងខ្លួនសាហាវជាងនេះទៀតឡើយ ហើយថយកម្លាំងក្លាយជា ជំងឺផ្តាសាយធម្មតា appeared first on Kampuchea Thmey Daily.